🟦🟦🟦🟦🟦🟦🟦

Gruziyaning Tbilisi davlat universiteti qoshidagi Gruzin tili va adabiyoti instituti direktori bilan uchrashuv bo‘lib o‘tdi

12-may kuni O‘zbekiston davlat jahon tillari universitetida Tbilisi davlat universiteti qoshidagi Gruzin tili va adabiyoti instituti direktori, professor Irme Ratiani bilan uchrashuv bo‘lib o‘tdi.

Uchrashuvda O‘zDJTU tomonidan universitet rektori I. Tuxtasinov, xalqaro hamkorlik bo‘yicha prorektor A. Nasirov, xalqaro hamkorlik bo‘limi boshlig‘i X. Yuldashev hamda Jahon adabiyoti kafedrasi mudiri G. Xalleyeva ishtirok etdilar.

Tadbir davomida quyidagi asosiy yo‘nalishlar muhokama qilindi:
— O‘zDJTUda gruzin tilini o‘qitishni yo‘lga qo‘yish;
— gruzin tili bo‘yicha tarjimon kadrlar tayyorlash;
— ilmiy-tadqiqot sohasida hamkorlikni rivojlantirish;
— hamkorlikda seminar-treninglar, konferensiyalar hamda professor-o‘qituvchilar ma’ruzalarini onlayn va oflayn shaklda tashkil etish;
— tomonlarni qiziqtirgan boshqa masalalar.

Uchrashuvda I. Tuxtasinov universitet faoliyati hamda 31-mart – 3-aprel kunlari Gruziyaga amalga oshirilgan tashrif natijalari yuzasidan ma’lumot berdi. Shuningdek, O‘zDJTUda Gruzin tili markazini tashkil etish va gruzin tilini o‘qitish bo‘yicha Gruziya Oliy ta’lim, fan va yoshlar vazirligi, Tbilisi davlat universiteti, Gruziya universiteti hamda Telavi davlat universiteti bilan olib borilayotgan ishlar haqida to‘xtalib o‘tdi.

Professor Irme Ratiani esa ushbu tashabbuslarni amalga oshirishda har tomonlama ko‘mak berishini ta’kidlab, adabiyotshunoslik va qiyosiy adabiyotshunoslik (komparativistika) sohalarida hamkorlik qilishga tayyor ekanligini bildirdi.

Uchrashuv o‘zaro hamkorlikni yanada mustahkamlashga qaratilgan kelishuvlar bilan yakunlandi.

🌐 Biz ijtimoiy tarmoqlarda:
Telegram | Instagram | Facebook | Sayt

🔻🔻🔻🔻🔻

O‘zDJTUda sharq tillarini o‘qitishning zamonaviy yondashuvlariga bag‘ishlangan Respublika ilmiy-amaliy konferensiyasi bo‘lib o‘tdi

12-may kuni O‘zbekiston davlat jahon tillari universitetining 34 yilligiga bag‘ishlangan “Yangi avlod talabalariga sharq tillarini o‘qitishda zamonaviy yondashuvlar va innovatsion tendensiyalar” mavzusida Respublika ilmiy-amaliy konferensiyasi tashkil etildi.

Mazkur anjuman xorijiy tillarni o‘qitish metodikasi, sun’iy intellekt texnologiyalarining ta’lim jarayoniga integratsiyasi, zamonaviy pedagogik yondashuvlar hamda lingvistik tadqiqotlarning dolzarb masalalariga bag‘ishlandi.
Konferensiyani universitet rektori Ilxomjon Tuxtasinov kirish so‘zi bilan ochib, bugungi globallashuv davrida innovatsion ta’lim texnologiyalarining ahamiyati, xorijiy tillarni o‘qitishda zamonaviy metodlarni qo‘llash va ilmiy tadqiqotlarni rivojlantirish masalalariga alohida to‘xtalib o‘tdi.

Konferensiya doirasida mahalliy va xorijiy olimlar hamda tadqiqotchilar tomonidan qator ilmiy ma’ruzalar taqdim etildi. Jumladan, Ma Lei “Oʻzbekistonda xitoy tili darslarida fonetika ta’limining qoʻllanish ahamiyati va zarurati tadqiqi”, Sultanova Lola Akmalovna “Xitoy tilini oʻqitish samaradorligini oshirishda sun’iy intellekt texnologiyalaridan foydalanish”, Choi Seong Hoon “Sun’iy intellekt yordamida koreys tilida soʻzlashuv ta’limini oʻrganish” mavzularida ma’ruzalar bilan ishtirok etdi.
Shuningdek, Na Jongip “Badiiy asarlarda vaqt oqimi masalasining tahlili”, Absalomov Mirolim Sharif o‘g‘li “Koreys va o‘zbek tillaridagi kishilik olmoshlarining lingvistik-tipologik qiyosiy tadqiqi”, Ibragimova Malika Musayevna esa “Video kontent orqali talabalarning gapirish va tinglash ko‘nikmalarini rivojlantirish” mavzularida o‘z ilmiy qarashlarini taqdim etdi.

Anjuman davomida zamonaviy ta’lim texnologiyalarini amaliyotga joriy etish, xorijiy tillarni innovatsion metodlar asosida o‘qitish hamda xalqaro ilmiy hamkorlikni kengaytirish masalalari yuzasidan fikr almashildi.

Mazkur konferensiya ilmiy tajriba almashish, yangi tadqiqot yo‘nalishlarini muhokama qilish hamda yosh tadqiqotchilarni qo‘llab-quvvatlashga xizmat qiluvchi muhim ilmiy platformalardan biri sifatida e’tirof etildi.

🌐 Biz ijtimoiy tarmoqlarda:
Telegram | Instagram | Facebook | Sayt

O‘zDJTUda Respublika ilmiy-amaliy konferensiyasi sho‘ba yig‘ilishlari davom etdi

12-may kuni O‘zbekiston davlat jahon tillari universitetining 34 yilligiga bag‘ishlangan “Yangi avlod talabalariga sharq tillarini o‘qitishda zamonaviy yondashuvlar va innovatsion tendensiyalar” mavzusidagi Respublika ilmiy-amaliy konferensiyasi doirasida sho‘ba yig‘ilishlari bo‘lib o‘tdi.
Sho‘ba yig‘ilishlarida sharq tillari lingvistikasi, lingvomadaniyati, tarjimashunoslik, zamonaviy pedagogik texnologiyalar, sun’iy intellekt hamda raqamli ta’lim metodlariga oid dolzarb mavzular muhokama qilindi.

I-sho‘ba “Sharq tillari lingvistikasi, lingvomadaniyati va tarjimashunosligining dolzarb masalalari” mavzusiga bag‘ishlanib, unda rus va xitoy lingvomadaniyatida nutqiy ta’sir va ishontirish strategiyalari, xitoy tilida rasmiy va norasmiy uslublarning farqlari, antroponimlarning yasalish xususiyatlari, sharq adabiyotidagi ruhiy iztirob estetikasi, gender stereotiplari hamda rang leksikasining lingvomadaniy tahliliga oid ilmiy ma’ruzalar tinglandi.
Shuningdek, sho‘ba yig‘ilishida xitoy tilidan o‘zbek tiliga tarjima jarayonida uchraydigan xato va kamchiliklar, yapon tili ijtimoiy-nutqiy normalari, Lu Sun ijodining badiiy tahlili hamda xitoy va o‘zbek tillarida fonovariativlikni sun’iy intellekt va raqamli platformalar asosida takomillashtirish masalalari yuzasidan fikr almashildi.

II-sho‘ba “Sharq tillarini o‘qitishda innovatsion metodlar, raqamli texnologiyalar va sun’iy intellekt” mavzusida tashkil etilib, unda sharq tillarini o‘qitishda sun’iy intellekt texnologiyalaridan foydalanish, raqamli ta’lim platformalari imkoniyatlari, zamonaviy o‘qitish metodlari hamda innovatsion pedagogik yondashuvlar muhokama markazida bo‘ldi.
Mazkur sho‘bada Doubao platformasi asosida xitoy tilini o‘qitish, yapon tilini sun’iy intellekt vositalari yordamida o‘rgatish, HSK5 darajasini qisqa muddatda o‘qitishning kognitiv-psixologik tahlili, talabalarning bilimini raqamli metodlar asosida baholash, xitoy tilida iboralarni samarali o‘qitish usullari hamda sharq madaniyati va tilini o‘rganishda an’ana va yangilik uyg‘unligi kabi mavzularda ma’ruzalar taqdim etildi.

Konferensiya davomida mahalliy va xorijiy tadqiqotchilar, professor-o‘qituvchilar hamda yosh izlanuvchilar o‘rtasida ilmiy tajriba almashinuvi yo‘lga qo‘yilib, sharq tillarini o‘qitishda zamonaviy metodlarning samaradorligi va innovatsion texnologiyalarning ta’lim jarayonidagi o‘rni yuzasidan keng muhokamalar olib borildi.

🌐 Biz ijtimoiy tarmoqlarda:
Telegram | Instagram | Facebook | Sayt