Stories 📖

بيفتح براء الباب ، وأول مايشوفو نضال بيقرب عليه بلهفة ليضمو، بس براء بيبعد عنو وبيقلو بجفاء:
-(تفضل فوت)
بيدخل نضال وهو حاسس بالغصة..بيسألو:
-(وينها إمك؟)
-(تفضل منحكي بغرفتها منشان يكون الحديث إلو معنى أكتر..)
بيمشي براء وبيلحقو نضال على غرفة ناهد اللي كانت متسطحة بفرشتها..
أول مايشوفها نضال بيبتسم ابتسامة ارتباك وبيقلها بحرج:
-(كيفك حبيبتي؟ شو مارح تلاقيلي؟)
براء بسخرية: -( اي طبعاً ، رح تلاقيلك وتضمك بالأحضان)
ناهد: -(براء؟!)
وبتدير وجهها عن نضال وبتصير تبكي بقهر..
براء بيقعد جنبها وبيضمها وبيقلها:
-(بعتذر إمي..)
نضال لحد هلق ماعرفان إنو مرتو صارت مقعدة وكل فكرو إنها متسطحة بس ومارضيانة تقوم وتستقبلو..
بيقلهم بضيق:
-(ياجماعة أنا تعبان ومشتاقلكم كتير وبحاجتكم ، جاي حتى إشبع منكم وارتاح من ضغط الحياة ، بترجاكم لاتزيدوها عليي وخلونا ننسى الماضي ومستعد اشرحلكم كل شي واعتذرلكم للصبح؟)
براء بيقوم بعصبية وبيقلو بنبرة غضب مع استهزاء:
-(مشتاقلنا؟ وبحاجتنا؟ وبدك ترتاح؟ كأنو الأنا عندك شغال على أعلى مستوى؟!وكل شي بحياتك بيدور محورو حولين رغباتك ومشاعرك وحاجاتك؟كأنو هالمعاني فضفاضة عليك ومو قدران تمارسها مع الناس وبدك بس الناس تمارسها معك؟)
نضال: -(براء ابني بتفهم غضبك وعتبك بس هاد مابيعطيك الحق تتجاوز حدودك معي؟!)
-(حدودي؟! ليش انت بتعرف حدود لشي يااا....نضال بيك؟ليكون بعلمك أنا تجاوزت من زمان حدودي معك من لمانسيت وجودك بحياتي، من لما تركتنا وراك متل الكلاب من دون ماتسأل مرة وحدة ، مرة وحدة بس شو صاير فينا..من لما درت ضهرك بهداك اليوم وتركت إمي عم تموت بين إيدي ومابقى ترد على اتصالاتي..تجاوزت حدودي لمااحتجتك مرة واتنين وتلاتة وعشرة لتكون معي وتسندني وترفعني لماوقعت وتعثرت وتعبت ومالاقيت منك إلاالتخلي والخذلان...ذكرك ياسيادة العمييد كم مرة قلتلي كيف حالك من أربع شهور لهلق؟ كم مرة قلتلي شو لازمك؟شو ناقصك؟ كيفها إمك؟ شو مشاعرها بعد الخيبة اللي عيشتها ياها؟ كيف صحتها؟ عديتهم ياترى؟ أكيد مابحاجة تعد ، لأنو ولامرة ، ولامرة سألت؟ قلتلي إنك بحاجتنا؟ يعني إنت إجيت لماحسيت بحاجتك إلنا؟ كتر خيرك والله..منيح تذكرت إنو عندك ابن وزوجة تحتاجهم..بس للأسف ماتذكرت ولامرة إذا هنن احتاجوك).
نضال بيحس بالحرج من نفسو بس بيبرر:
-(ابني بشو قصرت معكم ،صح أنا غبت فترة بس إنتو متعودين على غيابي وكنت عم ابعتلكم مصاري على طول؟ إنت مابتعرف ظروفي لهيك لاتحكم عليي هيك..وأنا مارديت عليك يومها لأني كنت خجلان من حالي ومابعرف شو لازم قول وبنفس الوقت موقدران برر وفسر وأنا بهديك الحالة..صدقني أنا مابستاهل منك كل هالقسوة..)
بيضحك براء ضحكة عالية وبيقلو بسخرية مع لوعة ظاهرة:
-(مابتستاهل؟ صح معك حق والله مابتستاهل؟ لك امي انشلت بسببك ، انجلطت من عملتك، انجلطت لماكنت عم اتصل فيك لتساعدني إسعفها وحضرتك ماعم ترد؟ مابتستاهل وابنك صار يتصل فيك ويتصل ليخبرك إننا بحاجتك وانت ولاعبالك خجلان من أفعالك؟! ولمااتكرمت واتصلت ماغلبت خاطرك وسألت كيف وضعنا بس حكيت لتخبرني عن مشغولياتك وضغوطك يعني عن حالك متل عادتك وسكرت قبل ماتعطيني فرصة انطق حرف؟ صح مابتستاهل وابنك صرف كل قرش كان متخبي لجامعتو ليقدر يدفع تكاليف المشفى والعلاج ومع ذلك ضلت الديون متراكمة عليه..ولما اتصلت فيك اطلب مصاري صفقتني محاضرة عن التبذير والتدبير والاقتصاد وكالعادة ماتعبت حالك تسمع حتى أنا ليش محتاج هالمصاري؟
قسيت عليك لاتواخذني ، إنت بحاجتنا هلق ، وابنك اللي صار يشطف أراضي المطاعم حتى يقدر يدفع مصاريف المشفى والعلاج لأمو ماكان بحاجتك..)
بيغص وبتنزل دمعة من عينو وبيكمل:
-(ابنك اللي دمر حلمو بإنو يدرس طب ودفنو بسابع أرض لأنو ماضل معو قرش يقدر يأمن فيه تكاليف دراستو واختار فرع تاني حتى يقدر يكون قريب من أمو ويقدر يوفق بين شغلو ودراستو واهتمامو بأمو اللي قضى أبوه على صحتها..ابنك هاد قاسي صح..صح أبي أنا قسيت لأنو الزمن قساني عليك وقسي عودي الغض على بكير..)
ناهد عم تسمع ابنها ومنهارة من البكي..
أما نضال عم يسمع ومصدوم ومو مصدق..حس الدنيا عم تدور فيه..وكلام براء كان متل الصاعقة عليه..تمنى لو كان كابوس لدرجة صار يتمتم ويحكي:
-(لا..هاد كابوس..أكيد أنا بكابوس..قلي إني مو صاحي)
براء بيبتسم ابتسامة حرقة ووجع:
-(للأسف نضال بيك، يمكن هلق أكتر وقت إنت صاحي فيه من شهور..وطولت بنومك كتير)
نضال بيحط إيديه على راسو بعدم تصديق وبيصير يحكي متل المجنون:
-(لك إنت شو عم تحكي؟ كيف صار فيكن كل هاد ومالي خبر؟ لك ليش ماخبرتني)
براء بيفقد أعصابو أكتر :

2.2K views°•Ꭹᗩᖇᗩ ᔑᎩ°•🌸, 19:33