🔴بەڕێوەچوونی ڕێوڕەسمی کۆتاییهاتنی پۆلەکانی منداڵان

پێنجشەممە ۱ی خەزەڵوەری ٢٧٢۵ کومیتەی منداڵانی ڤەژین بە بۆنەی کۆتاییی پۆلەکانی هاوینی ناوەندی ڤەژین ڕێوڕەسمێکی تایبەت بە منداڵان بەڕێوەبرد.

گرینگترین بەشەکانی بەرنامە:

- دەستپێکی بەرنامە به خوێندنەوەی سروودی نیشتمانیی "خوایا وەتەن ئاواکەی"

- کردنەوەی پێشانگایێک لە بەرهەمەکانی منداڵانی بەشداربوو لە کۆرسی فێرکاریی نیگارکێشیی منداڵانی لە هاوینی ئەمساڵدا

- بەخشینی بڕوانامەی زمانی کوردی بە منداڵانی بەشداربوو لە کۆرسەکەدا

- وتاری مامۆستایانی پۆلەکانی منداڵان لە سەر گرینیگیی زمانی کوردی، بابەتی پەروەردە و فێرکاریی منداڵان

- بەخشینی کتێبی چیرۆکی کوردی بە منداڵانی بەشدار بوو

🔴کۆرسە فێرکارییەکانی ناوەندی ڤەژین بۆ منداڵان

🔶زمانی کوردی بۆ منداڵان
🔶فەلسەفە بۆ منداڵان
🔶نیگارکێشی بۆ منداڵان

وەرزی پاییز

٠٨٧٣٤۵٤٧۵١٩
٠٩٣٩٢٨٩٢٨٠۵
مەریوان، باخپارک، بنکەی سەرەکیی ناوەندی ڤەژین

🔴خەڵکی بەشەرەف و خاوەن هەڵوێستی کوردستان

    باوەڕ و ئایینە کۆنەکانی ئەم نیشتمانە شادەمارەکانی فەرهەنگی ئێمەیە و بۆنە و جێژنەکانمان ئاوێتەی ژیان و بە ناخی مێژووماندا ڕۆ چوون.

    پانتاییی وێژمانی کوردایەتی لە دەستپێکی زاگرۆسەوە تا دەگاتە لێواری ئاوە ئازادەکان بەدرێژایی هەزاران ساڵ لانکەی مرۆڤایەتی و هەوێنی بەهابەرزە ئینسانییەکان بووە.

ئەم نیشتمانە مێژوویەک لە جوامێری و داهێنانی بەخشیوەتە مرۆڤایەتی و شایانی ڕێزگرتنە، و هاوکات تاریکی باڵی بە سەریدا کێشاوە، بەڵام ڕۆڵە وریاکانی ئەم وڵاتە بە ئیلهامی یەلدا و پەیامەکانی میترا باوەشیان بۆ ژیان گرتووتەوە.
   خەبات بۆ ژیان و ڕووناکی بەشێکە لە خەباتی سەردەمیانەی ئەم نەتەوەیە. بۆیە نەوەی نوێی ئێمە بە خولیای هەتاوی ڕزگاری و نەمانی کڕێوە و زستان پەیمان لەگەل خواوەندی هەتاو نوێ دەکاتەوە، پەیمان بە خاک و بەو کەسانەی لەسەر ئەو خاکە دەژین. بۆیە پاش هەزاران ساڵ ئەوینی وڵات دەبێتە سروودی نیشتمان و سووری هەتاو، هێمای خوێنی ڕۆڵەکانمان و ڕەنگی سوری ئاڵاکەمان.
    "یەلدا" بۆ ئێمەی کورد تەنیا هێمایەکی ئوستورەیی نییە، بەڵکوو واتای کۆتایی تاریکی و ئەلەندی ڕزگاریی نەتەوییە کە ئامانجی کۆتاییەکەی کەرامەتی مرۆڤ و ژیانێکی واتادارە.

     ناوەندی فەرهەنگی-هونەریی ڤەژین لە تەمەنی خۆیدا توانی بە پشتبەستن بە ڕاستییە مێژویی و زانستییەکان، ئایینی "شەوچلە" و "یەلدا" بگەڕێنێتەوە واقیعی خۆی و بیکاتەوە بە موڵکی دانیشتوانی ڕەسەنی ئەم هەرێمە؛ بۆیە لە ساڵانی ڕابردوودا بە داهێنان و دەستپێشخەریی وەک: "خەڵاتی بەڕووی زێڕین" بۆنەی یەلدای کرد بە هەوێنی یەکخستنەوەی نیشتمان لە سەرانسەری هەرێمی زاگرۆس و لە ساڵی ٢٧١٢(١٣٩١)ەوە زۆربەی ساڵەکان یەلدای پیرۆز ڕاگرتووە.

    ئەمساڵ لەکاتێکدا بەرەوڕووی یەلدا دەڕۆین کە کوردستان لە کەشێکی جیاوازدایە، قەیرانە کۆمەڵایەتی-سیاسی و ئابورییەکان تەنگیان بە ژیان هەڵچنیوە، دەرەتانی ئازادی بەرتەسک دەکرێتەوە و دوورەدیمەنێکی ناڕوون وێنا دەکرێت.
بۆیە وێڕای باوەڕمەندبوونمان بە مانا فەلسەفی و هێماییەکانی یەلدا، گۆڕانکارییە کۆمەڵایەتییەکان دەمانهێنێتە سەر ئەو باوەڕە ئەمساڵ ڕێوڕەسمی یەلدا بەڕێوە نەبەین.
باوەڕی قووڵمان بە هەڵهاتنی خۆری دوای تاریکی، ئیرادەمان بۆ ڕاماڵینی تاریکی بەهێزتر دەکات و دڵنیاین هەتاوی ئازادی لە لووتکە بەرزەکانی نیشتمانەوە هەڵدێت.
            ناوەندی فەرهەنگی-هونەریی ڤەژین
                   یەلدای٢٧٢۵(١٤٠٤) - مەریوان