香港都有古羅馬式建築？唔係講笑，原來真係有㗎～呢個地方就係石硤尾主教山山頂嘅蓄水池啦！

話說最近收到水務署打算將主教山食水減壓缸清拆、解除結構危險，點知工程一展開，發現個地下蓄水池嘅建築係香港非常之罕見嘅「古羅馬式建築」。當區區議員何啟明去視察、發現有部分喉管刻上「1909」，估計整座建築物有機會超過100年歷史。佢立即要求水務署停工，並表示會喺嚟緊1月頭嘅區議會大會討論點樣去保育呢一座建築物。

呢個蓄水池其實係古羅馬式嘅結構，佢巨大嘅地下空間係由過百條麻石柱支撐，頂部就以紅磚砌成拱門，支撐住最高嘅拱形水泥池頂，最後就以泥土覆蓋。而香港好多現存嘅配水庫，例如北角雲景道、樂富等等，都係喺戰後興建，而且全部以鋼筋混凝土建築而成，所以呢個喺戰前興建嘅古羅馬式地下蓄水池係非常罕見㗎～

資料來源：何啟明FB（民協嗰位）、香港探古FB 圖文: #100毛
#古羅馬式建築 #蓄水池 #石硤尾 #深水埗 #歷史 #水務署 #配水庫 #文物 #古蹟

香港著名導演楚原離世，享壽87歲。

楚原一生人拍咗超過一百套電影，當中包括《書劍恩仇錄》、《楚留香》（狄龍版），仲有喜劇《七十二家房客》。佢最後一次公開露面，係2018年金像獎獲頒「終身成就獎」，當時佢嘅講辭字字珠璣，聽完會令人有所反思。

「人生兩個字，就係歡聲同淚影四個字砌成⋯⋯任何人無論噚日幾風光，噚日幾失意，聽日天光時候你都要起身做番一個人，繼續生活落去，因為明天總比昨天好，呢個就係人生。

管它天下千萬事，閒來輕笑兩三聲⋯⋯當你回首往事，不因碌碌無為而悔恨，不為虛度年華而羞恥，咁你就可以好驕傲同自己講，你無負此生。」

Posted by @100mosthk #100毛
#楚原 #無負此生 #終身成就獎 #明天總比昨天好