OʻzDJTU Ingliz tili 1-fakulteti 2025-yil yakuni sarhisobiga bag'ishlangan yig'ilish

🗓Bugun Oʻzbekiston davlat jahon tillari universiteti Ingliz tili 1-fakultetida 2025-yil yakuni sarhisobiga bag'ishlangan yigʻilish bo'lib o'tdi. Tadbir davomida fakultetning oʻtgan yil mobaynidagi faoliyati, erishilgan natijalari hamda kelgusidagi ustuvor vazifalar muhokama qilindi.

🌐Yigʻilish kun tartibiga muvofiq quyidagi masalalar atroflicha koʻrib chiqildi:

✅Yigʻilish doirasida Oʻzbekiston Respublikasi Prezidenti Shavkat Mirziyoyevning Oliy Majlis va Oʻzbekiston xalqiga yoʻllagan Murojaatnomasida ta'kidlab oʻtilgan taʼlim tizimini rivojlantirish, ilm-fan va innovatsiyalarni qoʻllab-quvvatlashga oid belgilangan vazifalar yuzasidan fikr-mulohazalar bildirildi.

✅Ingliz tili 1-fakulteti tomonidan oʻquv, ilmiy-tadqiqot, maʼnaviy-maʼrifiy hamda tashkiliy yoʻnalishlarda amalga oshirilgan ishlar yuzasidan batafsil hisobot berildi. Yil davomida erishilgan yutuqlar, ilgʻor tajribalar va aniqlangan muammolar tahlil qilindi.

✅Fakultet jamoasining universitet miqyosidagi loyihalar, xalqaro hamkorlik aloqalari, ilmiy anjumanlar, grant va innovatsion tashabbuslardagi ishtiroki alohida eʼtirof etildi.

✅Taʼlim sifatini oshirish, ilmiy salohiyatni mustahkamlash, professor-oʻqituvchilarning kasbiy rivojini taʼminlash hamda raqamli taʼlim texnologiyalarini joriy etish boʻyicha ustuvor yoʻnalishlar belgilab olindi.

📍Tadbir yakunida fakultet dekani G. Ergasheva tomonidan fakultet taraqqiyoti yoʻlida fidokorona mehnat qilayotgan kafedra mudirlari hamda professor-oʻqituvchilari tashakkurnomalar bilan taqdirlandi.

Mazkur sarhisob yigʻilishi fakultet jamoasining oʻz oldiga qoʻyilgan vazifalarni samarali amalga oshirish, taʼlim va ilm-fan sohasida yuqori natijalarga erishish yoʻlidagi masʼuliyatini yana bir bor namoyon etdi.

0️⃣0️⃣0️⃣

Britaniya Kengashining PRESETT dasturi doirasidagi Milliy forum ishini boshladi

Bugun, 2026-yil 6-yanvar kuni Toshkent shahrida Britaniya Kengashining PRESETT dasturi doirasida “National Forum on the Modernisation of English Language Education” mavzusidagi milliy forum ishini boshladi. Tadbir O‘zbekistonda ingliz tili ta’limini, xususan bo‘lajak ingliz tili o‘qituvchilarini tayyorlash tizimini modernizatsiya qilishga qaratilgan.

Forum Britaniya Kengashi tomonidan O‘zbekiston Respublikasi Oliy ta’lim, fan va innovatsiyalar vazirligi hamda O‘zbekiston Respublikasi Maktabgacha va maktab ta’limi vazirliklari bilan hamkorlikda tashkil etilgan. Unda mamlakat bo‘ylab bo‘lajak ingliz tili o‘qituvchilarini tayyorlovchi 50 dan ortiq davlat va nodavlat oliy ta’lim muassasalaridan 220 nafardan ziyod mutaxassislar ishtirok etmoqda.

Mazkur forum ishida O‘zbekiston davlat jahon tillari universiteti rektori Ilxomjon Tuxtasinov ham ishtirok etib, bo‘lajak ingliz tili o‘qituvchilarini tayyorlashda ta’lim dasturlarini zamonaviy yondashuvlar asosida takomillashtirish, refleksiv amaliyot, inklyuziv ta’lim va raqamli kompetensiyalarni rivojlantirish masalalarining dolzarbligiga e’tibor qaratdi.

Forumdan ko‘zlangan yana bir muhim maqsad O‘zbekistonda faoliyat yurituvchi PRESETT mutaxassislari tarmog‘ini kuchaytirish, ularning o‘zaro tajriba va malakalarini almashishiga ko‘maklashish hamda kasbiy hamkorlikni rivojlantirishdan iborat.

Forum doirasida PRESETT tizimini modernizatsiya qilishdagi ustuvor yo‘nalishlar, mavjud muammolar va ularning yechimlari muhokama qilinmoqda. Shuningdek, refleksiv amaliyot, inklyuziv ta’lim hamda PRESETT amaliyotlar hamjamiyati faoliyatini kuchaytirishga qaratilgan trening mashg‘ulotlari o‘tkazilmoqda.

Milliy forum 8-yanvar kuniga qadar davom etadi. Tadbir doirasida o‘qituvchilarning uzluksiz kasbiy rivojlanishini qo‘llab-quvvatlashga qaratilgan CPD Xab ishga tushirilishi rejalashtirilgan. Ta’kidlash joizki, PRESETT dasturining asosiy akademik hamkori Buyuk Britaniyaning Norvich til ta’limi instituti hisoblanadi.

🌐 Biz ijtimoiy tarmoqlarda:
Telegram | Instagram | Facebook | Sayt

👨‍⚖️👩‍⚖️

Filologiya fanlari doktori (DSc) dissertatsiyasi himoyasi bo‘lib o‘tdi

2026-yil 7-yanvar kuni Filologiya fanlari doktori (DSc) dissertatsiyasi himoyasiga oid Ilmiy kengash majlisi bo‘lib o‘tdi. Majlis O‘zbekiston davlat jahon tillari universitetida offline shaklda hamda ZOOM onlayn platformasi orqali tashkil etildi.

Mazkur ilmiy kengash majlisida Abdullayeva Shoxida Norqulovnaning 10.00.06 – Qiyosiy adabiyotshunoslik, chog‘ishtirma tilshunoslik va tarjimashunoslik ixtisosligi bo‘yicha tayyorlagan “Moliyaviy-iqtisodiy matnlarni ingliz tilidan o‘zbek tiliga tarjima qilishning funksional-semantik aspekti” mavzusidagi filologiya fanlari doktori (DSc) ilmiy darajasini olish uchun taqdim etilgan dissertatsiyasi himoyasi bo‘lib o‘tdi.

Dissertatsiya ishi zamonaviy tarjimashunoslik yo‘nalishida dolzarb bo‘lib, unda moliyaviy-iqtisodiy matnlarni tarjima qilish jarayonida funksional va semantik yondashuvlarning nazariy asoslari hamda amaliy jihatlari atroflicha tahlil qilingan.

Ilmiy kengash majlisida O‘zbekiston davlat jahon tillari universiteti rektori Ilxomjon Tuxtasinov ishtirok etib, universitetda ilmiy-tadqiqot faoliyatini rivojlantirish, ilmiy ishlar sifatini oshirish hamda tarjimashunoslik sohasida olib borilayotgan tadqiqotlarning ahamiyati haqida fikr bildirdi.

Himoya davomida dissertant tomonidan bildirilgan savollarga batafsil va dalillarga asoslangan javoblar berildi, ilmiy bahs-munozaralar olib borildi. Ilmiy kengash a’zolari tomonidan dissertatsiya ishining nazariy yangiligi, amaliy ahamiyati hamda tadqiqot natijalarining soha rivoji uchun muhimligi alohida e’tirof etildi.

Himoya yakunida Ilmiy kengash tomonidan belgilangan tartibda yopiq ovoz berish o‘tkazildi hamda Abdullayeva Shoxida Norqulovnaning filologiya fanlari doktori (DSc) ilmiy darajasini olishga loyiq ekani e’tirof etildi.

🌐 Biz ijtimoiy tarmoqlarda:
Telegram | Instagram | Facebook | Sayt