الجزء الأول...

(١)

عمّان - ٢٠٠٢

٢ وسط ووحدة حلوة صب..
اتفضّل يا مَعِن.. الحساب ٤٥ قرش..
يسلموا أبو طارق..

قبل الثورة السوشيال ميديّة كانت أيّام اسلاك الإنترنت ومقاهيها.. وقتها، إذا كنت من أصحاب الأوضاع المرتاحة وعندك نت بالبيت وبدّك تشبك، ف لازم كان تفصل التلفون الأرضي! ومش الكل كان معه "خلوي".. فكانت تصير ثورات ربيع مصغّرة بالبيت بين شعبين.. واحد بدّه الانترنت وواحد بدّه التلفون.. وياما صارت حوادث قطع أسلاك أو تخريب أملاك عائدة للدولة زي الهاتف.. بس بأغلب المرّات كان ينتهي الموضوع ع خير باستسلام أحد الأطراف أو توقيع معاهدة تناوب قبل حدوث أي خسائر بشريّة..
يومها وبعد عزومة الجمعة الروتينية العائلية المقيتة.. كنت قاعد بغزل بشباك الحب العنكبوتيّة مع "lonely_heart” على ال mirc ((برنامج محادثة انتشر في بدايات الألفيّة، وهو عبارة عن غرف محادثة بأسماء وهميّة)).. واحنا داخلين ع الساعة الثالثة فصل النت ع صوت امّي وهيّ ماسكة سلك النت كأنها عشماوي وحيلِفُّه على رقبتي وبتصرّخ بدها التلفون تحكي مع أختها.. سحبت حالي وحكيت مع ياسر ومحمّد واطلعنا نتسمم قهوة ع تلّة عبدون..
كانت هاي التّلة مقصد سياحي اجتماعي ثقافي هملي داخلي بوقتها لكل شباب عمّان.. كنّا نجتمع خميس أو جمعة المسا.. نشرب قهوة من عند كشك أبو طارق.. أو اي مُحَرّمات حدا من الشباب بعزّنا فيها وياسلام اذا فيه لفّة عشب أخضر اتودّيك لعالم حنون واتنسّيك صياح دكتور الماجنتكس الصّبح وهوّ ايهددك بتعتيلك المادّة عتالة.. بعديها بِنطلّع كل قرف الأسبوع بكوشوك السيّارة وهيّ اتلفّ اتسوّي خمسات.. وانجيب سيرة كم بنت بالعاطل وانقضيها تطعيم قبل ما انروّح عطول بس "البلو فيج" ايطفّي الإنارة وقبل ما تيجي دورية أو بك اب أزرق ايقولنا "هويّاتكو شباب"..

خذ قهوتك ياسر..
يسلمو يا معن، ما حكيتلي، شو آخر أخبار ال "lonely_heart” يازلمة؟
يا زلم هاي البنت ش.....، إلها شهر مش راضية تعطيني رقمها، مقضيّاها حب وما حب.. زي اللي بدها تتجوز بس خايفة تحمل!..
ههههه... طيب خلص احلقلها يازلمة اذا ما في أمل! شو بدّك اتضّلك اتحب فيها عن بعد لإيمتا؟! اتخيّل تطلع بالأخير شب وايخوزقك؟!
لا لا.. شو امفكّرني حمار يازلمة! بنت أكيد بنت..
ان شاء الله..
وين محمد؟! ما بدّه يشرب قهوة؟
كان مزنوق، نزل يسويها تحت التّلة..
يازلمة قد ما بينحصر هالبني آدم!..

كانت مثانة محمّد الصغيرة مشهورة أيام الجامعة.. "دكتور بدّي أروح ع الحمّام".. هاي كانت عبارته الشهيرة بأي محاضرة، لاب أو حتى قاعة امتحان.. لدرجة انّه مرّة دكتور النيوماريكالس لحقه ع الحمّام ليتأكد انّه ما بحشش قد ما شك فيه! وبعد ما طلع محمّد من الحمام وشافه الدكتور اقترح ايحطلّه عدّاد بين افخاده ليحسب عدد مرّات التبوّل واوقاتها ليتفادى الحرج!
بس اللّي ما كان الدكتور يعرفه انّه هاي المثانة انخلقت بهالشكل لكشف جريمة كبيرة كتير.. وما اعرفنا لحد ما اجا محمّد ركض من تحت التّلة وهوّ ايصرّخ وبنطلونه ساحل..

(٢)

في "الأحمر".. بمكان آخر في نفس المدينة..

عامر، وين سارة؟ ما إجت اليوم؟
لا ما اجت.. وبرن عليها موبايها مغلق..
طيب شو بدنا انسوي؟ الزباين بتسأل عليها!
خلص ابعتيلهم فيرونيكا او البنت الجديدة ألينا اللّي اجت امبارح..
يازلمة فيرونيكا ختيارة، وهاي الطرمة ألينا بتحكيش عربي وانجليزيتها مكسّرة، أنا مش عارف معلمك أبو الوليد من أي قرية بروسيا جايبها!

أنا عامر.. عمري ٢٨ سنة.. بشتغل مدير صالة بنادي "الأحمر" اللّيلي.. متديّن، متجوّز وعندي بنت.. ما تحكولي ليش اشتغلت هالشغلة بس واحد زي حالاتي مش دارس ومضطّر ايطعمي عيلته وأهله وايصرف ع اخوانه الصغار شو ايسوّي؟ بانتظاري أفواه بدها تبلع بالبيت أو بتبلعني! ما لقيت غير هالشغلة.. كنت كل يوم بس أروّح أتحمم وأتوضى وأصلّي وادعي ربّي يبعتلي غيرها بس لهلأ ما أذن.. اوعكم اتفكروا انّي بَسَيّس بنات لطاولات الزباين لأغراض مُحرّمة! لا والله، كل الموضوع انهم بكونوا بدهم قعدة طريّة اتنسيهم البلدوزرز اللّي عندهم بالبيت واترجعلهم شبابهم شوي.. هاد كل اللّي كان بصير ب "الأحمر"، بس برّا هاد المحل شو بصير أنا ما دخلني!..

(٣)

إجت الشرطة بسرعة.. قبل حتّى ما نقدر انخبّي زجاجة الجاك دانيلز.. فاضطرّينا وكلنا أسى انّه نرميها بالتّلة بعد مسح البصمات!

وين الجثة؟!
تحت سيدي تحت بالتّلة!
طيّب خلّيكوا هون ما حدا يتحرك هاد مسرح جريمة!..

نزلت الشرطة وكشفت عن الجثّة.. ما اقدرنا نمسك حالنا وانزلنا نشوف.. الجثّة لبنت عشرينيّة.. شعرها أشقر وبيضا.. جسمها عاري بالكامل.. مساحات الجروح محتلّة أغلب جسمها.. مطعونة من الرقبة لحد العظم، وببطنها كان جزء من مصارينها الغليظة الطويلة طالع.. الجثّة كانت مغطّية ببول محمد اللّي استغرب من صوت الطرطشة، ولّع القدّاحة ليشوف مصدرها فكمّلها ع حاله..
اجى البحث الجنائي وتخطيط الجرائم ومسرح الجريمة والمباحث.. باختصار كان إعلان رسمي بانتهاء عهد تلّة عبد

ون ولياليها الحالمة.. ومن خلف الحدث كان أبو طارق بيلطم ع تدمير مصدر دخله الوحيد، كشك القهوة..

(٤)

فندق الماريوت، غرفة ٦٠٥..

مرحبا سيّد أبو الوليد، معك الاستقبال، فيه ست هون اسمها ربى بدها اتزور حضرتك؟
اه اه.. خليها تطلع لو سمحت..

كنّا نتلاقى بالسّر.. وأغلب المرّات بالأوتيل.. ما كانت ظروفي الاجتماعيّة كنائب بالبرلمان ورجل أعمال وعائلة محترم متجوّز واولاده بالجامعة تسمح لأي اشي تاني غير هيك.. مرتي انا واياها اتطلّقنا عاطفياً من سنين طويلة.. وصارت أي علاقة جسديّة ان لا سمح الله وصارت تجرح اكتر ما بتدّاوي.. كنت بحاجة لحدا انام ع صدره وانا مرتاح.. لحدا ايشيل عنّي ضغوط العمل والحياة.. لحدا احبّه واعشقه مثل رُبى.. ٢٦ سنة، مصوّرة فوتوغرافيّة باستوديو صديق لإلي.. صهبا، سمرا وجسمها منحوتة رومانيّة لديناتيلو بعصر الإستشراق.. اتعرّفت عليها بوقت التغطية الإعلاميّة لحملة الانتخابات الماضية.. ومن وقتها صارت ربى إدماني.. بعرف انها فاكهة مُحرّمة بس ما بقدر أوقف أشتهيها.. هيّ خطيئتي بهالحياة اللّي بطلب من ربّي غفرانها بس بدون الرجوع عنها!.. معها نسيت أبو الوليد ورجعت طلال اللّي طول عمري بحلم انّي أكون.. شافتني.. وبدون حكي حضنّا بعض.. و كمان بدون أي مقدمات رتيبة، بدأت بتذوق فاكهتي الصهبا..

لا لا stop حبيبي stop! انت كل مرّة بتضحك عليّ وبتنسيني الموضوع.. ايمتى بدنا نتجوّز فهّمني؟
حبيبتي ليش النكد هلأ! ان شاء الله بس ايخلصوا الاولاد جامعة..
وشو دخلني باولادك طلال؟
ما بصير اتجوز هلأ! انتي ناسية انا مين!
لا ما نسيت! بس كمان ما تنسى انّي بحبك وبدّي اكون معك عطول وبالحلال مش بس بأوتيلات!
انتي جاي اليوم بس بدّك تهاوشي؟
لا I don’t wanna fight بس انت اللّي ما عم اتريحني طلال!..
استني شوي، صوت الباب بيدق..
مين اللّي بدق الباب؟
هاد اكيد الرووم سيرفس، طلبت ثلج..

للأسف فتحت الباب.. فتحت لألاقي تهاني.. واقفة بشموخ ما اتغيّر من لمّا اتجوزنا قبل ٢٥ سنة.. من يوم ما طلبتها من أبوها "غالب بيك" وبهدلني وحكالي كيف بتتجرأ وتطلب بنت البشوات وانت ابوك صاحب دكّانة عطريق السلط؟! ولولا ما هيّ هدّدت بالانتحار وقتها ما كان اتجوزنا.. اتطلّعت فيّ بنظرة برجوازية حقيرة وقالت..
كنت عارفة انّك بتخونّي يا طلال.. بس آخر شي اتوقّعته انّك تخونني مع وحدة قد بناتك.. بعد ما سوّيتك بني آدم تعمل فيّ هيك يا واطي؟!..
تَفّت علي وراحت.. وانتهى كل شي حلو بهديك الليلة قبل ما يبدا..

(٥)

خلص الدوام وسارة لسّا ما اجت ولا بترد ع تلفونها.. الغريب انّه كمان أبو الوليد مش امبيّن من امبارح وتلفونه مغلق!..آخ يا عرص من ايمتى بتلف ع بنات المحل تبعك!!

وأنا سرحان وقاعد بتخيّلهم مع بعض، فاتت الشرطة عالمحل.. سألوا ع صاحب المحل وسارة.. وبس حكتلهم انهم مش موجودين أخدوني معهم عالمخفر..

في الطريق حكولي انّهم لاقوا جثّة سارة ع تلّة بعبدون.. وبعد التحليل الفنّي بالاستوديوهات المشرحيّة اتبيّن تعرضها للاغتصاب والتنكيل بعد القتل..

طيّب كيف عرفتوا مين هيّ؟ لقيتوا جنبها اي اوراق؟
لأ.. بس واحد من أفراد المشرحة كان يتردد عندكم ع الأحمر وحكى انها بتشتغل هناك واسمها سارة.. انت ناسي قدّيش "الأحمر" مشهور!.. وهلأ انت المفروض تتعرف ع الجثّة..

وصلنا ع بيت الرعب.. دخلت ع المشرحة.. اضاءة خفيفة كتير لابقة لفيلم رعب من الطراز الهوليوودي.. ريحة جثث مغطّية بمواد طبيّة حاولت تقتل الريحة بدون أي فايدة.. برودة بتمسح العرق اللّي بدا يطلع من مسامات جسمي المرعوب.. كان كل شي بهيّء لمصيبة كبيرة جاي ع الطريق.. لحد ما أخيراً كشفوا عن الجثة..

آه عامر.. طمّنا.. اتعرّفت عليها؟! جثّة سارة مزبوط؟..
لا سيادة المحقق! هاي مش سارة! مش سارة!..

يتبع...

"الأَحْمَرْ"...

الجزء الثاني...

(٦)

قبل شهر من اليوم...

سارة.. ليش اتأخرتي؟
آسفة عامر.. رحت عالمطار.. اليوم هانّا وصلت من السفر..
وين حتقعد؟
حتسكن معي بنفس البيت لحد ما تلاقي شغل.. اجى أبو الوليد؟ سأل علي؟
آه هيّه قاعد فوق بمكتبه، بيعرف انّك اتأخرتي بس أنا مشّيت الموضوع.. يالله فوتي غيري أواعيكي الزباين بدت تيجي..

هانا أخت سارة التوأم.. اجت من روسيا اتدوّر ع شغل بعد ما اقنعتها سارة انّه الوضع جيّد جداً هون والكل بيحب الشعب الروسي الشقيق وبيعزّه.. خصوصاً الرجال! وفرصتها تلاقي شغل واتجمّع مصاري اكتر بكتير من فرصها بموسكو.. بس المعلم أبو الوليد ما كان راضي ايشغلها بالأحمر لأنّها اخت سارة.. وهوّ ما بدّه علاقات قرابة بين الموظفين او حتّى علاقات غرامية.. كان ايغار كثير ع بنات الأحمر.. ويمنع أي تواصل بينهم وبين الزباين أو الموظفين برّا الشغل.. ولو حدا من الموظفين خالف التعليمات كان مستعد ايعلّق راسه ع باب الأحمر..

عامر!! وين سرحت يا رجل؟!
آسف سيدي..
قلّي، اذا هاي مش سارة اذن مين هاي؟!
هاي هانا سيادة المحقق.. اخت سارة التوأم.. اجت قبل حوالي شهر وكانت اتدوّر ع شغل..
ووين سارة؟!
ما بعرف.. اليوم ما داومت وتلفونها مغلق..
شو عنوان بيتها؟
اتفضل سيادة المحقق..

(٧)

جرّونا جرّ ع المخفر.. أنا ومحمّد وياسر.. حتّى أبو طارق تبع القهوة جابوه.. حققوا معانا لثاني يوم الصبح وبعدين طلعونا.. اعتبرونا شاهد لما بعد الجريمة.. شاهد ع اشي ما شافوش..

(أصعب إشي بالجريمة إنّك تشوف فقط النتيجة.. كأنك بتسمع المشكلة من طرف واحد بس)!

بس شو ما كانت الأسباب شو الدافع لمجرم انّه يتصرّف بهالطريقة؟ يغتصب، يقتل وبعديها اينكّل بالجثّة؟!
أكيد في بيناتهم ثار.. كل هاي الأفكار كانت تخطرلي وانا عم بحط راسي وانام ع المخدّة.. بعد ما روّحت وحكيت لأهلي شو صار.. امّي صارت تلوم النت وتحكيلي هاي آخرة النت وراحت قطعت السلك.. أبوي حلف ع امّي بالطلاق انّي ابطّل اشوف ياسر ومحمد لإنهم همل.. تركتهم يلوموا بعض وسكّرت الباب ونمت نومة أهل الكهف...

(٨)

انبسطتي رُبى؟ هي تهاني عرفت..
معلش حبيبي.. أولها ع آخرها كان لازم تعرف.. مش احنا كنّا حنتجوّز؟!
يا ستّي انتي ما في ع تمّك غير الجيزة! رُبى من ايمتا انتي هيك صايرة؟ أنا بعرفك انسانة متحررة وعملية وهاد اللّي حببني فيكي.. ليش اتغيرتي؟!
أنا ما اتغيّرت طلال.. انت اللّي اتغيّرت.. انت اللّي وعدتني ولهلأ مش شايفة أي وعد من وعودك صار!.. مع انّك اخدت كل شي مني، قلبي روحي جسمي ما حرمتك من اشي.. اهتم فيّ زي ما بتهتم لتهاني واولادها!...

كانت محاورة عقيمة حتى الأنابيب ما بتعالجها.. لأول مرّة بحس إنّي بكره رُبى.. لأول مرّة بحس انّه ما حنوصل لأي نتيجة بنقاشنا.. إلبست أواعيي واجيت اطلع بدون حتى ما أودعها.. بدّي ألحق تهاني وعيلتي قبل ما اتضيع..

وين رايح؟
بدّي ألحق تهاني قبل ما تعمل اشي..
يعني خايف ع تهاني ومش سائل فيّ..
رُبى.. أحكيلك اشي.. انتي من اليوم بطريق وأنا بطريق.. عيلتي ومركزي أهم من أي لحظة بعيشها معك يا بنت ال...
بتغلط عليّ! بعد كل اللّي سويتلك ايّاه؟
أنا ما غصبتك ع اشي.. سلام...
أنا بورجيك يا حقير...

(٩)

أخذنا عنوان سارة ورحنا نشوف البيت.. كانت ساكنة قريب من الأحمر.. شقة طابق ثالث بالشميساني مستأجرها صاحب النادي اللّي اكتشفنا بالصدفة انّه نائب بالبرلمان.. دقّينا الباب أكثر من ١٠ مرات ما حدا رد.. اتصلنا ع موبايلها بعده مغلق.. ما كان في حل غير انّه نكسر الباب.. دخلنا ودوّرنا ما لقينا حدا.. بس في ريحة عاطلة طالعة من الحمّام.. فتحت الباب ولقيت جثّة سارة قاعدة بالبانيو (حوض الاستحمام).. كانت معبّية ميّ وايديها ممدودة وشرايينها مقطوعة.. للحظة الأولى بتبيّن انها عمليّة انتحار كلاسيكية بكل ما للكلمة من معنى.. استدعيت الطب الشرعي وبدينا تحقيق بالقضية بعد ضمّ الملف لأول جريمة.. موت أختين توأم بيوم واحد.. وحدة انتحرت والثانية انقتلت..

(١٠)

وصلت ع الفيلا.. تهاني كانت قاعدة ببرود معتاد بتدّخن بالصالون.. قعدت جنبها وطلت السيجارة وبدينا نتشارك حوار شيطاني بامتياز..

(تُوْلَد الصراحة المطلقة بإعلان وفاة المشاعر)...

انتي كيف عرفتي انا وين؟!
انت الك يومين ما بتيجي ع البيت!
طيّب ليش ما اتصلتي فيّ وسألتيني أنا وين!
تلفونك مغلق..
مين قلّك ع مكاني مين؟!
مش هاد المهم هلأ..
وشو المهم؟!..
شو المهم؟! (حكتها بقرف قاتل وبعدين كمّلت)..

شوف طلال، كل واحد بهالدنيا عمل أخطاء بحياته وهوّ صغير، وأثّرت عليه بس كبر.. بس خلص بطّل ينفع يتراجع عنها لأنه نتائج التراجع حتكلفه كتير!.. وانت واحد من هاي الأخطاء.. أنا كان لازم أسمع حكي أبوي غالب بيك لمّا قلّي انك انت واحد جوعان! جوعان للحياة، جوعان للجنس، جوعان للنجاح، والجوعان عمره ما بيشبع.. بس أنا كنت سخيفة وما صدّقته.. واليوم عم بجني نتيجة سخافتي وخطئي انّي اتجوزتك..
طيب شو بدّك هلأ؟!
بدّي انكون عمليّين أكثر..
كي

ف يعني؟!
يعني.. أنا عارفة انك خنتني مع رُبى وغيرها، وعارفة انّك ما بتترك بنات الأحمر بحالهم..
مش مزبوط هالحكي، أنا.....
بدون كذب طلال! خلص مافي داعي نكذب ع بعض، خلينا صريحين، أنا ما عندي مانع، روح نام مع مين ما بدّك، ان شاء الله تنام مع أبو علي البوّاب، بس ما اتسويلنا فضايح! انت عارف انت مين هلأ وانا بنت مين! وعنّا اولاد، وليد ونسرين بالجامعة وسمعتهم بتتأثر بأي فضيحة حتتعلّق فيك.. فرجاءاً خلينا أصحاب، وقدّام الناس والأولاد بنكون أزواج زي ما بيحبوا ايشوفونا..

انتهت المفاوضات بتوقيع معاهدة ترسيم حدود بيني وبين تهاني.. بغرفة النوم احنا اخوان، برّا احنا أزواج، هيك اتفقنا ولأجل غير مسمّى.. كانت الشروط بتناسبني وانتهى النقاش بالتوقيع في المكتّة بعد ما كل واحد خلص سيجارته وانسحب من المشهد..

((أعظم قدرة على التحمّل هي قدرتك على التعايش مع عدوّك بأرض واحدة بدون ما تفقد أعصابك وتفتكّ فيه))...

اتخيلوا أسد ونمر عايشين بقطيع واحد.. هاد اللّي حعيشه مع تهاني لبقيّة عمري..
تلفوني! انسيته مغلق! بدّي افتح اشوف مين رن عليّ بهاليوم الزبالة...

(١١)

سيدي أخيراً رد أبو الوليد ع التلفون وهيّه جاي ع الطريق..
أوّل ما يجي دخلوه لعندي.. وصل تقرير الطبيب الشرعي؟
آه.. اتفضل سيدي..
هات لنشوف..

تقرير الطبيب الشرعي:
سبب الوفاة اختناق ناتج عن الغرق في مياه عذبة أدت الى دخول ماء إلى المعدة والمجاري التنفسيّة وحدوث وذمة رئوية أدت إلى نقص مستوى الأوكسجين بالدم ومن ثم الوفاة..
قطع الشرايين ناتج عن حادث بعد الوفاة، وقت الوفاة تقريباً السّاعة ١ ظهراً..

طلع اللّي شاكك فيه مزبوط.. سارة ما انتحرت.. سارة انقتلت.. وبنفس اليوم اللّي انقتلت فيه هانا.. وأكيد القاتل واحد..

اجى أبو الوليد سيدي..
خليه يدخل..

وين كنت امبارح الساعة ١٢ الظهر سيد طلال؟
ليش؟
جاوب ع قد السؤال..
كنت بزيارة عند صديق لإلي..
مين هاد الصديق؟!
في اشي؟ ليش بتستوجبني بهالطريقة؟! انت عارف
مين أنا وشو بقدر أسوي؟!

(١٢)

روّحت عالبيت بعد كل هاي التحقيقات.. كنّا عايشين أنا ومرتي وبنتي مع أبوي وامّي واخواني الصغار بنفس البيت.. أبوي معاه سرطان دم وأيامه بالحياة صارت أقصر من انها تنعد.. وياما اترجّيت أبو الوليد انّه يجيبله عفو من الديوان عشان يتعالج لمّا كان فيه أمل وهوّ يوعدنا بس بدون أي فايدة.. وبس انتهى الأمل بطّلت أطلب.. وهوّ بطّل يسأل..

(الأمل، حبله أقصر من الكذب)..

عامر ليش اتأخرت حبيبي؟
كان في مشكلة بالشغل ما تقلقي..
أحطلك تتغدا؟ عاملة مجدّرة..
مش غلط.. وين امّي؟
نزلت من الصبح ع بيت أبو الوليد.. المدام عندها عزومة بكرا وراحت تطبخلهم..
وليش ما رحتي تساعديها؟
وبنتك مين حيضل معها؟!
خديها معك!
ام الوليد ما بتحب الصغار..
الله يقطعها هيّ وجوزها..

(١٣)

مرحبا ماما..
أهلاً حبيبتي نسرين.. كيف الجامعة؟
ماما اليوم السبت مافي جامعة! كنت بالمول، وين بابا؟
ما بعرف اجاه تلفون الصبح وضلّه طالع..
طيّب انا تعبانة بدّي اعمل shower وارتاح شوي..
اوك حبيبتي.. بس كمان شوي جايين ضيوف ع الغدا، انزلي اتغدي معنا اوك؟
ما بدّي ماما! قوليلهم نسرين ماتت!

دخلت ع غرفتي الكئيبة.. اتطلّعت بالمراي..
نسرين طلال.. ٢٠ سنة، بنت حدا من أهم الشخصيات بالبلد، ودلوعة أبوها.. بآخر عيد ميلاد جابلي ال CLK اللّي كنت بدّي ياها، ومش حارمني من اشي.. بس مع هيك مش مبسوطة! حاسّة اشي ناقصني.. الكل بيحترمني وبيعاملني over بس عشان مركز والدي.. عشان هيك دايماً بحب احكي مع ناس ما بتعرفني.. ناس ما بتعرف مين بابا.. ناس ما عمري حصارحها.. مين أنا..

شغّلت الكمبيوتر.. فتحت ال mirc..

الإسم: lonely_heart
كلمة السر:*********

يتبع...

"الأَحْمَرْ"...

الجزء الثالث.. والأخير!

(١٤)

قبل سنتين بالضبط..
موسكو ٢٠٠٠..

(وليد)
وصلت بطيارة ١٠ المسا.. كان أيامها الحج أبو الوليد مشغول بالتحضير للإنتخابات.. اضطريت أنزل بداله عشان نجيب طقم جديد للنادي بعد ما صدّى اللّي عنّا.. كنت إبنه الوحيد وكان بدّه ايّاني أستلم إدارته بس أخلص دراسة مع انّه امّي كانت معترضة.. بس كان لازم أتعلم الصنعة ع البدري..
بالعادة أبو الوليد كان يتعاون مع مكتب محلّي لتوريد العمالة.. نعطيهم الشروط والعدد وبس يجمعوهم ننزل نختار اللّي بيعجبنا..
بس تشوف مناظرهم صافّين عالدور وأنا بتمختر بينهم بتستغرب! مين قال انّه العبودية انتهت بعصر النبي -ص-؟! العبودية يا صديقي ما انتهت! بس صار فيه "عبوديّة ذكيّة"!..

اخترت أخيراً.. ومن بين اللّي اخترتهم كان في وحدة اسمها "سارة"..
كانت بيضا من السما.. لو تاهت بجبل ثلج ما حتعرفها إلاّ من شعرها الأشقر.. عيونها زرقة وعميقة.. بتطّلع فيها بتشوف ماضيك كلّه.. كانت أوّل سنة جامعة وبتدرس سياحة..
قعدت أسبوعين بموسكو واتحججتلها انّي محتاج حدا ايعرّفني ع المدينة بس لأكون معها.. لأشوفها كل يوم.. كنت بدّي أعرفها أكتر.. وهيك كان..

حبيتها.. حبيتها بجنون.. قضّيت أحلى أسبوعين بحياتي معها.. هيّ كتير حدا نضيف من جوّا.. بس ما كانت قادرة اتكمّل دراسة والوضع الاقتصادي عندهم كان سيء جداً.. فاضطرّت اتقدّم ع هيك شغل..
قبل بيوم ما أحضّر شنطي وأرجع على عمّان.. رحت ع مكتب التوظيف وشطبت إسمها من قائمة المغادرين.. وثاني يوم رحت ع المطار..
كنت خايف عليها! عارف شو مستنيها بعمّان واذا الزباين تركتها بحالها أبو الوليد ما حيتركها!
وصلت ولقيتها واقفة ع باب المطار بتستناني.. قعدت تلوم فيّ وتقول انها اذا ما سافرت واشتغلت ما حتقدر ترجع اتكمّل دراسة ولا تصرف ع أهلها.. ضعفت قدّامها بس فهّمتها ليش اتصرّفت هيك.. وقلتلها هاد لمصلحتك.. وصارحتها بإعجابي فيها..

"وأنا كمان معجبة فيك، وهاد سبب من الأسباب انّي بدي آجي معك"..

سافرت وتركت كياني كلّه بموسكو.. وعدتها أبعتلها مبلغ شهري تقدر تكمّل دراستها فيه وتصرف ع أهلها.. وكانت تشتغل بعد الجامعة وهيك بيمشي الحال..
صرت أخصم من مصروفي وأبعتلها.. ومرّات أسرق من أبو الوليد.. كلّه ع أمل انخلص جامعة ونرتبط.. هاي كانت أقصى أحلامي..
بس كان لازم هاي الأحلام تنتهي وبسرعة كتير زي ما بدت!
اشتقتلها وانزلت أعمللها مفاجئة وأشوفها..
سألت عليها بسكن الجامعة.. قالولي انها تركته من ٦ شهور!.. دوّرت عليها لحد ما اكتشفت انها عايشة مع صاحبها بشقّة بضواحي المدينة.. رحت عليها ودقّيت الباب..

حجزت بسرعة وارجعت ع عمّان.. كنت ٦ شهور عم بصرف عليها هيّ وصاحبها السّكير...
طويت الموضوع وارجعت لدراستي وجامعتي.. وحكيت لأبو الوليد ايبعّدني عن الأحمر لحد ما أخلص دراسة.. بس ما اقدرت أنساها ما اقدرت!..

(١٥)

في غرفة التحقيقات...

(طلال)
تركني المحقق بعد ما فهّمني شو القصّة.. سارة انقتلت ومتّهمينّي أنا بالقتل.. صحيح أنا اللّي نمت عندها قبل بيوم من الحادثة وتحليل ال DNA حيكشف هاد الإشي لأني ما استعملت واقي بشري.. أي ما بحبّه والله العظيم بيُخنق ما بحبه! بس يا سيادة المحقق أنا طلعت من عندها ع ١٢ الظهر! وكانت سليمة.. ما كان مالها اشي..
المشكلة يا عزيزي انّه كل الأدلّة ضدّك والحصانة ما حتحميك..

كنت ساعتها عم ببصم ع فشلي بتنفيذ إتفاق الشيطان مع تهاني.. وحفضح إسمي وعيلتي.. قريباً بالأسواق..
السفارة الروسيّة أعلنت الحداد ٣ أيّام عالضحيتين.. وصارت القضيّة على كل لسان.. هاد زاد كتير الضغط على التحقيق.. خصوصاً انّه سياسي من البلد متورط بالموضوع..

وبحب أقولك عزيزي القاريء انّك شو ما كنت كبير، فيه دايماً اللّي أكبر منّك.. وفرصك بالنجاة من المركب الغرقان بيعتمد على قدرتك ع سد فتحات التسريب.. بس لمّا التسريب يكون أقوى منك فالناس حتتركك تغرق لحالك فيه..
وهاد اللّي صار مع أبو الوليد.. انسحبت الحصانة منّه.. واتحوّل للتحقيق بتهمة قتل الشقيقتين..

(١٦)

(معن ونسرين)
وينك؟! الك كم يوم ما شبكتي؟
شويّة ظروف..
خير؟..
معلش مش حابّة أحكي عن هاد الموضوع...
طيّب طولي بالك.. شو ما كان صاير معك ما حيكون قد اللّي صارلي هاليومين..
ليش شو اللّي صاير معك؟!..

حكتلها عالجريمة.. ع محمد وياسر وسارة وأبو طارق.. وعالتحقيق.. ضلّت ساكته.. بس خلّصت أعطتني رقم تلفونها وقالتلي ضروري أشوفك بكرا.. استغربت كتير.. بس اتواعدنا بستاربكس عبدون..

(١٧)

(عامر)
ألو.. مرحبا عامر..
أهلاً وليد.. كيف حالك؟.. البقيّة بحياتك..
انت عارف مين قتلها؟!
ما بعرف يا وليد..
اكيد هوّ.. مين حيكون غيره؟!
ما تحكي هيك ع أبوك يا وليد!...

كان بزيارة لأبوه قبل حوالي ٣ أسابيع بالأحمر.. والتقى مع هانا اللّي بالصدفة البحتة كانت جاي تشوف أختها سارة.. اتعرّف عليها وروحوا مع بعض بعد ما عرض عليها ايوصلها.. اتطوّرت علاقتهم بصورة كتير سريعة.. هانا كانت حلوة كتير وبن

فس الوقت بتدوّر ع حدا برنس يصرف عليها.. كان هاد الحدا هوّ وليد..
المشكلة انّه وليد ما كان لحاله.. خصوصاً بعد ما عرف أبوه.. نبّه عليه ألف مرّة يبعد عن هانا وحط عليه مراقبة ٢٤/٧..

(١٨)

(عامر وتهاني)
مرحبا مدام..
أهلاً عامر.. كيف الوضع بالأحمر هلأ؟!
والله يا مدام زي الزفت.. الخبر انتشر بكل مكان والزّباين صارت خايفة تيجي..
طيّب اذا ضل الوضع هيك منسكّر وبنفتح بداله مطعم عربي.. منتشرة المطاعم هاي الأيام، شو رأيك؟
بس المطعم ربحه مش مثل الأحمر مدام! شو جاب لجاب؟!..
ولو.. عالقليلة ما حيكون فيه المسخرة اللّي كان يسويها طلال!..

(١٩)

(وليد)
سارة!! ماصدّقت عيوني بس شفتها بالأحمر.. بعد كل اللّي عملته فيّ بموسكو اجت.. وهاي المرّة كان أبو الوليد هوّ اللّي جايبها.. يا إلهي شو وقحة!

ما كان ينفع أقعد معه وأحكيله القصّة.. كان كتير متأخر الموضوع بعد ما اعرفت من عامر انّه ماخذلها شقّة بالشميساني وأغلب الأيّام مقضيها معها.. قلبي كان بيتقطّع من جوّا وكان لازم أنتقم منها.. وأحسسها نفس الشعور اللّي حسيته...

(٢٠)

(معن ونسرين)
التقينا بستاربكس عبدون.. كان اسمها نسرين.. طلبت فلات وايت وقعدت.. كان شكلها تعبانة كتير كإنها من يومين ما نامت.. سألتها شو القصّة وليش أصرّيتي نلتقي بعد ما حكتلك ع عموضوع التحقيق!

يعني أبوكي هوّ المتّهم بالموضوع؟
آه.. بس أنا متأكدة انو بابا مستحيل يعمل هيك!
طيّب مين ممكن يعمل هيك؟!
ححكيلك، بس كل اللّي بدي ياه منّك انّك تساعدني لنطلّع بابا من هالقصة...
كيف؟!

(٢١)

(رُبى والمحقق)
يعني انتي كنتي معه بعد ارتكاب الجريمة؟
سيدي أنا وصلت عالأوتيل الساعة ١٠ باليل، كنت بس بدي أورجيه شويّة صور للحملة الإعلانية الجديدة..
صور! وليش بالأوتيل؟! وبغرفته كمان؟!
سيدي هيك اتعودنا نشتغل.. بس أنا بأكدلك انّه ما في أي علاقة بتجمعني بطلال..
حدا جاب سيرة علاقة؟! أنا مستغرب بس..

سيدنا، تقرير الطبيب الشرعي للضحية الأولى طلع..
أعطيني أشوف..

أثبتت التحاليل المخبرية تعرّض المدعوّة هانا للإغتصاب والتعذيب ومن ثم القتل والتنكيل، وقت الوفاة الساعة ١٠ مساءاً، الحمض النووي للمشتبه يتوافق مع الحمض النووي للمتهم طلال بنسبة ٩٥٪؜...

قلتليلي أيّا ساعة لقيتيه بالأوتيل؟
الساعة ١٠..
وطبعاً بدون ما يصير أي علاقة، لأنه مرته كبست عليكم صح؟
سيدي قلتلك ما في اي علاقة بي...
طب خلص خلص بلا كتر حكي، بتعرفي من وين عرفت مرته؟!
لا..

(٢٢)

(وليد والمحقق)
إنت اللّي قتلت هانا!
لا والله يا سيدي والله ما قتلتها!
ما تكذب! بعد ما سوّينا اختبار الحمض النووي لأبوك، طلع انّه متطابق بنسبة ٩٥٪؜ مع الحمض النووي للمجرم.. ومافي ٢ بالدنيا بيتطابقوا بهالنسبة الاّ الأب وإبنه.. إنت قاتل هانا يا وليد..

بكي مثل ولد صغير.. أحلى شي بمهنتي كمحقق إنك تكتشف المجرم.. تحشره بالزاوية زي الحشرة ويصير يترجاك انّك ترحمه قبل ما تدعسه بإجرك!

اعترف انّه اتزوّج هانّا بورقة مضروبة وبالسّر عشان يقهر سارة، هيّ ضحكت عليه وأخذت منّه أبوه وهوّ بدّه ينتقم منها بأختها.. أسلوب ملائم جداً لحدا بعمره! وكان كل شي برضاها مش غصب أبداً وبدون ما تعرف انّه ابن طلال او حتى تخبّر اختها سارة.. بس ما اعترف انّه قتلها.. حكى انّه أخذها عتلّة ورا عبدون محل ما اتعودوا يتلاقوا وعاشرها بالسيّارة.. وبس خلصّوا هجموا عليهم ٣ زلام وأخذوها وقالوله جملة وحدة بس.. (روح روّح عالبيت أحسنلك)..

(٢٣)

انتهت التحقيقات.. بدون ما نقدر انجمّع أدلة كافية اتدّين أبو الوليد أو إبنه.. كانت عمليّة نظيفة كتير وبعيدة عن أي شبهات.. مع تزايد الضغط الإعلامي ع الموضوع كان لازم انقرر وبسرعة..
قررنا نحن النيابة العامّة.. الإفراج عن المتهمين لعدم كفاية الأدلّة.. مع حفظ الدعوى وقيدها ضد مجهول لحين ظهور أدلة أخرى..

(٢٤)

وصل أبو الوليد وإبنه عالبيت.. كان باستقبالهم تهاني.. بنفس الشموخ والعظمة واقفة عباب الفيلاّ بتستنا.. طبعت بوسة باردة ع جبين ابنها.. ودعت أبو الوليد لإجتماع مغلق بغرفة النوم...

شفت آخرة نزواتك لوين وصلتنا؟!
انتي عارفة انّي ما قتلت حدا!
بعرف.. انت بتقتل بس من جوّا.. بتستلذ بالتعذيب الداخلي فقط للبني آدمين!..
تهاني شو بدّك منّي ع هالمسا؟!
مستغربة! كيف وحدة زي سارة قدرت تضحك عليك واتجّر اجرك، وبعديها بتقولك انها حامل!..
وانتي شو عرّفك؟!
وطلعت بعد ما انقتلت مش حامل.. بس بدها تخرب بيتك!.. انت ليش ما بتستعمل واقي؟!
انتي عارفة انّي ما بحبه..
وهي البني آدمة راحت فيها عشان حضرتك ما بتحبه!..

(٢٥)

(عامر)
روّحت ع البيت الفجريات.. لقيت امّي صاحية وبتعزّل البيت.. صحّيت المرة وبهدلتها! وحلفت عليها يمين طلاق اذا بشوف امّي بتشتغل بالبيت مرّة ثانية لأطلقها! مش بكفي بتشتغل عند بيت إم الوليد! آه الست تهاني.. ياريتك زي الست تهاني.. شافت جوزها وإبنها بيغرقوا مع بنتين روسيّات ومع هيك قدرت اتطلّعهم منها.. كل هاد عشان تحافظ ع عيلتها وسمعتها! أصيلة.. است

ني شوي، التلفون بيرن، بنت حلال هاي الست تهاني!

عامر كيفك؟
تمام يا ست الكل.. خير أؤمري، بدّك ايّاني أخلّص ع رُبى كمان؟!
لا لا، هاي وحدة تافهة مش مستاهلة نحكي فيها، المهم خلّي عينك ع طلال منيح، ما بدّي ايّا أغلاط زي المرّة الماضية!
والله ما كان قصدي يا ستنا، هيّ اللّي حكت انها حامل، مش حقعد أسوّيلها اختبار حمل قبل ما أقتلها!..
طيب والثانية؟ ليش اتشوهها؟
ههههه هاد أبو طارق تبع القهوة، هوّ بيحب يترك أثره عالضحايا.. مش عشان اشي بس ليتذكروه بالقبر..
طيّب عكل حال.. أنا جبتلك العفو من الديوان عشان علاج أبوك.. زي ما اتفقنا..
تسلمي يا ست الكل..

النهاية...

(٢٦)

(معن ونسرين)
ما قلتيلي؟ كيف بدّك أساعدك؟!
أنا بعرف مين القاتل..
مين؟!
بتتذكر يومها بس كنّا نحكي ع ال mirc وفصل الخط؟
آه بتذكر، معلش إمّي قطعت السلك!
مش موضوعنا هلأ، ساعتها وليد طلع بالسيارة.. كنت عارفة انّه رايح يشوف صاحبته اللّي اتجوزها بعد ما اسمعت امّي بتبهدل فيه.. من فضولي الحقته.. أخدها بالسيارة وصفوّا عتلّة عبدون وبعد شوي اجوا ناس أخدوا منها ومشيوا.. إلحقتهم لحد ما وصلوا عند صاحب كشك قهوة.. أخدها منهم وراحوا.. استغربت بس لمّا قلتلي القصّة اعرفت انّه ابو طارق هو صاحب القهوة وهو القاتل!..
أبو طارق!! تبع الصب والغلي!.. نسرين، خلص اطلعي من الموضوع، أنا راح أبلّغ المحقق..

نحن النيابة العامة..

تمّ فتح ملف التحقيق لظهور أدلّة جديدة، وبضبط المتّهم أبو طارق ومواجهته بالأدلة اعترف وأرشد على المحرّض عامر ومنفذ جريمة القتل الأولى.. والذي بدوره أرشد إلى العقل المدبّر.. السيدة تهاني.. المدعوّة بأم الوليد..

تُحال القضيّة إلى محكمة الجنايات مع المطالبة بأشد عقوبة للمتهمين الثلاثة..

الإعدام شنقاً..

هلأ عنجد النهاية..

بداية القصة🤍🦋

رأيكن بالقصة🧚‍♀👇
@Stories_3_bot

قصة بقلم صديقة القناة "روزايين"🌸✨
بعنوان: #يا_ليتني
............
قراءة ممتعة🦋💙"

____يـــــــــــا لــــــــــــيـــــــــتـــــــــنــــــــــي____

بقلم صديقة القناة: روزايــيــن~🌹✨

- قصتنا اليوم بتحكي عن مجموعة من الصديقات، لكل بنت قصة وظروف خاصة فيها. . . خلينا نتعرف عليهن. .
هدى وكوثر وأمل ثلاث بنات بحبوا بعض كتير كتير بيعرفوا بعض من الإبتدائي وعمر كل وحدة منهن ١٤ سنة.
- هدى هيَّ قائدة المجموعة، بتتميز بشخصيتها القوية وأخلاقها ولكن هيَّ غامضة وعندها كتير أسرار...
- كوثر هيَّ أغنى وحدة في المدرسة حلوة كتير وطيبة القلب وما الها اهتمام بالدراسة.
- أمل الله ما رزقها المال متل كوثر لكن هيَّ قلبها كتير طيب ولطيفة وشاطرة كتير ومتفوقة وهادئة بس مسكينة أبوها ميت من وقت ما كانت صغيرة وأمها حلمها الوحيد انو بنتها تتخرج بأعلى العلامات وتصير دكتورة قد الدنيا. . .

هدول هنن شخصيات قصتنا اليوم، متشوقين تتعرفوا على أحداث القصة؟ يلا نبدأ!

- وسط أصوات الطالبات العالية في الباحة ثلاث بنات بيحكوا مع بعض. . .
كوثر: أففففففففف ولله مليت كم حصة رياضيات ضل حتى أخلص دراسة وأتزوج أمير الأحلام😍😍😍
هدى (ضربت كوثر بخفة): انتِ هاد همك!😒
كوثر: وانتِ أمل شبك شاردة؟
أمل: ما في شي بس تعبت شوي من التركيز...
هدى: الله يوفقنا جميعاً ...
كوثر: طلعولنا من سيرة الدراسة لأحكيلكن شو صار معي امبارح.
هدى وأمل: شو؟؟
- امبارح كنت قاعدة على هل فيسبوك إلا بشوف اجاني طلب صداقة من حدا.. دخلت على حسابو...
هدى وأمل: اي؟؟
- وإلا بشوف شب متل القمر يعني واو واو واو😍😍😍
قبلت الطلب فوراً وفتح حديث معي وضلينا نحكي للفجر🥰
أمل: 😕
هدى: 😳😳 (بصوت عالي) لك انتِ جنيتي شي؟؟؟؟؟!! طق هالدماغ براسك؟؟؟!!؟! اختفى!؟
كوثر: اي اي اي اشبك فلتي علي؟؟
أمل: حبيبتي كوثر بس هدى خايفة عليكِ، بتعرفي القصص يلي عم تصير...كملي...
كوثر: المهم، طلب مني أبعت صورتي بس ما رديت...
هدى: اي منيح...ضل في شي بهالراس...
كوثر: نعم ست هدى؟!
أمل: خلص خلص ما صار شي.

مر اليوم وراحت كل بنت على بيتها...

هدى راحت بطريق بيتها لكن انعطفت بعد تردد للمفرق التاني...
دقت باب بيت شوي قديم ودخلت...
هدى: شلونك امي؟...
برد عليها صوت مرة كبيرة: هدى؟ يا روحي جيتي؟ تعي تعي.
هدى: ماما بوعدك أخلصك من هالحالة وأرجعك لبيتك محل هالحية وفاء.
- خلص حبيبتي لا تشغلي بالك، الله كريم تعالي نتغدا..
تغدوا مع بعض وحكتلها هدى عن يومها...
بعدين بعد بكاء ودموع ودعوا بعض...
هدى: أمي لا تبكي أنا كل يوم جاي ورح تخلص هالشغلة عن قريب إن شاء الله.
- يا روح امك..ديري بالك على حالك.
وراحت هدى على بيتها الأصلي...

____

أما كوثر فرجعت على قصرها الفخم و أخدت حمام وسألت الخادمة..
- وين ماما؟
- راحت على اجتماع كوثر خانم.
- طيب طيب. اففف
ومسكت تلفونها وقعدت بغرفتها...
وتشوف رسالة على الماسنجر من "علي".

علي: آسف إذا أزعجتك بطلبي...
ردي علي...
- ولا يهمك..كنت تعبانة وبس.

بعد خمس دقايق..

- متأكدة ما انزعجتي؟ بس الصراحة بس كان بدي أتعرف عليكِ...
- امممممم
- لو سمحتي..بترجاكِ
- طيب اوك.
قامت ولبست أحلى شي عندها وحطت مكياج وأرسلت ٣ صور ...
- بتجنني!!😍😍😍😍😍❤️
- خجلتني🥰
- بتعرفي شغلة...
- أنا حبيتك من أول مرة حكيت فيها معك...
- . . .
- أنا آسف..
- لا لا ولا يهمك...أنا كمان...
- انتِ كمان شو؟
- حبيتك...شخصيتك حلوة كتير و صورتك امبارح..ما عم تنمحا من بالي.
- طيب إذا كنا منحب بعض..
- اي؟
- لازم...
- اي؟؟؟
- نتعرف عبعض صوت وصورة.
- امممم ما بعرف.
- يلا يعني ما فيها شي.!
- طيب طيب...خليني جهز حالي.
- 😍😍😍❤️

__

______

- مشيت أمل على طريق بيتها يلي كان بيبعد شوي عن طريق المدرسة بحارة قديمة ومهترئة وما فيها حدا، بس ما كانت تعرف انو في عيون شريرة عم تراقبها. . .

. . .: كيفك يا قطة؟!
أمل: آههه!!!😰😰 رعبتني!، شو بدك مني ؟!!!
. . .: بدي ياكِ😍
- شو سقيل! روح من هون!
- ما عكيفك!

ركضت أمل بأسرع ما يمكن حتى تصل على البيت.

أم أمل: كأنو أمل اتأخرت...رح أطلع على البلكونة أشوف.

أمل: اتركني يا حيوان! اتركني! 😭😭
. . .: حاج تتحركي!

.: شو عم يصير هون؟؟
. . .: لا تتحرك-ي
.: بعد عنها! 👊🏻👊🏻
أمل: 😭😭 الحمدلله يا ربي😭😭
.: انتِ بخير؟؟؟ فيكِ شي؟؟ هرب الله لا يوفقو.
أمل: لا لا الحمدلله، بتشكرك كتير لولاك ما بعرف شو كان صرلي😭😔
- خلص لا تبكي، الحمدلله كنت معدي من هون وشفتك...بيتك قريب؟
- اي هون بعد هالبناية
- أنا حسام. . .
- أنا أمل...يلا لازم أروح بتشكرك كتير كتير.
- يلا الله معك انتبهي على حالك المرة الجاي.
- شكراً..مع السلامة...

أم أمل: ليش تأخرتي؟!! خفت عليكِ..
أمل: آخخ..ما رح تصدقي شو صار.

وحكت أمل لأمها كلشي..

أم أمل: ولي على قامتي! الحمدلله الله حماكِ! فيكِ شي روحي!
أمل: لا ماما...اجا هالشخص بالوقت المناسب..
- الله يوفقو ويبعد عنو كل شر، منيح طلع آدمي..
- اي...يلا أمي رايحة أرتاح شوي تعبانة كتير...
- اي روحي حبيبتي ارتاحي وأنا بحضر الأكل.
- يلا...

_____

هدول هنن شخصياتنا. . . لاحظتوا انو كل وحدة منهن الها مشاكل وشخصية خاصة فيها وأسرار ما حدا بيعرف فيها و كل وحدة محرومة من شي... حتى كوثر، يلي عم تضيع وما في حدا يرشدها على الطريق الصحيح، بسبب انشغال امها وأبوها عنها...
وهدى محرومة من امها بسبب أبوها ومرت أبوها.
وأمل مو محرومة من المال والغنى بس...من شي أهم..من حنان الأب وحمايته...

_____

في بيت هدى. . .
وفاء: وينك يا صغيرة الجن!؟
هدى: شو بدك؟؟
- عمليلي فنجان قهوة جاييني ضيوف ... انقلعي.
- ما يعني إذا قلعتي أمي من البيت وخدعتي أبي لحتى يتزوجك من الأول يعني بتمشي كلمتك عليّ كمان!!!! صرلك اسبوع عم تزعجيني لهون وبس.
- بالله...قويانة...أنا بفرجيكِ
- هددي لأشوف واكذبي ما رح تتغلبي عليّ!

مسكت وفاء التلفون...
وفاء (بصوت باكي): ☹️😢 ألو حبيبي...روق شوي...لا لا بس...هدى...هدى جابت شب على البيت...روق روق...اه؟ لا لا ما كنت موجودة جيت شفتن هيك...هرب...لا لا روق روق..استنى شوي..ألو ألو....سكر😏
هدى: عم تألفي عليّ يا...
- ولا كلمة هلأ بيجي أبوكِ وبطالعك من بيتي وبتروح لعند أمك الله يقصف عمرك وعمرها ومنشوف مين رح يتغلب على التاني...
- الله لا يوفقك! حسبي الله ونعم الوكيل بس.
- 😏😏😏 لنشوف...

وما بتسمع هدى إلا صوت دق وخبط على الباب ...
بتمشي وفاء بكل ثقة وبتتظاهر بالحزن وبتفتح الباب...
سامر (أبو هدى): وينك!؟!!؟؟ يا &#@ أنا بدي أربيكِ!؟؟!!😡😡🤬🤬

و بيمسك سامر هدى من شعرها وبيشحطها على الباب...
وفاء: الله يوفقك روق شوي🥺😢
هدى: أنا ما عملت شي! هيَّ كذابة!
وفاء: من فوق ما عم أهديه حتى ما يدبحك!؟ الله يسامحك بس!
سامر: ما بدي أوسخ ايدي فيكِ يا وسخة وببيتي كمان؟! يا حوينة تعبي فيكِ، اعتبري حالك محظوظة بس ولله العظيم لو رجعت شفتك على عتبة بيتي لأخلص عليكِ!!!! انقلعي!!!
وتسكر الباب بقوة...

أيام مرت...
حسام وأمل عم يشوفوا بعض ويتعرفوا على بعض...
هدى تقلعت من البيت بسبب مرت أبوها وفاء، وهي مو أول مشكلة بتعملها...

___

في بيت كوثر. . .

كوثر: ام بدر...تعالي شوي...
ام بدر: نعم يا بنتي..
كوثر: أمي موجودة؟
- نعم، موجودة...
- 😍😍 شكراً كتير كتير.!
- الله يوفقك يا بنتي ويرشدك على الطريق الصح.
- آمين😍😍

دق دق دق...
صوت أنثوي ولكن كله قوة وكبرياء من جوا الغرفة بيقول: ادخل...
كوثر: أم-ي
بتتوقف عن الحديث بإشارة من امها✋🏻
أم كوثر (رزان) بتحكي على الهاتف: نعم...لازم...بس تذكر انو شركتنا مو بمكان مناسب حتى نوسع المبنى..عفواً بس...طيب طيب...رح أبحث بالموضوع..يلا مع السلامة..
كوثر: ماما...
- كوثر؟ نعم؟
- ماما بدي أقلك شغلة مهمة كتير.
- امم...تفضلي..
- أنا...
بيرن التلفون مرة تانية...
رزان: ألو..اي..اي..شلون؟ دقيقة أتحقق من هالشي.
فتحت تقلب المجلدات يلي قدامها..
كوثر بتطلع من الغرفة بغضب والدموع بعينيها...
ام بدر: خير يا بنتي..
- 😭 ليش ما حدا بيسمعني..
- تعالي لا تاكلي هم أنا بسمعك..امسحي دموعك...
- شكراً 😭 بشوفك متل أمي وأكتر...لأنك أقرب..
- تعالي حبيبتي. .شوفي..؟
- أنا تعرفت على شب بالفيسبوك و...
- اي؟
- عملنا شي غلط...بدي أمي تساعدني بس ما عم تسمعني..
- طيب شو هو الشي بالضبط...
- حكينا كتير...حكينا فيديو بعتلو صوري....بس ولله ما قصدي كان بس بدي اهتمام..
- طيب ما صار أكتر من هيك؟
- اي..بس حكي...كتير كبير.
- الله يسامحك ويهديكِ طيب حبيبتي ما فات الأوان..أنا مرة كبيرة ما بفهم بالتكنولوجيا...بس بعرف إنك لازم تتركي ها

لشب لأنو هالأشياء ما بتجوز وبتأدي للخطأ...والحمدلله إنك جيتي طالبة نصيحة هاد بيعني انك ندمانة.
- بعرف بس ... ما عم أحسن!
- ادعي الله يساعدك..الله رح يساعدك ويدلك على الطريق الصح.
- كيف؟
- بالصلاة والدعاء.
- بس أنا ما بعرف أصلي..وما بعرف أدعية...
- تعالي أعلمك..

تعلمت كوثر الصلاة وقرأت القرآن وحبتو كتير ولبست الحجاب يلي استغربت امها كتير من قرارها بس ما أبدت أي اهتمام...وكانت ام بدر تعاملها متل بنتها وتعلمها وترشدها للطريق الصح.. وقررت كوثر تاخد قرار أخير مشان علي..إنها تتخلى عن كل هالشي وتبدأ من جديد.

_

أمل بدأت تتعرف على حسام وتكبر المحبة بينهن أكتر بس بالسر..
حسام: أمل! يا آنسة أمل!
أمل: هاد انت؟ أهلاً أهلاً...
- بدي ياكِ تسمعيني من الأول للأخير وما تقاطعيني...أنا بحبك اي بحبك ومستعد أعوضك عن كلشي وأصير زوجك وانتِ زوجتي وتعيشي معززة مكرمة معي.
- امممم...بدي أفكر...
- بس هيك؟ ما في بحبك..
- حسام عطيني وقت.
- بستناكِ العمر كلو.

ما توقعت أمل هالشي...كان بدها تكمل تعليمها وتتخرج من الجامعة أول شي.. ما ركزت بدروسها بهاليوم...
___

في الباحة...
هدى: كيفك أمولة؟
- الحمدلله هدوشة
- وين رورو؟
- هههه...ما بعرف..
كوثر: مرحبا بنات
هدى وأمل:😳🤯
كوثر: شبكن؟
هدى: كوثر؟! تحجبتي؟ مو على أساس ما رح تتحجبي؟
كوثر: هدوشة، أنا الله بعتلي أم محل أمي تساعدني وتعلمني وتهتم فيني...
أمل: مين؟
كوثر: ام بدر، بتشتغل عند ماما بس هيَّ عاملتني كبنتها مع اني غلطت...
أمل: كيف يعني غلطتي؟
كوثر: تذكرتوا علي يلي قلتلكن عليه؟
هدى: اي؟
كوثر: عملنا شي غلط...

قبل ثلاث أيام. . .

علي: كوثر؟
- اي؟
- بدي أطلب منك طلب.
- امم
- مو انتِ بتحبيني؟
- اي وكتير
- طيب...شوفي هي البنت شو عملت لأنها بتحب حبيبها..
- شو هاد؟!!😳😥
- هاد يا حبيبتي حب..
- علي قلبت معدتي من هيك مناظر.🤢
- لا لا لا...هاد مو شي لسع😈 أنا وياكِ رح نعمل هيك بس أسهل.
- كيف يعني؟
- يعني بالدردشة، وإذا عجبتك رح نعمل فيديو! كيف؟!
- بس ما بدي
- يعني ما بتحبيني؟
- بحبك بس...
- لكن يلا!، أنا ما عم ألمسك على الحقيقة بس حكي.
- طيب طيب...

طفت شمعة البراءة في كوثر وهيَّ أولاً تقاوم بس بعد ضغط علي لحتى تتجاوب بالكلام...

- علي حاج حاج
- شبك شو صرلك
- راسي.
- سلامتك.😐 هلأ انتِ هيك لأنو أول مرة بعدين بتتعلمي..
- لا ما بدي.
- 😡 زعلت منك، افففففف
- لا لا لا خلص طيب
- اي ها هيك بدي ياكِ.

. . . . . . . . . . . . . . .

أمل: يا الله😳😦
هدى: انتِ ما بتخجلي من حالك!؟، ما عندك ذرة حس يا وسخة! ما بدي أقعد معك! لا تحكي معي!!
كوثر:😭😭😭 ولله ندمانة، هدى هدى!، أمل.
أمل:🙁 كوثر...خاب ظني فيكِ، بس لأني رفيقتك...ما لازم اتركك وقت الشدة، وأنا بعرف انك ندمانة، بدي أساعدك تصلحي غلطك.


____
عجبتكن القصة؟!🤓😃
هي أول قصة بنشرها على القناة...وإن شاء الله مو آخر وحدة كملوا وتفاعلوا معها!
واعطوني رأيكن!✨
يتبع...

___

كوثر: كيف رح تساعديني؟!😔 فات الأوان...
أمل: انتِ ندمانة؟
- اي وكتير ولله😭
- لكن رح أساعدك...
- سامحيني😭😭
- السماح مو مني، السماح من الله.
- 😭😭😭
- أول شي لازم تتخلصي من حسابك.
- كيف؟!
- امسحيه..
- طيب وعلي؟؟ رح يفضحني أنا بعرف.!
- مو إذا عملتي يلي رح أقلك عليه...
- شو هو؟
- أول شي اوعديني انك رح تعقلي وادرسي كويس وتنسي كل هالشي.
- بوعدك، بوعدك
- طيب. اسمعي يلي رح أقوله.
- طيب احكي.

_______

رجعت هدى على بيت امها معصبة وهيَّ على الطريق شافها أبوها.

سامر: يا هدى!
هدى: بابا
- لا...
- اسمعني بس! انت ولا مرة سمعتني ولله تعبت، ما سألت بنتي وين؟ أنا عند أمي...أمي يلي قلعتها من البيت مشان مرتك التانية..يلي ما صرلها عندك سنة وأمي صرلها ١٧ سنة معك عالحلوة والمرة، وأنا بتشك فيني؟! أنا تربايتك يا غالي...مو غريبة...يا بابا انت انخدعت كتير...بتعرف وين ماما ساكنة؟ ببيت قديم العفن عم ياكله! اصحى بابا فيق وطلع مين بقي؟!
سامر: . . .
هدى: بابا.
سامر: هدى حبيبتي يا فرحة عمري تعالي! البيت مو شي بلاكن! كل يوم وفاء عم تعملي مشكلة واكتشفت انها عم تسرق مني المصاري والدهب..وطلقتها...
هدى: بابا...😍😭
سامر: هلأ بقي نرجع حبيبتي الأولى والأخيرة.
هدى: ماما😃😃
سامر: لأ وفاء.😂
هدى: 😒😒
سامر: يلا!



رولا (ام هدى): جيتي هدى؟
سامر: جينا ...
رولا: 😕😐😐
هدى: ماما ارجعي معنا!
رولا: سامر انت تخليت عني بكل سهولة...ما أظن أحسن أكمل حياتي معك...بدي أطلق..
هدى: 🙁😧
سامر: طيب.أنا...😢😔
رولا: بعد ما أقضي حياتي معك وأموت وأنا معك وما رح أطلق. . .😊
سامر: 😃😄

ضموا بعض ورجعوا على بيت ورجعت عيلة هدى متل قبل وأحسن...
أما أمل فوقفت حكي مع حسام بعد ما قالتلوا انها بدها تكمل دراستها...وخلصت تاسع بجدارة ومن الأوائل، وأم أمل شافت شغل بمحل خياطة يلي طورتو حتى صار عندها مشغل خياطة أكبر مع بنات متلها وصارت تطالع مبلغ لا بأس به.
وكوثر مسحت الفيسبوك وقالت لـ علي انو أهلها كشفوها وصادروا منها الموبايل ورح سكرولها الفيسبوك...وأهلها فشلت شركتهم الكبيرة وانتقلوا لبيت أصغر وضلت أم بدر تتواصل مع كوثر وترشدها وتحن عليها وتبعتلها أكلات وطبخات طيبة كتير، وطلعت درجة رابعة على صفها بعد جهد ومساعدة من أمل.

جمعت أمل هدى وكوثر مع بعض حتى يتصالحوا...

هدى: بعدي شوي
أمل: استني شوي.
هدى: لك بعدي أمل مو بدي أضم كوثر الدبة؟؟؟ اشتقتلك دبة.
كوثر: أنا دبة يا وحشة!؟
أمل: مو على أساس تصالحتوا؟؟😅😅
هدى: أنا بغير طريقة حكيي مع حدا! وأصلاً بحبك أمل الفارة..
أمل: أنا فارة!!🐭🐭 تعي لهون!😂😂
هدى: 😂😂
كوثر: 🤣
أمل: هههه بحبكن يا أحلى رفقة😂😂❤️
_____

أمل: ياربي ماما خايفة بلكي ما جمعت طب؟؟!
ام أمل: لا تخافي حبيبتي عم أدعيلك.
هدى: سكتوا! طلعوا النتائج!
أمل: أمل أحمد عبد الله _ ناجحة ... طلعلي طب!!! بالمجموع التام!!!!
أم أمل: الحمدلله يارب!!!
كوثر: كوثر كوثر كوثر شفت اسمي! اممم... ناجحة بمجموع متوسط؛!!!!
أمل: مبروك روريتي!!!!❤️❤️❤️
هدى: هدى ... هدى... طلعتلي المحاماة !!!!!!!!! رح أصير محامية!!!!!😭😭😍😍😍😍❤️❤️❤️❤️❤️❤️❤️🎉🎉🎉🎉
كوثر: 😱💃🏻💃🏻💃🏻💃🏻
هدى: الظاهر كوثر قررت تصير رقاصة😂😂😂😂
كوثر: اسكتي وليه محامية هدى، وها𑹈ها👡
أم أمل: كل هالشي وأنا موجودة بقا بغيابي شو بتعملوا؟؟؟؟
أمل: ما بعرف شو أقول😂

_

دخلت أمل طب وانخطبت لحسام يلي استناها ٣ سنين.
وكوثر دخلت أدب انكليزي.
وهدى دخلت محاماة.

كلهن نجحوا بالحياة وتحققت أحلامهن...❤️✨ (نهاية سحرية)😂

_

بدي أنهي القصة بكم جملة يمكن ما حسنت وصلهن بالأحداث...

{❤️ عزيزتي وحبيبتي الأنثى الجميلة. . .
انتِ كنز ثمين ...
يعني مو كل مين بيقلك ممكن نتعرف بتقوليله اي اي اي😍
ويلي بيحبك بحافظ عليكِ وما بيقبل يفسدك ويستغلك ويلي بحبك... بيدق بابك وبيطلبك..والك حرية الرفض أو القبول.
وشهادتك سلاحك...لا تضيعي نفسك بقصص الحب والغرام...واي بتحسني تتحكمي بهالشي.
شهادتك ودراستك لازم يكونوا أولوياتك ...
ولو كنتِ وحيدة ومحتاجة حدا يساعدك وطلبتي من الله تذكري انو الله رح يبعتلك حدا يساعدك...
قلبك مو لعبة...}

__

{بشرتك ليست ورقة، لا تمزقها
وجهك ليس قناعاً، لا تخفيه
حجمك ليس كتاباً، لا تحكمه
حياتك..ليست فلماً، لا تنهيها💙~}

قيموا القصة ولا تكرهوها...لأني كتبتها حتى أوصل رسالتي،لأني بحبكن، انتو القراء❤️

[لست وحيداً...الله معك...وأنا معك]💙