◼️မင်းကင်းမှာ စစ်တပ်စစ်ကြောင်းကို PDF ကြားဖြတ်တိုက်ခိုက်၊ ဒရုန်းဖျက်လက်နက်နဲ့ ခဲယမ်းများသိမ်းဆည်းရရှိ

၂၇ ဩဂုတ် ||| နွေဦးအသံ |||

စစ်ကိုင်းဒေသ၊ မင်းကင်းမြို့နယ်မှာ အကြမ်းဖက်စစ်တပ် စစ်ကြောင်းကို တော်လှန်ရေးတပ်ဖွဲ့တွေက ကြားဖြတ်တိုက်ခိုက်ခဲ့ပြီး လက်နက်ခဲယမ်းတွေ သိမ်းဆည်းရရှိခဲ့တယ်လို့ မြို့နယ် ပြည်သူ့ကာကွယ်ရေးအဖွဲ့ (ပကဖ)ရဲ့ ဩဂုတ် ၂၆ ရက်ထုတ်ပြန်ချက် အရ သိရပါတယ်။

တောင်တွင်းဒေသမှာ စစ်တပ်စစ်ကြောင်းကို PDF ၊ ပကဖ ပူးပေါင်းတပ်တွေက ပြီးခဲ့တဲ့ ဇွန်လအတွင်းမှာ အကြိမ်ကြိမ်ကြားဖြတ်တိုက်ခိုက်ခဲ့တာဖြစ်ပြီး စစ်လက်နက်ပစ္စည်းတွေ သိမ်းဆည်းရရှိခဲ့တဲ့ တိုက်ပွဲမှတ်တမ်းအချို့နဲ့အတူ မင်းကင်း (ပကဖ)က ဖော်ပြထားတာပါ။

ကြားဖြတ်တိုက်ခိုက်မှုအတွင်း စစ်တပ်ဘက်မှ ဒရုန်းဖျက်လက်နက် (Anti-Drone Gun) အပါအဝင် ခဲယမ်းတွေနဲ့ စစ်သုံးပစ္စည်းတွေ၊ ယာဉ်တစီးတို့ကို သိမ်းဆည်းရရှိခဲ့တဲ့အပြင် စစ်ကောင်စီတပ်ဖွဲ့ဝင်တွေလည်း သေဆုံးမှုများရှိခဲ့တယ်လို့ မင်းကင်း (ပကဖ)က အသိပေးထားပါတယ်။

မုံရွာ-မင်းကင်း-ကလေးဝ လမ်းတလျှောက် ပြီးခဲ့တဲ့ မေလမှစပြီး အင်အား ၂၅၀ ကျော်နဲ့ စစ်ကြောင်းထိုးလာတဲ့ အဲဒီစစ်တပ်စစ်ကြောင်းဟာ လမ်းတလျှောက် ဒေသခံတွေကို ဓားစာခံအဖြစ် ဖမ်းဆီးသတ်ဖြတ်မှုတွေရှိသလို ပြည်သူပိုင်ပစ္စည်းတွေကိုလည်း ခိုးယူတာတွေရှိခဲ့တယ်လို့ ဒေသခံတွေက ပြောဆိုထားတာ တွေ့ရပါတယ်။

Photo | မင်းကင်း ပကဖ

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️‌မြင်းခြံ-နွားထိုးကြီးလမ်း စံပြရွာစစ်တပ်အထိုင်စခန်းကို တိုက်ခိုက်ရာ စခန်းရှိ စကစအားလုံးထွက်ပြေး

၂၇ ဩဂုတ် ||| နွေဦးအသံ |||

မန္တလေး၊ မြင်းခြံမြို့နယ်မှာ အကြမ်းဖက်စစ်တပ်ရဲ့ စံပြရွာအထိုင်စခန်းကို တော်လှန်ရေးပူးပေါင်းတပ်တွေက ဩဂုတ် ၂၆ ရက်၊ မနက် ၄ နာရီခန့်မှာ ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင်တွေ ထွက်ပြေးသွားခဲ့ပြီး စခန်းကိုသိမ်းပိုက်ရှင်းလင်းခဲ့တယ်လို့ သိရပါတယ်။

မြင်းခြံမြို့အရှေ့မြောက်ဘက်၊ နွားထိုးကြီး-မြင်းခြံလမ်းပိုင်းရှိ စံပြရွာမှာ အထိုင်ချထားတဲ့ စစ်တပ်စခန်းကို ဝင်ရောက်တိုက်ခိုက်ချိန်မှာ စစ်သားနဲ့ ပျူ တွေအားလုံး ထွက်ပြေးသွားတဲ့အတွက် စခန်းကို သိမ်းပိုက်ရှင်းလင်းခဲ့ကြတယ်လို့ ပကဖ အသံက ဖော်ပြထားတာပါ။

တော်လှန်ရေးတပ်တွေပြန်ဆုတ်ခဲ့ပြီးနောက် စစ်တပ်က အင်အားဖြည့်တင်းပြီး စံပြရွာထဲ ပြန်ဝင်လာခဲ့သလို အနီးပတ်ဝန်းကျင်ကိုလည်း ကင်းလှည့်တာတွေ လုပ်ဆောင်ခဲ့တယ်လို့ ဆိုပါတယ်။

အဲဒီစစ်ဆင်ရေးကို မြင်းခြံမြို့နယ် ပကဖ၊ ဗိုလ်ဆားပြောက်ကျားတပ်ဖွဲ့၊ ပြည်သူ့ကြယ်တပွင့်၊ မြင်းခြံ 35 ပြောက်ကျားတပ်ဖွဲ့နဲ့ အညာဖက်ဒရယ် ထနောင်းစစ်ကြောင်းတို့က ပူးပေါင်းတိုက်ခိုက်ခဲ့တာဖြစ်တယ်လို့ သတင်းရရှိပါတယ်။

Photo | မြင်းခြံ ပကဖ

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️‌မင်းလှမှာ စစ်တပ်စစ်ကြောင်းတွေကို တပတ်တာတိုက်ခိုက်မှု စကစ ၂၀ ဦးထက်မနည်းသေဆုံး

၂၈ ဩဂုတ် ||| နွေဦးအသံ |||

မကွေးဒေသ၊ မင်းလှမြို့နယ်မှာ အကြမ်းဖက်စစ်တပ် စစ်ကြောင်းတွေကို ဗမာပြည်ကာကွယ်ရေးတပ် USBA က ဩဂုတ် ၂၀ ရက်မှ ၂၆ ရက်ထိ တိုက်ခိုက်ခဲ့ပြီး တပတ်တာတိုက်ပွဲတွေအတွင်း စစ်ကောင်စီတပ်ဖွဲ့ဝင် ၂၀ ဦး ထက်မနည်းသေဆုံးခဲ့တယ်လို့ သိရပါတယ်။

မင်းတုန်းမှ မင်းလှမြို့နယ် ရှမ်းတပ်ရဲစခန်းဘက်သို့ ဦးတည်စစ်ကြောင်းထိုးလာတဲ့ စစ်တပ်စစ်ကြောင်းတွေနဲ့ တိုက်ပွဲတွေ တပတ်တာ ဆက်တိုက်ဖြစ်ပွားခဲ့ပြီး ပထမဆုံးထိုးလာတဲ့ အင်အား ၁၀၀ ခန့်ပါ စစ်တပ်စစ်ကြောင်းကို တိုက်ခိုက်ရာမှာ စစ်တပ်ဘက်မှ ၂၀ ဦး ကျော်သေဆုံးခဲ့တယ်လို့ USBA က ဩဂုတ် ၂၆ ရက်၊ ညပိုင်းမှာ ထုတ်ပြန်ထားတာပါ။

ဒါ့အပြင် စစ်တပ်စစ်ကြောင်းထံမှ ကား ၁ စီး၊ မီးစက် ၁ လုံးနဲ့ ခဲယမ်းအချို့ သိမ်းဆည်းရရှိခဲ့တဲ့အပြင် စစ်ကောင်စီတပ်ဖွဲ့ဝင် ၃၀ ဦးခန့် ဆေးရုံရောက်သွားခဲ့ပြီး စစ်ကြောင်းပျက်သွားတာကြောင့် ဩဂုတ် ၂၃ ရက်၊ ညပိုင်းမှာ လေကြောင်း၊ လက်နက်ကြီး၊ ဒရုန်းမျိုးစုံနဲ့ ကာပစ်ပေးပြီးနောက် ကျောက်တိုင်အထိုင်စခန်းထိ နောက်ပြန်ဆုတ်ပြေးသွားတယ်လို့ ဆိုပါတယ်။

အဲဒီနောက် မင်းတုန်းဘက်မှ အင်အား ၂၀၀ ခန့် ထပ်မံဖြည့်တင်းပြီး ဩဂုတ် ၂၄ ရက်မှာ ထပ်မံစစ်ကြောင်းထိုးလာခဲ့သော်လည်း ကျောက်တိုင်အထိုင်စခန်းမှ ၈ မိုင်အကွာရှိ ရှမ်းတပ်စခန်းသို့ ၃ ရက်အကြာ ဩဂုတ် ၂၆ ရက်၊ ညနေပိုင်းမှ ၀င်ရောက်သွားခဲ့တယ်လို့ အသိပေးထားပါတယ်။

စစ်တပ်ဘက်မှ စစ်ကြောင်း ရှေ့တိုးတာ၊ နောက်ဆုတ်တာတွေ ရှိလာနိုင်သေးသဖြင့် ဒေသခံပြည်သူတွေအနေနဲ့ ဘေးကင်းလုံခြုံစေဖို့ လိုအပ်တာတွေကို ပြင်ဆင်ထားကြဖို့ကိုလည်း ဗမာပြည်ကာကွယ်ရေးတပ် USBA က အသိပေးနှိုးဆော်ထားတာ တွေ့ရပါတယ်။

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️မွန်ပြည်တော်လှန်ရေးတပ် MSRF က ၇၉ ကြိမ်မြောက် မွန်တော်လှန်ရေးနေ့အခမ်းအနား ကျင်းပပြုလုပ်

၂၈ ဩဂုတ် ||| နွေဦးအသံ |||

မွန်ပြည်နယ်အတွင်း စစ်ရေးလှုပ်ရှားနေတဲ့ မွန်ပြည်တော်လှန်ရေးတပ် MSRF က ဩဂုတ် ၂၈ ရက်မှာ ကျရောက်တဲ့ ၇၉ ကြိမ်မြောက် မွန်တော်လှန်ရေးနေ့ အခမ်းအနားကို တပ်ရင်းဌာနချုပ်မှာ ကျင်းပပြုလုပ်ခဲ့ပြီး သူရဲကောင်းတွေကို အလေးပြုခဲ့ကြတယ်လို့ သိရပါတယ်။

အခမ်းအနားမှာ မွန်တော်လှန်ရေး သမိုင်းတလျှောက် အသက်ပေးလှူခဲ့တဲ့ သူရဲကောင်းတွေနဲ့ မွန်ပြည်တော်လှန်ရေးတပ် MSRF မှ အသက်ပေးလှူခဲ့တဲ့ သူရဲကောင်း ရဲဘော်တွေကို အလေးပြုခြင်းကို ပြုလုပ်ခဲ့တယ်လို့ MSRF က ဓာတ်ပုံမှတ်တမ်းအချို့နဲ့အတူ ထုတ်ပြန်ထားတာပါ။

ဒါ့အပြင် မွန်ပြည်တော်လှန်ရေးတပ် တပ်ရင်းမှူး ဗိုလ်မှူးကြီး နိုင်ဒရာဂွန်က အဖွင့်မိန့်ခွန်းပြောကြားတာ၊ မွန်ပြည်ဖက်ဒရယ်ကောင်စီ ကာကွယ်ရေးဌာန၊ ဌာနမှူး နိုင်တလနိုင်က ထူးချွန်ဆုရတဲ့ ရဲဘော်စာရင်းကို ကြေညာခြင်းအပြင် စစ်ရေး၊ နိုင်ငံရေး အခြေအနေတွေကို ရှင်းလင်းတင်ပြခဲ့တယ်လို့ ဆိုပါတယ်။

အဲဒီနောက် ပြည်သူ့ကာကွယ်ရေးတပ်မတော်၊ တနင်္သာရီတိုင်းစစ်ဌာန ၊ နည်းဗျူဟာ (၃၃) နည်းဗျူဟာ မှူး ရဲဘော် စောဒါးကိုက ပေးပို့တဲ့ သဝဏ်လွှာကို ဗျူဟာ ၃၃ မှ တာဝန်ရှိရဲဘော်က ဖတ်ကြားခြင်းနဲ့ မွန်ပြည်တော်လှန်ရေးတပ် ဒုတပ်ရင်းမှူး ဗိုလ်မှူး နိုင်ဗညားနွန်က အပိတ်မိန့်ခွန်း ပြောကြားခဲ့တယ်လို့ ဖော်ပြထားပါတယ်။

အခမ်းအနားကို မွန်ပြည်ဖက်ဒရယ်ကောင်စီ ကာကွယ်ရေးဌာနနဲ့ ပြည်ထဲရေးဌာနမှ တာဝန်ရှိသူတွေ၊ မွန်ပြည်တော်လှန်ရေးတပ် မှ ဝာာဝန်ရှိသူတွေနဲ့ ရဲဘော်တွေ၊ နည်းဗျူဟာ(၃၃) မှ တာဝန်ရှိသူတွေ၊ အမှတ်(၈၀၀၁) တပ်ရင်း - ရေးပြောက်ကျားတပ် YGF မှ တာဝန်ရှိသူတွေနဲ့ အမှတ်(၈၀၀၂) တပ်ရင်း ကံပေါက် ပြည်သူ့ကာကွယ်ရေးတပ် မှ တာဝန်ရှိသူတွေ တက်ရောက်ခဲ့ကြတယ်လို့ သတင်းရရှိပါတယ်။

Photo | MSRF

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။

◼️မိုးဗြဲတိုက်ပွဲ ၃ လအတွင်း စစ်တပ်စခန်းတခုသိမ်းပိုက်ခဲ့ပြီး စကစ ၂၀ ‌ကျော်သေဆုံးထိခိုက်ဟု PDF ပြော

🔹အလောင်းနဲ့ လက်နက်ခဲယမ်းအချို့ သိမ်းဆည်းရရှိတဲ့အပြင် ဒရုန်း ၃ စီး ဖျက်ဆီးနိုင်ခဲ့ဟုဆို

၂၈ ဩဂုတ် ||| နွေဦးအသံ |||

မိုးဗြဲမြို့အနီး အကြမ်းဖက်စစ်တပ်ကို မိုးဗြဲ PDF နဲ့ ပူးပေါင်းတပ်တွေက ၃ လတာအတွင်း တိုက်ခိုက်ခဲ့တဲ့ တိုက်ပွဲတွေမှာ ကာကင်းစခန်းတခုကို သိမ်းပိုက်ခဲ့တဲ့အပြင် စစ်ကောင်စီတပ်ဖွဲ့ဝင် ၂၀ ဦး ထက်မနည်းသေဆုံးထိခိုက်ပြီး လက်နက်ခဲယမ်းအချို့သိမ်းဆည်းရရှိခဲ့တယ်လို့ သိရပါတယ်။

မိုးဗြဲအခြေစိုက် စစ်ကောင်စီတပ် ခမရ ၄၂၂ ကာကင်းမှ ထွက်လာတဲ့ စစ်ကြောင်းတွေကို ပြီးခဲ့တဲ့ ဇွန်လမှ ဩဂုတ်လအတွင်း တိုက်ခိုက်ခဲ့တာဖြစ်ပြီး ထိတွေ့တိုက်ပွဲတွေ ဆက်တိုက်ဖြစ်ပွားခဲ့တယ်လို့ မိုးဗြဲပြည်သူ့ကာကွယ်ရေးတပ် MB PDF က တိုက်ပွဲမှတ်တမ်းအချို့နဲ့အတူ ဩဂုတ် ၂၈ ရက်မှာ ထုတ်ပြန်ထားတာပါ။

မိုးဗြဲမြို့အနီးရှိ စစ်တပ်ရဲ့ ကာကင်းစခန်းတခုကို တော်လှန်ရေးအင်အားစုတွေက ဇွန် ၂၉ ရက်မှာ တိုက်ခိုက်သိမ်းပိုက်ခဲ့ရာ စစ်ကောင်စီတပ်ဖွဲ့ဝင် ၁၀ ဦးထက်မနည်း ထိခိုက်ဒဏ်ရာရပြီး အလောင်း ၁ လောင်းနဲ့ လက်နက်ခဲယမ်းအချို့ သိမ်းဆည်းရရှိတဲ့အပြင် ၁ ဦးအရှင်မိခဲ့တယ်လို့ ဖော်ပြထားပါတယ်။

စခန်းသိမ်းခံရတဲ့အတွက် အထိနာသွားတဲ့ စစ်တပ်က ဇူလိုင် ၇ ရက်နဲ့ ၈ ရက်တို့မှာ လွယ်ယင်းတောင်ခြေအနီး ကာကင်းယူ ထိုးစစ်ဆင်ဖို့ ထပ်မံရောက်လာတာကြောင့် တိုက်ပွဲဖြစ်ပွားခဲ့ပြီး စစ်တပ်ဘက်မှ ၁၀ ဦးထက်နည်း ထိခိုက်သေဆုံးပြီး အလောင်း ၂ လောင်း မျက်မြင်တွေ့သော်လည်း လက်နက်ခဲယမ်းများ မရခဲ့ဘူးလို့ ဆိုပါတယ်။

အဲဒီနောက် စစ်တပ်က ဩဂုတ် ၂၆ ရက်မှာ လက်နက်ကြီးရမ်းသမ်းပစ်ခတ်ခဲ့ပြီးနောက် ဩဂုတ် ၂၇ ရက်၊ မနက်ပိုင်းမှာ စစ်ကြောင်းထိုးလာတဲ့အတွက် ထပ်မံတိုက်ခိုက်ခဲ့တဲ့အပြင် ညနေပိုင်းမှာ ဒရုန်းနဲ့ တိုက်ခိုက်ခဲ့ရာ စစ်တပ်ဘက်မှ ၁၀ ဦးထက်မနည်း ထိခိုက်သေဆုံးခဲ့တယ်လို့ ဖော်ပြထားပါတယ်။

အထိနာခဲ့တာကြောင့် အင်အား ၂၀၀ ခန့်ပါ စစ်တပ်စစ်ကြောင်းက ဩဂုတ် ၂၈ ရက်၊ မနက်ပိုင်းမှာ လွယ်ယင်းတောင်ခြေသို့ ထပ်မံချဉ်းကပ်ပြီး ဒရုန်း၊ လက်နက်ကြီးတွေနဲ့ ၁၅ ကြိမ်ထက်မနည်း ဗုံးကြဲခဲ့တယ်လို့ ဆိုပါတယ်။

ဒါ့အပြင် ဖယ်ခုံ၊ မိုးဗြဲ၊ လွိုင်ကော်နဲ့ လွိုင်လင်လေး အခြေစိုက်တပ်တွေက တရက်အတွင်း ၆၀ မမ၊ ၈၁ မမ နဲ့ ၁၂၀ မမ လက်နက်ကြီး အလုံး ၈၀ ထက်မနည်း ပစ်ခတ်ခဲ့တာ‌ကြောင့် ရဲဘော်အချို့ အသေးစားဒဏ်ရာများရခဲ့တယ်လို့ အသိပေးထားပါတယ်။

အဆိုပါ ၃ လတာအတွင်း စစ်တပ်ရဲ့ ဒရုန်း ၃ စီးကို တော်လှန်ရေးအင်အားစုတွေက ဟန့်တားဖျက်ဆီးနိုင်ခဲ့ပြီး ၂ စီးမှာ ပျက်စီးသွားခဲ့သော်လည်း ၁ စီးကို သိမ်းဆည်းရရှိခဲ့တယ်လို့ ဖော်ပြထားပါတယ်။

ရှေ့ဆက်ပြီး တိုက်ပွဲတွေ ပိုမိုပြင်းထန်လာနိုင်သလို စစ်တပ်ဘက်မှ လက်နက်ကြီး၊ ဒရုန်းတွေ ရမ်းသမ်းပစ်ခတ်နေတဲ့အတွက် ပြည်သူတွေအနေနဲ့ ကန့်သတ်ပိတ်ပင်ထားတဲ့ လမ်းကြောင်းတွေအားလုံးကို ဖြတ်သန်းသွားလာတာ လုံးဝမပြုလုပ်ကြဖို့ကိုလည်း မိုးဗြဲ PDF က အသိပေးနှိုးဆော်ထားတာ တွေ့ရပါတယ်။

Video | MBPDF

©The Voice of Spring
#thevoiceofspring
#WhatsHappeningInMyanmar
#RejectMilitaryCoup

✅ဆန်းသစ်တီထွင်မှုပြည့်ဝပြီး လွတ်လပ်တဲ့မီဒီယာအဖြစ် ဆက်လက်ရပ်တည်နိုင်ဖို့ The Voice of Spring ကို မျှဝေပါ။ Subscribe လုပ်ပါ။