በደቡብ አፍሪካ ለፋሲካ በዓል መንገደኞችን ጭኖ ሲጓዝ የነበረ አውቶብስ ተገልብጦ 45 ሰዎች ሞቱ። 8 ዓመት ሕጻን በሕይወት ተገኝታለች።

በደቡብ አፍሪካ ለፋሲካ በዓል መንገደኞችን ከጎረቤት አገር ቦትስዋና ጭኖ ሲጓዝ የነበረ አውቶብስ ተገልብጦ 45 #ሰዎች ሕይወታቸው አለፈ።

ከድልድልይ ላይ ወደ 50 ሜትር ገደል በወደቀው አውቶብስ ውስጥ ከነበሩት ተሳፋሪዎች የ8 ዓመት ሴት ልጅ ብቻ በሕይወት መገኘቷን ባለስልጣናት አስታውቀዋል።

ከሞት የተረፈችው ብቸኛዋ የስምንት ዓመት ልጅ ከባድ ጉዳት እንደደረሰባት ተገልጿል።

በሰሜን ምስራቅ ሊምፖፖ ግዛት አደጋው የደረሰበት አውቶብስ የድልድዩን መከላከያ ጥሶ ቁልቁል ወርዶ ከመሬት ጋር ሲጋጭ በእሳት መያያዙ ተነግሯል።

ተሳፋሪዎቹ ከቦትስዋና ዋና ከተማ ጋቦሮኔ ወደ ሞሪያ ከተማ ለፋሲካ በዓል መንፈሳዊ አገልግሎት ሲጓዙ የነበሩ ኃይማኖተኞች ነበሩ።

የአውሮፓውያንን የቀን አቆጣጠር የሚከተሉ ክርስቲያኞች የስቅለት በዓልን ዛሬ ዓርብ መጋቢት 20/2016 እያከበሩ ሲሆን የትንሳዔ በዓልን ደግሞ የፊታችን እሁድ መጋቢት 22 ያከብራሉ።

ተሽከርካሪው ከጆሃንስበርግ በስተሰሜን 300 ኪሜ ርቀት ላይ ካለው ድልድይ መውደቁን የደቡብ አፍሪካው ኤስኤቢሲ ቀድሞ ዘግቧል።

የአደጋውን ቦታ የጎበኙት የደቡብ አፍሪካ የትራንስፖርት ሚኒስትር ሲንዲሲዌ ቺኩንጋ በአውቶብሱ አደጋ ሕይወታቸውን ላጡ ቤተሰቦች ሃዘናቸውን ገልፀዋል።

"በዚህ አስቸጋሪ ጊዜ ጸሎታችን ከእናንተ ጋር ነው። በዚህ የትንሳኤ በዓል ሰሞን ብዙ ሰዎች ከቦታ ወደ ቦታ ስለሚጓጓዙ ሁል ጊዜ በኃላፊነት በማሽከርከር ከፍተኛ ጥንቃቄ እንድታደርጉ" ሲሉ አሳስበዋል።

ፕሬዝዳንቱ ለትንሳኤ በዓል ባስተላለፉት መልዕክት ዜጐች “ደህንነቱ የተጠበቀ ፋሲካ ለማክበር የተቻላቸውን ሁሉ እንዲያደርጉ” አሳስበዋል።

@BBC