🔥 بشري لكل واحد أجازته خلصت ومالحقش يستثمرها .. وحاسس إنه مابيعملش أي حاجة مفيدة خالص.

🔥بشري لكل واحد بردو عمره ما بدأ كتاب وكمله لآخره .. ونفسه يثبت علي كتاب وينهيه.

🔥 بشري لكل تايه يومه بيضيع علي الفاضي ومش عارف يحط تحدي ويكمل فيه للآخر.

عملنا تحدي علي قناة « مَشْرُوعْ قُدُسِيّة » لقراءة كتاب مسلكيات كاملًا لـ د/ إبراهيم السكران في 3 أيام .. واللهم بارك كان فيه إقبال كبير وتنافس قوي جدًا .. لدرجة إن البعض أنهي الكتاب اللي 186 صفحة في جلسة واحدة مابين الساعة والساعتين تبارك الله .. والتحدي خلي كتير من المشاركين معانا يحس بفرحة الإنجاز اللي كتير منا يفقدها في طلب العلم.

عشان كدا قررنا نوسع التحدي ونخليه تحدي شهري إن شاء الله .. وبقت مدة التحدي خمس أسابيع .. والجمعة من كل أسبوع أجازة للإستدراك .. وفي نهاية كل أسبوع هيكون فيه شهادات تقدير للمتميزين إن شاء الله.

نقرأ فيه كتاب كامل يوميا تتراوح عدد صفحاته من 58 صفحة وحتي 473 صفحة .. الكتب مختارة من قبل الشيخ أحمد السيد حفظه الله لأكاديمية الجيل الصاعد .. وإحنا هنمشي عليها بنفس التسلسل والتدريج المقترح من الشيخ.

للإشتراك :

@Mashro3_kodoseiia

#مشروع_قدسية

في يوم 11 من شهر فبراير السنة اللي فاتت غفلت عن قراءة الأذكار بعد صلاة الفجر زي ما متعودة .. وتذكرت بعدها بحوالي 3 ساعات وقلت خلاص بقا وقتها عدى .. وسبحان الله وأنا خارجة من البيت رايحة الجامعة وقتها واحدة بعتتلي رسالة SMS تذكرني بيها وعرفت بعدها إنها كانت مبعوتة غلطة أصلا .. رجعت وقعدت مخصوص عشان أقولها وبعد كدا خرجت.

خرجت للجامعة يومها .. وحصلي حادثة في المترو .. تفاصيلها موجعة جدًا مأثرة فيا نفسيا لحد النهاردة .. وكان بيني وبين إني أقع تحت المترو وأموت فورًا أقل من ثانية .. وبالفعل كنت غمضت عيني من الخوف واستسلمت لفكرة إني هشوف ملك الموت حالا .. وبدون خوض في تفاصيل لا داعي لها أنجاني الله عز وجل ورزقني وقتًا لأتوب فيه .. ولا أظنني نجوت يومها إلا بسبب الأذكار .. فالحمد لله على نعمة حفظ الأذكار لنا .. الحمد لله.


#مشروع_قدسية

اسألوا عَ دين بعض من وقت للتانى يا جماعة .. الزمان دا كفيل بتغيير أي قلب مهما كان ثبات صاحبه!

كنت بكلم صديقة ليا في التليفون الصبح .. وهى أخت ليا كنت بغير جدا من صلاحها وعطائها للدين .. فـ لمست في كلامها تهاون وفي دينها كثير من اللين .. وأغلب سقطاتها بدأت في تهاونات الخطبة ..

وزارني أخت ليا أحسبها ع خير كانت لا تتهاون في النوافل تماما .. اللهم بارك سنن رواتب وسنن غير مؤكدة .. وتلاقي كل فرض تصلى سنن قبله وبعده غالبا .. والضحى ٨ ركعات والقيام الثلث الأخير كله حرفيا .. وجاتلى تشتكيلى من نفسها إنها وصل بيها الأمر إنها تجمع الصلوات آخر اليوم ..

وصديقة كانت معايا في ثانوى مختمرة وأحسبها ع خير .. ماشفتهاش من زمن واتقابلنا .. شفت في وجهها انطفاءة لم أعهدها من قبل .. ومجرد ما اتكلمنا سوا قعدت تبكى وتشكيلى إنها فضلت تقع في فيديوهات وبعدها رجعت للأفلام وبعد كدا مسلسلات .. وتهاونات كتير لحد ما حاليا أدمنت الأفلام الإباحية وبتتفرج عليها شبه يوميا ..

وطبعا ناهيك عن كثير من أحبتنا اللى زاد ترخُّصهم في أمور الدين عموما .. والفتن اللى عمالة توقعهم ورا بعض .. لحد ما بقيت مرعوبة وأصبح جل دعائي من كتر اللى بيواجهنى : اللهم ثبتنا وسلم يارب سلم ..

ولما رجعت لـ نفسي لقيت المشكلة سببها حاجتين .. إما إن الواحد كان سايب نفسه بدون ما يتسند على شيء يمنعه من التمرغ في وحل الفتن .. وما حصنش نفسه بجدار إيمانى كويس زى ارتباطه بدار تحفيظ أو معهد علوم شرعية أو صحبة صالحة ..

أو السبب الثاني انشغال المصلحين عن بعضهم .. لدرجة إن ما بقاش فيه كلمات إخواتنا في الله اللى كانت بتذكرنا بالله عز وجل .. ولا رسائلهم اللى تفوقنا من الغفلة .. مابقيناش نتصل بعت رسائل ونهتم بدين بعض .. فـ تلاقى اللى كان ثابت امبارح وعنده لياقة إيمانية اللهم بارك بقا ضعيف جدا وبيثبت نفسه بالعافية .. ومش قادر يعين حد أصلا ..

السلف رحمهم الله كانوا يسألوا ع إخوانهم كل شوية .. يسأله عن آخرته خوفا عليه من ضياع الإيمان .. ويسأله عن دنيته خوفا عليه إنه يكون محتاج شيئ أو عايز حاجة وهو في وسط الأحباب والإخوان!

ورحم الله عمر بن الخطاب رضي الله عنه .. لما عرف إن صاحب ليه تدنى في إيمانه لحد ما شرب الخمر .. بعتله بدايات سورة غافر وقعد يذكره بالله عز وجل لحد ما رجع ..

اطمئنوا على بعضكم .. وتفقدوا إخواتكم .. هاتوا ورقة وقلم واكتبى أسمائهم كلهم .. وقسميهم خلال الشهر إنك تكلمى كل واحدة مرة ١٥ دقيقة في الشهر حتى .. لو لقيتيها على الطريق اللهم لك الحمد ثبتيها .. ولو لقيتيها بدأت تتزعزع اسنديها لحد ماتقف تانى وتثبت .. وإن لقيتيها وقعت في وحل الذنوب خالص ذكريها برحمة ربنا سبحانه وتعالى ومغفرته ..

لو عملتى يوميا الـ ١٥ دقيقة دى .. اللى يعرفك وكلمتيه هيشوفك سند .. لو في يوم من الأيام لقي نفسه بيقع هتكونى أول واحدة تفكر تلجألها عشان تعينها ع نفسها .. هتكون مكالمتك دعوة إلى الله وتعاون ع البر والتقوى .. ومحبة في الله وإيثار من باب لا يؤمن أحدكم حتى يحب لأخيه ما يحب لنفسه .. ونوايا عظيمة جدا .. ومع ثباتك على المكالمة دى هتلاقي ربنا بيزيدك ثبات بكل كلمة ثبتى بيها واحدة من صاحباتكم .. وكفاية عليكِ أوى أن الجنة لا يطيب نعيمها إلا وإنتم مع بعض .. لأننا بنحشر « زُمُــــرًا » يعنى جماعات وإخوة ..


فما آخاك أخوك لتلاطفه وتؤاكله وتمازحه عند النعماء .. وإنما لتؤازره في أمر دينه ودنياه عند الشدائد والأنواء!

#مشروع_قدسية

نوايا للمذاكرة عظيمة جدًا♥
مفيده جدًا جدًا ماتفوتهاش ولو النقط سريعًا
https://t.me/Mashro3_kodoseiia/4032

••

فتحت النهاردة استثنائي لما خدت بالي إن رمضان خلاص باقي عليه ١٠٠ يوم إن شاء الله .. افتكرت بوست قرأته السنة اللي فاتت في نفس الميعاد بيقول :

" تقريبًا كل يوم بيموت أكثر من ربع مليون إنسان على وجه الكرة الأرضية، يعني من هنا لرمضان هيموت تقريبًا 17 مليون إنسان!

ممكن إنت تكون واحد من الـ هيموتوا، فتجهَّز لرمضان وبيِّت نيتك، فلو مُت هتموت وإنت ليك أجر رمضان لأنك مبيِّت النية. "

وافتكرت الفيديو بتاع الشيخ حازم شومان عن أستاذ رامي رحمه الله .. وزي ما قلت قبل كدا إنه كان السبب إن أول مرة أفكر أقعد أحط خطة للإستعداد لرمضان.

وعشان الكلام كتير والنصائح كتير والدروس أكتر .. حبيت أشارككم اقتراح واحد بس مهم جدا جدا.

في دورة اسمها { رمضان قرب يلا نقرب }

معمولة علىٰ أربع مواسم وهي بالظبط ١٠٠ حلقة .. ومدة الحلقة تبدأ من ٥ دقائق ولا تتجاوز النص ساعة .. بتتكلم عن معظم الجوانب اللي محتاج تركز فيها وإنت بتستعد .. يعني مواضيع كتير مختلفة .. واللي بيلقيها مش شيخ واحد ولا اتنين .. دي مجموعة كبيرة جدا من المشايخ والدعاة المختلفين في الأسلوب والكلام والطريقة والأهم من كدا الخبرة والأفكار ..

كل اللي بقترحه عليك .. إنك تسمع كل يوم حلقة واحدة بس من البرنامج الجميل دا وتشتغل علىٰ تطبيقها لوحدك .. خلي لرمضان ساعة واحدة بس تستعدلها .. ركعتين توبة عشان تدخله وإنت نضيف وتسمع الحلقة وتشوف هتطبقها ازاي .. وبأكدلك إنك والذي نفسي بيده لو صدقت النية واستعنت بالله وبدأت تسمع وتطبق فورًا .. هييجي رمضان وإنت إنسان مختلف تمامًا إن شاء الله.

رمضان قرب يلا نقرب ج ١
رمضان قرب يلا نقرب ج ٢
رمضان قرب يلا نقرب ج ٣
رمضان قرب يلا نقرب ج ٤

#مشروع_قدسية

فقررت أجاهد للمرة السادسة إن أشغل أغلب أوقاتي بسماع القرآن .. وأنا لسة صاحية بروح مشغلة قرآن بصوت عالي عَ ما أقوم وأتوضي وأحضر حاجتي للكلية .. وأنا ماشية في الشارع أو وأنا بتمشي جوا الجامعة نفسها بين المحاضرات .. وأنا راجعة في العربية مجهدة وماعنديش طاقة أعمل حاجة .. وأنا بحضر حاجتي في الأوضة للمذاكرة .. وأنا بنقل المحاضرات للكشكول وبرتبها ومش محتاجة تركيز أوي .. وأنا فاتحة نت وبراسل الناس .. وفي أي وقت الهاند فري في ودني .. ومجرد ما ألاقي مافيش فرصة إني أعمل حاجة محتاجة تركيز جامد أدوس على الهاند وأكمل سماع قرآن.

لاحظت مع الوقت بقا فيه بركة عجيبة في يومي .. وبدأت العصبية تقل تمامًا في تعاملي مع كل اللي أعرفهم وأولهم أهلي بفضل الله .. ولاحظت توفيق في إتمام المهام جدا ببركة القرآن .. غير قراءتي اللي اتحسنت كتير .. وسبحان الله فُتِح عليا في فهم القرآن من وقتها أضعاف ما كان قبلها .. وبقا ممكن رصيد السماع اليومي يصل لأكتر من ٥ أجزاء الحمد لله .. بعد ما كنت في الأول بختم كل شهرين .. بقيت أختم سماع كل أسبوع تقريبًا بفضل الله.

وجت تحكيلي من إنها أصابها إحباط شديد من أول رمضان .. عشان كانت متحمسة لصحبة القرآن في رمضان جدا .. وحاضت في أول يوم فكل تخطيطها للقيام فشل كدا .. فذكرتها إنها من سنتين لما شافت مقطع لختم القرآن في سبع ساعات ونصف اتفاجئت وقالتلي : هو ممكن حد يقعد يسمع قرآن المدة دي كلها .. أنا لو قعدت أسمع أكتر من نص ساعة هبقا نمت.

فنصحتها تقيم الليل بسماع القرآن .. وتشوف إذا كانت تقدر تسمع السبع ساعات ونص ولا لأ .. وتحكيلي مشاعرها بعدها .. والنهاردة بعتتلي :

حبيت أفرحك إن من أول رمضان لحد النهاردة ختمت المقطع ٧ مرات سماع بفضل الله .. يعني كل يوم ختمة الحمد لله.

كنت ببدأ من بعد المغرب ع الساعة ٧ .. وبخلص ع ميعاد السحور الساعة ٣ مثلا .. وباقي اليوم بشوف اللي ورايا براحتي.

- مش عارفة أعلق أقول إيه بصراحة .. غير إن أنقل التجربة بكل تفاصيلها.

#مشروع_قدسية

اعتبروها وعد بينا ..

في ناس معينة ماينفعش يتنسوا من دعائنا ولا نغفل عنهم مهما حصل .. زى الموتى مثلاً .. أى شخص سمعتى عنه إنه مات أو من معارفك أو أصحابك .. ماينفعش تغفلى عنه بجد .. إحنا هنا بـ ننام ونقوم ونشتغل وناكل وحاجات كتير .. لكن هم في حياة القبر لا بيتنعموا لا بيتعذبوا .. وطمعانين في حسنة زيادة تنجيهم أو ترفعهم .. بس خلاص صفحتهم اتقفلت .. ييجى هنا دورك إنتِ بقا .. واحدة زى هدير ضياء تتعرض للسرطان والإبتلاءات المتتالية وتصبر وتحتسب ونحسبها والله حسيبها إنها من أهل الصلاح ولا نزكيها على الله .. لما نفتخر بيها وبالأثر الطيب اللى تركته في نفوسنا قصتها .. نعمل لها إيه؟ .. ندعيلها ..

واحد زى إبراهيم أحمد .. أحمد شقير .. إسماعيل نادر .. إسلام شعراوى .. بنت زى سارة قنيبى .. وغيرهم كتير من أصحاب الخاتمة الملهمة اللى أثرت فينا كلنا .. مش محتاجين منك صورهم اللى بتلم عليها ذنوب بـ إطلاق البصر .. ولا الكلمتين اللى بتقوليهم عنهم قدام الناس مضمون نيتك سليمة فيهم ولا لأ .. هم مش محتاجين منك حاليا حاجة زى الدعاء ..

على الجانب الآخر .. المسلمين من قرايبنا أو أصحابنا أو معارفنا .. وأقول تانى المسلمين .. اللى ماتوا على سوء خاتمة أو وهم مسرفين على ذنوبهم .. أو كانوا في حياتهم مصرين على ذنب معين وإنت عارفه .. اوعى تغفل عن الدعاء ليهم .. لعلك تلاقي اللى يفتكرك إنتَ كمان بعد موتك ..

بعد الأموات اوعى تنسي تدعى لـ دينك إنه يعتز وينتصر .. اوعى تنسي تدعى للشباب إنها تفوق من غفلتها .. وللضالين منهم إن ربنا يهديهم .. وللمهتدين منهم إن ربنا يزيدهم هدى وثباتا ..

اوعى تنسي تدعى لـ بلاد الإسلام المحتلة والمضطهدة زى فلسطين وسوريا وبورما والشيشان وأفغانستان وغيرهم .. اوعى تنسي تدعى لـ كل مرضى المسلمين بالشفاء العاجل .. اوعى تنسي تدعى إن الله عز وجل يكشف عنا ضر الوباء .. ويزيحه عنا ..

اوعى تنسي تدعى لـ مصر إن ربنا يصلح حالها ويولى علينا من يحكم فينا دين الله عز وجل .. دا واجب حبك ووفائك لـ بلدك إنها ماتغفلش عن الدعاء ليها ..

اوعى تنسي الدعاء لكل المعتقلين بما فيهم م.أيمن عبدالرحيم .. د.خالد أبو شادى .. الشيخ محمد صالح المنجد وهكذا .. والمختفيين قسريا اللى أهاليهم مايعرفوش مكانهم في أنهى معتقل ولا يعرفوا عنهم حاجة .. والمطاردين اللى عايشين مرعوبين في كل حتة أحسن يتقبض عليهم .. ادعى إن ربنا يصبرهم كلهم على بلائهم ..

اوعى تنسي تدعى لـ عيلتك فرد فرد .. خصصيهم بالإسم وشوفى كل واحد محتاج إيه .. اللى عاوز يتزوج .. واللى نفسها في طفل .. واللى تعبان جدا .. واللى عنده كرب واشتد عليه .. وأكيد أولهم والدك ووالدتك دا من أهم وسائل البر ليهم أصلا .. واوعى تغفلى عن الدعاء إنكم تتجمعوا إنت وعيلتك سوا في الجنة إن شاء الله ..

اوعى تنسي تدعى لـ صُحْبتك كلها .. اكتبيهم كلهم .. واختصي كل واحدة بـ أدعية معينة ليها .. واذكريها بالإسم .. دا سنة عن النبى صلى الله عليه وسلم .. وجمعى نوايا بقا ع قد ما تقدرى .. دا رمضان .. يعنى شهر استجابة الدعاء ..

وآخيرًا اوعى تنسي تدعى لـ علماء الأمة ومشايخنا الأفاضل إن ربنا يبارك في علمهم .. ويزيدهم من كرمه وفضله .. زى الشيخ الحوينى والشيخ محمد حسين يعقوب والشيخ محمد حسان وغيرهم كثير ..

اوعى تنسي تدعى لأى حد علمك حاجة أو ليه فضل عليك في حاجة .. داعية زى الشيخ حازم شومان والشيخ محمد الغليظ والشيخ أحمد جلال ود. أحمد عبدالمنعم وزودوا زى ما تحبوا .. مدرسينكم في ابتدائى واعدادى وثانوى ودكاترة الجامعة .. حد من أهلك أو أصحابك أو شخصية ع الفيس أو الواتس أو أى موقع تواصل اجتماعي عموما وأضافت ليك معلومة طيبة أو اتعلمتى منها حاجة ..

#مشروع_قدسية

@Mashro3_kodoseiia