የአሜሪካን አየር ኃይል በዓይነቱ የተለየ ራስ ገዝ አውሮፕላንን ሞከረ
=======================
የአሜሪካን አየር ኃይል በተገጠመለት ሶፍትዌር እና ሀርድዌር አማካኝነት በራሱ የሚንቀሳቀሰውንና ስካይቦርግ ተብሎ የተሰየመውን ሰው አልባ በራሪ ባሳለፍነው ወር ለመጀመሪያ ጊዜ መሞከሩ ተነገረ፡፡ ጦር ኃይሉ በዚህ ቴክኖሎጂ አማካኝነት በሰው ልጅ አማካኝነት በሚንቀሳቀሱና ሰው አልባ በሆኑ አውሮፕላኖች አማካኝነት ያለውን ቅንጅት ለማሳደግ ያለመ ነው።
በፍሎሪዳው የቲንዳል የአየር ኃይል ማዕከል ውስጥ ለ130 ደቂቃዎች ያህል በተደረገው የሙከራ በረራ ደህንነቱ መጠበቁን የሚያመላክቱት የአዲሱ አውሮፕላን መሰረታዊ ባህርያት ተገምግመውበታል፡፡ አውሮፕላኑም በተቀመጠለት የከባቢ ወሰን (geo-fences) ውስጥ በመቆየት የጉዞ ትዕዛዝ ሲቀበልና የተቀናጁ እንቅስቃሴዎችን ሲከውን ቆይቷል፡፡
የአሜሪካን አየር ኃይል የምርምር ቤተ-ሙከራ በሰው የሚንቀሳቀሱ አውሮፕላኖችን ሙሉ በሙሉ የሚተኩ ግን ደግሞ በሰው አማካኝነት መንቀሳቀስን እንደ አማራጭ የያዙ አውሮፕላኖችን ለመስራት በመንቀሳቀስ ላይ ነው።
አዲሱ አውሮፕላንም የወደፊቱ የስካይቦርግ ቴክኖሎጂ ማዕከል እንዲሆን የሚጠበቅበት ሲሆን በሌላ አጠራር አውቶኖሚ ኮር ሲስተም (ACS) በሚል ስያሜ በሚታወቁት ሰው አልባ አውሮፕላኖች ላይም ያለውን ዕምነት ለመገንባት እንደሚረዳ ተነግሮለታል፡፡
የአሜሪካን አየር ኃይል የምርምር ቤተ-ሙከራ በመጪዎቹ ጊዜያት ውስጥ አውቶኖሚ ኮር ሲስተምን ተጠቅመው በሚንቀሳቀሱትን አውሮፕላኖች ላይ ጭምሮ የተለያዩ ሙከራዎችን ለማድረግ አቅዷል፡፡ ከዚህ ጋር በተያያዘም ስካይቡርግን የፈበረከው ቡድን ሰው አልባ አውሮፕላኖቹ ተልእኮዎችን ሙሉ በሙሉ በራሳቸው የሚወጡና ይህን ሲያደርጉም ኪስን በማይጎዳ መልኩ እንዲሆን ያልማል፡፡ በጠቅላላው ቴክኖዎሎጂው ጦር ሜዳ ላይ ውሳኔዎችን በኮምፒውተር ፍጥነት መስጠት እንዲችልና የሰው ልጅ ይሆኑት ወታደሮችን ህይወትም መጠበቅ እንዲችል ታልሞ የተሰራ ነው።
ምንጭ፤ Tech Xplore
ለተጨማሪ፤ https://techxplore.com/.../2021-05-air-autonomous-drone...

ወደ የትኛውም የአለማችን ክፍል በ4 ሰዓት ውስጥ በ100 ዶላር
********************************
ቡም ሱፐር ሶኒክ የተሰኘው ፈጣን የአየር መንገድ ወደ የትኛውም የአለማችን ክፍል በ4 ሰዓት ውስጥ በ100 ዶላር ሰዎችን ለማድረስ ዝግጅቱን መጨረሱ ተሰማ፡፡ በአሁኑ ወቅት የበረራ ኢንዱስትሪው በትልቅ ኪሳራ ውስጥ ሲሆን ከካርቦን ልቀት ጋር የተያያዘ ችግርን ጨምሮ ብዙዎቻችን የአየር በረራን የመጠቀም ልምዳችን ዝቅተኛ ነው፡፡ ከኮንኮርድ መዳከም ጋር ተያይዞ ተቀዛቅዞ የነበረው የከፍተኛ ፍጥነት የአየር ትራንስፖርት በቡሙ ሱፐርሶኒክ ትልቅ ህልም ማንሰራራት ጀምሯል፡፡
በእንግሊዝና ፈረንሳይ ጥምረት ተቋቁሞ የነበረው ኮንኮርድ ፈጣን የአየር ትራንስፖርት በዘርፉ ከ1969 እስከ 2003 የቆየ ሲሆን ዋጋው የማይቀመስና ለከባቢ አየር ከፍተኛ ጠንቅ ነበር፡፡ አሁን ቴክኖሎጂው እያደገ የፈጠራ ሙያተኞች ከአካባቢ ጋር የተስማሙና በተመጣጣኝ ዋጋ አገልግሎት የሚሰጡ ሱፐርሶኒክ እና ሀይፐርሶኒክ የአውሮፕላን ፕሮጀክቶችን ቀርጸው እየሰሩ ነው፡፡
ሲኤንኤን ትራቭል ከድርጅቱ ሀላፊ ጋር አደረግኩት ባለው የመረጃ ልውውጥ ፕሮጀክቱ በ2026 መደበኛ ስራ ለመስራ ወደ አየር እንደሚወጣ አሳውቋል፡፡ የድጅቱ ሀላፊ የሆኑት ብሌክ ስኮል ሌሎች የረጅም ጊዜ እቅዶች እንዳሏቸውና እስካሁን በበረራ ዘርፍ ባልታየ ፍጥነት አገልግሎት ለመስጠት መዘጋጀታቸውን አሳውቀዋል፡፡
እነዚህ ከ65 እስከ 88 ተጓዦችን ማስተናገድ እንዲችሉ ታስበው ዲዛይን የተደረጉት ፈጣን አውሮፕላኖች ውቅያኖስ አቋርጠው የሚጓዙ ናቸው፡፡ በፍጥነት ደረጃም ከሎሳንጀለስ ወደ ሲድኒ ስምንት ሰዓት ተኩል ብቻ የሚጨርስ ይሆናል፡፡ ይህ በመደበኛ በረራ አስራ አምስት ሰዓት ከ10 ደቂቃ የሚወስድ ነው፡፡
ምንጭ CNN
ተጨማሪ ንባብ https://edition.cnn.com/.../boom-supersonic.../index.html...

ወጣት የፈጠራ ባለሙያዎችን ያሰባሰበው የቴክኢን ቅድመ ኢንኩቤሽን ፕሮግራም ተጀመረ
=================
የቴክኖሎጂ እና ኢኖቬሽን ኢንስቲትዩት ያዘጋጀውና የአራት ቀናት ቆይታ የሚኖረው ቅድመ ኢንኩቤሽን ፕሮግራም ዛሬ በይፋ ተጀመረ፡፡ ከተለያዩ የትምህርት ደረጃ እና ሙያ ዘርፍ የተውጣጡ የፈጠራ ባለሙያዎችን በማሳተፍ የተካሄደው ይህ ፕሮግራም ተሳታፊዎቹን በማንኛውም የኢንኩቤሽን ፕሮግራም ውስጥ ተሳታፊ ለመሆን ብቁ የሚያደርጋቸውና ሀሳባቸውንም ወደ ቢዝነስ እንዲለውጡ የሚያስችላቸው ነው፡፡
ኢትዮጵያ የፈጠራ ሀሳባቸውን ወደ ተግባር መለወጥ የሚችሉ ሰዎች እንዳላት ይታመነናል ያሉት የቴክኖሎጂ እና ኢኖቬሽን ኢንስቲትዩት ም/ዋና ዳይሬክተር ኢ/ር ተሾመ ሳህለማርያም እነዚህን ሰዎች የማሰባሰቡን ድርሻ ኢንስቲትዩታቸው ወስዶ እየሰራ መሆኑን ገልፀዋል፡፡ ብዙዎቹ ታላላቅ ምጣኔ-ሐብትን መገንባት የቻሉት ሀገራት ለስኬት የበቁት በትምህርት እና የፈጠራ ሀሳብ ላይ በመስራታቸው መሆኑን ያወሱት ኢ/ር ተሾመ የዝግጅቱ ተሳታፊዎችም የፈጠራ ሀሳባቸውን በአግባቡ አንፀው ወደ ቢዝነስ ሀሳብ በመለወጥ በዓለም አቀፍ ደረጃ ተፎካካሪ የሆነ ቢዝነስ መገንባት እንዳለባቸው በዚሁ የመክፈቻ ንግግራቸው አሳስበዋል፡፡
በዛሬው መሰናዶ ላይ በክብር እንግድነት በመገኘት ለተሳታፊ የፈጠራ ባለሙያዎቹ የማነቃቅያ ንግግር ያቀረበው ወጣቱ የፈጠራ ባለሙያ እንዲሁም የአይከን አፍሪካ መስራችና ዋና ስራ አስፈፃሚ የሆነው አቶ ኢዘዲን ከሚል ነበር፡፡ እርሱ ባይኖር ኖሮ የራሴን ድርጅት መመስረትም ሆነ አሁን ባለውበት ደረጃ ለመድረስ አልችል ስነበር “ኮቪድ ለእኔ ትልቅ ዕድል ነው” ያለው አቶ ኢዘዲን ተሳታፊ የፈጠራ ባለሙያዎቹም የሚገጥሟቸው ተግዳሮቶችን ወደ እድል እንዲለውጡ ምክሩን ለግሷል፡፡ አያይዞም የኮቪድ 19 ወረርሺኝን የተመለከቱትን ጨምሮ እሳካሁን በአራት ዘርፎች 36 የተለያዩ ፈጠራና ምርቶችን መስራት መቻሉን እና ከነዚህ ውስጥም 13 ያህሉን በፓተንት ማስመዝገብ መቻሉን ለተሳታፊዎች አሳይቷል፡፡
ከነዚህ በተጨማሪም በዛሬው መርሀ ግብር የኢንስቲትዩቱ ተመራማሪ በሆኑት አቶ ሙሉጌታ አንበሳ፣ አቶ አባይሰው አየለ፣ አቶ በላቸው አለማየሁ እና አቶ አብዱለጢፍ ሀቢብ በተለያዩ ጉዳዮች ዙርያ ገለፃ ቀርቧል፡፡ አቶ አባይሰው የሰው ልጅ ስላለፈባቸው የፈጠራ ሂደቶች፣ የኢኖቬሽን ምንነት፣ በሀገራችን ያሉ መፍትሄ የሚያሻቸው ተግዳሮቶች እንዲም በአሁኑ ሰዓት ዓለምን በከፍተኛ ደረጃ እየመሩ ባሉት እንደ ቢግ ዳታ ኮምፒውቲንግ፣ ዲኤንኤ ባዮቴክኖሎጂ፣ ብሎክቼይን የመሳሰሉ ቴክኖሎጂዎች ላይ ያተኮረ ገለፃን አቅርበዋል፡፡ አቶ በላቸው በበኩሉ የኢትዮጵያ የሳይንስ፣ ቴክኖሎጂ እና ኢኖቬሽን ፖሊሲ፣ የቴክኖሎጂ ሽግግር፣ እና በኢትዮጵያ ስላለው የኢኖቬሽን ገፅታና ተግዳሮት ያብራራ ሲሆን የቴክኖሎጂ እና ኢኖቬሽን ኢንስቲትዩት ምንነት፣ ምስረታና ተግባራት እንዲሁም በቅድመ ኢንኩቤሽን ፕሮግራሙ ላይ ያተኮረውን ገለፃ ደግሞ አቶ ሙሉጌታ አማካኝነት አቅርቧል፡፡
በፕሮግራሙ ላይ የተሳተፉት ወጣት የፈጠራ ባለሙያዎች የፈጠራ ሀሳብ ያላቸው ሆነው የሀሳባቸው ጥንካሬ ላይ ምልከታን ባደረገ ውድድር አማካኝነት የተመለመሉ ናቸው፡፡ ይህ ፕሮግራምም ከላይ ከተገለፁት ዓላማዎች ባሻገር ይህ ሀሳባቸውን እንዲያንፁና ወደ አዋጭ ቢዝነስነት እንዲለውጡ የሚያስችላቸው ስለመሆኑ በአዘጋጆቹ ተነግሯል፡፡

ህንፃዎችን ወደ ግዙፍ ኃይል ማከማቻነት የሚለውጠው አዲሱ የሲሚንቶ ባትሪ
=======================
በአንድ የስዊድን የኒቨርሲቱ ተመራማሪዎች የተሰራው ጥናት ባትሪዎችን ከሲሚንቶ በማምረት ህንፃዎችን ወደ ግዙፍ ኃይል ማከማቻነት ለመለወጥ አልሟል፡፡ በቻልመርስ ዩኒቨርሲቲ የኪነ-ህንፃ እና ሲቪል ምህንድስና ትምህርት ክፍል አማካኝነት የተሰራው ይህ ምርምር እንደሚያመላክተው የሲሚንቶ ባትሪዎቹን ለመጀመሪያ ጊዜ እንደማንኛውም ባትሪ ቻርጅ እያደረጉ መጠቀም የሚቻል ሲሆን ባትሪዎችን ከታዳሽ/ዘላቂ ምንጮች ማግኛ መንገድ ተደርጎም ተወስዷል፡፡
ከተለያዩ ሙከራዎች በኋላ ተመራማሪዎቹ የደረሱበት ሰርቶ ማሳያ ይህን ይመስላል፤ በሲሚንቶ የሚሰራ ውህድ ውስጥ የተወሰኑ ካርበን ፋይበሮችን በመጨመር ኤሌክትሪክ የማስተላለፍ ብቃቱ እና የመተጣጠፍ ጥንካሬው እንዲያድግ ተደርጓል፡፡ በውህዱ መሃልም በብረት የተለበጠ የካርበን ፋይበር ድር በአኖዶቹ ላይ የሚጠቀም ይሆናል፡፡
ከዚህ ቀደም በሲሚንቶ የተሰሩ ባትሪዎች እጅግ አነስተኛ ብቃት ማሳየታቸውን የምትናገረው የምርምሩ ተሳታፊ ዶ/ር ኤማ ዣንግ ሌላ ኤሌክትሮዶችን ማምረቻ ዘዴ መፈለግ እንደነበረባቸው ትናገራለች፡፡ በዚህም ስኬታማ መሆናቸውንና በዓለማችን የመጀመሪያው ተደጋግሞ ቻርጅ መደረግ የሚችል የሲሚንቶ ባትሪ በቤተ-ሙከራ ውስጥ ሰርተው ማሳየታቸውን አስቀምጣለች፡፡
ዶ/ር ኤማ እና ፕ/ር ሉፒንግ ታንግ የሰሩት ይህ የሲሚንቶ ባትሪ በአንድ ካሬ ሜትር የሰባት ዋትሀወር ወይም በሊትር 0.8 ዋትሀወር እፍጋት አለው፡፡ ይህን ከግምት ወስደን ከቀድሞዎቹ የሲሚንቶ ባትሪ ሙከራዎች ጋራ ስናነፃፅረው አዲሱ ባትሪ በ10 እጥፍ የላቀ ብቃትን ይዞ እናገኘዋለን፡፡ ምንም እንኳን ይህ ብቃት ከሌሎቹ ተለምዶአዊ ባትሪዎች አንፃር አሁንም አነስተኛ ሊባል የሚችል የኃይል ክምችት ብቃት ቢሆንም ባትሪው እራሱ ህንፃውን ሆኖ የሚሰራ በመሆኑ ይህ ችግር የሚሆን አይመስልም፡፡
አሁን ላይ ቴክኖሎጂው ገና ጅማሬው ላይ በመሆኑ ብዙ ጥያቄዎችን መመለስ ይኖርበታል፡፡ ለምሳሌ አንድ የኮንክሪት ህንፃ ከ50 እስከ መቶ ዓመታት ድረስ መቆየት የሚችል በመሆኑ ባትሪውም እየታደሰ ከህንፃው እኩል ዕድሜ መዝለቅ የሚችልበትን መንገድ መፈለግ አለበት፡፡
ታድያ ቴክኖሎጂው ወደፊት ስኬታማ ሆኖ የሚቀጥል ከሆነ ዘርፈ ብዙ ግልጋሎቶችን ማቅረብ ይቻለዋል፡፡ በዚህም እንደ ድልድይ ባሉ መሰረተ ልማቶች ላይ ለሚገጠሙ የቁጥጥር ስርዓቶች የኃይል ምንጭ ሆኖ የማገልገል አቅም አለው፡፡
ምንጭ፤ Tech Xplore
ለተጨማሪ፤ https://techxplore.com/.../2021-05-world-concept...

የቅድመ ኢንኩቤሽን ስልጠና ሁለተኛ ቀን
**************************
በቴክኖሎጂና ኢኖቬሽን ኢንስቲትዩት አዘጋጅነት በተለያየ ደረጃ ላሉ የፈጠራ ሙያተኞች እየተሰጠ ያለው የክህሎት ማበልጸጊያ ስልጠና ዛሬም በተለያዩ ርእሰ ጉዳዮች ቀጥሎ ውሏል፡፡ በዚህ በሁለተኛው ቀን መርሃ ግብር ከዜሮ እስከ ዚሊዮን፣ የፈጠራ ስነ-አእምሯዊ ዝግጅት፣ ሀሳብ ማፍለቅና መመዘን በሚሉ ርእሰ ጉጉዮች በዘርፉ የካበተ ልምድና እውቀት ባላቸው ሙያተኞች ገለጻ ቀርቧል፡፡
በመጀመሪያው ርእሰ ነገር የአዲስ አበባ ዩኒቨርሲቲ መምህርና የፋብ ቤተ-ሙከራ ማናጀር የሆነው ሐብታሙ ገብረ መስቀል አማካኝነት ገለጻ የቀረበ ሲሆን በገለጻውም ውስጥ ርዕይ አልሞ ግብ ስለማስቀመጥ፣ ይህንን ግብ እውን ለማድረግ የሚኬድባቸው መንገዶችና የሚያጋጥሙ ችግሮችን የሚመለከቱ ሀሳቦች ቀርበዋል፡፡ በዚህም ለእለቱ የመጀመሪያ በሆነው ገለጻ ላይ ከተሳታፊዎች የተለያዩ ጥያቄዎች ተነስተው በአቅራቢው ምላሽ ተሰጥቶባቸዋል፡፡
ለእለቱ ሁለተኛ የሆነው ርእሰ ጉዳይ ደግሞ በተለያዩ የአለማችን ክፍሎች የተለያዩ ትምህርቶችን በመማር ከፍኛ ውጤት ማስመዝገብ የቻለውና የቻፓ መስራች የሆነው ናኤል ሀይለማርያም የቀረበ ሲሆን ትኩረቱንም የፈጠራ ስነ-አእምሯዊ ዝግጅት ላይ ያተኮረ ነው፡፡ በዚህም ገለጻ ተሳታፊዎች የተለያዩ ክህሎቶችን ማዳበር የሚችሉባቸውን መንገዶችና የያዙትን ሀሳብ እንዴት ትርጉም ወዳለው ችግር ፈች መፍትሔ መቀየር እንደሚችሉ የሚያመላክቱ ሀሳቦች ቀርበዋል፡፡
የእለቱ ስልጠናም በተያዘለት መርሃ ግብር የቀጠለ ሲሆን በእለቱ በቀረቡት ርእሰ ጉዳዩች ሰልጣኞች የፈጠራ ክህሎታቸውን ማዳበር የሚያስችላቸውን ቁም ነገር ይጨብጣሉ ተብሎ ይጠበቃል፡፡

በአለማችን የሚገኙ አእዋፋት ብዛት
**********************
ጥያቄው የእብደት ቢመስልም በ2015 ኮሬይ ካላግሃን የተባለ የስነ ህይወት ተመራማሪ አንድ ቀን ጠዋት ከፍተኛ ቁጥር ያላቸው የወፍ መንጋዎች በዛፎች ላይ ሲያርፉ እና ዛፎቹ በአእዋፋቱ ሲዋጡ ከጓደኛው ጋር ተመልክተው እጅግ በጣም ተደነቁ፡፡ ከዚያም ለመሆኑ በአለማችን የሚገኙት አእዋፋት ስንት ይሆናሉ የሚል ጥያቄ መጣባቸው፡፡ ከዚያም ጊዜ ሳያጠፋ ካላግሃን እየተመለከተ ያለውን የአእዋፋት ስብስብ በመቁጠረር ስራውን ጀመረ፡፡
በመጀመሪያውም ቆጠራ ከግማሽ ሚሊዮን በላይ አእዋፋትን መቁጠር ቻለ፡፡ ይህንንም ለማድረግ አእዋፋቱ የሰፈሩባቸውን ዛፎች በተለያየ አቅጣጫ ፎቶግራፍ በማንሳት እና የተለያዩ ልኬቶችን የመስራት ስልትን ተጠቅሟል፡፡ ምንም እንኳን በአለማችን የሚገኙ አእዋፋትን ቆጥሮ መጨረስ የማይታሰብ ነገር ቢሆንም ባዮሎጂስቱ ግን ከአንድ አመት በኋላ አንድ አስገራሚ ቁጥርን ማግኘቱን አሳውቋል፡፡ በአውስትራሊያዋ ሲድኒ ኒው ሳውዝ ዌልስ ዩኒቨርሲቲ አማካኝነት ይፋ የተደረገው ቁጥርም 50 ቢሊዮን 428 ሚሊዮን ወፎች በምድር ላይ ይገኛሉ የሚል ነው፡፡
ጥናቱም ቀጥሉ አእዋፋቱን በየዝርያቸው የተጠኑ ሲሆን በዐለማችንም የሚገኙትን የአእዋፋት ዝርያዎች 92 በመቶ መሸፈን እንደተቻለ ተመራማሪዎቹ አሳውቀዋል፡፡ ምርምሩም በተለያዩ አስርት አመታት ውስጥ እየቀነሰ ያለውን የአእዋፋት ዝርያ መጠን መገመት የሚያስችልም ሆኗል፡፡
ምንጭ national geographic
ተጨማሪ ንባብ https://www.nationalgeographic.com/animals/article/how-many-birds-are-there-in-the-world-science-estimates?cmpid=org=ngp::mc=social::src=facebook::cmp=editorial::add=fb20210518animals-howmanybirds&sf245997971=1&fbclid=IwAR1vUUnpV8WUsy5JpWniJ_JJa3VVZdzChO2kc0HLT8aUirc8ZH_Aak5QrvE

ዝነኛው የዳርዊን ቅስት ፈረሰ
================
በኢኳዶሩ የጋላፓጎስ ደሴቶች የሚገኘው ዝነኛው የዳርዊን ቅስት (አርች) የላይኛው ክፍል መውደቁ ተዘግቧል፡፡ ከአቅራብያው የብስ ክፍል 1 ኪ.ሜትርን ርቆ በዳርዊን ደሴት ላይ የሚገኘው ቅስቱ ተፈጥሮአዊ በሆነ መሸርሸር ምክንያት ነው ለመውደቅ የበቃው፡፡
የተፈጥሮ ቅስቱ ስያሜውን ያገኘው ለታዋቂው እንግሊዛዊ ባዮሎጂስት ቻርለስ ዳርዊን መታሰብያ ይሆን ዘንድ ነው፡፡ ይህም እርሱ በአውሮፓውያኑ 1830ዎቹ ጅማሮ ላይ በጋላፓጎስ ደሴቶች ላይ ሳለ ዝግመተ ለውጥን ከማጥናቱ ጋር በተያያዘ ነው፡፡ አሁን ላይ ታድያ የቅስቱ የላይኛው ከፍል መውደቁን ተከትሎ አንድ አስጎብኚ ድርጅት የተቀሩት ሁለት ቋሚ ክፍሎቹን “የዝግመተ ለውጥ ምሰሶዎች” ሲል መጥራት ጀምሯል፡፡
ዳርዊን ደሴት በእሳተ ገሞራ አማካኝነት የተፈጠረና ከባህር ወለል በታች የ10 ሜትር ጥልቀት ያለው ድንጋያማ ደሴት ነው፡፡ ደሴቱ እንደየወቅቱ እጅግ ከፍተኛ መጠን ባላቸው የሻርክና ሌሎች አሳ ዝርያዎች በስፋት እንደሚሞላ ከዚህ ቀደም የተሰሩ ጥናቶች አመላክተዋል፡፡ ከነዚህ የአሳ ዝርያዎች መካከል የሀመርሄድና ሌሎች የሻርክ አይነቶች፣ የባህር ኤሊዎች፣ ማንታ ሬዮች እንዲሁም ዶልፊኖች ይገኙበታል፡፡
አካባቢው በተለይም የባህር ውስጥ ህይወትን ለመቃኘትና እና ቅስቱን ፎቶግራፍ ለማንሳት በሚሹ ሀገር ጎብኚዎች የሚዘወተር ነው፡፡ የዳርዊን ቅስት የሚገኝበት የጋላፓጎስ ደሴቶችን የከበበው የባህር ክፍልም በስፍራው ለተሰባሰበው የባህር ህይወት ሲባል ተከልሎ ጥበቃ የሚደረግለት ሲሆን በተባበሩት መንግስታት የትምህርት ሳይንስ እና ባህል ድርጅት (ዩኔስኮ) አማካኝነትም በቅርስነት የተመዘገበ ተፈጥሮአዊ ሐብት ነው፡፡
ምንጭ፤ Live Science
ለተጨማሪ፤ https://www.livescience.com/darwin-arch-collaspes-in...