Ruslanbek Jiyanov: “Mamlakatimiz futbolida erishilayotgan yutuqlar zamirida albatta, Yurtboshimizning millionlar o‘yiniga bo‘lgan ulkan e’tiborlari samarasi yotibdi”

Xabaringiz bor, yaqinda O‘zbekiston va Tojikistonda CAFA CUP-2025 musobaqasi bo‘lib o‘tdi hamda unda Timur Kapadze murabbiylik qilayotgan O‘zbekiston milliy terma jamoasi turnir g‘olibi bo‘ldi.
“Navbahor”ning mahoratli yarim himoyachisi Ruslanbek Jiyanov ham mazkur musobaqada terma jamoamiz tarkibida o‘ynab, milliy jamoamizning muvaffaqiyatiga munosib hissa qo‘shdi. 
“Navbahor” matbuot xizmati xodimlari Jiyanovdan CAFA CUP-2025 musobaqasidan olgan taassurotlari borasida maxsus intervyu olishdi.  

- Ruslanbek, suhbatimiz avvalida CAFA CUP-25 turniridagi zafar bilan tabriklaymiz. Musobaqa taassurotlari borasidagi fikrlaringiz bilan o‘rtoqlashsangiz...
- Tabrik uchun rahmat. Terma jamoamizning g‘alabasi barcha hamyurtlarimizga qutlug‘ bo‘lsin. Albatta, CAFA CUP-2025 musobaqasi ko‘tarinki ruhda o‘tdi, deb o‘ylayman. Allohga shukr, kubokni qo‘lga kiritib, o‘z oldimizga qo‘yilgan maqsadga erishdik.
- Turnir davomidagi eng qiyin uchrashuv qaysi terma jamoaga qarshi kechgan o‘yin bo‘ldi?
- CAFA CUP-2025 turniridagi barcha bellashuvlar keskin va murosasiz ruhda kechdi. Lekin o‘yinlar ichida eng qiyinini tanlash kerak bo‘lsa, shubhasiz, Eron termasiga qarshi kechgan final bahsini aytgan bo‘lar edim. Eronliklar bir kishi kam bo‘lib qolishganidan keyin, hisobni ushlab qolish uchun o‘ynab, himoyani mustahkamlashdi. Bu esa bizga qiyinchilik tug‘dirdi. Allohga shukr, yakunda xalqimiz va Yurtboshimiz oldilarida yuzimiz yorug‘ bo‘lib, g‘alaba qozonishga muvaffaq bo‘ldik.
- Musobaqa g‘olibiga aylanganinglardan keyin muhtaram Prezidentimiz stadionga tashrif buyurib, futbolchilarni tabrikladilar hamda kubokni o‘z qo‘llari bilan futbolchilarga topshirdilar. Bu voqelik, ya’ni,  Yurtboshimizning stadionlarga tashriflari qisqa vaqt ichida ikkinchi marta sodir etilmoqda. Bu nafaqat yurtimiz futboli, balki, jahon futboli tarixida ham deyarli kuzatilmaydigan hodisa. Aytingchi, Prezidentimiz tomonlaridan futbolchilarga bo‘lgan ushbu ulkan e’tibor sizlarga qanchalik motivatsiya berdi?
- Albatta, Yurtboshimiz tomonlaridan bo‘ladigan e’tibor har doim kim bo‘lishidan qat’iy nazar, insonga o‘zgacha his-tuyg‘ularni taqdim etadi. Muhtaram Prezidentimizning ishonchlari bizga katta ruh va kuch berdi. Stadionga tashrif buyurib, muvaffaqiyatni biz bilan birga nishonlaganliklari esa biz – futbolchilarga yanada ko‘proq motivatsiya beradi. Mamlakatimiz futbolida erishilayotgan yutuqlar zamirida albatta, Yurtboshimizning millionlar o‘yiniga bo‘lgan ulkan e’tiborlari samarasi yotibdi.
Fursatdan foydalanib, futbolga berayotgan ulkan e’tiborlari va yaratib berilayotgan a’lo darajadagi sharoitlar uchun barcha futbolchilar nomidan muhtaram Prezidentimizga o‘z minnatdorchiligimni bildiraman.
- JCH-2026ga qadar milliy terma jamoamiz ko‘plab yig‘inlar uyushtiradi. Mundial startini qanchalik kutyapsiz? Jahon chempionatiga qadar sodir bo‘layotgan qalb kechinmalari, his-tuyg‘ular bilan o‘rtoqlashsangiz?
- Mundial umuman boshqa daraja. JCHda ishtirok etish har bir futbolchining orzusi, barcha qatori men buni ham intiqlik bilan kutyapman.
- Siz yurtimiz tarixida ilk marta Olimpiada va mundial yo‘llanmasini qo‘lga kiritgan terma jamoalar futbolchisiz. Bu sizga qanday hissiyotlarni hadya etmoqda?
- Bu endi umuman boshqa narsa. Mazkur tuyg‘uni so‘z bilan ifodalay olmayman. Allohga shukr, uyda ota-onam, tog‘am ham bolaligimda Olimpiada va JCH yo‘llanmasini qo‘lga kiritadigan  terma jamoada safida o‘ynash nasib etsin, deb duo qilishardi hamda bu haqda ko‘p gapirishardi. Qolaversa, sinfdoshlarim bilan ham ko‘p hazillashardim va terma jamoamiz men o‘ynagan davrda Olimpiadada ham, mundialda ham ishtirok etadi, derdim. Niyatlarim xolis ekan, orzularim birma-bir ro‘yobga chiqmoqda. Buning uchun Allohga shukr, deyman. Alloh taolodan nima so‘rasangiz, shuni beradi. Shuning uchun niyatni katta qilish kerak ekan. Kelasi yilgi JCHda ham katta natijalarga erishish ijobat bo‘lishiga ishonchim bor.
(Davomi bor)