የወጋገን ባንክ የዳይሬክተሮች ቦርድ እና ማኔጅመንት ከከፍተኛ ባለአክሲዮኖች ጋር በባንክ ኢንዱስትሪው እየተከሰቱ ባሉ ለውጦች ዙሪያ ውይይት አካሄዱ

አዲስ አበባ ፣ ጥቅምት 7 ቀን 2017 ዓ.ም
የወጋገን ባንክ የዳይሬክተሮች ቦርድ እና ማኔጅመንት በባንክ ኢንዱስትሪው እየተከሰቱ ያሉ ፈጣን ለውጦች በባንኩ አፈፃፀም ላይ የሚያስከትሉትን ተግዳሮቶች በመቋቋም እና መልካም እድሎችን በመጠቀም ባንኩን ለማሳደግ እና በዘርፉ ተወዳዳሪ ሆኖ እንዲቀጥል ለማስቻል እየተከናወኑ ያሉ ተግባራትን አስመልክቶ ከከፍተኛ ባለአክሲዮኖች ጋር የግማሽ ቀን የምክክር መድረክ በስካይ ላይት ሆቴል አካሄዱ፡፡
በምክክር መድረኩ ላይ በባንክ ኢንዱስትሪው እየተከሰቱ ባሉ አጠቃላይ ነባራዊ ሁኔታዎች ዙሪያ ለባለአክሲዮኖች ገለፃ የተደረገ ሲሆን የካፒታል ገበያ ስርዓት መጀመር፣ የውጪ ባንኮች ወደ አገር ውስጥ መግባት እና ብር ከውጭ ምንዛሬ አንፃር ያለው ዋጋ በገበያ እንዲተመን መደረጉን ጨምሮ አዳዲስ በወጡ የብሔራዊ ባንክ መመሪያዎች ዙሪያ ማብራሪያ ተሰጥቷል፡፡ በተመሳሳይም የባንኩ የ2023/24 በጀት ዓመት አፈፃፀም እንዲሁም የ2024/25 የመጀመሪያ ሩብ ዓመት አፈፃፀም ቀርቧል፡፡
በዕለቱ የቀረበውን ገለፃ ተመርኩዞ ሰፊ ውይይት የተደረገ ሲሆን በቀጣይም ባንኩ በዘርፉ ተወዳዳሪ ሆኖ እንዲቀጥል ለማስቻል ካፒታል ማሳደግ፣ ሃብት ማሰባሰብ፣ የዲጂታል ባንክ አማራጮችን ማስፋፋት፣ የባንኩን የብድር አሰባሰብ እና ትንተና ማጠናከር፣ የደንበኛ እርካታ ማሳደግ፣ የሰለጠነ የሰው ኃይል ማፍራት እንዲሁም ገቢ እና ትርፍን ማሳደግ ላይ ትኩረት ተሰጥቶ እንደሚሰራ ተገልጿል፡፡