سلام عليكم
بعد طوووول غياب جيت نطل عليكم بحلويات العيد ، نتوما كملتوا ولا مزال وين راكم واصلين ؟

...
حلوى الزبيب وصفة زمااااان ماتدي الوقت ماتدي الجهد

الوصفة :

لابال 125 غ خرجتلي 32 حبة وزن الحبة 22 غ

125 غ لابال
ربع كأس سكر ناعم
ربع كأس عسل
بيضة وصفار بيضة
ملعقة صغيرة فاني
نخلط كلش مع بعض بالباتور حتى يتجانسوا مليح ، نحبس الباتور
ونضيف :
3 ملاعق كبار شوكولا حبيبات
3 ملاعق كبار زبيب منقوع فماء الزهر ومقطع رقيق
نصف كأس كاوكاو محمص ومطحون
ملعقة صغيرة خميرة الحلويات
نخلطهم مع بعض بيدي مليح ونبدا نزيد فال :
فرينة بين 220 غ حتى 240 غ حتى تتلم العجينة وتولي عندنا عجينة طرية تتلاصق فاليد بعض الشيء ، استعملت فرينة سفينة T45

العجينة لازم تبقى طرية تتلاصق شوي فاليدين

نعمر مول السليكون الخاص بالبنيون أو أي مول عندكم من الأفضل تختاروا الشكل لي حجمو صغير المول تاعي يهز 22 غ لكل حبة

الطهي على 170 درجة مدة 15 دقيقة حتى 18 دقيقة كل وحدة والفرن تاعها ، نحطوا المول ديراكت بلا مانقلبوه على وجهه غير تتحمر الحبة من فوق معناه راه طاب , الفرن يشعل من تحت فقط

بعد مايطيب نخلوه يبرد مليح ونغمسوه فمربى المشمش ونرمدوه فكاوكاو محمص ومرحي متوسط أو خشن ، التزيين اختياري

لي تحب كمية كبيرة تضاعف المقادير
..