" حبيبي كيف امرّ بـ شارعك ما تدري اني جاي ؟
‏وانا اعرف الصباح اللي يجيبك من ذعاذيعه؟

‏يا سحر آخر قصيدة في عيون الشاعر الغوّاي
‏يا وجهٍ .. مستعد اعيش عمري في تقاطيعه

‏أمانه لا تغرك .. مرحباي ، و ضحكة محيّاي
‏ترى حزني مثل رمشك طويل و ضيعتي ضيعه " .

" مرحبا يا ضيقة الليل في الصدر الوسيع
‏مدهلً يعرف مدى الصبر و يقسّي الهشاش

‏أقلطي … و الضيف في سلمنا شانه رفيع
‏نكرمه و يعيش … معنا ولو مابه معاش

‏جيتي و حيّاك ربي ، ولا يلحق ريع
‏رغم قسوة سطوتك ، ما يقاويني عناك

‏مانيب بحاجة تصدي ، ولا درعً منيع
‏انتي الضيف المثقل على خف الفراش

‏اكرمك و ادري لو اكرمتك ان جهدي يضيع
‏مثل من سوا الجمايل وهي في بطن لاش " .

سنة سعيدة علي وعليكم يا اصحاب .. سنة سابعة برفقتكم ❤️

أتحضّن القاف كل ماهاجسي هبّك
ضرير قلب .. وهواك مْبعثر أوراقي

تمر "غيمة حنين" ولا وقف صبّك
وتعكر الجو .. قبل تعكر "أخلاقي"

فرقاك حتّم علي أعيش متلبّك
بيديك طوق النجاة وسبة إغراقي

أن مايهمك ضياعي، خاف من ربك
ثملٍ بليّاك ماني بحاجة "الساقي"

دفعت "سبعة سنين" بطاولة حبك
وبخششت نادل غلاك بعمري الباقي .

" تدور الخرايط كلها و الأراضي السبع
‏يمرونك اغلبهم و شرواي ما مَرك

‏من اللي يشوف بوحدته فيك عزوه ربع
‏و من يزهد بخير البشر في رجا شرك

‏تدابير بقعا تفرز الناس سبع وضبع
‏أذا ابكاك حظكَ عندي تشوف ماسرك

‏يموتون ما لاثوا صفا طيبين النبع
‏انا اللي ولو يقدر على الضّر ماضرك

‏مابين الاوادم ما يعوض طبوعي طبع
‏لو ان الشكل تلقى بقاياه بصورك " .

‏“ طاح من عيني عتاب وطاح دمع وطاح غالي
‏والعيون إن طاح منها شي والله ما ترده ”

"بعدك أنا المشهد اللي صعب تصويره
وتمر الايام وأوضاعي هي أوضاعي

مشتاق لـ الليل والشرهات والغيره
ومشتاق لـ أسئلتك اللي مالها داعي".

مازلت في صدر المقادير عسَّاس
ممحل، وبارق ضحكتك شعّ نوره

قلبي معك من وين ماهبّ نسناس
يرَفى صواديف الزمن في حضوره

وشلون ينسى طلّتك يا أعذب الناس
لا صار وجهك كل ساعه يزوره !

يزف الفجر خيبات الظنون ويشعل الوسواس
بشمسٍ من سناها جذوة الأوجاع وهّاجه

عليه الناس ترقب موعدك ياسيّد الهوجاس
عطاشى حرفك اللي من زمن ماشح هدّاجه

ولدت بمهمةٍ فيه الأماني كفها من فاس
تباشر في مجيّك غيمةٍ بالدمع ثجاجّه

يجوز إن المطر مولد سعاده أو بداية ياس
هزيمه ما أرجهن ولا قدرت تعاتب إزعاجه

قرا جدك بسمعك سورتينٍ كلها فـ الناس
وإلين اليوم وأرقاب البشر بالظلم منعاجه

سدلت سلومك العفرا بصدرك والسحاب لباس
ظلالك كل ماطال النهار يزين منهاجه

كبرت ومامعك غير القلم، والفكر، والقرطاس
وبيتٍ مابقى من روحه الا هالة سراجه

تعبت وقلبك المؤمن يناجي جرحك الخنّاس
لا يكشف عورة أوجاعك مادام الناس هراجه

تعبت تشوف وجهك في عيون الحزن والجلاس
تعبت تصارع المجد التليد وعاتي أمواجه

تعبت وريح همّك في ضلوعك تقرع الأجراس
تعبت وحلمك المنفي بجوفك تلمح إحراجه

تمرك سالف الذكرى ويجرح خاطرك لا باس
وتركض في مسافات السنين، وتلعن الحاجه

وتاصل لآخر حدود المواجع ناحلٍ حسّاس
تهزّك نسمة الماضي، وحلمك يسحب أدراجه".

‏أنتي خلافي ولا على قولي خلاف
‏ولا قدمي الا حبّه لـ والدينه
‏ٓ
‏ولا ثرتي الغيره ولا ظنّي أخاف
‏إن قلبه الطيّب تبي تاخذينه .

‏لازال الوحيد ، اللي سكن بالي الدواج
‏على كثر ما مر .. وعلى كثر ما واجه

‏شعوري وانا انتظره وابيّن له اني ساج
‏شعور الفقير ، اللي يكاابر على الحاجه

‏- بتصرّف*

" سلامٌ عليهم ..
بعد ماجفونا "

‏خابر حظي ماقد جاب شي مرتجيه
ماشفع لي طيب جدي وقوة منسبي

" أشوف الوجيه العابره مع طريق المار
‏ولا زال وجهك في جميع إتجاهاتي

‏وش البال ؟ لو مافيه طاري ولا تذكار
‏وش الحب ؟ لو ماكنتي أول علاقاتي

‏وش الليل؟ لو مافلّ جادل وفك زرار
‏وش الحلم ؟ لو ماصرتي أعذب طموحاتي

‏بعدك السماء والأرض والدار وأهل الدار
‏مجرد فراغ يمرني في فراغاتي

‏ماعادت طواريق القصيدة محط أنظار
‏بعد غابت عيونك عن آخر كتاباتي " .

‏ياوسيع البال ضيّقت الصدور
‏رحت ماعلّمتني وين أنت ساري

‏في غيابك مالـ خلق الله حضور
‏وفي حضورك مالهم بالبال طاري

‏صاحبى محتاج لك شعر وشعور
‏وإحتياجى شي .. ماكان إختياري

‏من متى والغصن يختار الطيور
‏من متى والبال يختار الطواري !
ِ

وعرفت أن الزمن مايستحي وأن الأمل كذاب
- إذا ماهان جرح الآدمي ماهان محبوبه -

أنا ماكنت أخاف من الليال السود يادكتور
ولا كان الكلام اللي على قلبي على لساني

نسانيس الفجر كنها ترجعني ثلاث شهور
دواك اللي صرفته مابرى جرحي ونسّاني

تموت الأمنيات ويجبر الله الخاطر المكسور
- مثل مامت في ليلة فراقه والله أحياني -

" لو تعتذر و دموع عينك من محاجرها تسيل
بستان حبَّك يا قديمي صارت ورودة سُمر

وشلون تبكي فوق نعشي وأنت مرديني قتيل
و تقرا علي سبع المثاني وأنت دامرني دمر

والله لو أبدع لك من أشعار الغزل شعرٍ جزيل
و أقطف لك النجمة و أغلف من كواكبها قمر

مانيب مستغرب لو إنك رحت ما أوفيت الجميل
من يزرع الصبار غير الشوك ما يجني ثمر

هذا أنت ما والله تغيّر تحسب الواجد قليل
قنوع إلا في عطى كفوفي لو أعطيك العمر

عاهدتني في حب غيري ما تحيد و لا تميل
و أثرك مخاشر قلبي و قلبه لياليك الحمر

أخذ أسفك ماعاد لي بال على كذبك طويل
إن كان بعدك مر قربك ياشقى قلبي أمرّ

والله لو من فوق عنقي تشهر السيف الصقيل
إن رجعتك تحرَّم عليّه مثل تحريم الخمر " .