ويبدأ بالظهور نماذج عجيبة من الصحابة
أمثال 👈 ام سليم مثلا..
أم سليم راحلها واحد عشان يخطبها ..اسمه ابو طلحة وهو صاحب أخلاق ومال وجمال وحسب ونسب ولكنه مشرك ..
فقالت يا أبا طلحه انك رجل صاحب خلق وحسب ونسب ومال ومثلك لا يرفضه أحد ؛ غير انك رجل مشرك وإنى مسلمة فإن هدى الله قلبك الى الاسلام كان ذاك مهري ولا اريد منك شيء ، وهذا الارتباط بالدين لفت انتباه ابو طلحة؛ فيقرر انه يحاول يعرف عن دين الإسلام. فيذهب الى النبي .. فيشوف النبى طلحة و هو جاي عليه من بعيد ..
فيقول النبى لأصحابه: أيها الناس يأتيكم أبو طلحة بين عينيه الاسلام..
سبحان الله النبى كان يحس باللي جوه اللى قدامه ..و فعلا ييجي ابو طلحة و يبص لوجه النبي فيقول اشهد ان لا اله الا الله و انك رسول الله.. و يتزوج أبو طلحة أم سليم ♡

نكمل بكره إن شاء الله 🤍

سيرة_الرسول
الحلقة 72
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

و نكمل سوا جمال الصحابه فى المدينة..

كان فى صحابى اسمه《 ابو الدحداح》 كان غنى جدا و كان يملك بستان فيه ٦٠٠نخله ..
فكان ابو الدحداح قاعد مع النبى عليه الصلاة و السلام بالمسجد فيدخل عليهم اتنين و بعد شوية يتخانقوا الاتنين دول سوا.. طب ليه؟
اصل واحد منهم عنده قطعة ارض و التانى عنده نخلة علي الأرض دى ..
و صاحب الارض عايز يشتري النخلة من التانى عشان تتحل المشكلة ..
لكن الراجل التانى رافض بشدة و بيعند اوى اوى..
فالنبى قاله: يا هذا هلا تركت نخلتك وبعتها له و لك أيضآ نخلة فى الجنة ؟
فقال الرجل لا ..مكنش يقصد يعصى أمر رسول الله .. ولكن الراجل غضبان غضب شديد فمش مركز فى اللي بيقوله ..

بس أبو الدحداح سمع كلام النبى و بص فى وجهه و قال: يارسول الله من يشتري هذه النخلة تكن له نخلة فى الجنة؟
فقال النبى: اجل والله ..فقال ابو الدحداح لصاحب النخلة يا هذا هل تبع لى نخلتك ببستانى كله؟
فقال الرجل: ماذا تقول !! فقال أبو الدحداح أجل والله هو لك..
فقبل الرجل و اتحلت المشكلة..وقال النبى عليه الصلاة و السلام لأبو الدحداح : ماذا فعلت؟
.. فقال: يارسول الله أقرضت ربى بستانى لآخذ نخلة فى الجنة.. فأبتسم النبى وقال : وكم من نخيل فى الجنة لأبى الدحداح و كررها 3 مرات ..

تخيلوا يا جماعة كام نخلة النبي شافها لأبى الدحداح فى الجنة !! (تخيل أنت لما تتصدق بجنيه واحد عشان تساعد حد غلبان..كم لك فى الجنه من نعيم !! )
و مشى ابو الدحداح عشان يسلم البستان للرجل وكانت زوجة أبو الدحداح فى البستان فقال لها: يا أم الدحداح اخرجي أنتي وولدك فإنى اقرضت بستانى هذا لربى ..
وبكل فرحة تخرج ام الدحداح الزوجة الصالحة ويكون فى فم ابنها تمرة فتدخل اصابعها فى فمه و تخرجها وخرجت وهى بتقول : ربح البيع أبا الدحداح.. ربح البيع أبا الدحداح..🤍

الرسول صلى الله عليه و سلم قضى وقته يعلم الصحابة( من المهاجرين و الأنصار) احاديث عن الاخوة في الله ويقول : إن المتحابون فى الله يظلهم الله بظله يوم القيامة ...و ان الله تبارك و تعالى ينادي يوم القيامة و يقول اين المتحابون فى جلالي ..فيقومون و يقفون على منابر من نور يغبطهم عليها الملائكة و الانبياء و الصالحين ..

طيب كنا قلنا امبارح ان فى مشاكل بين قبيلتي الأوس و الخزرج فى المدينة ..
وكان بينهم معارك شديدة جدا. كان قبل الهجرة فى حرب اسمها البعاث و مات فيها مئات من اهل يثرب "المدينة"..
لكن النبى عليه الصلاة و السلام قدر يوحد الاوس و الخزرج ؛ وبقى يجلس عمر القرشي مع بلال الحبشي مع صهيب الرومي مع سلمان الفارسي كل ده بسبب المؤاخاة اللي اتكلمنا عليها المرة اللى فاتت..
الرسول عليه الصلاة و السلام مجمعهم رغم اختلاف أصولهم..

بس مرة واحد يهودي اسمه شأس بن قيس راح لصاحبه و قاله فى ذهول : ما فعل محمد؟
كيف جعل الاوسي يجلس بجانب الخزرجى .. فصاحبه يقول له اذهب إلي الاوس و قل لهم اتذكرون حرب بعاث و كم قتلوا منكم .. و كيف قتل كذا و كذا ....ثم عد للخزرج و قال لهم اتذكرون يا معاشر الخزرج حرب بعاث و كم قتلوا منكم ..

و فعلا راح عمل كده .. فبدأ الاوس و الخزرج في التشاجر.. و خرج من الاوس ناس بتقول: الحرب الحرب و من الخزرج كمان ناس تقول :الحرب الحرب و خرج ناس من الاوس يقولوا: موعدكم عند الظهيرة ..السيف السيف.... فيرد عليهم واحد خزرجي ويقول السيف السيف ..

فبسرعة راح صحابي للرسول صل الله عليه و سلم و قاله يلحق الحرب اللى هتقوم ..
فخرج النبى عليه الصلاة و السلام يجرى وقال: قال : ايها الناس مالكم ؟؟؟ اخرجكم الله من ظلمات الكفر للاسلام ..
أستعودون إلى ما كنتم عليه في الجاهلية !! لا تفعلوا هذا دعوها فإنها منتنة ..(يااااه شايفين.. ربنا عز وجل قال : إنما المؤمنون إخوة .. شايفين لما المسلمين يتخانقوا سوا ده شئ مكروه إزاى .. دعوهاااااا فإنها منتنة)

فيسكتوا كلهم و يكمل النبى كلامه و يقول : لا تعودوا إلى ما كنتم عليه..
لا تعودوا كفارآ يقتل بعضكم بعضا.. بعد ان اكرمكم الله بالإسلام و أنا بين اظهركم..
فيبكى الاوس و الخزرج و يحضنوا بعض و يرجعوا بيوتهم آمنين و يعض شأس بن قيس على يديه من الغيظ..
اليهود كانوا سبب فى مشاكل كبيرة و متاعب واجهت الدولة الإسلامية في المدينة ؛ و رغم كده الرسول عليه الصلاة و السلام كان حليم جدا معاهم إلا بعد غدرهم بالمسلمين وهنشوف بعد كده انهم هينطردوا من المدينة ..
وكان القانون اللى يخص اليهود فى المدينة اللى وضعه الرسول قبل غدرهم بيقول : ان اليهود امة من دون الناس.. لهم ما لهم و عليهم ما عليهم و لا إكراه فى الدين .. طيب دى المشاكل السياسية..

@

بالنسبة لإقتصاد المدينة .. الإقتصاد كله بإيد اليهود و بعد زيادة عدد المسلمين في المدينة ..بدأت اليهود فى تزويد أسعار السلع و ضيقوا على المسلمين.. فالرسول عليه الصلاة و السلام حل المشكلة دي بإنه أنشأ سوق خاص بالمسلمين .

وفى مشكلة تانية فى المياه..
المياه فى بئر روما .. و بئر روما ملك لواحد يهودي و المياه فى المدينة قليلة والراجل اليهودى ده كان بيزود أسعارها .. فيجى عثمان بن عفان رضى الله عنه و يروح لليهودى و يشترى منه البئر ..

لكن اليهودي للأسف استغل ده و طلب سعر كبير..و رغم كده وافق عثمان و لما جه يدفع .. قام اليهودى قال: هبيعلك بس بشرط.. البئر يتقسم نصين انا ابيع منه يوم و انت تبيع منه يوم .. يعنى هيبيع لعثمان نص البير بس.. فعثمان وافق.. وراح لرسول الله صلى الله عليه و سلم و قال له :يارسول الله قد أهديت هذا البئر للمسلمين .. يعنى المسلمين هياخدوا المياه ببلاش .. من غير ما يدفعوا فلوس♡ ..
فبدأ المسلمين يروحوا ياخدوا مياه فى يوم و اليوم التانى يقعدوا من غير مياه عشان ده يوم اليهودى وبيبيع بأسعار غالية..

فقام عثمان قايل لهم ياخدوا زى ما يحتاجوا و يخزنوا لليوم التانى فبكده مش هيشتروا حاجة من اليهودى ولا هيقعدوا فى اليوم بتاعه من غير مياه..
و المسلمين فعلا سمعوا كلام عثمان رضي الله عنه وعملوا كده..
فاليهودى يقف فى اليوم بتاعه بقى مش لاقى حد يشترى منه فبقى بيخسر ..
فراح اليهودي لعثمان و قرر أنه يبيع البئر كله و رغم كده طلب من عثمان نفس التمن .. و برده عثمان وافق..

(كان ممكن لو حد تانى مكان سيدنا عثمان كان ميعبرش اليهودى لأن خلاص مشكلة المسلمين اتحلت او يستغل الموقف و ميوافقش يدفع لليهودى المبلغ الكبير ده.. لكن هذه أخلاق اصحاب رسول الله صل الله عليه و سلم .. دى الاخلاق المسلمين )
و أشترى سيدنا عثمان البئر و كمان خلى المسلمين يرتاحوا من تخزين المياه .. ودفع تمن البئر .. و كأنه دفعه مرتين .. فوقف النبى صل الله عليه و سلم يقول : ما ضر عثمان ما فعله بعد اليوم (يعنى مهما غلطت يا عثمان ..الجنه بقت ليك.. مضمونه بعد اللى انت عملته للمسلمين )...

هنكمل سوا إن شاء الله 🤍

سيرة_الرسول
الحلقة 73
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

طبعا انتو عارفين ان النبي بيته جنب أخواله "بنى النجار" وشفنا اللى حصل و إزاى الناقة حددت مكان البيت.. والبيت اتبنى و جنبه المسجد النبوى وانتقل النبى عليه الصلاة و السلام لبيته ..
وكان بيت سيدنا النبى بسيط اوى.. اصل النبى كان متواضع و قريب من الناس..
و بتحكى عائشة رضي الله عنها وبتقول : والله ما رأى رسول الله خبز القمح بعينيه قط و لم يشبع من خبز الشعير قط..
( يعنى دايما الأكل مش كتير ..و خبز الشعير جاف جدا و لونه غامق اوى .. تخيلوا و كمان مش بيكفيه عشان يشبع .. الحمدلله على النعم اللى احنا فيها) ..
تخيلوا ده كان اكل رسول الله.. ورغم كده كان رسول الله يقول الحمدلله الذي اطعمني و سقاني برضا تام ..
قال تعالى: تَبَارَكَ الَّذِي إِن شَاءَ جَعَلَ لَكَ خَيْرًا مِّن ذَٰلِكَ جَنَّاتٍ تَجْرِي مِن تَحْتِهَا الْأَنْهَارُ وَيَجْعَل لَّكَ قُصُورًا ) اللهم صل على صاحب المقام المحمود 🤍

عارفين كمان بتقول السيدة عائشة رضي الله عنها: كان يمر علينا هلال تلو الهلال تلو الهلال و لا يوقد في بيت رسول الله نار.. (تقصد شهر ورا شهر مش بيطبخوا) فيرد عليها الزبير بن العوام ( تبقى خالته السيدة عائشة )
ويقول: يا خالة .. و ما كان يعيشكم ؟(كنتو بتاكلوا ايه؟)

قالت :الاسودان.. التمر و الماء ..( يااا..اختار النبي الهجرة و العيشة الصعبة دي فى سبيل تبليغ الدعوة لدين الله ).

ومن مواقف تواضع النبي ان مرة جه راجل من أهل المدينة و سأل أين رسول الله ..أين رسول الله.
كان الراجل مستنيه و عايز يشوفه اوى ، فدخل على النبي فالراجل اول ما شاف النبي اترعش من هيبة رؤية النبي صلى الله عليه و سلم و بدأ يبعد..
فلما النبى شافه بالشكل ده قام قايله: يا أخي لا تفعل هذا. إنما انا عبد و ابن أمه كانت تأكل القديد بمكة و طبطب عليه

و كان يقف النبي في المسجد النبوي و يمر عليه عابر سبيل و يطلب من النبي ان يضيفه و يأكله فيبعت لبيته و يقول هل عندنا طعام ؟
..فيجي له الرد :والذي بعثك بالحق نبيا ليس عندنا إلا الماء ..
فيقف الرسول عليه الصلاة و السلام على المنبر ويقول : ايها الناس من يضيف ضيف رسول الله الليلة ؟
فيخرج رجل من الصحابة بلهفه و يقول: أنا يا رسول الله و لكن ارجع لاهل بيتي أخبرهم و بعد ذلك اضيفه.. فيجرى الراجل على بيته و يقول لزوجته : هل عندك طعام ؟
قالت والله ليس عندنا الا شيء من شعير و قطعة عناق (حته لحمة) و لكنه طعام الاولاد.. فرد عليها و قال : لا تطعمي الاولاد نوميهم و انا سوف احضر ضيف رسول الله لياكل هو الطعام.

فوافقت الزوجة وقالت : أجل سوف أنوم الصبيان..و بقت توهم الولاد ان فيه اكل على النار لحد ما الولاد ناموا ( بس دلوقتى فى حاجة مهمة ..من الذوق و السنة ان يأكل المضيف مع الضيف عشان الضيف ميحسش بإحراج و يرضى ياكل و المشكلة دلوقتى الأكل قليل أوى مش هيكفى.. ده الأكل يدوووب يكفى الضيف بس) ..

فزوجها قال لها: عندما يأتي الضيف اصعدي كأنك تصلحي السراج ثم أطفئيه ليظن الضيف أنه فسد السراج ثم أنزلي وضعي أمام الضيف كل الطعام و ضعي أمامي و أمامك صحن فارغ و سنصنع كأننا نأكل (هنمثل اننا بناكل)..
فقالت له :اجل.. و فعلا أول ما الضيف جه راحت الزوجة عملت زى ما زوجها قالها بالظبط , و الضيف أكل و عدى اليوم الحمدلله و نام الزوج و الزوجة و الأولاد من غير ما ياكلوا شئ..

فلما جه وقت صلاة الفجر و خرج الصحابي للصلاة.. ففوجئ الصحابي ان النبى عليه الصلاة و السلام مستنيه و فاتح ذراعيه و قال له : أقبل يا هذا ..أقبل .. تعال ..مافعلت بضيفي البارحة ؟..
فقال يارسول الله مافعلت شيئآ.. فقال له رسول الله : ان الله قد ضحك من صنيعكما و قد اوجب لكم الجنة بما فعلتم ♡ ...

طيب فى مشكلة بتواجهه رسول الله فى المدينة دلوقتى..ايه هي؟
أهل الصُّفّة .. دول فقراء و عددهم 100 .. بلا مأوى ولا مطعم و لا ملبس .. و اسكنهم النبي في المسجد عشان يتصدق عليهم المسلمين و كلف النبي بعض الصحابة علشان يعلموا اهل الصُّفّة النجارة و الحدادة الصبح أما بالليل يعلموهم القرآن و أمور الدين و كانوا 70 صحابى اسمهم" القُرَّاء" و بعد شهور بقوا أصحاب دين و كمان معاهم حرفة بيشتغلوا بيها .. و كان الصحابي الجليل الشهير ابو هريرة من اهل الصُّفّة ..

و من رحمة النبى عليه الصلاة و السلام ان مرة واحد من أهل الصُّفّة جه المسجد و كان لابس يدوب قطعة قماش بتغطي العورة ..
فينظر النبي له و يصعب عليه أوي و يحمر وجهه و يغير النبي موضوع الخطبة و يطلب من الناس انهم يتصدقوا فمع إنتهاء الخطبة يكون كل اللى في المسجد تصدق على الفقراء اللى فى المسجد ..

@sanawichanal _قناة الثانويه
@B00Ks_BbOT _ بوت ڪتب
بوت تواصل
@Dr_mahm0ud_bot

فالراجل أكل و شرب و لبس .. ( كل واحد بيسارع على مساعدة الفقير.. لبس.. اكل ..شرب.. يعرف انه بيرفض ان وجه النبى يحمر من الغضب صل الله عليه و سلم .. و يعرف أنه بيحب ان ربنا الرقيب يشوفه بيقوم بدوره على الأرض و بيساعد العباد .
قال تعالى : إِنِّي جَاعِلٌ فِي الْأَرْضِ خَلِيفَةً

و مرة تانية كان الرسول بيخطب فى المسجد فدخل عليه رجل فقير و عزيز النفس..و النبي كان عارفه..
فأول ما النبى عليه الصلاة و السلام شافه قطع الخطبة و ناداه فرد و قال: لبيك يا رسول الله..
فكل اللى فى المسجد بصوا عليه ..فراح النبى عليه الصلاة و السلام قايل له: هل صليت تحيه المسجد ؟ فقال : لا .. فقال له النبى: صليها.. و عاد النبى للخطبة ..
(هو النبى عليه الصلاة و السلام عمل ايه؟
النبى عايز الناس تهتم بالراجل ده .. بس الراجل ده عزيز النفس مش هينفع حد يقدمله صدقة بصورة مباشرة ؛ فالنبى سلم عليه و كلمه قدام الناس عشان الناس تفكره راجل تبع النبى فساعتها يهتموا بيه) و فعلا بمجرد أن الخطبة أنتهت كانوا الصحابة راحوا للراجل و عاملوه احسن معاملة و اكلوه و لبسوه و خد كمان اكل لأهله ..

هنكمل سوا إن شاء الله
اذكروني بدعوة 🤍

سيرة_الرسول
الحلقة 74
يلا صلوا على النبى
اللهم صل وسلم وبارك على سيدنا محمد وعلى آله وصحبه اجمعين🤍

وفى المدينة فضل النبى عليه الصلاة و السلام يعلم المسلمين الاخلاق ؛ ويقول :
■ ياايها الناس ليس المسلم بالطعان و لا اللعان ولا الفاحش ولا البذيء...
■المسلم من سلم المسلمون من لسانه و يده ....
■لا يدخل الجنة من لا يأمن جاره بوائقه....
■لا يؤمن احدكم حتى يحب لاخيه ما يحب لنفسه...
■الراحمون يرحمهم الله..
■سباب المسلم فسوق و قتاله كفر...

و يزداد حب الصحابة للنبي ويزداد حبهم له و من كتر حب الصحابة للنبي بقوا يقلدوه فى كل شئ ؛ في مشيته .. تسريحة شعره .. لبسه.. وفي كل احواله ..و أخلاقه ♡..

طيب أتبقى مشكلة واحدة .. إزاى نجمع المسلمين فى الصلوات الخمس ؟ ( اصل مكنش لسه فيه آذان)

فواحد اقترح استخدام البوق .. بس النبي معجبتهوش الفكرة لأن اليهود بيستخدموه..
فقام واحد تانى اقترح يستخدموا الناقوس(الأجراس) والنبى رفضها لان يستخدمها النصارى..
ففى واحد من الصحابة اسمه عبد الله بن زيد كان مهموم لانه لقى النبي بيفكر و مهموم ..
فبقى عبد الله عمال يفكر فى طريقة عشان يحل المشكلة دى و يرتاح رسول الله و ينبسط .. فعبد الله نام و شاف رؤيه فى المنام ..

عبد الله بن زيد حلم بإنه ماشي في طرقات المدينة و قابل راجل شايل ناقوس فطلب عبد الله انه يديله الناقوس ده فرفض الرجل و قال لعبد الله هل أدلك على خير من هذا ؟
فقال عبد الله: أجل .. فرد الراجل و قال له: قل.. الله اكبر .. الله أكبر .. الله أكبر.. الله اكبر ؛ اشهد ان لا إله الا الله ؛ أشهد أن محمد رسول الله إلى آخر الآذان .. و أنتهى الحلم )

ويصحى عبد الله و يجري على النبي فى المسجد و يحكيله على الرؤيه..
فيرد النبى و يقول : إنها لرؤيا حق إن شاء الله فقم يا عبد الله و ألْقِ على بلال ما رأيت فإنه أندى صوتاً منك (يعنى عبدالله بن زيد مش بقى المؤذن لأن صوت بلال احلى ♡ الرسول لو كان بينا كان مش هيخلى غير اللى صوته جميل هوه اللى يأذن)

المهم قام عبد الله و قال لبلال رضي الله عنه على الآذان ووقف بلال يؤذن ؛ فبمجرد ما سمع عمر بن الخطاب رضي الله عنه صوت الآذان وهو في بيته خرج يجرّ رداءه بيجري بسرعة للمسجد النبوى ؛
وقال : يا رسول الله والذي بعثك بالحق لقد رأيت مثل ما سمعت الآن..
فيقول النبى : فلله الحمد.. (قال صلى الله عليه و سلم : الرؤيا الصالحة جزء من ستة وأربعين جزءاً من النبوة )..

بدأ مجتمع المنافقين في الظهور.. ناس بيبينوا انهم مسلمين لكن يبطنوا الكفر جواهم ..
بيكسبوا ود رسول الله و أصحابه عشان تستمر مصالحهم في المدينة بنفاقهم وكمان يكسبوا ود اليهود في نفس الوقت ..
كان على رأس المنافقين واحد اسمه عبد الله بن أبي بن سلول .. طيب ليه عبد الله بن أبى سلول بيحقد على الإسلام و رسول الله بالشكل ده؟
اصل يوم وصول النبي للمدينة .. كان عبد الله بن ابي بن سلول بيتم تتويجه سيدآ فى المدينة..
و لما وصل الرسول عليه الصلاة و السلام للمدينة ..
الناس سابت تتويج عبد الله و جريت لرؤية النبى .. فإتغاظ عبد الله جدا و اتملى قلبه بالحقد ..
و يفضل عبد الله زى ما هنشوف بعد كده يؤذي المسلمين لحد ما يموت..

طيب قريش.. اخبارها ايه بعد هجرة الرسول و الصحابة منها ؟

قريش هتموت من الغيظ ، هتتجنن..
ويتبعت جواب من سيد قريش إلى محمد ابن عبدالله : أظننتم انكم قد افلتم منا ! لا والله لنبعثن إليكم في كل عام جيش حتى نستأصل شأفتكم (جذوركم ).. والله لنقاتلنكم حتى نتفانى ..شايفين تهديد قريش! قريش مش بتهزر .

طيب وصل تهديد قريش للنبى عليه الصلاة و السلام بأنهم هيحاربوهم..
فيبدأ النبى في تكوين سرايا من الصحابة (سرية : مجموعة جنود بيخرجوا بس من غير رسول الله.. سواء يحاربوا أو لأ)....
وزاد تهديد قريش لدرجة انها أرسلت سرية قتالية بقيادة "كرز بن جابر الفهري" ؛ و دخلوا المدينة في نص الليل و حرقوا النخل و هدموا مناطق حيوية لكن مقتلوش حد و هربوا و مقدرش الرسول و الصحابة انهم يمسكوهم..طيب هتعمل إيه يا رسول الله ؟

هنعرف المره الجاية إن شاء الله 🤍

سيرة_الرسول
الحلقة 75
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

تلخيص غزوه بدر

علشان نقدر نستوعب الغزوات سوا.. هنزل حلقة الأول يبقى فيها تفاصيل كل غزوة فى نقاط مختصرة و كمان اسبابها .. و بعدين هنزل يوميآ بتفاصيل الغزوه كلها على حلقات بإذن الله♡

#غزوة_بدر

1- سميت بهذا الأسم : لان موقع الغزوة كان عند بئر اسمه بدر.
و يوم غزوة بدر ربنا عز وجل سماه فى القرآن ب " يوم الفرقان " طب ليه؟ عشان احداث يوم بدر فرّقت بين ان الدوله الإسلامية فى نظر العرب من دولة ضعيفة وفقيرة مهددة من باقي القبائل لدولة قوية ليها إعتبارها و كيانها ولاسباب تانية كمان ..

2- طرفي القتال : حوالى 1000 من قريش خارجين من مكة ب1000 ناقة و 200 فرس يعنى الجيش كله راكب ؛
اما الطرف التانى حوالى 313 من المسلمين مع رسول الله خارجين من المدينه ب70 ناقه فقط و هيركبوا الصحابة و رسول الله علي النوق دى بالتناوب و كل واحد هيمشى شوية؛ مكانوش عاملين حسابهم على القتال ومفيش معاهم غير مجرد اسلحة بسيطة للحماية .

أسباب الغزوة :
تهديد قريش لفظيآ للمسلمين بإرسال جواب تهديد بقتال المسلمين ؛ و رد رسول الله على الخطاب و قال انه لا يريد الحرب و لكن يريد ان يخلوا بينه و بين الناس (يعنى ميقفوش فى طريق دعوة الناس للإسلام). .
لكن ردت قريش على النبي و قالت انها مش هتسيب النبي ولا اصحابه حتى بعد هجرتهم من مكة.

** اعتدت قريش بالفعل على المسلمين بعتت قريش سرية هجمت عليهم بالليل (فبقت حياة رسول الله و دعوته للإسلام فى خطر شديد)..
رغم ان قريش اجبرت المسلمين انهم يسيبوا بيوتهم و اموالهم فى مكة و الصحابة هاجروا من التعذيب الشديد و محاولات قتل لرسول الله و رغم كل ده رايحيين ورا المسلمين بردو عشان يعتدوا عليهم..

**خروج المسلمين فى سرية عند منطقة اسمها النخلة لرصد حركه كفار قريش ؛
("سرية مخباراتية" والنبى عليه الصلاة و السلام امرها بالخروج للرصد فقط و لكن مش للقتال رغم ان قريش بادئة العدوان ..
و لكن الرسول عليه الصلاة و السلام كان حريص ان ميحصلش قتال و الدليل انه امر السرية بالخروج فى الأشهر الحرم "التى حرم الله تعالى فيها القتال") .

● الأحداث المترتبه على ذلك :
رصدت الإستخبارات ان فى قافلة تجارية تبع قريش كانت فى طريق رجوعها من الشام لمكة بقيادة " أبى سفيان بن حرب " و كانت كبيرة وفيها ألف بعير (ناقة)
وعليها فلوس كتير جدآ والمخابرات اللى تبع المسلمين عرفت ان القافلة تاجرت بأملاك و اموال المسلمين اللي اتعذبوا و اجبرتهم قريش على الهجرة من مكة بسبب إسلامهم لدين الخير و السلام و الاخلاق و الوفاء ويحرم الزنا و القمار و بيحقق مساواة بين العبد و السيد ..

** تحرك المسلمين لإستراد اموالهم فقط ( اموال المسلمين و شقاهم و حقهم و مش ينفع يسيبوه..( والله لا يستحي من الحق )

*يوصل خبر لأبي سفيان ان المسلمين هييجوا ياخدوا اموالهم .. فيطلب مدد من مكة لأنه فكر انه هيواجه قتال..
فيبعت واحد اسمه ضمضم لمكة عشان يبلغهم.. و لكن ضمضم الخبيث قام جارح الناقة واخد دمها و حطه على وشه و لبسه و نعكش شعره و يدخل ضمضم مكة
ويدعى ان المسلمين هجموا لقتال ابى سفيان .. وده كدب طبعا..

** تسمع قريش الكلام ده فيحرضهم ابو جهل بتجهيز جيش مقاتل و متجهز بكل ادوات الحرب من 1000 جندى.. و حاول واحد من المشركين بإقناع قريش انهم ميحاربوش محمد عليه الصلاة و السلام ؛ لان محمد مش عايز حرب و كل طلبات محمد عليه الصلاة و السلام انهم يخلوا بينه و ببن الناس و يسيبوه ينشر دين الله عز وجل ومن شاء فليؤمن ومن شاء فليكفر لكن ابو جهل اصر على الحرب و منع دعوة رسول الله لدين الإسلام و استمر فى تحريضه للحرب..

** عرف النبي عليه الصلاة و السلام ان قريش جهزت جيش ؛ وهدفها القتال و الصحابة اتخضوا جدااا لكن المسلمين بقوا مضطرين لمواجهه الجيش ده ..
هيتقابل الجيشين فى نص الطريق عند بئر بدر ، هيعسكر النبي فى مكان اسمه العدوة الدنيا ..
وقريش هتخرج من مكة وتعسكر في مكان اسمه العدوة القصوى( "العدوة" ده تل..جبل صغير).

**هتبدا المعركة بالمبارزة ..
هيطلع تلاتة من كفار قريش "عتبة بن ربيعة" ، "شيبة بن ربيعة" ، "الوليد بن عتبة" .. ( عتبة وابنه واخوه ) ...

ويقولوا : يا محمد أخرج لنا ثلاث من مهاجري قريش نبارزهم.. فيخرج 3 من صحابة رسول الله
"حمزة بن عبد المطلب" ، "علي بن ابي طالب" ، "ابو عبيدة بن الحارث بن عبد المطلب"
هيتقتل الصحابي الجليل ابو عبيدة ابن الحارث
وهيشتد القتال و هتستمر المعركة بين حوالى 1000 قرشي و حوالى 313 مسلم...

نهاية المعركة :
هتستمر المعركة وجيشهم كبير جدا وجيش المسلمين تعبان فيقف النبي علي التل ويدعي ربنا و يرفع إيده و يقول : اللهم انصرنا .. اللهم انجزني وعدك ..حتي يسقط رداءه من علي كتفيه الشريف..
فجري ابو بكر واخد الرداء وحطه علي ظهر النبي وحضن النبي صل الله عليه وسلم و قاله هون عليك يا رسول الله..
واول ما النبي خلص الدعاء تنزلت الملائكة استجابة الي دعاء رسول الله هتتنزل الملائكة وهتحارب و هيشوفوها الصحابة عياناً بياناً في ارض المعركة و ينتصر المسلمين ♡

التفاصيل فى الحلقات الجاية ان شاء الله 🤍

سيرة_الرسول
الحلقة 76
يلا بينا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر (ج1)
"إعتداء قريش و تهديدهم للمسلمين فى المدينة"

وقفنا المرة اللي فاتت و قريش متغاظة جدا و هتتجن ان النبى عليه الصلاة و السلام والصحابة هاجروا من مكة و استقروا فى المدينه و بعتوا جواب تهديد شديد لرسول الله فى المدينة؛
و قالوا : لا يغرنكم أنكم أفلتم إلى يثرب .. سنأتيكم فنستأصلكم و نبيد خضرائكم فى عقر داركم ( انتوا متخيلين إزاي الصحابة استقبلوا الكلام ده؟
بعد ما سابوا بيوتهم و اتغربوا لبلد كلها مشاكل و أمراض و منهم اللى هاجر مشي للمدينة؛ وبعد كل ده قريش برضو ناوية تيجي وراهم و لسه مصرة!! )

و يرد رسول الله عليهم و يقول: ما اريد إلا أن تخلوا بيني و بين الناس (سيبونى انشر الدعوة).. فيردوا عليه و يقولوا كلا والله لن نترككم أبدا ..

واعتدت قريش على أهل المدينة فعلا وتبعت سرية بالليل غدرآ بقيادة كرز بن جابر الفهري ؛ وحرقوا الزرع و هدموا اماكن فيها و هربوا ؛ والصحابة ملحقوش يمسكوهم ..
( دلوقتى حياة رسول الله فى خطر شديد و مصير الدعوة فى خطر ) ..

فيكون رسول الله سرية سميت بسريه النخلة و يأمرها بالخروج و كانت بقيادة عبد الله بن جحش و معاه 8 من الصحابة؛ و يعطى النبي جواب لعبد الله و يطلب منه انه ميفتحش الجواب إلا بعد مسيرة يومين فى الطريق..

و بعد يومين يفتح عبد الله الجواب فيجد الرسول عليه الصلاة والسلام بيطلب منه ان يذهب إلى نخلة كذا بين مكة و الطائف ودى كانت قريبة جدا من مكة (ف ده خطر عليهم )..
وبيقول النبي فى الجواب : أأتونى بأدق التفاصيل و الأخبار عن قريش ( بس ما يحاربوش.... طب ايه الدليل؟

الدليل ان الرسول عليه الصلاة و السلام باعتهم في الاشهر الحرم " التى حرم الله فيها القتال"...
( عشان يضمن عدم القتال ) ؛ ولا تجبر يا عبد الله احد من باقى الصحابة ان يذهب إلى هناك و ان اراد احد منهم الرجوع فأتركه يرجع ولا توبخه بالكلام..
(اصل النبي واثق في عبد الله انه هيقوم بالمهمة ولو هيفضل لوحده)
وقرأ عبد الله بن جحش كلام النبي للصحابة و ماحدش منهم رجع و كملوا الطريق عشان ينفذوا المهمة الإستخباراتية....

لكن فى الطريق تاه من الصحابة 2 واحد اسمه "عتبان بن غزوان "و "سعد بن ابي وقاص " عشان النوق بتاعتهم اتحركت بعيد عنهم و راحوا وراها و للأسف اسرتهم قريش ...

فلما عرف عبد الله غضب غضبا شديدا ؛ وشاف قافلة من قريش معدية ..
فقرر عبد الله انه يأسر 2 من القافلة ولكن واحد من الصحابة قاله ان رسول الله منعنا من القتال في الشهر الحرام و خرج واحد تانى يقول ان دي اخر ليلة في الشهر الحرام ..
واختلفوا الصحابة ( بس العامل النفسي و غدر قريش كان شديد عليهم و كام مرة قريش عذبت الصحابة عند البيت الحرام نفسه وفى الشهر الحرام كمان ) ..

فأسر الصحابة 2 من القافلة اللي تبع قريش و حصل مناواشات بينهم فقتل واحد اسمه عمرو بن الحضرمي ده كان من مشرك قريش.. وسقط ميتا ؛ وطبعا اتفزعوا الصحابة انهم قتلوا حد في الاشهر الحرم.. و ترجع السرية إلى رسول الله و يسالهم ايه الأخبار؟

فيحكوا للنبى اللى حصل فيغضب النبى غضب شديد و يقول ما أمرتكم بالقتال (ده الاشهر اللى حرم الله فيها القتال) ؛ ويرفض النبي دخول الاسرى للمدينة و يزعل من الصحابة و يمشى..
فينزل القرآن و يحل الموضوع بتوازن شديد و يقول رب العزة:
" يَسْأَلُونَكَ عَنِ الشَّهْرِ الْحَرَامِ قِتَالٍ فِيهِ قُلْ قِتَالٌ فِيهِ كَبِيرٌ وَصَدٌّ عَن سَبِيلِ اللَّهِ وَكُفْرٌ بِهِ وَالْمَسْجِدِ الْحَرَامِ وَإِخْرَاجُ أَهْلِهِ مِنْهُ أَكْبَرُ عِندَ اللَّهِ "
( يعنى اه مكنش صح يا اصحاب رسول الله ان حد يتقتل فى الاشهر الحرم لكن برده اللى عملته قريش اكبر عند ربنا من اللى حصل منكم لأنهم اجبروكم على الخروج من مكة و غربوكم و عذبوكم) ..
فيهدوا الصحابة و يعفو عنهم رسول الله و يحصل تبادل أسرى بين قريش..

طيب و القافلة القرشية حصل إيه لما رجعت لمكة ؟ راحوا يجروا يقولوا : ان محمد الذي يدعو لمكارم الاخلاق يقتل في الاشهر الحرم ( و كأن بقى للأشهر الحرم حساب عند كفار قريش.. طب ما كتير عذبتوا الصحابة فيها و البيت الحرام نفسه كتير اذيتوا النبي فيه.. مرة ترموا على ضهره سلا الجذور و هوه بيصلي ؛ و مرة واحد من كفار قريش يجيله من ضهره و يحاول يخنقه .. و عشان كل ده كلام قريش عن رسول الله مأثرش فى حد)...

وتعدي قافلة قرشية تانية راجعة من الشام لمكة بقيادة أبى سفيان بن حرب عليها اموال كتييييير جدا..
منين الاموال دى ؟ دى اموال المسلمين المهاجرين من مكة ..
قريش بتتاجر بيها و تبيع و تشترى .. ( ابو بكر سايب تسع محلات و صهيب الرومي فاكرين لما اجبروه يسيب 12جمل عليها اموال و ذهب من تعبه و شقاه.. كل ده قريش بتبيع و تشترى فيه ) ..
فترصد المخابرات اللي تبع المسلمين ان القافلة دى هتعدى و فيها اموال المسلمين..

فيقول رسول الله للصحابة اللى سابوا اهلهم و أموالهم طاعة لأمر الله و رسوله للهجرة من بلدهم مكة رغم ان قلبهم محروق على حاجتهم و كمان عرفوا أن قريش ناوية تكمل عدوان وباعتة تهددهم و باعتة سرايا وراهم للمدينة كمان ..

فيقول صل الله عليه و سلم للصحابه : اخرجوا الي القافلة واستردوا حقوقكم.. (استرداد الحقوق فرض على كل مسلم و المسلم مينفعش يبقى عاجز و ضعيف..)
.. مرة كان فى مشكلة بين اتنين فواحد منهم اتهاون فى استراد حقه و قال حسبى الله و نعم الوكيل..
فلما النبي وصلت له الحكاية دى قال :
اطْلُبْ حَقَّكَ حَتَّى تَعْجِزَ ، فَإِذَا عَجَزْتَ فَقُلْ : حَسْبِيَ اللَّهُ وَنِعْمَ الْوَكِيلُ ، فَإِنَّمَا يُقْضَى بَيْنَكُمْ عَلَى حُجَّتِكُمْ " )

طيب دلوقتى المسلمين خارجين يرجعوا حقوقهم وبس يعنى مش مجهزين لقتال و كان من الطبيعى ان العربى بيخرج الصحرا بسلاح لانه معاه ناقة لو جاع هيدبح ..
ومثلا معرض انه يقابل حرامية او حيوانات مفترسة فلازم يبقى معاه سلاح ل ده و بس مش اكتر..

لكن فى مشكلة
قريش فكرت ان المسلمين هدفهم انهم يحاربوهم مش مجرد أنهم طالبين إسترداد أموالهم .. فهتطلع إشاعة هتوصل قريش هتقلب الموازين ؟؟؟

هنعرفها سوا ان شاء الله 🤍

سيرة_الرسول
الحلقة 77
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين🤍

غزوة بدر (ج2)
إدعاء كاذب من ضمضم بن عمرو على المسلمين

شفنا إمبارح ابو سفيان ( قبل إسلامه) وهو بيحاول يهرب بأموال المسلمين فخرج بسرعة للإستطلاع بنفسه ؛ فسأل راجل عجوز في الطريق اذا كان شاف حد تبع رسول الله صل الله عليه و سلم ..

فرد الراجل وقال : نعم لقد رأيت أناس كثيرون مروا من هنا ، فسأله أبو سفيان عن المكان اللى استقروا فيه ؟..
و يروح أبو سفيان على المكان و يلاقي نوى تمر فيفهم أن كان محمد و أصحابه فى المكان عشان ده تمر المدينة..

فيبعت أبو سفيان واحد اسمه ضمضم بن عمرو عشان يبلغ قريش و يبعتوا له مدد " ناس أكتر" ..
لكن ضمضم عمل فعل خبيث جدا ..ضمضم جرح الناقة بتاعته و خد من دمها و لطخ وشه و لبسه بالدم و يدخل مكة وهو بيصرخ و يقول: اللطيمة ..اللطيمة ..الغوث الغوث .....
فيقولوا له مالك يا ضمضم ..فيقولهم : اجتمعوا عند الحرم و بعدين يحكي و يقول: هجم علينا محمد و أصحابه عند بئر بدر و أخذوا الأموال و قتلوا الناس و ضربونا.

فيقف أبو جهل و يقول : والله لا يبيتن رجل منكم إلا فى بدر..
هتعمل ايه يا ابو جهل ؟ هيجمع ابو جهل جيش بسرعة غير طبيعية.. جيش ما بين 950 ل 1000 جندى.. انتوا متخيلين العدد !!
و مش بس كده ب1000 ناقة و 200 فرس..
يعنى كل الجيش راكب و مرتاح و محدش هيمشي و معاهم أسلحة و جمال هتدبح هياكلوها فى الطريق و معاهم كل المعدات..
ابو جهل جهز الجيش بسرعة غير عادية.. طيب النبي فين دلوقتى ؟
النبي لسه موصلش لأبى سفيان أصلا و ضمضم كدااااب ..

طيب هو النبي اصلا طالع يحارب؟
لأ .. النبي طالع لقافلة أبى سفيان.. يعنى هيستردوا اموالهم و بس...
اه ممكن يحصل شد بس مش حرب يعنى.. طيب معاك إيه يا رسول الله؟ 313 صحابى .. و معاه من 70ل100 ناقة يعنى كل 3 افراد هيركبوا على ناقة واحدة بالتناوب و هيمشوا باقي السكة..

طيب هي المسافة من المدينة لبئر بدر كام كيلو ؟
من 300 او 350 كيلو ( يعنى لو كل 3 هيبدلوا بينهم و بين بعض على ناقة واحدة.. يبقى الواحد هيركب 100 او 150 كيلو .. يعنى يركب تلت المسافة ويمشى التلتين .. يعنى هيمشي حوالى 200 كيلو على رجله). ماهما مش عاملين حسابهم على حرب فعادي ان مجهودهم يروح فى المشي..انتوا متخيلين المشقة..

طب وانت يا رسول الله هتتناوب مع حد على بعير؟ اه ..النبى هيناوب مع 2 واحد اسمه أبو لبابة و التانى على بن ابى طالب رضى الله عنه ؛ وهما التلاتة بيبدلوا مع بعض على ناقة واحدة..
و يركب ابو لبابة شوية و على بن ابى طالب شوية فأبو لبابة أتضايق و قال لعلي : يا علي .. يركب النبي و نمشي انا و أنت؟ فقال علي : أجل يا ابو لبابة و قالوا ده للنبي بأن مينفعش تمشي .. فاركب و احنا هنمشى يا رسول الله..

فيرفض رسول الله يقول : لا والله ما أنتما بأقدر على المشي مني و ما أنا بأغنى عن الثواب منكما..
فيرفض النبى عليه الصلاة و السلام..

طيب ابو سفيان عمل ايه بعد ما بعت ضمضم ؟
ابو سفيان سلك طريق تانى ..عرف يلاقي سكة مش ممكن يكون النبي هيعدى منها..
ومشى منها و قام باعت جواب لقريش و يقولهم : يا معشر قريش لا تخرجوا، نجت العير " القافلة" .. ( تلاحظوا يا جماعة من الموضوع ده ان ابو سفيان مش بيسعى لحرب ولا بتاع مشاكل يمكن عشان كده ربنا أكرمه بالإسلام.. و أبو سفيان هيسلم بعد كده وهيبقى صحابى ♡ ).

المهم بعد ما ابو سفيان ما قالهم انا عديت خلاص.. متخرجوش..
فيقوم ابو جهل ميوافقش..ويقول : لا.. والله لنخرجن إلى محمد الليلة لنصل إلى بدر ولنبيتن ببدر هذه الليلة ونشرب الخمر ونذبح الجمال ونأكل و نطعم و ترقص المغنيات حتى تعلم العرب اننا لا نقاتل..

فيطلع واحد اسمه عتبة بن ربيعة و يقولهم : يا معشر قريش نجت القافلة لا تخرجوا ..
ما يريد محمد إلا ان تخلوا بينه وبين سائر العرب.. ( يبقى عتبة فاهم قضية النبى كويس و هي تبليغ الدعوة للإسلام )

و راح عتبة مكمل كلامه و قايل : لئن أصابته العرب..
إذن فهذا ما أردتم ولئن انتصر فعزه عزكم وملكه ملككم ( يعنى لو العرب قتلته يبقى هتخلصوا منه وتبقوا انتم بريئين من دمه و لو انتصر يبقى خير لأن هو فى الاخر قرشى وده هيعزكم ) فيرد ابو جهل و يقول : كلا والله لن نتركه ابدا..

و يبدأ أبو جهل يجهز الجيش.. الجيش خارج من مكة والجيش قرب يطلع خلاص ..
وفيه ناس خافت و مرضيتش تطلع.. ليه؟
لأنهم كلهم عارفيين ان النبي هو نبي الله حقآ و أن ربنا هيقف جنبه ... طيب فى واحد محدش يتصور انه مش راضي يطلع يحارب لانه قوى و شجاع..مين هو؟

هنعرف سوا إن شاء الله 🤍

سيرة_الرسول
الحلقة 78
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر (ج3)

شفنا امبارح ابو جهل و هو مُصر يجهز جيش كبير علشان يحارب النبى عليه الصلاة و السلام و شفنا كمان ان فى ناس خايفه تطلع لأنهم عارفين ان النبى محمد انه فعلا رسول الله و أكيد ربنا هيبقى جمبه..و فى واحد من كفار قريش كان قوى جدا و شجاع و رغم كده مكنش راضى يطلع مع الجيش.. مين هو؟ فاكريين الراجل اللى كان بيعذب بلال؟ كان امية بن خلف ..

اميه كان راجل ضخم جدا و قوى جدا فى منتهى الشجاعة .. لكن مكنش راضى يطلع مع الجيش و رجع بيته و تربس على نفسه باب بيته و أستخبى جوا .. طب ليه كل ده.. هوه ايه اللى مخوفه كده؟ أصل امية بن خلف من فتره بعد ما النبى هاجر للمدينه .. قام "سعد بن معاذ" سيد و رئيس المدينه رايح يعمل عمرة و يطوف حوالين الكعبه ..فسعد دخل الحرم فأول ما دخل سعد و لسه بيطوف حوالين الكعبه لقى فى وشه ابو جهل.. فقام ابو جهل وقف و مسك سعد من هدومه وقال : آويتم محمدآ !! والله لننتقمن منكم.

( طب ينفع يمسك ابو جهل سعد بالشكل ده.. و سعد يسكت؟!! لأ) يقوم سعد زاقق أبو جهل فيقع ابو جهل على الأرض ويقوم سعد قايل يا ابا الحكم لا ترفع صوتك هكذا ..فيفضلوا يتخانقوا مع بعض.. فجه مين؟ أميه بن خلف و أمية كان صديق قديم لسعد بن معاذ فمسك أميه سعد و قال له : يا سعد لا ترفع صوتك هكذا على ابا الحكم ( مينفعش عيب متعليش صوتك على ابو جهل) فقام سعد رادد عليه و قال: إليك عنى يا امية.. و الله يا امية لقد حدثنا رسول الله أننا قاتلوك (يعنى الرسول قال ان اميه هيموت )

فأميه راح قايل: أحقآ يا سعد؟ فقال نعم والله .. فيقوم قايل له : يا سعد..سأقتل خارج مكه أم فى مكه ؟ فقال سعد: لا ادرى ..(هوه أميه ماله؟ أميه مصدق كلام النبى جدا و عارف ان مدام النبى قال ان أميه هيموت يبقى اكيد كلام رسول الله حق .. شايفين إزاى الكفار كانوا عارفين ان محمد نبى لكن الكبر و العند هو اللى أخرهم عند طاعه رسول الله لحد ما ماتوا على الكفر) المهم من الوقت ده و أميه بقى مرعوب و مستنى لحظه موته.. فلما جت غزوة بدر فقال أميه: لن اخرج فى هذه المعركه و راح تربس و قفل على نفسه بابه ..فمراته أتخضت فقال لها كلام سعد بن معاذ و قال لها: و أرى اننى إن خرجت فإننى مقتول..

فقامت مراته قالت : إذن لا تخرج.. بس يجيله واحد صاحبه اسمه عقبة بن ابى معيط ( ده المجرم اللى مرة بصق فى وجه النبى الشريف صل الله عليه و سلم) فيفضل عقبه يخبط ..بس أميه ميفتحش لأنه خايف.. فيفضل عقبه يخبط يخبط.. فأمية يفتح الباب و يقول له ما تريد ؟ فيقول عقبة : يا أمية هلم معنا ..( يلا تعالى معانا فى الغزوه احنا طالعيين) فيقول أميه : لا لن اخرج و يصر.. فعقبة يمشى و يرجع لأميه تانى و هوه جايب معاه " المجمرة" دى حاجة بيبخروا بيها. فيخبط عقبه فيفتح أميه فيدخل عقبه و يشعل المجمرة ويلف حوالين أميه: و يقوله استجمر يا أميه فإنما انت من النساء.. استجمر..فإنما أنت من النساء (مدام مش عايز تطلع معانا يبقى انت من النساء) شايفين الصديق السوء!!..

المهم رد عليه أميه و قال: ويحك ما اراك تأخذنى إلا لمقتلى.. فيرد عقبه و يقول: انت من النساء..فيضايق أميه و يقول له: ويحك بئس ما جئت به !! بس امية هيسمع كلام صاحبه وهيخاف على سمعته فيقول أميه: إنى خارج.. فتجرى عليه مراته و تقوله: يا امية انسيت ما قاله لك سعد !! فقال : لا تخافى سأشترى اسرع فرس فى مكة ( عشان اى حاجة تحصل يطلع يجرى ) و فعلا راح أميه و أشترى اسرع فرس فى مكة .. بس ده هينفعه؟ لأ.. لان أميه فعلا هيموت زى ما النبى قال .. فيركب أميه الفرس و يطلع مع الجيش.. فى واحد تانى مش راضى يطلع مين هوه؟

ابو لهب..اصله مصدق النبى جدا فهو واثق ان النبى هينتصر .. عشان كده الله عز وجل سماهم الكفار( لأن كفر فى اللغه يعنى ستر و غطى و ليها نفس نطق بالانجليزى cover يعنى غطى.. و كفر فى كتاب الله معناها : ستر الحق و هما فعلا عرفوا الحق و ستروه و خبوه و كذبوه) المهم ابولهب مكنش راضى يطلع بس عيب اوى قدام العرب انه ميطلعش.. فيمثل انه عيان و يأجر شاب يطلع مكانه و يقوله خد سيفى وخد الفرس بتاعى اصل انا مريض و تعبان .. ويطلع الولد فعلا والجيش كله يخرج .. طب أبو لهب كده أرتاح؟ لأ .. هيفضل أبو لهب فى مكة لا عارف ينام ولا ياكل ولا يشرب. هيتجنن عايز يعرف ايه الاخبار.. و مش قادر يصبر..

فبعد كام يوم هيروح أبو لهب على بيت العباس عم رسول الله طب هو أصلا العباس موجود فى مكه؟ لأ طبعا العباس خرج مع الجيش ..طب إزاى ده العباس رغم كفره كان واقف يوم بيعه العقبه و بيوصى اهل المدينه على النبى انهم يحموه ..و كان حابب ياخد دور اخوه أبو طالب فى حمايته للنبى بعد وفاته ؟ اصل عشان كده العباس هيخرج مضطر.. غصب عنه و مش هيرفع سيفه فى المعركة.. بس ابو لهب من شده قلقه راح على بيت العباس..

يعنى عنده امل أن يمكن العباس يكون بعت اى اخبار لزوجته " أم الفضل"

فتفتح ام الفضل فتقول له : ما بك؟ فيقول : هل عندك اخبار ؟ فقالت: لا .. ليس عندى اخبار ،فيمشى ابو لهب بس يفضل قاعد قدام بيت العباس.. مستنى اى اخبار.. فيعدى واحد أسمه أبو سفيان بن الحارث ده كان جى من عند بئر بدر فابولهب شافه و سأله : ما يحدث ببدر؟

هنعرف سوا إن شاء الله 🤍

سيرة_الرسول
الحلقة 79
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر (ج4)

ابولهب قاعد على باب بيت العباس هيتجنن مستنى يعرف اى اخبار عن الجيش فى بدر .. فيلاقى واحد اسمه أبو سفيان بن الحارث معدى و كان ابو سفيان جى من بدر..فأبولهب قال له : اتيت من بدر؟ قال: اجل ، فقال له: ماذا حدث هناك.. فرد ابو سفيان بن الحارث و قال: والله يا ابا لهب ..كأننا اسلمناهم رقابنا يضربوننا كيف شاءوا، والله لقد رأينا جنودآ بيض على فرس بيض تقاتل ..و والله لو انهزمنا لا لوم على جيشنا ابدا .. (هوه شاف مين ؟شاف الملائكة وده كان فى نص المعركه..هنحكى عن ده فى التفاصيل بتاعت المعركه) فأبولهب مش مصدق الكلام اللى بيسمعه.. طب مين كان معدى والكلام ده أتقال قدامه؟

ابو رافع.. ده العبد اللى بيشتغل عند العباس " و ابو رافع كان كاتم إسلامه "..المهم اول ما سمع الكلام اللى اتقال.. اتخض و كانت فإيده صينيه قامت وقعت من ايده و صرخ و قال : هذه الملائكة ورب الكعبة.. هذه الملائكة ورب الكعبة..فمن كتر توتر ابو لهب قام قايم ضارب أبو رافع بالقلم على وشه وفضل يضرب فيه.. فأم الفضل جت تجرى و فى ايدها حديده و قامت ضاربه ابو لهب على راسه..و قالت: تضربه اذ غاب سيده! ( بتضربه عشان صاحب البيت مش موجود فيمشى ابو لهب ) بس عارفين بعد كده هيحصل إيه لأبو لهب ؟

هيجيله مرض جلدى و لو اى حد لمسه يتعدى وتبدأ أجزاء من جسمه تتساقط . و يبدا وشه يتشوه و المرض يكون معدى جدا فكل الناس تضطر تبعد عنه و تقرف منه فيتساب لوحده (ده اللى آذى النبى .. ده اللى كان بيمشى ورا النبى و ينشن بالطوب على العضمه اللى فى ضهر كعب رجله و ينزل الدم و النبى يمشى و يكمل تيبلغ القرأن للناس.. ولا يبص وراه و لا يفكر يؤذى ابو لهب حتى.. صل الله على سيد البشر ) و يشتد المرض على ابو لهب فتبدأ اجزاء تتساقط من جسمه و الناس تبعد عنه و يموت وحيدآ و هيكون لسه الجيش فى بدر..

و لما ابو لهب مات ، الناس كانت خايفه تدفنه، فتتعفن جثته و ريحتها تبقى صعبه جدا و لما هيرجع الجيش من بدر و قرايب ابو لهب يوصلوا لمكه هيلوموا الناس و يقولوا: أما تخشون احدا فى ابيكم ..( مش مكسوفيين من اللى عملتوه.. كده تسيبوه لحد ما جثته تتعفن!) فقالوا كنا نخشى العدوى : فقال: لا تخافوا انا معكم و جابوا خشب و فضلوا يزقوا ابولهب لحد ما حطوه فى مكان و حطوا عليه الطوب و الرمل و الزلط من بعيد .. قال تعالى : تَبَّتْ يَدَا أَبِي لَهَبٍ وَتَبَّ *مَا أَغْنَىٰ عَنْهُ مَالُهُ وَمَا كَسَب..النبى عليه الصلاه و السلام غالى اوى اوى و ابو رافع العبد المسلم اللى انضرب بالقلم ده كبير اوى عند ربنا و كل واحد بيراعى ربنا و بيحاول يجاهد انه يبقى فى طاعه ربنا عز وجل ده غالى اوى اوى و ربنا معاه و هينصره و يوفقه ).

طيب جيش المسلمين اخباره ايه؟.. احنا اخر حاجه قلناها ان المسلمين طالعين عشان يستردوا الاموال بتاعتهم من قافله ابو سفيان بن حرب ،فيقف المسلمين فى المكان اللى هتعدى منه القافله يوم و اتنين ..القافله متعديش و رغم ان ده ميعادها .. فالمسلمين يستغربوا.. فيجيب النبى اتنين من اكتر الناس اللى بيستأمنهم "الزبير بن العوام" و "على بن ابى طالب" عشان يطلعوا و يعرفوا ايه الاخبار.. فيطلع على و الزبير فى الطريق فيلاقوا ولدين بيملوا الجرادل مايه فياخدوهم للنبى عليه الصلاه و السلام عشان يسألهم فالولدين راحوا معاهم

لكن لحد ما وصلوا عند النبى عليه الصلاه و السلام كان النبى لسه واقف يصلى فالزبير قام سأل واحد من الولدين. و قاله: من اين انت؟ فقال انا غلام أسقى جيش قريش !!! فالزبير و على اتخضوا جيييييييييش قرييش ..جيييييش!!! فيقول على بن ابى طالب : ماذا تقول !! فالولد يقول انا اسقى جيش قريش.. فيزقوه و يقولوله بل انت تسقى قافله ابو سفيان .. فيقول لا والله بل انا اسقى جيش قريش.. و يفضلوا يزقوه و يشدوه.. و يقولوا له : انت تكذب و يزقوا فيه (هما مالهم متعصبين و بيزقوا الولد ليه ؟ اصلهم مش قادرين يستوعبوا ..جييييييش.. فكان نفسهم الولد يطلع بيكدب )

فالنبى يقول: يا على إذا قال الصدق ضربتموه! و اذا كذب تركتموه !..يعنى ايه ؟ النبى عايز يقول ان الولد بيقول الصدق ..يعنى ايه يا رسول الله ؟ احنا هنحارب؟ فالصحابه مزهولين..فيقول النبى عليه الصلاه و السلام :اجلس يا غلام.. قل لى كم عدد الجيش؟ فقال : لا ادرى.. فقال النبى : كم ينحرون فى اليوم؟ (بيدبحوا قد ايه؟) فرد الولد و قال: ينحرون تسعة و يوما اخر ينحرون فيه عشره.. طيب الجمل بيأكل 100 فالنبى عليه الصلاه و السلام أمى لا يقرأ و لا يكتب و لكن حسبها بوحى من الله..فقام قايل : إذن القوم ما بين التسعمائه و الألف.. لو يدبحوا 10 جمال وال 10 بتأكل 100 يبقى 1000=100x10 .. فيبص النبى للصحابه يلاقيهم مزهولين و مخضوضين.

فيسأل الولد تانى و يقول له: و من فى الجيش ؟ فيرد الولد و يقول: صناديد قريش.. ابو جهل..و البخترى بن هشام ..عتبة بن ربيعه..وشيبة بن ربيعة و عقبة بن ابى معيط وامية بن خلف وابى بن خلف و الولد فضل يقول اسماء كتير والصحابة مزهوليييين..فالنبى عليه الصلاه و السلام لما لقى الصحابه خلاص مش قادرين من الصدمه..فحب يرفع روحهم المعنويه فقالهم :الله اكبر..لقد ألقت إليكم قريش بفلذات اكبادها.. فبرده الصحابه يفضلوا ساكتين..( اصل العدد يا جماعه كبير 1000و المسلمين مش خارجين لحرب و عددهم 313 و مجهودهم سايبينه يروح فى المشى عااادى و يدوب بياكلوا تمر ..

اما الجيش القرشى بياكل جمال .. المقارنه كبيرة اوى.. بس حبيبك النبى عليه الصلاه و السلام بدأ يفكر فى المسلمين اللى معاه كلهم.. عايز يضمن انهم كلهم قادرين على الثبات و مواجهه جيش قريش لأن الموازين اختلفت..دلوقتى بقى فى حرب..طيب ال313 دول مسلمين من المهاجرين و الانصار و للا من مهاجرين بس؟ من المهاجرين و الانصار.. طيب المهاجرين دول جربناهم و شفناهم قبل كده مستعدين يموتوا نفسهم .. دول سابوا بيوتهم و مالهم فى سبيل الله.. يعنى تمام النبى مش شايف مشكله فيهم..طيب و الانصار؟

هنعرف المره الجاية إن شاء الله
دعواتكم 🤍

سيرة_الرسول
الحلقة 80
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوه بدر (ج5)
والله يا رسول إنا لصبر عند الحرب ،لصدق عند اللقاء ،و والله لنريك منا ما تقر به عينك ..

شفنا المره اللى فاتت ان النبى عليه الصلاه و السلام و الصحابه عرفوا ان قريش مجهزه جيش من 1000 جندى ،النبى عايز يطمن على المسلمين هيقدروا يواجهوا المفاجأه دى ولا لأ.. طيب المهاجرين دول جربناهم و شفناهم قبل كده مستعدين يموتوا نفسهم وسابوا بيوتهم و هاجروا فى سبيل الله.. .طيب و الانصار؟ النبى كان محتاج يطمن من ان الانصار عندهم الرغبه انهم يحاربوا بنفس رضا و قوه المهاجرين..

طيب زى ما احنا عارفين ان يوم بيعة العقبة.. لما جه ناس من اهل المدينه فى مكه و بايعوا و عاهدوا رسول الله على الإسلام.. اتعاهدوا على انهم يحموا رسول الله كأنهم بيحموا أهلهم بالظبط.. طيب و النبى راح المدينه و بقى قائدهم و هما بيحبوه اوى . طيب يبقى اطمن يا رسول الله و امرهم بالخروج لبدر على طول؟ اه يطمن .. بس النبى الكريم عليه الصلاه و السلام معملش كده.. و مرضيش يأمرهم.. النبى حب ياخد رأى الانصار و يخيرهم يحاربوا فى بدر ..ولا يرجعوا و يكمل النبى الطريق و معاه المهاجرين و يحاربوا كفار قريش لوحدهم؟

فيقف النبىﷺ و يقول للصحابه كلهم : ايها الناس لقد حدث كذا وكذا وخرج إليكم كفار قريش و فيهم فلان وفلان وفلان والقوم عددهم بين التسعمائة والالف.. ( النبىﷺ بيتكلم بمنتهى الشفافيه و بصراحه و وضوح) و بعدين يقول: أشيروا عليا.. فطبعا مين اول واحد هيقوم يرد على رسول الله؟ الصديق رضى الله عنه ♡ و يقول: يا رسول الله امض ونحن معك ما خرجنا والله للقتال ولكن اذا قاتلونا قاتلناهم .. فيقول النبى: جزاك الله خيرا ويقول تانى أيها الناس اشيروا علي( ها ايه رأيكم فى اللى قولته) و يقوم عمر رضى الله عنه يقول كلام زى ابو بكر و برده النبى يشكره و يعيد النبى كلامه تانى ايها الناس اشيروا عليا ..

طيب هو النبى بيعمل كده ليه .. دا النبى كان عادته لما يقول موضوع و ميلاقيش اعتراض من الناس عليه فكان يتوكل على الله و يمشى فى الموضوع.. لكن المره دى النبى فضل واقف مستنى و يعيد الكلام برده.. طب ليه؟ اصل ابو بكر و عمر مهاجرين و النبى كان عايز واحد من الانصار هوه اللى يقول رأيه و يتكلم .. النبى عايز يطمن ان الانصار موافقين بكل رضا انهم يشاركوا فى غزوه بدر ..

فيقوم صحابى جميل مهاجرى برده اسمه" المقداد بن عمرو " بس المقداد هيقول كلام حلو اوى هيقول: يا رسول الله لقد آمنا بك وصدقناك واعطيناك عهودنا و مواثيقنا، يا رسول الله امضى ونحن معك والله لا نقول لك ابدا كما قالت بنى اسرائيل لموسى اذهب انت وربك فقاتلا إنا ها هنا قاعدون... وانما نقول لك اذهب انت وربك فقاتلا إنا معكما مقاتلون.. فأبتسم النبى :') ♡.. و كانت كلمات جميله لدرجه ان الصحابى عبد الله بن مسعود قال: وددت لو قلت انا هذه الكلمة ..المهم يرد النبى على المقداد و يقول: جزاك الله خيرا يا مقداد

و يفضل النبى واقف مستنى: فأخيرآ يقوم سعد بن معاذ سيد الانصار يقول: كانك تريدنا يا رسول الله..( سعد فهم ان النبى عايز حد من الانصار يقول رأيه ) و يقول سعد: يا رسول الله لقد امنا بك وصدقناك واعطيناك عهدنا على ذلك ..قم يا رسول الله وتوكل على الله والله لو أستعرضت بنا هذا البحر لخضناه معك ( البحر عند العرب مخيف كان حاجه محدش بيقرب منها) فيقول سعد لو هتمشى بينا جوه البحر هنمشى معاك، و يقول: والله يا رسول إنا لصبر عند الحرب .. لصدق عند اللقاء ..والله يا رسول الله لنريك منا ما تقر به عينك.. فيفرح النبى عليه الصلاه و السلام ويقوله جزاك الله خيرا .. اجل يا سعد نتوكل على الله .. ويأخد النبي قرار ان احنا هنتصدى للعدوان.

يوصل للنبى اخبار ان جيش قريش دلوقتى عند العدوة القصوي ( العدوة ده تل)..هيعسكر جيش المسلمين فى العدوة الدنيا .. وقريش هتخرج من مكة وتعسكر في مكان اسمه العدوة القصوى .. طيب فين ابو سفيان ؟ كان ابو سفيان المفروض يعدى بالقافله من العدوه الدنيا بس ابو سفيان غير طريقه بعد ما عرف ان المسلمين هيبقوا فى العدوه الدنيا عند بئر بدر.. ربنا وصف المنظر ده في القران فقال تعالى :إِذْ أَنتُم بِالْعُدْوَةِ الدُّنْيَا وَهُم بِالْعُدْوَةِ الْقُصْوَىٰ وَالرَّكْبُ أَسْفَلَ مِنكُمْ وَلَوْ تَوَاعَدتُّمْ لَاخْتَلَفْتُمْ فِي الْمِيعَادِ وَلَٰكِن لِّيَقْضِيَ اللَّهُ أَمْرًا كَانَ مَفْعُولا ( الركب هو قافلة ابو سفيان )

النبى عليه الصلاه و السلام هيعمل خطة مبهرة ..في ظاهرها بسيطة جدا ولكنها مبهرة.. زمان العرب كانوا بيتعاملوا بالهمجية .. وبيحاربوا بطريقة الكر والفر ..يعني اضرب واجري .. فأول واحد يحط خطة عسكرية لرد العدوان و المعتدين كان النبي محمد عليه الصلاه و السلام.

ايه هي الخطة ؟ النبي هيوقف الجيش صف واحد و هيقسمهم نصين، ناس هتقف علي رجليها كتافها في كتاف بعض ومعاهم السيوف بتاعتهم و ناس تانيه هتقف وراهم فى صف تانى و هيبقوا قاعدين علي ركبتهم .. ومعاهم نبال .. ( دول اسمهم الرماه ) .. يعني ما بين كل اتنين واقفين في واحد قاعد علي ركبه بس مش باين منهم. هيبقى مستخبي.. فلما تيجي قريش من بعيد هتلاقى الجيش واقف صف واحد كل واحد كتفه في التاني .. فهتبدأ قريش ساعتها تحارب مبارزة عادية .. وأول ما قريش تقرب يقوم الصف ده ياخذ خطوة لورا ويطلع الرماة بالنبال يرموها علي جيش قريش فيتلخبط الجيش ويرتبك فينتصر المسلمين..

هيقف النبي يسوي الصفوف فيحصل موقف طريف جدا ..النبى و هو هيسوى الصفوف وبعدين يدور وشه .. يقوم صحابى اسمه " سواد" واخد خطوة لقدام .. فالنبي يرجع يبص علي الصف .. فيقول له استوى يا سواد.. وأول ما النبي يدور وشه فيرجع سواد يطلع بره الصف شويه و النبى يشوفه فيقول استوى يا سواد .. ويتكرر الموقف كذا مرة .. سواد بيهزر ..فالنبي عرف فكان معاه السواك فنغز بطن سواد وقاله له : استوي يا سواد .. فسواد قال: أى! أوجعتني يارسول الله اريد القصاص يا رسول الله .. فالصحابة بصوا لسواد واستغربوا .. فقال النبي : اجل يا سواد.. حقك يا سواد.. فيقف رسول الله صل الله عليه وسلم
و يقرب سواد بالسواك من بطن النبى الشريف.. و فجأه يحضن سواد النبي و يقبله و يبكى(لا سواد اقتص و لا عمل حاجه) .. فالنبي : سأله لما فعلت هذا ياسواد؟.. فقال سواد : يارسول الله اظن هذا اليوم يوم شهادة .. واظن اني ملاق ربي .. فأردت ان يكون اخر عهدي بالدنيا ملاصقة جسدي لجسدك يا رسول الله .. فيحضن النبي سيدنا سواد ويدعو له بالخير ويطبطب عليه .. ويقف سواد ويستوي في الصف .. وفعلا هيستشهد سواد في المعركة :') رضى الله عن سواد ♡ ..

هنكمل سوا ان شاء الله 🤍

سيرة_الرسول
الحلقة 81
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر(ج6)
قوموا إلى جنة عرضها السموات والارض

شفنا امبارح النبى عليه الصلاه و السلام لما عرف ان قريش جهزت جيش.. فجهز جيش المسلمين وحط الخطه و كان الصحابه تعبانين جدا لطول المسافه لحد بئر بدر ..طبعا بعد ما مشيوا تلتين المسافه على رجليهم.. و كانوا قلقانين و متوترين بعد ما عرفوا ان جيش قريش 1000 و المسلمين 300.. يعني اكتر من تلات اضعاف.. عارفين مع كل التعب اللى الصحابة فيه محدش منهم كان قادر ينام .. فتحصل معجزة ..

ربنا عزوجل بيقول في كتابه الكريم : "إِذْ يُغَشِّيكُمُ النُّعَاسَ أَمَنَةً مِّنْهُ وَيُنَزِّلُ عَلَيْكُم مِّنَ السَّمَاءِ مَاءً لِّيُطَهِّرَكُم بِهِ وَيُذْهِبَ عَنكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَام "الصحابه محتاجين يرتاحوا عشان يقدروا يحاربوا..فربنا سبحانه وتعالي يلقي عليهم النوم .. فالصحابة كلهم يناموا .. لدرجه ان بيقول بعض الصحابة : والله كان يسمع بعضنا لبعض غطيط (شخير من كتر النوم العميق ) ..و صحابى بيقول انه كان النبى موقفني حراسة وكان معايا سيف فوالله سقط السيف من يدي ٩ مرات لا ادري كيف يسقط وكيف انام فلما نزلت الاية عرفت ان الذي القي علينا النوم هو رب العالمين..

طيب و بقيت الايه ايه ؟وَيُنَزِّلُ عَلَيْكُم مِّنَ السَّمَاءِ مَاءً لِّيُطَهِّرَكُم بِهِ وَيُذْهِبَ عَنكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَام..الدنيا مطرت .. طب ايه فايدة المطر اللى ربنا انزله؟ اصل العدوة الدنيا اللي معسكر فيها المسلمين دي ارض صخرية ، فلما ينزل مطر كتير علي الارض الصخرية فتزداد صلابة .. ولما المطر ينزل على العدوة القصوي اللى معسكر فيها كفار قريش ..دي ارض طينية ، فلما ينزل المطر علي الارض الطينية فتزداد طينا.. فيبقي جيش المسلمين الارض تحته زي الحديد وجيش الكفار الارض تحته طريه جدا و بتزحلق و محدش يعرف يتحرك ويجري بسهولة فيه، دى معجزة من رب العالمين..

طيب دلوقتى الجيش نايم إلا رسول الله فضل سهران يدعى و يدعى و يدعى و يقول اللهم انصرنا ، اللهم نصرك الذي وعدتنا ..و بعد شويه ينام النبى دقائق بسيطة فيشوف رؤية .. القران بيقول : " إِذْ يُرِيكَهُمُ اللَّهُ فِي مَنَامِكَ قَلِيلًا وَلَوْ أَرَاكَهُمْ كَثِيرًا لَّفَشِلْتُمْ وَلَتَنَازَعْتُمْ فِي الْأَمْرِ " .. فربنا يخلى النبي يشوف فى المنام ان جيش المشركين عددهم قليل ..فالنبي يصحي معنوياته مرتفعة..

و يطلع النهار والمعركة هتبدأ .. فالنبي يبدأ يعلي الروح المعنوية و يشجع الجيش ، ويقول للصحابة : قوموا إلى جنة عرضها السموات والارض .. فيقف صحابي جميل اسمه عمير ويقول : بَخٍ بَخٍ يا رسول الله ( يعني الله الله ) فالنبي يقول له: لما تقول بخ بخ ياعمير ؟فقال عمير: يا رسول الله ، جنة عرضها السموات والارض :') ؟ فقال النبى: اجل يا عمير .. فقال عمير: يا رسول الله ، ادعوا الله ان اكون من اهلها .. فقال انت من اهلها ..

فعمير اتخض و فرح و قال: انا من اهلها يارسول الله ! فقال: اجل والله .. فلما هتبدأ المعركه زى ما هنشوف هيكون عمير في ايده تلات تمرات بياكلهم قبل المعركة فراح عمير باصص للتمرات و قال :يا عمير ليس بينك وبين الجنة الا هذه التمرات والله انها لحياة طويلة ..و رمى التمرات .. و دخل المعركه فقاتل لحد ما اتقتل و استشهد وكان اول شهداء المعركة :') ♡

صحابي تاني اسمه حارثة..حارثة شاب صغير ، مرة زمان قبل غزوة بدر كان حارثة ماشي في طرقات المدينة فقابل النبي .. فالنبي بيقوله كيف اصبحت ياحارثة ؟ فحارثة قال: اصبحت مؤمنا يارسول الله .. فقال النبي ياحارثة لكل قول حقيقة فما حقيقة ايمانك ؟ قال يا رسول الله اصبحت وكأني أري عرش ربي بارزآ و أرى اهل الجنة يتنعمون في الجنة واري اهل النار يصرخون في النار ..فأظمأت يومي و أيقظت ليلي بالقيام فرد النبي عليه وقال ' إذن عرفت.. فألزم يا حارثه ..

وفعلا لزم حارثه و ثبت على عباده الله عزوجل و في يوم المعركة ، وقف حارثة في الصفوف الاولي للجيش.. و قبل ما المعركة تبدأ ففجأه ييجى سهم فيقع في صدر حارثة فيقع حارثة و يموت ( تخيلوا !! كان لسة احاديث الجهاد النبي ماقالهاش .. ولسة الصحابة مش عارفين هل لو مات قبل ما يحارب يبقي شهيد وللا كان لازم يموت فى المعركه عشات يبقى شهيد؟ فجت ام حارثة تبكي وتقول يارسول الله مات حارثة قبل المعركة .. يارسول الله أحارثة في الجنه فأصبر ؟ ام هو فى النار فأبكى و قعدت تعيط جامد اوى ...

فرد النبى عليه الصلاه و السلام و قال : يا ام حارثة ان ابنك ليس في الجنة .. إنما هو في جنان فإنه قد اصاب الفردوس الاعلي، ففرحت الأم جدا جدا و فرح الصحابه..حارثة يا جماعه كان يدوب عنده ١٨ سنة ،رضى الله عن حارثه ♡

نكمل بكره إن شاء الله
دعواتكم 🤍

سيرة_الرسول
الحلقة 82
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر (ج7)
مات فرعون هذه الامة

اصطف جيش رسول الله صلى الله عليه و سلم، وتبدأ المعركة بمبارزة بين أشخاص و بعدها الجيشين هيحاربوا بعض ..

هتبدأ بالمبارزة و يطلع تلاتة من قريش واحد اسمه "عتبة بن ربيعة" و "شيبة بن ربيعة" و " الوليد بن عتبة" يعنى( اخو عتبة و عتبة و ابنه ) ...
فقالوا: يا محمد اخرج لنا ثلاثة نبارزهم..
فخرج ثلاثة ملثمين.. فقال عتبة : من انتم ؟ فقالوا : نحن من الأنصار ..فقال عتبة: لا .. بل نريد اكفاءنا ( احنا مش عايزينكم احنا عايزين القرشيين اللي هاجروا من مكة).. يا محمد اخرج إلينا اكفاءنا..

فالنبي يقول : قُم يا حمزة بن عبد المطلب .. قُم يا علي بن ابي طالب قُم يا ابو عبيدة بن الحارث بن عبد المطلب..
شايفين النبي عليه الصلاة و السلام يوم ما قرر يضحي مش هيضحي بالغريب و يخاف على نفسه و أهله ..لأ..النبى هيضحي بأسرته و اهله صل الله عليه وسلم ..
فيطلعوا التلاته يبارزوا و قدامهم التلاتة القرشيين ..

فطبعاً حمزة" أسد الاسلام" هيبارز الوليد و يقتله .. و علي بن ابي طالب "فارس شجاع" هيقتل عتبة بن ربيعة بعد دقايق من المبارزة..
ويتبقى شيبة بن ربيعة و" الصحابى الجليل" أبو عبيدة بن الحارث بن عبد المطلب ويفضلوا يبارزوا بعض فطعنوا بعض.. و قام شيبه بن ربيعة رفع سيفه و بتر ساق ابو عبيدة رضى الله عنه فلما حمزة شاف المنظر ده غلي الدم في عروقه وأخذ سيفه و قتل شيبة بن ربيعة.

و بدأ ابو عبيدة ينزف وينزف كتييير .. فالصحابة شالوه وحطوه على الارض قدام النبي ، فقام النبى قايل لا تضعوا رأسه علي الارض ولكن ضعوه في حجري ♡ (حنين اوى صل الله عليه و سلم )..
و بعدين نزل النبي علي ركبه و حضن أبو عبيدة و ابو عبيده غائب عن الوعي بسبب الدم الكتير اللى فقده..

بس اول ما النبي حضنه صحي و بص للنبي و قاله : يارسول الله ،أراضٍ عني؟ فبكي النبي ورفع كفه الي السماء وقال : اللهم اني أُشهدك أني راضٍ عن أبو عبيدة بن الحارث فأرضى عنه .. ويكررها النبي.

فيفتح ابو عبيدة عينيه ويبص للنبي ويبتسم اخر ابتسامة في عمره .. وتفارق روحه بدنه ويستشهد ابو عبيدة بن الحارث .. وينزل كلام رب العزة :
" هَٰذَانِ خَصْمَانِ اخْتَصَمُوا فِي رَبِّهِمْ فَالَّذِينَ كَفَرُوا قُطِّعَتْ لَهُمْ ثِيَابٌ مِّن نَّارٍ يُصَبُّ مِن فَوْقِ رُءُوسِهِمُ الْحَمِيم يُصْهَرُ بِهِ مَا فِي بُطُونِهِمْ وَ الْجُلُودُ كُلَّمَا أَرَادُوا أَن يَخْرُجُوا مِنْهَا مِنْ غَمٍّ أُعِيدُوا فِيهَا وَذُوقُوا عَذَابَ الْحَرِيق "...

و بعد إنتهاء المبارزة هيلتحم الجيشين ، اى جيش بينقسم إلي ميمنة و ميسرة ومقدمة ومؤخرة وقلب ..

النبي قال للجيش كلمة السر علشان بعد المبارزة نبدأ الإلتحام..
إيه هي الكلمة ؟ "شُدوا " ..
وبعد ما بدأ الإلتحام فى صحابي اسمه عبد الرحمن بن عوف المهاجري كان أمير الميمنة " ميمنة الجيش" ؛
فعبد الرحمن بيحكي قصة عظيمة اوى و بيقول : كانت معي الميمنة فنظرت فيها فإذا هى بضعة عشر رجلاً يعني حواليه من ١٥ الي ٢٠ رجل بس و طبعا ده قليل أوي .. فعبد الرحمن بيقول: فقلت في نفسي ، انظر لعل معي رجال أشداء، فنظرت عن يميني فإذا بغلام لم يبلغ الحلم (طفل يادوب 9 سنين)...

فلما عبد الرحمن شاف ده قام قايل : فقلت قد علمت مكاني اليوم ، فوجدت احد يشدني من ثيابي ، فنظرت عن يميني فقلت ما تريد يا غلام ؟
فقال: ياعم، أين ابي جهل ؟ فقلت: وما تريد انت من ابي جهل؟!!
فقال الغلام : سمعت انه يسب رسول الله، ووالله لا يفارق سوادي سواده حتي يموت الأعجل منا ؛
وبعدين قال الغلام : يا عم اخفض صوتك حتي لا يسمع ابن عمي فيسبقني إلى ابو جهل (اصل ابن عمه غلام تانى واقف على شمال عبد الرحمن ، اصلهم بيتسابقوا على نصره رسول الله .. ا
أحنا كمان لازم ننصر رسول الله .. نصرة دين الله و رسوله هتثبتك، قال تعالى:" يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ وَيُثَبِّتْ أَقْدَامَكُم" ....

هتثبت على صلاتك و دينك و مش هتبقى مهزوز ساعه البلاء.. نصره النبى هتبرأ بيها الإسلام من اللي شوهوا صورته.. نصرة النبي بنشر سيرة رسول الله و اخلاقه الحميدة و رحمته الواسعة لان اللي بيسب رسول الله بيسب التشدد و الإرهاب و هما متصورين ان دول بيقتدوا برسول الله .. ولكن ابدآ..حاشاه سيد الخلق اللي ربنا جعله على خلق عظيم.. رحمة للعالمين صل الله عليه و سلم ).

فبيقول عبد الرحمن فتعجبت ، و رفعت رأسي فإذا بغلام اخر على يسارى يغمزني فنظرت فإذا هو في نفس عمر وطول الغلام الاول .. ( دول ولاد عم واحد اسمه معاذ بن عمرو و التانى معاذ بن عفراء ) فقال عبد الرحمن: ماذا تريد ؟ قال : ياعم.. اين ابو جهل ؟ فقال: ما تريد انت من أبي جهل ؟

قال: يا عم والله قالت لى أمي إن لم تقتل ابي جهل فلا تعود فإنه يسب رسول الله ؛ والله لا اتركه حتى اقتله و لكن يا عم اخفض صوتك حتي لا يسبقني إليه ابن عمي ..

فعبد الرحمن بيقول : فنظرت إليهما فهما لم يتجاوزا العشر سنوات ( متنسوش ان جو الصحراء و التربية الشديدة كانت بتخلى الاطفال عندهم نضج كويس فى السن ده )..

و بيقول عبد الرحمن : من شدة لين عظام الغلامين فكانا قد ربطا الأسياف علي ذراعيهما ( ميعرفش يشيل السيف فرابط السيف علي دراعه علشان يرفع اول ما يرفع ايده.. يترفع السيف .. و ليه ده كله ؟ عشان سمعت انه يسب رسول الله ..
فبيقول عبد الرحمن بن عوف: فلما نظرت اليهما ارتفعت نفسي ..و بعد مرور بعض الوقت رأيت ابي جهل فقلت لهم ها هو صاحبكم ها هو من أردتموه..

فأنطلق الغلامين كالسهمين يجريان ..يتسابقان إلي ابي جهل .. فنظرا إليه فقال احدهما للأخر : إن ابا جهل ضخم..كيف نقتله ؟
فرد الثاني و قال: لا عليك فلنضع خطة ، أنت تضرب رجلين الفرس حتى يقع ،و حينها أنا أقتله ، فقال: اتفقنا ..
فقام الاول ضارب الحصان بالسيف في رجله فالحصان وقع علي الارض .. فابو جهل وقع من فوق الحصان.. فقام الغلام التانى ضارب ابو جهل فى رقبته.. فشافهم مين ؟
عكرمة بن ابي جهل ..فطلع بسرعة يجري وراهم و لحق عكرمة واحد منهم و ضربه بالسيف على كتفه فنزف كتير بس كمل جرى .. عشان خاف ابن عمه يسبقه الي رسول الله فيفوز برضا النبي قبله ♡ ..

فييجى الغلام و يقول : فوصلنا إلي رسول الله فوقفنا أمامه و قلنا: قتلنا ابو جهل..قتلنا ابو جهل .

فقال النبي : آلله الذي لا إله غيره ؟ (بجد.. أتقتل!! ) ؟ فقلنا والله يا رسول الله ..وبعدين بدأ الغلامين يزقوا بعض .. واحد يقول انا اللي قتلته و التانى يقول لأ أنا اللي قتلته،
فقال النبي : اسكنوا.. أهداؤوا ..فقال : هل مسحتما سيفيكما ؟
فقالا : لا .. قال النبى : أروني سيفيكما ..
فالنبى شاف الدم علي السيفين .. فقال كلاكما قتله ..

بس النبي لسه مش مصدق ، فجاب عبد الله بن مسعود ( ده اللى كان اول من جهر بالقرآن بعد رسول الله و قريش مسكته كذا مرة و ضربته).. فقال له النبي : يا بن مسعود اذهب و تأكد ان كانوا قتلوه أم لا..

فقال بن مسعود: سأفعل يارسول الله .. فبيقول عبد الله : فجريت إليه ( ابو جهل) ..فرأيته في الرمق الاخير..( روحه بتطلع خلاص) ..

فوضع بن مسعود قدمه علي صدر ابو جهل .. فقال ابو جهل: لم يبقي الا انت يا عبد تضع قدمك علي صدري!!!.. ثم قال من انتصر اليوم ؟
فقال بن مسعود: الله ورسوله يا عدو الله ..
فضغط عبد الله ابن مسعود عليه بالسيف فقضى عليه .. و بيقول عبد الله : فجعلت اجري الي رسول الله ابشره وكانت الارض لا تحملني من الفرح فقلت : أبشر يا رسول الله.. مات ابوجهل.. فرد النبى و قال : مات فرعون هذه الامة ..

هنكمل سوا إن شاء الله 🤍

سيرة_الرسول
الحلقة 83
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر(ج8)
هَذَا جِبْرِيلُ آخِذٌ بِرَأْسِ فَرَسِهِ، عَلَيْهِ أَدَاةُ الْحَرْب

حكينا المرة اللي فاتت ان مات فرعون هذه الأمه "أبو جهل" مات ..فاكرين قد إيه عذب الصحابه، فاكرين لما عذب السيده سميه و أتقتلت و بقت أول شهيدة فى الإسلام .. أبو جهل اللى اتهجم على رسول الله فى الحرم و فتح راسه و النبى فضل ينزف و بعدها راح سيدنا حمزه عم الرسول وضرب ابو جهل .. ابو جهل أذانا و أذى الصحابه فى رسول الله :'( و الحمدلله الذى شفا قلوب المسلمين بموت أبو جهل ) طيب دلوقتى المعركه مستمرة و وسط المعركة يقوم النبى عليه الصلاة و السلام قايل : من رأي ابو البختري بن هشام فلا يقتله ، من رأي العباس بن عبد المطلب "عم الرسول" فلا يقتله .. من رأي أبو العاص بن الربيع فلا يقتله " أبو العاص ده جوز زينب بنت رسول الله ".. طيب ليه يا رسول الله امرت ان محدش يقتلهم؟

لان العباس وابو العاص بن الربيع خرجوا مغصوبين.. مكانوش عايزين يحاربوا النبى ..لكن ابو البختري خرج للمعركه بمزاجه ، طيب ليه يا رسول الله أمرت بعدم قتله؟ هقولكوا.. عارفين مين ابو البخترى ده؟ ده المشرك اللى شارك مع المجموعه اللى انزعجت من صحيفه قريش لما قريش كتبت الورقه اللى كانت بتنص على حصار بنى هاشم إقتصاديآ و إجتماعيآ لمده 3 سنين .. لا أكل و لا شرب و لا زواج .. ويومها خطط ابو البخترى مع مجموعه من اهل قريش انهم يقلبوا الرأى العام على الصحيفه دى و فعلا اتفك الحصار و التفاصيل قولناها فى الحلقات من فتره..فالنبى حبيبى صل الله عليه و سلم فى غزوة بدر وقف و قال: لا تقتلوا ابو البخترى هشام وفاءآ له بيوم الصحيفة ♡ (محدش يقتله وفاءآ له عشان ساعدنا في يوم من الايام)..

ففى واحد من الصحابة بيقول: في وسط المعركة لاقيت قدامى ابو البختري بن هشام و جانبه واحد صاحبه ف لفيت من ورا ابو البختري و قتلت صاحبه و مشيت.. فأبو البختري مش مصدق ..فقال له : لم لم تقتلني اولآ. فقال: امرنا رسول الله الا نقاتلك .. فقال ابو البخترى: و لما؟ فقال : وفاءا لك بيوم الصحيفة.. قال ابو البختري : أرايت ان قتلتك انا ؟ فقال الصحابى : أفر منك طاعة لرسول الله ، لقد امرنا ألا نقتلك.. فبدأ ابو البختري يحارب الصحابى عايز يقتله ..والصحابي بقى يجري و يبعد .. لحد ما ابو البختري رفع السيف و خلاص هيقتله .. فقام الصحابى دافع عن نفسه و قتله.. فراح الصحابى للنبي يبكى وقال : يا رسول الله أمرتنا ألا نقتله ولكنه والله كاد يقتلني ..فقال النبي: لا عليك ، إنما فقط أردنا الوفاء..

و تفضل المعركة مستمرة وجيش قريش كبير اوى و جيشنا عدده قليل و بدأ يتعب..و المعركه بقت شديده.. فيقف رسول الله عليه الصلاه و السلام علي التل و يدعي ربنا و يقول : اللهم انصرنا .. اللهم انجزني وعدك .. اللهم ان تهلك هذه العصابة، لا تُعبد في الارض..(العصابه يعنى المجموعه..يقصد جيش المسلمين) و فضل يدعي ويبكي ويدعي لحد ما سقط رداءه من علي كتفه الشريف صل الله عليه و سلم :'( .. فجري ابو بكر الصديق عليه و أخد رداء النبى من على الأرض وحطه علي ضهر النبي وحضن النبي صل الله عليه وسلم . و قال له : هون عليك يا رسول الله، سيستجيب لك الله ..ان الله سينجزك وعده يا رسول الله.. و اول ما النبي خلص الدعاء تنزلت الملائكة استجابة إلي دعاء رسول الله ..يستنجد حبيب الله بالله تعالى، فينصره رب العزه بالملائكه و هتتنزل الملائكة و هتحارب.

فيقول رسول الله "هَذَا جِبْرِيلُ آخِذٌ بِرَأْسِ فَرَسِهِ، عَلَيْهِ أَدَاةُ الْحَرْبِ" فجبريل بنفسه نزل يشارك في الموقعة، و جه وهو يمسك بلجام فرسه، والتراب يتصاعد من حول الفرس، و وراه ألالاف من الملائكة ترفع سيوفها وعليها عدة الحرب، قال تعالى عن يوم بدر: " إِذْ تَسْتَغِيثُونَ رَبَّكُمْ فَاسْتَجَابَ لَكُمْ أَنِّي مُمِدُّكُمْ بِأَلْفٍ مِنَ الْمَلاَئِكَةِ مُرْدِفِينَ" يعنى متتابعين ..مجموعه و وراها التانيه.. قال تعالى : إِذْ تَقُولُ لِلْمُؤْمِنِينَ أَلَنْ يَكْفِيَكُمْ أَنْ يُمِدَّكُمْ رَبُّكُمْ بِثَلاَثَةِ آَلاَفٍ مِنَ الْمَلاَئِكَةِ مُنْزَلِينَ*بَلَى إِنْ تَصْبِرُوا وَتَتَّقُوا وَيَأْتُوكُمْ مِنْ فَوْرِهِمْ هَذَا يُمْدِدْكُمْ رَبُّكُمْ بِخَمْسَةِ آلاَفٍ مِنَ الْمَلاَئِكَةِ مُسَوِّمِينَ" " طيب يارب ليه كل العدد ده يااا 5000 ده عدد كبييير جدا اضعاف اضعاف الجيش الكافر..؟ ربنا نزل العدد ده لإدخال السرور والفرح على المؤمنين، يقول تعالى: " ومَا جَعَلَهُ اللهُ إِلاَّ بُشْرَى وَلِتَطْمَئِنَّ بِهِ قُلُوبُكُمْ"

@