🟦🟦

Filologiya fanlari bo‘yicha falsafa doktori (PhD) dissertatsiyasi himoyasi bo‘lib o‘tdi

2026-yil 12-may kuni O‘zbekiston davlat jahon tillari universiteti huzuridagi Ilmiy kengash majlisida Qodirjonova Iqbola Bahodir qizining 10.00.06 — Qiyosiy adabiyotshunoslik, chog‘ishtirma tilshunoslik va tarjimashunoslik ixtisosligi bo‘yicha “Amerika va o‘zbek bolalar adabiyotida “yetim bola” obrazi: davr va ruhiyat (Kristofer Pol Kertis va Xudoyberdi To‘xtaboyev asarlari misolida)” mavzusidagi filologiya fanlari bo‘yicha falsafa doktori (PhD) dissertatsiyasi himoyasi bo‘lib o‘tdi.

Himoya majlisi oflayn hamda ZOOM onlayn platformasi orqali tashkil etildi.

Dissertatsiya ishida Amerika va o‘zbek bolalar adabiyotidagi “yetim bola” obrazining badiiy talqini, davr va ruhiyat bilan bog‘liq jihatlari qiyosiy tahlil asosida yoritildi.

Ilmiy kengash a’zolari tomonidan tadqiqot ishining dolzarbligi, ilmiy yangiligi hamda amaliy ahamiyati alohida e’tirof etildi.

🌐 Biz ijtimoiy tarmoqlarda:
Telegram | Instagram | Facebook | Sayt

🔷🔷🔷🔷

Tarjimon-volontyorlar uchun seminar tashkil etildi

12-may kuni joriy yilning 18–19-may kunlari Toshkent shahrida bo‘lib o‘tadigan “Mehnat migrantlari va ularning oila a’zolarining ijtimoiy-huquqiy himoyasi” mavzusidagi xalqaro forumga jalb etilgan O‘zbekiston davlat jahon tillari universiteti, Jahon iqtisodiyoti va diplomatiya universiteti hamda Toshkentdagi Singapur menejmentni rivojlantirish instituti tarjimon-volontyorlari ishtirokida seminar tashkil etildi.

Tadbirni O‘quv ishlari bo‘yicha prorektor M. Chutpulatov kirish so‘zi bilan ochib berib, forumning xalqaro miqyosdagi nufuzini alohida ta’kidladi hamda xorijiy mehmonlarga sifatli tarjima xizmatlarini ko‘rsatish, mas’uliyat va professionallik bilan yondashish zarurligini qayd etdi.

O‘zbekiston Respublikasi Vazirlar Mahkamasi huzuridagi Migratsiya agentligining Xorijdagi migrantlarga ijtimoiy-huquqiy yordam ko‘rsatish bo‘limi mas’ul xodimi Alisher Qodirov agentlik faoliyati haqida ma’lumot berib, mazkur forum hukumat darajasida tashkil etilayotganini hamda tarjimon-volontyorlardan yuqori mas’uliyat talab etilishini ta’kidladi.

Shuningdek, O‘zDJTU Xalqaro hamkorlik bo‘limi boshlig‘i X. Yuldashev ish jarayonidagi punktuallik, muloqot madaniyati, tarjimonlik etikasi hamda xorijiy ishtirokchilar bilan muloqotda yuzaga kelishi mumkin bo‘lgan ijtimoiy-siyosiy masalalarga jiddiy e’tibor qaratish yuzasidan tavsiyalar berdi.

Tadbir yakunida tarjimon-volontyorlar o‘zlarini qiziqtirgan savollarga javob oldilar.

🌐 Biz ijtimoiy tarmoqlarda:
Telegram | Instagram | Facebook | Sayt

🟦🟦🟦

O‘zDJTUda “Ijtimoiy faollik indeksi” doirasida kitobxonlik madaniyati test sinovlari boshlandi

O‘zbekiston Respublikasi Vazirlar Mahkamasining 2025-yil 14-martdagi 149-son qarori bilan tasdiqlangan “Oliy ta’lim tashkilotlarida talabalarga grantlarni taqdim etish va qayta taqsimlash tartibi to‘g‘risidagi nizom” hamda “Ijtimoiy faollik indeksi”ni baholash mezonlari asosida universitetda kitobxonlik madaniyati bo‘yicha test sinovlari bugundan rasman boshlandi.

Mazkur sinovlar 2026-yil 12–14-may kunlari davomida fakultetlar kesimida belgilangan grafik asosida tashkil etilmoqda.

Test sinovlari talabalar tomonidan o‘qilgan badiiy adabiyotlar asosida ularning kitobxonlik madaniyati, mutolaa ko‘nikmalari, tahliliy fikrlash qobiliyati hamda ma’naviy salohiyatini aniqlashga yo‘naltirilgan.

“Ijtimoiy faollik indeksi” tizimi esa talabalarni faqat akademik ko‘rsatkichlar emas, balki ijtimoiy, ma’naviy va ma’rifiy faolligi asosida kompleks baholashni nazarda tutadi.

Mazkur jarayon grantlarni adolatli va shaffof taqsimlash hamda talabalarda kitobxonlik madaniyati va ijtimoiy faollikni yanada rivojlantirishga yo‘naltirilgan.

Test sinovlari bugundan boshlab 2026-yil 14-mayga qadar davom etadi.

🌐 Biz ijtimoiy tarmoqlarda:
Telegram | Instagram | Facebook | Sayt

🟦🟦🟦🟦🟦🟦🟦

Gruziyaning Tbilisi davlat universiteti qoshidagi Gruzin tili va adabiyoti instituti direktori bilan uchrashuv bo‘lib o‘tdi

12-may kuni O‘zbekiston davlat jahon tillari universitetida Tbilisi davlat universiteti qoshidagi Gruzin tili va adabiyoti instituti direktori, professor Irme Ratiani bilan uchrashuv bo‘lib o‘tdi.

Uchrashuvda O‘zDJTU tomonidan universitet rektori I. Tuxtasinov, xalqaro hamkorlik bo‘yicha prorektor A. Nasirov, xalqaro hamkorlik bo‘limi boshlig‘i X. Yuldashev hamda Jahon adabiyoti kafedrasi mudiri G. Xalleyeva ishtirok etdilar.

Tadbir davomida quyidagi asosiy yo‘nalishlar muhokama qilindi:
— O‘zDJTUda gruzin tilini o‘qitishni yo‘lga qo‘yish;
— gruzin tili bo‘yicha tarjimon kadrlar tayyorlash;
— ilmiy-tadqiqot sohasida hamkorlikni rivojlantirish;
— hamkorlikda seminar-treninglar, konferensiyalar hamda professor-o‘qituvchilar ma’ruzalarini onlayn va oflayn shaklda tashkil etish;
— tomonlarni qiziqtirgan boshqa masalalar.

Uchrashuvda I. Tuxtasinov universitet faoliyati hamda 31-mart – 3-aprel kunlari Gruziyaga amalga oshirilgan tashrif natijalari yuzasidan ma’lumot berdi. Shuningdek, O‘zDJTUda Gruzin tili markazini tashkil etish va gruzin tilini o‘qitish bo‘yicha Gruziya Oliy ta’lim, fan va yoshlar vazirligi, Tbilisi davlat universiteti, Gruziya universiteti hamda Telavi davlat universiteti bilan olib borilayotgan ishlar haqida to‘xtalib o‘tdi.

Professor Irme Ratiani esa ushbu tashabbuslarni amalga oshirishda har tomonlama ko‘mak berishini ta’kidlab, adabiyotshunoslik va qiyosiy adabiyotshunoslik (komparativistika) sohalarida hamkorlik qilishga tayyor ekanligini bildirdi.

Uchrashuv o‘zaro hamkorlikni yanada mustahkamlashga qaratilgan kelishuvlar bilan yakunlandi.

🌐 Biz ijtimoiy tarmoqlarda:
Telegram | Instagram | Facebook | Sayt