💭 ربنا جعل الدنيا دار امتحان ومجاهدة وصبر، واللي هايكون هدفه بصدق رضا الله وهايسعى لتحقيقه بكل اللي يقدر عليه، الله عز وجل هايرضيه ويهديه ويعينه على الامتحان ويقويه "وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ"..

💭 ومن أهم الحاجات اللي ربنا جعلها سبب في الوصول لرضاه ومحبته والفوز بجنته 👈 سلم مجاهدة النفس "أَمْ حَسِبْتُمْ أَن تَدْخُلُوا الْجَنَّةَ وَلَمَّا يَعْلَمِ اللَّهُ الَّذِينَ جَاهَدُوا مِنكُمْ وَيَعْلَمَ الصَّابِرِينَ"..

💭 ومجاهدة النفس من أشد وأصعب أنواع الجهاد لأنك بتجاهد جزء منك طووول عمرك..
وفي جهادك مع نفسك لازم تكون عارف عيوبها كويس، عارفها ومعترف بيها من غير مبالغة ولا تهوين..
لإنك لو مش عارف العيوب، أو عارفها وبتنكرها، مش هتتحرك ولا حتى هايكون عندك دافع تعالجها..
وساعتها هتبقى ركبت زحليقة الاستسلام وهتلاقي نفسك زي اللي بيغرق وسط البحر وموج الفتن والشهوات والشبهات حواليك في كل حتة ومش معاك طوق النجاة..

💭 فخليك واعي وماتفرطش في طوق نجاتك.. جاهد واصبر على الالتزام بطاعة الله..
جاهد واصبر على البعد عن معاصي الله..
جاهد واصبر على أقدار الله المؤلمة..
جاهد واصبر لإن الجنة طريقها محفوف بالمكاره، والنار طريقها محفوف بالشهوات..
جاهد واصبر عشان تعب الدنيا أهون بكتيييير من عذاب الآخرة، وزي ما قال سيدنا عمر بن الخطاب رضي الله عنه: "حَاسِبُوا أَنْفُسَكُمْ قَبْلَ أَنْ تُحَاسَبُوا، وَزِنُوا أَنْفُسَكُمْ قَبْلَ أَنْ تُوزَنُوا، فَإِنَّهُ أَهْوَنُ عَلَيْكُمْ فِي الْحِسَابِ غَدًا، أَنْ تُحَاسِبُوا أَنْفُسَكُمُ الْيَوْمَ، وَتَزَيَّنُوا لِلْعَرْضِ الأَكْبَرِ، يَوْمَئِذٍ تُعْرَضُونَ لا تَخْفَى مِنْكُمْ خَافِيَةٌ".

#مجاهدة_النفس
#السلم_والزحليقة

t.me/moh_elghaleez

💭 رسولنا الكريم ﷺ نبهنا على دور الأسرة في التربية ورعاية أبنائها ومسئولية الأب والأم الكبيرة فقال: «أَلَا كُلُّكُمْ رَاعٍ، وَكُلُّكُمْ مَسْئُولٌ عَنْ رَعِيَّتِهِ، فَالْأَمِيرُ الَّذِي عَلَى النَّاسِ رَاعٍ، وَهُوَ مَسْئُولٌ عَنْ رَعِيَّتِهِ، وَالرَّجُلُ رَاعٍ عَلَى أَهْلِ بَيْتِهِ، وَهُوَ مَسْئُولٌ عَنْهُمْ، وَالْمَرْأَةُ رَاعِيَةٌ عَلَى بَيْتِ بَعْلِهَا وَوَلَدِهِ، وَهِيَ مَسْئُولَةٌ عَنْهُمْ، وَالْعَبْدُ رَاعٍ عَلَى مَالِ سَيِّدِهِ وَهُوَ مَسْئُولٌ عَنْهُ، أَلَا فَكُلُّكُمْ رَاعٍ، وَكُلُّكُمْ مَسْئُولٌ عَنْ رَعِيَّتِهِ»..

💭 فلو قام الوالدين بتربية أنفسهم وأبنائهم على الشرع والنهج النبوي هايكونوا على سلم الصلاح والهداية بإذن الله..
والسلم ده نهايته 👈 "وَالَّذِينَ آمَنُوا وَاتَّبَعَتْهُمْ ذُرِّيَّتُهُمْ بِإِيمَانٍ أَلْحَقْنَا بِهِمْ ذُرِّيَّتَهُمْ وَمَا أَلَتْنَاهُمْ مِنْ عَمَلِهِمْ مِنْ شَيْءٍ كُلُّ امْرِئٍ بِمَا كَسَبَ رَهِين"..

💭 أما لو اتضحك عليهم وركبوا زحليقة التربية الغربية الحديثة غير المنضبطة بضوابط الشريعة الإسلامية وأهملوا تربية ولادهم وانشغلوا بمشاغل الحياة 👈 فالزحليقة دي نهايتها تخوف عافانا الله منها..
فالنبي ﷺ قال: «مَا مِنْ عَبْدٍ اسْتَرْعَاهُ اللَّهُ رَعِيَّةً، فَلَمْ يَحُطْهَا بِنَصِيحَةٍ، إِلَّا لَمْ يَجِدْ رَائِحَةَ الجَنَّةِ»..

💭 الخلاصة 👈 الأب والأم كالزارع اللي بيراعي زرعته اللي ربنا أكرمه بيها 🌱
فإما إنه يتق الله فيها ويسقيها خير وصلاح..
وإما إنه يخالف أمر الله ويسقيها شر وفساد حتى وإن كان بغير قصد منه..
والنبي ﷺ قالنا: «كُلُّ مَوْلُودٍ يُولَدُ عَلَى الفِطْرَةِ، فَأَبَوَاهُ يُهَوِّدَانِهِ، أَوْ يُنَصِّرَانِهِ، أَوْ يُمَجِّسَانِهِ، كَمَثَلِ البَهِيمَةِ تُنْتَجُ البَهِيمَةَ هَلْ تَرَى فِيهَا جَدْعَاءَ»..
والفطرة هي دين الإسلام 💚
فحافطوا على فطرة ولادكم.. علشان هتتحاسبوا عليهم..
حافطوا على فطرة ولادكم.. علشان الفتن في كل حتة واللي بيتخطف ممكن مايرجعش تاني..
حافطوا على فطرة ولادكم.. علشان هينفعوكم بعد موتكم فالنبي ﷺ قال: "إِذَا مَاتَ الْإِنْسَانُ انْقَطَعَ عَنْهُ عَمَلُهُ إِلَّا مِنْ ثَلَاثَةٍ: إِلَّا مِنْ صَدَقَةٍ جَارِيَةٍ، أَوْ عِلْمٍ يُنْتَفَعُ بِهِ، أَوْ وَلَدٍ صَالِحٍ يَدْعُو لَهُ".

💭 وماتنسوش ربوا نفسكم قبل ما تبقوا أب وأم..
ولو كنتم بالفعل أب وأم فربوا نفسكم مع ولادكم علشان أنتم أساس صلاحهم والتربة اللي هاينشأوا فيها.

#التربية
#السلم_والزحليقة

t.me/moh_elghaleez

*التدين* 👇

💭 التدين من نعم الله اللي كل مسلم المفروض يسعى للحصول عليها..
بس للأسف فيه ناس مننا فاهمة التدين بشكل غلط..
فالتدين السليم هو اتباع شرع الله في كل لمحة في حياتنا كما قال الله تعالى: "قُلْ إِنَّ صَلَاتِي وَنُسُكِي وَمَحْيَايَ وَمَمَاتِي لِلَّهِ رَبِّ الْعَالَمِينَ"..
والمؤمن الحق هو اللي بيخلي الدين حكمًا على أقواله وأفعاله وقراراته من غير تفريط ولا إفراط..

💭 وكل اللي بيتبع الكتاب والسُنة بالفهم السليم فهو طلع سلم المنهج الوسطي المعتدل..
ونبينا محمد ﷺ هو الميزان والقدوة في الوسطية والاعتدال؛ اللي هايزود عليه يبقى متشدد ومتنطع..
واللي هيقلل عنه بإهمال السنن وتهميشها في حياته يبقى مفرط في حق نفسه..
ربنا عز وجل قال: "لَّقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ لِّمَن كَانَ يَرْجُو اللَّهَ وَالْيَوْمَ الْآخِرَ وَذَكَرَ اللَّهَ كَثِيرًا"..

💭 والنبي ﷺ كان بيعلم الناس إن الدين قائم على اليسر وبيحثهم علي ده فقال ﷺ: «إِنَّ الدِّينَ يُسْرٌ، وَلَنْ يُشَادَّ الدِّينَ أَحَدٌ إِلَّا غَلَبَهُ، فَسَدِّدُوا وَقَارِبُوا، وَأَبْشِرُوا، وَاسْتَعِينُوا بِالْغَدْوَةِ وَالرَّوْحَةِ وَشَيْءٍ مِنَ الدُّلْجَةِ»..
وكمان النبي ﷺ علمنا بكل وضوح إن سنته هي المعيار والميزان اللي نوزن عليه تديننا، فعن أنس بن مالك رضي الله عنه قال: جَاءَ ثَلاَثَةُ رَهْطٍ إِلَى بُيُوتِ أَزْوَاجِ النَّبِيِّ صَلَّى اللهُ عَلَيْهِ وَسَلَّمَ، يَسْأَلُونَ عَنْ عِبَادَةِ النَّبِيِّ صَلَّى اللهُ عَلَيْهِ وَسَلَّمَ، فَلَمَّا أُخْبِرُوا كَأَنَّهُمْ تَقَالُّوهَا، فَقَالُوا: وَأَيْنَ نَحْنُ مِنَ النَّبِيِّ صَلَّى اللهُ عَلَيْهِ وَسَلَّمَ؟ قَدْ غُفِرَ لَهُ مَا تَقَدَّمَ مِنْ ذَنْبِهِ وَمَا تَأَخَّرَ، قَالَ أَحَدُهُمْ: أَمَّا أَنَا فَإِنِّي أُصَلِّي اللَّيْلَ أَبَدًا، وَقَالَ آخَرُ: أَنَا أَصُومُ الدَّهْرَ وَلاَ أُفْطِرُ، وَقَالَ آخَرُ: أَنَا أَعْتَزِلُ النِّسَاءَ فَلاَ أَتَزَوَّجُ أَبَدًا، فَجَاءَ رَسُولُ اللَّهِ صَلَّى اللهُ عَلَيْهِ وَسَلَّمَ إِلَيْهِمْ، فَقَالَ: «أَنْتُمُ الَّذِينَ قُلْتُمْ كَذَا وَكَذَا، أَمَا وَاللَّهِ إِنِّي لَأَخْشَاكُمْ لِلَّهِ وَأَتْقَاكُمْ لَهُ، لَكِنِّي أَصُومُ وَأُفْطِرُ، وَأُصَلِّي وَأَرْقُدُ، وَأَتَزَوَّجُ النِّسَاءَ، فَمَنْ رَغِبَ عَنْ سُنَّتِي فَلَيْسَ مِنِّي»..

💭 وحذرنا النبي ﷺ كمان من مجاوزة منهجه في الوسطية والاعتدال والدخول في دائرة الإفراط لأن اللي هيعمل كده هيكون ركب زحليقة التشدد..
والزحليقة دي نهايتها هلاك -عافانا الله-
فعن عبد الله بن مسعود رضي الله عنه قال: قال رسول الله ﷺ: «هَلَكَ الْمُتَنَطِّعُونَ» قَالَهَا ثَلَاثًا..
والمتنطعون كما قال النووي في شرح مسلم: المتعمقون، الغالون، المجاوزون الحدود في أقوالهم وأفعالهم.

💭 الخلاصة 👈 الوسطية مش مجرد كلام وشعارات..
الوسطية هي طريقة حياة مبنية على فهم صحيح للكتاب والسًنة..
الوسطية هي وسطية النبي ﷺ 💚

#التدين
#السلم_والزحليقة

t.me/moh_elghaleez

💭 وجود الأب والأم في حياة أي حد نعمة كبيرة من نعم ربنا..
ونعمة وجودهم إما إننا نشكرها فتكون سلم يوصلنا لرضا ربنا..
أو نجحدها فتكون زحليقة توقعنا وتعرضنا لغضب ربنا..

💭 ولو تدبرنا كتاب الله وأحاديث نبيه ﷺ هنلاقي إن ربنا عز وجل فرض طاعة الوالدين وبرهم في غير معصية..
فهنلاقي مثلا في سورة الإسراء قوله تعالى《وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا (23) وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا》..
وهنلاقي كمان في هدي نبيه ﷺ تأكيد على أهمية بر الوالدين؛ فعن عبد الله بن مسعود رضي الله عنه: سَأَلْتُ رَسُولَ اللَّهِ ﷺ قُلْتُ: يَا رَسُولَ اللَّهِ، أَيُّ العَمَلِ أَفْضَلُ؟ قَالَ: «الصَّلاَةُ عَلَى مِيقَاتِهَا»، قُلْتُ: ثُمَّ أَيٌّ؟ قَالَ: «ثُمَّ بِرُّ الوَالِدَيْنِ»، قُلْتُ: ثُمَّ أَيٌّ؟ قَالَ: «الجِهَادُ فِي سَبِيلِ اللَّهِ» ..

💭 فبر الوالدين فرض من فروض الله..
فرض يعني 👈 سمعنا وأطعنا..
فرض يعني 👈 لو أقمناه بالطريقة اللي يحبها ربنا هيكون سلم لينا يوصلنا لرضاه سبحانه وجنته 💚

💭 بس لازم نخلي بالنا من زحليقة خطيرة جدااا في فهمنا لمعنى طاعة وبر الوالدين..
طاعة وبر الوالدين مش معناها طاعة مطلقة في كل شيء حتى لو كانت معصية..
طاعتهم في المعصية = معصية..
والنبي ﷺ نهانا عن كده وقال: "لا طَاعَةَ في مَعْصِيَةٍ، إنَّما الطَّاعَةُ في المَعروفِ"..

💭 والزحليقة التانية اللي لازم ناخد بالنا منها 👈 زحليقة عقوقهم..
لإن مش معنى أنه يحرم علينا طاعتهم في المعصية إننا نعمل معصية بعقوقهم..
طبعا نرفض ونمتنع عن فعل أي معصية يأمرونا بيها..
لكن في نفس الوقت يكون الرفض والامتناع ده بأدب..
لإن ربنا عز وجل قال في كتابه《وَوَصَّيْنَا الْإِنسَانَ بِوَالِدَيْهِ حَمَلَتْهُ أُمُّهُ وَهْنًا عَلَىٰ وَهْنٍ وَفِصَالُهُ فِي عَامَيْنِ أَنِ اشْكُرْ لِي وَلِوَالِدَيْكَ إِلَيَّ الْمَصِيرُ (14) وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطِعْهُمَا ۖ وَصَاحِبْهُمَا فِي الدُّنْيَا مَعْرُوفًا ۖ وَاتَّبِعْ سَبِيلَ مَنْ أَنَابَ إِلَيَّ ۚ ثُمَّ إِلَيَّ مَرْجِعُكُمْ فَأُنَبِّئُكُم بِمَا كُنتُمْ تَعْمَلُونَ》..

💭 وخلينا نختم بحديث النبي ﷺ "رَغِمَ أنْفُ، ثُمَّ رَغِمَ أنْفُ، ثُمَّ رَغِمَ أنْفُ" قيلَ: مَنْ؟ يا رَسولَ اللهِ، قالَ: "مَن أدْرَكَ أبَوَيْهِ عِنْدَ الكِبَرِ، أحَدَهُما، أوْ كِلَيْهِما فَلَمْ يَدْخُلِ الجَنَّةَ".

#بر_الوالدين
#السلم_والزحليقة

t.me/moh_elghaleez

💭 الأمر بالمعروف والنهي عن المنكر من شعائر الإسلام، وهو من أعظم فرائضه، والله عز وجل جعله سلم للوصول للفلاح في الدنيا والآخرة..
فقد قال الله في كتابه: "وَلْتَكُن مِّنكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ ۚ وَأُولَٰئِكَ هُمُ الْمُفْلِحُونَ"..

💭 والأمر بالمعروف والنهي عن المنكر واجب على كل مسلم بحسب استطاعته.. وأقل درجة لاااازم تكون موجودة عند كل مسلم بشكل أساسي هي الإنكار بالقلب.. يعني إنك من جوه قلبك تكره المعصية وتبقى رافضها، قال النبي ﷺ: "مَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ، فَإِنْ لَمْ يَسْتَطِعْ فَبِلِسَانِهِ، فَإِنْ لَمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيمَانِ"..
وخلي بالك من الإنكار بالقلب إنك ماتروحش لمكان المعصية برجليك وتقول هنكر بقلبي..
وإنك ماتفضلش قاعد في مكان فيه معصية وتقدر تقوم وتمشي وتقول هاقعد أنكر بقلبي..

💭 وخلي بالك 👈 الحياء من الناس مش عذر في ترك إنكار المنكر، فالحياء هنا مذموم ودليل على ضعف الإيمان، وربنا حذرنا من ده لأنه يترتب عليه الفساد في البلاد والعباد، كثرة الخبث، تسلط الأعداء، عدم استجابة الدعاء، الوقوع في الشهوات، واللعن ما حصل لبني إسرائيل {لُعِنَ الَّذِينَ كَفَرُوا مِن بَنِي إِسْرَائِيلَ عَلَىٰ لِسَانِ دَاوُودَ وَعِيسَى ابْنِ مَرْيَمَ ۚ ذَٰلِكَ بِمَا عَصَوا وَّكَانُوا يَعْتَدُونَ (78) كَانُوا لَا يَتَنَاهَوْنَ عَن مُّنكَرٍ فَعَلُوهُ ۚ لَبِئْسَ مَا كَانُوا يَفْعَلُونَ}..
فخد بالك وإنت في طريقك لربنا من زحليقة ترك الأمر بالمعروف والنهي عن المنكر..
خد بالك منها لإنك لو ركبتها وتساهلت فيها هتلاقي نفسك وقعت مرة واحدة..
وكمان خد بالك من زحليقة تانية؛ زحليقة إنك تأمر وتنهى بدون ضوابط شرعية..
الزحليقة دي خفية ومش كل الناس بتبقى شايفة إنها زحليقة..
فعشان كده لازم تتعلم آداب وضوابط الأمر بالمعروف والنهي عن المنكر..

💭 وأخيرا لازم كلنا نراجع قلوبنا ومانستسلمش للمنكر مهما كان كبير وننكره قدر استطاعتنا واحنا متلزمين بالآداب والضوابط الشرعية عشان يكون لنا عذر عند الله كما قال سبحانه: "وَإِذْ قَالَتْ أُمَّةٌ مِّنْهُمْ لِمَ تَعِظُونَ قَوْمًا ۙ اللَّهُ مُهْلِكُهُمْ أَوْ مُعَذِّبُهُمْ عَذَابًا شَدِيدًا ۖ قَالُوا مَعْذِرَةً إِلَىٰ رَبِّكُمْ وَلَعَلَّهُمْ يَتَّقُونَ".

#الأمر_بالمعروف_والنهي_عن_المنكر
#السلم_والزحليقة

t.me/moh_elghaleez

💭 ما أحوجنا اليوم للورع، -وهو ترك ما يُخشى ضرره في الآخرة-، فالورع يحفظ صاحبه ويمنعه من الوقوع في المحرمات أو أنه يقصر في فعل الواجبات، وأنه يكون على طول بيبحث عن الحق عشان يتبعه، وده من أسباب كمال التقوى..
فكلما كان العبد وَرِع كان ده سلم يوصله لرضا الله وثناءه عليه، فقد فقال الله عز وجل: "إِنَّ الَّذِينَ هُم مِّنْ خَشْيَةِ رَبِّهِم مُّشْفِقُونَ ۝ وَالَّذِينَ هُم بِآيَاتِ رَبِّهِم ْيُؤْمِنُونَ ۝ وَالَّذِينَ هُم بِرَبِّهِمْ لَا يُشْرِكُونَ ۝ وَالَّذِينَ يُؤْتُونَ مَا آتَوا وَّقُلُوبُهُمْ وَجِلَةٌ أَنَّهُمْ إِلَى رَبِّهِمْ رَاجِعُونَ ۝ أُوْلَئِكَ يُسَارِعُونَ فِي الْخَيْرَاتِ وَهُمْ لَهَا سَابِقُونَ"

💭 وفي الحديث عن النبي ﷺ قال: "إِنَّ الْحَلَالَ بَيِّنٌ، وَإِنَّ الْحَرَامَ بَيِّنٌ، وَبَيْنَهُمَا مُشْتَبِهَاتٌ لَا يَعْلَمُهُنَّ كَثِيرٌ مِنَ النَّاسِ، فَمَنِ اتَّقَى الشُّبُهَاتِ اسْتَبْرَأَ لِدِينِهِ، وَعِرْضِهِ، وَمَنْ وَقَعَ فِي الشُّبُهَاتِ وَقَعَ فِي الْحَرَامِ، كَالرَّاعِي يَرْعَى حَوْلَ الْحِمَى، يُوشِكُ أَنْ يَرْتَعَ فِيهِ، أَلَا وَإِنَّ لِكُلِّ مَلِكٍ حِمًى، أَلَا وَإِنَّ حِمَى اللهِ مَحَارِمُهُ، أَلَا وَإِنَّ فِي الْجَسَدِ مُضْغَةً، إِذَا صَلَحَتْ، صَلَحَ الْجَسَدُ كُلُّهُ، وَإِذَا فَسَدَتْ، فَسَدَ الْجَسَدُ كُلُّهُ، أَلَا وَهِيَ الْقَلْبُ"..
والشبهات 👈 هي الأمور اللي اختلط فيها الأمر على الشخص؛ هل هي حرام أم حلال؟
فاللي بيرتكب الشبهات وبيقع ويتساهل فيها هيكون من اللي ركب الزحليقة وهيقع في الحرام في الآخر لأنه معملش بينه وبين الحرام حاجز وهو أنه يسيب الشبهة..
زي كده اللي بيسيب المستحبات ويفرط فيها بغير عذر هتلاقيه غالبا هيسيب الفرائض واحدة واحدة بالتدريج لأنه هدم بنفسه الحاجز اللي بيحميها، وبردو اللي بيستسهل وبيعمل المكروهات بغير عذر هتلاقيه غالبا بعدها هيعمل المحرمات لأن نفسه هتجره واحدة واحدة.

💭 فعشان تفضل طالع على السلم وماتنزلش في الزحليقة خودها قاعدة عندك 👈 تسأل أهل العلم الثقات في الحاجة قبل ما تعملها دي حلال ولا حرام؟
ولو سألت وماوصلتش للإجابة يبقى اسمع كلام النبي ﷺ اللي قالنا وعلمنا "دع ما يَريبكَ إلى ما لا يَريبُكَ" وسيب الشبهة دي وماتعملهاش.

#الورع
#السلم_والزحليقة

t.me/moh_elghaleez

💭 تخيل معايا إنك طالع سلم طويل، بس مش مستعد بدنيا ولا نفسيا لده، هتلاقي الصعود شاق جدا، وممكن كمان تقع من التعب وماتقدرش تكمل!

💭 هو ده بالظبط طريق الالتزام والعبادة بدون علم شرعي..
يعني لو تركت طلب العلم الشرعي 👈 إما إنك هتكمل دايخ ومش شايف الطريق بوضوح وكل شوية تتخبط وتقع وهتضل الطريق في الآخر..
وإما إنك هتقع تماما ومش هتقوم.

💭 ولازم تبقى عارف إن العلم الشرعي هو زادك في الطريق لله عز وجل..
هو بوصلتك في زمن التوهان..
هو نورك ونجاتك في وقت الفتن..
واستغنائك عنه هيخليك تلف وتاخد زحليقة الانتكاس أسرع مما تتخيل لإنك باختصار ماشي في طريق ربنا وانت ماتعرفوش، ماشي من غير بوصلة.

💭 وتخيل كم السنين اللي ضاعت من عمرنا من غير علم شرعي واللي بسببها اتأخرنا في الطريق لله عز وجل وتوهنا منه وممكن نكون كمان مشينا عكس الاتجاه.

💭 بس خلي بالك مش أي حد تاخد منه العلم الشرعي 😎
لازم اللي تاخد منه يكون شيخ ثقة، موثوق في علمه وديانته ومُزكى من أهل مجاله الصالحين.

💭 وفي الختام عايز أقولك إن العلم لازم يتبعه عمل لإن الهدف مش الإجازات والشهادات وووو
إنما الهدف إننا نتعلم علشان نعمل ونعبد الله عز وجل على بصيرة..
ولا يمكن يستوي من تعلم بمن لم يتعلم..
ولا يمكن يستوي من تعلم وعمل بمن تعلم ولم يعمل..
"أَمَّنْ هُوَ قَانِتٌ آنَاءَ اللَّيْلِ سَاجِدًا وَقَائِمًا يَحْذَرُ الْآخِرَةَ وَيَرْجُو رَحْمَةَ رَبِّهِ ۗ قُلْ هَلْ يَسْتَوِي الَّذِينَ يَعْلَمُونَ وَالَّذِينَ لَا يَعْلَمُونَ ۗ إِنَّمَا يَتَذَكَّرُ أُولُو الْأَلْبَابِ".

#طلب_العلم_الشرعي
#السلم_والزحليقة

t.me/moh_elghaleez

💭 جميل إن يكون لك طموحات وأهداف في الحياة سواء في أمور دينك أو دنياك..
وجميل إنك تسعى لتحقيقهم وتكون ناجح زي اللي نجحوا بفضل الله..
بس لازم تخلي بالك لإن سعيك للنجاح إما إنه يكون سلم يقربك من ربنا أو يكون زحليقة توقعك في ذنوب كتير..

💭 وسعيك للنجاح عشان يكون سلم يقربك من ربنا ورضاه 👈 لازم يكون منضبط بضوابط الشرع..
يعني مثلا تسعى للنجاح بالحلال ومن غير غش وخداع..
تسعى للنجاح بخطوات عملية تساعدك إنك ترتقي بنفسك وتطور من قدراتك..
تسعى للنجاح وانت بتاخد بالأسباب المتاحة وقلبك متوكل على الله بصدق ويقين لأنك عارف إن كل حاجة بأمره..
تسعى للنجاح وانت بتحب الخير لغيرك زي ما بتحبه لنفسك لإن النبي ﷺ قال "لَا يُؤْمِنُ أحَدُكُمْ، حتَّى يُحِبَّ لأخِيهِ ما يُحِبُّ لِنَفْسِهِ"..

💭 أما لو سعيت للنجاح من غير التزام بضوابط الشرع 👈 هتلاقي نفسك اتزحلقت في مستنقع ذنوب ومعاصي..
هتلاقي نفسك مثلا كل همك تحقيق النجاح حتى لو كان بالحرام..
تغش.. تخدع.. تسرق مجهود غيرك..
مش مهم.. المهم تنجح..
هتلاقي نفسك بتحسد غيرك وكاره إنه يتفوق عليك..
هتلاقي نفسك مش راضي بقضاء الله وقدره..
هتلاقي قلبك قسى واتملى أمراض وبقيت حد تاني..
هتلاقي نفسك حتى لو نجحت؛ هيكون نجاحك مزيف مافهوش بركة..

💭 الخلاصة 👈 اسعى للنجاح واجتهد واتعب وخد بالأسباب المتاحة بس بشرطين ✌️
1. يكون قلبك متوكل على الله بصدق ويقين لأنه سبحانه مالك المُلك وخزائن كل شيء بيديه.
2. يكون سعيك منضبط بضوابط الشرع لأن ما عند الله لا يُنال بمعصيته.

#السعي_للنجاح
#السلم_والزحليقة

t.me/moh_elghaleez

💭 حقيقة الدنيا إنها امتحان..
والامتحان مليان أسئلة..
ومن أصعب وأهم أسئلة امتحان الحياة 👈 سؤال "شريك الحياة"

💭 اختيارات كتير بتكون أدام الطرفين؛ مال، جمال، سُلطة، عيلة كبيرة، دين وووووووو
وبيكون مطلوب من كل طرف إنه يحدد ويختار المعيار الأساسي اللي هايبني عليه اختياره النهائي في شريك الحياة..
والاختيار ده إما إنه يطلعك السلم أو يزحلقك على الزحليقة..

💭 ورغم صعوبة السؤال ده اللي بيخلي كتييير مننا خايف من اتخاذ القرار إلا إن ربنا عز وجل عطانا الحل على لسان نبيه ﷺ؛ فعن أبي هريرة رضي الله عنه عن النبي ﷺ قَالَ: "تُنْكَحُ المَرْأَةُ لِأَرْبَعٍ: لِمَالِهَا وَلِحَسَبِهَا وَجَمَالِهَا وَلِدِينِهَا، فَاظْفَرْ بِذَاتِ الدِّينِ، تَرِبَتْ يَدَاكَ"..
وقال ﷺ: "إِذَا جَاءَكُمْ مَنْ تَرْضَوْنَ دِينَهُ وَخُلُقَهُ فَأَنْكِحُوهُ، إِلَّا تَفْعَلُوا تَكُنْ فِتْنَةٌ فِي الأَرْضِ وَفَسَادٌ"..
يعني لازم يكون معيارك الأساسي هو الدين اللي لو مش موجود يبقي مافيش تفكير أساسا..
ولو موجود يبقى نفكر في باقي الحاجات هل تناسبنا ونكمل ولا مش مناسبنا ونرفض..
لإن ببساطة شريك الحياة لو ماعندوش دين حقيقي هايكون سبب رئيسي في فتنة شريكه عاجلا أم آجلا..
هتلاقي نفسك بتتكعبل في طريقك لله..
هتلاقي نفسك بترجع بالتدريج، ومرة واحدة هتفوق تلاقي نفسك تحت في نهاية الزحليقة..
وساعتها ممكن يكون الرجوع مش سهل..

💭 أما لو كان شريك حياتك عنده دين حقيقي هتلاقي نفسك مكمل طريقك لله اللي بدأته قبل الزواج بإطمئنان مهما قابلت من صعاب..
هتكمل الطريق وتطلع السلم خطوة خطوة بس مش لوحدك؛ هتكمل ومعاك شريك حياتك وذريتك..
هتكمل وهما معاك لغاية ما تتقابلوا بفضل الله في جنة الخلد 💚

#شريك_الحياة
#السلم_والزحليقة

t.me/moh_elghaleez

💭 الفرح شعور جميل كلنا بنحبه وبنتمناه 💚
لكن إما إنه يكون محمود وياخدنا ويطلع بينا السلم 🤩
أو يكون مذموم ويوقعنا ونتزحلق على الزحليقة 😑

💭 الفرح المحمود بيكون لله ومنضبط بضوابط الشرع..
فتفرح بفضل الله عليك..
تفرح بتيسير الطاعات لك..
تفرح بتثبيتك على طريق الصلاح..
تفرح بهداية العباد وقربهم من الله عز وجل..
تفرح بخروج العباد من ظلمات الكفر إلى نور الإسلام..
تفرح عشان ربنا قال في كتابه "قُلْ بِفَضْلِ اللَّهِ وَبِرَحْمَتِهِ فَبِذَٰلِكَ فَلْيَفْرَحُوا هُوَ خَيْرٌ مِّمَّا يَجْمَعُونَ" 💚

💭 ومن علامات الإيمان إن العبد يفرح بطاعته لربنا ويحزن بمعصيته زي ما قال النبي ﷺ: "مَن سرَّتهُ حسنتُهُ وساءتْهُ سَيِّئتُهُ فذلِكم المؤمنُ"..
وفرح المؤمن هنا فرح بنعمة الله وهدايته وتوفيقه..
فرح يصاحبه استشعار لمعنى (لا حول ولا قوة إلا بالله)..
فرح يصاحبه إدراك لحقيقة أنه لولا الله ما اهتدينا وما كانت أي طاعة في حياتنا..

💭 والفرح المحمود مش بس في الطاعات وأعمال الآخرة..
الفرح المحمود في كل حاجة في حياتنا..
فرح بنجاح في دراسة، بالترقي في عمل، بتحقيق حلم..
فرح في أي شيء دنيوي مافهوش معصية لله..
فافرح بكل ده بس لازم يكون فرحك منضبط بالشرع..
فتفرح من غير ما تعصي الله..
وتفرح بتوازن من غير إفراط زي ما اتعلمنا من هدي النبي ﷺ..

💭 أما الفرح المذموم فبيكون للنفس ومليان كِبر وغرور سواء كان فرح بطاعات أو حتى أمور دنيوية..
والفرح المذموم له صور كتير جدا؛ يعني مثلا تلاقي العبد فرحان بالدنيا وزينتها ومشغول بيها!
تلاقيه فرحان بالطاعة من باب المفاخرة والرياء وحب الظهور!
تلاقيه فرحان بنجاحه ومصدق إنه نجح بشطارته وبس!
تلاقيه فرحان بنعم ربنا عليه بس متعالي بيها على الناس!
تلاقيه لما يفرح يعصي الله ويقولك عايز افرح ومرة وهتعدي!
تلاقيه فرحان بانتهاء الطاعة زي الصلاة مثلا علشان تقيلة عليه!
وخطورة زحليقة الفرح المذموم هنلاقيها واضحة جدا في قصة قارون في سورة القصص..
قصته اللي بدأت بفرح مذموم وانتهت بالخسف كعقاب من الله له..

💭 الخلاصة 👈 افرح وفرح غيرك بس الفرح يكون منضبط بالشرع.

#الفرح
#السلم_والزحليقة

t.me/moh_elghaleez