▫️پینه‌چی

سنه ائله گلیر کی،
یاشاندی، بیتدی، گئتدی؟
نه سن، نه من، نه بیز وار،
هر اوچو ایتدی گئتدی؟

آرادا بیر واخت ائله،
یولوخ* بیر آخشام بیزی!
گؤر نئجه یاراتمیشام،
نئجه قورموشام بیزی!

سنی خاطیره‌لردن
آلمیشام ایلمه-ایلمه.
توخوموشام لیباسی
نیمداش گله‌جه‌ییمه.

سحرلر گون ایشیغیم،
داغینیق چارپاییمسان.
ساعاتیمین زنگیسن،
مورگوم، قهوه‌م، چاییمسان.

گئجه‌لر سیغیندیغیم
یورغانیم، دؤشه‌ییمسن.
دامیم، قاپیم، پنجره‌م،
ائویمسن، ائشیگیمسن.

سویوقدا اود-اوجاغیم،
ایستیده کؤلگه‌م منیم.
قوطبوم، قیطعه‌م،جهتیم،
شهَریم، اؤلکه‌م منیم.

سن گونده‌لیک دفتریم،
استول‌اوستو کیتابیم.
سنسن هر شئیه صبریم،
سنسن هر شئیه تابیم.

سن هم آسوده واختیم،
هم ده ایشیم-گوجومسن.
هم خیالیم، هم ده کی،
بیر خاطیره کؤچومسن.

گؤر نئجه قوووشموشوق!
گؤر نه بختوَریک بیز!
لاپ آللاه دا ایسته‌سه،
بئله بیرلشمه‌ریک بیز.

سنه ائله گلیر کی،
آرادا آیریلیق وار؟
«هیجران» دئدیگین نه‌دیر؟
جیسمانی آیریلیقلار؟

سنی دونندن آلیب
یاماییرام صاباحا.
آتدیم هیجرانین داشین،
پینه‌چی‌یم من داها.

#اورخان_باهادیرسوی
*باش وورماق
#شعر_اوجاغی
@SheirOcagi

▫️ایندیدن آغلا!

دوغولاندا آللاه بیزه دئییر کی،
سونراکی حالینا ایندیدن آغلا!
بو شیرین حیاتین سونو زهَردیر
غوغانا، قالینا ایندیدن آغلا!

سن اوشودون... دومانا نه، چنه نه؟
سن اود توتدون... اود اله‌ین گونه نه؟
قیفیللی دیلینه، داغلی سینه‌نه،
قانداللی قولونا ایندیدن آغلا!

باخما تانیشین دا، دوستون دا چوخدور!
کیمین نه وئجینه کیم سنی ییخدی؟
بودره‌سن، باخارسان بیرجه‌سی یوخدور،
ساغینا، سولونا... ایندیدن آغلا!

عونوانین ایته‌جک، ایزین ایته‌جک،
اوجاغین ایته‌جک، اودون ایته‌جک،
یاخینین ایته‌جک، یادین ایته‌جک،
اوبانا، ائلینه ایندیدن آغلا!

دونیا دا گؤزل‌دیر، دئمیرم ال چک،
آنجاق عمل‌لرین قالاجاق بیر تک.
اودلاردان کئچه‌جک، داشدان کئچه‌جک-
یولونا، ایزینه ایندیدن آغلا!

#شوجاعت_کلبجرلی
#شعر_اوجاغی
@SheirOcagi

▫️اینسان سیخینتی‌لاری‌یلا باش-باشا قالماغی، قاچیشا اولان حسرتینه غالیب گلمه‌یی اؤیرندیگینده، داها اؤیرنمه‌‌دیگی چوخ شئی قالمایاجاق.

#آلبر_کامو
#شعر_اوجاغی
@SheirOcagi

▫️دوداق چایی

گل، سنه چای دمله‌ییم،
پُر‌رنگی، دوداغیمدان،
دمی، سرخوشلوغومدان،
شکری بارماغیمدان!

دوغراییب ساچلاریمی،
یوللارینا سپیم، گل!
سنی منه گتیرن،
آیاغیندان اؤپوم، گل!

بو یوخسول جییَریمه،
آزاجیق نفس گتیر!
غضبیمه تسلّی،
سوکوتوما سس گتیر!

قار-یاغیش خبر وئریر،
«ائفیر»ده‌کی بدخبر.
سنی، منی دوشونمور،
نییه سوسمور بو لچر*؟

سن اونون آجیغینا،
قاردی، یاغیشدی، باخما!
پالتولارا بورون گل،
پاییزدی، قیشدی، باخما!

گل! دیوارلار داغیدیر،
سس‌لنیشیم، هاراییم.
گل! چورودو بارماغیم،
سویودو دوداق چاییم.

#اورخان_باهادیرسوی
* حیاسیز
#شعر_اوجاغی
@SheirOcagi

▫️اویانیرسان، سورمه دانه‌لرین کئفلی.
آللاه فریادینا یئتسین،
بیر گئجه‌نی سنین گؤزلرینده کئچیردن سورمه‌‌نین!

#ادهم_شرقاوی
#شعر_اوجاغی
@SheirOcagi

▫️کومسومول پوئماسی19

کندده تئاتر
ایکینجی پرده

ایکینجی پرده‌ده بیر اؤزگه حال وار:
«سیز خوش گلمیشسینیز، عزیز قوناقلار!»
دئیه‌رک، «گَرای» بی آچیر مجلیسی،
اونا جاواب وئریر باشقا بیریسی:
«گرای بَی!» دئیه‌رک گؤزلر سوزولور،
اللرده تیتره‌ین قدح‌لر گولور.
- یاشاسین پارلامان!
- یاشاسین میلّت!
آچیلیر اورتادا بیر رسمی صؤحبت.
آیاغا قالخاراق مینیستر* «ائلخان»:
- «سیز بیلیرسینیز کی، دَییشیر زامان.
دَییشیر هر شئیین اوّلکی حالی،
بئله بیر زاماندا آییق اولمالی!
هرچندی محو اولدو ییرمی‌ آلتیلار،
یئنه ده باکیدا بیر ازدحام وار.
بو بیر آخین‌دیر کی، باش آلیب گئدیر،
ایندی کندلره ده سیرایت ائدیر.
دئییرلر، کندلییه وئریلسین تورپاق.»
- «آرپا یئین‌لرین ایشتاهینا باخ!»
گرای بی حیرص‌لنیب یئریندن دورور،
الینی ایستولون اوستونه وورور:
- «آ کیشی، بیر دایان! من اؤلوم بیر دور!
تورپاغی نئیله‌ییر اؤکوزسوز موزدور؟»
- «اؤکوز ده ایسته‌ییر، قویون دا، آت دا.»
- «یوخ، بیر آرواد دا، یوخ بیر منی ده!»
- «بلی، سنی ده!
حتّی دئییرلر کی، پارلامان گرک،
الینی هر شئیدن تامام اوزه‌رک،
وئرسین حؤکومتی بولشئویک‌لره،
یعنی مولکدارلیق اولسون بیر کره!»
- «های-های! غریبه دیر دونیانین ایشی.»
- «اوَت افندیمیز، چارخین گردیشی،
قوجامان تورکلویه گولمه‌ییر چوخدان.
اومید کسمه‌یه‌لیم آتیلان اوخدان!
وطن لاله‌زاردیر، میلّت پُروقار،
اونون گؤیلر قدر امل‌لری وار.
آیریلیق اؤلدورور میلّتی هر آن،
ساعاتلار وودوقجا یئتیشیر زامان.
آیریلان قووّه‌لر بیرلشمه‌لی‌دیر،
وطن بیر تورپاغا یئرلشمه‌لی‌دیر!»
دئییب «صبری پاشا» قیلینجا باخیر،
باشیندان توستولر، دومانلار قالخیر.
چوخالیر حسرتی، چوخالیر یاسی،
آخیر خیالیندان نؤیوت دریاسی.
نؤیوت کمرلری دوزه‌لیب یولا،
آخیب تؤکولورلر دوز استانبولا.
سونرا، داوام ائدیر سؤزونه «ائلخان»:
«اؤلچولر گؤتورور ایندی پارلامان.
ان اوّل باکیدا بوتون قوچولار،
شهَرده ازدحام سالانلار کی وار،
اونلاری آختاریب تاپاراق همن،
آییریر باشینی درحال بدندن!
ایشچیلر معدندن هئی قووولورلار،
آخیردا سوسماغا مجبور اولورلار.
آرالیق بیر قدر کئچمه‌ده سرین...
ایندی ده تورکلرین، ائرمنی‌لرین،
اورتاسیندا گرک ضدیّت سالاق!
کندین یوخسوللاری هر کسدن قاباق،
قویون سیلاحلانیب گیرسین مئیدانا،
اللری چاتماسین اؤزگه بیر یانا!
قاریشسین جبهه‌ده اونلارین باشی!
تکی بؤیوکلره، بَیلره قارشی،
بیر ده باش قالدیریب دئیینمه‌سینلر،
اونلار دا قیرمیزی گئیینمه‌سینلر!»

«مالادئس!... یاشاسین بئله پارلامان!»
گرای بی بو سؤزو دئدیگی زامان،
الیندن هدفی دوشوب تؤکولور،
«نیچئوو!» دئیه‌رک بالاجا گولور.

#صمد_وورغون
* وزیر، ناظیر
#شعر_اوجاغی
@SheirOcagi
داوامی وار.

▫️عشق و غورور

هاردان بیله‌جکدین سنی سئودیگیمی؟!
هئچ فیسیلدامادیم کی قولاقلارینا عشقیمی.
سنین اوچون گونلرجه، گئجه‌لرجه آغلادیم،
هاردان بیله‌جکدین؟
هئچ‌ سیلمه‌دیم کی یانیندا گؤز یاشلاریمی.

#احمد_سلچوک_ایلکان
#شعر_اوجاغی
@SheirOcagi

▫️اینسانلاردا، گئرچک‌لشمه‌یه‌جک اومیدلر اویاندیرمایین!

📚 وادیده‌کی زانباق
#اونوره_دو_بالزاک
#شعر_اوجاغی
@SheirOcagi

▫️اؤزومدن یورولدوم، اؤزومه قاچدیم،
سؤزوم، صؤحبتیم ده، اؤزومدن دوشور.
زامانلا گؤزومده داغ ائتدیکلریم،
زامان ديَیشدیکجه، گؤزومدن دوشور.

هردن ییغیشاندا قوناغیم، قارام،
اؤزومو هر کسدن چوخ قیناییرام.
اوستونو آچاندا سیزلاییر یارام،
اؤرتنده اوره‌ییم دؤزومدن دوشور.

بختیمین گؤینه‌ین یاراسیندا دا،
گؤزومون آغیندا، قاراسیندا دا،
عاغلیم‌لا قلبیمین آراسینادا دا،
بوتون داوا-دالاش سؤزومدن دوشور...

#افسانه_روان
#شعر_اوجاغی
@SheirOcagi

▫️بیَندیگینیز بدن‌لره، خیالینیزداکی روحلاری قویوب بونو «عشق» ظنّ ائدیرسینیز.

📚 Pia Mater
#سرکان_کاراایسماعیل‌اوغلو
#شعر_اوجاغی
@SheirOcagi

‍ ▫️یئنی بیر صحیفه‌ده سنه باخماق

هر شئی دوزَلتمک اولار بیر بیاض کاغیذلا،
اوچاق مثلا، اوچورتما مثلا.
آلتینا قویولا بیلر،‌ بیر آیاغی اوبیریسی‌لردن قیسا اولدوغو اوچون ساللانان بیر ماسانین.
و یا شعر یازیلا بیلر، سوره‌سی اوبیریسی‌لردن قیسا بیر عؤمور اوزرینه.

بیر بیاض کاغیذا هر شئی یازیلا بیلر،
سندن باشقا.
گؤزل‌لیگینه بنزَتمه تاپماق چتین.
سن یاخشیسی می سنه بنزه‌مه‌یه چالیشان هر شئیدن،
بیر گولدن... بیر ایلک، بیر سون‌باهاردان سوروش!
بلکه طبیعتده‌دیر چاره‌سی، سنین بیر چیچه‌یه بو قدر بنزه‌مه‌نین،
و منیم بیلینجی قابارلی بیر باغچاوان چاره‌سیزلیگیم.
آنلارام بیتکیدن فیلان،
آما آنلادا بیلمه‌رم تورپاغین گونشله دانیشماسینی، سنه چوخ بنزه‌ین بیر چیچک یولویلا.

سن منه ایشیق وئر یئتر! منده تومورجوق چوخ.
کؤکلرین ایچیمده گیزلی‌دیر.
گلن، گئدن، آرایان، سوران، دره، بوداق یوخ،
ایچینده بنزتمه‌لر اولان بیر شعر ایسترسن.
قوصورا باخما، سئوگیلیم!
توربامدا سنه بنزه‌یه‌جک قدر گؤزل بیر شئی یوخ.

اوزون بیر یولدان گلن تداروکسوز، یاوانلیق‌سیز بیر یولجویام.
یارالی، یاراسیز سئودالاردان کئچدیم.
قوینومدا بیر بیاض کاغیذ بوشلوغو.
هر شئیی آنلاتدیم،
اولان، اولمایان، آغریدان، سانجیدان.
بیلسم کی سنه چاتماق اوچوندور بوتون آرا وئرمه سانجیلاری،
بوتون استقرارلی آرخاداشلیق‌لار،
داها سورعتلی قاچاردیم.
سئوَرآددیم* گلردیم گؤزلرینین مرجان ماویلیگینه.

سنه باخماق،
سویا باخماق‌دیر.
سنه باخماق،
بیر مؤعجوزه‌نی آنلاماق‌دیر.
سنه، سولا باخمادان یئریدیگیم یوللار تانیق‌دیر.
عشق سورغوسوندا شاهانه‌م،
یالنیز قاندال‌لار موتّهم‌دیر.

نه یازسام اولمور،
چونکی بیلن‌لر خاطیرلار،
هم دوزَلمیش، هم ساختا چیچک ساتانلار، باغچاوانلار دئییل، تاجیرلردیر.

سن اؤیله گؤز،
سن اؤیله تورپاق و گونش اورتاق‌لیغی.
سن، تنینده جنّت قایقانلیغی ایکن،
سنه شعر یازماق آخماقلیق‌دیر.

بیر تک سؤز قالیر دیشلریمین آراسیندا،
من سنه «گولوم» دئیه‌رم، گولون عؤمرو اوزانماغا باشلار.
وئردیگیم بوتون سؤزلر سنده قالسین ایسته‌رم،
من سنه «گولوم» دئیه‌رم.
گول سنه بنزه‌دیگی اوچون اؤلومسوز،
یازدیغیم بوتون شعرلر، سنه باشلایان بیر کیتاب اوچون اؤن سؤز.

سنه باخماق،
هر شئی اولماغا حاضیر بیر بیاض کاغیذا باخماق‌دیر.

سنه باخماق،
سویا باخماق‌دیر،
گؤردویون صورتدن اوتانماق.

سنه باخماق،
بوتون راست‌گلمه‌لری رد ائدیب
بیر مؤعجوزه‌نی آنلاماقدیر.

سنه باخماق
آللاها اینانماقدیر.

#ییلماز_اردوغان
* هر بیر آددیمینی سئوگی‌یله گؤتوره‌رک
#شعر_اوجاغی
@SheirOcagi

▫️منم ده...

بو نه ایش‌دیر دوشموشم؟
بیلینمیر گونوم، گئجه‌م.
چیخ، سسیمه هارای وئر!
یوخسا، واللاه اؤله‌جم.

نه داعوایا گلمیشم،
نه ده باریشماق اوچون.
بیر دردیم وار، آی آدام!
گلدیم دانیشماق اوچون.

یوخلوغوندان چکدیگیم
عذابلاری اونوتدوم.
یاراما پامبیق باسیب
آغریما پرده توتدوم.

چوخ دا جیدّی‌یه آلما
بو زارییان بایقوشو!
سنینچون نه چکمیشم،
هامیسی حالال خوشون!

ائشیدیرسن‌می منی؟
آچ قاپینی، ایشیم وار!
بو نئچه ایلده سندن،
تک بیرجه خواهیشیم وار.

سنه قوشولوب قاچان
یوخومو آپارماغا،
بو بویدا یول گلمیشم،
هر کونجه باخا-باخا.

آخیر کی تاپدیم سنی،
بو خارابا شهرده.
آچ قاپینی، آی آدام!
تانیمادین؟...منم ده!

داها دؤزه بیلمیرم،
من بو یوخوسوزلوغا.
وئر آپاریم یوخومو!
علاج‌دیر یالنیزلیغا.

#اورخان_باهادیرسوی
#شعر_اوجاغی
@SheirOcagi

▫️اینام، بیزیم گؤزوموزه تاخدیغیمیز رنگلی گؤزلوک کیمی‌دیر.‌ هانسی گؤزلویو تاخساق، دونیانی اونون پریزماسی ایله گؤره‌جه‌ییک. آما منیم ایسته‌دیگیم، گئنل‌لیکله گؤزلویو چیخاریب اؤز گؤزلریم‌له دونیایا باخماق ایدی.

📚 ایکینجی آددیم
#قاراقان
#شعر_اوجاغی
@SheirOcagi

▫️سسسیزسن.
بیلیرسن ساکین اللرین،
شعر کیتابی‌دیر؟

آیاق‌یالینسان.
بیلیرسن آیاق‌یالین قادین،
تاریخین ریتمینی دَییشیب
دونیا خریطه‌سینی آلت-اوست ائدیب
عؤمرو اوزادا بیلر؟

#نزار_قبانی
#شعر_اوجاغی
@SheirOcagi

▫️کومسومول پوئماسی20

کندده تئاتر
اوچونجو پرده

- «آیاغا قالخینیز، شئیخیمیز گلدی!»
دئیه، گرای بیین سسی یوکسَلدی.
قالخدیلار؛ باش ووروب اوتوران زامان،
آللاهین ائلچیسی الینده قورآن،
گلدی؛ او مسلکی کؤموردن قارا،
بیر گؤیه بویلاندی، بیر اینسانلارا:
«هر کیمین قووّه‌سی وارسا قولوندا،
بو گون دین یولوندا، میلّت یولوندا،
کئچسین اؤز جانیندان، اؤز وار-یوخوندان!
تانییاق اونلاری، بیلَک یاخیندان،
گؤرَک تانریسینا دوز چیخان هانی؟
وطنین اوغروندا تؤکولن قانی،
ملَک‌لر اؤز یاشیل قانادلاریندا،
قالدیراجاق گؤیه، تانری یانینا.»
دئییب او مسلَکی کؤموردن قارا،
بیر گؤیه بویلاندی، بیر اینسانلارا.

آغارمیش ساچلاری داغدا قار کیمی،
اورَکده حسرتی، دردی وار کیمی،
ساللاییب باشینی، دایانمیش «عیمران»،
بوکولموش قامتی سانکی بیر کامان.
قورخوب چکینمه‌ییر او جبهه‌لردن،
فقط گؤزلرینه گؤرونور هردن،
ائوینده آج قالان چیلپاق یاوروسو،
باشیندان سئل کیمی داشیر قایغیسی.
اوشویور وارلیغی، آز قالیر دونا،
گئدیب شئیخه طرف، یالواریر اونا:
«هرچندی آللاهین حؤکمو سنده‌دیر،
بیر بؤلوک کولفَتین گؤزو منده‌دیر.
تکم، کؤمَکسیزم، اوشاقلار کؤرپه،
اونلارین گؤزوندن‌ یاش سرپه-سرپه،
اوزاق بیر سفره گئتمک اولارمی؟
"قانون" دئییلنده، مرحمت وارمی؟»

گرای بَی قاشینی چکیب یوخاری،
یئریندن اویناییر عیمرانا ساری:
«شوبهه‌سیز، حاقلیسان طلبینده سن،
سؤیله، نه ائتمک کی؟! داغیلیر وطن.
بیلیرم، گنجلیکدن سن قهرمانسان،
بیر آز دا میلّتین حالینا یانسان،
آللاها خوش گئدر. قالدی، اوشاقلار
اونلارین من کیمی کندخوداسی وار.
الیمدن گلَنی اسیرگه‌مه‌رم.»
بو حالی سئیر ائدن چال‌پاپاق «کرم»،
چاتیب قاشلارینی حیرصیندن یئنه،
گولور بیغ آلتیندان گرای دئیَنه...

قارانلیق، بوغوجو بیر یاز گئجه‌سی،
آیین دا رنگینده ساریلیق واردی.
اطرافی توتموشدو توپلارین سسی،
ماتَمه دؤنموشدو گئجه‌نین آردی.
آیین دا رنگینده ساریلیق واردی.

باشقادیر بو گئجه گرایین حالی،
او اؤز کئفینده‌دیر، دملی‌دیر¹ الآن.
- «دئمک کی، میلّتین وار استقبالی»
دئییب گولومسرکن مینیستر ائلخان،
یئنه ده سس‌لنیر گوموش باکال‌لار،²
یئنه ده سرخوشجا قهقهه‌لر وار:
- «گرای بی! دوغرودان اهریمَنسینیر.
گلر بیز زامان کی، بو هونرله سیز،
سیز ده کئچرسینیز دوز پارلامانا.
بو شؤهرت یاراشیر بیر قهرمانا.»

- «ساغ اولون، مؤحترم و بؤیوک ائلخان!
بللی کی، حؤکمونو وئره‌جک زامان.
الیمدن گلنی اسیرگه‌مه‌رم.»

- «نه اولدو کومونیست چال‌پاپاق کرم؟»
- «او، اله کئچمه‌دی...دئییرلر یئنه
کنددن اوزاقلاشیب گئدیب معدنه.»
- «جبهه‌لر نئجه‌دیر؟»
- «ائشیدیرسینیز؟
او توپ سسلرینین آلتیندا بو گون،
الی توفنگ توتان نه وارسا بوتون،
اؤلور ده، اؤلدورور؛ لاپ قیامت‌دیر،
آنلایان یوخدور کی، بو، سیاست‌دیر.»
- «آفرین، گرای بی! اینان کی سنین،
روحوندا روحو وار دوغما وطنین.
حالال‌دیر بو هاوا، بو سو، بو تورپاق»
- «ائلخان، بو سؤزلری، من اؤلوم، بوراخ!
منیم کی بورجوم‌دور چالیشماق سیزه.»
- «اوَت، صادیقسینیز وظیفه‌نیزه.
قورخوب چکینمه‌مک اؤلومدن، قاندان
گؤزلَنیر عادتا هر قهرماندان.»

#صمد_وورغون
¹- کئفلی، سرخوش
²- ایچگی پیاله‌سی
#شعر_اوجاغی
@SheirOcagi
داوامی وار.

▫️بیلمه‌دیم

درد سینه‌مده داشا دؤندو،
آللاه! اریده بیلمه‌دیم.
قان آغلایان اوره‌ییمی،
بیر یول کیریده بیلمه‌دیم.

یولدا، ایزده قالدی گؤزوم،
بوزا دؤندو اودوم، کؤزوم،
چوخ چالیشدیم؛ آی دوز سؤزوم!
سنی یئریده بیلمه‌دیم.

«شوجاعت!» سولدو باغ‌لاریم،
قورودو بوز بولاق‌لاریم.
آز-چوخ بختوَر چاغلاریم،
قالدی گئریده؛ بیلمه‌دیم.

#شوجاعت_کلبجرلی
#شعر_اوجاغی
@SheirOcagi

▫️بیر جوت غم چیچه‌یی‌دیر سانکی گؤزلرین،
ائله ایچلی، ائله یومشاق، ائله درین...

#نیلگون_مارمارا
#شعر_اوجاغی
@SheirOcagi

▫️منی هانسی قوش داشییار؟

ائله بیر داغ ایدی چؤکدو، چئوریلیب گؤردوم، عجب،
ایندی بیر صحرادی هر یان، قیریلیب دوشور بوداغیم.
من ده بو صحرا ایچینده دَوه‌سی اؤلموش عرب،
اشی، سو یوخسا، جهنّم! سنه چات-چات دوداغیم.

اوسانیب قاچان روحومو توتورام آتیب سینه‌مه،
منم ائ، دردی باشیندان آشان او سفیل سئوگیلین.
اویانان دئییل بو آغری، مین ایلدی یاتیب سینه‌مه.
گله‌سن، سوسوز جانیما یاغاسان غفیل، سئوگیلیم!

توکه‌نیب بوتون سئوگی‌لر، بیتیب او آرزوم-اومیدیم.
اؤزومه هر گون سؤالیم «نئجه‌سن»، «نه وار، نه یوخ»دو.
ایندی ان شیرین یوخومدا، منه بیر یوزوم اومیدیم
باخیرام، شیرینلیگی ده کم اولور؛ نه وار، نه یوخدو.

تؤکولور پنجره‌لردن، قوشلارین دیمدیگی دن-دن.
آرابیر بوز دیرناقلاری شوشه‌نی دؤیر، قاشییار.
او یازیلماییب بوکولموش، ازیلن مکتوب منم، من.
گئدیب ائ گؤیرچین‌لریم! منی هانسی قوش داشییار؟

#اورخان_باهادیرسوی
#شعر_اوجاغی
@SheirOcagi

▫️هیندلی‌لر، اینک‌لره سایغی گؤستریرلر. من ده اونلارین اینانجلارینا سایغی گؤستریرم. آما اینک‌لری منی بوینوزلاسا، من اونلارا سایغی گؤسترمک قالسین، بوینوزلارینی دا سیندیرارام.

#چارلز_بوکووسکی
#شعر_اوجاغی
@SheirOcagi

▫️شعر ییغینجاغی
دوکتور «ناصر فیص»، اوستاد «نادر الهی» و اؤلکه شاعیرلرینین حوضورویلا

چرشنبه گونو، ۲۵ دوندوران آی
ساعات ۱۵/۳۰

#شعر_اوجاغی
@SheirOcagi