▫️ایفاده ائدیلمه‌میش دویغولار اصلا اؤلمز. جانلی‌-جانلی باسدیریلیب سونرادان چیرکین شکیل‌لرده اورتایا چیخیر...

#زیگموند_فروید
#شعر_اوجاغی
@SheirOcagi

سئودییی شهید اولان، خانیملارا

▫️یاغیشلار یاغمادان دا ایسلانیر شهید قبیرلری...
و قیزلار شهید شکیللرینی سئویر‌...
ایندی... قیزلار اوغلانلارا چیچک آلیر-
اونلارین آد گونونده،
ایلک گؤروش گونونده،
یا ان عادی گونده.
لچک‌لرینده گؤز یاشلاریندان شئه‌لر،
شهید قبیرلرینین اوستونو اؤرتور چیچک‌لر.
ایندی حسرتین بیتمه‌دییی یئرلرده،
بنؤوشه قیزلار
هر گئجه شهیدلره مکتوب یازیر،
و...
هر شهید اؤز سئودییینین یازدیغینی
گؤیلردن اوخویور.
گؤیلر «سئویرم» سؤزو قوخویور،
گؤیلر یئرلره شهیدلرین نورونو سپیر،
قیزلار قیرمیزی لئنتلی باش داشلارینا ساریلاندا
شهیدلر کولک‌لرین گتیردییی
قیز ساچلارینین قوخوسوندان اؤپور...

#اسمیرا_مئهی‌قیزی
#شعر_اوجاغی
@SheirOcagi

▫️اینسان اؤزو ایله صمیمی دئییل. اونا گؤره ده اؤزونو باشا دوشمه‌مه‌سیندن شیکایت‌لنمه‌مه‌لیدیر...

📚 بو شهرده کیمسه یوخدور
#رؤوشن_عبدالله‌اوغلو
#شعر_اوجاغی
@SheirOcagi

▫️ ایللر سونرا اؤیرندیم کی، قیشقیریب-باغیرماغا احتیاج یوخدور. سسینی ائشیتمک ایسته‌ینه بیر فیسیلتی‌ن یئتر...

#فرید_فرجاد
#شعر_اوجاغی
@SheirOcagi

▫️اوشاقلیقدا من اؤزومو بیر آری پته‌یی کیمی خیال ائدیردیم: چئشیدلی ساده و عادی آداملار بال آریلاری کیمی حیات حاقّینداکی اؤز بیلیک و فیکیرلرینین بالینی بورایا گتیریر، هر کس سخاوتله منیم روحومو بیر شئی‌له زنگین‌لشدیریردی. چوخ زامان بو بال چیرکلی و آجی اولوردو، لاکین هر جور بیلیک هر حالدا یئنه ده بال‌دیر...

📚 اوشاقلیق
#ماکسیم_گورکی
#شعر_اوجاغی
@SheirOcagi

▫️ بیز ائله بؤیوموشوک، ائله تربیت اولموشوق کی، حتّی سئوگی بئیینه عایید ائدیلیر.
سئوگی اساساً اوره‌یه مخصوصدور، آما بیزیم توپلوم اورکدن یان کئچیر، چونکی اورک منطیقلی دئییل، اورک راسیونال دئییل.
بئینه ائله تربیت وئریلیب کی، منطیقلی اولمایانی سهو حساب ائدیر، ایرراسیونال اولان هر شئیی یانلیش بیلیر. بئینه گؤره منطیقلی اولان دوزگوندور‌.
بیزیم تربیت پروقرامیمیزدا اوره‌یه یئر یوخدور، هر شئی بئیین اوچوندور. اورک همیشه آز قالا وارلیغیمیزدان اوزاقلاشدیریلیب، سوسدورولوب. اوره‌یه، بؤیومک اوچون ایمکان وئریلمیر، اونا اؤز پوتانسییئلینی فعّال‌لاشدیرماق اوچون شراییط یارادیلمیر...

📚 قیزیل کولچه‌لر
#اوشو
#شعر_اوجاغی
@SheirOcagi

اوشاق شعری

▫️توملار*

بیر استکان توم
اکدیم تورپاغا.
سونرا باشلادیم
من داریخماغا.

کئچدی آیلاریم
کئچدی ایللریم،
نه واخت چیخاجاق،
توملاریم منیم؟

ائشدیم تورپاغی
گؤردوم توملارین
یاریسی یوخدو.
یاریسینین دا
الی چیخیبدی.

گؤردوم یاریسی
آیاق آچیبلار.
او بیرلری ده،
یقین قاچیبلار...

#قشم_نجف‌زاده

* توخوم (Tum)
#شعر_اوجاغی
@SheirOcagi

▫️... سؤزون اخلاقلا ایلگیسی یوخدور.
اخلاقا چوخ باغلی اولان، آنجاق یاخشی داورانیشلاری اولمایان آداملارلا قارشیلاشمیشام من.
و هر گون داها دا چوخ آنلاییرام: «دوغرولوغون قانونا احتیاجی یوخدور...»

📚 سیزیف افسانه‌سی
#آلبر_کامو
#شعر_اوجاغی
@SheirOcagi

▫️«پری چینقیلی»ندا گیزلنَن گؤزل

قاچمیسان الیندن آمانسیزلارین،
بلکه سجده اوچون بورا گلمیسن.
سنین ایسته‌یینین عکسینه اولان-
امره غول اولماییب باش اَیمه‌میسن.

زامانین الیندن قاچمیسان یوخسا؟
گلیب سیغینمیسان اولو داغلارا.
سن اوزاق اولموسان ائودن-ئشیکدن،
پناه گتیرمیسن چینقیل‌لیق‌لارا.

گوندوزلر قایالار گیزلدیب سنی،
سندن اوزاق اولا بد اینسان گؤزو!
قایغینا قالیبدی، قورویوب سنی،
سیلدیریم قایالار، طبیعت اؤزو.

شئهلی چمن‌لری بخش ائدیب سنه-
اولو تانری بلکه خالی یئرینه.
خینالی قایالار خینا یاخیبدی،
چیچک اللرینه، گول اللرینه.

اَینینده قالماییب نیمداش پالتارین،
عؤمرون ائله-بئله لوت-عوریان اولوب.
بلکه اینسانلاردان سنه، او جانسیز،
او دیلسیز قایالار مئهریبان اولوب.

بلکه بو آلنینین یازیسی بئله،
بئله زامانایا، گونه اعتیراض.
من سنین دردینی یازسام دا، گؤزل!
میندن بیر دردینین بیری یازیلماز.

زور ایله وئریلن حؤکمه اعتیراض،
بیر سون قویولماییر حاقسیزلیق‌لارا.
باشیمدا دولانیر آغیر فیکیرلر،
چکیر حیسلریمی، آپاریر دارا.

چینقیل‌لار فیکریمی آپاریر، گئدیر،
ائله هئی باخیرام گؤزوم دؤرد اولوب.
نئچه ایل کئچسه ده او واختدان بری،
سنین دردین منه یامان درد اولوب!

سن ائله موقدّس، سن ائله صافسان،
بئله تمیز قالماق یاراشیر سنه.
هاردا گؤزل گؤرسم، ائله بیلیرم،
اونلار دا بنزه‌ییر، اوخشاییر سنه.

بئله گؤزل اولماز گؤیون قاتیندا،
گؤیدن‌می گلمیسن؟ هئچ اینانمیرام.
سنین کدرینه شریک اولورام،
والله صبر ائله‌ییب راحاتلانمیرام.

یئل ووروب، قار ووروب بئله‌دن-بئله،
چینقیل‌لار، قایالار جیلالانیبدیر.
گونش ده اوتانیب گؤزل‌لیگیندن،
بولود آرخاسیندا دالدالانیبدیر.

بیللم، تئل‌لرینه سیغال دَیمه‌ییب،
کؤنلونون قیسمتی حسرت اولوبدو.
سنین او قنیرسیز گؤزل‌لیگین ده،
داغلارا، داشلارا قیسمت اولوبدور.

طبیعت بول ائدیب ناز-نعمتینی،
بؤیورتکن، چیه‌لک لالیق-لالیقدی.
اونلاری ال آتیب دره بیلمه‌دیم،
ائله بیل بیر دونیا داغیلاجاقدی.

ساخلاییب بو داشلار، قایالار سنی،
دونون یارپاق اولوب، اؤرپه‌یین چیچک.
سیغینیب داغلارا گؤزله‌میسن کی،
زامان دَییشه‌جک، گون دَییشه‌جک.

سسین یازیلیبدی قایایا، داشا،
ائشیتدیم، پری قیز! اؤز سسینی من.
دویدوم قایالارین مئهریبانلیغین،
دویدوم بیر گؤزَلین نفسینی من.

طالعین بئله‌یمیش، قیسمتین بئله،
ائو-ائشیک بیلمیسن قایانی-داشی.
سنین کدرینی بیلندن بری،
یانیب-قوورولوبدو باغریمین باشی.

ائله کی، خیالیم اوچور داغلارا،
سنی دوشونورم هر شئیدن ازل.
هئچ جوره یادیمدان چیخمیرسان منیم،
پری چینقیلیندا گیزلنن گؤزل!...

#نصیب_نبی‌اوغلو
#شعر_اوجاغی
@SheirOcagi