Ethio Locate አዲሱ የጉዞ መመሪያ ፕላትፎርም
========================
ለአገር ውስጥ እና ለዓለም አቀፍ የቢዝነስ እንቅስቃሴዎች ዲጂታል መፍትሄዎችንና አሰራሮችን በማቅረብ የሚሰራው ዋይ-ቴክ (Y-Tech) የተሰኘው አገር በቀል የቴክኖሎጂ ድርጅት Ethio Locate የተባለ አዲስ የጉዞ መመሪያ ፕላትፎርም ማቅረቡን ይፋ አድርጓል፡፡ ኢትዮ ሎኬቴ በቀላል ሂደት ተጠቃሚዎች ቦታዎችን እና መረጃዎችን በኢትዮጵያ ውስጥ በነፃ እንዲያገኙ የሚያግዝ የጉዞ መመሪያ ፕላትፎርም ሲሆን፤ ማንኛውም የንግድ ድርጅቶች እና ተቋማት አገልግሎታቸውን ወይም ምርቶቻቸውን በኦንላይን እንዲያስተዋውቁ እና ዲጂታል ፕሮፋይል እንዲኖራቸውም የሚያስችል ነው፡፡
ኢትዮ ሎኬቴ በአሁኑ ወቅት በአንድሮይድ ስልኮች እና በፕለይ ስቶር መተገበሪያዎች ላይ የሚገኝ ቢሆንም ለአንድ አመት በዌብሳት ፕላተፎርም ግልጋሎት ሲሰጥ የቆየ እና በዚህ ቆይታውም ከተጠቃሚዎች ጥሩ ምላሽ ማግኘቱ ተገልጿል፡፡ በዚህ የጉዞ መመሪያ ፕላትፎርም ተጠቃሚዎች የሆቴሎችን፣ ሙዚየሞችን፣ ፓርኮችን እና በመላ አገሪቱ ያሉ የተለያዩ ቦታዎችን አጠቃላይ አድራሻ በቀላሉ ማግኘት እንደሚችሉም ተገልጿል፡፡
የኢትዮ ሎኬቴ የቡደን አባላት ወደ ተለያዩ የአገሪቱ ከተሞች ሲጓዙ መረጃዎችንና ቦታዎችን ለማግኘት ያጋጠማቸውን የግል ፈተናዎች መሠረት በማድረግ ፕላትፎርሙን ለመስራት መነሳሳታቸውን የሚያስረዳው የኢትዮ ሎኬቴ ዋና ሥራ አስፈፃሚና መስራች አቶ ይሳቅ አምደሥላሴ ኢትዮ ሎኬቴ አገልግሎት አቅራቢዎች እና ደንበኞቹ የሚፈልጉትን የተደራጀ እና የተጣራ የዲጂታል መረጃ በአንድ ቦታ ለማግኘት የሚስችል ፕላትፎርም መሆኑን ይናገራል፡፡ ይህ የመረጃ እጥረት ከተለያዩ የአለማችን ክፍሎች ለሚመጡ ቱሪስቶችም ትልቅ ችግር በመሆኑ የአገልግሎት አቅራቢዎች የተሻሻለ መረጃቸውንና አድራሻቸውን በቀላሉ በዲጂታል መንገድ ማቅረብ እንዲችሉ ይህ ፕላትፎርም ትልቅ እድል እንደሚፈጥርም አቶ ይሳቅ ተናግሯል፡፡
በፕላትፎርሙ አማካኝነት የሀገራችንን የቱሪስት መስህቦች፣ መዳረሻዎች እና የታላቋን ሀገራችንን ታሪክ በተፃፈና በተደራጀ ይዘት ማስተዋወቅ እንፈልጋለን የሚለው አቶ ይሳቅ ይህን ለማሳካትም በኢትዮ ሎኬቴ ዙሪያ ሰፋፊ እቅዶች ይዘን በመስራት ላይ እንገኛለን ብሏል፡፡
መተግበሪያውን በተከታዩ የጎግል ፕለይ ሊንክ ማውረድ ይቻላል
https://play.google.com/store/apps/details...
ምንጭ፡ https://www.techinafrica.com/ethiopia-tech-startup-launches-travel-guide-application/

ከፊል እይታን መመለስ የቻለው ኦፕቶጀኔቲክስ ቴክኖሎጂ**********************************
ሁለቱም አይኖቹ ማየት ተስኗቸው የነበሩ አንድ ሰው ኦፕቶጀኔቲክስን በሚጠቀም ከፍተኛ የቴክኖሎጂ ህክምና አማካኝነት ከፊል ብርሃን ማግኘቱ ተሰማ፡፡ ህክምናው የነርቭ ዘረመሎችን ለብርሃን መልስ እንዲሰጡ በሚያስችል መልኩ የተካሄደ እንደሆነ የመረጃ ምንጫችን ዘግቧል፡፡
ኦፕቶጀኔቲክስ በአሁኑ ወቅት በብዛት ጥቅም ላይ እየዋለ ያለ ቴክኖሎጂ ሲሆን የጭንቅላት ህዋሳትን በትክክል መቆጣጠር የሚያስችልና ህዋሳቱም ለብርሃን መልስ እንዲሰጡ የሚያደርግ ነው፡፡ በእንስሳት ላይ ጥቅም ላይ በሚውልበት ጊዜ የተለያዩ ግኝቶችን ማሳወቅ የቻለ ሲሆን ባለው የሳይንስ እውቀት ክፍተት ምክንያት በሰዎች ላይ ለመሞከር ብዙ እንቅፋቶች አሉበት፡፡ ለምሳሌ በጭንቅላት ውስጥ ብርሃንን ለማብራት ብርሃን አስተላላፊ ገመዶችን በጭንቅላት ውስጥ ማስገባት አስፈላጊ ነው፡፡ ይህን ማድረግ ደግሞ ለጊዜው የማይደፈር ነው፡፡
ብዙዎች የአይን ብርሃን ማጣትን ለመከላከል ወይም ለማከም እንዲውል የተለያዩ ጥረቶችን እያደረጉ ሲሆን እስካሁን በዚህ ዘዴ የአይን ብርሃኑ የተመለሰለት አንድ ፈረንሳዊ የ58 ዓመት ጎልማሳ ነው፡፡ ይህም ሰው በመንገድ የሚንቀሳቀሱ ሰዎችን ምስል በነጭና ጥቁር ቀለማት ማየት መቻሉ ተነግሯል፡፡ ይህም እንዲሆን ታካሚው የሚያደርገው ለምስል መከሰት የተለያዩ እገዛዎችን የሚያደርግ መነጸር መልበስ ይኖርበታል፡፡
ምንጭ newscientist
ተጨማሪ ንባብ https://www.newscientist.com/article/2278405-partial-sight-restored-for-man-who-is-blind-thanks-to-optogenetics/?utm_medium=social&utm_campaign=echobox&utm_source=Facebook&fbclid=IwAR2sHL1KWnO7M8MMQGIf5_auP91iwfaQwWrh7nKqtAs5EEcUoIPEK-wjPuU#Echobox=1621874379-1

ለትምህርት ቤቶች “ኮቪድ-19 ኢትዮጵያ” የተሰኘ መተግበሪያ
******************************
ለትምህርት ቤት አስተዳደር ሠራተኞች እና ለመምህራን የኮሮና ቫይረስ ሥርጭትን መከላከል እና ለቁጥጥር ሥራ የግንዛቤ ማስጨበጫ ለመስጠት “ኮቪድ-19 ኢትዮጵያ” መተግበሪያ ይፋ ሆነ።
የግንዛቤ ማስጨበጫ መተግበሪያው ከኮሮና ቫይረስ ጋር በተያያዘ የተለያዩ ርእሰ ጉዳዮችን ማካተቱ ተገልጿል።
የኮሮና ቫይረስ መተግበሪያው በጤና እና ትምህርት ሚኒስቴር በጋራ የተዘጋጀውን የኮሮና ቫይረስ መከላከል መመሪያን መሠረት ያደረገ ነውም ተብሏል፡፡
መተግበሪያው የበሽታ ቅኝት፣ የተግባቦት እና የማኅበረሰብ ተሳትፎ ሥራዎችን እንዲሁም በሁሉም ደረጃ ስላለው ኃላፊነቶች የግንዛቤ ማስጨበጫ እንደሚሰጥ ተገልጿል።
በመጨረሻም “ኮቪድ-19 ኢትዮጵያ” መተግበሪያን ሁሉም መምህራን እና የትምህርት ቤት አስተዳደር ሠራተኞች በስልካቸው በመጫን ስልጠናውን እንዲወስዱ እና ለኮሮና ቫይረስ ሥርጭት ቁጥጥር ሥራ የበኩላቸውን አስተዋጽኦ እንዲያደርጉ ጥሪ ቀርቧል፡፡
ምንጭ ጤና ሚኒስቴር
https://www.facebook.com/EthiopiaFMoH/posts/1823445957826199

ኬኒያዊቷ ዶክተር የአለም ጤና ድርጅት አዋርድን አሸነፈች
----------------------------------------
የ28 አመቷ ዶ/ር ጀሚማህ ካሪዩኪ በኩቪድ -19 እገዳ ወቅት ነፍሰ ጡር እናቶች የወሊድ እንክብካቤ እንዲያገኙ በማስቻል ዓለም አቀፍ ጤናን ለማሳደግ ላበረከተችው ትልቅ አስተዋፅዖ የአለም ጤና ድርጅት እውቅና ሰቷታል፡፡ የአለም ጤና ድርጅት ዋና ዳይሬክተር ለአለም ጤና መጠበቅ ትልቅ አበርክቶት ነበራቸው በሚል በየዓመቱ እውቅና እና ሽልማት የሚሰጥ ሲሆን በዚህኛው የ 2021 ዓመትም ወጣቷ ኬኒያዊት ዶክተር አሸናፊ መሆን ችላለች፡፡
ዶ/ር ካሪዩኪ በአለም ጤና ድርጅት አሸናፊ መሆኗ ከተረጋገጠ በኋላ በቲውተር ገፅዋ ባስተላለፈችው መልክት ይህ ሽልማት በማህበረሰቡ ውስጥ ላሉ ወጣቶች ማድረግ አንደሚችሉ እና የአለም ማህበረሰብ ለሁሉም ነፍሰ ጡር እናቶች ግድ እንደሚለው ያመላከተ ነው ብላለች፡፡ ዶ/ር ካሪዩኪ ኮቪድ ባስከተለው ቀውስ ምክንያት በተለያዩ ጤና ጣቢያዎች አስፈላጊውን የቅድመ ወሊድ እንክብካቤ ያላገኙ ነፍሰ ጡር እናቶች ተገቢውን እገዛ እንዲገኙ በማለም የተለያዩ ፕሮግራሞችን በማቅረብ ተሳታፊ ሆናለች፡፡ በተለይም በኮቪድ -19 እገዳ ወቅት በቲውተር ገፅዋ እንዳስታወቀቸው ነፍሰ ጡር እናቶች የወሊድ እንክብካቤ እንዲያገኙ የበኩሌን አስተዋፅዖ እወጣለሁ በሚል ነጻ የአሙቡላንስ አገልግሎት ለነፍሰ ጡር እናቶች እንዲሰጥ እና በዚህም ከ1ሺ በላይ እናቶችና ህጻነት ተገቢውን ክትትል እንዲያገኙ ትልቅ አስተዋፅዖ አበርክታለች፡፡
ከኮቪድ 19 ጋር በተያያዘ በጆንስ ሆፕኪንስ የተሰራ ጥናት እንደሚያሳየው ወረርሽኙ በፈጠረው የጤና ስርዓት መቃወስ ብቻ 1.1 ሚሊዮን የሚጠጉ ህጻናት ህይወታቸው ያለፈ ሲሆን፤ 56,700 የሚደርስ የእናቶች ሞት ደግሞ በዝቅተኛ እና መካከለኛ ገቢ ባላቸው ሀገራት ሊመዘገብ ችሏል፡፡
https://nation.africa/.../kenyan-doctor-wins-who-director...

በሀገራችን የቴሌኮም ፈቃድን በማግኘት የመጀመሪያው የግል ተቋም ስለሆነው ግሎባል ፓርትነርሺፕ ፎር ኢትዮጵያ ጥቂት እንበልዎ
======================
ከወራት በፊት ባለስልጣኑ የቴሌኮም አገልግሎት ፈቃድ ለመስጠት ጨረታ ማውጣቱን ተከትሎ የደቡብ አፍሪካው ኤምቲኤን እና ግሎባል ፓርትነርሺፕ ፎር ኢትዮጵያ ወደ ጨረታው መግባታቸው ይታወሳል፡፡ ታድያ ባሳለፍነው ቅዳሜ የኢትዮጵያ ኮምዩኒኬሽን ባለስልጣን በሀገራችን የቴሌኮም ኢንዱስትሪ ውስጥ ከኢትዮ ቴሌኮም በመቀጠል ለመጀመሪያ ጊዜ ተሳታፊ እንዲሆን የሚያስችለውን ፈቃድ ለግሎባል ፓርትነሺፕ ፎር ኢትዮጵያ መስጠቱ ይታወሳል፡፡
ፈቃድ የማግኘት ውድድሩን በአሸናፊነት የተወጣው ግሎባል ፓርትነርሺፕ ፎር ኢትዮጵያ ለኮምዩኒኬሽን ባለስልጣኑ 850 ሚሊዮን ዶላር የፈቃድ ክፍያን የሚፈፅም ሲሆን የ8.5 ቢሊዮን ዶላር መዋለ ነዋይ ፈሰስ ለማድረግም ቃል ገብቷል፡፡
ግሎባል ፓርትነሺፕ ፎር ኢትዮጵያ አምስት ዓለም አቀፍ የቴክኖሎጂ፣ ቴሌኮም እና ፋይናንስ ተቋማትን ያቀፈ ጥምረት ነው፡፡ ከነዚህ ኩባንያዎች መካከል የእንግሊዙ ዓለም አቀፍ የቴሌኮምዩኒኬሽን ኩባንያ ቮዳፎን ሲገኝበት በዚህ ተቋም አብዛኛው የአክሲዮን ድርሻው የተያዘው የደቡብ አፍሪካው ቮዳኮምም የጥምረቱን 6.2 በመቶ ድርሻ ይዟል፡፡ በአንፃሩ የኬኒያው ግዙፍ የቴሌኮምዩኒኬሽን ኩባንያ ቀድሞ የጥምረቱ ዋና ባለቤት ሆኖ የ51 በመቶ ድርሻን እንደሚይዝ ተነግሮ የነበረ ሲሆን ኋላ ላይ ድርጅቱ ድርሻውን በበለጠ ወደ 56 በመቶ አሸጋግሮታል፡፡
በማዕድን ማውጣት፣ መሰረተ ልማት ግንባታ እና ሌሎችም ኢንዱስትሪዎቹ የሚታወቀው የጃፓኑ ሱሚቶሞ ኮርፖሬሽን ጥምረቱ ላይ የ25 በመቶ ድርሻን ይዞ ይሳተፋል፡፡ ታድያ ሱሚቶሞ ከባለቤትነት ድርሻ ባሻገርም ጥምረቱ በኢትዮጵያ ለሚዘረጋው የቴሌኮም ስራ የቴክኖሎጂ አቅራቢም ነው፡፡ ኩባንያው ከዚህ ቀደም ከጃፓኑ የቴሌኮም አገልግሎት ሰጪ ኬዲዲአይ እና በማይናማር መንግስት ባለቤትነት ከሚተዳደረው ኤምቲፒ የቴሌኮም ኩባንያ ጋር ሆኖ የማይናማርን ቴሌኮም ገበያ ክፍት የማድረግ ስራዎችን ሲያከናውን ቆይቷል፡፡ የእንግሊዙ የፋይናንስ ተቋም ሲዲሲ ግሩፕ በበኩሉ ከጥምረቱ የአስር በመቶ ድርሻን ይዞ እናገኘዋለን፡፡
በፋይናንስ ረገድ የአሜሪካኑ ዴቨሎፕመንት ፋይናንስ ኮርፖሬሽን የጥምረቱ አካል ለሆነው ቮዳፎን የ500 ሚሊዮን ዶላር ብድር እንደሚያቀርብ ሸጋ ዘግቦታል፡፡
በተጠቃሚዎች ብዛት ከአፍሪካ ቀዳሚው የሆነው ኤምቲኤን በውድድሩ ላይ የተሳተፈው ከሲልክ ሮድ ፈንድ እና ሌሎች ለጊዜው ግልፅ ያልወጡ አጋሮችን በመያዝ ነበር፡፡ ግልፅ የወጣው ሲልክ ሮድ ፈንድን ስናይ ተቋሙ በቻይና መንግስት ባለቤትነት የሚተዳደር ሆኖ ሀገሪቱ ከዓለም ጋር ይበልጥ ያስተሳስረኛል ብላ በጀመረችው የቤልት ኤንድ ሮድ እንቅስቃሴ ለሚሳተፉ ሀገራት የገንዘብ አቅርቦትን የሚያደርግ የልማትና መዋለነዋይ ድጋፍ አድራጊ ነው፡፡ ሆኖም ኤሜምቲኤን በውድድሩ ላይ ማቅረብ የቻለው 600 ሚሊዮን ዶላር አነስ ብሎ በመገኘቱ ተቀባይነትን ሳያገኝ ቀርቷል፡፡ ሆኖም ቀሪውን ፈቃድ ለማግኘት የሚደረገው ውድድር የሚቀጥል ይሆናል፡፡
ምንጭ፤ Shega
ለተጨማሪ፤ https://shega.co/.../summary-ethiopia-telecommunication.../

በኢትዮጵያ ለመጀመሪያ ጊዜ የተደረገው አፍሪካን ዩኒቲ ፎር ሬነሳንስ ኮንፈረንስ
===========================
በምድረ አፍሪካ ለሳይንስ፣ ቴክኖሎጂ እና ኢኖቬሽን አስቻይ የሆነ ከባቢ መፍጠርን አልሞ የሚካሄደው ዓመታዊው አፍሪካን ዩኒቲ ፎር ሬነሳንስ ኮንፈረንስ (AURC) ለመጀመሪያ ጊዜ በኢትዮጵያን ተካሄደ፡፡ ኮንፈረንሱ በዋናነት በኢትዮጵያ በቴክኖሎጂ እና ኢኖቬሽን ኢንስቲትዩት አማካኝነት የተለያዩ ኢትዮጵያውያን ምሁራን፣ ተመራማሪዎችና ባለድርሻዎችን በማሰባሰብ በራዲሰን ብሉ ሆቴል ሲካሄድ ከወደ ደቡብ አፍሪካም በዙም አማካኝነት ተሳታፊዎችን አካቶ ተደርጓል፡፡
በኮንፈረንሱ ላይ “Africa’s Future Beyond COVID-19” በሚል ርዕስ መቀመጫቸውን ደቡብ አፍሪካ ያደረጉ ምሁራን በዙም አማካኝነት የፓናል ውይይት ያደረጉ ሲሆን እዚሁ ኢትዮጵያ በነበረው ዝግጅትም አራት ያህል የጥናትና ምርምር ስራዎችና ለታዳሚው ቀርበዋል፡፡ በእለቱ ከቀረቡት የምርምር ስራዎች መካከል የጎማ ውስጥ አየር አሞላል በመኪናው የነዳጅ ፍጆታ ላይ የሚያደርሰውን ተፅዕንዖ የሚዳስሰው የአቶ ንጋቱ በላይነህ ጥናት ይገኝበታል፡፡ ብዙውን ጊዜ መኪኖች የጎማቸው አየር ከሚገባው በላይ አልያም በታች ሆኖ እንደሚሞላ የተናገረው አቶ ንጋቱ ይህ የሚያሳድረውን ውጤትም በአንበሳ የከተማ አውቶብሶች ላይ ካደረገው ሙከራ ጋር በማያያዝ ለታዳምያኑ አስቃኝቷል፡፡
ሌላው በዕለቱ የቀረበው ጥናት በቴክኖሎጂ እና ኢኖቬሽን ኢንስቲትዩት አማካኝነት በሺዎች የሚቆጠሩ የኢትዮጵያ ተቋማትን በመዳሰስ ተጠንቶ ለህዝብ በቀረበው የብሔራዊ ኢኖቬሽን ሰርቬይ ላይ ነው፡፡ የኢንስቲትዩቱ ተመራማሪ በሆኑት አቶ በላቸው አለማየው አማካኝነት ለታዳምያን እንዲደርስ በተደረገው በዚህ ዳሰሳ በኢትዮጵያ ያሉ ሀገራዊ የኢኖቬሽን ደረጃዎች ተመላክተውበታል፡፡ ኢትዮጵያ ውስጥ ያሉ ተቋማት በተገበሯቸው የኢኖቬሽን ስራዎች አማካኝነት ከ8 ቢሊዮን ብር በላይ ገቢ መገኘቱን የተናገረው አቶ በላቸው ለዚህ ያበቃቸው ዘንድ ተቋማቱ ሲተገብሯቸው የሚስተዋሉ የኢኖቬሽን አይነቶች እንዲሁም ወደ ኢኖቬሽን ለመግባት መነሻ ምክንያቶቻቸው ናቸው ያላቸውን በዝርዝር አሳይቷል፡፡ ይህ በእንዲህ እንዳለ ግን በኢትዮጵያ ያለውን የኢኖቬሽን እንቅስቃሴ እጅግ ዝቅተኛና በውስን ሁናቴዎች ላይ የተንጠለጠለ በመሆኑ ይህን እንደ ሀገር ያሻሽላሉ የተባለላቸው ጠንካራ የአዕምሮ ንብረት ጥበቃ ስርዓት ግንባታ፣ የገንዘብ ድጋፍ እና የዕውቀት ሽግግርን ጨምሮ ልዩ ልዩ የመፍትሄ እርምጃ ጥቁምታዎች ተሰጥተውበታል፡፡
ከሁለቱ በተጨማሪ “Termal Regulating Leather for Hot Environment” እንዲሁም “Analysis Factors Affecting Firm Level Innovation Activity in Ethiopia” በሚል ርዕስ የምርምር እና ጥናት ስራዎች የኢንስቲትዩቱ ተመራማሪ በሆነው አቶ ወገኔ ደምሴ እና ከጎንደር ዩኒቨርሲቲ በመጣው አቶ አበባው አቢቦ ቀርበዋል፡፡ በአጠቃላይ የቀረቡት ጥናቶች እና የፓናል ውይይትንም አስመልክቶ በመድረኩ ተገኝተው በነበሩ ምሁራን አማካኝነት ጥያቄና አስተያየት ሲሰጥባቸው ቆይቷል፡፡
አፍሪካን ዩኒቲ ፎር ሬነሳንስ ኮንፈረንስ ላለፉት 10 ዓመታት ሲካሄድ ቢቆይም ከደቡብ አፍሪካ ውጪ ሲደረግ ግን ይህ ለመጀመሪያ ጊዜው ነው፡፡ ኮንፈረንሱ በኢትዮጵያ ሊካሄድ ዕቅድ ተይዞለት የነበረው ባለፈው ዓመት ቢሆንም በኮቪድ-19 ወረርሺኝ ምክንያት ወደዚህ ዓመት ሊሸጋገር ችሏል፡፡

በኪንግ ደሴት የተገኘው የተለየ እንቁላል
*************************
የእንግሊዙ የተፈጥሮ ታሪክ ሙዚየም አካል የሆነ አንድ የተመራማሪዎች ቡድን በአየነቱ የተለየ ኢምዩ የተሰኘች በአውስትራሊያ ብቻ የምትገኝ የማትበር ወፍ እንቁላልን ማግኘቱን ይፋ አደረገ፡፡ እንቁላሉም ከሌሎች ተመሳሳይ አእዋፋትና ከሌሎች ዝርያዎች እንቁላል በእጅጉ የተለየ እንደሆነ ተሰምቷል፡፡
ኢምዩ በአውስትራሊያ እና በአካባቢው በሚገኙ ደሴቶች ብቻ የምትገኝ የማትበር ወፍ ስትሆን በግዝፈቷ ከሰጎን ቀጥሎ የምትጠራ ናት፡፡ በአውስትራሊያ የሚገኙ ታስማኒያ፣ ካንጋሮ እና ኪንግ የተሰኙ ደሴቶች የራሳቸው የሆነ የኢምዩ ዝርያ አላቸው፡፡ እነዚህ የወፍ ዝርያዎች በተለያዩ ምክንያቶች የድንክነት ችግር እንዳጋጠማቸው ጥናቶች ያመለክታሉ፡፡
ይህ የወፍ ዝርያ በሚኖርባቸው አካባቢዎች ለመኖር ምቹ አለመሆን ምክንያት ሊጠፋ የተቃረበ እንደሆነ ይታወቃል፡፡ ይሁን እንጂ ተመራማሪዎች ዝርያውን ከጥፋት ለመታደግ የሚያስችል የተለያዩ ስራዎችን ሲሰሩ ቆይተዋል፡፡ ለብዙ ጊዜያት የዚህን ወፍ እንቁላል ሲፈልጉ የቆዩት ተመራማሪዎች በታስማኒያ እና በካንጋሮ ደሴቶች ብዛት ያላቸውን እንቁላሎች ማግኘት ችለው የነበረ ቢሆን ኪንግ በተባለችው በመጠኗ አነስተኛ በሆነችው ደሲት ግን ምንም እንቁላል ማግኘት አልቻሉም ነበር፡፡
እስካሁን ምንም እንቁላል ያልተገኘባት የጊንግ ደሴት አሀን ላይ አንድ ከተለመደው መጠን ከፍ ያለ እንቁላል ተገኝቶበታል፡፡ ጉዳዩን የተመለከቱት ተመራማሪዎች ለዚህ ትልቅ እንቁላል መፈጠር ምክንያቱ በደሴቱ ያለው የማይመች ሁኔታ ወፏ በአንድ ስፍራ ውስጥ ለረጅም ጊዜ ተወስና በመቆየቷ እና የተሸለ ሙቀት በማግኘቷ ሊሆን ይችላል ሲሉ ተናግረዋል፡፡
ምንጭ phys.org
ተጨማሪ ንባብ https://phys.org/news/2021-05-extinct-dwarf-emu-egg-king.html

ኢትዮጵያ የኒውክሌር ቴክኖሎጂን ለሰላማዊ ጥቅም ለማዋል በምታደረገው ጥረት ሩስያ የሰው ሃይል አቅም ግንባታ ላይ ድጋፍ ታደርጋለች።
========================
ኢትዮጵያና ሩስያ ከዚህ ቀደም የነበሩ ስምምነቶች ወደ ስራ በሚገቡበትና አዳዲስ የስምምነት ማዕቀፎችን መመስረት በሚችሉባቸው ጉዳዮች ዙሪያ ምክክር አድርገዋል።
የኢኖቬሽንና ቴክኖሎጂ ሚኒስትር ዴኤታ አህመዲን መሀመድ (ፒ ኤች ዲ) እና በኢትዮጵያ የሩስያ አምባሳደር የቭጊኒ ተርኪን ሁለቱ ሃገራት በሳይንስ ቴክኖሎጂና ኢኖቬሽን መስክ በትብብር መስራት በሚቻልባቸው ጉዳዮች ዙሪያ መክረዋል።
ኢትዮጵያ የኒውክሌር ሃይልን ለሰላማዊ ጥቅም ለማዋል ከዚህ በምታደረገው እንቅስቃሴ ሩስያ በሰው ሃይል አቅም ግንባታ ድጋፍ እንደምታደርግ አምባሳደሩ አረጋግጠዋል።
የኢኖቬሽንና ቴክኖሎጂ ሚኒስትር ድኤታ አህመዲን መሐመድ (ፒ ኤች ዲ) ሁለቱ ሀገራት ከዚህ ቀደም ያደረጓቸው ስምምነቶች የትብብር ማዕቀፍ በመፍጠር በፍጥነት ወደ ስራ መግባት እንዳለባቸው ተናግረዋል።
ከኢትዮጵያ የ10 አመት መሪ እቅድ ጋር የሚጣጣሙ አዳዲስ ስምምነቶች እንዲደረጉም ጠይቀዋል።
የኢኖቬሽንና ቴክኖሎጂ ሚኒስቴር

የፊልም ተዋንያን የውጭ ቋንቋዎችን በብቃት እንዲናገሩ የሚያስችለው ቴክኖሎጂ
=============================
የትወና ተዕይንቶች ወይም ፊልሞች በውጭ ቋንቋ ተተርጉመው ቋንቋውን ለማይረዱ ሰዎች ተዘጋጅተው ሲቀርቡ ተመልከተናል፡፡ ይሁንና አብዛኛውን ጊዜ የትርጉም ስራውን ለሚሰሩ ብዙ ባለሙያዎች የተዋንያኑን የከንፈርና የፊት እንቅስቃሴን ከትርጉሙ ጋር በትክክል ለማጣጣም አስቸጋሪ ይሆንባቸዋል፡፡ ይህን ችግር ለመቅረፍ ጥቅም ላይ የዋለው የዲፕፌክ ቴክኖሎጂ የትወና ትዕይንቲች በመደበኛ ቋንቋቸው የተሰሩ እስከሚስል ድረስ ተዋንያን የውጭ ቋንቋዎችን በብቃት እንዲናገሩ የሚያስችል ነው፡፡
የአርተፊሻል ኢንተለጀንስ ስርዓትን መሰረት አደርጎ የሚሰራው አዲሱ ቴክኖሎጂ የፊልም ትዕይንቶችና ድራማዎች ወደ ውጭ ቋንቋዎች ተተርጉመው የሚሰሩበትን ነባር አሰራር ይበልጥ እንደሚለውጥና እንደሚያዘምን ይጠበቃል፡፡ ቴክኖለጂው እንግሊዝ ውስጥ መቀመጫውን ባደረገ ፍሎውለስ በተሰኘ ኩባንያ የበለፀገ ሲሆን ማንኛውም የፊልም ትዕይንቶች ላይ ያለ ንግግርን ተዋናዩ እንደራሱ ቋንቋ እንዲናገራቸውና እንዲተውን የሚያስችል ነው፡፡ በኩባንያው ድረገፅ እንደ ሳምፕል የተቀመጠው በእግሊዘኛ የተሰራ የፊልም ትዕይንት፤ ፍፁም በሌላ ቋንቋ የተሰራ በሚመስል መልኩ ተዋኒያኑ የፈረንሳይ፣ ጀርመን እና ጃፓን ቋንቋዎችን አስመስለው ሲናገሩ ፊልሙ በእንግሊዘኛ ሳይሆን በእነዚህ ቋንቋዎች ተሰርቶ የቀረበ ሊመስል ይችላል፡፡
ስኮት ማን በተባለ ግለሰብ የተመሰረተው ይህ ኩባንያ ከድምጽና ምስል ቀረጻ በኋላ የሚኖሩ የቮይስ ኦቨር (voiceovers) ማስተካከያዎችን እና የደቢንግ (Dubbing) አሰራሮችን በአርተፊሻል ኢንተለጀንስ በመታገዝ ለማሳደግ እና ብዙ ግዜ በትርጉም ስራዎች ላይ የሚከሰተውን የከንፈር ማስመሰል (lip-sync) ችግሮችን ለማስቀረት ያለመ ነው፡፡ የኩባንያው ዳይሬክተር ስኮት ማን እንደሚናገሩት ሰዎች ይህን ቴክኖሎጂ ተጠቅመው መሰል የፊልም ትዕይንቶችን ሲመለከቱ ፊልሙ በመደበኛነት በየትኛው ቋንቋ እንደተሰራ እስኪያጠራጥራቸው ድረስ በሚሰሙት ቋንቋ የተሰራ ትዕይንት ሊመስላቸው ይችላል ይላሉ፡፡
ከቅርብ ጊዜ ወዲህ ሰዎች በዚህ የዲፕፌክ ቴክኖሎጂ በመታገዝ ማንኛውንም ምሰል እና ቪዲዮ ወደሚፈልጉት ባህሪና ቅርፅ መለወጥ የሚችሉበት ደረጃ ላይ የደረሱ ሲሆን፤ አንዳንዶች ይህ ቴክኖሎጂ በተገቢው ሁኔታ ካልተያዘ ጥልቅ ማጭበርበሮችና ማሳሳቻዎች በሕብረተሰቡ ላይ ሊያስከትል እንደሚችል ሲያስጠነቅቁ ይሰማል፡፡ በተለይም ብዙ ተከታይ ባላቸው ታዋቂ ሰዎች ላይ መሰል የማጭበርበሪያ ቪዲዮዎችን በመልቀቅ ለእኩይ ኣላማና ፕሮፖጋንዳ ሊውል የሚችልበት እድል እንዳለ ብዙዎች ሲገልፁ ይሰማል፡፡
https://wonderfulengineering.com/this-new-ai-can-make.../