نحنُ نعرفُ هذا الشعور جيّدًا ، نعرفُ ما معنى الرهبة والدموعِ التي في أعينهم ، نعرفُ مدى فظاعةِ فُقدان الأشخاصِ المُقربين منهم ، نعرفُ ما معنى أن تُهدّ الأسقفِ فوق رؤوسهم ، نعرفُ هذا الشعور الذي يجعلُكَ تركُض بلا أيِّ إدراكٍ إلى ايِّ مكانٍ لتحتمي فيه .
لقد جرّبناهُ من قبل ، لذا نشعُر الآن و كأنَّ مُصابهم مصابنا ، ولوعتهم لوعتنا ، وفقدانهم فقداننا ، وبكاؤهم بكاؤنا ، ودماؤهم دماؤنا .
اللهمَّ هوِّن عليهم ، اللهم الطف بهم ، اللهمَّ ارحمهم و أعنهم يارب .. 🖤!
#زلزال_المغرب

- زَيْد الباكير

عشتُ حياتي و أنا انتظرُ يدًا حانية تُربتُ على كَتفي ، تُطمئنني وتُخبرني أنَّ بعد كُلّ هذا الظلام الحالك نورًا سيندفقُ من إحدى الأنفاق ، انتظرتُ هذا النور عشرينَ عامًا ، ثُمّ جاءت هي ، فـ شعرتُ أنَّ الأنوارَ بدأت تشعُّ حتّى من أشدِّ السراديب حلكة ، فـ رأيتُ الحياة اكثرُ نقاءًا ، وأقلُّ بؤسًا ، و بعدَ كُلّ هذا النور ، صُفعتُ من اليدِ الحانية نفسها ، صفعةً ماعادت تجعلُني اطمئنُّ حتّى من الأيادي التي تودُّ أن تعانقني .. 🖤!

- زَيْد الباكير

- أحيانًا بفكّر يازلمة ، انو شو بقيلي بهالبلد حتّى إبقى فيها ؟ ، يعني البلد او الوطن ، هو حيث الإنتماء ، الأصدقاء ، الأهل ، ووو. 
إذا الأصدقاء والأهل كلن طلعوا ! شو اللي مخليني إتمسك بهالجدران !.
الإنتماء ؟ مُستحيل يارجل تحس بالإنتماء بهيك متاهة ! يعني الضياع ، التشتت ، الحيرة ، التمزّق ، حتّى الأحلام المسلوبة اللي بتخلّيك تسعى بكل طاقتك لحتى تحققا و ماتقدر هنن من أكتر الأسباب اللي بخلوك تفكر بالهجرة حرفيًا !
- يمكن الكرامة ، العزّة ، الكبرياء ، هنن من أهم الأشياء اللي بتخلّيك تفكر تبقى ! ، يعني انت شايف كيف الكل عم يطالب برحيلنا من أراضيهن ، يمكن بسبب تفوقنا عليهن بعدّة امور ، بتخلي الشعب حرفيًا يكرهك او يعمل المستحيل ليطالعك ! طييب انت كيف بتقبل على حالك إنّك تضل ببلد مو رايدتك ! و كُلّ الكوكب عم يهاجمك ليرجعك ع أرضك ؟
- إنّك تقدر تحقق احلامك ببلد غريبة مو رايدتك ، افضل بكتير من إنّك تبقى ببلدك و انت مو قادر تعمل شيء أساسًا ، بعدين مين قلك إنّو حتى هالبلد رايدتك!  ما هيي عم تعمل كل الأشياء الممكنة لحتى تخليك تهاجر ! و بكُلّ السبل الممكنة إذا بدك !
- طيب وبعدين ؟ وين بدنا نروح ؟ ، بكل حياة بدك تبدأها من جديد رح تعاني كتير فيها ، و بالنهاية كل الطُرق مسكّرة بوجهك ! كُلّ الطرق مسدودة ! و نحن دائمًا عم نعلّق فشلنا بهويتنا ! و ليك ! إذا اتطلعت ع كل قصص النجاح المعروفة رح تلاقي اغلبها هنن أصحاب هالهوية ! .
-كل قصص نجاح اصحاب هالهوية حققوها بعيدًا عن ارضُن ! يعني بتتطلع هيك ، بهاد المكان بدك سنين لتقدر توصل لجزء بسيط جدًّا من أحلامك هي إذا وصلت بعد كمّ هائل من السعي ، بينما بالمقابل بالمكان الآخر ، انت رح تتعذب شوي اكيد ، بس انت واثق انّك رح تحقق ، رح تثمر ، شو فائدة الزراعة بأرض جافة ؟ ، يعني بالنهاية مابعرف شو بدي قلك ، كل اللي بقدر قلك ياه ! انّو كُلّ هالأراضي اللي عم ترفضنا  قادر تثبت ذاتك فيها ، وتبني ارض تقدر تطلع فيها طوابق من النجاح وتحقيق الأحلام ! و إذا بدك تنظُر ع أرضنا اللي مافيها ريحة طمأنينة او إستقرار أو حتّى حياة هيي ذاتا عم تعمل المُستحيل لتلفظنا .. 🖤!

- زَيْد الباكير

‏"ولكنّكِ مددتِ كفّ الطمأَنينة في الحين الذي همّت بلمس خاطري يد القلق، ثمّ تسألين لماذا أحبّك! أحبّكِ لأنّكِ الأمان في دُنيا مشحونةٌ بالخوف، لأنّك ركنٌ شديد في عالمٍ كلّ أركانه واهنة." .. 🖤!

رائحةُ الشتاءِ تفوحُ في الشوارع .. 🖤🖤🖤

قلبي مع ضحايا فيضانات ليبيا 💔.
عندي صديق هنيك من اول امبارح المسا مش فاتح نت ، ادعولو 💔

- طيب هل تعلم ، انّو رُغم هيمنة الرجُل وجبروتو وقسوتو ، بيبقى إنتقام الاُنثى أقوى واشدّ قسوة من إنتقام الرجُل ؟
- و كيف هيّ بقا !!
- الرجُل باللحظات العصيبة ، بعصّب وبيضرب و بصرّخ و إذا بدو ينتقم بيستخدم القوة لأنّو هيّ سلاحو ، والرجُل الأعزب مثلًا غير الرجُل المتزوج ، بمعنى :
الرجُل الأعزب ماعندو شي يخسرو فـ بهاجم بضراوة ، بينما الرجُل المتزوّج ما بيتهدد بمقتلو ! إنّما يُهدد بمقتل أُنثاه ، و إذا لاحظت هون يُستخدم معو سلاح العاطفة ، فالعاطفة هيّ السلاح الأكبر صح ؟
- صح ، وبعدين !
- و مين بيشتهر بالعاطفة الأقوى على وجه الأرض ؟ الرجُل أم الاُنثى ؟
- الأنثى اكيد !
- لهيك انتقام الأنثى بكون عاطفي ، سواءً بالحُب أو بأيّ شيء مُمكن يهدد قوّة الرجل ، بمعنى انت لما تواجه الرجُل بالقوّة ، القوّة مُقابل القوّة ما بتنتج عن خسارة ! ، بينما القوّة مُقابل العاطفة ! ، بتساوي الإنهيار التام أكيد  .
و حتّى بتلاقي أحيانًا بمعارك الرجال لما بدنّ يوقعوا بعض شو السلاح اللي بيستخدموه ؟
- سلاح الأنثى ؟
- بالضبط ، بتلاقي الرجل مثلًا ، باعت انثى لحتّى توقع الخصم ، وبتكون وقعتو اسهل من أيّ استخدام آخر
- لوين بدك توصل ؟
- بدي وصل انو السلاح الأقوى دائمًا لتقدر توقع خصمك فيه هو العاطفة ، و العاطفة الأشد بتمتلكا الأنثى ، لهيك الأنثى لما بدا تنتقم بكون انتقاما اشد و أقسى .
وكون متيّقن دائمًا إنو السيطرة بهالكوكب ليست للقوة إنما للعاطفة .. 🖤!

- زَيْد الباكير

" من قتل اللهفة في أعيننا كُلما إلتقينا في طريق؟ من ذا الذي يخطفُ كَتفي خشيةَ الإصطدام بك وإيقاظ الحنين " .. 🖤!

16/9/2023 .
يومٌ لا يشبهُ أيّ يوم آخر ، فيهِ ولدت جنّةُ الأرض ، وفيه ولدت الخيبة ، أسمعتَ يومًا عن جنّةٍ تخلقُ خيبة ؟ .. 🖤!

- بتعرف ؟ ، في جملة قالتلي ياها بعد مرحلة منيحة من الفراق ، و كنت قول دائمًا إنّها مُبرر حتّى ماترجع ، أو بسبب محاولاتي المُتكررة لبقائها بس بعدين فهمتا منيح ، أو حسيت انو معا حق .
- وشو هالجملة ؟ ، بعدين شو ذكرك بهالشي و هالفراق صرلو سنين ؟ .
- هيك كلام لا يُنسى قد ما مر عليه من وقت و الجملة كانت : " عم حاول إرجع حبّك ، عم حاول ابقى معك ، بس في جواتي شي مش فاهمتو ، يعني هيك فينك تقول عم يمنعني من إني ارجع حسّ بشي معك ، او حتّى اقدر اتقبّلك بحياتي متل ما كنت ، كل مابجي بحكي معك اول يوم ، تاني يوم بحس اني مالازم احكي او مش قادرة احكي اساسًا ، كل ما حاول اعطيك شي من مشاعري بلاقي حالي فاضية ، مش لأنو ماعندي مشاعر ، لأ ، إنّما مش قادرة اعطيك شي لإلك انتَ تحديدًا ! "
- يعني خلصوا مشاعرا تجاهك ، ماعادت تقدر تحبكّ !
- صح
- وليش ماقالتلك هالشي دَج ، يعني خلص ، انا مش حاسة بشي معك وماني قادرة حبك ؟
- لأن يمكن عنجد كانت عم تحاول ترجع و عم تورجي اسباب عدم بقاءا بعيدًا عن هاد النوع الجاف اللي بتحسّو متواجد بين المرتبطين بعد الفراق .
- طيب انت شو اللي فهمتو من حكيا !
- اللي فهمتو انّو بعد ما يمُر عالعلاقة وقت و يصير فيها عدّة مشاكل بتخلق حالات من الجفا بـ قلب أحد الطرفين ، هو مابدو يكون هالجفا موجود بس بينوجد بحالة لا شعورية ! متل ما قرأت ، المحاولة ! إنّ الشخص بحاول مرة ومرتين وتلاتة إنّو يرجع يرمم العلاقة اللي حطمتا المشاكل ، ولكن بتخلق حالة جوا الآخر واللي هيي حالة موت المشاعر، يعني مابعود بحسلك بشي قد ماكنت مقدّم ، طبعًا هاد الشيء لا إرادي ولكن للأسف بيخلق الخيبة جوّا المقصود بالرسالة ، وقت وصولا كنت حاسس بالإستياء ، انو معقول بعد كلشي هيك كل شي يروح ! وين راح كُل هالحُب ؟ بعدين تيّقنت إنّو كل شي بروح ، حتّى الحُب ، لهيك و مع مرور الوقت صرت اتقبلها .
- بس قد ماكنت متقبلا بتتم مؤذية !
- حتّى و إن كانت مؤذية ، لكنّهُ القَدر ، ما بيعطينا كل شي ، إلّا ما ياخد مننا شي يخلّينا نعرف إنو " ليسَ كُلّ ما يتمناهُ المرءُ يدركه " .. 🖤!

- زَيْد الباكير

إيّاكَ ان تدخُل دمشق كأنّك عابر سبيلٍ فقط ، ودون أن تُعيرها اهتمامًا .
خُلقت دمشق لتتأمّلها ، لتستشعرُها ، لتعرف أنَّ كُلّ مافيها حياة ، دمشق ليست كأيِّ مدينةٍ أخرى ، إنّما هي عالمٌ مختلف تماماً عن أيِّ عالمٍ آخر .. 🖤!

تعرفينَ جيّدًا أنّ العُمر يركضُ بسرعة ، و تعرفينَ أنّنا يومًا سنصيرُ آباءًا نحملُ أعباءًا أكبر من أعباءِ الخيباتِ هذه ، لكن ماذا لو منحتينني بعضًا من هذا الوقت؟ نحنُ لم نعُد نحتاجُ إلى الأبديةّ ، إنما إلى كلمةٍ رطبةٍ تهوّن علينا مشقّات هذه الحياة حتّى ولو كانَ يومًا واحدًا فقط من بينِ كُلّ هذه السنين، كلمةٍ عذبة كـ كلمةِ مديح مُدير عملٍ لشابٍّ كفؤٍ في عمله ، مثل هذه الكلمةِ الحانيةِ التي تخففُ عليهِ بعضًا من مشقّات أعماله .
إنّما نحتاجُ إلى عناقٍ صامتٍ بلا أيِّ كلماتٍ تُزيل غيومَ هذا الجفاء الذي تولّد بيننا .
تعاليّ ولا تدعي هذا العُمر يمضي هكذا ، بلا كلمةٍ رطبة ، بلا عناقٍ صامت ، بلا ندمٍ يجعلُكِ تقضينهُ بين جُدران منزلكِ مع أعباء طفلكِ المُشاغب ورجلُكِ المُهمل . تعاليّ فقط .. 🖤!

- زَيْد الباكير

صراحةً بعد هالغياب الطويل لفرَح ما كنت متوقع أبدًا تقدّم هيك أداء مُبهر بهالمسلسل .
فرح بسيسو عم تجسّد دور الألم و الحُزن و البؤس ، و الأمّ المقهورة و المتآكلة واللي تحولت من حالة العزّ لحالة الشقاء بشكل مُرعب ، لدرجة إنّها قادر تبكيك بكل مشهد بيطلع و بكل لقطة بتظهَر فيها .. 💔

- هلأ سؤال ! يعني انت على مرّ حياتك كُلّ حياتك ، شو اكتر جملة أثّرت فيك نفسيًا ! يعني انت لليوم كل ما تتذكر هالجملة بتشعر بجوّاتك بغصّة ! او قهر !! او او او. 
- من أكتر الجُمل اللي شعرت بأذاها نفسيًا ، وحسيت وقتا بقهر كتير كبير كانت من ابي ، يعني يمكن بوقتا أنا ماكنت مقدّر قيمة هالجملة بس بعدين كان وقعها على قلبي كبير جدًّا .
- شو هي !
- جملة " أنا مو دايملك " !
يعني بهديك المرحلة لما قلّي ياها ابي ، كنت شخص عديم المسؤولية ، أيّا قصّة بدي ساويها أو أيّا شي بدي اعملو ، كنت أرمي اعبائو على ابي وفعلًا أبي كان كتف ويشيل أثقل الأعباء و بلحظة من اللحظات و بعد شوفة أبي لألي إنّي على  قدر غير كافي من المسؤولية ، نادالي وقلّي :
" ليك يا ابني ، أنا ابوك و من واجبي إنّي شيلك كلّ العُمر ، و لكن بدي ياك تتذكر شغلة وحدة ولازم ترسخها بذهنك وتتقبلا " أنا مو دايملك " ولازم تكون على قدر من المسؤولية .
بوقتا حرفيًا حسّيت بشيء ماحسيتو من سنين ! يا الله شو قاسية هالجملة !!.
وجع فظيع لدرجة البُكاء ، حزن وقهر و ما كنت عارف شو بدي جاوبو ، وبالفعل شو بدو يصير فيي بغيابو ! أوّ كيف بدي اقدر اتحمل فكرة غيابو وكون قادر على تحمُّل هالأعباء ، قمت بوقتا بست راسو وقلتلو " الله يخليلنا ياك و يديمك كل العمر " .
صرلو بعيد عنّي سنين و صرت قادر على تحمُّل أكبر الأعباء ولكن وجودو كان يخفف بعض من الأعباء وكان قوّة وسنَد لمجرد شوفتو يوميًا !
بتعرف ؟ يمكن من أكتر الأشياء اللي بتقهر بالغربة مُش وطن ، ولا انتماء و لا حتّى بيت أو تخت ، الغُربة هيي بُعدك عن ابويك ، و اديش صعبة فكرة انّن هنن عم يكبروا وانت بعيد عنن ! لهيك استمتع بكل لحظة عم تقضيها معُن وقدّر قيمتها. 
و لليوم ، ولبكرا ولبعد مية سنة ، مافي جُملة قادرة على تغيير نفسيتي و تأثّري غير جملة " أنا مو دايملك " .. 🖤!

- زَيْد الباكير

"الحُبّ هو ذكاء المسافة ، ألّا تقترب كثيرًا فتُلغي اللهفة ، ولا تبتعد طويلًا فتُنسى، ألّا تضع حطبك دفعةً واحدةً في موقد من تُحب ، أن تُبقيه مشتعلًا بتحريكك الحطب ليس أكثر ، دون أن يلمح الآخر يدك المحرّكة لمشاعره ومسار قدره " .. 🖤!

لما أقنع حدا بحب اغنية .. 🖤

_ دخلك شو متاهة هالوقت هيّ ؟
_ متاهة الوقت ؟ كيف ؟
_ يعني بلحظة سعادة الإنسان ، الوقت بيمضى بلحظة ، وبينما بلحظات التعاسة الوقت بمُر ببطئ شديد .
مثال : هلا الإنسان بـ حالة الحُب ما بيشعُر كيف مرّ كل هالوقت وتجمّعت كلّ هالذكريات ، بينما بـ حالة الفراق ، الليلة بسنة ، مُعادلة صعبة الفهم يا رجل فهمني .
_ يعني ليش دائمًا رابط فكرة السعادة والتعاسة بالحُب والفراق ؟ الحياة متنوعة وفيها شغلات اهم ، بس اوك رح جاوبك . الفكرة مِش بالوقت ، الوقت واحد ، ولكن الإحساس مختلف
_ كيف ؟
_ يعني الإحساس بالوقت هو حسب اهتمامك بالأشخاص اللي حواليك ، ولنفرُض جدلًا انّك قاعد مع شخص بتحبّو ، بهالحالة مارح تحس بالوقت لأنّك بلحظة كما تُسمّى تسارُع الأحداث ، يعني إحساسك بالوقت تلاشى وانصب كل تركيزك على هالشخص وبالتالي مارح تشعر بالوقت ، بينما انت وقاعد مع شخص ما بتحبّو مثلًا و ناطر اللحظة لتخلص من هالشخص هون تركيزك كلو مُنصبّ على انقضاء هذه اللحظة وبالتالي تفكيرك بالوقت بكون أكبر وبتحس ببطئ الوقت ، طبعا مش شرط شخص فقط ، أيّا  عمل بتحبّو وانت عم تشتغلو رح يكون كذلك بينما العمل اللي مابتحبو ، او ضغوطات المُدير اللي بتخلّيك تكره كل شي رح تشعر ببطئ الوقت ، حتى وجودك بالجامعة لما تكون المحاضرة اللي عم يقدمها دكتور مُمتع او دكتور مُمل .
_ طيب وبحالة الفُراق ؟ يعني انا اليوم كتير عم اشتقلا وعم حسّ الليلة بألف ليلة .
_ ما هيّ الفكرة نفسا ، يعني اذا كنت مستمتع باللحظة ما بتعطي للوقت اي اهميّة لهيك ما بتحس فيه ، بينما في لحظات الفُراق انت هون فارغ من كُلّ شيء و الشعور بالتعاسة والحزن بخليك تفكّر أكتر بالوقت لحتى تمضى هاللحظة
يعني خلينا نقول انو القصة ومافيها قصة اهتمام ، عمل دماغ .
- حتّى الوقت بدو اهتمام !
- اكيد ، كل شيء بهالكوكب بحاجة اهتمام ، و اهتمامك بالوقت بخلّيه أقل مرور وخاصّةً في اللحظات العصيبة او الشعور بالملل.
بينما استمتاعك بـ اللحظة وصرف نظرك الكامل عن الوقت بسبب حلاوة الجلسة مع الشخص ال بتحبو او ايا عمل كان حاببو وعم تقضي وقتك فيه رح يكون اسرع بكتير  وهكذا .. 🖤!

- زَيْد الباكير

أخافُ منّي ، أخافُ من تناقُضاتي ، أخافُ هذا الرجُل الذي بودّهِ أن يُغيّر مُجريات العالم لكنّهُ لا يقوى على التحرّك من فراشه ، أن يحظى بحُبِّ كُلِّ من هُم حوله ، لكنّهُ غير قادرًا على حُبّ نفسه .
أخافُ منّي ، أخافُ من هذا الطفل الذي بدأ يتآكل داخله ، ليظهر بعدها شخصٌ لا يشبهه ، يحقدُ بشراهة ، يكرهُ بقسوة .
أخافُ منّي ، أخافُ من هذهِ الذكريات التي و مِن الآن لا تودُّ مغادرتي فـ كيف مع التقدُّم في السن !
أخافُ منّي ، فإنّي أكبر عدوٍّ لنفسي ، أخافُ عشوائيّتي ، تلك العشوائيّةِ التي يُستحال ترتيبها .
أخافُ منّي ، أخافُ منّي جدًّا .. 🖤!

- زَيْد الباكير

" تُجرَح ، لا تتكلّم ، تحزن ، لا تتكلّم
ويتكسرُّ فيكَ حُلمك  وايضاً لا تتكلّم
ثمّ تتغيّر ، يُعاد تشكيلّك وتلوينك
الطفلُ فيكَ مخنوقٌ ، والأملُ فيك مبتورٌ
صامتٌ ، هادئٌ في ركنٍ منسي
ضحكتُك لا تشبهك مزيفة وقليلة
مؤقتة!
لا تنام ولا تصحو ، ببساطة لا تعيش
لحمُك يتساقط ، وجبتُك المفضلة بسلةِ مهملات ايضاً ، لا تكتب مجدداً ، لا رسائلَ حبٍ كالعادة ولا حتى رسائلَ صباح معتادة
وجهك يسيل ، يصبحُ ماءً بين يديك ويبكي!  ودموعك ما عادت تسعفك
لا تكفي! ، مَن قال يا صديقي
أنّ الخسارةَ ايضاً تُنسى ، أنّ الخيبة تُشفى!
ولمَ أنّ وحدي أعاني ..
أحلامي المنهارةَ فوق رأسي
ووحدتي..؟
يدي ينقصّها عشرةُ اصابعٍ تتشابكُ مع عشرتي وجسدي مصلوبٌ فاتحاً يديه كفزّاعة ، رأسي محفورٌ لكتفٍ يملأه
ولكن ليس لي من البشر لا كتفٌ
ولا حُضن ولا حتّى عشرة اصابع .
لي من البشر فوهة مظلمة وخيبات متتالية وقلب يحترق " .. 🖤!

Fact :
كروبات الفيس بوك بأكملا صايرة ناقدة موسيقيةمتذوّقة للفن العريق ، مُحاربين الفَنّ الهابط .. 🖤

- ما أكثرَ ما يُخيفُك ؟ .
- في الحياةِ عامّةً هُناك الكثير من الأمور المُخيفة التي يهلعُ منها المرء و لا يقدرُ قلبي على عدّها ، أمّا في الحياةِ خاصّتي كُلّ ما يُخيفني أن يَبقى وجهُكِ يشعُّ على ذاكرتي في كُلّ صباحٍ دون أن اتحسسه ، استشعرهُ و المسُه ، ليكون نهاري مشرقٌ ك عادتُكِ .. 🖤!

- زَيْد الباكير