አጥኚዎች አልበርት አንስታይንን ወደ ህይወት መልሰው ከሰዎች ጋር እንዲነጋገር አደረጉት
=============
ከወደ ጥንቆላው ዓለም በሙት መንፈስ አማካኝነት ከብዙ ዓመታት በፊት ያለፉ ቤተሰብ እና ሌሎች ወዳጆችን ማዋራት እንደሚቻል ሲነገር ብዙዎቻችን ሰምተን ይሆናል፡፡ ታድያ በእንግሊዙ የድምፅ ሰሪ ኩባንያ ኤፍሎሪዝሚክ እና በኒውዚላንዱ የዲጁታል ሰብ አበልፃጊ አኒኪው ወስጥ ያሉ አጥኚዎችም ታሪካዊውን የሳይንስ ሊቅ አልበርት አንስታይንን በድምፅም በምስልም መስሎ የሚናገር የሰው ሰራሽ አስተውሎት ስርዓትን ይዘው መጥተዋል፡፡
ሁለቱ ተቋማት ተጠቃሚዎች ልክ እራሱ አልበርት አንስታይንን እንደሚያዋሩት በሚመስላቸው መልኩ ጥያቄዎችን እንዲጠይቁት አልመው ነው ይህን የሰው ሰራሽ አስተውሎት ስርዓት በትብብር የገነቡት፡፡ ኩባንያዎቹ እንደሚሉት ከሆነ ስመ ጥሩን ሳይንቲስት ለዚህ ስራ የመረጡት በሰዎች ዘንድ ባለው የባለ ምጡቅ አዕምሮ ባለቤትነት እይታ፣ ታሪካዊ ስብዕና፣ የቴክኖሎጂ ልክፍተኝነቱ እንዲሁም ብዙዎች የተለያዩ ጥያቄዎችን ሊያቀርቡለት የሚፈልጉት ሰው ነው ብለው በማመናቸው ነው፡፡
ምስለ አንስታይን ሊቅነቱን እንዲያስመሰክርና በተቻለ መጠንም እውነተኛ ይመስል ዘንድ የረቀቁ ኮምፒውተራዊ ስልቶችን አኒኪው ሰጥቶታል፡፡ ሆኖም የአልበርት አንስታይንን ድምፅ በትክክል በማስመሰሉ ረገድ ነገሮች ፍፁም አልሆኑም፡፡ አጥኚዎቹ ማግኘት የቻሏቸው የሳይንቲስቱ ታሪካዊ ንግግሮች የሚያመላክቱት አልበርት አንስታይን እንግሊዝኛው ከፍተኛ የጀርመንኛ ተፅዕንዖ ያለበት፣ ሲናገርም በዝግታ፣ ትህትና፣ ጠቢብነት እንዲሁም ሞቅ ባለ ቶን ተሞልቶ መሆኑን ነው፡፡ ሆኖም አልበርት በሚናገረው እንግሊዝኛና የድሮ መቅርፀ ድምፆች ባላቸው የጥራት መጓደል ሳብያ ተመራማሪው ትክክለኛው ድምፁ ምን ሊመስል ይችላል የሚለውን ለመለየት አስቸግሯቸው ነበር፡፡
ታድያ ብዙዎቹ ተጠቃሚዎች በቴክኖሎጂው አማካኝነት ከአንስታይን ጋር ሲገናኙ ስለ ድምፁ ትክክለኝነት ብዙም ግድ እንደማይሰጣቸው አምነዋል፡፡ ይህን ከግምት በማስገባትም አጥኚዎቹ ከዚህ ስመጥር የፊዚክስ ተመራማሪ ጋር አንድ አይነት ያልሆነ፤ ግን ደግሞ በሚያነጋግሩት ተጠቃሚዎች ዘንድ ሊቀር የሚችል ሌላ ድምፅ ለምስለ አንስታይኑ ሰጥተውታል፡፡ ይህ አዲስ ድምፅ ምስለ አልበርት አንስታይን የተወሰነ ጀርመንኛ ዘዬ ባለው መልኩ እንዲናገርና ለተጠቃሚዎችም ንግግሩ የተጫዋችና በወዳጅ ቅርበት የተዋዛ መስሎ እንዲታያቸው የተሰራ ነው፡፡ በተጨማሪም አጥኚዎቹ ይህ የሰው ሰራሽ አስተውሎት ስርዓት ምስለ አልበርት ተጠቃሚዎችን ሲያነጋግር ልክ ከራሱ ዕውቀት ተነስቶ የሚናገር ሊቅ እንዲመስል ጭምር አድርገውታል፡፡
ከድምፁ ባሻገርም ይህ የአልበርት ዲጂታል ምስለእኔን ሲሰሩት ልክ እንደ ደንበኞች አገልግሎት ጥሪ ወይም የግል ረዳት ሁሉ የተጠቃሚዎችን ጥያቄ በፍጥነት እንዲመልስ አድርገው መስራት ነበረባቸው፡፡ አጥኚዎቹ ይህን ለማሳካት ሰው ሰራሽ አስተውሎቱን ከረቀቀ ኮምፒውተራዊ አሰራር ያቀናጁት ሲሆን ማሻሻያዎቹን ማድረግ ከጀመሩበት ከሁለት ሳምንታት በኋላም ስርዓቱ ለጠያቂዎቹ ምላሽ ለመስጠት የሚወስድበትን ጊዜ ከ12 ሴኮንድ ወደ 3 ሴኮንድ ማውረድ ችለዋል፡፡
ታድያ ተመራማሪዎቹ ይህ የአልበርት አንስታይን ዲጂታል ምስለእኔ በሰው ልጆች እና ሰው ሰራሽ አስተውሎት ስርዓት መካከል ሊደረግ ስለሚችለው መስተጋብር የመጀመሪያ እርምጃ አድርገው ተመልክተውታል፡፡
እርስዎም ይህን ሊንክ በመጠቀም አልበርት አንስታይንን ሊያዋሩት ይችላሉ https://einstein.digital
humans.com/
ምንጭ፤ Tech Xplore

የኮሌጅ ዲግሪን በ6 ወር የምስክር ወረቀት ለመተካት ያሰበው ጎግል
******************
የቴክኖሎጂ ኩባንያ የሆነው ጎግል ከኮሌጅ ዲግሪ ይልቅ የስድስት ወር ርዝማኔ ያላቸውን ኮርሶች በመስጠት ሰራተኞችን ለመቅጠር ማቀዱን አሳውቋል፡፡ ኩባንያው አራት አመት በሚረዝም የዩኒቨርሲቲ ዲግሪ ስራ ለመቀጠር ከሚወዳደሩ ሰዎች ይልቅ ድርጅቱ የሚያዘጋጀውን የስድስት ወር ኮርስ በማጠናቀቅ ምስክር ወረቀት ያላቸውን ሰዎች ተመራጭ እንደሚያደርግ ተናግሯል፡፡
ለዚህ ስልጠና የሚያስፈልገው ክፍያ እስካሁን ይፋ ባይደረግም ከዚህ ቀደም ድርጅቱ ከሚሰጣቸው ስልጠናዎች ዋጋ በመነሳት እስከ 300 የአሜሪካን ዶላር ሊደርስ እንደሚችል ተገምቷል፡፡ ድርጅቱ 100 ሺህ የሚደርሱ የትምህርት እድሎችን እንዳመቻቸ ያሳወቀ ሲሆን በትምህርታቸው የተሻለ አፈጻጸም ያላቸው ተማሪዎች ኮርሱን ቢወስዱ ከፍተኛ ከፋይ በሆኑ ተቋማት የመቀጠር እድላቸውን እንደሚያሰፋላቸው ተነግሯል፡፡
በዚህ የስድስት ወር ፕሮግራም ውስጥ እንደ መረጃ ትንተና እና የፕሮጀክት አስተዳደር ያሉ ኮርሶች ተካተውበታል፡፡ እነዚህ የስልጠና አይነቶች የጎግል ተቀጣሪ የሆኑ ሙያተኞችን ክህሎት ለማዳበር ታስበው የተዘጋጁ ሲሆን ሰራተኞቹ ከስልጠናዎቹ አዳዲስ ክህሎቶችን እንደሚማሩባቸው የተናገሩት የጎግል አለም አቀፍ ጉዳዮች ምክትል ፕሬዘዳንት ኬንት ዎከር አክለውም በስልጠናዎቹ የሚሳተፉ ሰዎች ስራ ለማግኘት የሚያደርጉትን ጥረት እጅግ እንደሚቀልላቸው ገልጸዋል፡፡ ለስልጠናዎቹም ምንም አይነት ዲግሪም ሆነ የስራ ልምድ አይጠየቅም ተብሏል፡፡
የዚህ ፕሮግራም አላማ እንደ ድርጅቱ መረጃ ከሆነ በተለይ በአሜሪካ የኮሌጅና የዩኒቨርሲቲ ዲግሪ ለሁሉም ተደራሽ አለመሆንና ኢኮኖሚያዊ ደህንነትን ለማረጋገጥ የግድ የኮሌጅ ዲግሪ አስፈላጊ ባለመሆኑ ሲሆን በተለይ በአጫጭር ስለጠናዎች ሊሰሩ የሚችሉ ስራዎችን ለመስራት አራትና አምስት አመት በዩኒቨርሲቲዎች ውስጥ ሆኖ ጊዜን፣ ገንዘብንና ጉልበትን መጨረስ አያስፈልግም በሚል እሳቤ እንደሆነ ታውቋል፡፡
ምንጭ፡ iflscience
ተጨማሪ ንባብ https://www.iflscience.com/policy/google-plan-to-replace-the-need-for-college-degrees-with-sixmonth-certificates/?fbclid=IwAR3kngUgDi-ItPY9gtQRZ4BrRzu12BQEbopIlOuUspLuXdRE2JPK18Xaf5A

ኢትዮ ቴሌኮም የሞባይል ክፍያ አገልግሎት በቅርቡ ሊጀምር ነው
=======================
ኢትዮ ቴሌኮም በሁለት ሳምንታት ጊዜ ውስጥ ደንበኞች ስልካቸውን በመጠቀም ብቻ ገንዘብ እንዲልኩ፣ እንዲቀበሉና ግዢ እንዲፈፅሙ የሚያስችል የሞባይል ክፍያ አገልግሎት ሊጀምር መሆኑ ተነገረ፡፡ ቴሌብር የተሰኘው የክፍያ ስርዓቱ ደንበኞች ካሽ ወይም ቼክ ሳያስፈልጋቸው ዘርፈ ብዙ ክፍያዎችን እንዲፈፅሙ የሚያደርግ ነው፡፡
ቴሌብር ደንበኞች በሀገር ውስጥም ሆነ ዓለም አቀፍ ደረጃ በሁሉም የትስስር መንገዶች ላይ ገንዘብ መላላክን፣ ለዕቃና አገልግሎቶች ግዢ የሚደረጉ ክፍያዎችን መፈፀም እንዲያስችል ተደርጎ መሰራቱ ተገልጿል፡፡ በዚህም ደንበኞች ለምሳሌ የትምህርት ቤት፣ የውሃና ኤሌክትሪክ እንዲሁም ሌሎች መሰል ክፍያዎችን በስልካቸው እንዲፈፅሙ ያስችላቸዋል፡፡ በተጨማሪም በኢትዮ ቴሌኮም ለሚቀርቡ እንደ አየር ሰዓት ግዢ ላሉ አገልግሎቶች ክፍያን እንዲፈፅሙ ያመቻቸ ነው፡፡ በሌላ መልኩ አገልግሎቱ የኩባንያው ደንበኞች ከሀገር ውጪ ካለው ዲያስቦራ ገንዘብ እንዲቀበሉ፣ ገንዘባቸውን እንዲቆጥቡ፣ ብድር እንዲያገኙና የባንክ አካውንታቸውን ከቴሌብር ጋራ እንዲያስተሳስሩ የሚፈቅድ ይሆናል፡፡
ኢትዮ ቴሌኮም አገልግሎቱን ያስጀምር ዘንድ ከአንድ ዓመት በፊት ለዲጂታል ፋይናንስ አገልግሎቶች ፍቀድ ለሚሰጠው የኢትዮጵያ ብሔራዊ ባንክ ጥያቄውን አቅርቦ ነበር፡፡ ባንኩም ለአገልግሎቱ አረንጓዴ መብራት ከሰጠ በኋላ ነው ኩባንያው እንቅስቃሴውን የጀመረው፡፡
ደንበኞች ለቴሌብር ለመመዝገብ የኢትዮ ቴሌኮም ሲም ካርድ ያለበት ተንቀሳቃሽ ስልካቸውን እና ማንነታቸውን የሚገልፅ መታወቂያ ይዘው ወደ ቴሌብር ወኪሎች አልያም የኢትዮ ቴሌኮም ሽያጭ ማዕከላት በማምራት መመዝገብ እንደሚችሉ ተገልጿል፡፡
ምንጭ፤ Capital
ለተጨማሪ ንባብ https://www.capitalethiopia.com/.../telebirr-to-launch.../

በሰው ልጆች ታሪክ እጅግ የከፋው ዘመን የትኛው ነው
========================
ባሰላፍነው የፈረንጆች አመት የብዙ ሰዎችን ህይወት የቀጠፈና ሁለንተናዊ ቀውስ ያስከተሉ ክስተቶች በብዙ የአለማችን ክፍሎች ተከስተዋል፡፡ አደገኛ አለም አቀፍ ወረርሽኝ፣ በየሀገራቱ የተስተዋሉ የፖለቲከላ አለማረጋጋቶችና ግጭቶች፣ የአየር ንብረት ለውጥ እንዲሁም ከኮቪድ ጋር ተያይዘው የመጡ የማህበረሰብ የአኗኗር ዘይቤ ለውጦች 2020ን ከባድ ጊዜ አድርገውት ነበር፡፡
ይህ በሚነሳበት ጊዜ በአለም ደረጃ የ 100 ሚሊዮን ሰዎች ህይወት የነጠቀው እና የመጀመሪያው የአለም ጦርነት የተጠናቀቀበት የ1918 አመት እጅግ የከፋው ዘመን ተደርጎ ይወሰዳል፡፡ ከዚህ ባለፈም ግማሽ አውሮፓን ጠራርጎ ያጠፋው እና በትንሹ 20 ሚሊዮን የአለም ህዝቦች ያለቁበት የ 1349 የብላክ ዴዝ መቅሰፍት በሰው ልጆች ታሪክ አንዲሁ የከፋው ዘመን ተደርጎ ይወሰዳል፡፡ ይሁንና እንደታሪክ ተመራማሪዎች ብያኔ 536 ዓ.ም ከየትኛውም ዘመን በላይ በሰው ልጆች ታሪክ እጅግ አስጨናቂውና አስከፊው ዘመን ነው፡፡
በ 536 ምንድን ነው ተከሰተው
በሃርቫርድ ዩኒቨርስቲ የመካከለኛው ዘመን ታሪክ ተመራማሪ ፕሮፌሰር ማኮርሚክ እንደሚሉት በ 536 የተከሰተው እጅግ የከበደ የእሳተ ገሞራ ፍንዳታ በሰዎች ልጆች ታሪክ ውስጥ እስካሁን ያልታየ ሁለንተናዊ ቀውስ እና የሰዎች እልቂት የፈጠረ ክስተት መሆኑን ይናገራሉ፡፡ በ 536 የመጀመሪያ ወራት ላይ በአይስላንድ የተነሳው የእሳተ ገሞራ ፍንዳታ ከፍተኛ መጠን ያለው አመድ በከባቢ አየር ላይ በመልቀቅ አብዛኛው የአለም ክፍል በጭጋግ እንዲሸፈን ምክንያት ሆኖ ነበር፡፡ ይህ ጭጋግ የአሁኗን አውሮፓ ጨምሮ የመካካለኛው ምስራቅ እና የእስያን አብዛኛውን ክፍል ለ18 ወራት የቀን ጨለማ ውስጥ እንዲሆኑ አስገድዷቸዋል፡፡ በጊዜው የነበሩ የታሪክ ፀሃፍት እንዳስቀመጡት በእሳተ ገሞራ ፍንዳታው ምክንያት ፀሃይ ሰማያዊ ቀለም ይዛ የነበረች ሲሆን እኩለ ቀን ላይም የሰውነት ጥላዎችን መመልከት እጅግ ከባድ ነበር፡፡
በ 536 የነበሩት የጨለማ ወራት የቅዝቃዜ ወቅትን በማስከተል የበጋው ሙቀት በ2.5 ዲግሪ ሴልሼየስ እንዲወርድ ያስገደደ ሲሆን ይህም በ2300 አመታት ውስጥ እጅግ አደገኛው የቅዝቃዜ ውቅት እንዲሆን አስችሏል፡፡ ይህ የዘመን ክስተት ምድር ከፀሃይ የምታገኘውን ብርሃንና ሙቀት በማሳጣት መጠን የለሽ የሰብል ውድመት እንዲከተል እና ሰዎች ሊቋቋሙት ወዳማይችሉት አለምአቀፍ ረሃብ እንዲያመሩ አስገድዷቸዋል፡፡
ይህ የብዙዎችን ህይወት የቀጠፈ አስከፊ አደጋ በአለማችን እስካሁን ከታዩት ሰቆቃዎች የሚተካከለው እንደሌለ የሚናገሩት ፕሮፌሰር ማኮርሚክ 536ም ከየትኛውም ዘመን በላይ ለሰው ልጆች በህይወት ለመኖር እጅግ አስቸጋሪ ከነበሩ ዘመናት ውስጥ በቀዳሚነት የምትቀመጥ መሆኑን ያስረዳሉ፡፡
ምንጭ፡ Bigthink
https://bigthink.com/politics.../worst-year-in-human-history

በዓለም ላይ ያሉ 195 ሀገራትን መጎብኘት የቻለችው ሴት
********************************
ጀሲካ ናቦንጎ ትባላለች፡፡ በአለም ላይ የሚገኙ ሆሉንም ሀገራት መጎብኘት የቻለች ብቸኛ ጥቁር ሴት ስትሆን ለዚህ ያበቃትም ምክንያት እንዲህ ትናገራለች፡፡ ነገሩ የተጀመረው በ2017 ነው፡፡ በኢንዶኖዢያዋ ባሊ ባደረገችው የሁለት ሳምንት የእረፍት ጊዜ ነው፡፡ በወቅቱ ጀሲካ በድርጅት ወስጥ ተቀጥራ ከምትሰራበት ለቅቃ ስራ ፈጣሪ መሆን የቻለች ሲሆን በመዝናናት ላይ እያለች አንድ ጽሁፍን ማንበብ ችላለች፡፡ ጽሁፉ ሁሉንም የአለማችን ሀገራት በፍጠነት በመጎብኘት በአለም ክብረወሰን ስሙን ስላስመዘገበው ካሴይ ዴ ፔኮል የሚናገር ነበር፡፡
ይህንን ጽሁፍ ካነበበች በኋላ ጀሲካ በዚህ ረገድ በሁሉም የአለም ሀገራ እግሯን ማሳረፍ የቻለች የመጀመሪያዋ ጥቁት ሴት ለመሆን ተነሳሳች፡፡ እንስቷ ጉዞን ከሚወዱ ቤተሰቦች የተወለደች በመሆኗ የጎዞ ማስታወሻ ይዛ መጓዝ ከመጀመሯ በፊት 65 ሀገራትን ማዳረስ ችላለች፡፡ ጀሲካ ናቦንጎ በአጠቃላይ 193 የተባበሩት መንግስታት አባል ሀገራትንና ተጨማሪ አባል ያልሆኑ ቅዱሱ ውሃ እና ፍሊስጤምን መጎብኘት ችላለች፡፡ ጉዞዋንም ጥቅምት ስድስት 2019 Seychelles በተባለው የምስራቅ አፍሪካ ደሴት አጠናቅቃለች፡፡
በጉዞ ውስጥ መጓዝ ብቻውን ወይም የሀገራቱ ቁጥር ብቻውን ትልቅ ጉዳይ እንዳልሆነ የተረዳችው ጀሲካ በጉዞዋ ጸሐፊ፣ የፎቶ ባለሙያ፣ በቱሪዝም ላይ ልዩ ፍላጎት ያላት ሴት መሆን ችላለች፡፡ አሁን ላይ ከናሽናል ጆግራፊክ ጋር በመሆን ስለተመረጦ 100 ሀገራት የሚተርክ መጽሀፍን በማዘጋጀት ላይ ስትሆን መጽሀፉም በ2022 ይታተማል ተብሎ እየተጠበቀ ነው፡፡
ተጓዧ እንስት ለናሽናል ጆግራፊክ ባደረገችው ቃለ ምልልስ በአለም ላይ የሚኖሩ ህዝቦችን የተለያየ የአኗኗር ዘይቤ መመልከት እጅግ ቀልቧን ገዝቶት እንደነበር ተናግራለች፡፡
ምንጭ National geographic
ተጨማሪ ንባብ https://www.nationalgeographic.com/travel/article/she-visited-every-country-on-earth-heres-what-she-learned?cmpid=org=ngp::mc=social::src=facebook::cmp=editorial::add=fb20210421travel-jessicanabongotravels&sf245134823=1&fbclid=IwAR3y1CS5BGI6F97Xl-h2TjaEWxNM7tUVyEqhTY0jb22NUgXSi6TxUJnqC80

ዘመን ባንክ በኢትዮጵያ የመጀመሪያ የሆነውን የቅድመ ክፍያ የጉዞ ካርድ አስተዋወቀ
=========================
ዘመን ባንክ ከማስተር ካርድ ጋራ በመተባበር በኢትዮጵያ የመጀመሪያ የሆነውን ያለ ጥሬ ገንዘብ ለበረራና ሆቴል ለማስያዝ ግልጋሎት የሚውል የቅድመ ክፍያ የጉዞ ካርድ ይፋ አድርጓል፡፡ ባንኩ በተጨማሪም የኤቲኤም ማሽኖቹን ከካሽ አልባ ክፍያዎች ጋራ እንዲቆራኝ ማድረግ መቻሉ ተነግሯል፡፡ የካርዱ ተጠቃሚዎች ዩሮ ወይም ዶላርን መጠቀም የሚችሉ ሲሆን ወደፊት ግን እንደየ አካባቢው ፍላጎት ከማስተር ካርድ ጋራ በመሆን ሌሎች የገንዘብ አይነቶቸንም በዚህ አገልግሎት ውስጥ ተካታች ለማድረግ እንደሚሰራ የባንኩን ኃላፊዎች ጠቅሶ ፎርቹን ዘግቧል፡፡
ሌላኛው ይህ ካርድ ይሰጠዋል የተባው ጥቅም ደንበኞች በዓለም ዙርያ ባሉት ከማስተር ካርድ ጋራ የተሳሰሩ ኤቲኤም ማሽኖች እና የገንዘብ ዝውውር ስርዓቶችን መጠቀም እንዲችሉ ማድረጉ ነው፡፡ በተጨማሪም የአገልግሎቱ ደንበኞች እንደ ጉዞው ዓላማ እስከ አስር ሺህ ዶላር ድረስ በካርዱ እንዲያንቀሳቅሱ ያስችላቸዋል፡፡
የዘመን ባንክ ዋና ስራ አስፈፃሚ አቶ ደረጄ ዘበነ ባንኮች እንዲህ ዓይነት አገልግሎቶችን መስጠት እንዲችሉ ብሔራዊ ባንክ መፍቀዱን አድንቀው በአገልግሎቱ አማካኝነት በተለያዩ ሀገራት የሚጓዙ ደንበኞቻቸውን ጥሬ ገንዘብ ሳይዙ እንዲንቀሳቀሱ ለማድረግ መቻሉ እንዳስደሰታቸው ተናግረዋል፡፡ ዘመን ባንክ በኢትዮጵያ ልዩ ልዩ የባንክ ቴክኖሎጂዎችን በማስተዋወቅ ረገድ ቀዳሚ ነው ያሉት ዋና ስራ አስፈፃሚው ይህ አዲስ አገልግሎትም ለሀገራችን የኢ-ኮሜርስ እድገት መንገድ ጠራጊ መሆኑን እንደሚያምኑ አክለዋል፡፡
የማስተርካርድ ከሰሀራ በታች አፍሪካ ኃላፊ ራንጋቭ ፕራሳድ በበኩላቸው ያለ ጥሬ ገንዘብ የሚንቀሳቀስ ማህበረሰብን በኢትዮጵያ ለመፍጠር ኢኖቬሽን ቁልፍ ሚናን እንደሚጫወት ጠቅሰው ኩባንያቸውም ጠቃሚ የዲጂታል ክፍያ ስርዓቶችን ለደንበኞች ለማቅረብ ቁርጠኛ መሆኑንና ከዘመን ባንክ ጋር የመሰረቱት ትብብርም የዚህ ማሳያ መሆኑን ተናግሯል፡፡
ባንኩ ከዚህ በተጨማሪም ዓለም አቀፍ የሶፍትዌር አቅራቢ ኩባንያ ከሆነው ሲአርቱ ጋር በመተባበር የሞባይል እና በይነ-መረብ ባንኪንግ ስርዓትን መዘርጋቱ ተነግሯል፡፡ ይህ የሞባይል ባንኪንግ አገልግሎት የተለያዩ ጠቀሜታዎች ያሉት ሲሆን ከነዚህም ውስጥ ዜድ-ካሽ የተባለውና ደንበኞች በተንቀሳቃሽ ስልካቸው አማካኝነት ቮቸር በማቅረብ ብቻ ከኤቲኤም ማሽኖች ገንዘብ ማውጣት የሚችሉበት እነዲሁም ዜድ-ዋሌት የተሰኘው ደንበኞች የዘመን ባንክ አካውንት ለሌላቸው ሰዎች የሞባይል ዋሌት በመፍጠር ገንዘብ መላክ የሚችሉበት አገልግሎት ይጠቀሳሉ፡፡
ምንጭ፤ Fortune እና africa.com
ለተጨማሪ ንባብ https://addisfortune.news/zemen-bank-rolls-out.../...
https://africa.com/zemen-bank-and-mastercard-partner-to.../

መንታ እህቷን በውስጧ ይዛ የተወለደችው ህጻን
*****************************
በኮሎምቢያ አንዲት እናት በአስገራሚ መልኩ ሁለት ሴት ልጆችን ወልዳለች፡፡ አስገራሚው ነገር የቁጥሩ እንዳልሆነ አምስትና ስድስት አንዳንዴም ከፍያለ ቁጥር ያላቸው መንትዮች መወለዳቸው ስለሚሰማ መረዳት ይቻላል፡፡ የዚህችን ሴት ውልደት አስገራሚ ያደረገው አንዷ ህጻን የተወለደችው በእህቷ ውስጥ ሆና መወለዷ ነው፡፡ ሁለተኛዋ ህጻን በእህቷ ሆድ ውስጥ ሆና መወለዷ በጣም ያልተለመደ ቢሆንም ፈጽሞ ያልተከሰተ ግን አይደለም፡፡ እስካሁን በሳይንስ ታሪክ ውስጥ መቶ የሚደርሱ ተመሳሳይ ክስተቶች ተመዝግበዋል፡፡
ጉዳዩ የታወቀው በ35ኛው የእርግዝና ሳምንት ሲሆን በህጻኗ ሆድ ውስጥ ያለው ሽል እንደሆነ በተደረገ የአልትራሳውንድ ምርመራ ተረጋግጧል፡፡ እናትየዋ በ37ኛው ሳምንት የተገላገለች ሲሆን 3.2 በሆነ የጤነኛ ህጻን ክብደት ያላት ልጅንም ታቅፋለች፡፡ ሁኔታው fetus-in-fetu ነው ብለው ያመኑት ዶክተሮች ከአንድ ቀን በኋላ በህጻኗ ውስጥ ያለውን ሽል ለማስወጣት በማሰብ ምርመራ የጀመሩት ሀኪሞች በዚህ ወቅት ያስተዋሉት ነገን እጅግ ሳያስገርማቸው አልቀረም፡፡
በህጻኗ ውስጥ ያለውን ሽል ለማውጣት በተዘጋጁበት ወቅት ሀኪሞቹ ያስተዋሉት ይህ ሽል አሁንም እያደገ ያለና በህይወት ያለ መሆኑን ነው፡፡ መንትያው ሽል 14 ሚሊሜትር የሚረዝም ሲሆን የራሱ የሆነ ልብና ጭንቅላት የሌለው ነው፡፡ ሁኔታውን ለእናትየዋ የተናገሩት ሀኪሞች እናትየዋ ሁኔታውን አስተውላው እንደማታውቅ ተናግራለች፡፡ ሀኪሞቹም ሁለቱን ህጻናት ያገናኘውን የእንግዴ ልጅ መስመር (umbilical cord) ሲቆርጡት ሽሉ ሞቷል፡፡ ቀሪዋ ህጻንም አሁን ላይ በሙሉ ጤንነት ላይ እንዳለች ሀኪሞቹ ተናግረዋል፡፡
ምንጭ፡ iflscience
ተጨማሪ ንባብ፡ https://www.iflscience.com/health-and-medicine/baby-girl-born-with-her-twin-living-inside-her/?fbclid=IwAR2bsIvwNQk_rlGOtV2-V_2qFJeKYX4WnsEA37JCQRfcr57Tyh9IE96W780

የመጀመሪያው ኦክስጅን ከማርስ
*********************
ማርስ ላይ ያለውን እምቅ ካርቦን ዳይ ኦክሳይድ ወደ ኦክስጅን በመለወጥ ለወደፊት በማርስ ላይ ለታሰበው ህይወትና ሌሎች ተግባራት መሳካት የመጀመሪያ የሚባሉ ሙከራዎች እየተደረጉ ነው፡፡ ከዚህ በፊት በተሰሙ መረጃዎች የማርስን ከባቢ አየር መሰረት ያደረጉ ህንጻዎች የሚገነቡበት ዲዛይን እንዲሁም በሚሰሩት ከተሞች መንቀሳቀስ የሚያስችሉ የትራስፖርት አማራጮች በንድፍ ደረጃ እየተሰሩ መሆኑ ይታወቃል፡፡ ማርስ ላይ ከዚህ በተጨማሪ የኦክስጅን ጉዳይ ሌላው ከፍተኛ ምርምር እየተደረገበት ያለ ዘርፍ ነው፡፡
ከየካቲት ወር ጀምሮ ላለፉት 60 ቀናት ከማርስ ካርቦን ዳይ ኦክሳይድ ኦክስጅንን መስራት የሚያስችሉ የተለያዩ ሙከራዎች ሲሰሩ እንደነበር የመረጃ ምንጫችን ናሳን ዋቢ አድርጎ የሰራው ዘገባ ያመለክታል፡፡ ይህ ጥናት ወደ ውጤት የሚያመራ ከሆነ የሳይንስ ልቦለድ ታሪኮችን እውነት የመሆን እድል እንዲኖራቸው ያደርጋል፡፡ አሁን ላይ የመጀመሪያ በሚባል ሙከራ ቴክኖሎጂን በመጠቀም የመጀመሪያ የሆነውን ኦክስጅን ከማርስ ማግኘት ተችሏል፡፡ ይህ ሙከራ ማደግ ከቻለ ተመራማሪዎች ከማርስ ወደ ምድር ለመመለስ የሚያስፈልጋቸውን የሮኬት ሀይል ከዚያው ከማርስ እንዲያገኙ ሲያደርጋቸው ከፍ ሲልም ሊተነፍሱት የሚችሉትን አየር ማግኘት ያስችላቸዋል የሚል ተስፋን ሰንቋል፡፡
እንደሚታወቀው የማርስ ከባቢ አየር በ96 በመቶ ካርቦን ዳይ ኦክሳይድ የተሸፈነ ነው፡፡ ይህ MOXIE የተሰኘ የናሳ ቴክኖሎጂ ከካርቦን ዳይ ኦክሳይድ በከፍተኛ ሙቀት አማካኝነት የኦክስጅንና የካርቦን ቅንጣቶችን የመለያየት ተግባር በመስራት ከዚህ የሚገኘውን የካርቦን ሞኖ ኦክሳይድ ተረፈ ምርት ወደ ማርስ ከባቢ አየር ይለቃል፡፡ በመጀመሪየው ሙከራ ለ10 ደቂቃ መተንፈስ የሚያስችል 5 ግራም ኦክስጅንን ማምረት ተችሏል፡፡
ምንጭ technology.org
ተጨማሪ ንባብ https://www.technology.org/2021/04/22/nasas-perseverance-mars-rover-extracts-first-oxygen-from-red-planet/?fbclid=IwAR3zlI199iEN2zYImmyQqDk5abPEwfQV4Efpzj8dAd9oNRwt8HUhqmJV4O8

በኢንስቲትዩቱ አዘጋጅነት የተካሄደው የኢትዮጵያ የምርምር ተቋማት የምክክር መድረክ
=========================
በኢትዮጵያ ያሉ የምርምር መሰረተ ልማቶች ትብብር ላይ ያተኮረ ሀገር ዓቀፍ የምክክር መድረክ በቴክኖሎጂ እና ኢኖቬሽን ኢንስቲትዩት አዘጋጅነት ተካሂዷል፡፡ Research infrastructure for national competitiveness በሚል ርዕስ ትናንት ሲካሄድ የዋለው የምክክር መድረኩ በሀገራዊ የምርምር መሰረተ ልማቶች እና ተያያዥ አስቻይ ሁኔታዎች ላይ ያተኮረ የፓናል ውይይት እና ሌሎች መሰናዶዎችን ያካተተ ነበር፡፡
በፓናል ውይይቱ በዋናነት እንደ ሀገር ከምርምር ጋር ተያያዘው የሚነሱ የሰው ሀብት አያያዝ፣ የፖሊሲና ግብዓት አቅርቦት ችግር፣ የምርምሮች ሀገራዊ እርባና፣ ማበረታቻ እና የተቋማት ስፔሻላይዜሽን ላይ ያውጠነጠኑ ሀሳቦች ተነስተውበታል፡፡
ውይይቱን በጋራ የመሩት የቴክኖሎጂና ኢኖቬሽን ኢንስቲትዩት እንዲሁም የኢትዮጵያ ባዮቴክኖሎጂ ኢንስቲትዩት ዋና ዳይሬክተሮች አቶ ሙሉቀን ቀሬና ዶ/ር ካሳሁን ተስፋዬ በተነሱት ጉዳዮች ላይ ምላሽ ሰጥተውባቸዋል፡፡ የተነሱት ጥያቄዎች አግባብነት ያላቸው መሆናቸውን ያወሱት አቶ ሙሉቀን ቀሬ የሚመሩት ኢንስቲትዩት ከባዩ ቴክኖሎጂ ኢንስቲትዩት ጋር መመስረት የቻለውን ጥምረት በምሳሌነት በመጥቀስ ተቋማቱ በጋራ በሚሰሩበት መንገድ ላይ ብሎም የፕሮኪውርመንት ፖሊሲ ዝግጅት እና ሌሎች ጉዳዮች ላይ ሀሳባቸውን አንፀባርቀዋል፡፡ በተጨማሪም በውይይቱ የተነሱ ሀሳቦች ከቃል ባለፈ ወደ ተግባር ይለወጡ ዘንድ የቴክኖሎጂ እና ኢኖቬሽን ኢንስቲትዩት እንደሚሰራ ተናግረዋል፡፡
ዶ/ር ካሳሁን በበኩላቸው መንግስታዊ የግዢ ሕጉ የምርምር ተቋማትን እንዲያሰራ ሆኖ እየተዘጋጀ መሆኑን ለታዳሚው ተናግረዋል፡፡ በስፔሻላይዜሽን ረገድም በመሰረቱ የተቋማት በየቦታው መገንባት ስህተት ባይሆንም ሁሉንም የልህቀት ማዕከል ለማድረግ መሞከሩ ግን የተሳሳተ መሆኑን ዶ/ር ካሳሁን ተናግረዋል፡፡ ለተመራማሪዎች በሚሰጡ የድጋፍ እና ማበረታቻ ስራዎችም ማሻሻያ ተደርጎባቸው በስራ ላይ መዋላቸው እንደሚቀጥል አስቀምጠዋል፡፡
ከፓናል ውይይቱ ባሻገር መንደርደርያ የሆኑ ማብራርያዎች በተጋባዥ ምሁራን እና የቴክኖሎጂና ኢኖቬሽን ኢንስቲትዩት ተመራማሪዎች ቀርበዋል፡፡ በኢትዮጵያ የሳይንስ እና ኦኖቬሽን ፖሊሲ አላማ እንዲሁም አቅጣጫና ስትራቴጂዎች ላይ ያተኮረ ማብራርያ በቴክኖሎጂ እና ኢኖቬሽን ኢንስቲትዩት ም/ዋና ዳይሬክተር ኢ/ር ተሾመ ሳህለማርያም ቀርቧል፡፡ በኢንስቲትዩቲ ማንነት፣ ስልጣንና ተግባራት እንዲሁም ስኬቶች ላይ ደግሞ ወ/ሮ ህልውና ማሜ የተወሰነ ገለፃ አድርገዋል፡፡
በሌላ መልኩ በኢትዮጵያ የምርምር መሰረተ ልማት ስነ-ምህዳር እና የሌሎች ሀገራት ተሞክሮ ላይ ያተኮረ ማብራርያ በዶ/ር አብረሀም ደበበ፣ በምርምር ማዕከላት የኢኖቬሽን ስራዎች፣ የተመረጡ የአስተዳደር ተግባራትና የህግ ማሻሻያዎች እንዲሁም ህብረቶች ላይ ዶ/ር መላኩ ደረጀ በመጨረሻም አቶ ወገኔ ደምሴ የኢትዮጵያ የምርምር ማዕከላትን በሚለይ እና በሚያስተሳስር ፕሮጀክት ዙርያ ገለፃቸውን አቅርበዋል፡፡
የምክክር መድረኩን አስመልክቶ ያነጋገርናቸው የኢንስቲትዩቱ ምክትል ዋና ዳይሬተር ኢ/ር ተሾመ ሳህለማርያም መድረኩ የምርምር መሰረተ ልማቶችን ማስተሳሰር እና ማን ምን እየሰራ መሆኑን ማወቅን በዓላማነት ያነገበ መሆኑን ገልፀውልናል፡፡ አያይዘውም መንግስት በኢኖቬሽን ዙርያ ከፍተኛ ትኩረት ሰጥቶ እየሰራ ስለመሆኑና የተቀመጡ ተግዳሮቶችም በጊዜ ሂደት እየተፈቱ እንደሚሄዱ ተናግረዋል፡፡
በምክክር መድረኩ ከሀገራችን ልዩ ልዩ የከፍተኛ ትምህርት ተቋማት፣ የምርምር ማዕከላት እና የሚመለከታቸው የመንግስት መስሪያ ቤቶች የተውጣጡ ምሁራን ተሳታፊ ሆነውበት አልፏል፡፡