"أقبل وأنا ماني بداله ولا مستريح
‏ينشد عن دموعي اللي مادخلها ريا
‏ٓ
‏قلت أنها دموع فرحه والكلام الصحيح
‏دموع حزنٍ قديمه ردها الكبريا".

"تجفّلني ليال الصخب وأهتني بالهمس
‏ليا ضقت وأحوف البلاد وضواحيها

‏أعرفك وأعرف دموعك اللي ذرفتيها أمس
‏لو أن الزمن ماضاق بي ماذرفتيها

‏وأعرف الصباح اللي لو يجيب نور الشمس
‏مابدّد ظلام الليلة اللي سريتيها".

"بعد تبت من طرد الهوى وأخذت عهد ودين
أعف القلب عن زيف الغرام اللي معنيني

بـ واقع تجربه مُرّه تحلواها الخفوق سنين
هقيت أنت صفحة الماضي بتبقى في عناويني

ولكني طويت الصفحه وغمضّت جفن العين
وعيني لدّت لـ ذاتي .. وطاح الحب من عيني

سليت وعشت لي فتره وأنا متسيّد السالين
منعت القلب من كل الغنادير المزاييني

وضاعت سلوتي من جيتني ياناعم الخدين
تبعك القلب ماكني مواجه مايكفيني

على درب الهوى المجهول تاخذني خطاي لـ وين ؟
مشيت وماتثاقل خاطري خطوات رجليني

تبعت الحلم ما أدري عن التأويل لي ذا الحين
رجاي أني بعيش الحب بـ أحساس المحبيني

نسيت التجربه الاولى وعهدي والزمان الشين
وجيتك مرخصٍ عمري فداك وباقي سنيني

عسى لا جيتك بجرحٍ ما أرد وبداخلي جرحين
ترى قلبي أمانه في يدك والحب معميني

عسى الجرح أن برى ماهو بـ متجرّي على السكين
وعساني من بعد ماتبت ما أجرحني بيديني

أنا شاعر غوى قلبه قبل لا يتبعه غاوين
هبوب الشوق لا هبّت على فكره تسريني

وأنا من يوم ماجيتك بعد ما أخذت عهد ودين
دريت أن قلبي اللي طول هالمده يمشيني".

‏إنك ندبة في صدري تجعلني في كل مرة أوشك أن اطمئن لأحدهم، أتذكرك ويأكلني الفزع!

مصيبة لما يصير عادي،بعد ماكان كل شي.

ليه رحت وماتركت الا صوّرك ؟
تنبش بـ صدر الحزين وماحواه

تترك اللي عاش عمره مايضرّك !
ولا يشوفك فـ العتام الا ضواه

كان حلمي في حياتي إني أسرك
وكان حلمك، ترحل وتنهي حياه !

"أنا أطيب من الظنون اذا حسبتّني غريم
‏ وأقرب لبيض النوايا من محيط السواد

‏حتى بلادي خذتني بالتعامل خصيم !
‏ماتعتبرني مواطن .. وأعتبرها بلاد".

اذا إنوجد بر المخاوف يا الأمان
‏لا يزعجك كثر الوجود من العدم

‏ماعاد باقي في صباحاتك مكان
‏ الصبح من غيّ الليالي إحتدم

‏لو يستفز الصبر أدنا شي كان
‏ماكان لي فوق الثرى موطئ قدم

‏أنا الندم ماصرت أحسه من زمان
‏ماصرت أحسه صرت أنا : الندم !

الريح هبّت ولا أدري عن مساراتي
أنا مع الريح ؟ ولا عكس وجهتها !

ما أحمل النفس .. لكن إحتمالاتي
تحمّل النفس حاجه فوق طاقتها

ضيّعت درب الكلام وشفت خطواتي
تشكلّت في قِفار الصمت جرتها

من غربة الروح كيف أجمّع شتاتي ؟
ماشتت الروح الا طول غربتها

أشره على الوقت ما أشره على ذاتي
مراحل العمر مرّت قبل حزتها

ماتاخذ من الصباح الا إبتساماتي
وماتعطي من الليالي غير عتمتها

صافحت كف السحاب وسالت أبياتي
وغنيتها .. والضلوع العوج غنتها

سود الليالي خذت مني طموحاتي
وأنا الى اليوم مدري وين ودتها !

" عقب الضما ماجازلي مورد الما
يجف ريقي ماشربت الحثاريب "

" عنيت لك رجليّ وسخرت جاهي
وحنا لنا فعلٍ يطمن اهل نجد "

واللي مُتاح من الفرص مهوب يسوى الانتهاز
انا .. احب الكايد اللي مستحيل انه يُتاح .

اضحكي لي يا ليال العمر .. دام العمر مرّه
‏و اسقي جفافٍ تفرّع، و احتضن زهرة شبابي

"انا حزين وصرت اشوف الشمس في عيني ظلام"

‏الوصل وصلك والجفى فعل يمناك ،
وحنا على الثنتين نقدر ونصبر 🤍.

"كلما يعطشني الزمن كنت الماي
‏ليه الجفاف أقدم وهدّم سنيني ؟

‏أثر الحزن لايق لمثلي وشرواي
‏لاموا ! لأن ماجاهم اللي يجيني

‏أبكي ولا إبن أمه يلاحظ بكاي
‏أنا الصبر مخلوق مني وفيني

‏واقف وأنا اللي وقفتي تسبق خطاي
‏كلٍ يبي مني .. ولا أحدٍ يبيني".

"تركته على باب المفارق ورحت وراح
‏مثل ماتركت الناس هذي على شانه".

كل ماجيت أتخلص من علامات إضطرابي
‏ماقدرت أزيّف الواقع وأصد من الحقيقه

‏أذبلت في كف لوعات الشقى زهرة شبابي
‏بعد ماطالت ليالي الهجر وإمتصت رحيقه

‏السراب اللي تبعته غيّ لين أهلك ركابي
‏كيف أوقّف والامل ماشوفه الا في بريقه !

"والله أن بعض المداهيل للعاشق دمار
‏ذكرياتٍ تشلع القلب وتكّ النسم

‏كل ماسجيت عنها ذكرت وجيت مار
‏ورحت منها دمع عيني مثل وبل الوسم

‏يتمادى صوبي الضيق وأفك الزرار
‏وأتنهّت وأتذكر وأهوجس وأبتسم

‏أقنعي يانفس بالبعد واللي صار صار
‏ ودي أنها تزين لكن ربي ماقسم".