◼ခေတ်အဆက်ဆက် ကျောင်းသားလူငယ် တော်လှန်ရေးရဲဘော်အပေါင်းကို အမျိုးသားညီ ညွတ်ရေးအစိုးရက လေးစားဦးညွတ်ဂုဏ်ပြု

ဇူလိုင်(၇)ရက် | နွေဦးအသံ |

ယနေ့ကျရောက်တဲ့ နှစ်(၆၀)ပြည့် ဆဲဗင်းဂျူလိုင်နေ့မှာ အမျိုးသားညီညွတ်ရေးအစိုးရက သဝဏ်လွှာပေးပို့၍ အပြစ်ပေးအရေးယူမှုကနေ လွတ်ကင်းနေဆဲ စစ်အာဏာရှင်များကို အပြစ်ပေးအရေးယူရန်ရည်မှန်းချက်ထားရှိကြောင်း အသိပေးခဲ့တယ်လို့ သိရပါတယ်။

စစ်အာဏာသိမ်းမှုတွေကို အမြစ်ဖြတ်ပြီး ထပ်မံမပေါ်ပေါက်စေဖို့ နွေဦးတော်လှန်ရေးကို အစွမ်းကုန်ကြိုးပမ်း သွားမယ်လို့ အမျိုးသားညီညွတ်ရေးအစိုးရက သဝဏ်လွှာမှာ ကတိပြုထည့်သွင်းဖော်ပြထားပါတယ်။

ရာဇဝတ်မှုကျူးလွန်ခဲ့ကြတဲ့ စစ်အာဏာရှင်တွေ အပြစ်ပေးအရေးယူခံရရေးအတွက် နွေဦးတော်လှန်ရေးမှာ ရည်မှန်းချက်ထားပြီး ကျောင်းသားထုရဲ့သမဂ္ဂစိတ်ဓါတ်၊ ပြည်သူလူထုတစ်ရပ် လုံးရဲ့ စိတ်ပိုင်းဖြတ်ချက်၊ တိုင်းသားလူမျိုးပေါင်းစုံက ခေါင်းဆောင်တွေအားလုံးရဲ့ အတွေ့အကြုံတွေ ပေါင်းစပ်ပြီး အစွမ်းကုန်ကြိုးပမ်းဆောင်ရွက်သွားမယ်လို့ ဆဲဗင်းဂျူလိုင် အရေးတော်ပုံကို ဦးညွတ်ရင်း သန္နိဌာန်ပြု ကြောင်း သဝဏ်လွှာပေးပို့ခဲ့တာဖြစ်ပါတယ်။

လွတ်လပ်မှု၊ ညီမျှမှု၊ တရားမျှတမှုနဲ့ အမှန်တရားအတွက် အသက်နဲ့ ဘဝကို ပဓာနမထားဘဲ ခေတ်အဆက်ဆက် ယုံကြည်ရဲရင့်စွာနဲ့ တော်လှန် တိုက်ပွဲဝင်ခဲ့ကြတဲ့ ကျောင်းသားလူငယ် တော်လှန်ရေးရဲဘော်အပေါင်းကို အမျိုးသားညီ ညွတ်ရေးအစိုးရက လေးစားဦးညွတ်ဂုဏ်ပြုတယ်လို့လည်းဖော်ပြထားပါတယ်။

ကျောင်းသားလူငယ်တွေရဲ့ လွတ်လပ်တဲ့ သမဂ္ဂစိတ်ဓါတ်တွေကို စစ်အာဏာရှင်အဆက်ဆက်က ဖြိုဖျက်နိုင်စွမ်း မရှိခဲ့ကြဘူး ဆိုတာကို ယခုနွေဦး တော်လှန်ရေးမှာ ရှေ့တန်းက တော်လှန်တိုက်ပွဲဝင်နေကြတဲ့ လူငယ်ထုက သက်သက်ပြလျက်ရှိတယ် ဆိုပြီး အမျိုးသားညီညွတ်ရေးအစိုးရ ဂုဏ်ပြုချီးကျူးထားတာတွေ့ရပါတယ်။

©နွေသူရ
ဓါတ်ပုံ | ပြစ်ဒဏ်ကင်းလွတ်ဆဲ စစ်ရာဇဝတ်ကောင် သန်းရွှေ နှင့် မင်းအောင်လှိုင်
https://t.me/VOStelegram
https://youtube.com/c/TheVoiceOfSpringTV
#thevoiceofspring

◼ဒီမိုကရေစီအရေးအတွက် အသက်ပေးခဲ့သူများကို ဂုဏ်ပြုကြောင်း မြန်မာနိုင်ငံဆိုင်ရာ အမေရိကန်သံရုံးထုတ်ပြန်

ဇူလိုင်(၇)ရက် | နွေဦးအသံ |

၁၉၆၂ ခုနှစ် ၊ ဇူလိုင် ၇ ရက်မှာ အသက်ပေးခဲ့ကြရသူအားလုံးနဲ့ ၂၀၂၁ ခုနှစ် ၊ဖေဖော်ဝါရီလကစလို့ ဒီမိုကရေစီအရေးအတွက် ခုခံကာကွယ်ရင်း အသက်ပေးခဲ့ကြရတဲ့ ထောင်နဲ့ချီတဲ့ မြန်မာပြည်သူတွေကို ဂုဏ်ပြုအပ်ပါတယ်လို့ မြန်မာနိုင်ငံဆိုင်ရာ အမေရိကန် သံရုံးက ဇူလိုင် ၇ ရက် မနက်ပိုင်းက ထုတ်ပြန်လိုက်တယ်လို့ သိရပါတယ်။

ဒါ့အပြင် မြန်မာပြည်သူတွေကို လူတိုင်း အလှမ်းမှီသောပညာရေး၊ လူ့အခွင့်အရေးနဲ့ အခြေခံကျတဲ့ လွတ်လပ်ခွင့်တွေ ကျင့်သုံးပိုင်ခွင့် ရရှိခံစားနိုင်ပါစေလို့လည်း ဆုတောင်းပေးထားပါတယ်။

မြန်မာပြည်သူ‌တွေရဲ့ လွတ်လပ်မှု၊ ဒီမိုကရေစီနဲ့ ငြိမ်းချမ်းရေးအတွက် ကာလရှည်ကြာ ကြိုးပမ်းလာခဲ့တဲ့အပေါ်ကိုလည်း မြန်မာနိုင်ငံဆိုင်ရာ အမေရိကန် သံရုံးကဂုဏ်ပြုကြောင်းထုတ်ပြန်လိုက်တာဖြစ်တယ်လို့ သိရပါတယ်။

©အောင်နွေထက်
https://t.me/VOStelegram
https://youtube.com/c/TheVoiceOfSpringTV
#thevoiceofspring

◼နေပြည်တော်အချုပ်ထောင်၌ ဆက်လက်ထားရှိဆဲဖြစ်

ဇူလိုင်(၇)ရက် ||| နွေဦးအသံ |||

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဇူလိုင်(၆)ရက်ညတွင် ရန်ကုန်ရှိ နေအိမ်သို့ ပြန်လည်ပြောင်းရွှေ့လိုက်ကြောင်း ထွက်ပေါ်နေသော သတင်းမှာ မှန်ကန်မှု မရှိဟု နွေဦးအသံသို့ ယုံကြည်စိတ်ချရသော ရင်းမြစ်များမှ အတည်ပြုသည်။

အတိုင်ပင်ခံပုဂ္ဂိုလ်ကို နေပြည်တော်အချုပ်ထောင်၌ပင် ဆက်လက်ထားရှိဆဲဖြစ်ကြောင်းနှင့် အဆိုပါ ထောင်တွင်းတရားရုံးမှာပင် အကြမ်းဖက်စစ်အုပ်စုက မတရားစွဲဆိုထားသောအမှုများကို ဆက်လက်ရင်ဆိုင်နေရလျက်ရှိကြောင်း သိရပါသည်။

©အောင်နွေထက်
ဓါတ်ပုံ | ရန်ကုန်နေအိမ်
https://t.me/VOStelegram
https://youtube.com/c/TheVoiceOfSpringTV
#thevoiceofspring

◼ YDF တပ်ရင်း စခန်းခွဲ ဖျက်ဆီးခံရ သို့သော် လူထိခိုက်မှု မရှိ

ဇူလိုင်(၇)ရက် | နွေဦးအသံ |

◼ စစ်ရေးတင်းမာနေသဖြင့် ဒေသခံ စစ်ရှောင်များအတွက် အရေးပေါ်လိုအပ်ချက်များဖြစ်ပေါ်နေ

အကြမ်းဖက် စစ်တပ် သည် မကွေးတိုင်း၊ ထီးလင်းမြို့နယ်ထဲက ယောဒေသကာကွယ်‌ရေးတပ်ဖွဲ့ (YDF) -ရွှေစွန်ညိုအဖွဲ့ရဲ့ စခန်းတစ်ခုကို ပြီးခဲ့သည့် ဇွန် (၃၀) ရက်နေ့က ဝင်ရောက်ဖျက်ဆီး မီးရှို့ခဲ့ကြောင်း ယနေ့ ဇူလိုင်လ ၆ ရက်မှာ (YDF) ၏ သတင်းထုတ်ပြန်ချက်အရသိရသည်။

ယင်းစခန်းကို အကြမ်းဖက် စစ်တပ်က စီးနင်းရာတွင် YDF ဘက်က ထိခိုက်မှု မရှိခဲ့ကြောင်းသိရသည်။ လူထိခိုက်မှု မရှိသော်လည်း စခန်းပျက်ဆီးသွားသဖြင့် ကာလတန်ဖိုး ကျပ်သိန်း (၂၀၀) ကျော်ခန့် ဆုံးရှုံးခဲ့ရသည်။

အကြမ်းဖက် စစ်ကောင်စီတပ် စစ်ကြောင်းနဲ့ ချင်းကာကွယ်ရေးတပ်- မင်းတပ် (CDF-Mindat) တို့ မကွေးတိုင်းနဲ့ ချင်းပြည်နယ် နယ်စပ်မှာ ပြီးခဲ့တဲ့ ဇွန်လ ၂၉ ရက်မှာ တိုက်ပွဲ ဖြစ်ပွားခဲ့ပြီး အကြမ်းဖက် စစ်ကောင်စီတပ်က တိုက်ပွဲ အနီးနားရှိ ရွှေစွန်ညိုအဖွဲ့ရဲ့ စခန်းခွဲကို ဝင်ရောက်စီးနင်း ဖျက်ဆီးခဲ့ခြင်းဖြစ်သည်။

စီးနင်းခံရချိန်တွင် ရွှေစွန်ညိုစခန်းခွဲ၌ YDF မှ တပ်ဖွဲ့ဝင်အားလုံးနီးပါး မရှိဘဲ ထီးလင်းမြို့နယ်အတွင်း စစ်ရေးလှုပ်ရှားနေသည့် အချိန်လည်းဖြစ်သည်။
လက်လုပ်လက်နက် အချို့နှင့်အတူ ဆိုင်ကယ်များ ၊ ဆိုလာပြားများနှင့် စခန်းသုံးပစ္စည်းများ မီးလောင် ပျက်စီးခဲ့ကြောင်း၊ ဆန်နှင့် ရိက္ခာအချို့ကိုမူ ကြိုတင်ရွှေ့ပြောင်းထားနိုင်သဖြင့် ထိခိုက်ပျက်ဆီးမှုမရှိခဲ့ကြောင်းသိရသည်။

ဇူလိုင် ၂ ရက် နေ့က ထီးလင်းအနောက်ဘက်၌ စစ်ကြောင်းထိုးနေသည့် စစ်ကောင်စီအင်အား ၂၀၀ ခန့်ကို YDF တပ်ရင်း ၄ ခု ပေါင်း၍ တိုက်ခိုက်ရာ အကြမ်းဖက် စစ်ကောင်စီတပ် မှ သေဆုံး သူများပြားခဲ့သည်။

ယခုကဲ့သို့ စစ်ရေးတင်းမာနေသဖြင့် ထီးလင်းမြို့နယ် အနောက်မြောက်နှင့် မြောက်ဘက် ရှိ ကျေးရွာများမှ ပြည်သူ ၁၀၀၀ ခန့် အိုးအိမ်စွန့်ခွာထွက်ပြေးနေရ ကြောင်းသိရသည်။ ထို့ပြင် စစ်ရှောင်များအတွက် အရေးပေါ်လိုအပ်ချက်များစွာဖြစ်ပေါ်လျက်ရှိနေသည်။

©မျိုးဇော်
ဓါတ်ပုံ | - Shwe Som Nyo
ကိုးကား | Shwe Som Nyo
https://t.me/VOStelegram
https://youtube.com/c/TheVoiceOfSpringTV
#thevoiceofspring

◼ အကြမ်းဖက် စစ်အုပ်စု စနိုက်ပါနှင့် ပစ်ခတ်ခံရပြီး စစ်သား(၃)ဦးသေဆုံး

ဇူလိုင်(၇) | နွေဦးအသံ |

◼ အကြမ်းဖက် စစ်ကေင်စီ အဖွဲ့ လက်နက်ကြီး ဖြင့် ပစ်ခတ်ခံရသဖြင့် အသေအပျောက် များနိုင်

ကရင်နီပြည်၊ ဒီးမော့ဆိုမြို့နယ်ထဲက အကြမ်းဖက် စစ်အုပ်စု၏ (၄၂၇) ခြေမြန် တပ်ရင်းကို ကရင်နီအမျိုးသား ကာကွယ်ရေးတပ် KNDF က စနိုက်ပါ ဖြင့် ပစ်ခတ်တိုက်ခိုက်ခဲ့ရာ အကြမ်းဖက် စစ်အုပ်စုဘက်က(၃)ဦး ပွဲချင်းပြီး သေဆုံးခဲ့ ကြောင်း KNDF (B -09 )(ဒီးမော့ဆို့ဇုံ) ၏ ထုတ်ပြန်ချက်အရသိရသည်။

ထို့အပြင် အကြမ်းဖက် စစ်အုပ်စုရဲ့ (၄၂၇) ခြေမြန်တပ်ရင်းကို ကရင်နီအမျိုးသား ကာကွယ်ရေးတပ် (KNDF) က (၆၀) မမ လက်နက်ကြီးဖြင့် ပစ်ခတ်တိုက်ခိုက်ခဲ့ပြီး ပစ်မှတ်ကို တိုက်ရိုက်ထိမှန်ခဲ့သည်။

လက်နက်ကြီး တိုက်ရိုက်ထိမှန်မှုကြောင့် အကြမ်းဖက် စစ်အုပ်စုဘက်က သေဆုံးသူများပြားနိုင်ပြီး အရေအတွက်အားဖြင့် အတည်မပြုနိုင်သေးဟု KNDF (B -09 )က ထုတ်ပြန်ထားသည်။

ယခုတိုက်ပွဲတွင် KNDF ရဲဘော်များ ဘက်မှ ထိခိုက်ကျဆုံးမှု လုံးဝမရှိဘဲ အောင်အောင်မြင်မြင် ပြန်လည် ဆုတ်ခွာနိုင်ခဲ့ကြောင်းသိရသည်။

©လင်းယုန်နွေ

ဓါတ်ပုံ | - Karenni Nationalities Defense Force KNDF B09
ကိုးကား | Karenni Nationalities Defense Force KNDF B09
https://t.me/VOStelegram
https://youtube.com/c/TheVoiceOfSpringTV
#thevoiceofspring

◼ ဖယ်ခုံတိုက်ပွဲ၌ အကြမ်းဖက် စစ်အုပ်စုဘက်က (၄၀)ကျော်သေဆုံးနိုင်ပြီး အများအပြားဒဏ်ရာရ

ဇူလိုင်(၇)ရက် | နွေဦးအသံ |

ရှမ်းပြည်နယ်တောင်ပိုင်း၊ ဖယ်ခုံမြို့နယ်အတွင်းရှိ ကုန်းဆုံနှင့် လွယ်ပတာကျေးရွာ အနီးက အကြမ်းဖက် စစ်အုပ်စုတပ်စခန်းကို ကရင်နီတပ်မတော် (KA)၊ ကရင်နီအမျိုးသား ကာကွယ်ရေးတပ် (KNDF) အပါအဝင် ဖယ်ခုံနှင့် မိုးဗြဲ PDF တပ်တွေ ပူးပေါင်း တိုက်ခိုက်ခဲ့ရာ စစ်အုပ်စု ဘက်က (၄၀) ကျော် သေဆုံးနိုင်ပြီး အများအပြားဒဏ်ရာရရှိခဲ့ကြောင်း KNDF သတင်းရင်းမြစ်များထံက သိရသည်။

လွယ်ပတာစခန်းကုန်း မှ KNDF တပ်ဖွဲ့များ ပြန်လည်ထွက်ခွာစဉ် အကြမ်းဖက် စစ်အုပ်စုဘက်က လက်နက်ကြီးများနှင့် ဆက်တိုက် ပစ်ခတ်ပြီး သာလွန် အင်အားသုံးကာ ပြန်လည် တိုက်ခိုက်လာသဖြင့်သိမ်းပိုက်ပြီးစခန်းနှင့် လက်နက်ခဲယမ်းများကို ထားခဲ့၍ စွန့်ခွာခဲ့ရသည်။

အဆိုပါတိုက်ပွဲသည် ဖယ်ခုံမြို့နယ်အတွင်း ဖြစ်ပွားခဲ့သည့် တိုက်ပွဲများအနက် အပြင်းထန်ဆုံး တိုက်ပွဲဖြစ်ပြီး နှစ်ဘက်ထိခိုက်ကျဆုံးမှု များခဲ့သော တိုက်ပွဲ တခု လည်း ဖြစ်သည်။

တိုက်ပွဲတွင် ဒေသခံတော်လှန်ရေး အင်အားစုများဘက်မှ ၁၁ ဦး ကျဆုံး ကာ တော်လှန်ရေးအတွက် အသက်ပေးလှူခဲ့ရကြောင်းသိရသည်။

©အောင်နွေထက်
ဓါတ်ပုံ | - Karenni Nationalities Defense Force KNDF
https://t.me/VOStelegram
https://youtube.com/c/TheVoiceOfSpringTV
#thevoiceofspring

◼ NUG အစိုးရ ပြည်တွင်းအခွန်များဦးစီးဌာနမှ အခွန်ထမ်း လူပုဂ္ဂိုလ် တဦးချင်း နှင့် စီးပွားရေးလုပ်ငန်းများကို ဂုဏ်ယူစွာ မှတ်တမ်းတင် ထားကြောင်း ထုတ်ပြန်

ဇူလိုင်(၇)ရက် | နွေဦးအသံ |

◼ သမိုင်းပေးတာဝန်တစ်ရပ်အဖြစ် ဂုဏ်ယူစွာဖြင့်ပါဝင်နိုင်

အာဏာသိမ်းအကြမ်းစစ်ကောင်စီ ကို တော်လှန်နေစဉ်ကာလအတွင်း အခွန်ထမ်းဆောင်ပေးကြသည့် လူပုဂ္ဂိုလ်တဦးချင်း နှင့် စီးပွားရေး လုပ်ငန်း များကို ဂုဏ်ယူစွာဖြင့် မှတ်တမ်းတင်ထားကြောင်း NUG အစိုးရ၏ ပြည်တွင်းအခွန်များဦးစီးဌာနက သတင်းထုတ်ပြန်ခဲ့ကြောင်းသိရသည်။

ပြည်တွင်းအခွန်များဦးစီးဌာန က သတင်းထုတ်ပြန်ရာတွင် ‘အခွန်ဆိုတာ နိုင်ငံတစ်နိုင်ငံ၊ အစိုးရတရပ် အတွက် မရှိမဖြစ်လိုအပ်တဲ့ အခြေခံအုတ်မြစ်တစ်ခုဆိုရင်လည်း မမှားပါဘူး။ အမျိုးသားညီညွတ်ရေးအစိုးရရဲ့ ပြည်တွင်းအခွန်များဦးစီးဌာနမှလည်း အခုလိုအကြမ်းဖက် စစ်အာဏာရှင်ကို တော်လှန် နေတဲ့ကာလမှာအခွန်ထမ်းဆောင်နေတဲ့လူပုဂ္ဂိုလ်တစ်ဦးချင်းနဲ့စီးပွါးရေးလုပ်ငန်းများကိုဂုဏ်ယူစွာမှတ်တမ်းတင်ထားပါတယ်။’ ဟု ဖော်ပြပါရှိသည်။

အခွန်ထမ်းဆောင်ရန်ကျန်ရှိနေသည့် စီးပွားရေးလုပ်ငန်းရှင်များကိုလည်း အခွန်ထမ်းဆောင်ရန် အတွက် ဆက်သွယ်ဆောင်ရွက် ပုံနည်းလမ်းများကိုထုတ်ပြန်ပေးထားပြီး ပြည်တွင်းအခွန်များဦးစီးဌာန ၏ contact@nug-mm.net email မှတဆင့် Notice Letter များ ကို ပေးပို့ထားသည်။

NUG အစိုးရ ပြည်တွင်း အခွန်များဦးစီးဌာနအနေဖြင့် ယခုကဲ့သို့ အကြမ်းဖက် စစ်အာဏာရှင်ကို တော်လှန်နေသည့် ကာလတွင် အခွန်ထမ်းဆောင်ခြင်းသည် သမိုင်းပေး တာဝန်တစ်ရပ်အဖြစ် ဂုဏ်ယူစွာဖြင့်ပါဝင်နိုင်ကြပါကြောင်းကိုလည်း ထုတ်ပြန်ထားသည်။

©မျိုးဇော်
ဓါတ်ပုံ | ပြည်တွင်းအခွန်များ ဦးစီးဌာန၊အမျိုးသားညီညွတ်ရေး အစိုးရ၊၊
https://t.me/VOStelegram
https://youtube.com/c/TheVoiceOfSpringTV
#thevoiceofspring

◼နေပြည်တော်အချုပ်ထောင်၌ ထားရှိကာ အချုပ်ထောင်တွင်းတရားရုံး၌ပင် တရားရင်ဆိုင်စေခဲ့

ဇူလိုင်(၈)ရက် | နွေဦးအသံ |

ပြည်ထောင်စုရွေးကောက်ပွဲကော်မရှင်(UEC) ဥက္ကဋ္ဌ ဦးလှသိန်း အပါအဝင် ကော်မရှင်အဖွဲ့ဝင်ဖြစ်သော ဦးမြင့်နိုင် နှင့် ဦးသန်းဌေး တို့ကို အကြမ်းဖက်စကစတရားရုံးက ဇူလိုင်(၇)ရက်တွင် ထောင်ဒဏ်(၃)နှစ်စီ ပြစ်ဒဏ်ချမှတ်လိုက်ကြောင်း သိရသည်။

အဆိုပါ UEC ဥက္ကဋ္ဌ နှင့် ကော်မရှင်အဖွဲ့ဝင်(၂)ဦးကို ရာဇသတ်ကြီး ဥပဒေပုဒ်မ ၁၃၀ (က) နှင့် နေပြည်တော်အချုပ်ထောင်တွင်းတရားရုံးက သက်သေအထောက်အထားမပြနိုင်ဘဲ မတရားစွပ်စွဲ၍ အမိန့်ချမှတ်ခဲ့ခြင်း ဖြစ်သည်။

ပုဒ်မ - ၁၃၀ (က)သည် တည်ဆဲဥပဒေများကို တားမြစ်ခြင်း၊ တမင်ချန်လှပ်ထားခြင်းတို့ကို ကျူးလွန်လျှင် အရေးယူရသည့် ပုဒ်မဖြစ်ပြီး ငွေဒဏ်အပြင် အမြင့်ဆုံးထောင်ဒဏ် သုံးနှစ်အထိ ချမှတ်နိုင်သည်။

ကိုဗစ်ကပ်ရောဂါကြားမှ ကျန်းမာရေးစည်းကမ်းသတ်မှတ်ချက်စံနှုန်းများနှင့်အညီ လွတ်လပ်ပြီး တရားမျှတသော(၂၀၂၀) အထွေထွေရွေးကောက်ပွဲကို ဥက္ကဋ္ဌ ဦးလှသိန်းနှင့်အဖွဲ့က ဥပဒေနှင့်အညီ အောင်မြင်စွာ ကျင်းပပြုလုပ်နိုင်ခဲ့သည်။

သို့ရာတွင် စစ်တပ်ထောက်ခံသော ကြံ့ခိုင်ရေးပါတီမှာ မရှုမလှရှုံးနိမ့်ခဲ့ရသဖြင့်အခြေအမြစ် မရှိသော သက်သေမပြနိုင်သည့် မဲသမာမှုကို အကြောင်းပြပြီး စစ်အာဏာသိမ်းပြီးနောက် အကြမ်းဖက်စစ်အုပ်စုသည် နိုင်ငံအနှံ့ရှိ UEC အဖွဲ့ဝင်များကို မတရား ဖမ်းဆီးခဲ့သည်။

ရွေးကောက်ပွဲကော်မရှင် ဥက္ကဋ္ဌ နှင့် အဖွဲ့ဝင်နှစ်ဦးကိုလည်း ၂၀၂၁ ခုနှစ် နိုဝင်ဘာလမှ စတင်ပြီး နေပြည်တော်အချုပ်ထောင်၌ ထားရှိကာ အချုပ်ထောင်တွင်း တရားရုံး၌ပင် တရားရင်ဆိုင်စေခဲ့ကြောင်း သိရပါသည်။

©အောင်နွေထက်
ကိုးကား | RFA
ဓါတ်ပုံ | ဥက္ကဋ္ဌ ဦးလှသိန်း (ဝဲ)၊ ဦးမြင့်နိုင် (ယာ)
https://t.me/VOStelegram
https://youtube.com/c/TheVoiceOfSpringTV
#thevoiceofspring