▫️دؤورلر

هئچ بیر دؤورده،
اینسان راحات اولماییب.
کئچیب گئدیب قیزیل دؤورو،
داش دؤورو، تونج دؤورو.

دنیز کیمی قاباریب، چکیلیب،
تورپاق کیمی شوملانیب، اکیلیب.
اولماییب اینسانلیغین دینج دؤورو.

بوتون عصرلر، قرینه‌‌لر،*
بشرین فاجیعه‌لی،
اینسانین قورخونج دؤورو.

#زلیمخان_یعقوب
* اصلینده ۳۳ ایللیک بیر دؤور، «عصر» معناسیندا ایشله‌نیر.
#شعر_اوجاغی
@SheirOcagi

▫️بیزدن نه قالاجاق؟

بولبوللر اینساندان قاباغا دوشوب،
بوتون نغمه‌لری اوخویوب گئدیب.
آللاهین الی‌یله یاشیل چمنلر،
بوتون خالیلاری توخویوب گئدیب.

قارا قاریشقالار قارا تورپاغی،
بیزدن قاباق اکیب، دن گؤتوروبلر.
بیزدن اوّل اوچوب اوجا گؤیلره،
قارتاللار مئیدانی گئن گؤتوروبلر.

چیچک دسته-دسته، گول طاباق-طاباق،
هر آری اؤزونه بیر شان باغلاییب.
آدمدن ایره‌لی، حوّادان قاباق،
آری بال عشقینه داستان باغلاییب.

باخیرام صحرانین گئنیش‌لیگینه،
نه‌لری گؤرورم قومدا، نه‌لری!
صحرا داستانینی نه گؤزل یازیب،
بو قوم ذرّه‌لری، قوم دنه‌لری!

دونیانین بو قدر زنگین‌لیگینه،
«نیظامی» مات قالیب، «هومر» مات قالیب.
اینسان نه یارادیب اوچوب داغیلیب،
آللاه نه یارادیب سالامات قالیب.

اوغولسان هاوا چال تزه گؤرونسون،
بوتون هاوالاری چالیب گئدیبلر.
اؤلمزدی، ایتمزدی اوزان دده‌لر،
تاریخین یادیندا قالیب گئدیبلر.

عاغیل‌لا، ایدراک‌لا اینسان اوغلونو،
دویدوروب گئدیبلر، دویوب گئدیبلر.
بوتون خزینه‌لر داهی‌لریندی،
بیزلری الی‌بوش قویوب گئدیبلر.

بیزیم گئتدیگیمیز جیغیرین، یولون،
هاردا قورتاراجاق سونو، بیلمیرم.
تانری تؤحفه‌سی‌دی بیزه قالانلار،
بیزدن نه قالاجاق، اونو بیلمیرم.

#زلیمخان_یعقوب
#شعر_اوجاغی
@SheirOcagi

▫️سنسیزلیک، قورخو

هر سحر گونش دوغور،
هر آخشام گونش باتیر،
نه آی کؤنول اوخشاییر،
نه گون کؤنلومه یاتیر.

نه دوغان گون منی یوخودان اویادیر،
نه باتان گون منه یوخو گتیریر.

یوخسان یانیمدا،
سنسیزلیک آداما
قورخو گتیریر.

#زلیمخان_یعقوب
#شعر_اوجاغی
@SheirOcagi

▫️من سنین اولدوم.

دالغا دنیزین‌دی، چیچک چمنین.
روح جانین پایی‌دی، نفس بدنین.
میلّت شاعیرین‌دی، شاعیر وطنین.
نه یاخشی، نه یاخشی من سنین اولدوم!

قانیم نسلیمین‌دی، جانیم تورپاغین،
مؤحتاجی دئییلم بئش آرشین آغین.
یاشیل آغاجیندا یاشیل یارپاغین،
ساری سونبولونده بیر دنین اولدوم.

آرایا اوچوروم، دره سالمادی،
خئیره یول گؤستردی، شره سالمادی.
یارادان، سؤزومو یئره سالمادی،
«وطن» دئیه-دئیه وطنین اولدوم.

#زلیمخان_یعقوب
#شعر_اوجاغی
@SheirOcagi

▫️مصلحت

درمانا اومید اولما!
حکیم'ه بئل باغلاما!
بیر یئرین آغرییان‌تک،
اوشاق کیمی آغلاما!
اؤزون اول حکیمین،
اؤزون اول درمانین!
قورخما، اؤلمه‌یه‌جکسن،
تانریدان گلمه‌سه فرمانین!

بیر آز ال‌لی ترپن،
بیر آز عمل‌لی ترپن!
عزراییلی یولوندان ساخلا!
اجَلی لنگیت،
اؤلومو قاباقلا!

#زلیمخان_یعقوب
#شعر_اوجاغی
@SheirOcagi

▫️یادداشدان یادداشا

قلم‌له دوست اولان ایلک گوندن بری،
قلمین یاشینا  گووَنمیشم من.
بایاتی قورویان، داستان یاشادان،
ائلین یادداشینا گووَنمیشم من.

یازین قایالارین قیریشلارینا!
یازدیرین هر داشا، کؤچورون منی!
کیتابدان کیتابا کؤچورمک آزدی،
یادداشدان یادداشا کؤچورون منی!

#زلیمخان_یعقوب
#شعر_اوجاغی
@SheirOcagi

▫️آنام نئجه دینیر، نئجه دانیشیر،
شعریمی آنامین دیلینده یازدیم.
منی دیل‌لندیرن، منی دیندیرن،
سئوگیمین، صونامین دیلینده یازدیم.
ساغلام عقیده‌نین، صاف طبیعتین،
آللاها اینامین دیلینده یازدیم.
حالال کیشیلردن حالال سؤز آلدیم،
حالال بیر ایلهامین دیلینده یازدیم.

#زلیمخان_یعقوب
#شعر_اوجاغی
@SheirOcagi

▫️گزیردیم چؤللری بیر یاز آخشامی،
روحومون، قلبیمین بیر ساز آخشامی،
دونیانین ان خوشبخت سؤز آدامی‌یدیم.
شعریمی چیچک‌لر اوخویوردولار،
آری‌لار، بؤجک‌لر اوخویوردولار،
سس-سسه وئرمیشدی قاریشقالار دا،
خاللی کپنک‌لر اوخویوردولار.
ائنمیشدی یانیما گؤیدن ملک‌لر
تانری‌لار، فلک‌لر اوخویوردولار.
بوتون کئچمیشلره چاتمیشدی شعریم،
بوتون گله‌جک‌لر اوخویوردولار.

اینانا بیلمیردیم قولاق‌لاریما،
قوشلار اوخویوردو شعیرلریمی.
ککلیک ده، قارتال دا سؤز یاریشیندا،
داشلار اوخویوردو شعیرلریمی.
سونبول‌لو زمی‌لر دالغالانیردی،
دوزلر اوخویوردو شعیرلریمی.
اوغوللار سؤز آچیر «یاشیل آغاج»دان،
قیزلار اوخویوردو شعیرلریمی.

منیم شعیرلریم بوش دایانماییب،
چؤللرله دانیشیب سیّاح دیلینده.
دردی اورک‌لردن چکیب چیخاردیب،
خسته‌یله دانیشیب جرّاح دیلینده.
یوخسولا همدم‌دی دار کومالاردا،
سارای‌لا دانیشیب پادشاه دیلینده.
داغ دا باشا دوشور، داش دا آنلاییر،
شاعیر دانیشاندا آللاه دیلینده.

آنام نئجه دینیر، نئجه دانیشیر،
شعریمی آنامین دیلینده یازدیم.
منی دیللندیرین، منی دیندیرن،
سئوگیمین، سونامین دیلینده یازدیم.
ساغلام عقیده‌نین، صاف طبیعتین،
آللاها اینامین دیلینده یازدیم.
حالال کیشیلردن حالال سؤز آلدیم،
حالال بیر ایلهامین دیلینده یازدیم.

گؤزومله گؤردوم کی بیر یاز آخشامی،
قلبیمین، روحومون بو ساز آخشامی،
قلبینه کؤچوروب طبیعت منی،
تورپاغین، سمانین یادداشیندایام.
بولودون، یاغیشین، اوتون، یارپاغین،
ذیروه‌نین، دومانین یادداشیندایام.
دونن یئر آییریب، بو گون یئر وئریب،
تاریخین، زامانین یادداشیندایام.

#زلیمخان_یعقوب
#شعر_اوجاغی
@SheirOcagi

‍ ▫️گؤزل‌دی.

پاییز کؤور‌َلد‌ن‌دی، باهار جوشدوران،
منی سرت ائله‌ين قیش دا گؤز‌ل‌دی.
اوره‌یین داشدی می، دئمه، آي اینسان!
دۇیماغی باجارسان، داش دا گؤز‌لدی.

بیر گؤزل چیخاندا چمنه، دوزه،
فیکیر وئر یاناغا، نظر سال اوزه!
گؤز‌للیک باخارمی اَیرییه، دوزه؟
دئمه کی اَیریدی، قاش دا گؤز‌ل‌دی!

«زلیمخان»، اولماسین نه آه، نه آمان!
آغریدان آغلاماق، یامان‌دیر، یامان.
سئوینجین قلبینی دولدوران زامان،
یاناقدان سوزولن یاش دا گؤز‌ل‌دی.

#زلیمخان_یعقوب
#شعر_اوجاغی
@SheirOcagi

▫️یوخو شیرین، حیات آجی،
یاتمیسان‌می، اویاقسان‌می؟
ائی روحومون احتیاجی،
گؤزلریمه چیراقسان‌می؟

یانیمدا قیمتین، قدرین،
قلبیمده حؤرمتین، خطرین،
آدامی اؤلدورور عطرین،
چیچک دولو بوداقسان‌می؟

عؤمروم-گونوم یاشیل تاغدی،
سئوگین ساغلام، عشقین ساغدی.
سینه‌ن اوستو آغدان آغدی،
یازیلمامیش واراقسان‌می؟

ایشیقلی‌دی اۏدون، قۏرون،
سئوگیده‌دیر گوجون، زورون.
یاندیریرسان کۏرون-کۏرون*
اودو سؤنمز اوجاقسان‌می؟

بیریم، پیریم، بیرجه دنه‌م!
سن سئویلن، من سئوَنم.
بو ائوین صاحیبی منم،
سن بیر غریب قوناقسان‌می؟

#زلیمخان_یعقوب
* کؤزَره-کؤزَره
#شعر_اوجاغی
@SheirOcagi

▫️کین‌ درین قویودو.

هامی آددیم آتدی آللاها طرف،
عؤمرونده بیر آددیم سن آتمامیسان.
هامییا قوش قویوب داش آتان آلچاق!
بیر قوش یوواسینا دن آتمامیسان.

کین سنین دوشدویون درین قویودو،
کیم اوردا قالدیسا باتدی، اویودو.
چیرکاب سنین اوچون چئشمه سویودو،
هئچ زامان صافلیغا جان آتمامیسان.

#زلیمخان_یعقوب
#شعر_اوجاغی
@SheirOcagi

▫️تانرینین اۆزۆ کیمی

دوم‌دورویام، دوم‌دورو،
بولاغین گؤزو کیمی.
اریتمیشم حسرتی،
داغلارین بوزو کیمی.
دویغولار اوره‌ییمده
بسله‌نیر قوزو کیمی.
دادلی‌یام، بو دونیانین
چؤره‌یی، دوزو کیمی.
دوغولدوم یئرین عشقی،
گؤیون اولدوزو کیمی.
اۆز-گؤزوم ایشیقلانیب
تانرینین اۆزۆ کیمی.

#زلیمخان_یعقوب
#شعر_اوجاغی
@SheirOcagi

▫️داریخماق نه شیرین شئی ایمیش آللاه!

بو قدر داریخماق نه ایمیش، آللاه،
داریخماق نه شیرین شئی ایمیش آللاه!
غفیلدن بورنومون اوجو گؤینه‌دی،
نوه‌لر منیمچون نوه دئییلمیش،
قلبیمده سیزلایان نئی ایمیش، آللاه!

داریخماق نه شیرین شئی ایمیش، آللاه،
سنی داریخدیران نوه‌لر اولا!
الین یئتیشمه‌یه، اۆنۆن چاتمایا،
نه بیر سوراق چیخا، نه خبر اولا!

اونلار دا منیمچون داریخیر ایندی،
منی سسله‌ییرلر، سوراقلاییرلار.
بیر-بیر کیتابلاردا شکلیمه باخیب
شعیر دفتریمی واراقلاییرلار.

یقین کی اوجالیب ایندی بویلاری،
هره‌سی اوزانیب بیر داری بویدا.
منی گؤرن کیمی هوپپاناجاقلار،
بیزیم ائویمیزین حاصاری بویدا.

اۇزۇن آیریلیقلار کؤنول قیرماسین،
سونلوق گؤزل اولسون هر سفر اوچون!
آللاه هئچ بیر کسی داریخدیرماسین،
داریخان داریخسین نوه‌لر اوچون!

#زلیمخان_یعقوب
#شعر_اوجاغی
@SheirOcagi

▫️ناحاق ائندیک او داغلارین باشیندان.

ناحاق ائندیک او داغلارین باشیندان،
گرک اوردا قال اوغلو قال اولایدیق.
عؤمروموزو گول عؤمرونه دؤندریب
ذیروه‌ده قار، پتَکده بال اولایدیق.

آللاها تن، حاقّا یاردی ذیروه‌لر،
یارانیشدان دوم‌آغ قاردی ذیروه‌لر.
عؤمروموزو اوجالداردی ذیروه‌لر،
ناحاق ائندیک او داغلارین باشیندان

اوفوقلرده قوش اولماق دا گؤزَلدی،
شیمشک‌لره توش اولماق دا گؤزلدی،
لاپ او یئرده داش اولماق دا گؤزلدی،
ناحاق ائندیک او داغلارین باشیندان.

اوجالیغی اؤلوم-ایتیم حاقلامیر،
پئیغمبردی، قلبینده کین ساخلامیر.
مین ایل کئچیر، بیر قایاسی لاخلامیر،
ناحاق ائندیک او داغلارین باشیندان.

حاقّ ائویدی هر داش اوتاق، هر کاها،
سلام وئریر دان یئرینه، صاباحا.
تزه-تزه قوووشوردوق آللاها،
ناحاق ائندیک او داغلارین باشیندان.

روح پاک‌لاشیر، یاغان قاردان آغ اولور،
جان برکیییر، صاف پولاددان ساغ اولور،
داغ باشیندا واللاه آدام داغ اولور!
ناحاق ائندیک او داغلارین باشیندان.

#زلیمخان_یعقوب
#شعر_اوجاغی
@SheirOcagi

▫️خلوت

اولو تانریم، نه گؤزَلدی دوغما یووا،
خلوت سئچیب بیر قیراغا چکیلمیشم.
بو گوشه‌ده چیراق یانیر، شام اریییر،
اریمیشم، شام-چیراغا چکیلمیشم.

ان وفالی ایکی دوستوم، سیرداشیم وار،
بیر قلمه، بیر واراغا چکیلمیشم.
صؤحبتیمین لذّتینی دادان بیلر،
ائله بیل کی بال'ام، یاغا چکیلمیشم.

یاغی دوشمن ائله بیلیر من اؤلموشم-
کفن‌لنیب بئزه، آغ'ا چکیلمیشم.
«فضولی»تک درد الیندن داغا چیخیب
قلبیمده‌کی گؤی یایلاغا چکیلمیشم.

#زلیمخان_یعقوب
#شعر_اوجاغی
@SheirOcagi

▫️قاچقینلیق

بو نئجه عؤموردو، بو نئجه گوندو،
کؤهلَندن آرالی، یهردن قاچاق.
مئه باشا حسرتدی، شئه ده آیاغا،
دوشموشوک آخشامدان، سحردن قاچاق.

هانی او گول‌یاناق، او گول دوستلاریم،
منیم جان دوستلاریم، کؤنول دوستلاریم؟
یاناغی کول اولموش، آ کول دوستلاریم،
قاچاق، بو توستودن، زهردن قاچاق!

هره‌میز بیر سمته، بیر یئره قاچدیق،
گاه خئیره قورشاندیق، گاه شره قاچدیق
کنددن باش گؤتوروب شهره قاچدیق،
قورخورام ایندی ده شهردن قاچاق.

#زلیمخان_یعقوب
#شعر_اوجاغی
@Sheiraocagi

▫️هامی بو شهره دیپ‌دیری گلیر‌.

شهر دونیاسی‌دی... گونده مئیدانا-
عاغیللیسی چیخیر، دلیسی چیخیر.
هره‌نین بیر جوره نفَس‌کسَنی،
هره‌نین بیر جوره زلیسی چیخیر.
هامی بو شهره دیپ‌دیری گلیر،
هامینین شهردن اؤلوسو چیخیر.

#زلیمخان_یعقوب
#شعر_اوجاغی
@SheirOcagi

▫️قبیردن گلن سس

دونیادا ان راحات یئر،
قبیر ائوی‌دیر آنجاق.
واردی بیر جان بۏرجوموز،
بۏرجو وئردیک، قاییتدیق.

باشیمیزا قاخماسین،
خرجیمیزی چکن‌لر!
جانیمیز باهاسینا،
خرجی وئردیک، قاییتدیق.

ائندیک تورپاغین اوستدن،
دوشدوک تورپاق آلتینا.
قالا'نی تسلیم ائتدیک،
بۆرجۆ وئردیک، قاییتدیق.

#زلیمخان_یعقوب
#شعر_اوجاغی
@SheirOcagi