Turli tillar va madaniyatlarga bag‘ishlangan to‘garak mashg‘ulotlari o‘tkazildi

2026-yil 18-mart kuni O‘zbekiston davlat jahon tillari universiteti Ingliz tili 3-fakulteti Ikkinchi chet tili kafedrasi tomonidan turli tillar va xalqlar madaniyatiga bag‘ishlangan navbatdagi to‘garak mashg‘ulotlari tashkil etildi.

Jumladan, golland tili katta o‘qituvchisi Rahmonkulova Xabiba rahbarligida Ingliz tili 3-fakultet 2418-guruhi talabalari ishtirokida “Nederlandse keuken” (Niderlandiya oshxonasi) mavzusida mashg‘ulot o‘tkazildi. Unda Gollandiya milliy taomlari, xususan, mashhur “Gouda” va “Edam” pishloqlari hamda “patat” kabi taomlar haqida ma’lumot berildi. Talabalar golland va o‘zbek milliy oshxonalari o‘rtasidagi o‘xshashlik va farqlar yuzasidan fikr almashdilar.

Shuningdek, grek tili katta o‘qituvchisi Musayeva Surayyo rahbarligida Ingliz tili 1-fakultet 2307-guruhi talabalari bilan “Ελληνική κουζίνα” (Gretsiya oshxonasi) mavzusida to‘garak mashg‘uloti tashkil etildi. Mashg‘ulot davomida Gretsiya oshxonasining sog‘lom va muvozanatli ovqatlanishga asoslanganligi, uning “Mediterranean diet” tamoyillariga mos kelishi haqida so‘z yuritildi. Talabalar faol qatnashib, savol-javoblar va interaktiv topshiriqlar orqali o‘z bilimlarini mustahkamlashdi.

Bundan tashqari, kafedra o‘qituvchisi Maxamadxodjayeva Umida tomonidan Hind tili markazida hindiy tili to‘garagining navbatdagi mashg‘uloti o‘tkazildi. Mashg‘ulot “Hindistonning tarixiy obidalari” mavzusiga bag‘ishlanib, unda Toj Mahal, Qizil qal’a, Akbarshoh maqbarasi, Qutub minor kabi mashhur yodgorliklar haqida nazariy va amaliy ma’lumotlar berildi. Talabalar o‘zlari tayyorlagan taqdimotlar bilan chiqish qildilar hamda mavzuga oid qiziqarli o‘yinlar tashkil etildi.

Mazkur mashg‘ulotlar zamonaviy pedagogik yondashuvlar asosida tashkil etilib, talabalar bilimini mustahkamlash bilan birga ularning dunyo xalqlari madaniyati va an’analariga bo‘lgan qiziqishini yanada oshirdi.

🌐 Biz ijtimoiy tarmoqlarda:
Telegram | Instagram | Facebook | Sayt

🟦🟦

Dissertatsiya ishining kengaytirilgan kafedra ilmiy muhokamasi bo‘lib o‘tdi

2026-yil 18-mart kuni O‘zbekiston davlat jahon tillari universiteti Rus filologiyasi fakulteti Rus tili va o‘qitish metodikasi kafedrasi tomonidan navbatdagi kengaytirilgan kafedra ilmiy muhokamasi oflayn shaklda hamda ZOOM platformasi orqali tashkil etildi.

Muhokama doirasida Kononova Irina Yurevnaning 10.00.04 – Yevropa, Amerika va Avstraliya xalqlari tillari va adabiyoti mutaxassisligi bo‘yicha «Kiritma konstruksiyalar sintaksisning subyekt-ekspressiv shakli sifatida (M. Svetayeva badiiy prozasi asosida)» mavzusidagi filologiya fanlari bo‘yicha falsafa doktori (PhD) ilmiy darajasini olish uchun taqdim etilgan dissertatsiyasi ko‘rib chiqildi.

Muhokama ochiq ilmiy muloqot va mazmunli munozara ruhida o‘tdi. Kafedra a’zolari tomonidan tadqiqot yuzasidan ilmiy fikrlar bildirilib, ishni yanada takomillashtirishga qaratilgan tavsiyalar berildi.

O‘tkazilgan ilmiy muhokama dissertatsiya ishining dolzarbligi, ilmiy yangiligi hamda amaliy ahamiyatini yana bir bor tasdiqladi.

🌐 Biz ijtimoiy tarmoqlarda:
Telegram | Instagram | Facebook | Sayt

🟦🟦🟦

O‘zDJTUda “Rahbar va yoshlar” uchrashuvi tashkil etildi

19-mart kuni O‘zbekiston davlat jahon tillari universiteti akademik litseyida rektor Tuxtasinov Ilxomjon Madaminovich ishtirokida uchrashuv bo‘lib o‘tdi. Tadbir litsey direktori Obidova Maxsudaxon Obidovna tomonidan olib borildi.

Tadbirni rektor ochib berdi va yoshlar bilan bevosita muloqot qilish, ularning fikr va tashabbuslarini eshitish har doim ustuvor vazifa ekanligini ta’kidladi.

Uchrashuv davomida eng faol talabalarning “Akademik litsey iftixori” va “Rektor stipendiyasi” bilan taqdirlanishi bo‘lib o‘tdi. Talabalar o‘z fikr va takliflarini bildirdi, rektor esa ularni qo‘llab-quvvatlashga tayyor ekanligini qayd etdi.

Mazkur tadbir yoshlar bilan muloqot qilish, ularning tashabbuslari va kelajak rejalari bilan yaqindan tanishish imkonini berdi. Litsey talabalari uchun bunday uchrashuvlar nafaqat bilim olish, balki o‘z salohiyatini namoyon etish va kelajakka ishonch bilan qadam tashlash imkonini yaratadi.

🌐 Biz ijtimoiy tarmoqlarda:
Telegram | Instagram | Facebook | Sayt