Sergeli tumanidagi maktabda ingliz tili to‘garagi mashg‘uloti tashkil etildi.

Xorijiy tillarni o‘qitish markazlari faoliyati doirasida ingliz tili to‘garaklari samarali tarzda tashkil etib kelinmoqda.

Jumladan, 2026-yil 11- aprel kuni Sergeli tumani 104-sonli umumta’lim maktabida ingliz tili bo‘yicha navbatdagi to‘garak mashg‘uloti bo‘lib o‘tdi. Mazkur mashg‘ulot O‘zbekiston davlat jahon tillari universiteti Ingliz tili birinchi fakulteti Ingliz tilini o'qitish metodikasi N1 kafedrasiga qarashli 2210- guruh talabasi Qudratova Durdona tomonidan tashkil etildi.

Mashg‘ulot davomida o‘quvchilar bilan ingliz tili grammatikasi va lug‘at boyligini mustahkamlashga qaratilgan amaliy mashqlar bajarildi. Xususan, Yes/No questions, -wh- questions kabi mavzular asosida turli mashq va topshiriqlar ustida ishlanib, o‘quvchilarning bilim va ko‘nikmalarini rivojlantirishga alohida e’tibor qaratildi.

🌐 Biz ijtimoiy tarmoqlarda:
Telegram | Instagram | Facebook | Sayt

Yaponiya choy marosimi to‘garagi

O‘zbekiston davlat jahon tillari universiteti Yapon filologiyasi kafedrasi o‘qituvchilari tashabbusi bilan talabalarning nazariy bilimlarini amaliy ko‘nikmalar bilan boyitishga qaratilgan Yaponiya choy marosimiga bag‘ishlangan maxsus to‘garak tashkil etildi.

To‘garak mashg‘ulotlari yaponiyalik mutaxassislar — Toshuko hamda Kazuhiko Matsuo rahbarligida olib borildi. Ushbu tashabbus talabalarda yapon milliy qadriyatlari, xususan, choy marosimi madaniyatiga bo‘lgan qiziqishni yanada kuchaytirdi.

Ma’lumot o‘rnida, mashg‘ulotlar 4–10-aprel kunlari davomida 2-bosqich talabalari ishtirokida “Choy tarixi va matcha tayyorlash” mavzusida o‘tkazildi.

Jarayon davomida ishtirokchilar yapon choy marosimining kelib chiqishi va rivojlanish bosqichlari haqida nazariy bilimlarni o‘zlashtirish bilan birga, matcha ichimligini mustaqil tayyorlashni ham amalda sinab ko‘rishdi.

Shuningdek, talabalar Yaponiya va O‘zbekiston choy madaniyatini solishtirib, o‘xshashlik va farqlar yuzasidan o‘z fikrlarini bildirishdi. Bu esa ularning madaniyatlararo muloqot ko‘nikmalarini yanada mustahkamladi.

Mazkur to‘garak talabalarga til o‘rganish bilan bir qatorda o‘rganilayotgan mamlakat madaniyatini chuqurroq anglash imkonini beradigan samarali amaliy mashg‘ulot sifatida ahamiyat kasb etdi.

🌐 Biz ijtimoiy tarmoqlarda:
Telegram   | Instagram  | Facebook  | Sayt

Xorijlik talabalar Tovoqsoyda

O‘zbekiston davlat jahon tillari universiteti 6-sonli talabalar turar joyida istiqomat qilayotgan xorijlik talabalar uchun pedagog Z. Ibadullayeva tashabbusi bilan Tovoqsoy hududiga madaniy-ma’rifiy sayohat tashkil etildi.

Mazkur sayohat davomida talabalar Tovoqsoy hududining betakror tabiati bilan yaqindan tanishib, ochiq havoda piknik tashkillashtirdilar. Sayohat davomida talabalar o‘zaro muloqot qilib, do‘stona muhitda vaqtlarini maroqli o‘tkazdilar.

Shuningdek, ushbu sayohat xorijlik talabalarning bo‘sh vaqtini mazmunli tashkil etish, ularning jamoaga moslashuvini, O‘zbekistonning go‘zal tabiati va hududlari bilan yaqindan tanishishlarida muhim ahamiyat kasb etdi. Shu kabi sayohatlar xorijlik talabalar uchun nafaqat hordiq chiqarish, balki yangi muhitni anglash, madaniy almashinuvni rivojlantirish imkonini yaratadi.

🌐 Biz ijtimoiy tarmoqlarda:
Telegram   | Instagram  | Facebook  | Sayt

🌿 UzSWLU talabalari ekologik aksiyada faol ishtirok etdi

O‘zbekiston Ekologik partiyasi Markaziy Kengashi tashabbusi bilan Toshkent viloyati partiya tashkiloti, Parkent tumani hokimligi hamda “Zero Waste” MCHJ sanitar tozalash korxonasi hamkorligida Parkent tumanining “Qizil tog‘” hududida “Biz inson va tabiat uyg‘unligi tarafdorimiz!” shiori ostida ekologik aksiya tashkil etildi.

Mazkur tadbirda O‘zbekiston davlat jahon tillari universiteti, Yangi asr universiteti, Toshkent menejment va iqtisodiyot instituti, International School of Finance Technology and Science hamda Muhammad al-Xorazmiy nomidagi ixtisoslashtirilgan maktabning talaba-yoshlari faol qatnashdi.

Aksiyaning asosiy maqsadi – aholining ekologik madaniyatini yuksaltirish, atrof-muhitni asrashga jamoatchilik e’tiborini kuchaytirish, yoshlarda tabiatga mas’uliyatli munosabatni shakllantirish hamda hududlarda obodonlashtirish ishlarini kengaytirishdan iborat bo‘ldi.

Tadbir davomida “Qizil tog‘” hududida dam oluvchilar tomonidan qoldirilgan chiqindilar talaba-yoshlar tomonidan yig‘ishtirilib, maxsus texnikalar yordamida belgilangan joylarga olib chiqildi. Ushbu jarayonda universitetning Ekologiya va yashil resurslar kafedrasi dotsenti Rayxon Mudarisova rahbarligida XT2-2302 va XT2-2316-guruh talabalari alohida faollik ko‘rsatdi.

Tadbir yakunida faol ishtirok etgan talaba-yoshlar hamda hamkor tashkilotlar vakillari O‘zbekiston Ekologik partiyasi Markaziy Kengashining tashakkurnomalari va esdalik sovg‘alari bilan taqdirlandi.

Mazkur aksiya yoshlar orasida ekologik ong va madaniyatni rivojlantirish, shuningdek, tabiatni asrash borasida amaliy harakatlarning muhim namunasi sifatida e’tirof etildi.

🌐 Biz ijtimoiy tarmoqlarda:
Telegram | Instagram | Facebook | Sayt