🟦🟦🟦🟦🟦

Rus tilshunosligi va komparativistikaning dolzarb muammolari muhokama qilindi

12-mart kuni O‘zbekiston davlat jahon tillari universitetida “Rus tilshunosligi va komparativistikaning dolzarb muammolari: an’analar va innovatsiyalar” mavzusida xalqaro ilmiy-amaliy konferensiya bo‘lib o‘tdi.

Mazkur nufuzli anjuman O‘zbekiston Respublikasi Oliy ta’lim, fan va innovatsiyalar vazirining 2026-yil 16-yanvardagi “2026-yilda xalqaro va respublika miqyosida o‘tkaziladigan ilmiy hamda ilmiy-texnik tadbirlar rejasini tasdiqlash to‘g‘risida”gi 11-son buyrug‘i hamda universitet rektorining 2025-yil 27-yanvardagi tegishli buyrug‘i ijrosini ta’minlash maqsadida tashkil etildi.

Konferensiya Xalqaro Turon fanlar akademiyasi akademigi, filologiya fanlari doktori, professor Qulmamatov Do‘stmamat Sattorovich tavalludining 70 yilligi munosabati bilan tashkil etildi. Tadbirni universitetning Rus filologiyasi fakulteti hamda Rus tili va o‘qitish metodikasi kafedrasi tashkillashtirdi.

Konferensiyada Moskva davlat universiteti prorektori, filologiya fanlari doktori, professor, Rossiya Ta’lim akademiyasi akademigi Tatyana Vladimirovna Kortava ham ishtirok etib, anjuman qatnashchilariga tabrik yo‘lladi. Shuningdek, xorijiy olimlarning videomurojaatlari ham namoyish etildi.

Anjuman davomida rus tilshunosligi va komparativistika sohasidagi dolzarb ilmiy masalalar muhokama qilinib, ilmiy hamkorlikni kengaytirish, tajriba almashish hamda yosh tadqiqotchilarni qo‘llab-quvvatlash masalalariga alohida e’tibor qaratildi.

🌐 Biz ijtimoiy tarmoqlarda:
Telegram | Instagram | Facebook | Sayt

🟦🟦🟦🟦🟦

Xalqaro olimlar ishtirokida ilmiy ma’ruzalar tinglandi

Konferensiyaning yalpi majlisida turli mamlakatlardan tashrif buyurgan taniqli olimlar o‘z ma’ruzalari bilan qatnashdi. Jumladan, Rossiya Fanlar akademiyasining V.V. Vinogradov nomidagi Rus tili instituti yetakchi ilmiy xodimi, professor Margarita Ivanovna Chernyshyova, Qalmog‘iston davlat universiteti professori Vladimir Naranovich Mushaev, Qozog‘iston milliy universiteti professori Eleonora Dyusenovna Suleymenova, O‘zbekiston davlat jahon tillari universiteti professori Maxanbet Jussupov, Qirg‘iziston–Rossiya Slavyan universiteti professori Mamed Jakypovich Tagaev va boshqa ko‘plab olimlar o‘z ilmiy ma’ruzalari bilan ishtirok etdi.

Shuningdek, Samarqand davlat universiteti professori Ibodulla Kamolovich Mirzayev, Alisher Navoiy nomidagi Toshkent davlat o‘zbek tili va adabiyoti universiteti professori Hamidulla Aripovich Dadaboyev, O‘zbekiston Milliy universiteti professori Abdimurod Eshanqulovich Mamatov hamda Rossiyaning Shimoliy (Arktika) federal universiteti professori Larisa Viktorovna Nenasheva o‘z ilmiy izlanishlari yuzasidan ma’ruzalar taqdim etdilar.

Kun davomida anjuman doirasida davra suhbati ham tashkil etilib, rus tilshunosligi, komparativistika, sotsiolingvistika, tarjimashunoslik hamda zamonaviy lingvistik tadqiqot yo‘nalishlariga oid dolzarb masalalar yuzasidan fikr almashildi.

Tadbirda professor-o‘qituvchilar, ilmiy tadqiqotchilar, doktorantlar, magistrantlar va iqtidorli talabalar faol qatnashdi. Konferensiya yakunida ilmiy hamkorlikni rivojlantirish, qo‘shma tadqiqotlarni kengaytirish hamda rus tilshunosligi va komparativistika sohasida yangi ilmiy yo‘nalishlarni rivojlantirish bo‘yicha taklif va tavsiyalar bildirildi.

🌐 Biz ijtimoiy tarmoqlarda:
Telegram | Instagram | Facebook | Sayt

🟦🟦

Dissertatsiya ishining kengaytirilgan kafedra ilmiy muhokamasi bo‘lib o‘tdi

12-mart kuni Abdullayev Marks Komiljanovichning 10.00.06 – Qiyosiy adabiyotshunoslik, chog‘ishtirma tilshunoslik va tarjimashunoslik ixtisosligi bo‘yicha tayyorlagan “Zamonaviy slengning kognitiv xususiyatlari: kontseptual metaforalar va mental modellar prizmasidan (ispan va rus tillari materialida)” mavzusidagi filologiya fanlari bo‘yicha falsafa doktori (PhD) ilmiy darajasini olish uchun taqdim etilgan dissertatsiya ishining kengaytirilgan kafedra ilmiy muhokamasi bo‘lib o‘tdi.

Muhokama offline hamda ZOOM onlayn platformasi orqali tashkil etildi. Unda kafedra professor-o‘qituvchilari, ilmiy xodimlar va tadqiqotchilar ishtirok etib, dissertatsiya ishining dolzarbligi, ilmiy yangiligi hamda amaliy ahamiyati yuzasidan o‘z fikr-mulohazalarini bildirdilar.

Tadbir davomida dissertatsiya ishining nazariy va amaliy jihatlari muhokama qilinib, tadqiqot yuzasidan berilgan savollarga muallif tomonidan batafsil javoblar berildi. Muhokama yakunida ilmiy ish yuzasidan tegishli tavsiyalar bildirildi.

🌐 Biz ijtimoiy tarmoqlarda:
Telegram | Instagram | Facebook | Sayt

#yoshlarkuni #harpayshanba

🟦🟦🟦🟦🟦

“Biz — sog‘lom turmush tarzi tarafdorlarimiz” mavzusida davra suhbati o‘tkazildi

Bugun O‘zbekiston davlat jahon tillari universitetida talabalar o‘rtasida sog‘lom turmush tarzini targ‘ib qilish hamda OIV infeksiyasining oldini olishga bag‘ishlangan davra suhbati tashkil etildi. Tadbir “Biz — sog‘lom turmush tarzi tarafdorlarimiz” mavzusida bo‘lib o‘tdi.

Davra suhbatini Yoshlar masalalari va ma’naviy-ma’rifiy ishlar bo‘yicha birinchi prorektor Valijon Sadiyev ochib, sog‘lom turmush tarzini shakllantirish, talabalarning salomatligini asrash va turli kasalliklarning oldini olish borasida olib borilayotgan targ‘ibot ishlarining ahamiyati haqida so‘z yuritdi. Tadbirda universitet Tibbiy bo‘lim xodimlari — Azimbayeva Zilola Mamasidiqovna va Abdusattorova Nigora O‘ralboyevna talabalarga OIV infeksiyasi (Odam immunitet tanqisligi virusi) haqida batafsil ma’lumot berdilar. Mutaxassislar kasallikning yuqish yo‘llari, xavf-xatarlari va undan himoyalanish choralari, shuningdek, antiretroviral terapiya yordamida virusni nazorat ostida saqlash imkoniyatlarini yoritib berdilar.

Shuningdek, “Rahbar va yoshlar uchrashuvi” tashkil etilib, Yoshlar masalalari va ma’naviy-ma’rifiy ishlar bo‘yicha birinchi prorektor Valijon Sadiyev talaba-yoshlar bilan ochiq muloqot o‘tkazdi. Uchrashuvda talabalar o‘z muammo va takliflarini bevosita yetkazib, ta’lim jarayoni, bo‘sh vaqtni mazmunli tashkil etish hamda yoshlar tashabbuslarini qo‘llab-quvvatlash masalalari yuzasidan savol-javoblarda faol ishtirok etdilar. Zarur masalalar yuzasidan keyingi choralar belgilanib olindi.

Tadbir yakunida talaba-yoshlar mutaxassislardan va prorektor Valijon Sadiyevdan batafsil javoblar oldilar.

🌐 Biz ijtimoiy tarmoqlarda:
Telegram | Instagram | Facebook | Sayt