ከፎቶ ላይ ያለን ጽሁፍ ማንቀሳቀስ የሚያስችለው iOS 15

ከፎቶ ላይ ያለን ጽሁፍ ማንቀሳቀስ የሚያስችለው iOS 15
*********************************
በአዲሲ የአፕል ምርት በሆነው አይፎን ስልክ ላ የተካተተው iOS 15 የተሰኘው ቴክኖሎጂ ከፎቶ ላይ ያለን ጽሁፍ ወደፈለግነው ቦታ ማንቀሳቀስ እንድንችል የሚያደርግ ብቃት እንዳለው ታውቋል፡፡ ይህ የተለያዩ ብቃቶች እንዳሉት የተነገረለት ስርዓት ሰው ሰራሽ አስተውሎትን በመጠቀም በአንድ ፎቶ ላይ ያሉ ይዘቶችን በመተንተን ተጠቃሚው የሚፈልገውን እንዲያደርግ (copy and paste) ያስችላዋል ተብሏል፡፡

ይህ ነገሮችን (ጽሁፎችን) አይቶ የመረዳት ስርዓት ከዚህ በፊትም የነበረ ቢሆንም እንደ አፕል ማብራሪያ ከሆነ የአሁኑ ቴክኖሎጂ እንደ ከዚህ ቀደሙ ክላውድ ሰርቨር ላይ ያለ ሳሆን ስልኩ ላይ የተቀመጠ ነው፡፡

ይህ ቴክኖሎጂ ከሚሰጠው ጥቅም ውስጥ ተጠቃሚዎች አንድን ጽሁፍ ወይም ገጽ ፎቶ በማንሳት ካነሱት ፎቶ ላይ ያለውን ጽሁፍ በቀላሉ መገልበጥ (copy and paste) ማድረግ መቻሉ ዋነኛው ነው፡፡ ከዚህም በተጨማሪ እንደ ቢዝነስ ካርድ ካሉ የመረጃ ወረቀቶች ላይ የተጻፉ ስልክ ቁጥሮችንና የኢሜል አድራሻዎችን በቀላሉ ፎቶ በማንሳት ስልክ መደወልም ሆነ ኢሜል መላክ ያስችላል፡፡

ሌላውና ይህ አዲሱ ቴክኖሎጂ ከሚሰጣቸው አገልግሎቶች ውስጥ የእጅ ጽሁፍን በፎቶ አማካኝነት ወደ ዲጂታል መቀየር የሚያስችል መሆኑ ነው፡፡
ምንጭ CNBC Technology
ተጨማሪ ንባብ https://www.cnbc.com/2021/09/29/ios-15-live-text-how-to-copy-and-paste-text-from-a-photo.html?utm_content=Tech&utm_medium=Social&utm_source=Facebook&fbclid=IwAR2ieGiSW7cBjJ5GKzPNkI5LEYJ0hgcCRLLTD2EBsbUoSbRYQkmoHaHfgp4#Echobox=1632951279

ትውስታን በመግነጢሳዊ የማነቃቃት ዘዴ

ትውስታን በመግነጢሳዊ የማነቃቃት ዘዴ
***************
መግነጢሳዊ የማነቃቃት ዘዴን በመጠቀም የአእምሮን የትውስታ አቅም ማሳደግ እንደሚቻል አንድ ጥናት አመላከተ፡፡ ጥናቱ በ2012 መከናወን የጀመረ ሲሆን በወቅቱ DLPFC የተሰኘው የጭንቅላት የግራ ክፍል ከመርሳት ጋር የተያያዙ ችግሮች የሚስተዋሉበት ክፍል እንደሆነ አረጋግጧል፡፡

አሁን ላይ በድጋሜ በተሰራው ጥናት ይህንን የጭንቅላት ክፍል ተመጣጣኝ መግነጢሳዊ ሀይል በመጠቀም ማነቃቃት ትውስታን መመለስ እንደሚችል ተረጋግጧል፡፡

የዚህ ግኝት ሙከራ በግሎስጎው የኒቨርሲቲ የተሰራ ሲሆን የተገኘው ውጤትም አስደናቂ እንደሆነ የዩኒቨርሲቲው ተመራማሪ የሆኑት ሲሚን ሀንሰልማይር ተናግረዋል፡፡ በሙከራው 24 ጤነኛ ሰዎች እንዲሳተፉ የተደረገ ሲሆን እያንዳንዳቸው 10 ቃላት ያሏቸው በሁለት ምድብ የተከፈሉ የቃላት ዝርዝሮችን አንብበው እንዲሸመድዱ ተደርጓል፡፡ ሁለቱ ዝርዝሮችም በተደጋጋሚ ተሳታፊዎቹ እንዲመለከቷቸው ተደርጓል፡፡

በመካከል ላይ ተሳታፊዎቹን ሌላ ስራ እንዲሰሩ በማድረግ ከቆይታ በኋላ የምርምሩ ተሳታፊዎች ከተመለከቷቸው ቃላት ውስጥ የሚችሉትን እንዲያስታውሱ ተደርገዋል፡፡

በዚህ ጊዜ ከተሳታፊዎቹ መካከል ግማሾቹ በጭንቅላታቸው የግራ ክፍል አካባቢ መጠነኛ መግነጢሳዊ ማነቃቂያ እንዲያገኙ ተደርገዋል፡፡ ቀሪዎቹ ደግሞ ተመሳሳይ መጠን ያለው መግነጢሳዊ ማነቃቂያ በላይኛው ጭንቅላታቸው ክፍል እንዲያገኙ ተደርገዋል፡፡

ከመግነጢሳዊ ማነቃቂየው በኋላ በጭንቅላታቸው የግራ ክፍል እገዛ የተደረገላቸው ተሳታፊዎች የተሻለ የማስታወስ ብቃት አስመዝግበዋል፡፡
ምንጭ science alert
ተጨማሪ ንባብ https://www.sciencealert.com/a-certain-type-of-magnetic-stimulation-could-help-the-brain-remember?fbclid=IwAR0mFsmxU65PuQ6gwGQCyrRd6XqtXJEmS46da6XqqnZnRDJtzhMIF9hkO7Y

የዌቢናር ጥሪ
========
የኢትዮ-ጀርመን ኢንኪዩቤሽን እና ስታርታፕ ፕሮሞሽን ፕሮግራም በሚል የተዘጋጀው አዲሱ የዌቢናር መርሃ ግብር የፊታችን መስከረም 27 እና ጥቅምት 25 የሚከናወን ይሆናል፡፡ የቴክኖሎጂ እና ኢኖቬሽን ኢንስቲትዩት ከጀርመን የኢነርጂና ኢኮኖሚ ጉዳዮች ሚኒስቴር ጋር በመተባበር ያዘጋጀው ይህ የበይነ-መረብ ሴሚናር ከዚህ ቀደም በኢንስቲትዩት የቅድመ ኢንኪዩቤሽን ፕሮግራም የተካፈሉ ጀማሪ ኢኖቬተሮች፣ በቴክኖሎጂ ስታርታፕ ለሚሰሩ ባለሙያዎች እና በዘርፉ እየተንቀሳቀሱ ላሉ የኢትዮጵያ የፈጠራ ባለሙያዎች ማህበር አባላት የልምድ ማግኛ መድረክ እንዲሆን በሚል የተዘጋጀ መርሃ-ግብር ነው፡፡

በዚህ ዌቢናር በስታርታፕ ፕሮሞሽን ዘርፉ ላይ የብዙ ዓመት ልምድ ያላቸው የጀርመን ስታርታፖች በቢዝነስ ሞዴል፣ የፋይናስ አቅም በመፍጠር እና በጀርመን ስላለው የኢንኪዩቤሽን ፕሮግራም ድጋፍ ተሞክሮዎችን በማንሳት በዘርፉ ላይ እንዴት ስኬት ማምጣት እንደሚቻል ሰፊ ውይይት እንደሚያደርጉ የሚጠበቅ ሲሆን ከተሳታፊዎች የሚነሱ ሃሳቦችን በሰፊው ለመመልከትም የጥያቄና መልስ ክፍል በመርሃ-ግብሩ ተካቷል፡፡
You are all kindly invited to participate in the Ethio-German Incubation and Startups Program.
1. Start-up Split Tech Technologies GmbH, Frankfurt, Germany
• Speaker: Mr. Carsten Bock, CEO
• Date and Time: 07 October, 2021, 10:00 AM -12:00 PM (Nairobi Time)
2. Start-up Regiothek GmbH, Passau, Germany
• Speaker: Mr. Simon Nestmeier, CEO
• Date and Time: 04 November, 2021, 10:00 AM - 12:00 PM (Nairobi Time)

በሁለት የተለያዩ ቀናት በሚደረገው በዚህ ዌቢናር መሳተፍ የምትፈልጉ ከታች ያሉትን ሊንኮች በመጠቀም መመዝገብ ትችላላቹ
1 https://us04web.zoom.us/j/75691666980?pwd=M2FFNElqZlV0aHlGdVFlNnN5RHhZUT09

2 https://us04web.zoom.us/j/75075017679?pwd=a1VHZWVSWEFBVG0xR1YxY1BqSTE0dz09

የቻይና ህዝብ ቁጥር በግማሽ ሊቀንስ ነው ተባለ

የቻይና ህዝብ ቁጥር በግማሽ ሊቀንስ ነው ተባለ
=================
አዲስ የወጣ ጥናት እንዳመላከተው በዓለማችን በህዝብ ብዛቷ ቀዳሚ የሆነችው ቻይና በሰላሳ ዓመታት ውስጥ ብቻ ለሀገሪቱ አሳሳቢ በሚባል ሁኔታ የህዝብ ቁጥሯ በግማሽ ሊቀንስ እንደሚችል አመላክቷል፡፡

በሀገሪቱ እየተስተዋለ ያለው ዕድሜያቸው የገፉ ሰዎች መጨመር እና የውልጃ ምጣኔ የማሽቆልቆል ሁናቴ የቻይናን መንግስት ሲያስጨንቀው የቆየ ሲሆን ይህን ጭንቀት በሚያብስ መልኩ አዲሱ የህዝብ ቆጠራ ውጤትም አዳዲስ የሚወለዱ ህፃናት ቁጥር ከሚጠበቀው በላይም እንደሚያሽቆለቁል አመላክቷል፡፡ ይህ ማሽቆልቆል ህዝቡ እያሳየው ካለው ልጅ የመውለድ ፍላጎት ማጣት ጋር ተዳምሮ ነው የህዝብ ቁጥሯ በአውሮፓውያኑ 2050 በግማሽ ሊቀንስ ይችላል የተባለው፡፡

ምንም እንኳን ጥናቱ የተመራማሪዎቹ ጥርጣሬንም ትንሽ በማይባል መጠን ያካተተ ቢሆንም ውጤቱ ግን ቻይና በተለይ ወደፊት የዓለማችን ቀዳሚ ልዕለ ኃያል ሀገር ሆና ለመውጣት በምታደርገው ጉዞ ላይ በጎ ያልሆነ ተፅዕንዖ እንደሚኖረው ይጠበቃል፡፡

ከቅርብ ጊዜያት ወዲህ ሀገሪቱ ጥንዶች ቤተሰባቸውን እንዲያሰፉ በማሰብ ሁለት ልጆችን ብቻ እንዲወልዱ የሚያበረታታው ፖሊሲዋን በመቀየር ወደ ሦስት ልጆች ከፍ አድርጋለች፡፡ ሆኖም እንደ አጥኚዎቹ ከሆነ ጥንዶች ብዙ ልጆችን እንዳይወልዱ የሚያደርጋቸው የፖሊሲ እና መንግስታዊ ክልከላ ጉዳይ ሳይሆን በምጣኔ ሐብታዊ ስጋት እና ማህበራዊ ድጋፍ እጦት ምክንያቶች መነሻነት ነው፡፡ ለዚህ ችግር ምላሽ ይሆን ዘንድ መንግስት የቤት አቅርቦት እና ትምህርትን በተመጣጣኝ ዋጋ ለማዳረስ ጥረት ቢያደርግም እርምጃዎቹ ግን ብዙም የሚረዱ አልሆኑም፡፡

በሌላ መልኩ አዲሱ የህዝብ ቆጠራ እንዳመላከተው በአሁኑ ሰዓት በቻይና የህፃናት ቁጥር ከአጠቃላይ ህዝቡ 17 በመቶ መሆኑን ነው፡፡ ይህ ታድያ ከህዝብ ቁጥሩ የ18 በመቶ ድርሻ ካላቸው ዕድሜያቸው ከ60 ዓመት በላይ የሆኑ ዜጎች ጋር ሲነፃፀር አነስተኛ ሆኗል፡፡ እንደ አጥኚዎች ከሆነ ዕድሜያቸው የገፉ ዜጎች ቁጥር ከህፃናት በልጦ ሲገኝ ይህ በሀገሪቱ ታሪክ ለመጀመሪያ ጊዜ ነው፡፡

ምንጭ፤ ፊውቸሪዝም
ለተጨማሪ፤ https://futurism.com/the-byte/china-population-half-30-years

በቻይና የተገነባው የዓለማችን ትልቁ የስነ ፈለክ ሙዚየም
==================
በቅርቡ ግንባታው ተጠናቆ ለህዝብ ክፍት የሆነውና የቻይና የንግድ ከተማ በሆነችው ሻንጋይ ውስጥ የተገነባው አዲስና አስደናቂ ቤተ-መዘክር (ሙዚየም) በሆነ የህዋ ምርምር ሳይንስን ከውብ ኪነ-ህንፃ ጋር አዋዶ የተገነባ ነው፡፡ የሻንጋይ ስነ ፈለክ ቤተ-መዘክር የሚል ስያሜ የተሰጠው ይህ አስደናቂ ህንፃ የኮስሞስን ጂኦሜትሪ እንዲያንፀባርቅ ተደርጎ ተገንብቷል፡፡ በዚህም ምንም አይነት ቀጥተኛ መስመርም ሆነ 90 ዲግሪ ያለው ጥግ ጥቅም ላይ ያልዋሉበት ነው፡፡

39 ሺክ ካሬ ስፋት ያለው ቤተ-መዘክሩ የሻንጋይ ሳይንስ እና ቴክኖሎጂ ቤተ-መዘክር አካል ነው፡፡ በውስጡም የአወደ ርዕይ፣ ጠፈርን መመልከቻ (planetarium)፣ ኦብዘርቫቶሪ እና ወደ 24 ሜትር የሚጠጋ ቁመት ያለው ፀሐይን መመልከቻ ቴሌስኮፕን ይዟል፡፡

የቤተ-መዘክሩ ንድፍ አውጪዎች እንደሚሉት ህንፃው ስነ-ፈለክን (ህዋ ምርምር) በኪነ-ህንፃ ለመግለፅ ያለመና ያለ ምንም ቀጥተኛ መስመሮች በክብ ቅርፅ ብቻ መገንባቱ በዩኒቨርስ ውስጥ ሁሉም ነገር በተለያዩ ኃይላት ቁጥጥር ስር ሆኖ በማያቋርጥ እንቅስቃሴ ውስጥ መገኘቱን ለማሳየት የሚጥር ነው፡፡ በተጨማሪም “ስሪ ቦዲ ፕሮብሌም” ተብሎ በሚታወቀውና እስካሁንም ምላሽ ያላገኘው የሦስቱ አካላት ማለትም የከዋክብት፣ ፕላኔቶች እና ጨረቃዎች በስበት ላይ የተመሰረተ ሦስትዮሻዊ የጋራ እንቅስቃሴያቸውን ከሚመለከተው ሒሳባዊ ስሌትን መነሻ ሀሳብ ስለማገግኘታቸውም የኪነ-ህንፃ ባለሙያዎቹ ይናገራሉ፡፡ ይህም ሙዚየሙ ላይ በሦስቱ የህንፃው አካላት ተገልጿል፡፡

በዚህም ጎብኚዎች ወደ ህንፃው ሲገቡ ሰዓቱ በተለዋወጠ ቁጥር ጊዜ እና ወቅትን በሚያመላክት መልኩ የሚሽከረከር የፀሐይ ብርሃንን በክብ ቅርፅ ወለሉ ላይ በሚያስተላልፈው ክፍል ይገባሉ (ምስል ሁለትን ይመልከቱ)፡፡ ከዚህ በመቀጠል ግዙፍና በኳስ ቅርፅ ተሰርቶ እየተንሳፈፈ ያለ የሚመስል መዋቅር ወዳለበት ክፍል ይገባሉ (ምስል ሦስትን ይመልከቱ)፡፡ በስተመጨረሻም ጎብኚዎች ከላይ ወደታች የተገለበጠ የመስታወት ጉልላት ወዳለበት ክፍል በመግባት በተለይ የምሽቱን ሰማይ ሽቅብ መመልከት ይችላሉ (ምስል ሦስትን ይመልከቱ)፡፡

የሙዚየሙን ንድፍ የሰራውና በቻይና እንዲሁም አሜሪካን ቢሮዎች ያሉት ኤናድ አርክቴክትስ ከዚህ ቀደም በኒው ዮርክ የሚገኘውን እውቁን ሮስ የመሬት እና ህዋ ማዕከልን (የአሜሪካን የተፈጥሮ ታሪክ ቤተ-መዘክር አካል) ንድፍ ከሌሎች ጋር በመሆን ሰርቷል፡፡

ምንጭ፤ ሲኤንኤን
ለተጨማሪ፤ https://edition.cnn.com/style/article/shanghai-astronomy-museum-ennead-architects-scn/index.html

በዓለም ዙርያ ለሰዓታት ተቋርጦ የነበረው ፌስቡክ

በዓለም ዙርያ ለሰዓታት ተቋርጦ የነበረው ፌስቡክ
==============
የዓለማችን ትልቁ የማህበራዊ ሚዲያ ተቋም ፌስቡክ ለስድስት ሰዓታት ያህል ሙሉ በሙሉ ተቋርጦ ቆይቷል፡፡ ትናንት በኢትዮጵያ ሰዓት አቆጣጠር ከምሽቱ 1 ሰዓት አንስቶ የጀመረው ይህ የአገልግሎት መቋረጥ ለስድስት ሰዓታት ከቆየ በኋላ ነው ከሌሊቱ 7 ሰዓት ገደማ የድርጅቱ አገልግሎቶች በሂደት መመለስ የጀመሩት፡፡ ታድያ ብልሽቱ ከፌስቡክ ባሻገር በኩባንያው ስር የሚገኙትን ኢንስታግራም እና ዋትሳፕንም ጭምር ያጠቃለለ ነበር፡፡

ፌስቡክ ዛሬ ባወጣው መግለጫ ችግሩ የአሰራር ስህተትን ለማስተካከል በተደረገ ጥረት አማካኝነት የመጣና ብልሽትን የማስተካከያ ውስጣዊ መንገዶቹን ጭምርም ከስራ ውጪ ያደረገ እንደነበር አስታውቋል፡፡ አክሎም አገልግሎቱ በተቋረጠባቸው ሰዓታት የተጠቃሚዎቹ መረጃ ስጋት ውስጥ እንደነበር የሚያሳይ ምንም ዓይነት ማስረጃ እንደሌለ ገልጿል፡፡ የኩባንያው ዋና ስራ አስፈፃሚ ማርክ ዙከምበርግ በበኩሉ ለነበረው የአገልግሎት መቋረጥ ይቅርታውን አቅርቧል፡፡

ከሦስቱ የፌስቡክ ገፆች ባሻገር የኩባንያውን የቨርቹዋል ሪያሊቲ ሄድሴት አገልግሎት አቅራቢ ኦኪውለስ እና ሌሎች እንደ ፖኪማንጎ ያሉት በፌስቡክ በኩል መግባትን የሚጠይቁ መተግበሪያዎችም አገልግሎቱ በተቋረጠባቸው ሰዓታት ውስጥ እንዲሁ እክል አጋጥሟቸው ቆይተዋል፡፡

ፌስቡክ በተለያዩ ጊዜያት ቴክኒካዊ ችግሮች ሊያጋጥሙት ቢችልም ጉዳዮቹ ግን በፍጥነት የሚፈቱ ናቸው፡፡ ከዚህም ባሻገር ችግሮቹ ሲከሰቱ በብዛት በአንድ አካባቢ ነው፤ ለምሳሌ ገፁ በአንድ ሀገር እየሰራ በሌላኛው ግን ይበላሻል፡፡ ነገር ግን የትናንቱ አገልግሎት መቋረጥ አንድን አካበባቢ ወይም ሀገር ብቻ የነካ ሳይሆን መላው ዓለምን የሸፈነ ነበር፡፡ ፌስቡክ መሰል ከፍተኛ የሆነና ለረጅም ሰዓታት የዘለቀ የአገልግሎት መቋረጥ ተደጋግሞ ሲገጥመው አይታይም፡፡ ኩባንያው በዚህ ልክ ከፍተኛ የአገልግሎት መቋረጥ ሲያጋጥመው የትናንትናው ከሁለት ዓመታት በኋላ የመጀመሪያው ነው፡፡ በአውሮፓውያኑ 2019 ያጋጠመው የያኔው የአገልግሎት መቋረጥ ፌስቡክ እና በስሩ የሚገኙ አብዛኛዎቹ መተግበሪያዎች ለ14 ሰዓታት ያህል አገልግሎት መስጠት እንዳይችሉ አስገድዷቸው ነበር፡፡

የድ-ገፆችን አገልግሎት መቆራረጥ በመከታተል የሚታወቀው ዳውንዲቴክተር የተባለው ገፅ ታድያ የአገልግሎት መቋረጡ በታሪኩ አይቶት በማያውቀው ደረጃ እጅግ ከፍተኛ እንደነበር ገልጿል፡፡

ፌስቡክ ባለፉት ጥቂት ቀናት ብቻ ችግር ውስጥ ሲገባ ይህ የመጀመሪያው አይደለም፡፡ የአገልግሎት መቋረጡ ተከስቶ ከነበረበት ከአንድ ቀን በፊት የቀድሞው ሰራተኛው ኩባንያው ከደህንነት በላይ ለእድገቱ ቅድሚያ እንደሚሰጥ ሲቢኤስ ከተባለው የአሜሪካን መገናኛ ብዙሀን ድርጅት ጋር ባደረገችው ቃለ መጠይቅ ማሳወቋ በከፍተኛ ደረጃ ሲያወያይ ነበር፡፡

ምንጭ፤ ቢቢሲ
ለተጨማሪ፤ https://www.bbc.com/news/technology-58793174

የዌቢናር ጥሪ

የዌቢናር ጥሪ
=======
የኢትዮ-ጀርመን ኢንኪዩቤሽን እና ስታርታፕ ፕሮሞሽን ፕሮግራም በሚል የተዘጋጀው አዲሱ የዌቢናር መርሃ ግብር የፊታችን ጥቅምት 3 እና ጥቅምት 18 የሚከናወን ይሆናል፡፡ የቴክኖሎጂ እና ኢኖቬሽን ኢንስቲትዩት ከጀርመን የኢነርጂና ኢኮኖሚ ጉዳዮች ሚኒስቴር ጋር በመተባበር ያዘጋጀው ይህ የበይነ-መረብ ሴሚናር በዋናነት ለሁሉም የግል እና የመንግስት ኢንኪዩቤተሮች፣ በቴክኖሎጂ ስታርታፕ ለሚሰሩ ባለሙያዎች እና በዘርፉ እየተንቀሳቀሱ ላሉ የኢትዮጵያ የፈጠራ ባለሙያዎች ማህበር አባላት የልምድ ማግኛ መድረክ እንዲሆን በሚል የተዘጋጀ መርሃ-ግብር ነው፡፡

በዚህ ዌቢናር በኢንኪዩቤሽን ፕሮግራም ዘርፉ ላይ የብዙ ዓመት ልምድ ያላቸው የጀርመን ኢንኪዩቤተሮች በቢዝነስ ሞዴል፣ የፋይናስ አቅም በመፍጠር፣ በጀርመን ስላለው የኢንኪዩቤሽን ፕሮግራም ድጋፍ እንዲሁም ተያያዥ ጉዳዮች ላይ ተሞክሮዎችን በማንሳት በዘርፉ ላይ እንዴት ስኬት ማምጣት እንደሚቻል ሰፊ ውይይት የሚያደርጉ ሲሆን ከተሳታፊዎች የሚነሱ ሃሳቦችን በሰፊው ለመመልከትም የጥያቄና መልስ ክፍል በመርሃ-ግብሩ ተካቷል፡፡
All private and public incubators are cordially invited to participate in the Ethio-German Incubation and Startups Program
1. Incubator Untenrehmer TUM GmbH, Munich, Germany
• Speaker: Mr. Stefan Drüssler, CEO
• Date and Time: 13 October, 2021, 10:00-11:30 AM (Nairobi Time)
2. Incubator Digital HUB Logistics, Dortmund, Germany
• Speaker: Mr. Thorsten Hülsmann, Hub Manager
• Date and Time: 28 October, 2021, 10:00 AM -12:00 PM (Nairobi Time)

በሁለት የተለያዩ ቀናት በሚደረገው በዚህ ዌቢናር መሳተፍ የምትፈልጉ ከታች ያሉትን ሊንኮች በመጠቀም መመዝገብ ትችላላቹ
1 https://us04web.zoom.us/j/71290108442?pwd=TWd1Qk5hSERzazE3NTYyNmhaa3dzZz09

2 https://us04web.zoom.us/j/74594426306?pwd=RFhYMWZoMnNjSHRVdVZodDBsK0F2Zz09

ኢትዮጵያውያን ባለሙያዎች ተሳትፈውባት የነበረችው ሶፊያ ሮቦት በዚህ ዓመት በብዛት ልትመረት ነው
========================
መቀመጫውን በሆንኮግ ኮንግ ባደረገው እና ሀንሰን ሮቦቲክስ በተሰኘ የቴክኖሎጂ ኩባንያ በዋና መሪነት የተሰራችው ሶፍያ ሮቦት ከ50 የሚበልጡ የፊት ገለጻዎችን ማሳየት የምትችል መሆኗ ለየት ያደርጋታል። ሶፍያ ይህን ለማድረግ ሰው ሰራሽ አስተውሎት (artificial intelligence) የሚባለውን ግሩም ቴክኖሎጂ ከማካተቷ በተጨማሪ ኢትዮጵያን ጨምሮ ከተለያዩ ሀገራት የተወጣጡ የኮምፒውተር ሳይንስ ባለሙያዎች አሻራቻን ያሳረፉባት አስገራሚ የቴክኖሎጂ ግኝት ናት። ከአመታት በፊት አይኮግ ላብስ በተባለው ድርጅት የታቀፉ ኢትዮጵያውን ባለሙያዎች የሮቦቷን አካል ከሰራው ሀንሰን ሮቦቲክስ ኩባንያ ጋር በመተባባር ለሶፍያ የሰው ሰራሽ አስተውሎት ቀመሮችን በማዘጋጀት ስራ ላይ በዋናነት ሲሰራ መቆዩታቸው የሚታወቅ ሲሆን ሮቦቷን ወደ ውጤት በማምጣት ሂደት ላይም የራሳቸውን ተሳትፎ አድርገዋል፡፡

እንደአውሮፓውያኑ በ2016 ለአለም የተዋወቀችው ይህች ሮቦት የማህበራዊ ሚና ያላቸው ሮቦቶች ከሚባሉት የምትመደብ ቢሆንም ከሷ በፊትና ከሷ በኋላ ከተሰሩት ማሽኖች እጅግ የሚለይ ባህሪዎችና ገፅታዎች የተላበሰች ሮቦት ናት፡፡ እስካሁን በዚህ ዘርፍ ከተሰሩት ማሽኖች ከሰዎች ጋር ባላት ግንኙነት እና እንደየሁኔታው በሚያጋጥሟት ክስተቶች እንደ መቆጣት፣ ማዘን እና መደሰት ያሉ ሰውኛ ባህሪዎችን ለመሳየት መቻሏ ሶፊያን ከሌሎች የማህበራዊ ሚና ካላቸው ሮቦቶች ለየት የሚደርጋት ነው፡፡ ሶፊያ በአለም አቀፍ ደረጃ ከፍተኛ እውቅና ያላት እና በማህበራዊ ሚና ላይ ለሰዎች ይበልጥ የቀረበች ሮቦት ብትሆንም በብዛት የመመረት እድል ስላልነበራት ወደብዙዎች መድረስ አለመቻሏን የሚያስረዱት የሀንሰን ሮቦቲክስ መስራች ዴቪድ ሃንሰን አሁን ላይ ከኮቪድ መምጣት ጋር ተያይዞ ሮቦቷን በብዛት አምርቶ ወደገበያ ለማቅርብ እየተሰራ መሆኑን ተናግረዋል፡፡

ከወራት በፊት ይህን እቅድ በመሬት ላይ በማውረድ በብዙዎች የምትታወቀውን የሶፍያ ሮቦት እስከአመቱ መጨረሻ በሺዎች በመማረት ለገበያ ለማቅርብ እየሰራ መሆኑን የሚናገሩት ዴቪድ ሃንሰን አሁን ባለንበት አለም እንደሶፊያ ያሉ ማህበራዊ ሚና ያላቸው አውቶሜትድ ማሽኖች አቅመ ደካሞችን ያለመሰልቸት ለመርዳት እና የታመሙ ሰዎችንም ለማገዝ ትልቅ ሚና እንደሚኖራቸው ያነሳሉ፡፡ አሁን ላይ ብዙ በሮቦቲክስ ዙሪያ የሚሰሩ የቴክኖሎጂ ድርጅቶች ማህበራዊ ሚና ያላቸው ሮቦቶችን በብዛት በማምረት ላይ የሚገኙ ሲሆን እንደ ሃዩንዳይ ያሉ ትልልቅ ኩባንያዎች ሳይቀር በዘርፉ ላይ ሰፊ እንቅስቃሴዎችን በማድረግ ላይ ናቸው፡፡

ከዚህ በፊት የተሰሩ እንደ ሚሎ ያሉ የማህበራዊ ሚና ያላቸው ሮቦቶች ከኦቲዝም ጋር የተያያዘ የጤና እክል ያለባቸው ህጻናትን ስሜቶቻቸውን አውጥተው አንዲናገሩ በማስቻል የተግባቦት አቅማቸውን ሊያስድጉ መቻላቸውን የሚናገሩት የዘርፉ ባለሙያዎች መሰል የማህበራዊ ሚና ያላቸው ሮቦቶች በየቀኑ ሊሰሩ የሚችሉ ስራዎችን ያለመስለቸት በመስራት የታመሙ ሰዎች ለመርዳት እና አቅመ ደካሞችን ለማገዝ ጥሩ አማራጭ መሆናቸውን ያስረዳሉ፡፡ በዚህ ሁኔታ ውስጥ ሰፊ እውቅና ያላት የሶፍያ ሮቦት እንዲህ ያሉ ማህበራዊ ተግባሮችን ለመከወን የሚስችል የስሜት ተለዋዋጭነት እና የበዛ የቋንቋ ክህሎት የታከለባት ሮቦት እንደመሆኗ መጠን ተቀባይነቷን እንደሚጨምረው የባለሙያዎች አስተያየት ነው፡፡
https://bigthink.com/technology-innovation/sophia-the-robot-hanson-robotics/

ሦስት ተመራማሪዎች የዘንድሮውን የፊዚክስ ዘርፍ ኖቤል ሽልማት አሸነፉ

ሦስት ተመራማሪዎች የዘንድሮውን የፊዚክስ ዘርፍ ኖቤል ሽልማት አሸነፉ
=================
ሸኩሮ ማናቤ፣ ክላውስ ሀስልማን እና ጆርጂኦ ፓሪሲ የተሰኙት ተመራማሪዎች የዘንድሮው የፊዚክስ ዘርፍ የኖቤል ሽልማት አሸናፊ መሆናቸው ትናንት ይፋ ተደርጓል፡፡ ከተመራማሪዎቹ መካከል ሸኩሮ ማናቤ እና ክላውስ ሀስልማን ለአሸናፊነት የበቁት የምድራችንን አየር ንብረት ለውጥ የሚያደርሰውን ተፅዕንዖ የሚያመላክት የኮምፒውተር ሞዴልን ባስገኘው ፈር ቀዳጅ ጥናታቸው አማካኝነት ነው፡፡

የአየር ንብረት ለውጥን የረጅም ጊዜ ባህርይ ለመተንበይ እጅግ አዳጋች የሚባል ተግባር ነው፡፡ በዚህም ምክንያት የበካይ ጋዞች ልቀት የሚያመጣውን ለውጥ የሚተነብዩ እና የዓለም ሙቀት መጨመርን ለመረዳት ጥቅም ላይ የሚውሉ የኮምፒውተር ሞዴሎች እጅጉን አስፈላጊ ናቸው፡፡ በሁለቱ ተሸላሚዎች ጥናት ላይ ተመስርተው የተሰሩት የአየር ንብረት ለውጥን መመልከቻ የኮምፒውተር ሞዴሎች ታድያ የዓለም መሪዎች የአየር ንብረት ለውጥን አስመልክቶ የሚያስተላልፏቸው ውሳኔዎች በማስረጃ ላይ የተመሰረቱ እንዲሆኑ ስለማድረጋቸው ተነግሮላቸዋል፡፡

የጃፓን ተወላጅ እና የ90 ዓመት ዕድሜ ባለፀጋ የሆኑት ሸኩሮ ማናቤ በአሜሪካን የፕሪንስተን ዩኒቨርሲቲ አንጋፋ ሚቲዮሮሎጂስት ሲሆኑ በጥናታቸውም ወደ ከባቢ አየር የሚለቀቅ በካይ ጋዝ በምድር ላይ የሚያስከትለውን የሙቀት መጨመር አሳይተዋል፡፡ በዚህም እ.አ.አ 1960ዎቹ የአየር ንብረት አካላዊ ሞዴል እንዲሰራ የመሪነት ሚናን ተጫውቷል፡፡

ከሸኩሮ ማናቤ ስራ አስር ዓመት በኋላ ደግሞ አሁን 89ኛ ዓመት ዕድሜያቸው ላይ የሚገኙት ክላውስ ሀስልማን አየር ፀባይ እና አየር ንብረትን ያስተሳሰረ የኮምፒውተር ሞዴል ይዘው መጥተዋል፡፡ ይህ ስራቸው ታድያ የአየር ንብረት ሞዴሎች የአየር ፀባዩ የሚለዋወጥ ቢሆን እንኳን ለምን እምነት የሚጣልባቸው እንደሆኑ አሳይቷል፡፡

የ73 ዓመቱ ተመራማሪ ጆርጂኦ ፓሪሲ ስራ በበኩሉ ከአየር ንብረት ለውጥ ጋር ያለው ግንኙነት ያን ያህል ነው፡፡ ስራቸው ስፒን ግላስ የተሰኘ አተሞች ከኮፐር አተሞች መስመር ጋር የሚዋሀድበት የሜታል አሎይን ይመለከታል፡፡ ነገር ግን የኖቤል ኮሚቴው የጆርጂኦ ፓሪሲ ስራ ውስብስቡን የምድር አየር ንብረት ባህርይ በመረዳት ረገድ ጠቃሚ ሆኖ ስላገኘው ለሽልማቱ ተመርጠዋል፡፡ ጆርጂኦ ፓሪሲ በዚህ ስራቸው በጠጣር ቁሶች ዘፈቀዳዊ ባህርይ ላይ ተፅዕንዖ የሚያሳድሩ ድብቅ ሕጎችን ማግኘትና በሒሳባዊ ስሌትም ማብራራት ችለዋል፡፡

ለተመራማሪዎቹ ለሽልማት ከቀረበው ገንዘብ ውስጥ አስር ሚሊዮን የስዊድን ክሮና ወይም 842,611 ፓውንድ የሚሆነውን ሸኩሮ ማናቤ እና ክላውስ ሀስልማን የሚካፈሉት ሲሆን የተቀረው ለጆርጂኦ ፓሪሲ ይበረከታል፡፡

የኖቤል ሽልማት መሰጠት ከተጀመረበት ከአውሮፓውያኑ 1901 አንስቶ ባሉት 120 ዓመታት ውስጥ 218 ሰዎች በፊዚክስ ዘርፍ ያሸነፉ ሲሆን ከነዚህ ውስጥ ግን አራቱ ብቻ ሴቶች ናቸው፡፡ በሌላ መልኩ ጆን ባርደን በፊዚክስ ዘርፍ ኖቤልን ሁለት ጊዜ በማሸነፍ (በአውሮፓውያኑ 1956 እና 1972) እስካሁንም ብቸኛው ሰው ሆነው ቆይተዋል፡፡

ምንጭ፤ ቢቢሲ
ለተጨማሪ፤ https://www.bbc.com/news/science-environment-58790160