فيسأل الولد تانى و يقول له: و من فى الجيش ؟ فيرد الولد و يقول: صناديد قريش.. ابو جهل..و البخترى بن هشام ..عتبة بن ربيعه..وشيبة بن ربيعة و عقبة بن ابى معيط وامية بن خلف وابى بن خلف و الولد فضل يقول اسماء كتير والصحابة مزهوليييين..فالنبى عليه الصلاه و السلام لما لقى الصحابه خلاص مش قادرين من الصدمه..فحب يرفع روحهم المعنويه فقالهم :الله اكبر..لقد ألقت إليكم قريش بفلذات اكبادها.. فبرده الصحابه يفضلوا ساكتين..( اصل العدد يا جماعه كبير 1000و المسلمين مش خارجين لحرب و عددهم 313 و مجهودهم سايبينه يروح فى المشى عااادى و يدوب بياكلوا تمر ..

اما الجيش القرشى بياكل جمال .. المقارنه كبيرة اوى.. بس حبيبك النبى عليه الصلاه و السلام بدأ يفكر فى المسلمين اللى معاه كلهم.. عايز يضمن انهم كلهم قادرين على الثبات و مواجهه جيش قريش لأن الموازين اختلفت..دلوقتى بقى فى حرب..طيب ال313 دول مسلمين من المهاجرين و الانصار و للا من مهاجرين بس؟ من المهاجرين و الانصار.. طيب المهاجرين دول جربناهم و شفناهم قبل كده مستعدين يموتوا نفسهم .. دول سابوا بيوتهم و مالهم فى سبيل الله.. يعنى تمام النبى مش شايف مشكله فيهم..طيب و الانصار؟

هنعرف المره الجاية إن شاء الله
دعواتكم 🤍

سيرة_الرسول
الحلقة 80
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوه بدر (ج5)
والله يا رسول إنا لصبر عند الحرب ،لصدق عند اللقاء ،و والله لنريك منا ما تقر به عينك ..

شفنا المره اللى فاتت ان النبى عليه الصلاه و السلام و الصحابه عرفوا ان قريش مجهزه جيش من 1000 جندى ،النبى عايز يطمن على المسلمين هيقدروا يواجهوا المفاجأه دى ولا لأ.. طيب المهاجرين دول جربناهم و شفناهم قبل كده مستعدين يموتوا نفسهم وسابوا بيوتهم و هاجروا فى سبيل الله.. .طيب و الانصار؟ النبى كان محتاج يطمن من ان الانصار عندهم الرغبه انهم يحاربوا بنفس رضا و قوه المهاجرين..

طيب زى ما احنا عارفين ان يوم بيعة العقبة.. لما جه ناس من اهل المدينه فى مكه و بايعوا و عاهدوا رسول الله على الإسلام.. اتعاهدوا على انهم يحموا رسول الله كأنهم بيحموا أهلهم بالظبط.. طيب و النبى راح المدينه و بقى قائدهم و هما بيحبوه اوى . طيب يبقى اطمن يا رسول الله و امرهم بالخروج لبدر على طول؟ اه يطمن .. بس النبى الكريم عليه الصلاه و السلام معملش كده.. و مرضيش يأمرهم.. النبى حب ياخد رأى الانصار و يخيرهم يحاربوا فى بدر ..ولا يرجعوا و يكمل النبى الطريق و معاه المهاجرين و يحاربوا كفار قريش لوحدهم؟

فيقف النبىﷺ و يقول للصحابه كلهم : ايها الناس لقد حدث كذا وكذا وخرج إليكم كفار قريش و فيهم فلان وفلان وفلان والقوم عددهم بين التسعمائة والالف.. ( النبىﷺ بيتكلم بمنتهى الشفافيه و بصراحه و وضوح) و بعدين يقول: أشيروا عليا.. فطبعا مين اول واحد هيقوم يرد على رسول الله؟ الصديق رضى الله عنه ♡ و يقول: يا رسول الله امض ونحن معك ما خرجنا والله للقتال ولكن اذا قاتلونا قاتلناهم .. فيقول النبى: جزاك الله خيرا ويقول تانى أيها الناس اشيروا علي( ها ايه رأيكم فى اللى قولته) و يقوم عمر رضى الله عنه يقول كلام زى ابو بكر و برده النبى يشكره و يعيد النبى كلامه تانى ايها الناس اشيروا عليا ..

طيب هو النبى بيعمل كده ليه .. دا النبى كان عادته لما يقول موضوع و ميلاقيش اعتراض من الناس عليه فكان يتوكل على الله و يمشى فى الموضوع.. لكن المره دى النبى فضل واقف مستنى و يعيد الكلام برده.. طب ليه؟ اصل ابو بكر و عمر مهاجرين و النبى كان عايز واحد من الانصار هوه اللى يقول رأيه و يتكلم .. النبى عايز يطمن ان الانصار موافقين بكل رضا انهم يشاركوا فى غزوه بدر ..

فيقوم صحابى جميل مهاجرى برده اسمه" المقداد بن عمرو " بس المقداد هيقول كلام حلو اوى هيقول: يا رسول الله لقد آمنا بك وصدقناك واعطيناك عهودنا و مواثيقنا، يا رسول الله امضى ونحن معك والله لا نقول لك ابدا كما قالت بنى اسرائيل لموسى اذهب انت وربك فقاتلا إنا ها هنا قاعدون... وانما نقول لك اذهب انت وربك فقاتلا إنا معكما مقاتلون.. فأبتسم النبى :') ♡.. و كانت كلمات جميله لدرجه ان الصحابى عبد الله بن مسعود قال: وددت لو قلت انا هذه الكلمة ..المهم يرد النبى على المقداد و يقول: جزاك الله خيرا يا مقداد

و يفضل النبى واقف مستنى: فأخيرآ يقوم سعد بن معاذ سيد الانصار يقول: كانك تريدنا يا رسول الله..( سعد فهم ان النبى عايز حد من الانصار يقول رأيه ) و يقول سعد: يا رسول الله لقد امنا بك وصدقناك واعطيناك عهدنا على ذلك ..قم يا رسول الله وتوكل على الله والله لو أستعرضت بنا هذا البحر لخضناه معك ( البحر عند العرب مخيف كان حاجه محدش بيقرب منها) فيقول سعد لو هتمشى بينا جوه البحر هنمشى معاك، و يقول: والله يا رسول إنا لصبر عند الحرب .. لصدق عند اللقاء ..والله يا رسول الله لنريك منا ما تقر به عينك.. فيفرح النبى عليه الصلاه و السلام ويقوله جزاك الله خيرا .. اجل يا سعد نتوكل على الله .. ويأخد النبي قرار ان احنا هنتصدى للعدوان.

يوصل للنبى اخبار ان جيش قريش دلوقتى عند العدوة القصوي ( العدوة ده تل)..هيعسكر جيش المسلمين فى العدوة الدنيا .. وقريش هتخرج من مكة وتعسكر في مكان اسمه العدوة القصوى .. طيب فين ابو سفيان ؟ كان ابو سفيان المفروض يعدى بالقافله من العدوه الدنيا بس ابو سفيان غير طريقه بعد ما عرف ان المسلمين هيبقوا فى العدوه الدنيا عند بئر بدر.. ربنا وصف المنظر ده في القران فقال تعالى :إِذْ أَنتُم بِالْعُدْوَةِ الدُّنْيَا وَهُم بِالْعُدْوَةِ الْقُصْوَىٰ وَالرَّكْبُ أَسْفَلَ مِنكُمْ وَلَوْ تَوَاعَدتُّمْ لَاخْتَلَفْتُمْ فِي الْمِيعَادِ وَلَٰكِن لِّيَقْضِيَ اللَّهُ أَمْرًا كَانَ مَفْعُولا ( الركب هو قافلة ابو سفيان )

النبى عليه الصلاه و السلام هيعمل خطة مبهرة ..في ظاهرها بسيطة جدا ولكنها مبهرة.. زمان العرب كانوا بيتعاملوا بالهمجية .. وبيحاربوا بطريقة الكر والفر ..يعني اضرب واجري .. فأول واحد يحط خطة عسكرية لرد العدوان و المعتدين كان النبي محمد عليه الصلاه و السلام.

ايه هي الخطة ؟ النبي هيوقف الجيش صف واحد و هيقسمهم نصين، ناس هتقف علي رجليها كتافها في كتاف بعض ومعاهم السيوف بتاعتهم و ناس تانيه هتقف وراهم فى صف تانى و هيبقوا قاعدين علي ركبتهم .. ومعاهم نبال .. ( دول اسمهم الرماه ) .. يعني ما بين كل اتنين واقفين في واحد قاعد علي ركبه بس مش باين منهم. هيبقى مستخبي.. فلما تيجي قريش من بعيد هتلاقى الجيش واقف صف واحد كل واحد كتفه في التاني .. فهتبدأ قريش ساعتها تحارب مبارزة عادية .. وأول ما قريش تقرب يقوم الصف ده ياخذ خطوة لورا ويطلع الرماة بالنبال يرموها علي جيش قريش فيتلخبط الجيش ويرتبك فينتصر المسلمين..

هيقف النبي يسوي الصفوف فيحصل موقف طريف جدا ..النبى و هو هيسوى الصفوف وبعدين يدور وشه .. يقوم صحابى اسمه " سواد" واخد خطوة لقدام .. فالنبي يرجع يبص علي الصف .. فيقول له استوى يا سواد.. وأول ما النبي يدور وشه فيرجع سواد يطلع بره الصف شويه و النبى يشوفه فيقول استوى يا سواد .. ويتكرر الموقف كذا مرة .. سواد بيهزر ..فالنبي عرف فكان معاه السواك فنغز بطن سواد وقاله له : استوي يا سواد .. فسواد قال: أى! أوجعتني يارسول الله اريد القصاص يا رسول الله .. فالصحابة بصوا لسواد واستغربوا .. فقال النبي : اجل يا سواد.. حقك يا سواد.. فيقف رسول الله صل الله عليه وسلم
و يقرب سواد بالسواك من بطن النبى الشريف.. و فجأه يحضن سواد النبي و يقبله و يبكى(لا سواد اقتص و لا عمل حاجه) .. فالنبي : سأله لما فعلت هذا ياسواد؟.. فقال سواد : يارسول الله اظن هذا اليوم يوم شهادة .. واظن اني ملاق ربي .. فأردت ان يكون اخر عهدي بالدنيا ملاصقة جسدي لجسدك يا رسول الله .. فيحضن النبي سيدنا سواد ويدعو له بالخير ويطبطب عليه .. ويقف سواد ويستوي في الصف .. وفعلا هيستشهد سواد في المعركة :') رضى الله عن سواد ♡ ..

هنكمل سوا ان شاء الله 🤍

سيرة_الرسول
الحلقة 81
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر(ج6)
قوموا إلى جنة عرضها السموات والارض

شفنا امبارح النبى عليه الصلاه و السلام لما عرف ان قريش جهزت جيش.. فجهز جيش المسلمين وحط الخطه و كان الصحابه تعبانين جدا لطول المسافه لحد بئر بدر ..طبعا بعد ما مشيوا تلتين المسافه على رجليهم.. و كانوا قلقانين و متوترين بعد ما عرفوا ان جيش قريش 1000 و المسلمين 300.. يعني اكتر من تلات اضعاف.. عارفين مع كل التعب اللى الصحابة فيه محدش منهم كان قادر ينام .. فتحصل معجزة ..

ربنا عزوجل بيقول في كتابه الكريم : "إِذْ يُغَشِّيكُمُ النُّعَاسَ أَمَنَةً مِّنْهُ وَيُنَزِّلُ عَلَيْكُم مِّنَ السَّمَاءِ مَاءً لِّيُطَهِّرَكُم بِهِ وَيُذْهِبَ عَنكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَام "الصحابه محتاجين يرتاحوا عشان يقدروا يحاربوا..فربنا سبحانه وتعالي يلقي عليهم النوم .. فالصحابة كلهم يناموا .. لدرجه ان بيقول بعض الصحابة : والله كان يسمع بعضنا لبعض غطيط (شخير من كتر النوم العميق ) ..و صحابى بيقول انه كان النبى موقفني حراسة وكان معايا سيف فوالله سقط السيف من يدي ٩ مرات لا ادري كيف يسقط وكيف انام فلما نزلت الاية عرفت ان الذي القي علينا النوم هو رب العالمين..

طيب و بقيت الايه ايه ؟وَيُنَزِّلُ عَلَيْكُم مِّنَ السَّمَاءِ مَاءً لِّيُطَهِّرَكُم بِهِ وَيُذْهِبَ عَنكُمْ رِجْزَ الشَّيْطَانِ وَلِيَرْبِطَ عَلَىٰ قُلُوبِكُمْ وَيُثَبِّتَ بِهِ الْأَقْدَام..الدنيا مطرت .. طب ايه فايدة المطر اللى ربنا انزله؟ اصل العدوة الدنيا اللي معسكر فيها المسلمين دي ارض صخرية ، فلما ينزل مطر كتير علي الارض الصخرية فتزداد صلابة .. ولما المطر ينزل على العدوة القصوي اللى معسكر فيها كفار قريش ..دي ارض طينية ، فلما ينزل المطر علي الارض الطينية فتزداد طينا.. فيبقي جيش المسلمين الارض تحته زي الحديد وجيش الكفار الارض تحته طريه جدا و بتزحلق و محدش يعرف يتحرك ويجري بسهولة فيه، دى معجزة من رب العالمين..

طيب دلوقتى الجيش نايم إلا رسول الله فضل سهران يدعى و يدعى و يدعى و يقول اللهم انصرنا ، اللهم نصرك الذي وعدتنا ..و بعد شويه ينام النبى دقائق بسيطة فيشوف رؤية .. القران بيقول : " إِذْ يُرِيكَهُمُ اللَّهُ فِي مَنَامِكَ قَلِيلًا وَلَوْ أَرَاكَهُمْ كَثِيرًا لَّفَشِلْتُمْ وَلَتَنَازَعْتُمْ فِي الْأَمْرِ " .. فربنا يخلى النبي يشوف فى المنام ان جيش المشركين عددهم قليل ..فالنبي يصحي معنوياته مرتفعة..

و يطلع النهار والمعركة هتبدأ .. فالنبي يبدأ يعلي الروح المعنوية و يشجع الجيش ، ويقول للصحابة : قوموا إلى جنة عرضها السموات والارض .. فيقف صحابي جميل اسمه عمير ويقول : بَخٍ بَخٍ يا رسول الله ( يعني الله الله ) فالنبي يقول له: لما تقول بخ بخ ياعمير ؟فقال عمير: يا رسول الله ، جنة عرضها السموات والارض :') ؟ فقال النبى: اجل يا عمير .. فقال عمير: يا رسول الله ، ادعوا الله ان اكون من اهلها .. فقال انت من اهلها ..

فعمير اتخض و فرح و قال: انا من اهلها يارسول الله ! فقال: اجل والله .. فلما هتبدأ المعركه زى ما هنشوف هيكون عمير في ايده تلات تمرات بياكلهم قبل المعركة فراح عمير باصص للتمرات و قال :يا عمير ليس بينك وبين الجنة الا هذه التمرات والله انها لحياة طويلة ..و رمى التمرات .. و دخل المعركه فقاتل لحد ما اتقتل و استشهد وكان اول شهداء المعركة :') ♡

صحابي تاني اسمه حارثة..حارثة شاب صغير ، مرة زمان قبل غزوة بدر كان حارثة ماشي في طرقات المدينة فقابل النبي .. فالنبي بيقوله كيف اصبحت ياحارثة ؟ فحارثة قال: اصبحت مؤمنا يارسول الله .. فقال النبي ياحارثة لكل قول حقيقة فما حقيقة ايمانك ؟ قال يا رسول الله اصبحت وكأني أري عرش ربي بارزآ و أرى اهل الجنة يتنعمون في الجنة واري اهل النار يصرخون في النار ..فأظمأت يومي و أيقظت ليلي بالقيام فرد النبي عليه وقال ' إذن عرفت.. فألزم يا حارثه ..

وفعلا لزم حارثه و ثبت على عباده الله عزوجل و في يوم المعركة ، وقف حارثة في الصفوف الاولي للجيش.. و قبل ما المعركة تبدأ ففجأه ييجى سهم فيقع في صدر حارثة فيقع حارثة و يموت ( تخيلوا !! كان لسة احاديث الجهاد النبي ماقالهاش .. ولسة الصحابة مش عارفين هل لو مات قبل ما يحارب يبقي شهيد وللا كان لازم يموت فى المعركه عشات يبقى شهيد؟ فجت ام حارثة تبكي وتقول يارسول الله مات حارثة قبل المعركة .. يارسول الله أحارثة في الجنه فأصبر ؟ ام هو فى النار فأبكى و قعدت تعيط جامد اوى ...

فرد النبى عليه الصلاه و السلام و قال : يا ام حارثة ان ابنك ليس في الجنة .. إنما هو في جنان فإنه قد اصاب الفردوس الاعلي، ففرحت الأم جدا جدا و فرح الصحابه..حارثة يا جماعه كان يدوب عنده ١٨ سنة ،رضى الله عن حارثه ♡

نكمل بكره إن شاء الله
دعواتكم 🤍

سيرة_الرسول
الحلقة 82
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر (ج7)
مات فرعون هذه الامة

اصطف جيش رسول الله صلى الله عليه و سلم، وتبدأ المعركة بمبارزة بين أشخاص و بعدها الجيشين هيحاربوا بعض ..

هتبدأ بالمبارزة و يطلع تلاتة من قريش واحد اسمه "عتبة بن ربيعة" و "شيبة بن ربيعة" و " الوليد بن عتبة" يعنى( اخو عتبة و عتبة و ابنه ) ...
فقالوا: يا محمد اخرج لنا ثلاثة نبارزهم..
فخرج ثلاثة ملثمين.. فقال عتبة : من انتم ؟ فقالوا : نحن من الأنصار ..فقال عتبة: لا .. بل نريد اكفاءنا ( احنا مش عايزينكم احنا عايزين القرشيين اللي هاجروا من مكة).. يا محمد اخرج إلينا اكفاءنا..

فالنبي يقول : قُم يا حمزة بن عبد المطلب .. قُم يا علي بن ابي طالب قُم يا ابو عبيدة بن الحارث بن عبد المطلب..
شايفين النبي عليه الصلاة و السلام يوم ما قرر يضحي مش هيضحي بالغريب و يخاف على نفسه و أهله ..لأ..النبى هيضحي بأسرته و اهله صل الله عليه وسلم ..
فيطلعوا التلاته يبارزوا و قدامهم التلاتة القرشيين ..

فطبعاً حمزة" أسد الاسلام" هيبارز الوليد و يقتله .. و علي بن ابي طالب "فارس شجاع" هيقتل عتبة بن ربيعة بعد دقايق من المبارزة..
ويتبقى شيبة بن ربيعة و" الصحابى الجليل" أبو عبيدة بن الحارث بن عبد المطلب ويفضلوا يبارزوا بعض فطعنوا بعض.. و قام شيبه بن ربيعة رفع سيفه و بتر ساق ابو عبيدة رضى الله عنه فلما حمزة شاف المنظر ده غلي الدم في عروقه وأخذ سيفه و قتل شيبة بن ربيعة.

و بدأ ابو عبيدة ينزف وينزف كتييير .. فالصحابة شالوه وحطوه على الارض قدام النبي ، فقام النبى قايل لا تضعوا رأسه علي الارض ولكن ضعوه في حجري ♡ (حنين اوى صل الله عليه و سلم )..
و بعدين نزل النبي علي ركبه و حضن أبو عبيدة و ابو عبيده غائب عن الوعي بسبب الدم الكتير اللى فقده..

بس اول ما النبي حضنه صحي و بص للنبي و قاله : يارسول الله ،أراضٍ عني؟ فبكي النبي ورفع كفه الي السماء وقال : اللهم اني أُشهدك أني راضٍ عن أبو عبيدة بن الحارث فأرضى عنه .. ويكررها النبي.

فيفتح ابو عبيدة عينيه ويبص للنبي ويبتسم اخر ابتسامة في عمره .. وتفارق روحه بدنه ويستشهد ابو عبيدة بن الحارث .. وينزل كلام رب العزة :
" هَٰذَانِ خَصْمَانِ اخْتَصَمُوا فِي رَبِّهِمْ فَالَّذِينَ كَفَرُوا قُطِّعَتْ لَهُمْ ثِيَابٌ مِّن نَّارٍ يُصَبُّ مِن فَوْقِ رُءُوسِهِمُ الْحَمِيم يُصْهَرُ بِهِ مَا فِي بُطُونِهِمْ وَ الْجُلُودُ كُلَّمَا أَرَادُوا أَن يَخْرُجُوا مِنْهَا مِنْ غَمٍّ أُعِيدُوا فِيهَا وَذُوقُوا عَذَابَ الْحَرِيق "...

و بعد إنتهاء المبارزة هيلتحم الجيشين ، اى جيش بينقسم إلي ميمنة و ميسرة ومقدمة ومؤخرة وقلب ..

النبي قال للجيش كلمة السر علشان بعد المبارزة نبدأ الإلتحام..
إيه هي الكلمة ؟ "شُدوا " ..
وبعد ما بدأ الإلتحام فى صحابي اسمه عبد الرحمن بن عوف المهاجري كان أمير الميمنة " ميمنة الجيش" ؛
فعبد الرحمن بيحكي قصة عظيمة اوى و بيقول : كانت معي الميمنة فنظرت فيها فإذا هى بضعة عشر رجلاً يعني حواليه من ١٥ الي ٢٠ رجل بس و طبعا ده قليل أوي .. فعبد الرحمن بيقول: فقلت في نفسي ، انظر لعل معي رجال أشداء، فنظرت عن يميني فإذا بغلام لم يبلغ الحلم (طفل يادوب 9 سنين)...

فلما عبد الرحمن شاف ده قام قايل : فقلت قد علمت مكاني اليوم ، فوجدت احد يشدني من ثيابي ، فنظرت عن يميني فقلت ما تريد يا غلام ؟
فقال: ياعم، أين ابي جهل ؟ فقلت: وما تريد انت من ابي جهل؟!!
فقال الغلام : سمعت انه يسب رسول الله، ووالله لا يفارق سوادي سواده حتي يموت الأعجل منا ؛
وبعدين قال الغلام : يا عم اخفض صوتك حتي لا يسمع ابن عمي فيسبقني إلى ابو جهل (اصل ابن عمه غلام تانى واقف على شمال عبد الرحمن ، اصلهم بيتسابقوا على نصره رسول الله .. ا
أحنا كمان لازم ننصر رسول الله .. نصرة دين الله و رسوله هتثبتك، قال تعالى:" يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ وَيُثَبِّتْ أَقْدَامَكُم" ....

هتثبت على صلاتك و دينك و مش هتبقى مهزوز ساعه البلاء.. نصره النبى هتبرأ بيها الإسلام من اللي شوهوا صورته.. نصرة النبي بنشر سيرة رسول الله و اخلاقه الحميدة و رحمته الواسعة لان اللي بيسب رسول الله بيسب التشدد و الإرهاب و هما متصورين ان دول بيقتدوا برسول الله .. ولكن ابدآ..حاشاه سيد الخلق اللي ربنا جعله على خلق عظيم.. رحمة للعالمين صل الله عليه و سلم ).

فبيقول عبد الرحمن فتعجبت ، و رفعت رأسي فإذا بغلام اخر على يسارى يغمزني فنظرت فإذا هو في نفس عمر وطول الغلام الاول .. ( دول ولاد عم واحد اسمه معاذ بن عمرو و التانى معاذ بن عفراء ) فقال عبد الرحمن: ماذا تريد ؟ قال : ياعم.. اين ابو جهل ؟ فقال: ما تريد انت من أبي جهل ؟

قال: يا عم والله قالت لى أمي إن لم تقتل ابي جهل فلا تعود فإنه يسب رسول الله ؛ والله لا اتركه حتى اقتله و لكن يا عم اخفض صوتك حتي لا يسبقني إليه ابن عمي ..

فعبد الرحمن بيقول : فنظرت إليهما فهما لم يتجاوزا العشر سنوات ( متنسوش ان جو الصحراء و التربية الشديدة كانت بتخلى الاطفال عندهم نضج كويس فى السن ده )..

و بيقول عبد الرحمن : من شدة لين عظام الغلامين فكانا قد ربطا الأسياف علي ذراعيهما ( ميعرفش يشيل السيف فرابط السيف علي دراعه علشان يرفع اول ما يرفع ايده.. يترفع السيف .. و ليه ده كله ؟ عشان سمعت انه يسب رسول الله ..
فبيقول عبد الرحمن بن عوف: فلما نظرت اليهما ارتفعت نفسي ..و بعد مرور بعض الوقت رأيت ابي جهل فقلت لهم ها هو صاحبكم ها هو من أردتموه..

فأنطلق الغلامين كالسهمين يجريان ..يتسابقان إلي ابي جهل .. فنظرا إليه فقال احدهما للأخر : إن ابا جهل ضخم..كيف نقتله ؟
فرد الثاني و قال: لا عليك فلنضع خطة ، أنت تضرب رجلين الفرس حتى يقع ،و حينها أنا أقتله ، فقال: اتفقنا ..
فقام الاول ضارب الحصان بالسيف في رجله فالحصان وقع علي الارض .. فابو جهل وقع من فوق الحصان.. فقام الغلام التانى ضارب ابو جهل فى رقبته.. فشافهم مين ؟
عكرمة بن ابي جهل ..فطلع بسرعة يجري وراهم و لحق عكرمة واحد منهم و ضربه بالسيف على كتفه فنزف كتير بس كمل جرى .. عشان خاف ابن عمه يسبقه الي رسول الله فيفوز برضا النبي قبله ♡ ..

فييجى الغلام و يقول : فوصلنا إلي رسول الله فوقفنا أمامه و قلنا: قتلنا ابو جهل..قتلنا ابو جهل .

فقال النبي : آلله الذي لا إله غيره ؟ (بجد.. أتقتل!! ) ؟ فقلنا والله يا رسول الله ..وبعدين بدأ الغلامين يزقوا بعض .. واحد يقول انا اللي قتلته و التانى يقول لأ أنا اللي قتلته،
فقال النبي : اسكنوا.. أهداؤوا ..فقال : هل مسحتما سيفيكما ؟
فقالا : لا .. قال النبى : أروني سيفيكما ..
فالنبى شاف الدم علي السيفين .. فقال كلاكما قتله ..

بس النبي لسه مش مصدق ، فجاب عبد الله بن مسعود ( ده اللى كان اول من جهر بالقرآن بعد رسول الله و قريش مسكته كذا مرة و ضربته).. فقال له النبي : يا بن مسعود اذهب و تأكد ان كانوا قتلوه أم لا..

فقال بن مسعود: سأفعل يارسول الله .. فبيقول عبد الله : فجريت إليه ( ابو جهل) ..فرأيته في الرمق الاخير..( روحه بتطلع خلاص) ..

فوضع بن مسعود قدمه علي صدر ابو جهل .. فقال ابو جهل: لم يبقي الا انت يا عبد تضع قدمك علي صدري!!!.. ثم قال من انتصر اليوم ؟
فقال بن مسعود: الله ورسوله يا عدو الله ..
فضغط عبد الله ابن مسعود عليه بالسيف فقضى عليه .. و بيقول عبد الله : فجعلت اجري الي رسول الله ابشره وكانت الارض لا تحملني من الفرح فقلت : أبشر يا رسول الله.. مات ابوجهل.. فرد النبى و قال : مات فرعون هذه الامة ..

هنكمل سوا إن شاء الله 🤍

سيرة_الرسول
الحلقة 83
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر(ج8)
هَذَا جِبْرِيلُ آخِذٌ بِرَأْسِ فَرَسِهِ، عَلَيْهِ أَدَاةُ الْحَرْب

حكينا المرة اللي فاتت ان مات فرعون هذه الأمه "أبو جهل" مات ..فاكرين قد إيه عذب الصحابه، فاكرين لما عذب السيده سميه و أتقتلت و بقت أول شهيدة فى الإسلام .. أبو جهل اللى اتهجم على رسول الله فى الحرم و فتح راسه و النبى فضل ينزف و بعدها راح سيدنا حمزه عم الرسول وضرب ابو جهل .. ابو جهل أذانا و أذى الصحابه فى رسول الله :'( و الحمدلله الذى شفا قلوب المسلمين بموت أبو جهل ) طيب دلوقتى المعركه مستمرة و وسط المعركة يقوم النبى عليه الصلاة و السلام قايل : من رأي ابو البختري بن هشام فلا يقتله ، من رأي العباس بن عبد المطلب "عم الرسول" فلا يقتله .. من رأي أبو العاص بن الربيع فلا يقتله " أبو العاص ده جوز زينب بنت رسول الله ".. طيب ليه يا رسول الله امرت ان محدش يقتلهم؟

لان العباس وابو العاص بن الربيع خرجوا مغصوبين.. مكانوش عايزين يحاربوا النبى ..لكن ابو البختري خرج للمعركه بمزاجه ، طيب ليه يا رسول الله أمرت بعدم قتله؟ هقولكوا.. عارفين مين ابو البخترى ده؟ ده المشرك اللى شارك مع المجموعه اللى انزعجت من صحيفه قريش لما قريش كتبت الورقه اللى كانت بتنص على حصار بنى هاشم إقتصاديآ و إجتماعيآ لمده 3 سنين .. لا أكل و لا شرب و لا زواج .. ويومها خطط ابو البخترى مع مجموعه من اهل قريش انهم يقلبوا الرأى العام على الصحيفه دى و فعلا اتفك الحصار و التفاصيل قولناها فى الحلقات من فتره..فالنبى حبيبى صل الله عليه و سلم فى غزوة بدر وقف و قال: لا تقتلوا ابو البخترى هشام وفاءآ له بيوم الصحيفة ♡ (محدش يقتله وفاءآ له عشان ساعدنا في يوم من الايام)..

ففى واحد من الصحابة بيقول: في وسط المعركة لاقيت قدامى ابو البختري بن هشام و جانبه واحد صاحبه ف لفيت من ورا ابو البختري و قتلت صاحبه و مشيت.. فأبو البختري مش مصدق ..فقال له : لم لم تقتلني اولآ. فقال: امرنا رسول الله الا نقاتلك .. فقال ابو البخترى: و لما؟ فقال : وفاءا لك بيوم الصحيفة.. قال ابو البختري : أرايت ان قتلتك انا ؟ فقال الصحابى : أفر منك طاعة لرسول الله ، لقد امرنا ألا نقتلك.. فبدأ ابو البختري يحارب الصحابى عايز يقتله ..والصحابي بقى يجري و يبعد .. لحد ما ابو البختري رفع السيف و خلاص هيقتله .. فقام الصحابى دافع عن نفسه و قتله.. فراح الصحابى للنبي يبكى وقال : يا رسول الله أمرتنا ألا نقتله ولكنه والله كاد يقتلني ..فقال النبي: لا عليك ، إنما فقط أردنا الوفاء..

و تفضل المعركة مستمرة وجيش قريش كبير اوى و جيشنا عدده قليل و بدأ يتعب..و المعركه بقت شديده.. فيقف رسول الله عليه الصلاه و السلام علي التل و يدعي ربنا و يقول : اللهم انصرنا .. اللهم انجزني وعدك .. اللهم ان تهلك هذه العصابة، لا تُعبد في الارض..(العصابه يعنى المجموعه..يقصد جيش المسلمين) و فضل يدعي ويبكي ويدعي لحد ما سقط رداءه من علي كتفه الشريف صل الله عليه و سلم :'( .. فجري ابو بكر الصديق عليه و أخد رداء النبى من على الأرض وحطه علي ضهر النبي وحضن النبي صل الله عليه وسلم . و قال له : هون عليك يا رسول الله، سيستجيب لك الله ..ان الله سينجزك وعده يا رسول الله.. و اول ما النبي خلص الدعاء تنزلت الملائكة استجابة إلي دعاء رسول الله ..يستنجد حبيب الله بالله تعالى، فينصره رب العزه بالملائكه و هتتنزل الملائكة و هتحارب.

فيقول رسول الله "هَذَا جِبْرِيلُ آخِذٌ بِرَأْسِ فَرَسِهِ، عَلَيْهِ أَدَاةُ الْحَرْبِ" فجبريل بنفسه نزل يشارك في الموقعة، و جه وهو يمسك بلجام فرسه، والتراب يتصاعد من حول الفرس، و وراه ألالاف من الملائكة ترفع سيوفها وعليها عدة الحرب، قال تعالى عن يوم بدر: " إِذْ تَسْتَغِيثُونَ رَبَّكُمْ فَاسْتَجَابَ لَكُمْ أَنِّي مُمِدُّكُمْ بِأَلْفٍ مِنَ الْمَلاَئِكَةِ مُرْدِفِينَ" يعنى متتابعين ..مجموعه و وراها التانيه.. قال تعالى : إِذْ تَقُولُ لِلْمُؤْمِنِينَ أَلَنْ يَكْفِيَكُمْ أَنْ يُمِدَّكُمْ رَبُّكُمْ بِثَلاَثَةِ آَلاَفٍ مِنَ الْمَلاَئِكَةِ مُنْزَلِينَ*بَلَى إِنْ تَصْبِرُوا وَتَتَّقُوا وَيَأْتُوكُمْ مِنْ فَوْرِهِمْ هَذَا يُمْدِدْكُمْ رَبُّكُمْ بِخَمْسَةِ آلاَفٍ مِنَ الْمَلاَئِكَةِ مُسَوِّمِينَ" " طيب يارب ليه كل العدد ده يااا 5000 ده عدد كبييير جدا اضعاف اضعاف الجيش الكافر..؟ ربنا نزل العدد ده لإدخال السرور والفرح على المؤمنين، يقول تعالى: " ومَا جَعَلَهُ اللهُ إِلاَّ بُشْرَى وَلِتَطْمَئِنَّ بِهِ قُلُوبُكُمْ"

@

والملايكة اللى اشتركت في يوم بدر دى مجموعة منتقاة، احسن مجموعه فى الملائكة، روى البخاري ان رسول الله قال: جاء جبريل إليا فقال: مَا تَعُدُّونَ أَهْلَ بَدْرٍ فِيكُمْ؟ قال: "مِنْ أَفْضَلِ الْمُسْلِمِينَ"، فقال: "وَكَذَلِكَ مَنْ شَهِدَ بَدْرًا مِنَ الْمَلاَئِكَةِ".الصحابه هيشوفوا الملائكه عياناً بياناً في ارض المعركة.. واحد من الصحابه قال : "إني لأتبع رجلاً من المشركين يوم بدر لأضربه، إذ وقع رأسه قبل أن يصلَ إليه سيفي، فعرفتُ أنه قد قتله غيري"( رايح ورا مشرك فى الحرب عشان يقتله فيدوب اول ما قرب منه..لاقاه قام واقع ميت و واحد قتله )

و صحابى تانى من الانصار هيأسر العباس بن عبد المطلب فقال العباس: يا رسول الله، إن هذا والله ما أسرني، لقد أسرني رجل أجلح من أحسن الناس وجهًا على فرس أبلق (بين السواد والبياض)، ما أراه الآن في القوم (يعنى مش من الصحابه) فقال الصحابى :والله أنا الذى أسرته يا رسول الله..فرد عليه رسول الله و قال: "اسْكُتْ؛ فَقَدْ أَيَّدَكَ اللَّهُ تَعَالَى بِمَلَكٍ كَرِيمٍ"
وانتصر المسلمون فى غزوه بدر الحمدلله بس لسه فى اسرى من المعركه.

هنتكلم عنهم بكره إن شاء الله
أدعوا لي ولكم بالمثل 🤍

سيرة_الرسول
الحلقة 84
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر (ج9)
هل وجدتم ما وعد ربكم حقاً ؟! فإني وجدت ما وعدني ربي حقا 🤍

شوفنا الحلقات اللى فاتت تعب الصحابة من المعركة الشديدة مع جيش قريش الكبير...
وكنا عايزين نحكيلكم عن صحابى اسمه
سعد بن خثيمة ..
الصحابى ده لما عرف انه هيحصل معركة بين الكفار و المسلمين فكان سعد الابن و خثيمة الاب الاثنين عاوزين يحاربوا في بدر ..بس في مشكلة ..خثيمة عنده بنات في المدينة..
فلو خثيمة وابنه سعد راحوا الغزوة وقاتلوا و استشهدوا في المعركة ؛ مين هيراعى البنات من بعدهم؟..
كده ابوهم واخوهم ممكن يموتوا..
فالأب خثيمة قال لابنه سعد : تعالى نعمل قرعة واللي يخرج اسمه فيها هو اللي هيحارب مع رسول الله والتاني هيخلى باله من البنات ..

فيطلع اسم سعد فيبقى سعد هو اللي هيحارب .. فخثيمة الاب يبكي ويحزن ..
نفسه يحارب مع النبي و يموت في سبيل الله ..
فيروح لابنه سعد و يقول له : يابني آثرني بها اليوم (من فضلك أتنازل لي ..انا عاوز شهادة في سبيل الله ) .. فيرد ابنه ويقول : يا أبتي والله لو كانت غير الجنة لآثرتك بها .. ولكنها الجنة .. ودخل سعد فقاتل فاستشهد..( ماحدش يتأخر على طاعة الله.. ربنا لو اختارك لعمل صالح اجتهد و حاول انك تعمله.. دى الجنة ♡..
(ولو محاولاتك خلصت و بقيت مش قادر تعمله.. اعطي العمل لحد غيرك يقدر يعمله و حاول تساعده اكتر و اكتر ده هيخلى العمل ده فى ميزانك و كمان ربنا هيشوف سلامة قلبك انك حاولت.. حتى لو مقدرتش تعمل العمل).

طيب و شفنا المرة اللى فاتت النبى و هوه بيبكي ويدعي صل الله عليه و سلم ويقول : اللهم انصرنا .. اللهم انجزني وعدك..
و قال تعالى:" إِذْ يُوحِي رَبُّكَ إِلَى الْمَلَائِكَةِ أَنِّي مَعَكُمْ فَثَبِّتُوا الَّذِينَ آمَنُوا سَأُلْقِي فِي قُلُوبِ الَّذِينَ كَفَرُوا الرُّعْبَ فَاضْرِبُوا فَوْقَ الْأَعْنَاقِ وَاضْرِبُوا مِنْهُمْ كُلَّ بَنَان" ..
ونزلت الملائكة واتشافت عياناً بياناً ..

بيحكي سيدنا علي بن ابي طالب و يقول: كنت يوم بدر عن يمين رسول الله فبعد أن دعا النبي رأيت ريحاً شديدة .. ثم ريحاً ثانية أشد من الأولي .. ثم ريحاً ثالثة أشد من الأوليين ..فقالوا و ما كانت يا علّي ؟
فقال : في الأولي كان ميكائيل في ألفٍ من الملائكة .. وفي الثانية اسرافيل في ألف من الملائكة ..
وفي الثالثة جبريل في ألف من الملائكة ..
فكان عن اليمين ميكائيل .. وعن اليسار اسرافيل ..
وأمام رسول الله جبريل في ثلاثة آلاف من الملائكة،
فقال النبي عليه الصلاة و السلام هؤلاء جند الله..

و فى صحابى تاني اسمه أبي داوود المازني بيقول: والله كنت أقاتل حتي أقف امام المشرك فيرفع سيفه ليقتلني .. فأرفع سيفي لأقتله.. فوالله أجده يسقط مقتولاً يسيل دمه و والله ما مسسته .. فأعلم انه قد قتله غيري..

و الصحابة بيحكوا و يقولوا : والله كنّا نراهم بيض يركبون علي خَيل بيض وكنا نعرفهم من العمامة ( عمامة بيضا ضخمة اوي ) .. فوالله ما رأيناهم بعد المعركة وعرفنا حينئذ انهم هم الملائكةً.. "

و ينزل الرعب في قلوب المشركين ، زي ما ربنا قال :
" سَأُلْقِي فِي قُلُوبِ الَّذِينَ كَفَرُوا الرُّعب "...
فالمشركين مرعوبين مش قادرين يستوعبوا وجود الملايكة ولا عددهم..
فبدأوا المشركين يجروا في كل مكان في ارض المعركة .. كله عايز يهرب و من ضمن الناس اللي كانت عايزة تهرب أُمية بن خلف .. أمية كان خايف يطلع المعركة لأن سعد سيد الانصار قال له : ان النبى قال لنا انك هتتقتل.. بس طلع فى الاخر.(فاكرين حكينا عن ده قبل كده ) ..

فأُمية في وسط المعركة لما شاف الوضع كده، اترعب و ركب فرسه و جري فشافه مين ؟ سيدنا بلال بن رباح .. سبحان الله ، تلف الأيام يا أمية واللي هيقتلك هو نفس العبد الفقير اللي كنت بتعذبه و تحط الحديد على جسمه وتسيبه فى عز الشمس و الحديد يسخن و يسيح جلد بلال ..

فبلال يشوف أمية في ارض المعركة ويقول : هذا أمية بن خلف !! والله لا نجوت ان نجى ( والله ما هسيبه يا انا يا هوا)...
ففجأة أمية لقى قدامه سيدنا عبد الرحمن بن عوف و بلال وراه .. فبسرعة أمية قال لعبد الرحمن لقد أستسلمت خذني أسير.. فعبد الرحمن وافق..
اما سيدنا بلال مكنش شايف قدامه غير العذاب اللي اتعرضله و الظلم و تعبان من مجهود المعركة، فكان مش شايف و مكمل فى محاربة أمية..

فسيدنا عبد الرحمن بن عوف عايز يخبي أمية عشان يحميه لانه خلاص عرف ان أمية استسلم و بقى اسير لكن سيدنا بلال كان ماسك خنجر فطعن أمية بن خلف.. بس سيدنا بلال وهو بيشد الخنجر بتاعه خدش رجل سيدنا عبد الرحمن بن عوف غصب عنه ..
وبيحكى الرواه بعد كده و بيقولوا : ظل عبد الرحمن يحكى لكل الصحابة ما فعل بلال و يريهم الجرح الذى بقدمه.. و مات أمية بن خلف ..

و يقف النبي علي التل فى المعركة
ويبدأ يشاور بيده الشريفة ويقول هذا مقتل فلان ( فلان هيموت في الحتة دي ) ..
النبي بيشاور علي الأماكن ويقول هنا هيموت فلان وهنا هيموت فلان .. فبيقول الصحابة والله بعد المعركة ما رأينا مشركاً واحدآ إلا وهو واقع مقتول في المكان الذى أشار اليه رسول الله ..ويموت عقبة بن ابي معيط و ابو جهل زى ما شفنا..
كل اللي زعلوك يا رسول الله ،كل اللى آذوك و آذوا الصحابة .. ربنا وعدك بالنصر و نصرك الحمدلله يا رسول الله بعد التعب و الآذى اللى شفته..
وهيتعمل مقبرة جماعية هنسميها القليب (مقلب) ..

ويقف النبي قدام المقبرة ويقول: يا معشر قريش .. يا ابو الحكم " ابوجهل".. يا أمية بن خلف .. يا عقبة بن ابي معيط .. يا عتبة بن ربيعة .. يا شيبة بن ربيعة .. هل وجدتم ما وعد ربكم حقاً ؟!
فإني وجدت ما وعدني ربي حقا..
فعمر بن الخطاب واقف جنب النبي فيقول له : يا رسول الله أتُكلمهم وقد جُيِفوا ( خلاص بقوا اموات ) !!
فيرد عليه النبي و يقول: أسكت يا عمر ما انت بأسمع لي منهم ،غير انهم لا يجيبون..( دول يا عمر سامعين كلامى اكتر منك ) ..
فسكت عمر .. وكأن النبي كان مش عايز ليهم النهاية دي و كأنه بيقولهم كنتم سبتوني أبلغ دعوة ربى للحق و العدل و الخير .. و من شاء فليؤمن و من شاء فليكفر..
و ينتصر المسلمين. و يموت عدد كبير من الكفار و يتأسر 70 اسير ..

هنكمل حكايتهم سوا إن شاء الله 🤍

سيرة_الرسول
الحلقة 85
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

غزوة بدر (ج10)
اسْتَوْصُوا بِالأُسَارَى خَيْرًا

انتهت المعركه و المسلمين راجعين المدينه و معاهم اسرى وعلي فكرة الاسلام ما ابتدعش موضوع الأسري .. يعني الاسلام مقلش لما تحاربوا خدوا أسري .. الاسر ده قانون دولى.. يعنى كل الدول بتاخد اسرى حروب و الإسلام جه و خلى للأسير حقوق و خلى معامله الاسير لازم يكون فيها إنسانيه لدرجه ان بسبب ده أسري كتير دخلوا في الاسلام .. لان انا كمسلم مش هدفى من الأسر انى اذل الاسير و انتقم منه لانه كان هيقتلنى.. لأ ..هدفى ان أصد آذاه و كمان بتمنى ان ربنا يهديه للإسلام .. النبي عليه الصلاة و السلام بيقول : عجب ربك من قوم يقادون إلي الجنة في سلاسل ..فقالوا ومن هؤلاء ؟ فقال النبي: هؤلاء أسري الحروب .. لان الأسير هيدخل المدينة متكتف وبعدين هيدخل الاسلام من حسن معاملة المسلمين و بكده هيدخل الجنه.. فلولا الاسر مكنش زمانه اسلم..

طيب هي معامله الاسير فى الإسلام شكلها إيه؟ النبى وقف و قال: " اسْتَوْصُوا بِالأُسَارَى خَيْرًا".و الصحابه عملوا كل خير مع الاسرى..و بقوا يتناسوا ان الاسير ده كان يتمنى انه يقتلهم و بقوا بس يفتكروا كلمه رسول الله : اسْتَوْصُوا بِالأُسَارَى خَيْرًا"..فى اسير اسمه أبو عزيز بن عمير، بيقول: "كنت في نفر من الأنصار، فكانوا إذا قدَّموا غداءهم وعشاءهم، أكلوا التمر وأطعموني البُرَّ ( الخبز ) لوصية رسول الله إياهم بنا".
طبعا الخبز احسن من التمر و مع ذلك كان الصحابى يعطيه للأسير و ده اثر على نفسيه الاسير جدا و كمان المعامله الجميله منهم بسبب ده الأسير بيسلم ♡ و على فكره الصحابى ده اخو مصعب ابن عمير ( فاكرين مصعب ؟ ده اللى راح المدينه و نشر الاسلام ورجع مع شويه مسلمين من المدينه عشان يبايعوا النبى فى مكه على الهجره للمدينه )

طيب واحد تانى اسمه الوليد بن الوليد بن المغيرة من اسرى بدر، كان بيقول: " كان اصحاب رسول الله يحملوننا ويمشون". يعنى لو المسلمين شافوا اسير جريح أو مريض أو مرهق كانوا يهتموا بيه و يراعوه".. واحد اسمه ابي العزيز بن عمير كان اسير مشرك بيقول: كنت فيمن أُسِر يوم بدر و رأيت رسول الله يخطب في الناس ويوصيهم بالأسرى فكان الصحابه يطعمونني اللحم ويأكلون هم التمر والماء لوصية رسول الله ..

و اسير تاني اسمه ابو العاص بن الربيع كان مشرك و أتأسر و هيسلم بعد كده { ابو العاص كان زوج السيده زينب بنت رسول الله و كان مشرك و كان مانع السيده زينب من الهجره مع رسول الله للمدينه لانه كان بيحبها جدا و بعدين لما اتأسر بعتت السيده زينب لرسول الله عقد مامتها السيده خديجه رضى الله عنها..عشان تفادى بيه ابو العاص وانتو عارفين ان النبى كان موصى الصحابه ان محدش يقتله لان النبى عارف ان ابو العاص قريش غصبته على الخروج ضد رسول الله المهم .. وصل العقد لرسول الله فيضم النبى العقد لصدره و يبكى شوقآ للسيده خديجه و يقف النبى علي المنبر ومعه قلادة خديجة و يقول : ايها الناس اذا رأيتم ان تردوا لزينب القلادة وتطلقوا لها اسيرها فأفعلوا .. وان لم تروا ذلك فخذوا القلادة ،

فالصحابه قالوا:نطلقه يا رسول الله.. و ترجع لزينب القلادة ..و يطلق النبي سراح ابو العاص لكن بشرط انه يسيب زينب تهاجر من مكه للمدينه و ميمنعهاش ..فقال ابو العاص: لك ذلك يارسول الله ، والله لا اخادعك ابدا .. النبي بعد الموقف ده بمده بقى دايما بيثني علي ابو العاص و يمدحه و يقول: وعدني ابو العاص ووفي وعده .. و يرجع ابو العاص مكة و يدخل علي زينب ويقولها يا زينب لو عايزه تهاجرى مع المسلمين هاجرى.. فتفرح زينب وتنسي جوزها وتنسي الدنيا وتركب علي الناقة بتاعتها ..و ابو العاص هيدخل الاسلام بعد كده.. المهم هاجرت زينب وكانت حامل في الشهور الأخيره.. و تبدأ تمشي في طريق الهجرة ..و فى الطريق هيمنعها هبار بن الاسود "قبل إسلامه" وهيوقعها من على الناقه و هتنزف جامد زى ما حكينا قبل كده }

طيب ابو العاص و هو اسير كان الصحابه بيعاملوه ازاى ؟ ابو العاص بيقول : الصحابه كانوا يطعمونني الخبز وهو معهم يومئذ قليل و يأكلون هم التمر و كانوا يحسنون الينا طاعة لوصية رسول الله..و بيقول ان كان واحد من الصحابه معاه حته خبز و يدوب لسه هياكلها فيبص لحد مننا ( الاسرى) فينزلها من على فمه ويطعمنا الخبز طاعة لرسول الله .. و بيقول ابو العاص : كان الصحابه يحملوننا ويمشون .. فكان الاسير يركب علي الفرس والصحابي يمشي علي قدميه إحسان لهم طاعه لوصيه رسول الله..

فكانت النتيجة انا عدد كبير من أسرى بدر أسلموا..يعنى يا صحابه رسول الله دي اخلاقكم مع اعدائكم .. طيب امال أخلاقكم مع بعض عاملة ازاي؟! فينزل قول الله تعالي يمدح الصحابة :"

وَيُطْعِمُونَ الطَّعَامَ عَلَىٰ حُبِّهِ مِسْكِينًا وَيَتِيمًا وَأَسِيرًا* إنَّمَا نُطْعِمُكُمْ لِوَجْهِ اللَّهِ لَا نُرِيدُ مِنكُمْ جَزَاءً وَلَا شُكُورًا* إِنَّا نَخَافُ مِن رَّبِّنَا يَوْمًا عَبُوسًا قَمْطَرِيرًا* فوَقَاهُمُ اللَّهُ شَرَّ ذَٰلِكَ الْيَوْمِ وَلَقَّاهُمْ نَضْرَةً وَسُرُورًا"

طيب على فكره الاسير كان ممكن يقدر يفادى نفسه بالمال و ده مش لهدف مادى و لكن كان النبى عايز يفهمهم ان اختيار الحرب هيكلفهم كتير.. بس فى مجموعه من الاسرى النبى عليه الصلاه و السلام أطلق سراحهم بدون فداء زى واحد اسمه أبو عزة الجمحي وكان رجل فقير.. وقال للنبى : "لقد عرفت ما لي من مال، وإني لذو حاجة وذو عيال، فامنن عليَّ". فمنَّ عليه رسول الله و اطلق سراحه، لكن النبى اخد عهد من الراجل ده انه ما يعملش اى شئ ضدء المسلمين..ولكنه لم يفى بعهده و عمل اعمال ضد الإسلام.

وعلى فكره كمان الفداء مش لازم يكون بالمال يعنى مثلا النبي شاف أن بعض الأسرى بيعرفوا القراءة والكتابة، و المسلمين كتير منهم ميعرفوش يقروا و يكتبوا، فالنبى شاف ان الاسرى ممكن يفادوا نفسهم بإنهم يعلموا المسلمين..اما بقى أكابر مجرمى قريش أمر النبى بقتلهم زى عقبة بن أبي مُعَيْط، والنضر بن الحارث؛ و دول اللى بنسميهم النهارده مجرمى الحرب.. و فى اسير تانى اسمه سهيل بن عمر وكان سهيل بن عمرو من قادة قريش، وكان أسيرً في بدر، و كان من اشطر الناس فى حسن البيان والخطابة، وكان بيحمِّس المشركين على قتال النبى و المسلمين،

ولما أتأسر كان رأى سيدنا عمر بن الخطاب أن تُنزع ثَنِيَّة -الأسنان الأمامية- عشان ميقدرش يخطب فى الناس مره تانيه..لكن النبى رفض و قال : "عَسَى أَنْ يَقُومَ مَقَامًا لاَ تَذُمُّهُ".يعنى لعله مره يخطب و يكون فيه خير و فعلا هيتحقق اللى قاله رسول الله صل الله عليه و سلم ..بعد وفاه النبى هيرتد العرب و هيرجعوا كفار لكن هيقف سهيل وهيخطب في الناس و هيثبَّتهم على الإسلام في مكة المكرمة، و من ضمن الكلام اللى قال له: "إن ذلك لم يزد الإسلام إلا قوةً، فمن رابنا ضَرَبْنا عُنُقَه"؛ فثبت الناس في مكة على الإسلام.. الحمدلله ♡ و صدق رسول الله .

من ضمن اسري بدر كان العباس ابن عبد المطلب" عم الرسول" : النبي كان قايل من رأي العباس بن عبد المطلب فلا يقتله لانه النبى عارف ان العباس خرج بدر مغصوب..و العباس ما رفعش سيفه فى المعركه فأتأسر العباس ..فوقف العباس قدام رسول الله و قال : يا رسول الله اني اشهد انه لا اله الا الله وانك رسول الله .. اصل العباس كان كاتم إسلامه هو كان عايز يسلم من وهو في مكة بس كان خايف من قومه.. فلما لاقى نفسه في المدينة زال الخوف فأسلم ..
فالنبي يطلب منه انه يرجع مكه علشان كده هيفيد الإسلام أكتر.. و تفضل كاتم إسلامك علشان يبقى العباس كأنه المخابرات بتاعت المسلمين جوة مكة .. وفعلا يوافق العباس ويكون هو المخابرات الاسلامية السرية داخل مكة .. علشان كده اختلط علي بعض الناس ان العباس اسلم يوم فتح مكة .. لكن الحقيقه ان العباس اسلم يوم بدر واشهر اسلامه يوم فتح مكة بعد ما مهمته انتهت ..

نكمل بكره إن شاء الله
ادعوا لي ولكم بالمثل🤍

سيرة_الرسول
الحلقة 86
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

يا محمد من يمنعك مني ؟ فقالﷺ: الله

حكينا عن معامله الأسرى بعد انتصارنا في بدر .. غزوه بدر اتقتل فيها اكابر الكفار و اتقتل ابو جهل علي ايد اتنين من اطفال "غلامين" المسلمين..حاجة مهمة اوي لازم نقولها وهي ان النبي كان بيحترم حقوق الاطفال وماكانش بيأذن للاطفال يحاربوا ..لكن لازم نعرف ان المسلمين ماكانوش خارجين للحرب و لكن لإسترداد حقوقهم من قافله ابو سفيان عشان كده كان فى اطفال..طيب نحكى بقى على شويه احداث إجتماعيه.. المسلمين و هما راجعين للمدينه من غزوه بدر كانوا فرحانين اوووى و كانوا عايزين يفرحوا أهل المدينه ..اصل اهل المدينة قلقانين عايزين يطمنوا علي النبي وعلي الصحابة .. مش بياكلوا ولا يشربوا ..قاعدين علي باب المدينة محدش عاوز يرجع بيته ..

فالنبي هيبعت اتنين من الصحابة يبشروا أهل المدينة .. هتبعت مين يا رسول الله ؟ عبد الله بن رواحة و زيد بن حارثة فراحوا يبشروا أهل المدينة .. فضجت المدينة بالتكبير .. الله اكبر الله اكبر.. ربنا نصر المسلمين.. ده اول نصر للإسلام .. ربنا قال ان يوم غزوة بدر هو يوم الفرقان لأن فيها فرق الله في بدر بين الحق والباطل .. الدنيا أتغيرت بعد بدر .. نظرة الكفار للمسلمين اتغيرت .. احنا بقينا كيان و دولة و جيش ..هتعترف قريش رسمياً بوجود المدينة بعد بدر .. طيب وصل رسول الله مع الصحابه للمدينه .. بس للأسف يا رسول الله فى شئ هيحزنك :'( ايه هو ؟

النبى و هو داخل المدينه في نفس اللحظة كانوا الصحابة بيساووا القبر علي رقية بنت محمد ..ماتت رقية بنت رسول الله .. ملحقتش ترتاح يا رسول الله .. حبيبنا صلى الله عليه و سلم كان يرضى و يصبر و يحتسب و يقف يصلى لحد ما رجله تتورم و بعد كل ده يقول أفلا أكون عبدآ شكورأ !! صلى الله على محمد .. فدخل النبي و لقي الصحابة وشهم متغير .. فعرف ان في اللحظة اللي هو داخل فيها كانوا بيقفلوا القبر رقية .. اصل قبل غزوه بدر رقية كانت مريضة جدا و كان النبي قلقان كان حاسس انها بتموت .. فالنبي قال لسيدنا عثمان بن عفان جوزها.. متجيش معانا بدر خليك في المدينة علشان لو رقية ماتت تلاقي حد من محارمها معاها..

فعثمان مراحش بدر ليه ؟ بأمر من رسول الله ..فييجي بعد كدة الروافض و الشيعه و اعداء الاسلام يقولوا عثمان تخلف عن غزوه بدر و يُتهم عثمان بالباطل ..لكن ده كان امر رسول الله و كمان رسول الله بعد المعركة اعطي لعثمان نصيبه من الغنائم كأنه كان موجود .. فتموت رقية ويبكي النبي بكاء شديد صل الله عليه و سلم .. و بعد موت رقية النبي يجوز عثمان لبنته التانية أم كلثوم .. ولما تموت ام كلثوم ، النبي يقول له : يا عثمان لو كانت عندي الثالثة لزوجتكها :') .. النبي بيحب عثمان حب غير طبيعي ..فيلقب عثمان في التاريخ بذي النورين علشان اتجوز بنتين من بنات النبي رقية و ام كلثوم..

بعد غزوة بدر حالة قريش النفسية بقت سيئة جدا .. قريش اقسمت انها لازم تنتقم من رسول الله .. فيحصل حاجة عجيبة اوي .. واحد اسمه صفوان بن امية مشرك و صحبه عمير بن وهبة الجنحي.. الاتنين كانوا قاعدين في صحن الكعبة .. فيقول صفوان والله وددت لو اني ذهبت إلى المدينه و أقطع راس محمد..فعمير رد عليه و قال : والله يا صفوان لولا عيال و دين عليا لذهبت إلي محمد فضربت عنقه .. فصفوان قال له: عيالك عيالي و دينك ديني فلا تنشغل بهم و اذهب و افعل ما قلت ( انا هتحمل مسؤليه كل شئ..بس اقتل محمد )

فوافق عمير و قال أجل سأذهب.. فصفوان قال له: خذ سيفي وناقتي..فراح عمير بن وهبة واخد السيف وركب الناقة بتاعت صفوان وراح المدينة .. فلما وصل المدينه ، الصحابه قالوا عايز ايه ده !! فعمر شافه .. فعمر قلق.. قام عمر رايح مكتفه من غير تفاهم ..فعمير قال لعمر : اريد محمد.. فعمر خده و دخل بيه للنبي متكتف .. فالنبي قال له: ماذا يا عمر ؟ فعمر قال : يا رسول الله ، هذا عدو الله عمير بن وهب و معه سيف ..

فالنبي ابتسم وقال ارسله يا عمر( يعنى فك قيده) فأرسله عمر .. فقال النبي : ادنو يا عمير (قرب شويه).. ما الذي جاء بك يا عمير؟ فقال عمير : لا شئ جئت أفدى اسير عندي .. فقال النبي : و إن كنت جئت للأسير فما هذا السيف ؟ فقال عمير : قبحها الله من سيوف وهل اغنت عنا يوم بدر! (يعني عايز يقول للنبي .. إيه السيف ده يعنى.. ده و لا حاجه .. ده منفعناش حتى يوم بدر.. و ادينا انهزمنا ) ..

فابتسم النبي وقال : لا ياعمير .. بل جلست انت وصفوان في صحن الكعبة .. ثم قال لك صفوان وددت لو اني اقطع رأس محمد .. فقلت انت له: والله لولا دين عليا و عيال لذهبت الي محمد فضربت عنقه .. فقال لك دينك ديني وعيالك عيالي ولكن اذهب فافعل ما قلت .. فأخذت سيفه وركبت ناقته وجئت الي هنا لتقتلني .. ولكن يا عمير الله حائل بيني وبينك .. فقال عمير والله ما كان معنا الا الله وما سمعنا الا الله ..

و ما كان لاحد ان يبلغك بهذا الا الله .. فاشهد ان لا اله الا الله واشهد انك رسول الله .. ففرح النبي ..

فعمير قال : يا رسول الله اعدك ان اعود الي مكة فاقتلهم كما قاتلت أصحابك في بدر .. فالنبي قال له: لا تفعل .. فقال اذاً ادعوهم الي الله ؟.. فقال النبي اجل ..طيب دلوقتى صفوان صاحب عمير بقى من ساعه ما عًمير خد السيف و الناقه و مشي عشان يقتل النبى.. كان صفوان كل يوم الصبح يجمع قريش ويقولهم انا محضر لكم مفاجأة .. استنوا بس لما عمير ييجي .. كل يوم يقولهم نفس الحاجة ..لحد ما عمير جه .. فصفوان مستني عمير عند التنعيم عند باب مكة فقال له ماذا فعلت ؟ فعمير مابيردش .. فصفوان قال له انت شكلك متغير ليه ؟ قال يا صفوان اشهد ان لا اله الا الله واشهد ان محمدا رسول الله ..ًفقال : صفوان ما لهذا بعثتك ، قبحك الله ..وحلف صفوان انه عمره ما هيكلمه تاني ..ًطبعا شكله وحش اوي قدام قريش .. و سبحان الله اللي هيكون سبب في اسلام صفوان بعد كدة هو عمير بن وهب .. هو اللي هيقف جنبه ..

طيب يحصل ايه بعد كده.. يحصل شويه غزوات ييجي بني سليم يغزو المدينة.. فالصحابه يلحقوهم لحد نصف المسافة فيحصل مناوشات ويطلعوا يجروا .. و فى غزوة اسمها غزوة السويق .. خرج فيها ابوسفيان بنفسه مع ٢٠٠ مشرك .. و دخل المدينة في نص الليل .. ابوسفيان كان عاوز ينتقم .. حرق و هدم كام بيت ، و قتل ٢ صحابة و طلع الجيش القرشى يجرى .. و الصحابه للأسف ملحقهومش.. طب ليه اسمها غزوة السويق؟

ابو سفيان كان معاه حاجة اسمها السويق و السويق ده عبارة عن دقيق ممزوج بالعسل والسمن .. علشان كان الجيش ياكلها ويتقوي بها قي الطريق فيشبع .. فمن خوف الكفار من المسلمين قاموا شالوا السويق من جيوبهم و راموه في الارض علشان يجروا اسرع بسبب خوفهم من المسلمين .. فالصحابة لما ملحقوهمش بدأو يلموا السويق ..فرجع الصحابة بكمية ضخمة جدا من السويق و اتسمت بغزوه السويق.

طيب فى غزوة تانية اسمها غزوة" ذي أمر " بردوا قبيلتين جم يحاربوا النبي فالنبي طلعلهم فبردوا خافوا وطلعوا يجروا من المسلمين .. بس سيد القبيلة دي اسمه" دعثور بن الحارث" .. فدعثور لما لقي النبي و الصحابه جايين قام كل جيشه هرب ، لكن دعثور مرضيش يهرب .. و قال لنفسه ازاي اهرب! انا مش جبان، فثبت دعثور مكانه و استخبى ورا جبل .. وقال اول لما النبي يكون مش واخد باله هطلع عليه اقتله .. في نص السكة بقى النبي مروح و الصحابه مروحين.. فالدنيا ليلت ومطرت شوية فهدوم النبي اتبلت .. فقلع عبايته و علقها علي شجرة .. و خلع سيفه و نام تحت الشجرة .. والجيش نام ..

كان دعثور مستخبي .. فخرج و سحب سيف النبي و حط السيف على رقبت النبى.. فالنبي صحي .. فقال يا محمد من يمنعك مني ؟ .. فقال النبي : الله .. فسقط السيف من يد دعثور .. سقط ازاي ؟ دعثور هيحكي لسه.. المهم فالنبي اخد السيف وحطه على رقبه دعثور.. وقال : و انت من يمنعك مني ؟
فقال: لا أحد إلا عفوك يا محمد ..فقال النبي: عفوت عنك .. فقال دعثور وانا اشهد ان لا إله الا الله وانك رسول الله .. اسلم ليه دعثور بالسرعة دي ؟ لما قومه سألوه بعد كدة قال : والله رأيت رجلا عظيما ابيض دفعني في صدري .. وليس بإنس .. وعلمت انه ملاك ..فسقط السيف من يدى..

هنكمل سوا إن شاء الله 🤍

سيرة_الرسول
الحلقة 87
يلا بينا صلوا على النبى
صلى الله على سيد الرجال ♡

هنحكى النهارده عن غزوه بنى قينقاع .. مين بنى قينقاع ؟ دى قبيلة يهودية كانت عايشة في المدينة .. يعني اليهود كانوا عايشين معانا كدة عادي ؟ ايوه طبعا لأن الاسلام مش دين عنصري .. والنبي لما دخل المدينة عمل دستور يحفظ حقوق المواطنين .. ففي الدستور ده مكتوب ان اليهود امة من دون الناس ، ليهم زى ما للمسلمين وعليهم زى ما علي المسلمين ، بس بشرط واحد..ايه هوه ؟ معاهده بين المسلمين و بين اليهود بتقول أن اليهود لا يحاربوا النبي والمسلمين.. و لا يشتركوا مع أحد لمحاربه المسلمين..شايفين النبي كان محقق حقوق المواطنة من ١٤٠٠ سنة ♡ ..

فاليهود عايشين مع النبي في المدينة لا بنأذيهم و لا بيأذونا .. و كان عايش في المدينة ٣ قبائل ..يهود بني قينقاع ..و يهود بني قريظة..و يهود بني النضير ..بس بني قينفاع كانوا مش بيسكتوا.. كانوا بتوع مشاكل.. كان الصحابه يستحملوهم بس ساعات كانوا بيضايقوا منهم لكن النبى كان دايما بيفكرهم أن بينا و بين بنى قينقاع معاهده.. و ان حسن العهد من الإيمان .. لحد ما فى مره إمرأه من العرب دخلت سوق بني قينقاع بتبيع دهب .. فقعدت مع الصائغ يهودي بتبيع وتشتري ..

فاليهودي طلب منها تكشف وشها فالمرأه رفضت و أضايقت أوى.. فاليهودى حب يضحك عليها الناس.. و كانت الست لابسه عبايه طويله فقام اليهودى سابها تتفرج على البضاعه و قام لافف من وراها و راح رابط طرف العبايه فى طرف الإيشارب بتاعها..و عقدها عقدة جامدة اوي .. و العبايه واسعه و طويله فالمرأه محستش :( ..فأول ما قامت المراة وقفت.. أنكشف عورتها.. فخافت و صرخت ..

فقام رجل من المسلمين اتخض من اللى حصل و جرى على اليهودى و ضربه فتشابكوا الاتنين فالمسلم قتل اليهودي .. هو مش قاصد يقتله ..بس الموقف كان صعب و شديد اوى اللى اتعرضت له المرأه دى.فاليهود لما لاقوا اليهودى مات قاموا هجموا على المسلم فقتلوه. و بقى فى قتال بين المسلمين واليهود .. بس مين اللي بدأ بالغدر ؟ مين اللي نقض العهد ؟ اليهود..فالنبي جهز جيش .. جيش علشان إمرأه اتكشفت عورتها .. صلى الله على سيد الرجال ♡

و اليهود بقوا يقولوا للنبى : يا محمد لا يغرنك انك قاتلت اغمارآ من قريش ، فهم لا يعرفون القتال .. (متفكرش يا محمد انك قوى علشان انتصرت فى بدر ..دة انت لو حاربتنا هنعلمك القتال ) و نزلت الآيات :" قُل لِّلَّذِينَ كَفَرُوا سَتُغْلَبُونَ وَتُحْشَرُونَ إِلَىٰ جَهَنَّمَ وَبِئْسَ الْمِهَاد* قَدْ كَانَ لَكُمْ آيَةٌ فِي فِئَتَيْنِ الْتَقَتَا فِئَةٌ تُقَاتِلُ فِي سَبِيلِ اللَّهِ وَأُخْرَىٰ كَافِرَةٌ يَرَوْنَهُم مِّثْلَيْهِمْ رَأْيَ الْعَيْنِ وَاللَّهُ يُؤَيِّدُ بِنَصْرِهِ مَن يَشَاءُ إِنَّ فِي ذَٰلِكَ لَعِبْرَةً لِّأُولِي الْأَبْصَار" فاليهود لما لاقوا النبى جهز جيش قاموا دخلوا الحصن بتاعهم واستخبوا فيه ..فالنبي فضل محاصرهم ١٥ يوم .. و بعد ١٥ يوم تعبوا و استسلموا ..

فيجي للنبى واحد اسمه عبد الله بن أُبي بن سلول " ده مسلم لكن كان رأس المنافقين " فيقول للنبى: يا محمد اطلق بني قينقاع .. فالنبي مايردش عليه .. فيقوله احسن إليهم يا محمد.. فالنبي مايردش ..فيقوم عبد الله بن ابى بن سلول ماسك النبي من رقبته ويشدوا ويقوله أَحسن إليهم ..أَطلق بني قينقاع، فالنبي يغضب و يبص له و يقول له : ارسلني (شيل ايدك.. ابعد ) فيكرر عبد الله بن ابى بن سلول.. فالنبى يقوله سبنى.. (يا جماعه النبى عليه الصلاه و السلام كان فى قوه اربعين رجل و معاه جيش كبير و معاه رب العالمين قبل كل ده بس شوفوا هيتصرف ازاى)

فيكرر عبد الله و يقول اطلقهم يا محمد فيقول النبى عليه الصلاه و السلام : هم لك.. النبى ساب بنى قينقاع..سبتهم يا رسول الله ؟ اه النبى قرر يعامل عبد الله كويس لأن يمكن ده يحرك قلب عبد الله شويه..النبي مش عاوزه يموت منافق .. و كمان النبى قرر يسيب بنى قينقاع لانهم استلموا فخلاص النبى مش هيحاربهم و لكن هيحكم عليهم النبى بالخروج بره المدينه و قال ان مش ينفع يعيشوا مع المسلمين في المدينة لانهم نقضوا العهد و غدروا .. و يمشى بنى قينقاع و تخلص غزوة بني قينقاع ..

طيب نقول شويه احداث إجتماعيه :) . زواج فاطمة بنت محمد عليه الصلاه و السلام و علي بن ابي طالب كان سنة ٢ هجرياً.. فاطمة بنت محمد بقت في سن الزواج .. جمال فاطمة مش عادي .. فاطمة كانت اشبه الناس برسول الله .. يعنى كانت حته من القمر رضى الله عنها و ارضاها .. كانت اجمل واكمل واعظم النساء .. وعلي بن ابي طالب من أجمل الصحابة ..

فراحت واحدة صحابية تقول له: يا علي اما علمت ان فاطمة قد خطبت ( يعني بيتقدملها خطاب كتير ) ؟ فقال لها: نعم .. فقالت له : لما لا تخطبها انت ؟.. فعلي سكت .. فتكرر الصحابية عليه الكلام من تاني وتقوله: اخطبها يا علي ..فعلي يقولها معنديش فلوس كفايه انى اتقدم لفاطمه بنت رسول الله..

فالصحابيه تصمم و تقول له النبى : بيحبك يا على..هيقبلك..

و يتشجع على و يروح للنبي فيدخل و يقعد ..فالنبي يقول له ما بك يا علي ؟ فعلى ساكت مبيردش ..و بعدين يقول :أردت أن أخطب فاطمة يا رسول الله.. فبكل رفق وحنان يسأله النبى : " وهل عندك شىء ؟" فيرد عليه علىّ و يقول : لا يا رسول الله..فقال النبى : " فأين درعك التى أعطيتك يوم بدر؟ (كان النبى اعطى درع هديه لعلى) فقال علىّ : هو عندى يا رسول الله ..فقال النبى :" ائت بها " و يكون ده الصداق بتاع فاطمه و يتم الزواج المبارك بين فاطمة وعلي .. ويكون بيتهم متواضع جدا جدا .. و يكون اجمل زواج عرفه التاريخ ..

طيب نحكى بقى عن زواج حفصة بنت عمر بن الخطاب و رسول الله صل الله عليه و سلم..حفصة مات جوزها .. فتأيمت ( يعني بقت ارملة ) فعمر عاوز يجوز بنته بسرعة .. فراح لعثمان بن عفان وقال له : يا عثمان إن أردت أن تتزوج حفصه فأنا قبلت تتزوج .. فعثمان قال له هفكر فى الموضوع (متنسوش ان عثمان متجوز بنت النبى ).. فيعدى يوم و أتنين و يرجع عمر لعثمان .. فعثمان يقول له : معلش يا عمر انا مش عاوز اتجوز .. فعمر يزعل .. فيروح لأبو بكر و يقول له : يا ابا بكر إن أردت أن تتزوج حفصه فأنا قبلت الزواج.. فيسكت ابو بكر و يقول له هفكر ..و يعدى ايام و ابو بكر يسكت خالص..

فعمر زعل لدرجه انه بيحكى و يقول : حين سكت ابو بكر..وجدت في نفسي اكثر من عثمان ..( يعنى زعل اوي)..فيعدى يومين فيروح النبى عليه الصلاه و السلام لعمر عشان يخطب حفصه ففرح عمر جدا.. فجه ابو بكر لعمر و قال له يا عمر انت زعلت مني .. فعمر قال له: اه زعلت منك جدا .. فقال ابو بكر : والله يا عمر كنت أعلم ان النبي يريد ان يخطب حفصه.. فعمر قال له : لما لم تقص علي هذا ؟ فرد ابو بكر و قال : ما كنت لأفشي سر رسول الله ..و اتجوز النبي حفصة.. طيب ليه ؟ ايه السبب ؟ النبي مش بيجوز علشان عايز يتجوز.. أبدآ..الوحيده اللى النبى اختارها هيه السيده خديجه و كانت اكبر منه ب25 سنه و مكنش راضى يتجوز بعدها ابدآ..

فجواز النبى من بنت عمر كان لتوطيد العلاقات لأن عمر هيبقى خليفه للمسلمين لمده 10 سنين ( فاكرين وقت بناء مسجد قباء لما النبى رتب الطوب فأبو بكر حط طوبه و بعدين عمر و بعدين عثمان فقام النبى قال: هؤلاء هم الخلفاء الراشدين من بعدى ) فالزواج ده حكمته ظهرت بعد كده ان عمر لما هيكون خليفه هيحتاج رأى حفصه فى حاجات كتير لأن حفصه كانت زوجه لرسول الله فحافظه النبى كويس اوى .. وده استفاد سيدنا عمر منه جدا.. و كانت حفصه حكيمه و رزينه..ده غير النسب برسول الله.. رضى الله عن حفصه ♡

نكمل بكره إن شاء الله 🤍

سيرة_الرسول
الحلقة 88
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

رد شبهه زواج عائشه من رسول الله فى سن 9 سنوات (ج1)

نبدأ بقى فى موضوع زواج النبى من عائشة .. عن هشام بن عروة عن عائشة أن عائشة قالت تزوجنى رسول الله وانا بنت تسع سنين ... طيب ازاى!! دى كده تبقى طفلة صغيرة ؟؟ لأ.. تعالوا بقى نتكلم بشكل علمى ومنطقى .. فى مستشرق ده واحد من الأجانب متخصص فى تاريخ بلاد الشرق و كان اسمه بودلى و كان غير مسلم .. بودلى عاش ومات غير مسلم وعمل كتاب موجود فى كل حتة بيقول فيه : لقد أخطأ الغرب إذ يقيسون زواج محمد على مقاييس زماننا هذا ويهدرون فروق البيئة والزمن والثقافات (بودلى مش مؤمن أن سيدنا محمد رسول بس مؤمن أن محمد انسان عظيم و بيقول بودلى ان مينفعش أنك تقيس ظروف جواز انسان من 1400 سنة على ظروف حياتك النهاردة بدون ما تهتم بفروق الزمن والبيئة والثقافات)

يعنى مثلا فى القاهرة و اسكندرية هنلاقى ان جرت العاده ان البنت بتتجوز بعد ما تخلص كلية فى المتوسط يعنى..لكن مثلاً فى بعض الأرياف معندهمش كليات فبرضه فى معظم الاحوال هنلاقى ان البنت بتتجوز بعد الثانوية مثلاً .. طيب لو رجعنا لبلد من 1400 سنة ..مكنش فيها لا جامعات ولا مدارس يبقى التدرج الطبيعى والنسبة والتناسب هنلاقى ان البنت هتتجوز بعد البلوغ على طول...طيب هل الرسول ﷺ فى زواجه من عائشه معارضه للتقاليد بتاعت بلده وقتها ؟ طب تفتكروا هل لو كان النبى عمل حاجة عيب او حاجة غير اعتيادية و اتجوز طفلة لا تصلح للزواج هل كان كفار قريش سكتوا ؟؟

طبعا مستحيل انهم يسكتوا.. بالعكس.. دول كانوا هيأذوا النبى و كانوا زمانهم بيحاربوه ..و احنا على مدار السيرة شفنا ان قريش كانت بتبذل اقصى جهدها عشان تأذى النبى ولو كان وقتها زواج النبى من عائشه فى سن صغير عيب أو خطأ، كان زمان قريش مفوتتش الفرصه دى للطعن فى رسول الله .إذن النبى لم يخالف تقاليد مجتمعه وقتها لأن ده كان العُرف السائد فى المجتمع ..ابو سُفيان شخصياً كان متجوز كده.. لأن ده كان السائد فى المجتمع..و على الفكرة النبى ﷺ لم يعارض أعراف مجتمعه بس.. لأ..ده كمان لم يعارض الأعراف العالمية المحيطة بيه..

اليهود مثلاً هنلاقى السيدة صفية بنت حُيي بن أخطب (بعد كده هتُسلم وتبقى أم المؤمنين و زوجه رسول الله) النبى تزوج صفيه و هي عندها 14 سنة .. طيب دى مش المشكلة.. المشكله و المفاجأة أن النبى كان تالت زوج لصفية يعنى لو حسبناها تقريباً نلاقى أن أول زواج لصفيه كان سنها فى نفس سن زواج السيده عائشه يعنى تسع سنين.. و بعدين اتجوزت تانى و كان التالت رسول الله وكانت وصلت لسن ال 14 سنه..

طيب تعالوا نروح للعالم الغربى، هنلاقى أنه ثابت فى كتب التاريخ الغير عربية اللى بتؤرخ التاريخ الرومانى والتاريخ الفارسى أن فى سنة 545 م أتجوز الملك البيزنطى الثانى أليكسيوس الثانى من الأميرة أجنيس وهى عندها تسع سنين ، و فى سنة 560 م الملك البيزنطى أيزك أتجوز الأميرة المجرية مارجريت وهى عندها تسع سنين ..طيب تخيلوا ان ده كان عادى و وقتها كان بعد النبى بكتييييير ،فما بالك بوقت زواج النبى؟!.. اكيد وقت زواجه كان ده شئ عادى اكتر و اكتر لانه كان فى زمن اقدم...طيب لو أننا أقتنعنا أن زواج عائشة وهى عندها تسع سنين شئ عادى ومقبول وقتها ، هل عائشة وهى فى السن ده كانت ناضجه كفايه؟ يعنى هل كانت امرأة ناضجة وللا طفلة صغيرة لا تصلح للزواج وقتها ؟

هقولك.. اول حاجه لازم نكررها ان ما ينفعش نقيس ظروف زمان بظروف النهارده، زمان البنات وقتها كانت بتحيض بدرى غير دلوقتى، خصوصآ المجتمعات الجبلية والصحراوية و اللى قال كده " بودلى "برده.. بودلى قال فى كتابه ان النساء فى هذا الحين فى المجتمعات الصحراوية كانت تحيض مبكرآ و قال ان الكلام ده موجود فى ريف اسبانيا وفى شرق اوروبا لذلك كان الزواج فيها مبكرآ (عارفين زى دلوقتى لو جبتى بنت بدوية عندها 10 سنين وبنت من القاهره مثلا و تكون فى نفس السن هتلاحظوا الفرق الكبير ما بينهم فى الجسم و فى نمو البدن و علامات الانوثه واضحة على البدوية وعلامات الطفولة لسه واضحة على البنت التانيه

لأن البيئة صحراوية بتساعد على النمو السريع فلو بنت سنها تسع سنين هتكون حاضت..طيب كده أتبقى نقطة مهمة جداً لو احنا فهمنا أن البنت فى مناطق معينة بتنضج مبكرآ و بتحيض..طيب فهل ينفع بقى أنى أجى دلوقتى أجيب بنت عندها تسع سنين وأجوزها لمجرد انها حاضت ؟ طبعاً لأ.. دى جريمه فى حق الطفولة ولا يجوز وحرام والقانون اللى محطوط عندنا فى مصر بتجريم و تحريم ده .. قانون صح جدا .. طب أمال السيده عائشه اتجوزت فى السن ده إزاى؟ عائشة لما اتجوزت فى السن ده مكنتش ناضجة جسمانياً بس ..لأ.. كانت ناضجه ذهنياً ونفسياً والمجتمع كله حواليها كان متقبل هذا الأمر

لكن النهاردة لو بنت حاضت و هي عندها تسع سنين فهى بتبقى ناضجة جسمانياً فقط لكن مش ناضجة ذهنياً و لا فكريآ والمجتمع اللى حواليها مش متقبل هذا الوضع فلا يجوز ..و مينفعش أبداً انها تتجوز ، لان البنت الصغيره اللى عندها تلات سنين أيام الرسول ﷺ كانت تعرف تقول أبيات شعر وبتتكلم لغة عربية فُصحى ..النهاردة البنت االصغيره اللى فى السن ده ممكن تكون مش قادره تتكلم حتى.. و اهلها لو اتأخرت فى الكلام يخدوها لدكتور تخاطب ..

الولدين اللى قتلوا ابو جهل كان سنهم حوالى 10 سنين.. و كان اقصى احلامهم انهم يقتلوا قائد جيش الكفار اللى بيسب رسول الله عليه الصلاه و السلام..

طيب فى ناس سألت ليه ..النبى ﷺ محددش للناس سن معين للزواج و نلتزم بيه؟ لأن النبى لو كان عمل كده كان ظلم فئه من الناس لأن أحنا لسه قايلين أن كل بيئة وكل زمان ليه أوضاعه الخاصة بيه فمقدرش أعمم وأظلم ناس فى بيئات أخرى أو أزمنة أخرى ) النبى ﷺ سابها مفتوحة ..(أحنا عندنا فى مصر فى المدن جرت العادة والمجتمع أن البنت بتتجوز فى سن العشرينات إذن فهو دين و هنتبعه .. اما السن ده عند الصعايدة والفلاحين البنت لو فى سن العشرين بدون جواز يبقى خلاص فاتها سن الجواز ..لأن عندهم البنت بتتجوز فى سن 14 سنة فأنا لو ألزمتهم بقانون المدنية أبقى ظلمتهم

علشان كده النبى قال ان كل بلد مادام العُرف بتاعهم مش ضد الشرع فهو دين .. و الكل يمشى عليه.. فا فى المدينه من حقى كمجتمع احدد سن واتجوز فيه .. طيب واحد تانى من البدو عايز يتجوز فى سن 15 سنه؟ طيب خلاص مدام سن الجواز عند البدو 15 يبقى اتجوز.. بس استنى البنت ناضجه عقلياً و مهيئة أنها تبقى مسئولة عن أسرة..؟ يبقى خلاص اتجوز و دى تقاليد مجتمعك و ظروف مجتمعك .. فكان المجتمع و البيئه اللى عاشت فيهم السيده عائشه عامل من العوامل الاساسيه لزواجها فى سن تسع سنين و كانت مؤهله عقليا و بدنيآ و كان عرف سائد فى العالم و ليس فقط عند العرب..

هنكمل سوا إن شاء الله 🤍

سيرة_الرسول
الحلقة 89
يلا صلوا على النبى
اللهم صل وسلم وبارك على سيدنا محمد وعلى آله وصحبه أجمعين 🤍

رد شبهه زاوج عائشه من رسول الله فى سن تسع سنوات (ج2 و الاخير)

اتكلمنا قبل كده عن بودلى المستشرق الغير مسلم و جملته الشهيره "لقد أخطأ الغرب إذ يقيسون زواج محمد على مقاييس زماننا هذا ويهدرون فروق البيئه و الزمان و الثقافه"..و فهمنا ان النبى عليه الصلاه والسلام لم يخالف عرف مجتمعه و لا العالم فى زواجه من السيده عائشه فى سن 9 سنوات و ضربنا امثله عن ده زى زواج الاميره مارجريت فى نفس السن من الامير الكسيوس و زواج الاميره اجينس من الامير ايزك و قلنا ان حرام و لا يجوز زواج البنت الناضجه جسديآ فقط.. و فهمنا ان السيده عائشه و اى بنت فى سن زواجها كانوا فى بيئه و ظروف ادت لنضجهم الفكرى و الجسدى و عادات المجتمع و العرف السائد وقتها كان بيقول ان ده كان سن الزواج الطبيعى جدا..

والمفاجأة و الدليل على ده .. ان لما الله تعالى "أمر " النبى بطلب عائشة للزواج.. كانت هي اصلا مخطوبة لواحد كافر .. فلو مكنش سنها هوه سن الزواج العادى فى مجتمعها مكنش اصلا خطيبها الاول" الغير مسلم " فكر انه يتقدم لخطبتها .. خطيبها كان اسمه الجُبير بن مُطعم بن عدىّ (قبل إسلامه) فلما النبى اتقدم لخطبه عائشة .. ابوها سيدنا ابو بكر فرح جدااا ، أبو بكر كان بيدعى ليل نهار أن النبى يخطب عائشة ، كان نفسه يبقى بينه و بين النبى نسب، طب ليه يا أبو بكر قبلت ان عائشه تتخطب من الجبير .. ليه اتسرعت ..كنت استنى و بلاش تخلى عائشه ترتبط ؟ ابو بكر اتسرع فى خطوبه عائشه للجبير لانه خاف تتأخر فى الزواج .. فده دليل ان العرف السائد وقتها انه عادى جدا زواج البنت فى السن ده..

( طيب على فكرة النبى ﷺ مكنش يعرف ان عائشه مخطوبه.. و أبو بكر لما عرف ان النبى عايز يتزوج من عائشه فرح جدا و ربنا شاء ان ام الجبير تقول لابو بكر " إن زوجناك إبننا. و تدعوه لدين محمد!! أتريدون أن تُفسدوا ابننا علينا" يعنى ام الجبير خافت ان الجبير يسلم و بقت عايزه تفسخ الخطوبه فأبو بكر انتهز الفرصه و وافق على فسخ الخطوبه ..

طيب و حاجة كمان هل عائشة لما اتجوزت كانت بتنجب الاولاد؟ لأ.. عائشه مكنتش بتخلف..ربنا اراد ده لأن..أنتى يا عائشة رسالتك كبيرة أوى ، أنتى جوازك من النبى لهدف و رساله .. أنتى رسالتك أنك تبلغى الإسلام للبشرية كلها.. فأنتى ما ينفعش تتشغلى بالأطفال وتقعدى ترربيهم و تأكليهم..عائشة هتروى عن رسول الله 2210 حديث أغلبهم فى الفقه فهى ماينفعش تنشغل بحاجة تانية غير تبليغ الدعوة..و كانت بتحب النبى اوى و نفسها تخلف منه و تقول له : يا رسول الله كل نسائك لهن كُنية الا أنا فيقول لها صلى الله عليه و سلم: لا تحزنى يا عائش ..أنتى أم عبد الله (يكنيها بعبد الله بن الزُبير ابن أسماء أختها)..

طيب هل السيدة عائشة كانت انسانة عادية ؟ لأ ..ماكنتش إنسانة عاديه..سيدنا أبو موسى الأشعرى بيقول :ما رأيتُ أفصح من عائشة ويقول ما رأيت أفرض من عائشة (أفرض يعنى عالمة بعلم الفرائض اللى هو علم المواريث .. ده علم صعب جداً و محتاج حد ذكى جداً وعنده قدرة على الحفظ وعلى التفريق بين الروايات فصعب جداً) و مش بس كده ده الصحابة كمان كانوا بيقولوا ان عائشه كانت اعلم الناس بالطب.. طب إزاى .. ده الطب سكه تانيه خالص على اهتماماتها؟ لما سألوا عائشه عن ده قامت قالت : كان يُمرض رسول الله فيُنعت له فأحفظ (النبى ﷺ كان يتعب فتتكتبله روشتة فكانت تحفظ) و كنت أمرض فيُنعت لى فأحفظ و يمرض فلان فينعت له فأحفظ.. ( فلما بقى حد يمرض تبدأ تسترجع بقى فُلان لما تعب اخد دوا كذا.. فبقت تقول الدواء وبقت طبيبة ).. ده دليل انها كانت مميزه جدا..

طيب سيبوا كل اللى قلناه ده و نفترض انكم لسه مش مقتنعين انها تتجوز فى سن صغير .. بس ركزوا فى اللى هقوله ده ... { كان زواج رسول الله من السيده عائشه أمر من رب العالمين ، فمش من حقك انك ترفض يا رسول الله ..ده أمر .. النبى ﷺ بيقول للسيده عائشة : أُريتكُ فى المنام ثلاثاً ، يأتينى جبريل بصورتك فى حريرة ويقول يا محمد هذه زوجتك فى الدُنيا والأخرة فأقوم من نومى وأقول إن يكن خيراً، يُمضيه الله .. و فى الليلة اللى بعدها ييجى جبريل يا محمد هذه زوجتك فى الدنيا والأخرة فيقول إن يكن خيراً يُمضيه الله ويتكرر الأمر فى الليلة الثالثة ..

طيب ممكن حد يقول ده مجرد حلم .. لأ ..مش مجرد حلم لأن رؤيا الأنبياء حق وسيدنا عبد الله بن عباس قال: رؤيا الأنبياء وحى .. و سيدنا إبراهيم عليه السلام ، اخبرنا الله تعالى فى القرآن الكريم ان سيدنا إبراهيم قال : يا بُنى إنى أرى فى المنام أنى أذبحك قال يا أبتى أفعل ما تؤمر .. يبقى الرؤيا للأنبياء أمر من الله سبحانه و تعالى ..يبقى النبى ﷺ فى النهايه هو مأمور من الله }

كده اتبقى نقطه وهى أن النبى ﷺ كان كبير وقت زواجه من عائشه.. كان فى الخمسينات.. طب ده ينفع ؟؟ أه ينفع مع محمد ﷺ بس .. ليه ؟؟ لأن النبى أصلاً مش كل تكوينه زينا عنده حاجات خارقة للبشرية .. يعنى ايه برده ؟ النبى ﷺ مرة صام 3 أيام ورا بعض من غير ما يفطر المغرب .. ده أسمه صيام الوصال.. فجه صحابى حب يقلده فالصحابى كان هيموت.. فالنبى جرى عليه سأله بتعمل كده ليه ؟ فقال له: أُقلدك يا رسول الله .. فقال النبى: لا تفعلوا هذا !! أنتم لستم مثلى..فإنى أبيتُ عند ربى يُطعمنى ويُسقينى (أنا اشبهكم فى حاجات ، وحاجات تانية.. لأ ..فأنا أصوم 3 أيام و مفطرش اما انتم لأ)

حاجة تانية النبى ﷺ كان عرقه مسك ♡ فهل ده تكوين بشرى زينا؟ طبعا لأ ، كمان النبى كان يمشى فيرى من خلف ظهره ..هل ده زينا؟ لأ طبعا.. و كمان النبى ﷺ ماكنش ليه ضل على الأرض.. (فى كتاب أسمه الخصائص الكبرى للسيوطى فيه كل الخصائص اللى أنفرد بيها النبى عن باقى البشر).. طيب اللى عايزة أوصله ليكو أن النبى ﷺ ماكنش زينا فى حاجات كتير و انه مكنش بيشيب و يعجز ، النبى ﷺ مات وهو عنده 63 سنة وكان جلده أنعم من الطفل اللى عنده 10 سنين.. فا فكره انه كان كبير لما اتجوز عائشه وكان فى سن الخمسينات .. ده مش بيمثل مشكله خالص.. فمتقارنش النبى وقتها براجل كبير معدى الخمسين سنه .. النبى كان كأنه شاب..فنفسيآ عائشه مرتاحه جدا..

و اللى عايزه أوصله ليكو برده ..انكم تفهموا كويس اوى ان زواج محمد وعائشة مينفعش حد يقلده دلوقتى بأى حال من الأحوال إلا لو جبنا حد زى النبى و ده مستحيل طبعاً و كمان لو جبنا واحدة زى عائشة وده برده مستحيل..و يهما ظروف البيئه و المجتمع ..فزواج محمد من عائشه كان حاجة خاصة بيهم وبزمانهم و مينفعش تتقلد فى ظروف النهارده..

نحكى شويه عن حبهم لبعض شويه بقى .. عاش النبى ﷺ مع عائشه وكان بيحبها جدا فكان يقول لها: يا عائش إنى أعلم متى تكونين عنى راضية ومتى تكونين عنى غضبى .. فقالت وكيف تعلم ذلك يا رسول الله ؟فقال إن كنتى عنى راضية قلتى لا ورب محمد ♡ وإن كنتى علىّ غضبى قلتى لا ورب إبراهيم ..فضحكت عائشه وقالت والله لا أهجر الا إسمك يا رسول الله ( انا بخاصم إسمك بس يا رسول الله ..مش بخاصمك أنت..انا مقدرش أخاصمك أنت ابداً .. صل الله عليه وسلم ) ..

نكمل مواقف جميله فى حب النبى و عائشه المره الجايه إن شاء الله 🤍