Bilaluna Edris (Xuqal.X.Qafarey)

በአላህ ፍቃድ ቅዳሜ ዙልሒጃህ 9 እንይዛለን። ዙልሂጃ 9 ወይም የአረፋ ቀን በዱንያ ላይ ካሉ ቀናቶች ሁሉ የበለጠች ቀን ናት።

ሑጃጅ ዐረፋ ላይ የሚቆሙበት ቀን እንደመሆኑም ይህ እለት የዐረፋ ቀን ይባላል። ዐረፋ ላይ መቆም ከሐጅ ምሰሶዎች ውስጥ አንድ ምሰሶ ነው።

ነብዩ ﷺ “ሐጅ ማለት ዐረፋ ነው” ማለታቸው ይህንን እውነታ ያሳያል።

በዚህ ቀን አላህ የወፈቃቸው ሑጃጆች ሱብሕን ሚና ላይ ከሰገዱ በኋላ ፀሐይ ስትወጣ ተልቢያ፣ ዚክር እያደረጉ ወደ ዐረፋ ለኢባዳቸው ይጓዛሉ።

አላህ የሚመጣውን ሀጅ ይወፍቀን እና እንደኛ ይሄን ቦታ ለኢባዳ መዘየር ያልቻለ ምን ያድርግ፦

1ኛ. እለቱን በፆም ያሳልፍ

ይህን ቀን መፆም ያለውን ምንዳ አስመልክቶ የአላህ መልዕክተኛ(ሰዐወ) እንዲህ ብለዋል፦

"የዐረፋ እለት የፆመ ሰው ያለፈውን አንድ አመት እና የሚመጣውን የአንድ አመት ወንጀሉን ያስምረታል ብየ እከጅላለሁ" ማለታቸው ተዘግቧል። (ሙስሊም)

2ተኛ. በዱዐ ይበራታ

የአላህ መልዕክተኛ(ሰ•ዐ•ወ) "በላጩ እና ምርጡ ዱዓ በአረፋ ቀን ውስጥ የተደረገ ዱዓ ነው"ብለዋል።(ቲርሙዚ ዘግበውታል)

በዚህ ቀን የትኛው ዱዐ ነው ይበልጥ ተወዳጅ ?

ነብዩ ﷺ እንዲህ አሉ፦ እኔም ከእኔ በፊትም የነበሩት ነብያት በዚህ ቀን የምንለው ይህን ዱዐ ነው ብለዋል።

لا إِلَهَ إِلَّا اللهُ وَحْدَهُ لا شَرِيكَ لَهُ، لَهُ الْمُلْكُ وَلَهُ الْحَمْدُ وَهُوَ عَلَى كُلِّ شَيْءٍ قَدِيرُ،

ከአላህ በቀር ሌላ አምላክ የለም። አንድ ነው። አጋርም የለውም። ስልጣን የርሱ ብቻ ነው። ምስጋናም የሚገባው ለርሱ ብቻ ነው።

በተቻለን መጠን ከዙሁር ቡሃላ አፋችንን በዚህ ዱዐ ልንጠምዳት ይገባል።

3ተኛ. ሰደቃ መስጠት

ሰደቃ የተዘጋ ሲሳይን ትከፍታለች፣ የመጣ በላዕ ታባርራለች፣ ከእሳት ቅጣት ትከላከላለች፣ ድብቅ ወንጀልን ታባርራለች፣ በዚህ ታላቅ ቀን እጃችን ላይ ባለው ነገር ከመልካም ንግግር ጀምረን ሰደቃ ልናረግ የተገባ ነው።

4ተኛ. እውነተኛ ተውበትን ማድረግ

ረሱል (ሰ•ዐ•ወ) "አላህ (ሱ•ወ) ባሪያውን ከእሳት ነፃ የሚያወጣበት ቀን ከአረፋ ቀን በላይ የለም" ማለታቸው በሙሰሊም ተዘግቧል። እኛም በዚህ ቀን አላህ (ሱ•ወ) ከእስት ነጃ ካላቸው ሰዎች ያደርገን ዘንድ ፤ ለክብሩ ተናንሰን፣ ለትእዛዙ እጅ ሰተን፣ ከልባችን እያለቀስን መሃርታውን ይቅር ባይነቱን እንዲሰጠን እየለመንን ከሰራናቸው ወንጀሎች በመጸጸት ወደ አላህ (ሱ•ወ) መመለስ ይገባናል።

አላህ (ሱ•ወ) እንዲህ ብሏል፦

ምእምናኖች ሆይ! ትድኑ ዘንድ ሁላችሁም ወደ አላህ (በመመለስ) ተጸጸቱ። [ሱረቱል-ኑር-31]

5ተኛ. ከወንጀል መራቅ

የአላህን ትእዛዛት መፈጸም ወደርሱ እንደሚያቃርብ ሁሉ የከለከላቸውን እና እርም ያደረጋቸውን ነገሮች መዳፈር ከርሱ መራቅን እና ከእዝነቱ ለመባረር ምክንያቶች ናቸውና በዚህም ቀን ሆነ በሌሎች ቀናት ከወንጀል መራቅ ግድ ይለናል።

ቁርአንን መቅራት፣ ሱና ሰላቶችን መስገድ፣ አላህን ማውሳት (ዚክር ማድረግ)፣ ወላጆችን መርዳት፣ ድሆችን መመገብ፣ ዱዓን ማብዛት፣ የታሰረን ወይም የታመመን ሰው መጠየቅ፣ ዝምድናን መቀጠል በዚህ ቀናት ልናረጋቸው የምንችላቸው መልካም ስራዎች ናቸው።

ከሁሉም በላይ አላህ አዋቂ ነው።

ለተጨማሪ መረጃ ፣ የቴሌግራም ቻናሌን follow ያድርጉ
@ https://t.me/Xuqal