◼️ချင်းတွင်းမြစ်အတွင်း စစ်တပ်သင်္ဘောများကို တိုက်ခိုက်မှု စစ်သင်္ဘော ၅ စီးပျက်စီးပြီး တစီးနစ်မြုပ်

🔹မိချောင်းစစ်ဆင်ရေးအဖြစ် ဖော်ဆောင်ခဲ့ခြင်းဖြစ်ပြီး အရာရှိများအပါ စကစ ၂၃ ဦးသေဆုံးဟုဆို

၂ စက်တင်ဘာ ||| နွေဦးအသံ |||

စစ်ကိုင်းဒေသ၊ မော်လိုက်ခရိုင်အတွင်းမှာ အကြမ်းဖက်စစ်တပ်သင်္ဘောတွေကို ချင်းတွင်းအထက်ပိုင်း တော်လှန်ရေးပူးပေါင်းတပ်တွေက တလတာခန့်တိုက်ခိုက်ခဲ့ရာ စစ်သင်္ဘော ၅ စီးပျက်စီး၊ တစီးနစ်မြုပ်ခဲ့ပြီး အရာရှိများအပါအဝင် စစ်ကောင်စီတပ်ဖွဲ့ဝင် ၂၃ ဦးသေဆုံးခဲ့တယ်လို့ သိရပါတယ်။

ချင်းတွင်းမြစ်အတိုင်း ဆန်တက်လာတဲ့ တိုက်ခိုက်ရေးသင်္ဘောတွေအပါအဝင် စစ်ရေယာဉ် ၂၈ စီးကို ပြီးခဲ့တဲ့ ဇူလိုင်လမှ ဩဂုတ်လအတွင်း PDF ၊ ပကဖ တွေရဲ့ "မိချောင်းစစ်ဆင်ရေး" အဖြစ် တိုက်ခိုက်ခဲ့ကြောင်း မော်လိုက်ခရိုင် အမှတ် ၃ တပ်ရင်းက စက်တင်ဘာ ၂ ရက်မှာ ရုပ်သံမှတ်တမ်းအချို့နဲ့အတူ ထုတ်ပြန်ထားတာပါ။

အဆိုပါ "မိချောင်းစစ်ဆင်ရေး" အတွင်းမှာ စစ်တပ်ရဲ့ စစ်သင်္ဘော တစီး နစ်မြုပ်ခဲ့ပြီး ၅ စီး ပျက်စီးခဲ့တဲ့ပြင် အရာရှိများအပါအဝင် စစ်‌အုပ်စု ၂၃ ဦးသေဆုံးခဲ့ကြောင်း အတည်ပြုပြီး ဖြစ်တယ်လို့ အသိပေးထားပါတယ်။

တဖက်မှာလည်း ဧရာဝတီမြစ်ကြောင်းတလျှောက်မှာ စစ်တပ်သင်္ဘောတွေကို KIA နဲ့ ပူးပေါင်းတပ်တွေက တိုက်ခိုက်မှုတွေကြောင့် စစ်သင်္ဘောများ ပျက်စီးနစ်မြုပ်ခဲ့တဲ့အပြင် စစ်ကောင်စီတပ်ဖွဲ့ဝင် ၁၀၀ ကျော် လက်နက်ချအညံ့ခံခဲ့ပြီး စစ်အုပ်စု အထိနာလျက်ရှိတယ်လို့ သတင်းရရှိပါတယ်။

Photo | မော်လိုက်ခရိုင် တပ်ရင်း ၃

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️ထားဝယ်မြို့မှာ စကစ ၇ ဦး သေနတ် ၇ လက်နဲ့အတူ SGF တပ်ဖွဲ့ထံ အလင်းဝင်

၃ စက်တင်ဘာ ||| နွေဦးအသံ |||

တနင်္သာရီ‌ဒေသ၊ ထားဝယ်မြို့မှာ အကြမ်းဖက်စစ်ကောင်စီ တပ်ဖွဲ့ဝင် ၇ ဦးက သေနတ် ၇ လက်၊ ခဲယမ်းတွေနဲ့အတူ အထူးပြောက်ကျားတပ်ဖွဲ့ (SGF) ထံသို့ အလင်းဝင်ရောက်ခဲ့တယ်လို့ စက်တင်ဘာ ၁ ရက်၊ SGF တပ်ဖွဲ့ရဲ့ ထုတ်ပြန်ချက်အရ သိရပါတယ်။

စောမိညိုရပ်ကွက်ဘုန်းကြီးကျောင်းမှာ တပ်စွဲထားတဲ့စစ်အုပ်စုမှ စစ်ကောင်စီတပ်ဖွဲ့ဝင် ၇ ဦးက မေ ၅ ရက်၊ ညပိုင်းမှာ MA1 ၁ လက်၊ MA16 ၁ လက်၊ ကာဘိုင် ၃ လက်၊ ဘော်ကာ ၂ လက်၊ ကျည်ဘောက် ၁၀ ခု၊ ကျည်တွေနဲ့အတူ အလင်းဝင်ခဲ့တယ်လို့ ဖော်ပြထားတာပါ။

အဲဒီ စစ်ကောင်စီတပ်ဖွဲ့ဝင်တွေကို အလင်းဝင်ရောက်ဖို့ ဆက်သွယ်လာတာကြောင့် လမ်းတနေရာမှာ သွားရောက်ခေါ်ဆောင်ပေးခဲ့တာဖြစ်ပြီး လက်ရှိမှာ သူတို့ကို ဘေးကင်းတဲ့ လွတ်မြောက်နယ်မြေတနေရာသို့ ပို့ဆောင်ပေးပြီးဖြစ်တယ်လို့ အထူးပြောက်ကျားတပ်ဖွဲ့ (SGF) က အသိပေးထားတာ တွေ့ရပါတယ်။

Photo | SGF

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️တီးတိန်မြို့အနီး နောက်တန်းပြန် စစ်တပ်ယာဉ်တန်းကို PDF Zoland မိုင်းဆွဲတိုက်ခိုက်

၃ စက်တင်ဘာ ||| နွေဦးအသံ |||

ချင်းပြည်နယ်၊ တီးတိန်မြို့အနီးမှာ ထန်တလန် စစ်မျက်နှာမှ နောက်တန်းစခန်းသို့ ပြန်လာတဲ့ အကြမ်းဖက်စစ်ကောင်စီ ယာဉ်တန်းကို PDF Zoland က စက်တင်ဘာ ၂ ရက်၊ နေ့လယ် ၂ နာရီခွဲခန့်မှာ ကြားဖြတ် မိုင်းဆွဲ တိုက်ခိုက်ခဲ့တယ်လို့ သိရပါတယ်။

ဖလမ်း-သိုင်းငင်း လမ်းမှတဆင့် တီးတိန်မြို့အခြေစိုက် အမှတ် ၂၆၉ ခြေလျင်တပ်ရင်း - ခလရ (၂၆၉)သို့ ပြန်လာတဲ့ စစ်အုပ်စုရဲ့ Forland ကား ၃ စီးနဲ့ ၁၂ ဘီးကား ၁ စီး၊ စုစုပေါင်း ၄ စီးပါ ယာဉ်တန်းကို အသင့်ထောင်ထားတဲ့ မိုင်းတွေနဲ့ လမ်းပိုင်းတနေရာမှာ ဖောက်ခွဲ တိုက်ခိုက်ခဲ့တယ်လို့ PDF Zoland က ရုပ်သံမှတ်တမ်းနဲ့တကွ ထုတ်ပြန်ထားတာပါ။

တိုက်ခိုက်မှုကြောင့် စစ်အုပ်စုဘက်မှ ထိခိုက်သေဆုံးသူ အရေအတွက်ကိုတော့ အတည်ပြုနိုင်ခြင်းမရှိသေးဘဲ ကာကွယ်ရေးတပ်ဖွဲ့ဝင်တွေ အထိအခိုက်မရှိ ဘေးကင်းစွာ ဆုတ်ခွာနိုင်ခဲ့တယ်လို့ ဆိုပါတယ်။

ထန်တလန်မြို့ကို စစ်အုပ်စုက ပြီးခဲ့တဲ့ ဇွန်လဆန်းကတည်းက လေကြောင်း၊ လက်နက်ကြီး ပစ်ကူတွေနဲ့ အင်အားအလုံးအရင်းသုံးပြီး ထိုးစစ်ဆင်ခဲ့ပြီးနောက် ဇူလိုင်လထဲမှာ ချင်းတော်လှန်ရေးတွေအနေနဲ့ မြို့တွင်းနယ်မြေအများစုကို လက်လွှတ်ခဲ့ရပေမဲ့ မြို့ပေါ်နဲ့ မြို့နယ်အတွင်းရှိ နယ်မြေအချို့ကိုတော့ ဆက်လက်ထိန်းချုပ်ထားဆဲ ဖြစ်တယ်လို့ သတင်းရရှိပါတယ်။

Video | PDF Zoland

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။