▫️کومسومول پوئماسی30

دونن بیر دویغوسوز سوروشدو مندن:
«نه چوخ محبّتدن دم وورورسان سن!
هر شئی کی دونیادا دَییشیر، دؤنور،
محبّت، صداقت گولونج گؤرونور.»

دئدیم کی «وعظ ائتمه فلسفه‌لردن!
عالیم پالتاریندا گولمه‌لیسن سن.
یاخشی بیلیرم کی، طبیعت دؤنور،
وارلیق هر باخیشدا یئنی گؤرونور.
لاکین طبیعتین اؤز قانونو وار،
مئیوه‌نی واختیندا تؤکور آغاجلار.
آلدادا بیلمه‌میش دونیانین واری،
بیر مسلک عشقی‌یله یاشایانلاری.
گتیر خاطیرینه «بابک»ی بیر دم،
یاراندی داغلارین دردینه همدم.
او، ائللر عشقی‌یله گونده بوی آتدی،
ائللر زومزومه‌یله اونو اویاتدی.
قیلینج‌لار، نیزه‌لر کئچدی دؤشوندن،
جلّادا جان وئرن دیلینده «وطن.»
لاکین اونوتمادی «بابک»ی داغلار،
تاریخ، سئون‌لری گؤزونده ساخلار.
گئتسه بیر قاپیدان عشقین آیاغی،
سارالار باغچاسی، تؤکولر باغی.

غافیل! بو سؤالین کیمه گرک‌دیر؟
گئت اورکدن سوروش! سئون اورک‌دیر.
گتیر خاطیرینه «لئیلی-مجنون»و،
او داستان قالاجاق تاریخ اوزونو.
آغلادی «لئیلی‌»نین گؤزونده گؤللر،
آچدی قوجاغینی «مجنون»ا چؤللر.
بللی‌دیر «شیرین»ین چال-چارپاز داغی،
«فرهاد» محبّت‌له اوچوردو داغی.
محبّت هر زامان اؤتن بیر قوش‌دور،
دئمه بو داستانلار اویدورولموشدور!
نه اولورسا اولسون... بونلاردا قان وار،
یاشایان، چیرپینان، سئون اینسان وار.
گئتسه بیر قاپیدان عشقین آیاغی،
سارالار باغچاسی، تؤکولر باغی.»

بودور باخ، آز قالمیش یئنه سحره،
دوزورم سؤزلری من سطیرلره.
قیزاریر دان یئری اوره‌ییم کیمی،
قلبیم‌له بیر وورور سحَرین قلبی.
یانیر یاقوت کیمی ساکیت اوفوق‌لر،
آچیر قوجاغینی سئودالی سحر.
منه ایلهام وئرن بو صاف طبیعت،
دئییر: بو دونیادا قالاجاق صنعت.
«اوتانسین -سؤیله‌ییر سئودالی سحر-
شعیر دونیاسیندا ایشسیز گزن‌لر!»

سؤکولور دان یئری، گؤی خومار-خومار،
صنعتین عشقی‌یله گولسه صنعت‌کار.
توکنمز ایلهامی، توکنمز سؤزو،
محبّت یارانمیش صنعتین گؤزو.
گئتسه بیر قاپیدان عشقین آیاغی،
سارالار باغچاسی، تؤکولر باغی.

#صمد_وورغون
#شعر_اوجاغی
@SheirOcagi
داوامی وار.

▫️کومسومول پوئماسی31

قولاق آس، باشلانیر بیر یئنی داستان!
منیمله یاناشی بیزیم اوتاقدان.
گلیر قولاغیما قیزیمین سسی،
باشلانیر سحرین اوشاق نغمه‌سی...
گونشین عشقی‌یله اویانمیش «پری»،
باخیر خومار-خومار کؤرپه گؤزلری.
معصوم اوشاقلیغین اؤز عالمی وار:
اویناییر خیرداجا اللر، آیاقلار.
ظریف دوداق‌لاری گولدن قیرمیزی،
بو آزاد عالمین قایغیسیز قیزی،
باخیر پنجره‌دن گونشه ساری،
نه‌سه پیچیلداییر گول دوداقلاری.
اونون خیالیندا دونیا بیر رنگ‌دیر،
ائله بیل هر شئیدن سود امه‌جکدیر.
اودور، باخ! گؤزلری بیردن سوزولور،
گیزلی بیر عالم‌له اویناییر، گولور.

کشف ائده بیلمه‌میش عالیم‌لر بونو،
اینسان وارلیغینین ایلک دویغوسونو.
لاکین گؤزلری وار مدنیّتین،
شوعورو آچان‌دیر بوتون خیلقتین.
آچاجاق دونیانی او، واراق-واراق.
اینسان یئنی-یئنی ایلهام آلاجاق‌.
او واخت بیلینه‌جک اولدوزون سایی،
سئیره گله‌جه‌ییک گونشی، آیی.
قارداش اولاجاق‌دیر مین باهار، مین قیش،
گله‌جک عالمه ایندیدن آلقیش!

بلکه ده او منیم قیزیم اولاجاق،
ائله‌یسه شاعیرین طالعینه باخ!
بو قیز، ویجدانیمین دوغما سسی‌دیر،
بو منیم عشقیمین ایلک مئیوه‌سی‌دیر.
گئتسه بیر قاپیدان عشقین آیاغی،
سارالار باغچاسی، تؤکولر باغی.

محبّت بؤیوک‌دور ازلدن بری،
حیات عاشیقی‌دیر عشقی بیلن‌لر.
آنار حسرت ایله کئچن گونلری،
سئویب یاشایانلار، سئویب اؤلن‌لر...

#صمد_وورغون
#شعر_اوجاغی
@SheirOcagi
داوامی وار.

▫️کومسومول پوئماسی32

«واقیف!» یئنه ده سن یادیما دوشدون
تیتره‌دی قلبیمین اینجه تئل‌لری.
سنین سالامینی چاتدیریر هر گون،
بختیار یوردومون سحر یئللری.
بؤیوک بیر عشق ایله یاشادین سن ده،
شعرین سیغال ووردو آل یاناقلارا.
گلین‌لر کیشیلیک دویدوقجا سنده،
بیر ایستیلیک کئچدی گول دوداقلاردا.

اومید باغلامادین گؤیده مله‌یه،
دئدین کی، یئر قیزی اوندان گؤزل‌دیر.
دئدین کی، حوری‌لر چاتماز کؤمه‌یه،
مئیوه‌سیز خیال‌لار عؤمرو گؤدَلدیر.

بیلیرم، دوغرودان ار اوغلو ارسَن،
عؤمور کئچیرمه‌دین نیسیه دالینجا.
الیندن شیکاری بوراخمادین سن،
اؤلوم کؤلگه‌سینی یئره سالینجا.

ائلین کلاغایلی گؤزل گلینی،
سیندیریب سوزنده الینده دسمال،
اوزاتدین اونا سن شاعیر الینی،
دئدین: - لوقمان'ی دا بیر یادینا سال!

دالینجا سؤیلندی بیر شاعیر دونن:
«واقیف ذؤوق آلیرمیش قیز بوخاغیندان».
سن ده اؤز واختیندا بو شاعیرلردن،
بیر بؤلوک قووموسان اؤز اوتاغیندان.

یاشاماز عشقسیز، روحسوز صنعتکار،
اونون وارلیغی دا قورو سوموک‌دور.
اونون نه کؤلگه‌سی، نه مئیوه‌سی وار،
حیاتین بوینوندا بیر آرتیق یوک‌دور.

«بختیار، منی ده کومسومولا یاز!»،
دئییب سوکوت ائدیر آلاگؤز «گولزار».
قیزی دینله‌دیکجه بیزیم «بختیار»،
تیتره‌ییر قلبینده صدفلی بیر ساز.

یوخدور گؤزل‌لیکده گولزارا عوض،
آلمیش ایلک باخیشلا او، بختیاری.
سئوگیسیز، ایلهامسیز یاشایا بیلمز،
سئون بیر شاعیرین قهرمان‌لاری.

گئتسه بیر قاپیدان عشقین آیاغی،
سارالار باغچاسی، تؤکولر باغی.

#صمد_وورغون
#شعر_اوجاغی
@SheirOcagi
داوامی وار.

▫️کومسومول پوئماسی33

نوروز بایرامیندا

شاختا قیلینجینی قویموشدور قینا،
یازین قودرتینه تسلیم اولور قیش.
یئر تومار وئرسه ده اؤز ساغریسینا،
آغاجلار دیرچلیب چیچک آچمامیش.
قارا یئل گاه اسیر، گاه دا دایانیر،
هله ده ائولرده بوخاری یانیر.

یاغیشلار چوخالیر، گؤل‌لنیر سولار،
قامیش دا گؤیَریر جانی وار کیمی.
داغلارین دؤشونده قار زولاق-زولاق،
آغاریر گئجه‌لر چادیرلار کیمی.

گؤیده آغ بولودلار، قارا بولودلار،
جیدیردا قیزیشان کؤهلن‌لر کیمی.
گاه قارالار کئچیر، گاه دا آغ آتلار.
بعضا ده دؤش-دؤشه گلدیکجه اونلار،
کیشنه‌شیر عالمه قیشقیریق سالیر.
ائله بیل دؤیوش‌دور... دوشمن آتلی‌لار
اوز-اوزه گلدیکجه، گؤی طبیل چالیر.

هله توختامامیش بئینی قان باهار؛
کامالا دولمامیش بیر جاوان کیمی:
او تئز آجیقلانیر، تئز ده یومشالیر،
اوره‌یی توتماییر بیر یئرده قرار،
هله توختامامیش بئینی قان باهار.

گاه قارا گئیینیر اَینینه گؤیلر،
اوغلونا یاس توتان بیر آنا کیمی.
گؤزونو یومماییر، اونون دردی وار،
آغلاییر لاپ گونش دوغانا کیمی.

گاه یالقوزاق کیمی اولاییر کولک،
گاه دا قوزو کیمی یاتیر، دینجَلیر.
گؤیدن نه سس گلیر، نه سمیر گلیر،
بیردن بولودلاردا اویناشان شیمشک-
شاققیان ایلدیریم گؤیه سس سالیر،
ائله بیل داعوادیر، گؤی طبیل چالیر.

گاه دا پارچالانیر بولودلار لای-لای،
اولدوزلار گؤز قیرپیر گولومسه‌یه‌رک.
باخیر گؤی اوزوندن یئر اوزونه آی،
یاییر شفَقینی بخت اولدوزو تک.

گاه گونش قیزاریر تونقال سایاغی،
قایالار ترله‌ییر، بوغلانیر تورپاق.
گاه دا اوشاقلارین الی، آیاغی،
سویوقدان قیزاریر اسدیکجه سازاق.

#صمد_وورغون
#شعر_اوجاغی
@SheirOcagi
داوامی وار.

▫️اینسان‌اوغلو جان وئرر پروانه‌تک آتشلره،
دوز سؤزون، دوز ایلقارین، دوز اعتیبارین عشقینه.

#صمد_وورغون
#شعر_اوجاغی
@SheirOcagi

▫️«آی»ین افسانه‌سی (آی‌بنیز)

«آی» گؤزللیک چادیرینی
آچیب دوردو بولودلاردا.
یئنه بیزیم آی باشینا
دولانیرکن بولودلار دا،
گؤزلریمه گؤز دیکه‌رک
گلیب باخدی پنجره‌مدن.
بو گؤزللیک ائلچیسینه
حئیران اولوب دئدیم کی، من:
نه‌دن آز-آز گؤرونورسن؟
جاوابیمدا سوسدو بیر آز.
سونرا خومار باخیشی‌یلا
جانلار آلان او سرویناز
گؤزلریمه یئنه باخدی،
او دینمه‌دی... اوتانجاق‌دیر...
او بلکه ده اؤز قلبینی
باشقاسینا آچاجاقدیر.
لاکین اونون صیفتینده
بیر سولغونلوق نیشانی وار.
منجه اونون بو دردینی
درد چکنلر دۇیۇب آنلار.

دئدیم: «سوسما، گؤزلیم آی!
دئییلم کی من اؤزگه‌سی.
منه تانیش یارانمیشدیر
شادلیق نئیی، هیجران سسی.
ازل گوندن دولانمیشام
یئر اوزونو قاریش-قاریش،
مندن گیزلی بو دونیادا
بیر سینه‌ده سؤز قالمامیش.
سئوینن‌لر، دردلنن‌لر،
اؤز قلبینی آچار منه.
منیم وارلیق نفسیمدن
تورپاقلار دا گلر جانا،
چونکی اینسان یارانمیشام.»

یئنه باخدی اوزومه آی،
آرخاسینجا قۏشۇن چکیب
بولودلار دا گلدی لای-لای.
سونرا بیر آز گولومسه‌ییب
دیله گلدی آی دا بو دم.
او دیندیکجه، آغ کاغیذا
اینجی دوزدو قیزیل قلم...

#صمد_وورغون
#شعر_اوجاغی
@SheirOcagi
داوامی وار.

▫️«آی»ین افسانه‌سی (آی‌بنیز)

...دئدی: «آز-آز گؤرونمه‌ییم
نه‌دن سیزه آغیر گلیر؟»
دئدیم: «چونکی بو دونیادا
گؤزَللیک‌له سؤز یوکسَلیر.
گؤزَللیکسیز بیر صنعتین،
نه دویغوسو، نه جانی وار.
او دیرمالار قولاق‌لاری،
بالتا کیمی اۏدۇن یارار.»

آی اوزومه یئنه گولدو...
تئز آچیلدی قاش-قاباغی.
ایشیقلاندی سحر کیمی
خیالیمین سؤز اوتاغی.
دئدی: «آز-آز گؤرونمه‌ییم
کوسکونلوکدن نیشانه‌دیر.»
دئدیم: «بیر آز آچیق دانیش!
بو سؤزونون سیرّی نه‌دیر؟»
دئدی: «سن کی دیل‌بیلَنسن،
دوشمه‌دین‌می منی باشا؟»
دئدیم: «بعضاً وارلیغیما
حاکیم اولان بیر تاماشا،
اوچوردوقجا یئر اوزوندن
خیالیمین قانادینی،
اونودورام هر جانلینین،
هر جانسیزین اؤز آدینی.
جهالتین پنجه‌سینده
بوغولدوقجا قلبیم یئنه،
بیر کور کیمی بویلانیرام
بو معنالار عالمینه.
او واخت منیم شوعوروم دا
خیالیم دا قاچیر مندن.
قاییق قالیر فیرتینادا،
دالغالارا دوشور یئلکن.»

آی یئنه ده گولومسه‌دی،
ساچلارینی داغیداراق،
دئدی: «اینسان قلبینده‌کی
ساده‌لیگه، صافلیغا باخ!
سن کی بیزیم ایلک گؤروشده
اؤز سیرّینی دئدین منه،
من ده بوتون وارلیغیمی
آچاجاغام بو گون سنه»

دئدیم: «بویور، شاد اولارام!»..‌.

#صمد_وورغون
#شعر_اوجاغی
@SheirOcagi
داوامی وار.

▫️«آی»ین افسانه‌سی (آی‌بنیز)

..‌.ساریلاراق آی بوینوما
بیر گوناهسیز قوزو کیمی،
گلیب گیردی او قوینوما.

دئدی: «منیم کوسمه‌ییمین
باشلیجا بیر سببی وار.
قوی ائشیتسین بو سیرّیمی
شاعیر اولوب سؤز یازانلار!

بیلیرسن کی، من گؤزَلم،
داستانلارا دوشموش آدیم.
یاراندیغیم گوندن بری
باغلانمانیش قول-قانادیم.

بیر قوجامان شاهیدی‌یم
بو وارلیغین، ازل باشدان.
چونکی منیم وارلیغیم دا،
یوغرولموشدور سودان، داشدان.

چوخ گزمیشم بو دونیانی
اوبا-اوبا، اویماق-اویماق.
کیم ایسته‌ییر بو نعمتی
اؤز الیندن یئره قویماق؟

من دوغاندا گؤی اوزونه،
قاچیب گئدیر قارانلیقلار.
گؤزللیک‌له ائکیز اولان
بیر قووّتیم، قودرتیم وار.

منیم بؤیوک جامالیمدان
ایلهام آلیر بوتون عالم‌.
من ده اینسان خیالی تک
گوندوزلرین عاشیقی‌یم.

لاکین بیزیم شاعیرلردن
اینجیمیشم سؤزون دوزو.
اونلار بعضاً دوز گؤرمه‌ییر
نه گئجه‌نی، نه گوندوزو.

اونلار ائله ظنّ ائدیر کی،
گؤزللیک بیر اویونجاق‌دیر.
هر "سئویرم" دئین گنجه،
او دا عاشیق اولاجاق‌دیر.

ائله منیم اؤزومه ده
قلب آچمیشلار مین بیر کره.
من نه دئییم، نه آد وئریم
او اؤترگی وعده‌لره؟

اونلار باخیب ایلهام آلمیش
یالنیز منیم ظاهیریمدن.
لاکین اونلار بیلمه‌میشدیر
بیر نه‌چی‌یم باطینده من.

اونلار منی بنزه‌ده‌رک
مین گلینه، مین ده قیزا،
آرابیر ده اوخشاتمیشلار
هر اؤترگی وفاسیزا.

حتّی بؤیوک "پوشکین" بئله
بیر واخت منه سؤز آتمیشدیر.
او دا منی گؤی اوزونده
عاغیلسیزا اوخشاتمیشدیر.

لاکین دۇیان اولمامیش کی
منیم اؤز عالمیم واردیر.
بو سببدن اوره‌ییمده
دونیا بویدا غمیم واردیر.

آه، نه دئییم شاعیرلره؟!
اؤز دؤشونه دؤیه-دؤیه
خام آت کیمی تپیک آتیب
سیغیشمیرلار یئره، گؤیه.

بیر دئمیرلر من نه‌چی‌یم.
یاراندیغیم گوندن بری
نه‌لر گؤرموش بو دونیادا
"آی" دئییلن گؤزل پری؟!

منیم ده اؤز داستانیم وار،
منیم ده ماجرام واردیر.
بو دونیادا ماجراسیز
اوره‌یی داش اولانلاردیر.

دوزدور اینسان یارانمادیم،
باختیم بئله یازیلمیشدیر.
بو سببدن باغریم باشی
بیر دومانلیق، بیر ده قیش‌دیر.

لاکین منه چوخ تانیشدیر
اینسانلیغین بؤیوک سسی.
بیر ده نه‌یه توخونمامیش
بو داهی'نین خوش نفسی؟

دونیا کاروان یارانمیش‌سا،
اینسان‌اوغلو بیر ساربان‌دیر.
بشر قلبی گؤیه سیغماز،
اونون فیکری بیر عومّان‌دیر.

قوی شاعیرلر وورولماسین
یالنیز منیم جامالیما!
باخیب داستان باغلاسینلار
بو گؤزللیک کامالیما!»...

#صمد_وورغون
#شعر_اوجاغی
@SheirOcagi
داوامی وار.

▫️«آی»ین افسانه‌سی (آی‌بنیز)

...آی کیریییب دایاندی،
قلبیم یاندی، نه یاندی!
توستو چیخدی باشیمدان.
بو گؤزل سیرداشیمدان
ایلهام آلیب من بو دم،
دئدیم: «دۆزسن، ائی صنم!
سنین ده اوره‌یین وار،
قلبین وار، دیله‌یین وار.
فقط بیلمیرم نییه
سن دئین درینلیگه،
آت چاپماییر شاعیرلر.
بلکه توکَنمیش هونر.»

آی چاتیب قاشینی «یوخ!» دئدی بیردن،
غضب‌له اوینادی دوردوغو یئردن.
دئدی: «نه دئییرسن، اوشاقسان، نه‌دیر؟
اینسانین هونری بیر خزینه‌دیر.
نه قدر خرجله‌سن دونیادا اونو،
او دا واخت کیمی‌دیر، گؤرونمز سونو.
لاکین بو هونرین قدرینی بیلمک
هر هونر اهلینه بورج اولسون گرک!»

دئدیم: «دوز دئییرسن، آی نازلی صنم!
هامان شاعیرلرین بیری ده منم.
من ده طبیعتدن یازیرام بعضاً،
سونرا آغری قوپور اؤز اوره‌ییمدن.
گؤرورم سؤزلریم باش-آیاق وورور،
بعضاً قوش یئرینه داغ-داش اوچورور،
بعضاً گول یئرینه "تیکان" دئییرم،
گؤیون قورشاغینا "اؤرکن" دئییرم.
بعضاً آغ بولودو یازیرام قارا،
باخیب گولوشورلر من صنعتکارا.
هانی طبیعتین دیلینی بیلن؟
گؤزل آی! قارشیندا اوتانیرام من.»

#صمد_وورغون
#شعر_اوجاغی
@SheirOcagi
داوامی وار.