" لو تعتذر و دموع عينك من محاجرها تسيل
بستان حبَّك يا قديمي صارت ورودة سُمر

وشلون تبكي فوق نعشي وأنت مرديني قتيل
و تقرا علي سبع المثاني وأنت دامرني دمر

والله لو أبدع لك من أشعار الغزل شعرٍ جزيل
و أقطف لك النجمة و أغلف من كواكبها قمر

مانيب مستغرب لو إنك رحت ما أوفيت الجميل
من يزرع الصبار غير الشوك ما يجني ثمر

هذا أنت ما والله تغيّر تحسب الواجد قليل
قنوع إلا في عطى كفوفي لو أعطيك العمر

عاهدتني في حب غيري ما تحيد و لا تميل
و أثرك مخاشر قلبي و قلبه لياليك الحمر

أخذ أسفك ماعاد لي بال على كذبك طويل
إن كان بعدك مر قربك ياشقى قلبي أمرّ

والله لو من فوق عنقي تشهر السيف الصقيل
إن رجعتك تحرَّم عليّه مثل تحريم الخمر " .

عندي قصيدة جديدة .. صاحين؟

الأيام - ظلما - والليالي عديمة راي
مشاويرها - حرمان - ودروبها حره

خذت مني أغلى ماتمنيت في دنياي
وخلت لي اللي ماتعوذّت من شره

أنا بخير والله، لو معي ذاكرة نسّاي
ماهي بـ الحنين، ولوعة الوجد مضطره

تفاصيل ماترحم وقوفي ولا ممشاي
وجعها يجي ويروح، ويعاود الكره

سلامي على المتحكمه بـ زعلْي ورضاي
وعلى الغره اللي - طوقّتني - على غره

ولا هان عُودٍ شوفته تطلق محيّاي
نسيم الهبوب يداعبه كل مامرّه

هذي جرته في مرتع الصدر رايح جاي
من أبسط حقوق الحر، خطواته الحره

يامحبوبتي،
لا زال كوعي على مركاي
تحلويت صكّات الليالي وهْي مره!

أنا أجر قلبي مع طريقي، وأجر خطاي
وأخاف أجرحه ويسيل دمي على الجره

تغربّت،
حتى عن ربوعي وعن مرباي
أحس الوطن مافيه عارض ولا حره

بعدك الليالي صوتها صوت عازف ناي
يهيّض جروح القلب، ويقلّب صورّه

إذا مابقى - حنيةٍ - تستعيد قواي
حنانيك باللي يقطع الشوق بـ المره

وقوف الحياد أستنقصه من سنين صباي
أشوف أهله فـ الغالب أصغر من الذره

لا شان الزمان يضرني واحد من عداي
ولا غالي، لا سرّ وضعي ولا ضرّه !

لو الموت مرّه؟ ماتعنيت في دنياي
- أنا أشوف لي حييّن ماتوا مية مرّه -

ياليت الزمان يعود بي لأول المشوار
قبل لا تقص أحداث الأيام تذكرتي

وتاخذني الدنيا عن الدار وأهل الدار
غريبٍ يضجّ بغصتي همس حنجرتي

شعوري شعور التايه المرغم المنهار
أعرف أولي، لكني أجهل وش آخرتي

أنا اللي بعد زود الغلا، والسلام الحار
تنازلت لـ عيون المها عن مكابرتي

يابنت المطر، مالك مصدٍ عن الأمطار
من الغيم؟ ولا من نسيمه تعطرتي؟

عرفتك، وأنا نفسي صبوره على الأقدار
قبل تختبر صكات الأقدار مقدرتي

ماعاد أعرف من كثر ماني معك محتار
تغيّرت أنا؟ ولا أنتي اللي تغيرتي!

ياشين الخطايا يوم تكبر مع الأعذار
‏تروحين كنك مخطيه .. ماتعذّرتي

‏كلام العيون .. يبرر الواقع اللي صار
‏عطاك الزمن عدة خيارات وأخترتي

‏ورحتي وأنا من يوم رحتي غريب أطوار
‏من الضيق صرت أدور في نفس دايرتي!

‏يا ليت الكلام اللي حبسته ورا الأسوار
‏مجرد - رسايل عالقه - في مذكرتي

‏على كثر ماكانت .. ليال الوصال قصار
‏على كثر ماكانت - طويله - بـ ذاكرتي .

يا جعلني ما انحرم وصلك لو انه حرام
‏أمنت بـ اقدار حبي لك و ربي غفور
‏"
‏احتاج قربك مثل ما احتاج حلو المنام
‏و الحاجه تخلي الواحد يلف ويدور

إنطقي كل الكلام اللي يمرك
خاطرك به كلمتينٍ ماهتفها

حتى بعتابك غنَج، لله درك!
كل عبره صوتك الليّن خطفها

من سماك، إلين نوصل حد بَرّك
بينهم غلطه لي سنين أقترفها

ضاع عمري بين تفاحك وسرك
جنةٍ، يغني عن الدنيا ترفها

والنسيم أن لاعب عتامك يبرك
والنجوم اللي تضيّح مكتشفها

لي شعورٍ لا لمح عينك تحرّك
دوريني بين الأهداب وطرفها

ما أذكر أول صبح به خيرك وشرّك
أذكر آخر ليلة الحزن إنتصفها

مايمر من السراب إلا صورك
لـ السحاب اللي دموعه ماذرفها

لو يموت الشوق، والفرقى تغرّك
والقلوب برودها يجرح شغفها

إذكريني .. كل ماينفكّ .. زِرّك
الفتن مايستريح اللي كشفها

وإسلكي كل الدروب اللي تجرّك
السكك ماتامن إلا اللي عرفها

وإعرفي وش ينفع، ووشهو يضرّك
الحياه ظروفها تذبح صدفها

وأبشري باللي يراضيك ويسرّك
لي خفوق أن غنوّا الفرقى عزفها .

الليلة الشعر ناره تحرق اطرافي

تعبت،
وقلبك المؤمن يناجي جرحك الخنّاس
لا يكشف عورة أوجاعك ما دام الناس هرّاجه .

‏" يضيق البال من جرح الزمان و خاطري مكسور / ‏تقول الضيق كله لا زبن .. يزبن على صدري "

صباح الخير..

‏مديت لك عمري على كف يمناك
‏وغيرك على رجوى " هلا " مد عمره

‏نزعت بيبان الثقل غايـة رضاك
‏وشرّعت لك قلبي ويا طول صبره

‏ميّت شعور وفز قلبي لـ طرياك
‏وأعرف شعوري ما يجي غير مره

يرجهنّ الثاير من الملح ما هوّد عنادي
ولا تلحقت السنين اللي مضت مني حسوفه

غير
وجهٍ
عاد
من
بعد
الصخب
والطيش
هادي
راود عيون الطواري، وأستلبيت النكوفه

كم مضى لي والسفر مسعاي، والغربه بلادي
وكل دربٍ فيه لي جرّه موردني حتوفه

يا مرابي سالف الأيام، تسقيك الغوادي
من نفيض الوسم همّالٍ ترزّم لك قنوفه

يا رجاء رد الجميل من الزمن، وين أنت غادي؟
كفّي المجرود في أطراف الهواء ضاع مْعروفه

ما عذلت النفس يوم أغتر في بعض المبادي
الضمير الحي نوب يمره الغيّ ويطوفه!

بين طيّات القصور عْن الإجادة، والتمادي
لجري ما طمنّت ضرب الحتوف العوج نوفه

ولا على الباقي خلاف إليا دفن جمري رمادي
في ليال البرد يغني عن حرير السلك صوفه

وأنت يامَبلغ طموحاتي، وشفّي، وإجتهادي
والله أني عاذر إحساسك على قل الكلوفه

في رجاء الله تلتمس من جيّتي عذر إبتعادي
جعل شيءٍ ردني عنك مساعيه مخلوفه

مد كفك، سِلّ من غمد السهر بيض الهنادي
كم لوجه الصفح و ردون الحيا تطوي كفوفه

والله أني شفتك بعين الرضا، ولا أنت عادي
مكنتّك من السنين الماضيه "لحظة مروفه"

ورحت غالي، والرضا ريّض وعد وأنا مفادي
والمفادي ما يملّ محايل النفس العيوفه .

ماتوقعتها مني لكن ..
اشتقت

اعرف الثقل لكن تواضعت لك تقدير ,
اشيلك سما ياعاشق القاع .. وتحوّل !

" دارٍ توردك المهونه / بلياها
نار الخيار ولا ظلال الفريضة "

" من يهمّش كرم قلبك وينسى وفاك
سِل سيف الجفا واخذ الحبل -واقطعه- "

«عسىٰ منّ تعذّر لي و أنا ما معاي أعذار
‏بعد منّ نسى معروفي و شاف تقصيري»
‏— بدر بن ذنبوح ‏