《HKBN用戶被「免費」myTV SUPER追債？》

▌有網民向我哋求助，表示最近收到追數公司電話，向佢追索拖欠 #myTVSUPER (#TVB 旗下，下稱myTV) 約400蚊嘅債務，由於個myTV係綑綁住 #香港寬頻 一齊送嘅，而網民亦一直都無用過myTV服務，連線都無插過，所以感到一頭霧水，於是向香港寬頻、myTV查詢，惟前者表示唔關佢事，叫佢搵返myTV。myTV則回覆該名網民，表示正正係因為網民無用過myTV服務，所以先要收回成本，如果想豁免費用，就要駁返部機睇一次節目。

▌我哋團隊唔係記者，好難判斷呢單新聞材料是否屬實，但過去我哋確實收過唔少留言同私訊，指自己無啦啦俾myTV SUPER收錢，如果你都有類似經歷，可以喺下面留言或者私訊我哋講吓。至於以上呢個個案，如果屬實，我哋推斷myTV可能係要整靚active users條數畀廣告商睇，以游說佢哋落廣告。如果myTV員工睇緊呢篇文，希望你哋可以回應吓，釐清公眾疑慮。

▌其實過去我哋都投訴過香港寬頻強行將myTV SUPER綑綁喺寬頻計劃入面係擾民，有啲顧客唔想要，但香港寬頻又間硬塞舊嘢畀人，整爛整唔見又要賠錢，完全係無妄之災。所以各位如果唔想搞咁多嘢嘅話，都係轉用第間寬頻公司喇。

▌最近有 #網民報料，話喺myTV SUPER見到賭博遊戲廣告，大感不滿，認為個app越嚟越擸𢶍（立雜）。該款遊戲名為「#金猴爺老虎機」，根據App Store資料，佢被歸類為「頻繁/強烈的模擬賭博」遊戲，年齡分級為17歲或以上，小編目測遊戲除咗有各式老虎機外亦有釣魚、賽馬等遊戲。

▌小編翻查資料，原來過去myTV SUPER都有登過模擬賭博遊戲嘅廣告，喺2018年，myTV SUPER版嘅《#愛回家》就係由「#億萬富翁娛樂城」贊助，《香港01》亦有報導新聞，討論myTV SUPER咁做會否教壞細路，當時記者就話唔可以因為賭博遊戲冠名贊助劇集，就假定小朋友一定會下載，甚至沉迷或造成不良影響，皆因海味鋪都試過冠名贊助《愛回家》，如果廣告真係咁有效，間海味鋪一早撈得風生水起。

▌的確，喺 #TVB、#myTVSUPER 賣廣告真係未必有效，但我哋唔可以單憑「結果」就認定呢個行為係道德嘅，廣告商落廣告嘅「目的」就係想人睇到，越多人睇到越好，佢無考慮過小朋友睇唔睇到個廣告亦係存在道德問題，小朋友雖然未必會下載遊戲，但你亦唔可以排除呢個可能。不過，基於上次《01》向myTV SUPER查詢嘅時候都係得到「對個別商業行為我們不作評論」呢個回應，相信TVB都唔會正視或改正呢個問題。#唔好教壞細路

▌如果大家都留意到TVB嘅趣聞、廣告，或者想爆料、投訴，歡迎大家喺Facebook、Instagram、Telegram(@sayno4tvb_mailbot) inbox我哋。