◼️ရွှေဘို မဟာစည်ဘုန်းကြီးကျောင်းကို စစ်တပ်လေယာဉ်နဲ့ ဗုံးကြဲ၊ သက်ကြီးရွယ်အိုနဲ့ စစ်ရှောင်များသေဆုံးထိခိုက်

၁၁ အောက်တိုဘာ ||| နွေဦးအသံ |||

စစ်ကိုင်းဒေသ၊ ရွှေဘိုမြို့နယ်မှာ မဟာစည်ဆရာတော်ဘုရားကြီး သီတင်းသုံးခဲ့တဲ့ ကျောင်းကို အကြမ်းဖက်စစ်တပ်က အောက်တိုဘာ ၁၁ ရက်၊ မနက် ၁၁ နာရီ ၄၄ မိနစ်မှာ လေကြောင်းတိုက်ခိုက်ခဲ့တာကြောင့် သက်ကြီးရွယ်အိုတွေနဲ့ စစ်ရှောင်ပြည်သူတွေထဲမှ ၂ ဦး သေဆုံးခဲ့တယ်လို့ သိရပါတယ်။

ဆိပ်ခွန်ကျေးရွာရှိ သမိုင်းဝင်မဟာစည်ဘုန်းတော်ကြီးကျောင်းကို အကြောင်းမဲ့ လေကြောင်းမှ ဂျက်ဖိုက်တာနဲ့ ၃ ကြိမ် ဗုံးကြဲတိုက်ခိုက်ခဲ့တာကြောင့် ဥပုသ်သီလယူနေတဲ့ သက်ကြီးရွယ်အိုတွေနဲ့ စစ်ရှောင်ပြည်သူတွေထဲမှ ၂ ဦး သေဆုံးပြီး ၈ ဦးထက်မနည်း ထိခိုက်ဒဏ်ရာရခဲ့တယ်လို့ ဆိုပါတယ်။

ဒါ့အပြင် ဓမ္မာရုံ၊ ရိပ်သာဆောင်၊ ဇရပ်စောင်းတန်းတွေနဲ့ အဆောက်အဦး အများအပြား ပျက်စီးဆုံးရှုံးခဲ့ရတယ်လို့ ရွှေဘိုမြို့နယ် ပြည်သူ့ကာကွယ်ရေးအဖွဲ့ (ပကဖ) က မှတ်တမ်းဓာတ်ပုံတွေနဲ့တကွ ထုတ်ပြန်ထားတာပါ။

စစ်ကောင်စီတပ်ဟာ အရပ်သားပြည်သူတွေနဲ့ ဘုရားကျောင်းကန်၊ စာသင်ကျောင်း၊ ဆေးရုံဆေးခန်းတွေကိုပါ ပစ်မှတ်ထား တိုက်ခိုက်လျက်ရှိတာကြောင့် ပြည်သူတွေအနေနဲ့ လေယာဉ်နဲ့ လက်နက်ကြီးသံတွေ ကြားရပါက လုံခြုံရာသို့ အမြန်ဆုံးရှောင်ရှားကြဖို့နဲ့ မလိုအပ်ဘဲ လူစုလူဝေးမလုပ်ကြဖို့ ရွှေဘိုမြို့နယ် (ပကဖ)က သတိပေးထားတာ တွေ့ရပါတယ်။

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️‌တမူးခရိုင်တပ်ရင်း ၂ လုပ်ငန်းညှိနှိုင်းအစည်းအဝေးပြုလုပ်၊ ရှေ့လုပ်ငန်းစဉ်နဲ့ ရဲဘော်တွေရဲ့ လိုအပ်ချက်များဆွေးနွေး

၁၂ အောက်တိုဘာ ||| နွေဦးအသံ |||

ပြည်သူ့ကာကွယ်ရေးတပ်မတော်၊ အမှတ် ၁ စစ်ဒေသ၊ တမူးခရိုင် တပ်ရင်း ၂ ရဲ့ စစ်မြေပြင်တပ်မှူးတွေပါ တက်ရောက်ခဲ့တဲ့ တပ်ရင်းလုပ်ငန်းညှိနှိုင်းအစည်းအဝေးကို အောက်တိုဘာ ၁၁ ရက်မှာ ကျင်းပပြုလုပ်ခဲ့ပြီး ရှေ့လုပ်ငန်းစဉ်တွေ၊ ရှေ့တန်းရဲဘော်တွေရဲ့ လိုအပ်ချက်တွေ ဆွေးနွေးခဲ့ကြတယ်လို့ သိရပါတယ်။

အစည်းအဝေးကို ရှေ့တန်းစစ်မြေပြင်မှာ တာဝန်ထမ်းဆောင်နေတဲ့ စစ်မြေပြင်တပ်မှူးတွေ၊ လက်ရုံးတပ်ဖွဲ့၊ တပ်ရင်းဆေးတပ်ဖွဲ့၊ တပ်ရင်းရုံးအဖွဲ့၊ အရံတပ်ဖွဲ့ခေါင်းဆောင်တွေနဲ့ သက်ဆိုင်ရာအရာရှိတွေ တက်ရောက်ခဲ့ကြပြီး မနက် ၁၀ နာရီမှ ညနေ ၃ နာရီခွဲအထိ ပြုလုပ်ခဲ့ကြတယ်လို့ ဆိုပါတယ်။

အစည်းအဝေးမှာ ရှေ့ဆက်ဆောင်ရွက်မယ့် တပ်ရင်းလုပ်ငန်းစဉ်တွေအပြင် အုပ်ချုပ်ရေးနဲ့ စည်းရုံးရေးစွမ်းရည် မြှင့်တင်ရေး၊ ထုတ်လုပ်ရေးလုပ်ငန်းတွေ၊ ဆေးတပ်ဖွဲ့ရဲ့ လိုအပ်ချက်တွေနဲ့ ရှေ့တန်းရဲဘော်တွေရဲ့ လိုအပ်ချက်တွေကို ဖြည့်ဆည်းဆောင်ရွက်ပေးနိုင်ရေး အဓိကထား ဆွေးနွေးခဲ့ကြတယ်လို့ ဖော်ပြထားပါတယ်။

ဒါ့အပြင် ပြည်သူကို ဗဟိုပြုပြီး ပြည်သူတွေ ယုံကြည်အားကိုးထိုက်တဲ့ ပြည်သူ့တော်လှန်ရေးတပ်မတော်ဖြစ်လာစေဖို့ ဆက်လက်ကြိုးပမ်းသွားမှာ ဖြစ်တယ်လို့ ကတိသစ္စာပြုကြောင်း တမူးခရိုင် အမှတ် ၂ တပ်ရင်းက သတင်းထုတ်ပြန်ထားတာ တွေ့ရပါတယ်။

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။