#قصص_الأنبياء(٢)
#السيرة_النبوية
#الحلقة_مائتين_وخمسة
#أحداث_السنة_التاسعة_من_الهجرة
#منع_زواج_علي_من_ابنة_أبي_جهل

هنتكلم النهاردة إن شاء الله عن قصة منع رسول الله ﷺ لعلي بن أبي طالب من إنه يتزوج بنت أبي جهل👌
علي بن أبي طالب هو زوج فاطمة بنت رسول الله ﷺ زي ماحنا عارفين،
وكمان احنا عارفين إن في زمن رسول الله ﷺ وقبل حتى زمن رسول الله ﷺ تعدد الزوجات كان شيء عادي جدا💁‍♂️
يعني الرجل كان ممكن يبقى عنده تسع زوجات وأكثر كمان ومفيش أي مشكلة، وده كان قبل الإسلام،
أما بعد الإسلام فتعدد الزوجات اتحدد بأربع زوجات فقط ما عدا ما كان في حق رسول الله ﷺ وإنه وضعه كان حاجة خاصة بيه،
فالصحابة كان فيهم إللي عنده زوجة واحدة أو اثنين أو ثلاثة أو حتى أربعة،
علي بن أبي طالب كان متزوج من فاطمة فقط ومكنش عنده زوجة تانية، فكان عايز يتزوج من امرأة تانية فخطب بنت أبي جهل،
فلما فاطمة عرفت راحت لرسول الله ﷺ وقالت له:
"إِنَّ قَوْمَكَ يَتَحَدَّثُونَ أَنَّكَ لَا تَغْضَبُ لِبَنَاتِكَ، وَهَذَا عَلِيٌّ نَاكِحًا ابْنَةَ أَبِي جَهْلٍ"
يعني بتقول لرسول الله ﷺ إن الناس بيقولوا إنك مش بتغضب لبناتك لو حد آذاهم، وعلي هيتزوج بنت أبي جهل ودي حاجة تؤذي فاطمة،
وكان بعد ما علي خطب بنت أبي جهل جاء لرسول الله ﷺ بني هشام بن المغيرة إللي همّ قوم أبي جهل يستأذنوا رسول الله ﷺ إنهم يزوّجوا ابنتهم لعلي بن أبي طالب،
فقام رسول الله ﷺ يخطب في الناس وقال لهم:
"إنَّ بَنِي هِشَامِ بنِ المُغِيرَةِ اسْتَأْذَنُوا في أنْ يُنْكِحُوا ابْنَتَهُمْ عَلِيَّ بنَ أبِي طَالِبٍ،
فلا آذَنُ، ثُمَّ لا آذَنُ، ثُمَّ لا آذَنُ، إلَّا أنْ يُرِيدَ ابنُ أبِي طَالِبٍ أنْ يُطَلِّقَ ابْنَتي ويَنْكِحَ ابْنَتَهُمْ"
يعني رسول الله ﷺ بيقول إن أهل بنت أبي جهل استأذنوا رسول الله ﷺ إنهم يزوجوا بنتهم لعلي لكن رسول الله ﷺ رفض تماااما إلا بشرط وهو إن علي رضي الله عنه يطلق فاطمة ويتزوج ابنتهم،
وقال رسول الله ﷺ:
"فَإِنِّي أَنْكَحْتُ أَبَا الْعَاصِ بْنَ الرَّبِيعِ فَحَدَّثَنِي فَصَدَقَنِي، وَوَعَدَنِي فَوَفَى لِي، وإِنَّمَا فَاطِمَةُ بَضْعَةٌ مِنِّي يُؤْذِينِي مَا آذَاهَا
وإني لستُ أُحرّمُ حلالاُ، ولكن وَاللَّهِ لَا تَجْتَمِعُ بِنْتُ رَسُولِ اللَّهِ وَبِنْتُ عَدُوِّ اللَّهِ عِنْدَ رَجُلٍ وَاحِدٍ أَبَدًا،
وإِنَّ فَاطِمَةَ مِنِّي، وَإِنِّي أَتَخَوَّفُ أَنْ تُفْتَنَ فِي دِينِهَا"

يعني رسول الله ﷺ بيقول إنه زوّج بنته زينب لأبي العاص بن الربيع وكان عاهده إنه يحسن إليها ويرعاها ولا يؤذيها بأي طريقة، فوَفّى أبو العاص بعهده مع رسول الله ﷺ،
حتى إن قريش كانت طلبت من أبي العاص إنه يطلق زينب بنت رسول الله ﷺ بعد النبوة زي ما عمل أبناء أبي لهب لكن أبو العاصِ رفض،
واحنا اتكلمنا بالتفصيل عن الموضوع ده قبل كده وحكينا قصة زينب مع أبي العاص😁
فدلوقتي علي عايز يتزوج بنت أبي جهل ودي حاجة تؤذي فاطمة وهي أحب بنات رسول الله ﷺ إليه وأي حاجة تؤذيها بتؤذي رسول الله ﷺ، وأذية رسول الله ﷺ محرمة👌

ورسول الله ﷺ بيقول إنه لا يحرّم حلال، يعني التعدد ربنا شرعه وهو مباح لكن في أسباب منعت زواج علي من بنت أبي جهل، هم أربعة أسباب:
◇السبب الأول:
لا تجتمع بنت رسول الله ﷺ وبنت عدو الله في عصمة رجل واحد،
ولو تفتكروا العداء إللي كان بين رسول الله ﷺ وبين أبي جهل وكم المحاولات إللي أبو جهل حاول فيها يقتل رسول الله ﷺ وفي الآخر فشل،
ده غير إن أبا جهل كان بينتهز أي فرصة عشان يؤذي رسول الله ﷺ بأي طريقة،
كل ده وفاطمة رضي الله عنها شايفة وعارفة، وبنت أبي جهل استمرت على الكفر لحد فتح مكة، وأسلمت بعد الفتح،
فخلال السموات دي كلها قبل إسلامها كان في قلبها الكُره لرسول الله ﷺ وللإسلام،
فإزاي تتساوى بنت رسول الله ﷺ سيدة نساء العالمين مع ابنة فرعون هذه الأمة كما قيل عن أبي جهل وإن كان الحديث فيه ضعف،
لكن هو عدو الله بدون أدنى أشك وكمان أشد الناس عداوة لرسول الله ﷺ👌
أيوة الإسلام يمسح كل إللي قبله لكن يستحيل هم الاتنين يتساووا في المنزلة،
يعني ربنا نفسه بيقول:
"لَا يَسْتَوِي مِنكُم مَّنْ أَنفَقَ مِن قَبْلِ الْفَتْحِ وَقَاتَلَ ۚ أُولَٰئِكَ أَعْظَمُ دَرَجَةً مِّنَ الَّذِينَ أَنفَقُوا مِن بَعْدُ وَقَاتَلُوا"
يعني إللي أسلموا قبل فتح مكة وقاتلوا يستحيل تتساوى منزلتهم من إللي أنفقوا من بعد فتح ومكة وجاهدوا،
إللي أنفقوا وجاهدوا قبل فتح مكة أعظم درجة،
وخلونا منطقيين يا جماعة مين تقبل إن زوجها يتزوج امرأة أبوها كان أشد الناس عداوة لأبو الزوجة الأولى وحاول يقتله أكثر من مرة😑

◇وده هياخدنا للسبب التاني وهو قول رسول الله ﷺ:
"إِنَّ فَاطِمَةَ مِنِّي، وَإِنِّي أَتَخَوَّفُ أَنْ تُفْتَنَ فِي دِينِهَا"
يعني رسول الله ﷺ خايف إن فاطمة تفتن في دينها بسبب الغيرة،
يعني هو خاف أن تدفعها الغيرة لفعل ما لا يليق بحالها ومنزلتها وهي سيدة نساء العالمين،
واحنا عارفين إن الغيرة من طبع المرأة، فتخيلوا

#قصص_الأنبياء(٢)
#السيرة_النبوية
#الحلقة_مائتين_وستة
#أحداث_السنة_التاسعة_من_الهجرة
#موت_عبد_الله_بن_أُبيّ_بن_سلول

هنكمل الكلام النهاردة إن شاء الله عن باقي الأحداث إللي حصلت في السنة التاسعة من الهجرة،
لكن قبل ما نتكلم عن الأحداث دي في سؤال اتكرر عن الجزء إللي فات،
فاحنا هنرد عليه الأول عشان الكل يستفيد،
السؤال بيقول:
هل رسول الله ﷺ كان هيوافق إن علي يتزوج امرأة أخرى مادام هي مش بنت أبي جهل؟
ولّا رسول الله ﷺ معترض أصلا إن علي رضي الله عنه يتزوج من أي امرأة على فاطمة، يعني رسول الله ﷺ رافض إن علي يتزوج على بنته أيا كان هي مين🤔

شوفوا،
لو كان علي تزوج امرأة تانية غير بنت أبي جهل مكنش رسول الله ﷺ هيعترض نهائي؛ لأن ده ظاهر الحديث،
رسول الله ﷺ بيقول:
"وإني لستُ أُحرّمُ حلالاُ، ولكن وَاللَّهِ لَا تَجْتَمِعُ بِنْتُ رَسُولِ اللَّهِ وَبِنْتُ عَدُوِّ اللَّهِ عِنْدَ رَجُلٍ وَاحِدٍ أَبَدًا"
يعني رسول الله ﷺ معندوش أي مانع إن علي يتزوج بأي امرأة أخرى ما عدا ابنة أبي جهل،
فهو ﷺ لا يحرم حلال، يعني موافق إن علي يتزوج زوجة تانية عادي، لكن مش بنت أبي جهل👌
في قول تاني بقى بيقول إن عدم الزواج بأخرى دي حاجة خاصة ببنات رسول الله ﷺ،
يعني مينفعش حد من أزواج بنات رسول الله ﷺ يتزوج عليهن،
والكلام ده معلهوش أي دليل، الدليل الظاهر الواضح من كلام رسول الله ﷺ إنه معندوش أي اعتراض على زواج علي من امرأة تانية ماعدا ابنة أبي جهل عشان الأسباب إللي قلناها المرة إللي فاتت👌

نرجع بقى للكلام عن الأحداث في السنة التاسعة من الهجرة،
بعد غزوة تبوك،
في السنة التاسعة في شهر رمضان مات النجاشي أَصْحمة،
قال رسول الله ﷺ:
"مَاتَ الْيَوْمَ رَجُلٌ صَالِحٌ فَقُومُوا فَصَلُّوا عَلَى أَخِيكُمْ أَصْحَمَةَ"
واحنا اتكلمنا عن النجاشي قبل كده وشوفنا إزاي كان بيساعد المسلمين وعرفنا قصة إسلامه وشوفنا إزاي إن عمرو بن العاص رضي الله عنه أسلم على يده،
فلما مات النجاشي جاء جبريل وأخبر رسول الله ﷺ عن موته، فجمع رسول الله ﷺ الصحابة وأخبرهم عن موته وصلوا عليه صلاة الغائب لأن مكنش في حد هناك في الحبشة يصلي عليه، رحمه الله ورضي الله عنه.

مين كمان مات في السنة التاسعة من الهجرة بعد غزوة تبوك؟
رأس المنافقين عبد الله بن أبي بن سلول😬
وموت عبد الله بن أبي بن سلول هو ضربة قاصمة للمنافقين في المدينة،
وخصوصا بعد فضحهم في غزوة تبوك وحرق مسجد الضرار إللي كانوا بنوه،
وطبعا احنا مش ناسيين تاريخ ابن سلول الأسود على مدار تسع سنين من ساعة ما رسول الله ﷺ دخل المدينة،
وانسحابه في غزوة أحد وتعديه على عرض رسول الله ﷺ،
وغيرها وغيرها من الأحداث،
لكن لكل شيء نهاية، جاءت لحظة الموت إللي محدش هيهرب منها ومفيش حاجة هتنفع الإنسان ساعتها غير إيمانه بالله👌
عبد الله بن أبي بن سلول مرض قبل موته، وقعد في المرض عشرين يوم، وكان ده في شهر شوال،
العجيب بقى إن رسول الله ﷺ خلال فترة مرض عبد الله بن أبي بن سلول كان بيروح يزوره بالرغم الكوارث إللي ابن سلول عملها😶
وزيارة رسول الله ﷺ لعبد الله بن أبي بن سلول كان لها أهداف هي:
◇أولا:
إن رسول الله ﷺ ما زال يرجو إسلام عبد الله بن أُبي بن سلول،
يعني هو معاه لآخر لحظة يمكن ربنا يهديه،
واحنا عارفين أد إيه رسول الله ﷺ كان حريص جدا على هداية الناس مهما بلغ أذاهم له ﷺ،
والقلوب بين أصابع الله يقلبها كيف يشاء، واحنا شوفنا قبل كده الغلام اليهودي إللي أسلم وهو في مرض الموت،
فرسول الله ﷺ متمسك بآخر أمل لعله يكون سبب في نجاة ابن سلول من النار.

☆وهنا رسول الله ﷺ بيضرب لنا أروع الأمثال في الدعوة، وإننا نكون حريصين على نجاة الناس من النار مهما عملوا،
ورسول الله ﷺ لم يُظهر التشفّي لعبد الله بن أبي بن سلول مع إن الموقف ده يريح القلوب لأن ابن سلول أخيرا هياخد جزاؤه بعد إللي عمله ده كله،
لكن الهدف والغاية مكنتش الانتقام والتشفي أد ماهي كانت محاولة لهداية الإنسان ده وإنقاذه من النار👌

¤طبعا يا جماعة ده لا يتعارض مع الفرح بهلاك الظالمين والكفرة الفجرة المحاربين لله ورسوله،
دي حاجة ودي حاجة، احنا بنبقى حريصين على هداية الناس لأقصى درجة زي رسول الله ﷺ كده، لكن لو ماتوا على ظلمهم وطغيانهم وكفرهم بنفرح طبعا إن ربنا خلصنا منهم ومن شرهم👌

◇الهدف الثاني لزيارة رسول الله ﷺ لعبد الله بن أبي بن سلول:
إن رسول الله ﷺ كان عايز يتألف قلوب قومه؛ فعبد الله بن أُبيّ زعيم من زعماء الخزرج، وأتباعه وأحبابه وإللي بيستمعوا لرأيه كثير،
فممكن يتأثروا تأثير إيجابي لما يشوفوا رسول الله ﷺ بيزوره وبيعامله بالرفق والحسنى، على الرغم من الأذى إللي ابن سلول سبّبه لرسول الله ﷺ والكل كان عارفه👌

◇الهدف الثالث:
رسول الله ﷺ كان عايز يرفع من قيمة عبد الله بن عبد الله بن أُبي بن سلول، وهو من سادات وفضلاء الصحابة، ومن الصحابة إللي أثبتوا إخلاصهم وتجردهم لله ومن إللي ساهموا بشكل إيجابي في نصرة الإسلام وفي خدمة الدولة الإسلامية،

#قصص_الأنبياء(٢)
#السيرة_النبوية
#الحلقة_مائتين_وسبعة
#أحداث_السنة_التاسعة_من_الهجرة
#إسلام_ثقيف_وهدم_الرّبّة_أو_اللّات

وقفنا المرة إللي فاتت عند مجيء وفد ثقيف للمدينة عشان يعلنوا إسلامهم،
لكن ثقيف مكنوش عايزين يدخلوا في الإسلام عشان مقتنعين بيه أو حابينه مثلا😅
وضعهم وأحوالهم همّ إللي اضطروهم للدخول في الإسلام👌

☆إيه إللي حصل معاهم بقى واضطرهم للدخول في الإسلام🤔
◇أولاً:
معظم القبائل العربية الكبرى دخلوا في الإسلام، ومن القبائل دي فرع عَيْلان إللي كان بينتمى له أهم ثلاثة قبائل:
《غَطَفَان، وبنو سُلَيم، وهوازن》
واحنا اتكلمنا عن التقسيمة دي بالتفصيل في الجزء المائة وواحد وسبعون،
فمتبقّاش من هوازن غير فرع ثقيف هو إللي لسه مدخلش في الإسلام،
وكده ثقيف بقت لوحدها وهي معندهاش القدرة على حرب وقتال كل قبائل العرب😕

◇ثانياً:
مالك بن عوف كان محاصر الطائف هو وقبيلته هوازن بعد ما أسلموا فبقى في تضييق عليهم جامد، وطبعا ده أدى للسبب الثالث وهو:

◇سوء الأحوال الاقتصادية في الطائف بسبب الحصار وفقدت الطائف مكانتها التجارية؛ لأنها بقت مكان غير آمن، ولا يطمئن إليه عامة تجار العرب.

◇رابعاً:
فقدت ثقيف أحد زعمائها المعدودين وهو عروة بن مسعود الثقفي، ومش بعيد إنها تفقد رجالها واحد ورا التاني.

فقررت ثقيف إنهم يرسلوا وفد إلى رسول الله ﷺ مكون من ستة أشخاص، وفي رواية كانوا أكثر من عشرة، عشان يعلنوا إسلامهم وإسلام ثقيف بين يدي رسول الله ﷺ،
كان مين بقى على رأس الوفد ده🤭
عبد يَالِيل، فاكرينه😅
إللي كان استهزأ برسول الله ﷺ لما رسول الله ﷺ راح للطائف وقاله:
ده أنا أقطع أستار الكعبة لو ربنا أرسلك، واحنا اتكلمنا عن الموضوع بالتفصيل في الجزء الثامن والعشرين،
دلوقتي بقى هو جاي بعد السنين دي كووولها عشان يسلم😈
شوفتوا الأوضاع بتتبدل إزاي ومفيش حاجة بتفضل على حالها👌
هل عبد ياليل كان يتصور في يوم من الأيام إن محمد ﷺ إللي أظهر له العداء وسخر منه هييجي عليه اليوم ويبقى هو الزعيم وعبد ياليل نفسه يكون تابع له😏
"إِنَّهُ مَن يَتَّقِ وَيَصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ"👌

جاء الوفد ودخلوا على رسول الله ﷺ فاستقبلهم رسول الله ﷺ استقبال طيب يليق به كنبي، وعمل لهم خيمة في المسجد عشان يشوفوا أحوال المسلمين ويتعلموا من خطب رسول الله ﷺ،
ولم يُذكّرهم رسول الله ﷺ أبدا باللي عملوه معاه لما راح يدعو في الطائف قبل الهجرة للمدينة،
لما قعدوا مع رسول الله ﷺ عشان يُسلموا اشترطوا عليه شروط، قالوا لرسول الله ﷺ:
احنا هندخل في الإسلام يا رسول الله بس بشرط إنك تأذن لنا في الزنا؛ لأن احنا بنسافر أماكن بعيدة وبنبعد عن أهلنا، فلابد لنا من الزنا😕
فقال لهم رسول الله ﷺ:
هو عليكم حرام👌
إن الله عز وجل يقول:
"وَلا تَقْرَبُوا الزِّنَى إِنَّهُ كَانَ فَاحِشَةً وَسَاءَ سَبِيلًا"
يعني رسول الله ﷺ بيقول لهم ده حد من حدود الله ولا يمكن أبداً التنازل عنه،
مع إن إسلام ثقيف هيبقى إضافة كبيرة جدا للدولة الإسلامية، ورسول الله ﷺ كان ممكن في البداية بس يقولهم ادخلوا وبعدين نبقى نشوف الموضوع بعدين،
لكن رسول الله ﷺ من البداية كده بيوضح لهم إن هي دي شريعة الإسلام عاجبكم على كده أهلا وسهلا مش عاجبكم انتم حرين، احنا مش بنفصّل الدين على مزاج الناس وأهواؤهم😒
ده دين، لا يجوز إننا نفرط حتى في أمر واحد من أوامر ربنا👌
فلقوا رسول الله ﷺ مصمم ومفيش أي مجال يقنعوه، فدخلوا في الشرط التاني، قالوا له:
أفرأيت الربا؛ فإنه أموالنا كلها؟
يعني احنا أموالنا كلها من الربا مش هينفع تقولنا الربا حرام ومتتعاملوش بالربا، فانت تخلي لنا الربا حلال.

قال لهم رسول الله ﷺ :
لكم رؤوس أموالكم، فإن الله تعالى يقول:
"يَا أَيُّهَا الَّذِينَ آمَنُوا اتَّقُوا اللَّهَ وَذَرُوا مَا بَقِيَ مِنَ الرِّبَا إِنْ كُنتُمْ مُؤْمِنِينَ"
يعني تاخدوا رأس المال بس إللي بدأتوا بيه الربا، أما أي زيادة عليه فهي محرمة، لازم تتخلصوا منها،
فقال زعيمهم عبد ياليل:
أفرأيت الخمر؛ فإنه عصير أرضنا لا بد لنا منه؟
يعني الخمر بقى مفيش فيها مجال ولازم نشربها، ده احنا إللي بننتجها،
طبعا واضح إنهم مش عايزين يسلموا رغبة في الإسلام لكن الظروف هي إللي دفعتهم لكده😅
قال رسول الله ﷺ:
إن الله قد حرمها. وقرأ عليهم:
"يَا أَيُّهَا الَّذِينَ آمَنُوا إِنَّمَا الْخَمْرُ وَالْمَيْسِرُ وَالأَنصَابُ وَالأَزْلامُ رِجْسٌ مِنْ عَمَلِ الشَّيْطَانِ فَاجْتَنِبُوهُ لَعَلَّكُمْ تُفْلِحُونَ"

حاول وفد ثقيف إنهم يقنعوا رسول الله ﷺ إنه يحذف لهم الثلاثة أمور دي من الإسلام لكن رسول الله ﷺ كان واضح تمام الوضوح، وكان حازماً تمام الحزم،
مفيش مساومة في الدين، ولا إننا نلتقي في منتصف الطريق إذا كان الأمر يخص العقيدة والحلال والحرام،
ولم يسعَ إلى تأليف قلوبهم عن طريق حذف أو تبديل في الشريعة زي ما للأسف ناس كتير بتعمل دلوقتي بحجة تأليف القلوب وتحبيب غير المسلمين في الإسل

#قصص_الأنبياء(٢)
#السيرة_النبوية
#الحلقة_مائتين_وثمانية
#أحداث_السنة_التاسعة_من_الهجرة
#وفد_ضِمَام_بن_ثَعْلبة

رجعنا بفضل الله للسيرة من تاني، كل عام أنتم بخير وعافية في الدين والدنيا يارب وتقبل الله منا ومنكم صالح الأعمال 😊🤲
كنا اتكلمنا قبل الانقطاع عن وفد ثقيف إللي جاء وأعلن إسلامه وعرفنا قصتهم كاملة،
قبل ما نتكلم عن الوفد الثاني من الوفود المهمة إللي جاء لرسول الله ﷺ عايزين نعرف حصل إيه مع وحشي بن حرب،
لو تفتكروا كنت قلت لكم في الجزء المائة وخمسة وستين إن رسول الله ﷺ أهدر دم مجموعة من الناس وأمر بقتلهم لما دخل مكة في عام الفتح،
وكان منهم وحشي بن حرب قاتل حمزة، ووحشي ساعتها كان هرب من مكة إلى الطائف لما عرف إن جيش المسلمين داخل مكة خلاص،
فلما ثقيف قررت إنها تدخل في الإسلام؛ وحشي لقى نفسه ملوش مكان يلجأ له😕
فخرج وحشي مع وفد ثقيف لرسول الله ﷺ عشان يُسلم،
فلما رآه رسول الله ﷺ قال له:
آنْتَ وَحْشِيٌّ؟
فقال وحشي: نَعَمْ.
فقَالَ رسول الله ﷺ له: أَنْتَ قَتَلْتَ حَمْزَةَ؟
فقال وحشي:
قَدْ كَانَ مِنَ الأَمْرِ مَا بَلَغَكَ.
يعني إللي انت عارفه هو إللي حصل وأنا قتلته فعلا،
فقَالَ له رسول الله ﷺ:
فَهَلْ تَسْتَطِيعُ أَنْ تُغَيِّبَ وَجْهَكَ عَنِّي؟
يعني رسول الله ﷺ مكنش عايز يشوف وحشي؛ لأن كل ما هيشوفه هيفتكر مقتل حمزة ودي حاجة تؤذي رسول الله ﷺ،
ودي مشاعر طبيعية يا جماعة، يعني من الطبيعة البشرية إن الواحد يكره يشوف الشخص إللي آذى قريبه أو آذى حد بيحبه، ومش شرط وقوع الهجرة المنهية بينهما،
يعني في الموقف ده مفهوش المشاحنة ولا الخصام ولا الهجر إللي ربنا نهى عنه،
الموضوع وما فيه رسول الله ﷺ بيتجنب إنه يشوف وحشي، لكن لو شافه أو جاء يسأله عن شيء أكيد هيرد عليه،
وخصوصا أصلا إن وحشي رضي الله عنه أسلم، والإسلام يمسح ما قبله، وفي رواية بتقول إن لما وحشي جاء للمدينة الصحابة قالوا لرسول الله ﷺ:
هذا وحشي!
يعني الرجل إللي قتل حمزة بقى في إيدنا وممكن نقتله وننتقم لمقتل حمزة،
لكن رسول الله ﷺ قال لهم:
"دعُوه فَلَإِسلام رجلٍ واحدٍ أحبّ إليّ مِن قتْل ألف كافر"
يعني المسألة مش مسألة انتقام، هو أسلم، خلاص انتهى الموضوع بقى وربنا مش هيحاسبه عليه🤷‍♂️

فلما وحشي سمع رسول الله ﷺ بيطلب منه إنه يتجنبه خرج من عنده وعاش وحشي في المدينة وكان حريص إنه ميخليش رسول الله ﷺ يشوفه، يعني مثلا مكنش يعدي من أمام رسول الله ﷺ ولا حتى عينه تقع عليه، فما رآه حتى مات ﷺ👌
وبعد كده وحشي قتل مسيلمة الكذاب زي ما هنشوف بعدين إن شاء الله إذا كان في العمر بقية😊

نرجع بقى للكلام عن الوفود، معانا النهاردة وفد تاني مهم، الوفد ده كان وفد غريب عجيب شوية😅
الوفد ده مكون من رجل واحد فقط، ومع إنه رجل واحد فقط لكن كان نفعه عظيم جدا،
حتى عبد الله بن عباس رضي الله عنه بيقول:
ما سمعنا بوافدِ قومٍ كان أفضل من هذا الوافد،
يعني احنا مسمعناش عن حد أرسله قومه أفضل من الوافد ده👌
طيب ليه عبد الله بن عباس قال كده🤔
شوفوا الأحداث واحكموا بنفسكم👌
بنو سعد بن بكر اختاروا واحد منهم عشان يأتي لرسول الله ﷺ ويسألوه عن الإسلام، فاختاروا واحد اسمه:
《ضِمَام بن ثَعْلبة》
وكان ضِمَام رجل حكيم وقوي، فتوجه ضِمَام للمدينة ولما وصل أَنَاخَ بعيرَه، يعني قعّد بعيره على الأرض ونزل من عليه وربط البعير على باب المسجد ودخل للقاء رسول الله ﷺ،
ضِمَام ميعرفش رسول الله ﷺ ولا عمره شافه،
فدخل المسجد لقى مجموعة رجال قاعدين، مفيش واحد منهم متميّز عن التاني، فسأل ضِمَام كده على طول وش، من غير سلام وكلام:
أَيكم ابنُ عبد المطلب؟
يعني هو بيسأل عن رسول الله ﷺ، ورسول الله ﷺ قاعد وسطهم محدش يقدر يميّزه من بينهم لا بملابس ولا بمكان جلوسه، وده من تواضعه ﷺ،
فقال رسول الله ﷺ:
"أَنَا ابْنُ عَبْدِ الْمُطَّلِبِ"
فقال ضِمَام:
"يَا ابْنَ عَبْدِ الْمُطَّلِبِ، إِنِّي سَائِلُكَ وَمُغْلِظٌ عَلَيْكَ فِي الْمَسْأَلَةِ، فَلَا تَجِدَنَّ فِي نَفْسَكَ"
يعني بيقول لرسول الله ﷺ إنه عنده أسئلة عايز يعرف إجابتها، وهو بيتكلم بأسلوب فيه شدة وحِدّة فبيطلب من رسول الله ﷺ إنه ميزعلش منه ومن أسلوبه وكلامه،
فقال له رسول الله ﷺ:
"لاَ أَجِدُ فِي نَفْسِي، سَلْ عَمَّا بَدَا لَكَ"
يعني متقلقش اسأل زي مانت عايز مش هزعل،
فقال ضِمَام:
أَنْشُدُكَ بِاللَّه إِلَهَكَ وإِلَهِ مَنْ كَانَ قَبْلَكَ وَإِلَهِ مَنْ هُوَ كَائِنٌ بَعْدَك، آللَّه بَعَثَكَ إِلَيْنَا رَسُولًا؟!!
يعني بيحلّفه بالله ربه ورب كل شيء من قبل رسول الله ﷺ ورب كل شيء من بعد رسول الله ﷺ هل الله فعلا أرسله رسول؟
وهو بيشدد عليه في القَسَم كده عشان يحفز رسول الله ﷺ إنه يكون صادق معاه،
زي كده لما واحد بيقول للتاني بالله عليك تقول لي الحقيقة وخليك صادق معايا،
وكمان فيها تخويف، يعني خد بالك إللي خلق إللي قبلك وإللي هيخلق إللي بعدك مينفعش تكذب عليه👌
فرسول الله ﷺ رد عليه بكل هدوء وثقة:
"اللَّهُمَّ نَعَمْ"🤚
فقال

#قصص_الأنبياء(٢)
#السيرة_النبوية
#الحلقة_مائتين_وتسعة
#أحداث_السنة_التاسعة_من_الهجرة
#وفد_نصارى_نجران_والمُبَاهَلَة

اتكلمنا المرة إللي فاتت عن وفد نصارى نجران ووقفنا عند نزول آية المُبَاهَلَة، إللي هي:
" فَمَنْ حَاجَّكَ فِيهِ مِن بَعْدِ مَا جَاءَكَ مِنَ الْعِلْمِ فَقُلْ تَعَالَوْا نَدْعُ أَبْنَاءَنَا وَأَبْنَاءَكُمْ وَنِسَاءَنَا وَنِسَاءَكُمْ وَأَنفُسَنَا وَأَنفُسَكُمْ ثُمَّ نَبْتَهِلْ فَنَجْعَل لَّعْنَتَ اللَّهِ عَلَى الْكَاذِبِينَ"
يعني ربنا بيقول لرسول الله ﷺ إللي هيجادلك في عيسى بعد ما بيّنت له ووضحت له الحق بالدليل القطعي؛ قول له تعال وهات أهلك وأبناءك، وأنا هجيب أهلي وأبنائي وهنقف قصاد بعض ندعي ربنا إنه ينزل عقوبته ولعنته على إللي بيكذب فينا في شأن عيسى عليه السلام،
يعني رسول الله ﷺ بيقول إن عيسى عبد الله ورسوله، ووفد النصارى بيقولوا إن عيسى إله وابن إله، فالكاذب هو إللي هتنزل عليه لعنة الله، يعني بمجرد ما هنبتهل هتنزل اللعنة مباشرة👌
فوافق وفد نصارى نجران على المباهلة،
الطبيعي إنهم لو واثقين في نفسهم ومتأكدين إنهم على حق ومن إن محمد ﷺ مش رسول وبيدعي النبوة مش هيخافوا أبدا من المباهلة دي، وهيدخلوا فيها بقلب جامد💁‍♂️
تاني يوم جاء رسول الله ﷺ بعلي بن أبي طالب وفاطمة والحسن والحسين وقال لهم:
"اللهم هؤلاء أهلي"
وبدأ يستعد للدعاء وقالهم لما أَدعُوا أمّنُوا على دعائي،
فلما شاف الوفد إن رسول الله ﷺ جاد في موضوع المُبَاهَلَة خافوا واجتمعوا مع بعض وكان في واحد منهم اسمه السَّيِّدُ وده كان رئيسَهم، وواحد تاني اسمه العاقبُ وده كان صاحب مَشورَتِهم، يعني إللي بيقول لهم عليه بيعملوه فالسيد والعاقب مِن أكابِرِ نصارى نَجْرانَ وحكَّامِهم،
فقالَ أحَدُهُما لِصاحِبِهِ: "
لا تَفْعَلْ، فَواللَّهِ لَئِنْ كانَ نَبِيًّا فَلاعَنَّا لا نُفْلِحُ نَحْنُ، ولا عَقِبُنا مِن بَعْدِنا"
يعني واحد من أكابر النصارى الاتنين دول قال للتاني بلاش موضوع المباهلة ده لأنه لو كان فعلا نبي واللعنة نزلت علينا يبقى ضعنا خلاص احنا وذريتنا من بعدنا👌
فرفضوا إنهم يباهلوا رسول الله ﷺ وطلبوا منه إنه يحكم فيهم، فصالحهم رسول الله ﷺ على إنهم يدفعوا الجزية،
ولو فعلا كانوا باهلوا رسول الله ﷺ كان ربنا هيهلك أهلهم وأموالهم زي ما رسول الله ﷺ قال:
" ولو خرَجَ الذين يُباهِلونَ رسولَ اللهِ ﷺ لرَجَعوا لا يجِدونَ مالًا ولا أهلًا"

لما وفد نصارى نجران قرروا إنهم يرجعوا إلى بلادهم طلبوا من رسول الله ﷺ إنه يرسل معاهم رجل أمين عشان يقبض منهم الجزية، قالوا:
"ابْعَثْ معنا رَجُلًا أمِينًا، ولا تَبْعَثْ معنا إلَّا أمِينًا"
فقال لهم رسول الله ﷺ:
"لَأَبْعَثَنَّ معكُمْ رَجُلًا أمِينًا حَقَّ أمِينٍ"
يعني هرسل معاكم واحد مفيش حد زيه في أمانته، فالصحابة لما سمعوا رسول الله ﷺ بيقول كده كل واحد فيهم تمنى إنه يكون الشخص ده، فقال رسول الله ﷺ:
"قُمْ يا أبا عُبَيْدَةَ بنَ الجَرَّاحِ"
فلما قام أبو عبيدة قال رسول الله ﷺ:
هذا أمِينُ هذِه الأُمَّةِ👌

دي كانت قصة المباهلة إللي وردت في الأحاديث الصحيحة،
عندنا بقى كم سؤال محتاجين نجاوب عليهم،

◇السؤال الأول:
هل المباهلة خاصة برسول الله ﷺ فقط ولّا هو تشريع عام للمسلمين 🤔

المباهلة ليست خاصة برسول الله ﷺ مع النصارى، لكن هي تشريع عام له ولأمته ﷺ مع النصارى وغيرهم؛ لأن الأصل في التّشريع العموم مادام مفيش دليل تاني بيقول إن التشريع ده خاص بشخص وزمن معين👌

◇السؤال الثاني:
إيه هي اللعنة، هيحصل إيه يعني🤨
اللعنة هي الطرد من رحمة الله، وبالتالي مش هيبقى في لُطف من الله بالعبد في الدنيا،
ومش معنى إن اللعنة تنزل على حد إنه يبقى خلاص هيهلك في التو واللحظة،
زي إبليس مثلا، هو مش إبليس ملعون💁‍♂️
لكنه مش هالك لسه موجود لحد يوم القيامة،
وممكن يكون في ناس ملعونين وبيتحركوا بينا وبيروحوا وبييجوا عادي جدا وهم نفسهم مش حاسين ولا عارفين،
ممكن يكون واحد ملعون وعنده مال وأولاد وغرقان في مُتع الدنيا عادي جدا،
هي المسألة تتعلق بالمصير النهائي في الآخرة،
ففي ناس ملعونين ربنا يعجل بهلاكهم في الدنيا زي ما كان هيحصل مع وفد نصارى نجران لو باهلوا رسول الله ﷺ،
وفي ناس تانية نزلت عليهم اللعنة لكن ربنا يطيل في أعمارهم لزيادة العذاب عليهم في الآخرة،
فالموضوع مش زي ما الناس فاهمة إن بعد المباهلة هنستنى فترة معينة وبعدين هينزل الهلاك على فلان إللي على باطل وحصل بينه وبين أهل الحق مباهلة😅
ممكن يحصل الهلاك في الدنيا وممكن لأ، فالعبرة بالمصير في الآخرة👌

◇السؤال الثالث:
امتى الواحد يلجأ للمباهلة😕

المباهلة لازم تكون في أمر هامٍّ من أمور الدين، ويُرجى في إقامتها حصول مصلحة للإسلام والمسلمين، أو دفع شَر المُخالف،
وطبعا المباهلة بتكون بعد إقامة الحُجّة على المخالف،
يعني بعد ما نبين له الحق بكل الأدلة الواضحة والبراهين القاطعة،
زي ما رسول الله ﷺ وضّح لنصارى نجران بالأدلة الواضحة على إ

#قصص_الأنبياء(٢)
#السيرة_النبوية
#الحلقة_مائتين_وعشرة
#أحداث_السنة_التاسعة_من_الهجرة
#لا_ترفعوا_أصواتكم_فوق_صوت_النبي

من الوفود إللي جاءت لرسول الله ﷺ في السنة التاسعة للهجرة وفد بني تميم،
لما جاء الوفد اقترح أبو بكر الصديق رضي الله عنه على رسول الله ﷺ إن إللي يتكلم ويكون هو المسؤول عن تمثيل وفد بني تميم واحد اسمه القعقاع بن مَعبِد،
فهنا عمر قال لرسول الله ﷺ: لأ، خلي الأقرع بن حابس هو المسؤول،
فأبو بكر الصديق قال لعمر: ما أردت إلا خِلَافِي!
يعني انت عايز تخالفني وخلاص عشان كده اقترحت اسم تاني غير إللي أنا اقترحته،
فعمر قال لأبي بكر: ما أردتُ خِلافَك!
يعني أنا مش عايز أخالفك ولا حاجة زي ما انت فاهم،
فحصل بينهم جدال وأصواتهم ارتفعت وكل ده أمام رسول الله ﷺ،
فنزل القرآن👌
قال الله تعالى في بدايات سورة الحجرات:
" يَا أَيُّهَا الَّذِينَ آمَنُوا لَا تُقَدِّمُوا بَيْنَ يَدَيِ اللَّهِ وَرَسُولِهِ وَاتَّقُوا اللَّهَ إِنَّ اللَّهَ سَمِيعٌ عَلِيمٌ ۩
يَا أَيُّهَا الَّذِينَ آمَنُوا لَا تَرْفَعُوا أَصْوَاتَكُمْ فَوْقَ صَوْتِ النَّبِيِّ وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لِبَعْضٍ أَنْ تَحْبَطَ أَعْمَالُكُمْ وَأَنْتُمْ لَا تَشْعُرُونَ ۩
إِنَّ الَّذِينَ يَغُضُّونَ أَصْوَاتَهُمْ عِنْدَ رَسُولِ اللَّهِ أُولَئِكَ الَّذِينَ امْتَحَنَ اللَّهُ قُلُوبَهُمْ لِلتَّقْوَى لَهُمْ مَغْفِرَةٌ وَأَجْرٌ عَظِيمٌ"

يعني إيه الآيات دي بقى🤔
يعني ربنا بيقول للصحابة لا تُسرِعوا في الأشياء بين يديه، بمعنى إنكم تستنوا رأي رسول الله ﷺ وتشوفوا هو هيقول إيه الأول وتكونوا تَبَع له،
والموقف هنا إن محدش منهم يستعجل ويستبق الأمور ويقدم الرأي ويعرض على رسول الله ﷺ مين إللي يكون مسؤول،
لو رسول الله ﷺ طلب رأيهم ماشي، لكن إنهم منهم لنفسهم كده يتكلموا وكمان الموضوع يقلب بخناقة فده مينفعش خالص،
حتى لو كان إللي اقترحوا واتكلموا وأصواتهم ارتفعت عند رسول الله ﷺ هما الخَيِّرَانِ أبي بكر وعمر زي ما جاء في الحديث:
"كَادَ الخَيِّرَانِ أنْ يَهْلِكَا أبو بَكْرٍ وعُمَرُ رَضِيَ اللَّهُ عنْهمَا"
و الخَيِّرَانِ معناها إللي بيعملوا الخير الكثير،
وكادا أن يهلكا بسبب رفع أصواتهم أمام رسول الله ﷺ وتقديم الرأي قبل ما رسول الله ﷺ يتكلم أصلا،
وربنا نهى الصحابة إنهم يرفعوا أصواتهم عند رسول الله ﷺ أو إنهم يكلموه زي ما بيكلموا بعض،
لازم يتكلموا معاه بوقار واحترام ويوطوا أصواتهم وهم بيتكلموا معاه، عشان رسول الله ﷺ ميغضبش منهم؛ لأن ممكن ربنا يغضب لغضب رسوله ﷺ وكده كل أعمالهم الصالحة إللي عملوها تحبط،
وربنا شجّعهم على خفض أصواتهم عند الكلام مع رسول الله ﷺ أو في حضرته بإن إللي هيعمل كده جزاءه المغفرة والأجر العظيم.
وفعلا من بعدها عمر بن الخطاب رضي الله عنه ما كانَ يُسمِعُ رَسولَ اللهِ ﷺ بَعدَ هذه الآيَةِ حتَّى يَستفْهِمَه،
يعني بقى يوطي صوته خااالص وهو بيتكلم مع رسول الله ﷺ لدرجة إن رسول الله ﷺ بقى هو إللي يقوله يعلّي صوته عشان يسمعه👌

لما نزلت آية عدم رفع الصوت واحد من الصحابة اسمه ثابت بن قَيس بن شمّاس طبيعته إنه صوته عالي فكان بيتكلم وبيخطب أمام رسول الله ﷺ بصوت عالي، فلما سمع الآية قال:
أنا واللهِ الَّذي كُنْتُ أرفَعُ صوتي عندَ رسولِ اللهِ ﷺ وأنا أخشى أنْ يكونَ اللهُ قد غضِب علَيَّ😢
يعني هو فكّر إن الآية دي نزلت فيه هو وإن عمله خلاص أُحبط يعني أُبطِل، ومبقاش له أعمال صالحة،
فحزن ثابت بن قيس رضي الله عنه وقعد في بيته، وهو كان خطيب النبي ﷺ،
فرسول الله ﷺ افتقده، يعني لقاه مش موجود ودي مش عادته فسأل عنه هو فين، فواحد من الصحابة قال لرسول الله ﷺ:
يا رَسولَ اللَّهِ، أَنَا أَعْلَمُ لكَ عِلْمَهُ👌
يعني أنا هروح أجيب لك خبره وأشوفه هو فين، فراح الرجل لبيت ثابت لقاه قاعد موطي راسه ومهموم😔
فسأله الصحابي مالك في إيه🤨
فحكى له ثابت إن عمله خلاص أُحبط بسبب إنه كان بيرفع صوته فوق صوت النبي ﷺ وهو خايف إنه كده بقى خلاص من أهل النار،
فالصحابي رجع لرسول الله ﷺ وأخبره بالموضوع، فقال له رسول الله ﷺ:
" اذْهَبْ إلَيْهِ، فَقُلْ له: إنَّكَ لَسْتَ مِن أَهْلِ النَّارِ، ولَكِنْ مِن أَهْلِ الجَنَّة"
يعني روح بشّره وقول إنه مش هو المقصود بالآية دي، وإنه مش من أهل النار لكنه من أهل الجنة👌

◇سؤال بقى،
هل حكم رفع الصوت على رسول الله ﷺ انتهى بموته وبالتالي مفيش حبوط للعمل، ولّا الحكم مستمر بعد موته ﷺ🤔
شوفوا،
قال القاضي أبو بكر بن العربي:
"حُرْمة النبي ﷺ ميتاً كحرمته حياً، وكلامه المَأثُور بعد موته في الرُّقعة مثال كلامه المسموع من لفظه،
فإذا قُرئ كلامه، وجَب على كل حاضر ألا يرفع صوته عليه، ولا يُعرِض عنه، كما كان يلزمه ذلك في مجلسه عند تلفظه به"
يعني الأمور إللي ربنا نهى عنها في حياة رسول الله ﷺ وخاصة بيه ﷺ مستمرة حتى بعد موته،
وكلام وأحاديث رسول الله ﷺ وأفعاله المكتوبة في الكتب هي بالضبط زي كلامه ا

#قصص_الأنبياء(٢)
#السيرة_النبوية
#الحلقة_مائتين_وإحدى_عشر
#أحداث_السنة_التاسعة_من_الهجرة
#حج_أبي_بكر_الصديق

شوفنا إزاي الأوضاع في الجزيرة العربية استقرت والوفود إللي جاءت تُعلن الولاء لرسول الله ﷺ وللدولة الإسلامية،
سواء بدخولهم في الإسلام أو إنهم يعملوا معاهدات مع رسول الله ﷺ،
جاء بقى موسم الحج، ولحد اللحظة دي كان لسه المشركين بيحجوا لبيت الله الحرام مع المسلمين،
وكان في بعض المشركين بيطوفوا بالكعبة وهم عرايا، عريانين يعني، ومش لابسين ملابس تغطي حتى العورة المُغلظّة😶
والكلام ده من قبل الإسلام، وقالت السيدة عائشة في حديث صحيح:
" كانَ النَّاسُ يَطُوفُونَ في الجَاهِلِيَّةِ عُرَاةً إلَّا الحُمْسَ، والحُمْسُ قُرَيْشٌ وما ولَدَتْ،
وكَانَتِ الحُمْسُ يَحْتَسِبُونَ علَى النَّاسِ، يُعْطِي الرَّجُلُ الرَّجُلَ الثِّيَابَ يَطُوفُ فِيهَا،
وتُعْطِي المَرْأَةُ المَرْأَةَ الثِّيَابَ تَطُوفُ فِيهَا، فمَن لَمْ يُعْطِهِ الحُمْسُ طَافَ بالبَيْتِ عُرْيَانًا"
والحديث معناه إن قريش كانت بتمنع الناس إنهم يطوفوا بالبيت إلا وهم لابسين ملابس من قريش،
فكان الرجل من قريش بيعطي الرجل من خارج قريش ملابس يلبسها ويطوف بيها،
وكذلك كانت النساء، ولو محدش من قريش أعطى ثياب للقادمين من خارج قريش كانوا يطوفوا بالبيت الحرام عرايا، الرجال والنساء على السواء👌
فالعادة دي لسه موجودة لحد موسم حج السنة التاسعة من الهجرة، فرسول الله ﷺ مكنش عايز يطوف بالبيت وفي مشركين بيطوفوا وكمان في ناس عرايا، فلم يخرج للحج في السنة التاسعة،
وجعل أبو بكر الصديق أمير الحج، يعني هو إللي يقود الناس في الحج،
خرج أبو بكر في وفد الحج وتوجه إلى مكة،
بعد ما خرج أبو بكر رضي الله عنه نزلت بدايات سورة براءة أو سورة التوبة وفيها تشريعات مهمة في تعامل المسلمين مع المشركين، وتعتبر إعلان مصيري بالنسبة لكل مشرك في الجزيرة العربية👌

☆ملحوظة:
سورة التوبة أو سورة براءة هي آخر سور القرآن الطّوال إللي نزلت على رسول الله ﷺ،
وسورة التوبة هي السورة الوحيدة التي لم تبدأ بالبسملة،
والسبب في كده إنه كان من عادة العرب إنهم لما يكونوا عايزين ينقدوا عهد مع حد مكنوش بيبدأوا رسايلهم بنقد العهد بالبسملة،
يعني كانوا بيدخلوا في الموضوع على طول بدون قول باسمك اللهم،
وسورة براءة نزلت لتنقض العهد مع المشركين، فلم تبدأ السورة بالبسملة على عادة العرب👌
وسبب تاني لعدم ذكر البسملة وهو إن السورة فضحت المنافقين وفيها كلام شديد جدا للمنافقين والكافرين لا يتناسب مع الرحمة الموجودة في البسملة💁‍♂️

أمر رسول الله ﷺ علي رضي الله عنه إنه يذهب لمكة عشان يعلن للناس الأحكام الشرعية الجديدة،
ملخص الأحكام دي أربعة أحكام رئيسية هي:
◇ لا يدخل الجنة إلا مؤمن.
◇لا يطوف بالبيت عريان.
◇ لا يحج البيت الحرام بعد هذا العام مشرك.
◇مَن كان بينه وبين رسول الله ﷺ عهد فعهده إلى مدته حتى ولو كانت سنوات ما دام لم يظهر منه أي خيانة للعهد،
فلو ظهر منه أي خيانة له أربعة أشهر فقط،
وإللي ملوش عهد خالص من المشركين فآخر مدة عهده هي انتهاء الأشهر الحُرم، إللي هو باقي شهر ذي الحجة وشهر محرم.

فخرج علي رضي الله عنه من المدينة متجه لمكة وكان راكب على ناقة رسول الله ﷺ القَصْواء،
فلما جاء علي لأبي بكر سأله أبو بكر:
أميرٌ أم مأمورٌ ؟
يعني انت رسول الله ﷺ أرسلك عشان تبقى أمير على الحج بدالي ولّا انت جاي توصّل رسالة فقط وتكون تحت قيادتي،
فعلي رضي الله عنه قال:
بل مأمورٌ👌
يعني أنا جاي أوصل رسالة رسول الله ﷺ بالأحكام الشرعية إللي نزلت،
وبعدها انطلق علي رضي الله عنه بين الناس يخبرهم بالأحكام الشرعية الجديدة.

الآيات إللي نزلت كانت شديدة على المشركين وفيها إن الحرب مُعلنة عليهم بوضوح وقوة، ومفيش قصادهم غير اختيارين:
إما القتال ومواجهة المسلمين، وإما الإسلام👌

خلونا نشوف الآيات وتفسيرها واحدة واحدة:
"بَرَاءَةٌ مِنَ اللَّهِ وَرَسُولِهِ إِلَى الَّذِينَ عَاهَدتُّمْ مِنَ الْمُشْرِكِينَ ۩ فَسِيحُوا فِي الأَرْضِ أَرْبَعَةَ أَشْهُرٍ وَاعْلَمُوا أَنَّكُمْ غَيْرُ مُعْجِزِي اللَّهِ وَأَنَّ اللَّهَ مُخْزِي الْكَافِرِينَ"

دول أول آيتين من سورة التوبة، ربنا بيقول فيهم إنه سبحانه هو ورسوله ﷺ بيتبرأوا من أهل الشرك إللي بينهم وبين رسول الله ﷺ عهد،
طبعا يجوز دلوقتي عمل عهود بين المسلمين والمشركين، لكن في عهد رسول الله ﷺ نزلت الآية دي عشان تنهي أي عهود بين رسول الله ﷺ وبين المشركين،
وده تمهيد لأمر رسول الله ﷺ بعدين إنه لا يبقى في جزيرة العرب لا مشرك ولا كافر، فقط المسلمين،
فرسول الله ﷺ قال في مرض موته:
"أخرجوا المشركين من جزيرة العرب"
وقال ﷺ:
" لأُخرِجن اليهود والنصارى من جزيرة العرب حتى لا أدع إلا مسلماً"
يعني ده أمر مباشر من رسول الله ﷺ إن جزيرة العرب إللي هي الجزيرة العربية كلها التي يحيط بها البحر الأحمر والخليج العربي والمحيط الهندي وتنتهي شمالا إلى أطراف الشام والعراق لا

#قصص_الأنبياء(٢)
#السيرة_النبوية
#الحلقة_مائتين_واثنا_عشر
#أحداث_السنة_التاسعة_من_الهجرة
#إجابة_أسئلة_آية_السيف

اتكلمنا المرة إللي فاتت عن المشركين ومنعهم من دخول المسجد الحرام وإن رسول الله ﷺ أعطاهم وقت معين وبعد كده إما يسلموا أو يقتلهم، جالنا سؤالين على الجزء إللي فات هنرد عليهم النهاردة إن شاء الله 😊

☆السؤال الأول بيقول:
حاسة إني مش فاهمة أوي آية السيف،
يعني أنا أعرف إن دين الإسلام دين عفو ورحمة ومش بيقاتل المشركين إلا بالشروط إللى انتِ قولتيها بس ما هو الوضع كان كده قبل نزول آية السيف،
يعني إن المسلمين لا يقاتلوا غير بالشروط إللي قلناها
إللي هي:
اعتدوا على المسلمين بسَلْب أو نهب أو اغتصاب لحقوق المسلمين،
أو بسبب منعهم للمسلمين من نشر الإسلام وإيصاله إلى غيرهم.
فإيه الاختلاف، وكده الناس هتقول إزاي بنقول إن الإسلام دين رحمة وهو بيجبر الناس على الدخول في الإسلام بعد نزول آية السيف؟

شوفوا،
احنا محتاجين نفرق بين أمرين:
الأمر الأول هو زمن نزول آية السيف في عهد رسول الله ﷺ والزمن إللي بعده،
آية السيف لما نزلت في عهد رسول الله ﷺ كانت بتقول إن أي مشرك من العرب إللي عاصروا رسول الله ﷺ هيبقى موجود في الجزيرة العربية لو مدخلش الإسلام هيُقتل؛
لأن زي ما قلنا المرة إللي فاتت إنهم لا يستحقوا إنهم يسكنوا فيها؛ لأن الأرض أرض الله، وهم أعداؤه المعارضون والمحاربون له ولرسوله،
وهم يا جماعة أصلا كانوا محاربين لرسول الله ﷺ، يعني احنا شوفنا مشركي الجزيرة كلها كانوا بيحاربوا رسول الله ﷺ إزاي وفيهم إللي خان العهود وفيهم إللي كان مستني أي فرصة للقضاء على المسلمين،
فالأصل أصلا إنهم معتدين ولو الإسلام مكنتش ظهرت قوته كانوا هيستمروا في حربهم وعنادهم واعتداءهم على المسلمين،
فجاء الرد الحاسم من ربنا إنهم بعد كل الأحداث دي عاصروها وشافوها مع رسول الله ﷺ مينفعش يستمروا على الشرك،
فقصادهم إما الدخول في الإسلام وإما القتل💁‍♂️
فالمشركين العرب في عهد رسول الله ﷺ لو لم يسلموا بمجرد انتهاء العهد بتاعهم المسلمين هيقتلوهم👌

الأمر التاني هو بعد زمن رسول الله ﷺ، لو قلنا افتراضا يعني إن محدش من المشركين في الأرض اعتدى على المسلمين بسَلْب أو نهب أو اغتصاب لحقوقهم،
لكن السبب التاني موجود أكيد، وهو إن المشركين هيمنعوا المسلمين من نشر الإسلام وهنا هيحصل القتال بين المسلمين وبين المشركين وده الواقع إللي حصل بعد موت رسول الله ﷺ،
أمة الإسلام هي آخر الأمم ويجب عليها نشر الإسلام وتوصيله لكل الناس،
لكن في مشركين لهم مصالح في إن رعاياهم يستمروا على الكفر والضلال فهنا المسلمين هيقاتلوا جيوش المشركين دول عشان يوصلوا الإسلام لعامة الناس،
فالمشرك لا يُقتل لأنه مشرك فقط أبدا، لكن يُقتل لأنه يحارب دين الله،
فسواء في زمن رسول الله ﷺ أو بعد زمن رسول الله ﷺ فآية السيف حكمها قائم بسبب الشروط إللي قلناها.

◇طيب إيه الاختلاف قبل وبعد نزول آية السيف🤔

الاختلاف هو إن قبل نزول آية السيف كان ممكن يبقى بين رسول الله ﷺ وبين المشركين عهد وهدنة زي ما حصل في صلح الحديبية،
لكن بعد نزول آية السيف مبقاش في عهود تانية تتعمل بين المسلمين وبين المشركين في عهد رسول الله ﷺ ، إللي عنده عهد فالعهد بتاعه لحد مدته،
وإللي معندوش عهد آخر مدة السماح بتاعته لحد انتهاء الأشهر الحُرم بعد كده خلاص إما الإسلام وإما القتل؛ والكفر مُغلّظ في حق المشركين في عهد رسول الله ﷺ لأن رسول الله ﷺ نشأ بين أظهرهم،
والقرآن نزل بلغتهم، فالمعجزة في حقهم أظهر، لأنهم كانوا أعرف بمعانيه، ووجوه الفصاحة فيه،
وكل مَن تغلظ كفره لا يُقبل منه إلا الإسلام أو السيف👌

◇طيب إزاي بنقول إن الإسلام دين رحمة وهو بيجبر الناس على الدخول في الإسلام بعد نزول آية السيف؟

هو الإسلام مش بيجبر الناس على الدخول فيه بعد نزول آية السيف، ربنا لما قال:
"فَاقْتُلُوا الْمُشْرِكِينَ"
معناه اقتلوا المشركين الذين يحاربونكم سواء كانوا معتدين أو مانعين لنشر الإسلام؛
لأن الأصل أن يكون الدين لله، وأن تكون كلمة الله هي العليا فأي حد يمنع نشر الإسلام يُقاتل،
وأما مَن لم يكن من أهل الممانعة والمقاتلة، زي النساء والصبيان والراهب والشيخ الكبير والأعمى فلا يُقتلوا.
فعامة المشركين الغير محاربين للمسلمين دول بيتعرض عليهم الإسلام والمسلمين بيعلموهم الدين،
ومفيش إنسان عاقل يعرف الإسلام حق المعرفة بدون تشويه أو تحريف إلا ويعرف إن هو دين الحق وبالتالي يتبع الإسلام؛ لأن هو دين الفطرة👌
وعلى مر التاريخ لما كان عامة المشركين الغير محاربين بيعرفوا الإسلام حق المعرفة كانوا بيدخلوا في الإسلام مباشرة👌

¤طيب خلونا نمشي على القول إللي بيقول إن إللي بيرفض الدخول في الإسلام من المشركين وجب جهاده حتى يدخل في الإسلام،
وده قول فعلا لبعض أهل العلم واستدلوا على كلامهم بآية السيف وبحديث رسول الله ﷺ:
"أُمِرْتُ أَنْ أُقَاتِلَ النَّاسَ حَتَّى يَشْهَدُوا أَنْ لا إِلَهَ إِلا اللَّهُ

#قصص_الأنبياء(٢)
#السيرة_النبوية
#الحلقة_مائتين_وثلاثة_عشر
#أحداث_السنة_التاسعة_من_الهجرة
#الجزية_في_الإسلام

اتكلمنا عن نزول الأمر من الله بمنع المشركين من دخول المسجد الحرام،
قال تعالى في سورة التوبة:
"يَا أَيُّهَا الَّذِينَ آمَنُوا إِنَّمَا الْمُشْرِكُونَ نَجَسٌ فَلَا يَقْرَبُوا الْمَسْجِدَ الْحَرَامَ بَعْدَ عَامِهِمْ هَٰذَا"
يعني أهل الشرك مُعتقدهم نجس، يعني دينهم إللي بيعتقدوه نجس، والنجاسة المقصودة في الآية هي نجاسة معنوية،
وليس المقصود النجاسة الحسية، يعني مثلا لو مسلم سلم على واحد مشرك مش مطلوب منه إنه يغسل إيده بعد ما سلم عليه،
سواء كان المشرك ده على النصرانية أو اليهودية أو يعبد الأصنام👌
فلأن أهل الشرك معتقدهم نجس فلا يقربوا المسجد الحرام بعد العام إللي نزلت فيه الآية دي،
وطبعا العكس مع المسلمين،
يعني المسلم طاهر حتى لو أصابته جنابة مثلا، هو فقط مطلوب منه يغتسل لرفع الجنابة،
وهو طاهر حتى لو أصابت ثوبه أو بدنه نجاسة، لكن يجب عليه غسل النجاسة دي👌
والدليل على إن المسلم أو المؤمن لا ينجس موقف حصل مع أبو هريرة رضي الله عنه بيقول:
أنَّ النبيَّ ﷺ لَقِيَهُ في بَعْضِ طَرِيقِ المَدِينَةِ وهو جُنُبٌ، فَانْخَنَسْتُ منه، فَذَهَبَ فَاغْتَسَلَ ثُمَّ جَاءَ.
فَقالَ: أيْنَ كُنْتَ يا أبَا هُرَيْرَةَ؟
قالَ: كُنْتُ جُنُبًا، فَكَرِهْتُ أنْ أُجَالِسَكَ وأَنَا علَى غيرِ طَهَارَةٍ، فَقالَ:
"سُبْحَانَ اللَّهِ، إنَّ المُسْلِمَ لا يَنْجُس".
يعني أبو هريرة كان ماشي في بعض طُرق المدينة وكان على جنابة،
فقابل رسول الله ﷺ في الطريق فلما شافه أبو هريرة ورسول الله ﷺ نفسه شاف أبو هريرة فالمفروض في الموقف ده إن أبو هريرة يسلم على رسول الله ﷺ،
لكن ده محصلش، أبو هريرة رجع من غير يسلم على رسول الله ﷺ أو يكلمه، وده معنى:
《فانْخَنَسْتُ منه》،
فراح أبو هريرة واغتسل وبعدين رجع تاني لرسول الله ﷺ،
فسأله رسول الله ﷺ كنت فين، فقال له أبو هريرة إنه كان على جنابة فكَرِه إنه يقعد مع رسول الله ﷺ وهو غير طاهر،
فرسول الله ﷺ تعجب من تفكير أبو هريرة وقال له المسلم لا ينجس، يعني المسلم مش قَذِر👌

العلماء اختلفوا بقى في معنى المسجد الحرام المقصود في الآية،
يعني هل المقصود بالمسجد الحرام المسجد إللي فيه الكعبة فقط؟
ولّا المقصود بالمسجد الحرام هو مكة كلها ولّا المقصود عموم منطقة الحرم إللي متحددة بأعلام معينة🤔
قال بعض العلماء إن المقصود بالمسجد الحرام هو منطقة الحرم بصفة عامة مش بس المسجد إللي فيه الكعبة، وده هو القول الراجح،
حتى دلوقتي في علامات في مكة قبل منطقة الحرم مكتوب عليها يُمنع دخول غير المسلمين،
وفي علماء قالوا إن المقصود بالمسجد الحرام هو المسجد نفسه إللي فيه الكعبة،
لكن زي ما قلنا القول الأول هو القول الراجح.

☆ملحوظة:
احنا قلنا إن رسول الله ﷺ في آخر حياته أمر بإخراج كل الناس إللي على غير ملة الإسلام من جزيرة العرب،
فمينفعش أصلا دخول غير المسلمين لمكة بصفة عامة،
بس احنا بنشرح زمن نزول الآية والمقصود منها إيه👌

بعد ما نزلت آية منع المشركين من دخول المسجد الحرام المسلمين في مكة شافوا إن الموضوع شاق وصعب عليهم😬
☆ليه؟ 🤔
احنا عارفين إن مكة قائمة على التجارة، وبما إن فيها البيت الحرام فكل العرب بيأتوا لمكة، فهي قِبلة العرب،
وبالتالي هتتوفر في مكة كل أنواع البضاعة من كل مكان،
فدلوقتي المشركين إللي كانوا بييجوا من كل مكان اتمنعوا من إنهم ييجوا، وده طبعا هيأثر تأثير سلبي كبير جدا على التجارة في مكة وعلى المسلمين،
والناس قالوا خلاص كده مش هيبقى في أسواق وهتهلك التجارة 😶
فربنا أنزل:
"وَإِنْ خِفْتُمْ عَيْلَةً فَسَوْفَ يُغْنِيكُمُ اللَّهُ مِنْ فَضْلِهِ إِنْ شَاءَ ۚ إِنَّ اللَّهَ عَلِيمٌ حَكِيمٌ"
يعني ربنا بيقول للمسلمين لو خفتم من الفقر بسبب انقطاع تجارتكم مع المشركين نتيجة لمنعهم من دخول الحرم؛ فربنا هو إللي هيغنيكم من فضله إذا شاء سبحانه،
وربنا هنا ربط الغنى بالمشيئة؛ لأن ممكن الغِنى يكون فيه ضرر عليهم،
فقال لهم لو الغِنى فيه خير لكم سأغنيكم ولو فيه ضرر لن يفتح عليكم في الغِنى،
فهو الحكيم سبحانه فلا يكون شيء في كونه إلا بعلمه وبحكمته👌

☆نقف هنا وقفة،
الآية مش خاصة فقط بالمسلمين في مكة في زمن رسول الله ﷺ، الآية دي هي رسالة لكل واحد فينا إننا نهجر ونترك ما نهى الله عنه،
وإللي خايف على مصلحته ورزقه ربنا هيغنيه من فضله بحوله وقوته؛ لأن الرزق مش بالشطارة ولا الاجتهاد ولكنه فضل من الله قسمه بين العباد،
ربنا بيقول:
"نَحْنُ قَسَمْنَا بَيْنَهُمْ مَعِيشَتَهُمْ فِي الْحَيَاةِ الدُّنْيَا"
فلما يكون واحد بيشتغل في بيع الخمور مثلا ونقول له إن ده حرام ولازم يشتغل شغلانة تانية حلال مينفعش يقول وأنا هشتغل إيه، ما هو مفيش شغل...مفيش بديل،
هنا لازم إنه يترك طريقة الكسب الحرام دي وهو سبحانه هيرزقه من الحلال،
وزي برده إللي بيتعامل بالربا وشغله كله بالربا بحجة إن مفيش طريقة

#قصص_الأنبياء(٢)
#السيرة_النبوية
#الحلقة_مائتين_وأربعة_عشر
#أحداث_السنة_التاسعة_من_الهجرة
#بعض_مواقف_رسول_الله_مع_الأطفال

قبل ما ندخل في جزء النهاردة خلوني أفكركم إن من أهم الأحداث إللي حصلت في السنة التاسعة من الهجرة مجيء تميم الداري،
وتميم الداري هو إللي قابل المسيح الدجال على الجزيرة المهجورة، واحنا اتكلمنا عنه بالتفصيل لما كنا بنتكلم عن علامات الساعة الكبرى😊

هنتكلم النهاردة بقى عن بعض مواقف رسول الله ﷺ مع الأطفال،
رسول الله ﷺ بصفة عامة كان بيحب الأطفال وكان رحيم بيهم وكان لما بيعدي على أطفال وهم بيلعبوا كان بيمسح على رؤسهم،
وكنا قلنا في الجزء الثامن والثمانين إنه كان بيرش وجه الواحد منهم بالمية ويضحك،
وكان بيهزر مع واحد تاني ويقول له: "يا ذا الأذنين" ، كإنها حاجة غريبة وهي حاجة عادية أصلا، لأن كل واحد عنده أذنين فكانوا فبيضحكوا كلهم😅
وكان بيحب يفرّحهم باللعب المفيد معاهم، فكان بيوقف بعض الأطفال صفوف ويقول لهم:
تسابقوا وإللي يوصل لي الأول له مكافأة كذا وكذا!
فيستبقون إليه، فيقعون على ظهره وصدره، ويتمرغون فيه فيقبّلهم ويحضنهم ﷺ 😁
فكان الأطفال بيحبوا رسول الله ﷺ جدا، وكان لما رسول الله ﷺ يغيب عن المدينة لأي سبب كان أول مَن يستقبله هم الأطفال👌
مفيش ولا مرة خلال الثلاثة وعشرين سنة من بعثته ﷺ وحتى قبل البعثة؛ سمعنا عنه ﷺ إنه ضرب أو عنّف طفل،
ده بالعكس كمان؛
يعني رسول الله ﷺ خاتم الأنبياء والمرسلين... القائد السياسي...القائد العسكري...الإمام...على عظيم شغله ومسؤولياته الكبيرة إلا أنه كان يلاطف أطفال الصحابة، ويدخل السرور عليهم😊

♡من المواقف دي موقف بيحكيه أنس بن مالك رضي الله عنه، بيقول:
"كان رسول الله ﷺ يدخُلُ علينا ولي أخٌ صغيرٌ يُكنَى أبا عميرٍ، وكان له نُغَرٌ يلعبُ به، فمات..."
يعني أنس بيقول إن رسول الله ﷺ كان بيزورهم كتير في البيت، وكان عنده أخ صغير كنيته أبا عمير،
وكان عنده طائر شَبه العصفور بيلعب بيه، وكان رسول الله ﷺ لما بيروح في بيت أنس كان بيلاعب ويلاطف أبا عمير،

"فدخل عليه النبي ﷺ ذات يوم فرآه حزينًا، فقال: ما شأنه؟ فقالوا: مات نغرُهُ.
فقال ﷺ: يا أبا عُميرٍ! ما فعل النُّغيرُ؟!

يعني في مرة دخل عندهم رسول الله ﷺ فلقى أبا عمير قاعد حزين،
فسألهم عن سبب حزنه قالوا له إن الطائر بتاعه إللي كان بيلعب بيه مات،
فرسول الله ﷺ عشان يصرف عنه الحزن قعد يمازحه ويلاطفه ويقوله: يا أبا عمير! ما فعل النغير؟!

☆فرسول الله ﷺ بيعلمنا هنا إننا نحترم مشاعر الأطفال الصغار،
ونخفف عنهم إللي ممكن يحصل لهم من مصائب حتى لو كانت من وجهة نظرنا حاجة عادية ومش مستاهلة،
ولو تاخدوا بالكم رسول الله ﷺ انتبه لتغير وجه الطفل فعرف إن في حاجة مش طبيعية، وإن دي مش عادته وبعدين بدأ يسأل عن السبب،
فالاهتمام بالأطفال إللي ممكن في مرحلة من المراحل ميكونوش مستوعبين إللي بيحصل حواليهم؛ مطلوب،
فما بالكم كمان بالكبار💁‍♂️
فالعلماء استنبطوا من الحديث ده فائدة:
《إن من دوام المحبة والمودة بين الأصدقاء، السؤال عنهم ومعرفة أخبارهم،
وإن مِن الأدبِ الحَسَنِ سُؤالَ الأخِ لأخيه عن سَببِ حُزنِه ومُواساتَه، والتَّلطُّفَ بالصَّديقِ صَغيرًا كان أو كبيرًا، والسُّؤالَ عن حالِه》

موقف تاني حصل مع أنس بن مالك نفسه رضي الله عنه،
لكن قبل ما نعرف الموقف خلونا نعرف كده سريعا مين هو أنس بن مالك😊
هو أنس بن مالك بن النّضر، اتولد قبل الهجرة بعشر سنوات،
وفي رواية ثماني سنوات،
يعني لما رسول الله ﷺ هاجر للمدينة كان عمره عشر سنوات، أو ثمانية على اختلاف الروايات،
وأمه الرّميْصاء أم حرام واسمها مَلِيكة بنت مِلحان، وهي صاحبة أغلى مهر في الإسلام لما تزوجت أبو طلحة الأنصاري،
وهي إللي كانت معاها خنجر في غزوة حنين وثبتت مع رسول الله ﷺ لما الناس فروا من حوله،
وخال أنس هو حرام بن مِلحان إللي استشهد في حادثة بئر معونة،
وعم أنس بن مالك هو أنس بن النضر إللي استشهد في غزوة أحد، وكان بيقول قبل ما يُقتل:
"إني لأجد ريح الجنة دون أحد"
وعمة أنس هي الرُّبيّع بنت النضر إللي ابنها حارثة استشهد قبل بداية معركة بدر ورسول الله ﷺ بشرها بإن ابنها أصاب الفردوس الأعلى👌
يعني هو من عائلة كلها أبطال😅
بعد ما رسول الله ﷺ هاجر للمدينة، أخذته أمه أم سُليْم لرسول الله ﷺ وكان عمر أنس ساعتها عشر سنوات زي ما قلنا وقالت له:
"يا رسول الله، لم يبقَ رجل ولا امرأة مِن الأنصار إلا وقد أتحفك بتحفة، وإنِّي لا أقدر على ما أُتحفك به إلا ابني هذا، فخُذه، فليَخدُمك ما بدا لك"
يعني بعد ما رسول الله ﷺ هاجر للمدينة الصحابة بقوا يرسلوا له الهدايا، فأم سليم مكنش عندها حاجة تهديها لرسول الله ﷺ، فقالت له ياخد ابنها أنس ويكون خادم له، سنة... سنتين... زي ما هو عايز،
فاتعرَف أنس على مرّ القرون بإنه خادم رسول الله ﷺ، وكان بيفخر بإنه معروف بإنه خادم رسول الله ﷺ، حتى إنه قال بعد موت رسول الله ﷺ:
"إنِّي لأرجو أن ألقى رسولَ الله ﷺ في يوم الق

#قصص_الأنبياء(٢)
#السيرة_النبوية
#الحلقة_مائتين_وخمسة_عشر
#أحداث_السنة_التاسعة_من_الهجرة
#بعض_مواقف_رسول_الله_مع_الشباب

وقفنا المرة إللي فاتت عند سؤال: من هم العَبَادلة الأربعة؟
لقب العبادلة الأربعة أُطلق على أربعة من الصحابة، هم:
◇عبد الله بن عمر بن الخطاب رضي الله عنه
◇وعبد الله بن عباس بن عبد المطلب رضي الله عنه
◇وعبد الله بن الزبير بن العوام رضي الله عنه
◇وعبد الله بن عمرو بن العاص رضي الله عنه
والسبب في إن العلماء وأهل الحديث سموهم كده لأنهم كانوا من صغار الصحابة ومع ذلك جمعوا علمًا واسعًا، ولأنهم عاشوا زمن طويل بعد موت رسول الله ﷺ، فالناس اتعلموا منهم كتير،
فإذا اتفقوا هم الأربعة على شيء قيل:
هذا قول العبادلة، أو فعلهم، أو مذهبهم.

☆طيب وعبد الله بن مسعود ميدخلش معاهم ليه🤔
لأن عبد الله بن مسعود تقدمت وفاته، يعني مات قبلهم بكتير، لكن الأربعة عاشوا فترة طويلة حتى احتِيج إلى علمهم👌

هنتكلم النهاردة بقى إن شاء الله عن موقفين لرسول الله ﷺ مع شابين من شباب الصحابة،
رسول الله ﷺ بصفة عامة كان عارف طبيعة مرحلة الشباب إللي فيها أقصى درجات القوة والحيوية والنشاط وتُعتبر من أهم المراحل إللي بيمر بها الإنسان؛ لأن شخصيته تبدأ بالتكون والتطور من كل النواحي، فيكتسب المهارات، والمعارف وغيرها من الأمور،
عشان كده كان رسول الله ﷺ بيوجههم ويرشدهم بما يتناسب مع قدراتهم وشخصايتهم ويشجعهم ويعطيهم من المهام إللي ترفع همتهم وتقوّي نفوسهم،
وكان ﷺ يرفق بالشباب ويرشدهم باللي ينفعهم،
وفي الوقت نفسه يستخرج مواهبهم ويستفيد من طاقاتهم👌

♡أول موقف معانا النهاردة هو موقف رسول الله ﷺ مع معاذ بن جبل رضي الله عنه،
في مرة كده رسول الله ﷺ أخذ بيد معاذ وقال له:
"يَا مُعَاذُ ! وَاللَّهِ إِنِّي لَأُحِبُّكَ"
هنا رسول الله ﷺ بيحلف لمعاذ إنه بيحبه، ولكم أن تتخيلوا إحساس معاذ لما رسول الله ﷺ يقوله كلمة زي دي فجأة😅
فقال معاذٌ: بأبي أنتَ وأُمِّي واللهِ إنِّي لأُحِبُّك.
فقال له رسول الله ﷺ:
"يا معاذُ! أوصيك ألَّا تدَعَنَّ في دبُرِ كلِّ صلاةٍ أنْ تقولَ: اللَّهمَّ أعِنِّي على ذِكرِك وشُكرِك وحُسنِ عبادتِك"
يعني رسول الله ﷺ بيوصي معاذ إنه قبل ما يسلّم من الصلاة؛ يدعو الله ويطلب منه الإعانة على ذكره عز وجل وشكره وحسن عبادته،
فهنا رسول الله ﷺ عشان يعلّم معاذ رضي الله عنه ذِكر مهم لفت انتباهه الأول له بإنه أخبره إنه يحبه،
وده فضل عظيم لمعاذ رضي الله عنه،
فرسول الله ﷺ لما قال لمعاذ إني أحبك الطبيعي إنه يقع في قلب معاذ إن إللي بيحب حد هيدلّه على الخير، وهو ده إللي رسول الله ﷺ عمله، وبكده معاذ رضي الله عنه مستحيل ينسى الذكر ده لأنه ارتبط بتعبير رسول الله ﷺ عن محبته له👌

ومعاذ بن جبل رضي الله عنه أسلم وعمره ثمانية عشرة عام، وحضر بيعة العقبة الثانية، وحضر الغزوات كلها مع رسول الله ﷺ، وقال عنه رسول الله ﷺ بأنه أعلم الأمة بالحلال والحرام، وبعد فتح مكة تركه رسول الله ﷺ هناك عشان يعلم الناس الدين، مع إن عمره ساعتها كان ستة وعشرين سنة فقط،
ومش بس كده ده رسول الله ﷺ بعثه وبعثه إلى اليمن معلما وداعيا وأميرا،
ففي السنة التاسعة من الهجرة بعد غزوة تبوك واستقرار الأوضاع وظهور الإسلام؛ أمر رسول الله ﷺ معاذ إنه يسافر لليمن عشان يدعوا أهلها للإسلام، فقال له رسول الله ﷺ:
"إِنَّكَ ستأتي قَوْمًا أهلَ كتابٍ،
فإذا جئتَهم فادْعُهم إلى أنْ يشهدُوا أنْ لَا إِلَهَ إلَّا اللهُ ، وأنَّ محمَّدًا رسولَ اللهِ،
فإِنْ هم أطاعوا لَكَ بذلِكَ، فأخبرْهم أنَّ اللهَ قَدِ فرَضَ عليْهِمْ خمسَ صلَوَاتٍ في كُلِّ يومٍ وليلَةٍ، فإِنْ هم أطاعوا لَكَ بذلِكَ، فأخبرْهم أنَّ اللهَ قدْ فَرَضَ عليهم صَدَقَةً تُؤْخَذُ منْ أغنيائِهم ، فتردُّ على فقرائِهم،
فإِنْ هم أطاعوا لَكَ بِذَلِكَ ، فإيَّاكَ وكرائِمَ أموالِهم، واتَّقِ دعوَةَ المظلومِ ، فإِنَّه ليسَ بينها وَبينَ اللهِ حجابٌ"
يعني رسول الله ﷺ بيشرح لمعاذ طبيعة الناس إللي هيروح يدعوهم، فهم أهل كتاب،
وبيعلمه إنه يتدرج معاهم في الدعوة عشان ميبقاش الدخول في الإسلام ثقيل عليهم،
فأول حاجة يدعوهم إليها هي عبادة الله وحده والإيمان بأن محمد ﷺ رسول من عند الله،
فلو همّ استجابوا، ساعتها بقى يبدأ يقولهم أحكام الإسلام،
ويقول لهم إن ربنا فرض عليهم خمس صلوات في اليوم والليلة، فلو استجابوا؛ يقولهم إن ربنا فرض عليهم الزكاة، وهي مال يؤخذ من أغنيائهم ويُنفق على فقرائهم،
وقاله إنه مياخدش من نفائس الأموال في الزكاة، يعني ياخد الوسط، لا العالي ولا النازل،
يعني مثلا لو ناس عندهم أغنام وعليها زكاة، ميروحش ياخد أحسن واحدة عندهم وإللي بتكون نفسوهم متعلقة بيها،
وبيحذّره إنه لو عمل كده هيبقى الموضوع فيه ظلم، وكده هيعرض نفسه لدعوة المظلوم إللي مفيش بينها وبين ربنا حجاب👌

☆ممكن حد يسأل ويقول: طيب ليه رسول الله ﷺ مقلش على بقية أركان الإسلام في الحديث🤔

◇أولا: لأن إللي بيصلي الصلوات ال

قصص_الأنبياء(٢)
#السيرة_النبوية
#الحلقة_مائتين_وستة_عشر
#أحداث_السنة_التاسعة_من_الهجرة
#بعض_المواقف_لرسول_الله_مع_الحيوانات

اتكلمنا قبل كده عن مواقف لرسول الله ﷺ مع الصحابة بصفة عامة وتعامله معاهم،
واتكلمنا عن تعامل رسول الله ﷺ مع زوجاته وشوفنا إزاي كان بيعالج أخطاءهم،
واتكلمنا عن تعامله مع الأطفال ومع الشباب،
النهاردة الموضوع مختلف😅
لأن المواقف المرة دي مش مع البشر، المواقف المرة دي مع الحيوانات👌
ربنا بيقول عن رسول الله ﷺ:
"وَمَا أَرْسَلْنَاكَ إِلَّا رَحْمَةً لِلْعَالَمِينَ"
وكلمة العالَمِين دي يدخل فيها الحيوانات كمان مش بس الإنس والجن💁‍♂️
واحنا عارفين إن الناس في الجاهلية كانوا بياعملوا العبيد معاملة سيئة، فما بالكم بالحيوانات😬
فجاء الإسلام بأحكامٍ توضح وتبيّن حدود التعامل مع الحيوان، وتحذر من الاعتداء عليه بغير حق👌
زي المرأة إللي حبست قطة فلا هي أطعمتها ولا هي تركتها تأكل من رزق الله، لحد ما ماتت من الجوع فكان عقابها إن ربنا أدخلها النار😑
في حين إن رجل شاف كلب بياكل التراب إللي فيه رطوبة من شدة العطش فنزل للبئر وأخرج منه الماء وسقى الكلب فكان جزاؤه الجنة،
ورسول الله ﷺ لما حكى للصحابة قصة الرجل ده سألوه:
وإنَّ لنا في البهائم أجر؟!
يعني احنا هناخد أجر لو سقينا الحيوانات، فقال لهم رسول الله ﷺ:
"في كلِّ كَبِدٍ رَطْبةٍ أجرٌ"
يعني كل كائن حي إذا أطعمته وسقيته هتاخد عليه أجر👌

♡من المواقف إللي حصلت مع رسول الله ﷺ وأمر فيها بالرفق بالحيوان إنه مرة كان ماشي في المدينة فعدّى على بعير...جمل... قد لحِقَ ظَهْرُهُ ببطنِهِ، يعني من شدة الجوع والتعب الجمل بقى بطنه داخلة لجوة كده لحد ما بقى هزيل وضعيف،
فرسول الله ﷺ قال:
"اتَّقوا اللَّهَ في هذهِ البَهائمِ المعجَمةِ فاركَبوها صالِحةً وَكُلوها صالحةً"
يعني خافوا ربنا في البهائم إللي مبتقدرش تشتكي من ألمها وتتكلم دي، وربنا هيسألكم عن جوعها وعطشها وأتعبتوها في إيه،
فالبهائم القوية إللي تستحمل الشغل والمشقة استعملوها واركبوها، مش تستعملوا الضعيفة الهزيلة،
وكلوها لما تكون سليمة معافاة تَتشبَّعُ باللَّحمِ والسِّمَنِ، مش تسيبوها لحد ما يُهْلِكها الضعف من الجوع أو المرض👌
فالإسلام يأمر بعدم إجهاد البهائم فوق طاقتها ومراعتها في المأكل والمشرب.

♡موقف تاني بيحكيه عبد الله بن جعفر بن أبي طالب، وعبد الله بن جعفر أمه أسماء بنت عُميس الحبشية البحرية زي ما سماها عمر بن الخطاب رضي الله عنه واتكلمنا عنها في الجزء المائة وتسعة وثلاثون😅
فأسماء بنت عميس ولدت ابنها عبد الله بن جعفر في الحبشة في السنة الأولى من هجرة رسول الله ﷺ للمدينة،
فكده أبوه مات وهو عنده حوالي سبع أو ثماني سنوات، لأن جعفر رضي الله عنه قُتل شهيدا في معكرة مؤتة في السنة الثامنة من الهجرة،
المهم بقى عبد الله بن جعفر رضي الله عنه بيحكي وبيقول إن رسول الله ﷺ ركّبه وراه وهو صغير كده على دابة ومشيوا مع بعض يتكلموا،
فأخبره رسول الله ﷺ بسر، وعبد الله بن جعفر مقلش لحد على السر ده.

☆وهنا رسول الله ﷺ بيعلم عبد الله بن جعفر الطفل الصغير وبيربيه على الأمانة وتحمّل مسؤولية حفظ السر 👌

وهم ماشيين رسول الله ﷺ نزل عشان يقضي حاجته، وكان رسول الله ﷺ بيحب يستتر وراء مكان مرتفع لقضاء الحاجة زي البناء أو غيره،
أو يستتر خلف حائِشَ نَخْلٍ، وهو النَّخْلُ المُلْتَفُّ المُجْتَمِع بعضُه على بعضٍ، يعني بيبقى عاملة زي غابة كده مليانة شجر😅
فدخل رسول الله ﷺ بستان لواحد من الأنصار، فلقى جمل في البستان، أول ما الجمل شاف رسول الله ﷺ حنَّ وذرِفَت عيناهُ😢
يعني عمل صوت ونزلت الدموع من عين الجمل، فرسول الله ﷺ راح ناحيته ومسح ذِفراهُ، يعني مسح المكان إللي البعير بيَعْرَق منه عند أُذُنِه، فسكت الجمل ومبقاش يعمل صوت ولا بقت دموعه تنزل،
فقال رسول الله ﷺ:
مَن ربُّ هذا الجَمَلِ، لمن هذا الجمَلُ؟
يعني مين صاحب الجمل ده والمسؤول عنه؟!
فَجاءَ فتًى منَ الأنصارِ فَقالَ:
لي يا رسولَ اللَّهِ🙋‍♂️
فَقالَ له رسول الله ﷺ:
أفلا تتَّقي اللَّهَ في هذِهِ البَهيمةِ الَّتي ملَّكَكَ اللَّهُ إيَّاها؟
فإنَّهُ شَكا إليَّ أنَّكَ تُجيعُهُ وتُدئبُهُ.
يعني مش تتقي ربنا في البهيمة إللي خلاك تملكها دي؟!
وهو هنا بينبهه إن ربنا هو إللي ذلل له الجمل عشان يساعده، يعني دي نعمة من ربنا، فإزاي بقى ميراعيش النعمة دي،
ورسول الله ﷺ وضّح له المشكلة في إيه وقال له إن الجمل اشتكى له إنه بيجوّعه ومش بيأكّله لحد ما الجوع بيؤذيه،
وكمان بيتعبه ويجهده بالأعمال الكثيرة،
وطبعا دي معجزة واضحة لرسول الله ﷺ إنه عرف إللي بيشتكي منه الحيوان👌

☆طيب رسول الله ﷺ إزاي فهم الجمل🤔
حاجة من اتنين:
إما إن ربنا جعل رسول الله ﷺ يفهم شِكاية الجمل، زي ما ربنا علّم سليمان عليه السلام لغة الطير وباقي الحيوانات،
أو إن رسول الله ﷺ عرف مشكلة الجمل عن طريق الوحي،
وأيًّا كان يعني فدي آية ومعجزة لرسول الله ﷺ شافها الصحابة ونقلوه