◼️နတ်မောက်မှာ ပြည်သူကိုနှိပ်စက်ဆက်ကြေးကောက်နေတဲ့စစ်အုပ်စုကို မိုင်းဆွဲတိုက်ခိုက်ရာ စကစ ၃ ဦးသေဆုံး

၅ စက်တင်ဘာ ||| နွေဦးအသံ |||

မကွေးဒေသ၊ နတ်မောက်မြို့နယ်အရှေ့ခြမ်းမှာ လှည့်လည်စစ်ကြောင်းထိုးပြီး ပြည်သူကိုနှိပ်စက်၊ ဆက်ကြေး‌ကောက်နေတဲ့ အကြမ်းဖက်စစ်တပ်ကို မြို့နယ် ပကဖ နဲ့ပူးပေါင်းတပ်ဖွဲ့က စက်တင်ဘာ ၃ ရက်၊ မနက် ၇ နာရီခွဲခန့်မှာ မိုင်းဆွဲတိုက်ခိုက်ရာ စစ်ကောင်စီတပ်ဖွဲ့ဝင် ၃ ဦး သေဆုံးခဲ့တယ်လို့ သိရပါတယ်။

ပြည်သူ့အိုးအိမ်တွေကို မီးရှို့ဖျက်ဆီးတာ၊ ရွှေငွေပစ္စည်းတွေကို ခိုးယူတာနဲ့ ပြည်သူတွေကို ရိုက်နှက်ငွေညှစ်တာတွေလုပ်နေတဲ့ စစ်တပ်စစ်ကြောင်းကို ထနောင်းကုန်းကျေးရွာမှ ပြန်ထွက်လာစဥ် သရက်ချောင်းနဲ့ ကံလှကျေးရွာကြားမှာ ပဒေသာမိုင်းတွေနဲ့ မိုင်းဆွဲတိုက်ခိုက်ခဲ့တယ်လို့ ဆိုပါတယ်။

အဲဒီတိုက်ခိုက်မှုကြောင့် စစ်ကောင်စီတပ်ဖွဲ့ဝင် ၃ ဦး သေဆုံးပြီး ၁၅ ဦးခန့် ထိခိုက်ဒဏ်ရာရခဲ့တယ်လို့ နတ်မောက်မြို့နယ် ပြည်သူ့ကာကွယ်ရေးအဖွဲ့ (ပကဖ) က ထုတ်ပြန်ထားတာပါ။

နတ်မောက်မြို့နယ် ပြည်သူ့ကာကွယ်ရေးအဖွဲ့ (ပကဖ) နဲ့ အမှတ် ၉၀၃ တပ်ရင်း ဂဠုန် PDF တပ်ဖွဲ့တို့က ပူးပေါင်းတိုက်ခိုက်ခဲ့တာဖြစ်ပြီး ရဲဘော်တွေ အထိအခိုက်မရှိခဲ့ဘူးလို့ အသိပေးထားပါတယ်။

ပြည်သူလူထုအနေနဲ့လည်း စစ်တပ်က လှည့်လည်စစ်ကြောင်းထိုးရာမှာ ဓားစာခံလူသားဒိုင်းအဖြစ် ဖမ်းဆီးခေါ်ဆောင်လေ့ရှိတာကြောင့် စစ်အုပ်စုနဲ့ အဝေးမှ ရှောင်ရှားကြဖို့ နတ်မောက်မြို့နယ်(ပကဖ)က သတိပေးထားတာ တွေ့ရပါတယ်။

Photo | နတ်မောက် ပကဖ (ပုံဟောင်း)

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️သရက်ခရိုင်အတွင်း စစ်ရေးလှုပ်ရှားနေတဲ့ ကံမမြို့နယ် ပကဖ ရဲ့ အပတ်စဉ် ၅ စစ်သင်တန်းပြီးစီး

၅ စက်တင်ဘာ ||| နွေဦးအသံ |||

မကွေးဒေသ၊ သရက်ခရိုင်အတွင်း စစ်ရေးလှုပ်ရှားလျက်ရှိတဲ့ ကံမမြို့နယ် ပြည်သူ့ကာကွယ်ရေးအဖွဲ့ရဲ့ အပတ်စဉ် (၅) စစ်သင်တန်းဆင်းပွဲအခမ်းအနားကို စက်တင်ဘာ ၄ ရက်မှာ အောင်မြင်စွာကျင်းပပြုလုပ်ခဲ့တယ်လို့ အဆိုပါတပ်ရဲ့ ထုတ်ပြန်ချက်အရ သိရပါတယ်။

သင်တန်းဆင်းရဲဘော်သစ်တွေရဲ့ ဓာတ်ပုံမှတ်တမ်းတွေနဲ့အတူ ကံမမြို့နယ် ပြည်သူ့ကာကွယ်ရေးတပ်ဖွဲ့က စက်တင်ဘာ ၅ ရက်မှာ အသိပေးထားတာပါ။

အမျိုးသားညီညွတ်‌ရေးအစိုးရ NUG ၊ ကာကွယ်ရေးဝန်ကြီးဌာန ကွပ်ကဲမှုအောက်ရှိ ကံမမြို့နယ် ပြည်သူ့ကာကွယ်‌ရေးတပ်ဖွဲ့ (ပကဖ) အနေနဲ့ အပတ်စဉ် ၃ နဲ့ ၄ စစ်သင်တန်းတွေကိုလည်း ပြီးခဲ့တဲ့ ၂၀၂၆ ခုနှစ် ဖေဖော်ဝါရီလနဲ့ မေလ တို့မှာ အသီးသီးဖွင့်လှစ်ပြီးစီးခဲ့တာ တွေ့ရပါတယ်။

Photo | ကံမမြို့နယ် ပကဖ

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️သင်္ဘောများပျက်စီးပြီး တပ်ဖွဲ့ဝင်ရာချီစစ်သုံ့ပန်းဖြစ်ပြီးနောက် စစ်တပ်က အစီး ၃၀ ကျော်ထပ်လွှတ်ပြန်

၅ စက်တင်ဘာ ||| နွေဦးအသံ |||

ရွှေကူနဲ့ ဗန်းမော်ကြား သင်္ဘော ၇ စီးထက်မနည်း KIA ပူးပေါင်းတပ်တွေရဲ့ တိုက်ခိုက်ဖျက်ဆီးခံရပြီးနောက် အကြမ်းဖက်စစ်တပ်က တိုက်ခိုက်ရေးရေယာဉ်အပါအဝင် သင်္ဘော ၃၁ စီး ထပ်မံစေလွှတ်လိုက်ပြန်တယ်လို့ စက်တင်ဘာ ၅ ရက်၊ ဝက်လက်မြို့နယ် ပကဖရဲ့ ထုတ်ပြန်ချက်အရ သိရပါတယ်။

ဧရာဝတီမြစ်အတိုင်း မန္တလေး ဂေါဝိန်ဆိပ်ကမ်းမှ စစ်တပ်ရဲ့ သင်္ဘောအုပ်စု ထပ်မံဆန်တက်လာတာကြောင့် မြစ်ကမ်းဘေးနဲ့ ကျွန်းပေါ်နေပြည်သူတွေအနေနဲ့ စစ်တပ်ရဲ့ လေကြောင်း၊ လက်နက်ကြီး တိုက်ခိုက်မှုအန္တရာယ်ကို သတိရှိကြဖို့ ဝက်လက်မြို့နယ် (ပကဖ) နှိုးဆော်ထားတာပါ။

စစ်အုပ်စုသင်္ဘော ၃၁ စီးအနက် ရှေ့ပြေး ၄ စီးဟာ စဉ့်ကူးမြို့နယ်အနောက်ခြမ်း၊ ကြာဥယျာဉ်ရွာအနီးသို့ ညနေ ၃ နာရီခွဲခန့်မှာ ရောက်ရှိနေပြီး ကျန် ၂၇ စီးအနက် ပထမတစီးဟာ အနောက်တောင်ခြမ်း၊ ကြက်တူရွေးရွာအနီး၊ နောက်ဆုံးအစီးဟာ မတ္တရာအနောက်ခြမ်းရှိ ခြမ်းဘိုးကြီးကျွန်းရွာနား ရောက်ရှိလာနေတယ်လို့ ဆိုပါတယ်။

ရွှေကူမြို့နယ်မှာ အကြမ်းဖက်စစ်တပ်ရဲ့ သင်္ဘောတွေကို KIA PDF ပူးပေါင်းတပ်တွေက ပြီးခဲ့တဲ့ ရက်ပိုင်းတွေမှာ တိုက်ခိုက်ခဲ့ကြတာဖြစ်ပြီး သင်္ဘော ၇ စီးထက်နည်းပျက်စီးခဲ့တဲ့အပြင်စစ်ကောင်စီတပ်ဖွဲ့ဝင် ၁၇၀ ဦးခန့်အပါအဝင် စစ်သုံ့ပန်း ၁၉၀ ဦးခန့် ဖမ်းမိခဲ့တယ်လို့ သတင်းရရှိပါတယ်။

Photo | ဝက်လက် ပကဖ၊ လူမှုကွန်ယက်

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။