አርባ ቀናት በዋሻ ውስጥ
*************
ምንም አይነት የቀን ብርሃንና የሰዓት መቆጣጠሪያ ሳይኖራቸው ለአርባ ቀናት ያክል በዋሻ ውስጥ የቆዩ ሰዎች ከዋሻ ሲወጡ ለ30 ቀናት ያክል ብቻ እንደቆዩ እንደተሰማቸው ተናገሩ፡፡ ይህ የሆነው በፈረንሳይ የሚገኙ ራሳቸውን ከቀን ብርሃንና ከውጨኛው አለም ለማግለል በማሰብ ወደ ዋሻ በገቡ ሰዎች ነው፡፡ ሰዎቹ ወደ ዋሻ ሲገቡ የብርሃን መስተካከል እንዲኖር በማሰብ በቅድሚያ የጸሐይ መነጸር ለብሰው ገብተዋል፡፡ ከጥቂት ቆይታ በኋላ ግን ጊዜን መቆጣጠር እንዳልቻሉ ተናግረዋል፡፡
በዋሻ ውስጥ ሳሉ ብርሃን ለማጋኘት እዲያስችላቸው በፔዳል የሚሰራ የሐይል ማመንጫ የተጠቀሙ ሲሆን የሚጠጣ ውሃም ከዋሻው 45 ሜትር ርቀት ውስጥ እየቀዱ እንደተጠቀሙ ተናግረዋል፡፡ ከዚህ ውጭ ምንም አይነት ስልክም ሆነ ሌላ ብርሃን ያለውና ጊዜን ሊያሳውቅ የሚችል ቁስ አልያዙም፡፡
ተመራማሪዎች የፈቃደኞቹን አካላዊ፣ ስነ-ልቦናዊና ጤና ነክ ሁኔታዎች ከመግባታቸው በፊት የመዘገቡ ሲሆን በዋሻ ውስጥ ሳሉም ከአዲሱ አካባቢ ጋር ባላቸው መስተጋብር የነበራቸውን ግብረ-መልስ መዝግበዋል፡፡ አንዳንድ ፈቃደኞች የአእምሮ እንቅስቃሴያቸውን የሚቆጣጠርና የሚመዘግብ መሳሪያ ተገጥሞላቸው ነበር፡፡
ፕሮጀክቱ አላማ ያደረገው የሰው ልጅ የተለዩና ያልተለመዱ አካባቢዎች ለውጥ የሚኖርበት ሁኔታ ቢገጥመው የሚኖረውን ምላሽና መላመድ ለማጥናት ነው፡፡
ምንጭ፡ iflscience
ተጨማሪ ንባብ https://www.iflscience.com/.../a-group-of-people-just.../...

የአየር ማረፊያን የፀሐይ ሐይልን ለመሰብሰብ
***************************
አንድ ጥናት በአውስትራሊያ የሚገኝ አንድ የአየር ማረፊያ በአካባቢው ለሚገኙ 136 ሺህ ቤቶች የሚሆን የኤሌክትሪክ ሀይልን ከፀሐይ ማመንጨት እንደሚችል አመለከተ፡፡ በአውስትራሊያ የተለያዩ አካባቢዎች አነስተኛና መካከለኛ የፀሐይ ሐይል መሰብሰቢያ ንጣፎች የሚገኙ ሲሆን ጥቂት ለማይባሉ ቤቶች አማራጭ የሐይል ምንጭ ናቸው፡፡ ይሁን እንጂ የታዳሽ ሐይል ፍላጎትን ለማሟላት እንዲቻል በአየር ማረፊያዎች ሰፋፊ የሆኑ ንጣፎችን መትከል አሁን ላይ በከተሞች እየተሰበሰበ ካለው የፀሐይ ሐይል 10 እጥፍ መሰብሰብ እንደሚያስችል RMIT የተባለ ዩኒቨርሲቲ ተመራማሪዎች አሳውቀዋል፡፡
ከካርቦን ነጻ ለመሆን የሚደረገው ጥረት በትንንሽ ንጣፎች በሚሰበሰብ ታዳሽ ሐይል ብቻ የሚሳካ ባለመሆኑ ከፍተኛ ይዞታ ያላቸው የፀሐይ ሐይል መሰብሰቢያ ንጣፎችን መትከልና ከፍ ያለ መጠን ያለው ታዳሽ ሐይል መሰብሰብ አስፈላጊ ነው ሲሉ የዩኒቨርሲቲው ተመራማሪ ዶክተር ቻይን ሰን ተናግረዋል፡፡ ዶክተሯ አክለውም ይህ ምርምር የተለያዩ የፖሊሲ አማራጮች ታሳቢ እንዲሆኑና በእያንዳንዱ ከፍተኛ የግንባታ ስራ በሚሰራበት አካባቢ ሰፋፊ የፀሐይ ሐይል መሰብሰቢያ ንጣፎችን መትከል የግሪን ሀውስ ጋዝ ልቀትን ለመቀነስ ያስችላል ሲሉ ተናግረዋል፡፡
ለእንደዚህ አይነት ግዙፍ የፀሐይ ሐይል መሰብሰቢያ ፕሮጀክት የአየር ማረፊያዎች ወሳኝና ተመራጭ አካባቢዎች ናቸው ያሉት ተመራማሪዎቹ ለዚህም እንደ ምክንያትነት ያቀረቡት ኤርፖርቶች በትልልቅ ህንጻዎች፣ በዛፎች ወይም በሌላ የፀሐይ ብርሃንን ሊከልል በሚችል ነገር የማይሸፈኑ መሆናቸው ነው፡፡ ኤርፖርት አካባቢ ያልተከለለ ፀሐይ የሚገኝበት አካባቢ ነው፡፡
በምርምር ሂደቱ ጊዜ የፀሐይ ሐይል መሰብሰቢያ ንጣፍን ለማንጠፍ የሚያስችሉ የቤት ጣሪያዎችን የመለየት ስራ የተሰራ ሲሆን በዚህም 2.61 ኪሎ ሜትር ስኩየር ቦታን መለየት ተችሏል፡፡ ለዚህም ስራ እንደ ፐርዝና ሜልቦርን ያሉ ኤርፖርቶች እጅግ ምርታማ ሆነው ተገኝተዋል፡፡
ምንጭ techxplore
ተጨማሪ ንባብ https://techxplore.com/.../2021-04-airports-solar-energy...

አፕል ወደ መኖርያ ከተማችን እየመጣ ነው
=====================
አፕል ሚውዚክ በመኖርያ ከተሞቻችን በቀዳሚነት እየተደመጡ ያሉ ሙዚቃዎችን ዝርዝር ማቅረብ ሊጀምር መሆኑን አስታውቋል፡፡ ምንም እንኳን አሁን ላይ አገልግሎቱ በአዲስ አበባም ሆነ ሌሎች የኢትዮጵያ ከተሞች ማግኘት ባይቻልም ኒው ዮርክ፣ ቶኪዮ እና ሌጎስን ጨምሮ በተወሰኑ የአለማችን ከተሞች ላይ የሚሰራ ይሆናል፡፡
አፕል ትናንት በአገልግሎቱ ተደራሽ ይሆናሉ ያላቸውን ከ100 በላይ ከተሞች ይፋ ያደረገ ሲሆን፤ በእነዚህ ከተሞች ውስጥም በእያንዳንዳቸው በቀዳሚነት ተከፍተው እየተደመጡ ያሉ የ25 ሙዚቃዎችን ዝርዝር ያሳያል፡፡ አገልግሎቱን በቅድሚያ ከሚያገኙት መካከል 25 የሚሆኑት እንደ ሎስ አንጀለስ፣ ቫንኩበር፣ ቶሮንቶ፣ ቺካጎ ማያሚና ኒው ዮርክ ያሉት የሰሜን አሜሪካን ከተሞች ይሆናሉ፡፡ በአውሮፓም ፓሪስ፣ በርሊን፣ ደብሊን፣ ሮም፣ ማድሪድ፣ ለንደን እና ሌሎች ዋና ዋና ከተሞች የአገልግሎቱ ተደራሾች ናቸው፡፡
አገልግሎቱ ከምዕራቡ ባሻገር የተወሰኑ የአፍሪካ እሲያና ደቡብ አሜሪካን ሀገራት ላይም እንዲሰራ ተደርጓል፡፡ በዚህም መሰረት ናይሮቢ እና ጆሀንስበርግ ከአፍሪካ፣ ሲኦል፣ ባንኩክ እና ማኔላ ከእሲያ፣ ሪዮ ዴ ጄኔሮ እና ቦጎታ ከደቡብ አሜሪካን እንዲሁም ቴል አቪቭ፣ ኢስታንቡል እና ዱባይ ከመካከለኛው ምስራቅ ተመራጭ ከተሞች ሆነዋል፡፡
አፕል ሚውዚህ ከዚህም ባሻገር በዓለም አቀፍ ደረጃ በቀዳሚነት እየተደመጡ ያሉ የሙዚቃ አልበሞችን የሚያሳይበት የሙዚቃ ሰንጠረዥ እንዳለው ይታወሳል፡፡
ምንጭ፤ Tech Xplore
ለተጨማሪ፤ https://techxplore.com/.../2021-04-apple-music-city...

የ 4 ዓመቷ ህጻን በእድሜ ትንሿ የማይክሮሶፍት ባለሙያ ሆናለች
==========================
ከፓኪስታን የተገኘችው የአራት አመት ህፃን ኤሪሽ ፋጢማ በማይክሮሶፍት የባለሙያዎች ዝርዝር ውስጥ በእድሜ ትንሿ ባለሙያ በመሆን አዲስ ታሪክ ፅፋለች፡፡ የፓኪስታን መንግስት በይፋዊ የትዊተር ገፁ አንዳስታወቀው የአራት አመቷ ኤሪሽ ፋጢማ በማይክሮሶፍት የባለሙያዎች ማህደር ውስጥ በእድሜ ትንሿ በመሆን የሀገሯን ህዝብ በበጎ እንዳስጠራች ጠቅሷል፡፡
በሀገሪቱ ያለ እንድ ሚዲያ እንደዘገበው ህፃኗ ማይክሮሶፍት በሚያዘጋጀው የማይክሮሶፍት የተረጋገጠ ባለሙያዎች ፈተና (MCP) ላይ ተወዳድራ ማግኘት ከሚገባት 700 ነጥብ 831 ማርክ በማምጣት የመጀመሪያዋ በእድሜ ትንሿ የማይክሮሶፍት ባለሙያ ሆናለች፡፡ በሃገሪቱ የሲንዲህ ግዛት የካራቺ ከተማ ተወላጅ የሆነቸው ኤሪሽ ፋጢማ ይህን ለማሳካት በተፈጥሮ ካገኘችው የአእምሮ ልህቀት በተጨማሪ በወረርሽኙ ወቅት ከአባቷ ጋር በቤት ውስጥ የነበራት የኮምፒውተር ትምህርት በእጅጉ እንዳገዛት ተገልጿል፡፡ የኣይቲ ባለሙያ የሆነው ወላጅ አባቷ ከኮምፒውተር ጋር የተያያዙ የተለያዩ ስራዎችን በሚሰራበት ወቅት በከፍተኛ ትኩረት ስትከታተል የነበረችው ኤሪሽ ማይክሮሶፍት በሚያዘጋጀው የፕሮፌሽናል አይቲ ባለሙያዎች ፈተና ላይ በመወዳደር ከእድሜዋ በላይ ከፍተኛ ውጤት ማምጣት የቻለች ነች፡፡
ከኤሪሽ በፊት የማይክሮሶፍትን የ MCP ፈተና በማለፍ የዛው የፓኪስታን ተወላጅ የሆነና በእንግሊዝ ያደገው የ 5 ዓመቱ ህጻን ኣያን እንደአውሮፓውያኑ በ2014 በእድሜ ትንሹ የማይክሮሶፍት ባለሙያ መሆን ችሎ ነበር፡፡ ታዲያ አሁን የሀገሩ ልጅ የሆነችው ኤሪሽ ይህን ሪከርድ በማሻሻል የመጀመሪያው በእድሜ ትንሿ የማይክሮሶፍት ባለሙያ የሆነች ታዳጊ ህጻን ናት፡፡
ማይክሮሶፍት የሚያዘጋጀው የ MCP ፕሮግራም የአይቲ ፕሮፌሽናሎች ከማይክሮሶፍት ጋር ተያያዥነት ባላቸው የቴክኖሎጂ ዘርፎች ላይ የሚወዳደሩበት የሰርተፍኬት ፕሮግራም ሲሆን በሚዘጋጁት ፕሮፌሽናል ፈታናዎች ላይ ከ700 በላይ ውጤት የሚያመጡ ተወዳዳሪዎች ወደ ድርጅቱ የተረጋገጠ ባለሙያነት ሊያድጉ የሚችሉበት እድል ነው፡፡ ይህ ፕሮግራም በስድስት ዘርፎች የሚከፈል ሲሆን እነሱም ክላውድ፣ ፕሮዳክቲቪቲ፣ ሞቢሊቲ፣ አፕ ቢውልደር፣ ዳታ እና ቢዝነስ አፕልኬሽን ተብለው ይከፋላሉ፡፡
https://www.republicworld.com/.../four-year-old-pakistan...

እየተነዳ ቅርፁን መለወጥ የሚችለው ጎማ
====================
ተመራማሪዎች የጃፓን ባህላዊ ወረቀት አስተጣጠፍ ስልት በሆነው ኦርጋሚ ላይ በመንተራስ ተሽከርካሪው እየተንቀሳቀሰ ሳለ ቅርፁን መለወጥ የሚችል ጎማን ሰርተዋል፡፡
መነሻውን ከብዙ መቶዎች ዓመታት በፊት ሀገረ ጃፓን ላይ ያደረገው ኦርጃጋሚ በዓለም አቀፍ ደረጃ ስመ ጥር መዝናኛ ለመሆን በቅቷል፡፡ አሁን ላይ ታድያ መሀንዲሶች የኦርጋሚ ንድፍን በመጠቀም የብረት እና ፕላስቲክ እቃዎችን ለመስራት እየተንደረደሩ ይገኛሉ፡፡ በአዲሱ ጎማም አጥኚዎቹ ዋተርቦምብ ቴስሌሽን የተባለውን የኦርጋሚ ነንድፍ አይነትን በመውሰድ እንደተጠቃሚው ቅርፁን የሚለዋውጥ ጎማ ሰርተዋል፡፡ ለዚህ ይረዳ ዘንድም የጎማውን የፊት አካል በአልሙኒየሙች ሲሰራ አልሙኒየሞቹን ደግሞ በሌላ ግብዓት የማስተሳሰር ስልትን ተጠቅመዋል፡፡
አጥኚዎቹ ጎማውን ሲሰሩት በተለያዩ መጠን አድርገው ነው፤ አንዳንዶቹም በመኪና ጎማ ልክ ናቸው፡፡ ጎማዎቹ ተሽከርካሪው ላይ በሚኖረው የክብደት መለዋወጥ ሲያጋጥማቸው እንዲሁም የቦታው ሁኔታን ከግምት በማስገባት እነርሱም ለዚህ ተስማሚ በሆነ መልኩ ቅርፃቸውን ይለውጣሉ፡፡ ይህም ለምሳሌ አንድ አሽከርካሪ ከፍታው ዝቅተኛ በሆነ ድልድይ ስር ሲያልፍ የጎማውን ቅርፅ ለውጦ መኪናው ሳያቆም ዝቅ ብሎ ማለፍ እንዲችል ያደርገዋል ማለት ነው፡፡
ይህ ምርምር ገና በጅማሮው ላይ ያለ በመሆኑ ባሉን መንገዶች ላይ ግልጋሎት ለመስጠት ዝግጁ አይደለም፡፡ ወደፊት ግን በተለይ እንደ ጨረቃና ማርስ ባሉ አስቸጋሪ ገፆች ላይ መጠቀም ይቻል ዘንድ አጥኚዎቹ አልመዋል፡፡
ምንጭ፤ Tech Xplore
ለተጨማሪ፤ https://techxplore.com/.../2021-04-origami-based-vehicle...

የሰው ሰራሽ አይን ቴክኖሎጂን የሚያሻሽል የኮምፒውተር ሞዴል
***********************************
ተመራማሪዎች ለአይነ-ስውራን ባለ ቀለም እና ጥራት ያለው ምስል እንዲያዩ የሚያስችሉ ሲግናሎችን ማበልጸጋቸው ተሰማ፡፡ በአለማችን በሚሊዮኖች የሚቆጠሩ የአይን ብርሃናቸውን ከጊዜ ወደ ጊዜ እያጡ ያሉ ሰዎች አሉ፡፡ ፒግመንቶሳ በመባል የሚታወቀው በዘር የሚተላለፈው በሽታ ብቻ እንኳን በአለማችን ከ4 መቶው አንዱን የሚያጠቃ ነው፡፡ በአሁኑ ወቅት እንዲህ ባለ ችግር ምክንያት የአይን ብርሃናቸውን ላጡ ሰዎች ግማሽ መፍትሔ የሚሆን ቴክኖሎጂ አለ፡፡
ከእነዚህ ቴክኖሎጂዎች በዋናነት የሚጠቀሰው the Argus II የሚባለው ነው፡፡ ይህ ቴክኖሎጂ በዘርፉ የአለማችን የመጀመሪያው ቴክኖሎጂ ሲሆን ለእይታ ወሳኝ የሆኑ የተወሰኑ የአይን ክፍሎችን አቅም እነደገና መመለስ የሚያስችል ቴክኖሎጂ ነው፡፡ ቴክኖሎጂው ሙሉ ብርሃናቸውን ላጡ ሰዎች እንቅስቃሴንና ቅርጽን መለየት እንዲችሉ ያደርጋቸዋል፡፡
ይህ retinal prostheses የሚሰኝ ዘርፍ በህጻን እድሜ የሚገኝ ዘርፍ ሲሆን በአለማችን ለሚገኙ ጥቂት ለማይባሉ ሰዎች ኤሌክትሮኒክ አይን በመሆን አለምን እንዲረዱ እያደረጋቸው ነው፡፡ ይህ በጅማሮ ላይ ያለ ቴክኖሎጂ ለአይነስውራን ከእንቅስቃሴና ከቅርጽ ባሻገር ቀለማትንና ጥራት ያለው ምስል መመልከት እንዲችሊ ለማድረግ በተመራማሪዎች የተለያዩ ማሻሻያዎች እየተደረጉበት ነው፡፡
ምንጭ scitechdaily
ተጨማሪ ንባብ https://scitechdaily.com/advanced-computer-model-enables-improvements-to-bionic-eye-technology/

የዳውሮን ቱሪዝም መስህቦች የሚያሳይ ቱር አፕሊኬሽን ተመረቀ
===========
በዳውሮ ዞን የሚገኙ ልዩ የቱሪስት መስህቦችን በቨርቹዋል ሪያሊቲ አማካኝነት የሚያስጎበኝ ቱር አፕሊኬሽን በቴክኖሎጂና ኢኖቬሽን ኢንስቲትዩት እንዲሁም በባዮቴክኖሎጂ ኢንስቲትዩት ትብብር ተሰርቶ ትናንት ተመረቀ፡፡ ቨርቹዋል ዳውሮ 360 የተሰኘው ቱር አፕሊኬሽኑ በቦታው ተገኝተው አካባቢውን መጎብኘት የማይችሉ ሰዎች በቨርቹዋል ሪያሊቲ መመልከቻ አማካኝነት እዚያው ሆነው እየጎበኙ እንዲመስላቸው ከማድረግም ባሻገር ቦታውን የማስተዋወቅና ታዳጊዎችንም በ3ዲ ቴክኖሎጂ አማካኝነት በማነሳሳት በቀጣይ ወደ ስፍራው እዲሄዱ ማድረግን ያለመ ነው፡፡
የቴክኖሎጂ እና ኢኖቬሽን ኢንስቲትዩት ምክትል ዋና ዳይሬክተር ኢ/ር ተሾመ ሳህለማርያም ኢንስቲትዩቱ ባለው መዋቅራዊ አደረጃጀት እና በሚሰራቸው ተግባራት ዙርያ በዕለቱ ለተገኙት የክብር እንግዶች ገለፃ አቅርበዋል፡፡ አያይዘውም በሁለቱ ኢንስቲትዩቶች ትብብር የተሰራው ይህ የቱር አፕሊኬሽን ሀገራችን በደምብ ከሰራችበት የተሻለ ገቢ እንደምታገኝበት የገለፁት የቱሪዝም መስኩን በማስቷወቅ ረገድ ከፍተኛ አስተዋፅዖ እንደሚኖረው አስረድተዋል፡፡ የኢትዮጵያ ባዮቴክኖሎጂ ኢንስቲትዩት ዋና ዳይሬክተር ዶ/ር ካሳሁን ተስፋዬ በበኩላቸው መጋቢት 2012 ክቡር ጠቅላይ ሚኒስትር ዶ/ር አብይ አህመድ የዳውሮን እምቅ የተፈጥሮ ሀብት በጎበኙበት ወቅት በተሰጠ አቅጣጫ መሰረት ተቋማቸው ወደ ስራ የገባ መሆኑን ገልፀዋል፡፡ ይህን ተከትሎም በስፍራው ጥናትና ምርምር ከማድረግ ባሻገር ተቋማቸው ከቀረፃቸው ስምንት ፕሮጀክቶች መካከል አንዱ ይህ የዞኑን የተፈጥሮ መስህቦች የሚያስቃኝ የቨርቹዋል ቱሪዝም ስራ መሆኑን ጠቅሰው ቨርቹዋል ዳውሮ 360 ወደፊትም እየተሻሻለ በመሄድ የሀገር ውስጥ እና የውጪ ጎብኚዎች የሚያዘወትሩት የተዋጣለት የመረጃ መረብ እና የዲጂታል ቱር እንደሚሆን ያላቸውን ተስፋ ተናግረዋል፡፡
በምርቃት ፕሮግራሙ ላይ በክብር እንግድነት ተገኝተው ንግግር ያደረጉት የባህልና ቱሪዝም ሚኒስቴር ሚኒስትሯ ክብርት ዶ/ር ሂሩት ካሳው ቱር አፕሊኬሽኑ ተጠናቆ በማየታቸው ደስ መሰኘታቸውን ገልጸው ይህን ስራ በአጭር ጊዜ ተሰርቶ እንዲጠናቀቅ ላደረጉት ጥረት ለቴክኖሎጂ እና ኢኖቬሽን ኢንስቲትዩት እንዲሁም የኢትዮጵያ ባዮቴክኖሎጂ ኢንስቲትዩት ምስጋናቸውን አቅርበዋል፡፡ ዳውሮ በአስደናቂ የተፈጥሮ ውበት እና ብዝሀ ሕይወት የታደለች አካባቢ መሆኗን ያወሱስ ዶ/ር ሂሩት ቨርቹዋል ዳውሮ 360 ይህን ሙሉ ለሙሉ ለመመልከት ባያስችልም እንደሚያስተዋውቀው ተናግረዋል፡፡
የምሽቱን መዝጊያ ንግግር ያሰሙት የሳይንስና ከፍተኛ ትምህርት ሚኒስቴር ሚኒስትር ዴኤታ ፕ/ር አፈወርቅ ካሱም እንዲሁ በተሰራው የቱር አፕሊኬሽን ከፍተኛ ደስታ እንደተሰማቸው ተናግረዋል፡፡ ኢትዮጵያን የሚያሻግር ኃብት በአካባቢው እንዳለና ሰፊ ጥናት ሊደረግበት እንደሚገባ የገለፁትት ፕ/ር አፈወርቅ ክቡር ጠቅላይ ሚኒስትሩ ዳውሮን በጎበኙበት ወቅት በሰጡት መመርያ መሰረት ስራው ሳይጓተት ለዚህ በመብቃቱ ምስጋናቸውን ቸረዋል፡፡
በምረቃ ዝግጅቱ ላይ ከባህልና ቱሪዝም ሚኒስቴር፣ የዳውሮ ዞን አስተዳደር፣ የሳይንስና ከፍተኛ ትምህርት ሚኒስቴር እንዲሁም ከሁለቱ ኢንስቲትዩቶች የተውጣጡ ኃላፊዎችና ሌሎች ጥሪ የተደረገላቸው እንግዶች ተገኝተዋል፡፡
በደቡብ ብሄር ብሄረሰቦች ክልል የሚገኘው የዳውሮ ዞን ልዩ ልዩ የእንስሳት እና ዕፅዋት ሐብትን በውስጡ የያዘው የጨበራ ጩርጩራ ብሔራዊ ፓርክን ጨምሮ የተለያዩ ሰው ሰራሽ እና የተፈጥሮ መስህቦችን የያዘ የሀገራችን ክፍል ነው፡፡

ፋይዘር የመጀመሪያውን በታብሌት መልክ የሚወሰድ የኮቪድ 19 መድሃኒት እየሞከረ ነው
************
ፋይዘር የተሰኘው የመድሃኒት አምራች ተቋም በታብሌት መልክ የሚወሰድ የኮቪድ 19 መድሃኒት ለመስራት ሙከራዎችን እያደረገ እንደሆነ ተነገረ፡፡ በህክምና ዘርፍ ከማከም ይልቅ መከላከል የሚባለው መንገድ እጅግ ተመራጭ ነው፡፡ በተለይ እንደ ኮቪድ 19 ላሉ ተላላፊ ወረርሽኞች ከማከም ይልቅ መከላከል መድሃኒት ከመፈለግ ይልቅ በሽታው እንዳይሰራጭ ስራ መስራት በጣም አዋጭ ነው፡፡ እንደሌሎቹ በቫይረስ እንደሚተላለፉ በሽታዎች ሁሉ በኮቪድ የተጠቁ ሰዎችን ለማከም የሚያስችል መድሃኒት አስቸጋሪ ሆኖ ቆይቷል
አንድ አመት ከተቃረበ ጥረት በኋላ በሽታውን ለመቆጣጠር የሚያስችሉ የተለያዩ ክትባቶች መገኘታቸውን ብዙዎችም ክትባቶቹን እየወሰደ እንደሆነ ይታወቃል፡፡ ክትባቶቹ የቫይረሱን ስርጭት የሚከላከሉ እንጂ ታማሚዎችን የሚያግዙ ባለመሆናቸው ብዙዎች አሁንም በከፍተኛ ስወቃይ ውስጥ ሆነው እየሞቱ ነው፡፡ ፋይዘር የተሰኘው የመድሃኒት አምራች ድርጅትም ይህን የህሙማንን ስቃይ ሊያቀልና ከበሽታቸው እንዲያገግሙ የሚያግዛቸውን መድሃኒት ነው እየሞከረ ያለው፡፡
አሁን ባለው ህክምና በጽኑ ህሙምነት ላሉ ሰዎች የሚደረገው የህክምና እርዳታ ኦክስጅን እንዲያገኙ በማድረግ ሰውነታቸው በራሱ የበሽታ መከላከል ብቃቱን በማሳደግ እስኪያገግሙ መጠበቅ ነው፡፡ ይህ ግን ሁል ጊዜ አዋጭ አይሆንም ለዚህም ነው ብዙዎች ኦክስጅን እንኳን እያገኙ እንደ ቅጠል እየረገፉ ያሉት፡፡ ይህን ያስተዋሉ ተመራማሪዎች ያለ እረፍት ለህሙማን ድጋፍ የሚሆን መድሃኒትን በመፈለግ ላይ ናቸው፡፡ በዘርፉ ፋይዘር የተሸለ እንቅስቃሴ እያደረገ ይመስላል፡፡ ለዚህም በታብሌት መልክ የሚወሰድ መድሃኒትን እየሞከረ መሆኑ ማሳያ ነው፡፡
መድሃኒቱ አሁን ላይ በቤልጀም ብራሰልስ የመጀመሪያ ደረጃ ክሊኒካዊ ሙከራ እየተደረገበት ሲሆን መድሃኒቱም ቫይረሱ በሰውነታችን ውስጥ ለመራባት የሚጠቀምበትን ኢንዛይም በመለየት የሚያጠቃ ነው፡፡ እንደ ፋይዘር መረጃ ከሆነ ይህ PF-07321332 የተሰኘ ክኒን (ታብሌት) በሽታው በሰውነታችን እንደገባ ወይም እንደያዘን ወዲያው የሚወሰድ ነው፡፡
ታማሚዎች የመጀመሪያው የህመም ስሜት እንደተሰማቸው ወደ ተጨማሪ ህክምና ሳይሔዱ መድሃኒቱን ሊወስዱት እንዲችሉ ታስቦም የተሰራ መሆኑን ድርጅቱ ተናግሯል፡፡
ምንጭ iflscience
ተጨማሪ ንባብ https://www.iflscience.com/health-and-medicine/pfizer-is-trialling-the-first-pill-to-treat-covid19/?fbclid=IwAR0aYBp8BEQ10UFgADMaGKmXx9ld7TrQ3fD_XqLKYKeQeaqZyPSnYi9ryNk