◼ “ဦးသန်းရွှေ လက်စွဲစာအုပ်နဲ့ မင်းအောင်လှိုင် ဖော်ထုတ်ပေးတဲ့ အမာခံဒေါက်တိုင်များ”

စွမ်းအင် နဲ့ နည်းပညာလုပ်ငန်းတွေက အကျိုးအမြတ်ကြီးမားပါတယ်။

ဒီလို လုပ်ငန်းကြီးတွေကို စစ်အာဏာရှင်တွေက အလွယ်တကူလုပ်ကိုင်ခွင့်ပေးလေ့မရှိပါဘူး။

နအဖခေတ်တလျှောက်လုံးမှာ အစိုးရပိုင်အဖြစ်နဲ့ အပြည့်အ၀ ချုပ်ကိုင်ခဲ့တာပါ။

(၂၀၀၉-၂၀၁၀) ခုနှစ်တွေကြားမှာတော့ ပုဂ္ဂလိက လွှဲပေးဖို့ စီစဉ်ခဲ့ပါတယ်။

စစ်အာဏာရှင်ဟောင်း ဗိုလ်ချုပ်မှူးကြီး သန်းရွှေက ဘယ်သူတွေကို ရွေးချယ်ပြီး ဘယ်လိုပုံစံနဲ့ စဉ်းစားပြီး ပေးခဲ့သလဲဆိုတာကလည်း စိတ်ဝင်စားစရာကောင်းပါတယ်။

◼

ပထမဦးဆုံးအနေနဲ့ မြတ်မေတ္တာမွန် ကုမ္ပဏီက စက်သုံးဆီလုပ်ငန်းနဲ့ ပတ်သက်ပြီး အများဆုံး လုပ်ကိုင်ခွင့်ရခဲ့ပါတယ်။

မြတ်မေတ္တာမွန် ကုမ္ပဏီကို ဒေါက်တာဝင်းမြင့်က ပိုင်ဆိုင်တာပါ။

ဒါပေမဲ့ နောက်ကွယ်ကနေ ဦးသန်းရွှေရဲ့ မြေး ဖိုးလပြည့်က အကျိုးတူ ပါဝင်နေတာ ဖြစ်ပါတယ်။

ဒေါက်တာဝင်းမြင့် ရဲ့ သားဖြစ်သူနဲ့ အာဏာရှင်ကြီးရဲ့ မြေးဖြစ်သူ ဖိုးလပြည့်ကလည်း သူငယ်ချင်းတွေ ဖြစ်ကြပါတယ်။

နောက်ပြီး တပည့်ရင်းဖြစ်သူ ဦးရွှေမန်းရဲ့သား ဦးအောင်သက်မန်း ပါဝင်ပါတယ်။

အဲဒီနောက် အစဉ်အတိုင်းကြည့်ရင် ဦးတေဇ၊ ဧဒင်အုပ်စု ဦးချစ်ခိုင် နဲ့ ကမ္ဘောဇဘဏ်အုပ်စု ဦးအောင်ကိုဝင်းရဲ့ နီလာရိုးမ တို့ကို မြင်တွေ့ရမှာပါ။

ထူးခြားတာကတော့ ကြံ့ခိုင်ရေးပါတီကိုပါ ရံပုံငွေအတွက် အခြားအမည်ခံပြီး New Day ဆီဆိုင်တွေကို ဖန်တီးပေးခဲ့ပါတယ်။

ကိုယ်ကျိုးစီးပွားဦးစားပေးလွန်းတာကြောင့် မအောင်မြင်ဘဲ ဝန်ထမ်းစရိတ်ရှုံးတဲ့အတွက် နောက်ပိုင်းမှာ ကြံ့ခိုင်ရေးက အခြားကို ပြန်ရောင်းစားလိုက်တယ်လို့လည်း သိရပါတယ်။

ဒါကိုကြည့်ရင် ဦးသန်းရွှေဟာ သူ့ရဲ့ အရင်းနှီးဆုံး၊ အယုံကြည်ရဆုံး ဖြစ်ပြီး ဘယ်တော့မှ သစ္စာမဖောက်မယ့် ဒေါက်တိုင်တွေကိုသာ စနစ်တကျ ရွေးချယ်ပြီး စက်သုံးဆီလုပ်ငန်းကို ပေးအပ်ခဲ့တာ အထင်အရှား တွေ့ရမှာပါ။

◼

အခုလည်း မင်းအောင်လှိုင်က ရုရှကနေ စက်သုံးဆီတင်သွင်းခွင့်ပြုတဲ့ ကုမ္ပဏီတွေကို ကြည့်ရင်လည်း ရှေ့ကအတိုင်း ခြေရာတထပ်တည်း နင်းထားတာပါပဲ။

ဦးသန်းရွှေက သူ့မြေး နဲ့ ကမ္ဘောဇဘဏ်ပိုင်ရှင် ဦးအောင်ကိုဝင်းကို ပေးခဲ့သလို မင်းအောင်လှိုင်က သူ့သား နဲ့ ကမ္ဘောဇဘဏ်ပိုင်ရှင် ဦးအောင်ကိုဝင်း ကို ပေးပါတယ်။

ဦးသန်းရွှေက သူ့တပည့် သူရရွှေမန်းကို ပေးခဲ့သလို မင်းအောင်လှိုင်ကလည်း သူ့တပည့် ဖြစ်သူ စစ်တပ်ပိုင် မြန်မာ့စီးပွားရေး ကော်ပိုရေးရှင်း MEC ဥက္ကဋ္ဌ ညိုစောကို ကော်မတီ ဥက္ကဋ္ဌ ပေးပါတယ်။

အဲဒီနောက်မှာတွေ့ရတဲ့ စစ်တပ်ပိုင် Star Hight ကုမ္ပဏီနဲ့ ပြင်ပ BOC, PT Power ကုမ္ပဏီ တို့ကိုလည်း မင်းအောင်လှိုင် ရဲ့ အရင်းနှီးဆုံး စိတ်အချရဆုံး ဒေါက်တိုင်တွေအဖြစ် နားလည်သဘောပေါက်ရမှာပဲ ဖြစ်ပါတယ်။

သူ့ကိုယ်သူ ခေတ်မီပြီး ပိုထက်မြက်တဲ့သူအဖြစ် စစ်တပ်အတွင်း ဝါဒဖြန့်လေ့ရှိတဲ့ မင်းအောင်လှိုင်ဟာ ဦးသန်းရွှေ နည်းအဟောင်းကိုလည်း လက်မလွှတ်နိုင်ဘဲ ရံဖန်ရံခါ သုံးနေတာလည်း တွေ့ရလေ့ရှိပါတယ်။

ဦးသန်းရွှေ လက်စွဲစာအုပ်နဲ့ မင်းအောင်လှိုင် ကိုယ်တိုင်ဖော်ထုတ်ပေးတဲ့ ဒီဒေါက်တိုင် လူပုဂ္ဂိုလ်တွေ၊ ကုမ္ပဏီတွေဟာ စစ်အာဏာသိမ်းမှုရဲ့ နောက်ကွယ်မှာ တနည်းမဟုတ် တနည်းနဲ့ အဓိက ပါဝင်ပတ်သတ်မှုရှိနိုင်ပါတယ်။

©The Voice Of Spring - နွေဦးအသံ

https://t.me/VOStelegram
https://youtube.com/c/TheVoiceOfSpringTV
#thevoiceofspring

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက် ရပ်တည်နိုင်ဖို့ The Voice Of Spring Youtube Channel ကို Subscribe လုပ်နိုင်ပါပြီ။

သေနတ်(၃)လက်နဲ့တပ်သား(၂)ဦးက CDM ထပ်မံပြုလုပ် ||| နွေဦးအသံ |||

◼ ကိုကျားပေါက်က ပြန်လည်ဆွေးနွေးထားတာကို နားဆင်လို့ရပါပြီ။

| Speak To ME | Kyar Pauk
Episode(1) ||| နွေဦးအသံ |||

https://fb.watch/f1UoqZXZCl/

ကသာမြို့နယ် KPDF တိုက်ခိုက်သဖြင့် စကစ (၅)ဦးခန့် ထိခိုက်သေဆုံး ||| နွေဦးအသံ |||

| သုံးထပ်ကွေ့ကို လေယာဥ်နဲ့ ဗုံးကြဲလျက်ရှိ ||| နွေဦးအသံ |||

| မဖြစ်မနေ ဖြိုလှဲရမည့် ဒေါက်တိုင်များကို ဖော်ထုတ်သွားမှာ ဖြစ်ပါတယ်။ ©နွေဦးအသံ ( The Voice Of Spring ) |

◼စံနမူနာ ဖေဖေ

အမေရိကန်နိုင်ငံမှာ အသေးစားလုပ်ငန်းရှင်တဦးအဖြစ် မြန်မာပြည်ဖွားတဦးက အောင်မြင်မှုတွေ ရနေပါတယ်။

မြန်မာပြည်ဖွားအများစု လုပ်ကိုင်ကြတဲ့ ဆူရှီနဲ့ အခြားစားသောက်ကုန်လုပ်ငန်းတွေ မဟုတ်ပါဘူး။

အလှကုန်ပစ္စည်းတွေကို ကိုယ်တိုင်ဖန်တီး ထုတ်လုပ်တာပါ။

အချိန်တိုအတွင်းမှာပဲ အမျိုးသမီးလုပ်ငန်းရှင်နဲ့ ပတ်သက်တဲ့ ဆုတံဆိပ်တွေပါ ချီးမြှင့်ခံရပါတယ်။

သူက “ကျမရဲ့ စံပြပုဂ္ဂိုလ်က ကျမ အဖေပါ” လို့ ဆိုပါတယ်။

ဖခင် ဖြစ်သူကို စံနမူနာ ထားပြီး ကြိုးစားနေသူပါ။ ဒါဖြင့် သူ့ရဲ့ အဖေက ဘယ်သူပါလဲ။

◼အခွင့်အရေးသမားဖခင်

တချိန်က ရန်ကုန်စီးပွားရေးတက္ကသိုလ်မှာ စီးပွားရေးဆန်လှတဲ့ Master သင်တန်းတွေကို မှတ်မိကြဦးမှာပါ။

နအဖ ခေတ်မှာ စီးပွားရေးလုပ်ငန်းရှင်တွေရဲ့ သားသမီးတွေက ငွေအမြောက်အမြားသုံးပြီး တက်ကြရပါတယ်။

အကြောင်းရင်းကတော့ ထိပ်တန်းစစ်ခေါင်းဆောင်သားသမီးတွေနဲ့ ရင်းနှီးချင်လို့ပါပဲ။

အဲဒီလို သင်တန်းတွေကို ဒေါက်တာကံဇော် က ရန်ကုန်စီးပွားရေးတက္ကသိုလ်ရဲ့ ပါမောက္ခချုပ် ဖြစ်တဲ့အချိန်မှာ ကိုယ်တိုင်ဦးစီးပြီး ဖွင့်လှစ်ခဲ့တာပါ။

အရင်ခေတ်က စစ်အာဏာရှင်တွေရဲ့ သားသမီးတွေက ပြည်ပထွက်ပြီး ပညာသင်ကြတာ ရှားပါးပါတယ်။

ဒါကြောင့် ဒေါက်တာ ကံဇော် ရဲ့ MBA Master Of Business Administration), MPA (Master Of Public Administration), MDS (Master Of Development Studies) သင်တန်းတွေက အောင်မြင်ပါတယ်။

ဗိုလ်ချုပ်မှူး​ကြီး သန်းရွှေ သမက်၊ ဗိုလ်ချုပ်ကြီးမောင်အေးရဲ့ သမီး နန္ဒာအေး (ဦးအောင်သောင်းရဲ့ ချွေးမ) ကစလို့ ဗိုလ်ချုပ်ကြီး သီဟသူရ တင်အောင်မြင့်ဦးရဲ့ သား အပါအဝင် နအဖခေတ်ထိပ်တန်းလူကြီးသားသမီးတွေက တက်ကြပါတယ်။

တချက်ခုတ် နှစ်ချက်ပြတ် ဆိုသလိုပါပဲ။

အခွင့်အရေးသမား ပါချုပ်ဟာ အဲဒီသင်တန်းတွေက ဝင်ငွေအမြောက်အမြား ရခဲ့သလို စစ်တပ်ထိပ်တန်းအသိုင်းအဝိုင်းနဲ့လည်း ရင်းနှီးသွားပါတော့တယ်။

◼အချောင် နိုင်ငံရေးရာထူး

ပါချုပ်ဘဝမှာ စီးပွားရေးသင်တန်းတွေအပြင် အခြားလက်ဇောင်းထက်တဲ့ကိစ္စလည်း ရှိပါသေးတယ်။

အဲဒါကတော့ စစ်ဗိုလ်ချုပ်ကြီးတွေအကြိုက် နိုင်ငံရေးလှုပ်ရှားတဲ့လူငယ်တွေကို တက္ကသိုလ်ကနေ ထုတ်တဲ့နည်းနဲ့ နှိပ်ကွပ်တာပါပဲ။

ဒီလို စရိုက်နဲ့ သူ့ကို စစ်အာဏာရှင်ကြီးတွေက မျက်စိကျကြပါတယ်။

သူတို့ စစ်အစိုးရ ယန္တရားအတွက် အင်အားဖြစ်လာအောင် စနစ်တကျ မွေးမြူခဲ့ပါတယ်။

ဒါ့ကြောင့် ကိုယ့်ဖဲကိုယ်ချိုးပြီးတက်လာတဲ့ ဦးသိန်းစိန်က အမျိုးသားစီမံကိန်းနဲ့ စီးပွားရေးဖွံ့ဖြိုးတိုးတက်မှုဝန်ကြီးဌာနမှာ (၂၀၁၁-၂၀၁၂) အထိ ဒုဝန်ကြီးခန့်ခဲ့ပါတယ်။

အဲဒီနောက် ၂၀၁၃ ကနေ ၂၀၁၆ အထိ ဝန်ကြီးရာထူးကို ထပ်မံ တိုးမြှင့်ပေးလိုက်ပါတော့တယ်။

ပါချုပ်အဆင့်မှာတောင် ကိုယ်ကျိုးစီးပွားကို ကျွမ်းကျင်စွာ မြင်တတ်သူဟာ ဝန်ကြီး ဖြစ်လာချိန်မှာတော့ သူ့ရဲ့ ပိုင်ဆိုင်မှုတွေက ဘယ်လောက်တိုးပွားလာမလဲ တွေးဆကြည့်နိုင်ပါတယ်။

အဲဒီထဲကမှ အသေးစားတခုကို ထုတ်နုတ်ပြရရင် နေပြည်တော်က ဧရာဝတီလမ်းမမှာ ဖွင့်လှစ်ခဲ့တဲ့ Eden Garden စားသောက်ဆိုင်ကြီးပါပဲ။

သူ့သား ဖုန်ကံဇော် နာမည်နဲ့ ပေ(၁၀၀)ပတ်လည် မြေကွက်ကြီးမှာ တခမ်းတနား ဖွင့်လှစ်ထားတာပါ။

နောက်ပိုင်းမှာတော့ စိုးလျှပ်စစ်ဖောင်ဒေးရှင်း ကို ရောင်းလိုက်ပြီး သုခစိုး နာမည်နဲ့ စားသောက်ဆိုင် ဖွင့်ထားပါတယ်။

နအဖ ခေတ်ကနေ စစ်တပိုင်းအစိုးရခေတ်အထိ အခွင့်အရေးရဖို့ ဘာမဆို မရှက်မကြောက် လုပ်ဝံ့သူ ဒေါက်တိုင် ကံဇော် ဖြစ်ပါတယ်။

ဟုတ်ပါတယ်။ အဲဒါက သူ့ရဲ့ စံပြ အဖေပါပဲ။

◼သက်တမ်းရင့်ဒေါက်တိုက်

NLD အစိုးရလက်ထက်မှာ ကြံ့ခိုင်ရေးပါတီဝင် အမတ်လောင်းအဖြစ် ၂၀၂၀ ရွေးကောက်ပွဲမှာ ဝင်ပြိုင်ခဲ့တာကလွဲရင် နိုင်ငံရေးလှုပ်ရှားမှု ဘာမှ မရှိပါဘူး။

ဒါပေမဲ့ စစ်အာဏာသိမ်းအပြီးမှာတော့ ချက်ချင်းဆိုသလို ပြည်ထောင်စုစာရင်းစစ်ချုပ် ဖြစ်လာပါတယ်။

(၁၈)လအကြာမှာတော့ အကြမ်းဖက်စကစရဲ့ ရင်းနှီးမြှုပ်နှံမှုနဲ့ နိုင်ငံခြားစီးပွားဆက်သွယ်ရေးဝန်ကြီး ရာထူးကို ထပ်မံရရှိပြန်ပါတယ်။

အကြမ်းဖက်စကစရဲ့ ရင်းနှီးမြှုပ်နှံမှုဝန်ကြီးက သမီးဖြစ်သူကိုတော့ အမေရိကန်နိုင်ငံမှာပဲ စီးပွားရေးလုပ်ကိုင်စေလိုတဲ့သဘောမှာ ရှိပါတယ်။

◼တကယ်အခွင့်အရေး တက်ကြွသူလား

အကြမ်းဖက်စစ်ကောင်စီ ဒေါက်တိုင်ကံဇော်ရဲ့ သမီး ဖြစ်သူက Khinez Organics တည်ထောင်သူ ခိုင်ငွေနှင်းဇော် ပါ။

၂၀၂၀ ခုနှစ်၊ စက်တင်ဘာမှာ အမေရိကန်လေတပ်အရာရှိဖြစ်တဲ့ ခင်ပွန်းသည်နဲ့အတူ ပန်ဆယ်ဗေးနီးယား ပြည်နယ်ကို ပြောင်းရွှေ့ခဲ့ပါတယ်။

လက်ရှိမှာလည်း အဲဒီပြည်နယ်ရဲ့ United Way: Women United နဲ့ Lehigh Valley Launchbox Ladies Program အမျိုးသမီးအခွင့်အရေးအဖွဲ့အစည်းတွေမှာ အဖွဲ့ဝင်အဖြစ် ဆောင်ရွက်နေတာပါ။

အသက်(၃၉)နှစ်အရွယ် သားငယ်တဦးရဲ့ မိခင်တဦး တင်မကဘဲ အမေရိကန်နိုင်ငံမှာ အောင်မြင်တဲ့ လုပ်ငန်းရှင်တဦးလို့ ဆိုရင် မမှားပါဘူး။

ပြီးတော့ ခိုင်ငွေနှင်းဇော် ရဲ့ စံပြပုဂ္ဂိုလ်ဖြစ်တဲ့ ဖခင်ဟာလည်း မကွေးတိုင်းသားလို့ ဆိုရင် မမှားနိုင်ပါဘူး။

ဘာဖြစ်လို့လဲဆိုတော့ ဒေါက်တိုင်ကံဇော်က စလင်းမြို့မှာ မွေးခဲ့သူပါ။

မြန်မာနိုင်ငံမှာ အမျိုးသမီးငယ်တွေ အပါအဝင် မိခင်တွေဟာ အကြမ်းဖက်စကစရဲ့ လူသားမျိုးနွယ်ကို ဆန့်ကျင်တဲ့ရာဇဝတ်မှုတွေကို ကျူးလွန်တာကို နေ့စဉ် ခံနေကြရပါတယ်။

အထူးသဖြင့် သူ့ရဲ့ ဖခင်ဖြစ်သူ ဇာတိအရပ် မကွေးတိုင်းက အမျိုးသမီးအများစုဟာ အကြမ်းဖက်စကစရဲ့ လိင်အကြမ်းဖက်ပြီး သတ်ဖြတ်မှုကိုပါ ခါးစီးပြီး ခံစားနေကြရတာပါ။

ဒီလို လူမဆန်တဲ့ရာဇဝတ်မှုတွေကြောင့် အမေရိကန်နိုင်ငံက အကြမ်းဖက်စစ်ကောင်စီကို အရေးယူပိတ်ဆို့မှုတွေ တိုးမြှင့်လုပ်ဆောင်နေပါတယ်။

တချိန်တည်းမှာပဲ စကစရဲ့ နိုင်ငံခြားစီးပွားဆက်သွယ်ရေးဝန်ကြီးရဲ့ သမီးကလည်း သူ့ရဲ့ အသေးစားလုပ်ငန်းကို အမေရိကန်နိုင်ငံမှာ တိုးချဲ့လို့နေပါတယ်။

ခိုင်ငွေနှင်းဇော် ဟာ တကယ်ပဲ အမျိုးသမီးအခွင့်အရေးတွေ၊ အမျိုးသမီးတွေနဲ့ လူ့အခွင့်အရေး၊ တန်းတူညီမျှမှုတွေကို လေးစားသူလား။

ပန်ဆယ်ဗေးနီးယား ပြည်နယ်က Lehigh Valley အမျိုးသမီးလုပ်ငန်းရှင်အဖွဲ့အနေနဲ့ ပြန်စဉ်းစားစရာပါ။

အကြောင်းက . . .

သူ့ရဲ့ စံပြပုဂ္ဂိုလ်ဟာ သူ့အဖေလို့ ဖြေကြားထားလို့ပါပဲ။

| လုပ်ငန်း Website စာမျက်နှာကို Comment မှာဖော်ပြပေးထားပါတယ်၊ အခြားလိုအပ်တဲ့သတင်းအချက်အလက်တွေ ကူညီဖြည့်စွက်နိုင်ပါတယ် |

©The Voice Of Spring
https://t.me/VOStelegram
https://youtube.com/c/TheVoiceOfSpringTV
#thevoiceofspring

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက် ရပ်တည်နိုင်ဖို့ The Voice Of Spring Youtube Channel ကို Subscribe လုပ်နိုင်ပါပြီ။

Speak To ME | Kyar Pauk
Episode(2) | နွေဦးအသံ |

https://fb.watch/f5XO5gBHLT/

◼ ကိုကျားပေါက်က ပြန်လည်ဆွေးနွေးထားတာကို နားဆင်လို့ရပါပြီ။

#speaktome #kyarpauk #episode2 #thevoiceofspring

| ကျနော်တို့ ရဲဘော် တယောက်မှ အကျမခံနိုင်ဘူး၊ သူတို့ရဲ့ အသက်ကို ချမနင်းဘူး၊ အန္တရာယ်ကင်းကင်းနဲ့ ကျနော်တို့ တိုက်တယ် - ကိုစောကော် ( Cobra ဒုစစ်ကြောင်းမှူး ) |

◼ Cobra ဒုစစ်ကြောင်းမှူး ကိုစောကော်နှင့် စကားပြောခြင်း | နွေဦးအသံ |

“ကျနော်တို့ဘက်က လူသားအသက်တွေဖြစ်တဲ့အတွက်ကြောင့် ကျနော်တို့ ရဲဘော်တယောက်မှ အကျမခံနိုင်ဘူး။ ဗျူဟာအရ နည်းနည်း ဆုတ်လိုက်တာပေါ့။”

Cobra ဒုစစ်ကြောင်းမှူး ကိုစောကော်က ပြီးခဲ့သည့် ရက်ပိုင်းအတွင်း တိုက်ပွဲပြင်းထန်ခဲ့သည့် သုံးထပ်ကွေနှင့် ပတ်သက်ပြီး သူ၏ သဘောထားကို ပြောလာခြင်း ဖြစ်သည်။

စစ်ကော်စီတပ်များ လပေါင်းများစွာ ရှေ့သို့ဆက်မရဘဲ မရှုမလှနှင့် အသေအဆုံးများပြားလှသည့် နေရာမို့ သုံးထပ်ကွေ့က ထင်ရှားလာသည်။

ပြီးခဲ့သည့် ဩဂုတ်(၁၉)ရက်မှ စတင်ပြီး တိုက်ပွဲများ ရက်ဆက်ဆိုသလို စိပ်လာသည်။

ဩဂုတ်(၂၃)ရက်တွင် (၆၀)မမ၊ (၈၁) မမ၊ (၁၂၂)မမ ဟောက်ဝစ်ဇာအမြှောက်များ၊ (၈၄)မမ ‌နှင့် MLRS အတွဲလိုက်ပစ် ဒုံးများဖြင့် တရစပ်ပစ်ခတ်သည်။

တိုက်လေယာဉ် (၂) စီး အသုံးပြု၍ ကလက်စတာ ဗုံးများ၊ ပေါင် (၅၀၀) ဗုံးများ ကြဲချကာ လေကြောင်းတိုက်ခိုက်မှုကို ပြုလုပ်ခဲ့သည်။

◼ Cobra စစ်သည်တွေက သုံးထပ်ကွေ့ကနေ ဆုတ်ခွာလိုက်တယ်ကြားတယ်။ ဘာကြောင့်ပါလဲ။

ကျနော်တို့ လူငယ်တွေကျတော့ သွားဆို သွားမှာပဲလေ၊ တက်ဆို တက်မှာပဲ၊ ပြီးတော့ ဒီစစ်ကောင်စီ ပြိုကျဖို့က သူတို့ ဘာမဆို လုပ်မှာပဲ။

ကျနော်တို့က အဲဒီဟာကို သိတယ်။ သိပေမဲ့ ကျနော်တို့က သူတို့ရဲ့ အသက်ကို ချမနင်းဘူး။

အန္တရာယ်ကင်းကင်းနဲ့ ကျနော်တို့ တိုက်တယ်။ ဆုတ်သင့်တဲ့နေရာမှာ ဆုတ်တယ်။

ပြီးတော့ ဒီသုံးထပ်ကွေ့ ဆိုတာ ကျနော်တို့ စခန်း မဟုတ်ဘူး။

သူတို့ တက်လာမယ်ဆိုတာ သိလို့ သွားစောင့်ပစ်တဲ့နေရာပဲ။

အဲဒီတော့ ဗျူဟာအရ ဆုတ်ပေးလိုက်တယ်ဆိုတာ ကိစ္စ မရှိဘူး။ လှေကားထစ်တထစ်လောက်ပဲရှိတယ်။ အဝေးကြီးမဆုတ်ဘူး။ လှမ်းမြင်ရတဲ့ နေရာလောက်ပဲ ကျနော်တို့ ဆုတ်တယ်။

◼ စစ်ကောင်စီဘက်က (၁၀၀)ကျော်လောက် အတုန်းအရုန်းနဲ့ သေသွားတယ်လို့ သိရပါတယ်။ သတ်ကွင်းကြီးကို သိသိကြီးနဲ့ အကြမ်းဖက်စစ်ကောင်စီက ဘာအတွက် သူ့ရဲဘော်တွေကို အသေခံခိုင်းတာလဲ။

သူတို့က ဘာမှ သိမှာ မဟုတ်ဘူး။ သတင်းအမှောင်ချထားခံရတယ်။ ပြီးတော့ သူတို့ရဲ့ ရာထူးတည်မြဲရေးအတွက်ပဲ သူ့လက်အောက်ငယ်သားကို သတ်ကွင်းထဲကို မောင်းတင်လိုက်တာပဲ။

သူတို့ဘက်ကတော့ အယောက်ရာချီပြီး သေတာကို မတင်ပြဘူး။ အဲဒါတွေကို ဖြတ်စားမယ်။ အပေါ်မတင်ဘဲ ဒီလူတွေ ရှိတယ်ဆိုတဲ့အကြောင်း ပြစားတယ်။ အပေါ်က သိတာနဲ့ ဒီကောင်တွေ တန်းပြီး ပြုတ်မှာ။

◼သတ်ကွင်းကြီးထဲ အသေခံပြီး ဝင်နေရတဲ့ အကြမ်းဖက်စစ်ကောင်စီတပ်သားတွေကို ဘာပြောချင်လဲ။

မပစ်ဘဲနဲ့ လက်နက်ချမယ်ဆိုရင်တော့ . . . ကျနော်တို့ကတော့ လက်ဖျားနဲ့တောင် မထိဘူး။ အဲဒီလိုမျိုး တက်လာတယ်ဆိုရင်တော့ သူပစ်ကိုယ်ပစ်ဆိုရင်တော့ အားလုံးကို ပစ်ရမှာပဲလေ။ ကိုယ်ရှောင်လို့မှ မရတာ။ ကိုယ့်ကလေးတွေလည်း အသက်နဲ့ကိုး။ အဲဒီတော့ ပစ်ရတာပေါ့။

မယုံလို့ရှိရင် ကျနော်တို့ထဲမှာ ရှိတဲ့ လက်နက်ချတဲ့ စစ်ကောင်စီက အဖွဲ့တွေကို သွားမေးကြည့်လိုက်။ ကျနော်တို့ လက်ဖျားနဲ့တောင် မထိဘူး။ ပြီးတော့ သူတို့ ဘယ်လောက်ပျော်လဲဆိုတော့ ကျနော်တို့ ပြန်မောင်းထုတ်လို့တောင် မရဘူး။ ဒီမှာပဲ နေမယ်ဆိုတဲ့ဥစ္စာတွေချည်းပဲ။

◼Cobra စစ်ကြောင်းက အန္တရာယ်အကင်းဆုံး ဗျူဟာနဲ့ တိုက်တာက ဘာကြောင့်ပါလဲ။

ဒီကလေးတွေက အမှန်တရားကို နားလည်တယ်။ ပြီးတော့ ဒီနိုင်ငံမှာ အကျိုးတကယ်ရှိတဲ့ကလေးတွေ၊ ဒီထဲမှာ သူတို့ဝင်ပြီဆိုကတည်းက သူတို့အမှားအမှန်ခွဲခြားတတ်ပြီ။ အဲဒီတော့ ဒီကလေးတွေရဲ့ အသက်ကို တန်ဖိုးထားတယ်။

◼ဖြည့်စွက်ပြောချင်တာရော ရှိပါသလား။

ပြည်သူလူထုရဲ့ အကူအညီတွေအများကြီးရခဲ့တာမို့လို့ ပြည်သူလူထုကို ကျေးဇူးတင်ပါတယ်။

©The Voice Of Spring
https://t.me/VOStelegram
https://youtube.com/c/TheVoiceOfSpringTV
#thevoiceofspring #Cobra

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက် ရပ်တည်နိုင်ဖို့ The Voice Of Spring Youtube Channel ကို Subscribe လုပ်နိုင်ပါပြီ။

◼ CDM အချို့ရဲ့ ရင်ဖွင့်သံ၊ လူငယ်အချို့ရဲ့ နာကျင်သံ၊ အိမ်ရဲ့အဝေးကို ရောက်နေသူတို့ရဲ့ စကားသံတွေကို ကိုကျားပေါက်က ပြန်လည်ဆွေးနွေးထားပါတယ်။

https://fb.watch/fcNW-rSwQn/

Speak To Me | Kyar Pauk
Episode(3) | နွေဦးအသံ |

◼သင်္ကန်းရုံ စစ်မှုထမ်းများရဲ့ သူလျှို ခြေကုတ်စခန်း ပြိုလဲခြင်း

သတင်းသုံးသပ် | နွေဦးအသံ |

“ဒီမိုကရေစီ တိုင်းပြည်ဖြစ်သွားလို့ အရမ်းတိုးတက်သွားရင် ဗုဒ္ဓဘာသာ ကွယ်သွားလိမ့်မယ်”

ဒီစကားကို သဘာဝရိပ်သာဘုန်းကြီးက ပြောဆိုခဲ့တာပါ။

ဗုဒ္ဓဘာသာထွန်းကားဖို့ မြန်မာ​တွေက စစ်အာဏာရှင်လက်အောက်မှာ ဆင်းဆင်းရဲရဲနဲ့ အဖိနှိပ်ခံနေကြရမလိုပါပဲ။

ဒီလို အတွေးအခေါ်တွေက ဘုန်းကြီး အများစုမှာ ရှိနေကြတာပါ။

ထင်ရှားတဲ့ သီတဂူဘုန်းကြီးတို့ စစ်ဖိနပ်အောက်ကို ဝင်သွားတာလည်း အဲဒီအတွေးအခေါ်ကြောင့်ပါပဲ။

နောက်တခုက ဒီမိုကရေစီ နိုင်ငံမှာ ပညာရေးနဲ့ သတင်းမီဒီယာက အရှိန်အဟုန်နဲ့ ဖွံ့ဖြိုးပါတယ်။

လူငယ်တွေက ဘာမဆို အလွယ်တကူ လက်မခံဘဲ ကိုယ်တိုင်လေ့လာပြီး ဝေဖန်သုံးသပ်မှုက အားကောင်းလာပါတယ်။

ဘုန်းကြီးတွေ ဘာပြောပြော . . . သတည်း ချပေးတိုင်း သာဓု မခေါ်ကြပါဘူး။

ဒီအခါမှာ သင်္ကန်းလေးရုံ၊ ပုလ္လင်ပေါ် ခန့်ခန့်ကြီးနဲ့ သက်တောင့်သက်သာထိုင်ဖို့ ခက်လာပါတယ်။

လူငယ်တွေရဲ့ မေးခွန်းတွေ၊ ဆန်းစစ်မှုတွေက ဘုန်းကြီးတွေရဲ့ ဗုဒ္ဓအတွေးအခေါ်ကို နားလည်၊ တတ်ကျွမ်းမှု ရှိ မရှိ ကို လက်တွေ့အကဲဖြတ်ပြီး စစ်တမ်းထုတ်နေသလိုပါပဲ။

ထေရဝါဒ တံဆိပ်ကပ် ရှေးရိုးစွဲ သီရိလင်္ကာက မိရိုးဖလာအယူအဆတွေကို ဒီနေ့ခေတ်လူငယ်တွေရဲ့ သဘာဝကို သိမြင်နားလည်မှုနဲ့ ချိန်ထိုးကြတဲ့အခါ ဘုန်းကြီးအများစုက ကြောက်ရွံ့ပါတယ်။

ကလေးတွေရဲ့ မေးခွန်းကို အဖြေမပေးနိုင်ဘဲ ဆွေးနွေးပွဲတွေလုပ်တဲ့ ဦးဆေကိန်တို့လည်း အဲဒီထဲမှာ ပါဝင်ပါတယ်။

ဗုဒ္ဓရဲ့ အလိုကျ ဝိဘဇ္ဇ ၊ ဝေဖန်ပိုင်းခြားသုံးသပ်မှု ထွန်းကားလာမယ့် ပညာရေးကို ရမယ့် နိုင်ငံရေးစနစ်ကို အဆိုးမြင်ကြပါတယ်။

ဒါနဲ့ပဲ စစ်တပ်ကသာ အမျိုး ဘာသာ သာသနာကို စောင့်ရှောက်မယ့် အဖွဲ့အစည်းအဖြစ် ဗုဒ္ဓ နေရာမှာ၊ ဓမ္မနေရာမှာ စစ်ဖိနပ်ကို ထားပြီး ကိုးကွယ်ဆည်းကပ်ကြတဲ့ ဘုန်းကြီးတွေ များလာပါတယ်။

အဲဒီဘုန်းကြီးတွေက လူထုကို ဆန့်ကျင့်ပြီး လူထုကို သတ်ဖြတ်အနိုင်ကျင့်နေတဲ့ စစ်တပ်အတွက် မျက်နှာပြောင်တိုက်ပြီး လော်ဘီအလုပ်ကို လုပ်ကြတယ်။

နောက်ဆုံးမှာတော့ စစ်တပ်အတွက် သတင်းယူ သတင်းပေး အလုပ်ကို ပြည်တွင်းကနေ ပြည်ပမထိ ခြေဆန့်ပြီး လုပ်လာကြတဲ့အထိပါပဲ။

အဲဒီထဲမှာ ခြေလှမ်းအသွက်ဆုံး လှမ်းခဲ့တာက သဘာဝတရားရိပ်သာဘုန်းကြီးပါပဲ။

ထိုင်း-မြန်မာနယ်စပ်၊ မဲဆောက်မြို့၊ မယ်ပ ဘက်မှာ သုံးထပ်တိုက်ကြီးကို ငှားပါတယ်။

တရားမဝင် နယ်စပ်ဖြတ်ကျော်လာတဲ့ မဘသ၊ စစ်တပ်ထောက်ခံသူ၊ စရဖ လို့ ယူဆရတဲ့ သတင်းပေးတွေကို သင်္ကန်းဝတ်စေပါတယ်။

မြန်မာနိုင်ငံရေးသမားတွေ နေကြတဲ့ ရပ်ကွက်တွေထဲ ဆွမ်းဆန်စိမ်း အလှူခံဖို့ ကြိုးစားပါတယ်။

ရွှေ့ပြောင်းမြန်မာအလုပ်သမားတွေဆီ ဘာသာရေးအကြောင်းပြ ချဉ်းကပ်ဖို့ လုပ်ပါတယ်။

အဲဒီနောက်မှာတော့ နိုင်ငံရေးနဲ့ ပတ်သက်ပြီး စည်းရုံးဖို့ ခြေလှမ်းပြင်တာပါပဲ။

ဒါကို သိကြတဲ့ ရွှေ့ပြောင်းမြန်မာလူမှုအသိုင်းအဝိုင်းက မပတ်သတ်ကြပါဘူး။

ထိုင်း၊ မြန်မာနယ်စပ်က ဒုက္ခသည်စခန်းတွေဆီ စားနပ်ရိက္ခာ လှူဖို့လည်း သဘာဝရိပ်သာက ကြိုးစားပါတယ်။

လှူပြီးတာနဲ့ မပြန်ဘဲ တညအိပ်ခွင့်တောင်းဆိုတာမျိုးကြောင့် မရိုးသားတဲ့အတွက် ဒေသခံအဖွဲ့အစည်းတွေက သူတို့ရဲ့ အလှူကိစ္စကို ငြင်းဆိုခဲ့ကြပါတယ်။

ဘာသာရေးစည်းကမ်းတင်းကြပ်တဲ့ ထိုင်းနိုင်ငံရဲ့ ဥပဒေက ဘုန်းကြီးကျောင်းမဟုတ်တဲ့ အဆောက်အဦးမှာ ဘုန်းကြီးတွေ နေခွင့် မရှိပါဘူး။

ဩဂုတ်(၂၉)ရက်က ဝင်ရောက်စီးနင်းရှာဖွေစစ်ဆေးတဲ့အခါ အထောက်အထားမဲ့ ဘုန်းကြီး၊ မယ်သီလရှင် (၃၈)ဦးကို ဖမ်းဆီးရမိပြီး အဲဒီလူတွေကို ချက်ချင်းလူဝတ်လဲစေပါတယ်။

မဲဆောက်မြို့က စစ်အာဏာရှင်ဆန့်ကျင်ရေးလှုပ်ရှားသူတွေကို စုံစမ်းပြီး စစ်တပ်ဆီ သတင်းပေးဖိုနဲ့ အချို့ကတော့ ဘန်ကောက်ထိ သွားပြီး မြန်မာစစ်တပ်ဆီ သတင်းထောက်လှမ်းဖို့အတွက် နေထိုင်ကြတယ်လို့ ဝန်ခံထွက်ဆိုတဲ့အကြောင်း ထိုင်းသတင်းမီဒီယာတွေက ဖော်ပြကြပါတယ်။

ဗုဒ္ဓ ရဲ့ ဓမ္မ အတွက် အလုပ်လုပ်နေရင်တော့ ဘာတွေပဲ ဝတ်ထားပါစေ၊ သာသနာ့ဝန်ထမ်းပါပဲ။

သင်္ကန်းကြီးရုံထားပြီး စစ်တပ်အတွက် အလုပ်လုပ်နေရင်တော့ အကြမ်းဖက်စကစရဲ့ စစ်မှုထမ်းပဲ ဖြစ်ပါတယ်။

ဘာပဲဖြစ်ဖြစ် စစ်အုပ်စုက လက်သပ်မွေးမြူထားတဲ့ သဘာဝရိပ်သာဘုန်းကြီးရဲ့ သူလျှိုဌာနချုပ်ဖြစ်ရေး အားထုတ်မှုကတော့ မဲဆောက်မြို့မှာ ပျက်စီးသွားပြီ ဖြစ်ပါတယ်။

©The Voice Of Spring
https://t.me/VOStelegram
https://youtube.com/c/TheVoiceOfSpringTV
#thevoiceofspring

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက် ရပ်တည်နိုင်ဖို့ The Voice Of Spring Youtube Channel ကို Subscribe လုပ်နိုင်ပါပြီ။