▫️زامان منی سئورمی هئچ؟
نه بؤهتانام، نه شرَم من.
بیر مرد اودا دوشوب یانسا،
اوندان بئتر بیشَرم من.

بو دونیانین خسته حالین،
گلین مندن خبر آلین!
حاق دالینجا آیاق‌یالین،
دیار-دیار دوشرم من.

«شوجاعت»م بیر بوداقدا،
هر شئی یالان، هر شئی ساختا.
نه گؤرموشم دوز اولماقدا؟
نه عاغیلسیز بشرم من...!

#شوجاعت_احمدلی
کؤچوردو
#شعر_اوجاغی
@SheirOcagi

▫️اینسان

قلبه توخونماسا یاشایا بیلمز،
ظولمون چیراغینین یاغی‌دی اینسان.
کؤنول، احتیاطلا دولان دونیادا!
اونوتما زهَردی، آغی‌دی اینسان‌!

قورد گیره قلبینده دولانا، دَیمز.
یانا، پارچالانا، تالانا، دَیمز.
عقربه توخونماز، ایلانا دَیمز،
یالنیز اینسان اوچون یاغی‌دی اینسان.

«شوجاعت!» اورک‌لر قورخوسوز وورمور،
گؤزلرین سئوینجی گؤزلرده دورمور.
قوش دا یوواسینی یاخیندا قورمور،
بیلیر کی خانیمان داغیدیر اینسان...

#شوجاعت_احمدلی
کؤچوردو
#شعر_اوجاغی
@SheirOcagi

▫️قارداش!

دونیادا سینه‌سی داغلی دولانسین،
سنی زیندان‌لارا سالانی، قارداش!
گئت، گئری قاییتما، آمان گونودو
یانماسین عؤمرونون قالانی، قارداش!

اؤزونو هر یئرده نغمه‌کار تانیت،
اولوب-کئچن‌لری بیر یوللوق اونوت،
گؤرسن، آیاقلاما، شیرین دیله توت-
یالوار، یولا گتیر ایلانی، قارداش!

آنان چوخ ایسته‌ییب جانیندان سنی،
گؤز یاشی‌یلا اودوب هر بیر تیکه‌نی،
گولدور، اون ایل اوغول دردی چکه‌نی-
آلنی قیریش-قیریش اولانی، قارداش!

دئمیرم کی، منلییینی آت یاشا!
ناموس ایله بیر تیکه یئ، یات، یاشا!
آزادلیغین ال‌لریندن توت یاشا،
سالما گنجلییینه تالانی، قارداش!

هاردا گؤرسن لاله یاناق، قارا خال،
دویونجا باخ، گؤزل‌لیکدن لذّت آل!
آرا بیر ده «شوجاعت»ی یادا سال،
اونوتما تورمه‌ده سولانی، قارداش...!

#شوجاعت_کلبجرلی
@SheirOcagi

▫️یاتمیرام کی گئجه‌لر

گئدنلری آندا وئريب يولوندان-
ساخلاييرام؛ ياتميرام كی گئجه‌لر.
يوز آلتمیش مین، گؤز-گؤز اولان يارانی،
باغلاييرام؛ ياتميرام كی گئجه‌لر.

يورد-يوواميز ويران اولوب تالانيب،
بولاقلارين نغمه‌سی ده بولانيب.
آددیم-آددیم او داغلاری دولانیب-
یوخلاییرام؛ یاتمیرام کی گئجه‌لر.

چوخ یانمیشام اولمامیشام بئله من،
درد چکمه‌یه یارانمیشام ائله من.
گاه دؤنورم آشیب-داشان سئله من،
چاغلاییرام؛ یاتمیرام کی گئجه‌لر.

طالعيميز درديميزی قودوردوب،
وطن دردی «شوجاعت»ی اوتوردوب.
بالالاری گوله-گوله یاتیردیب-
آغلاییرام؛ یاتمیرام كی گئجه‌لر...

#شوجاعت_کلبجرلی
@SheirOcagi

▫️آنامین

دئیین: دوستاقلاری بوراخاجاقلار،
قوی غم بوزارتماسین اوزون آنامین!
دئیین: قیریلاجاق ظولمون زنجیری،
بیر تهر باشینی یوزون آنامین!

زهر گیزلَنیبمیش آشیمین آلتدا،
بیر دریا وار ایمیش قاشیمین آلتدا.
یاستیق داشا دؤنور باشیمین آلتدا،
بوردا هاردان آلیم دیزین آنامین؟

طالعی شیل-شیکست، فیکری ساغ اولدوم،
سئوینجی بیر ذرّه، دردی داغ اولدوم.
گاه عسگر، گاه خسته، گاه دوستاق اولدوم،
قویمادیم قورویا گؤزو آنامین.

تالانمیش عؤموردو، گوندو؛ نئیله‌ییم؟
باختیمین چیراغی سؤندو؛ نئیله‌ییم؟
سئوینجی فغانا دؤندو، نئیله‌ییم -
صؤحبتی نغمه‌دن حزین آنامین؟

«شوجاعت!» ائتدیلر یالان عؤمرومو،
کور اولسون داشلارا چالان عؤمرومو‌!
تالانان تالانیب؛ قالان عؤمرومو -
عؤمرونون اوستونه یازین آنامین...!

#شوجاعت_دلی‌داغلی
#شعر_اوجاغی
@SheirOcagi

▫️آی داغلار!

من گئدیرم غوربت ائله،
سن سالامات قال، آی داغلار!
حالاللیق وئر، قوی قالماسین،
اوره‌ییمده خال، آی داغلار!

هانی منده دؤزوم سنسیز؟
سؤنه‌جکدی کؤزوم سنسیز،
قان تؤکه‌جک گؤزوم سنسیز،
اولاجاغام لال، آی داغلار!

دوستوم-یاریم کئچیر گئندن،
دردیم آرتیر گونو گوندن.
منی غمدن، غمی مندن،
آل، آی داغلار، آل، آی داغلار!

گونش گزیب یورولاندا،
سازین سیمی قیریلاندا،
گؤیده قارتال وورولاندا،
منی یادا سال، آی داغلار!

قایالاری اله دؤندَر،
جیغیرلاری تئله دؤندر،
«شوجاعت»ی کوله دؤندر،
بیر «کرمی» چال، آی داغلار!...

#شوجاعت_کلبجرلی
@SheirOcagi

‍ ▫️سنسیز قالیبدی.

دور، عزیزیم! باریشماغا گلمیشم.
دؤزَنمیرم، دؤزوم سنسیز قالیبدی.
اؤز اوره‌ییم اؤز سینه‌می ایسیتمیر،
اودوم سنسیز، کؤزوم سنسیز قالیبدی.

کؤورَلمیشم، ائلسیز داغا دؤنموشم،
سارالمیشام، بارسیز باغا دؤنموشم.
بیر کیمسه‌سیز کور* اوشاغا دؤنموشم،
قان آغلاییر گؤزوم، سنسیز قالیبدی.

«شوجاعت»ام، شام دا منم، چیراق دا.
سن گئتمیسن، من قالمیشام سوراقدا.
یازدیقلاریم بوزا دؤنور واراقدا،
شعریم سنسیز، سؤزوم سنسیز قالیبدی..‌.

#شوجاعت_کلبجرلی

* آغلاغان (Kür)

#شعر_اوجاغی
@SheirOcagi

▫️آغلاییر.

بو هاوانین دردی چوخدو،
ائله آغلاییر، آغلاییر.
کرم دئییر «گرک یانام!»
له‌له آغلاییر، آغلاییر.

دردی چمن-چمن شاعیر،
اوره‌یینده وطن شاعیر،
ائل-اوباسی ایتن شاعیر،
بئله آغلاییر، آغلاییر.

«شوجاعت»ام، بختیم دویون،
دؤزمور اورک، دؤزمور بئیین.
منی سوروشسالار، دئیین:
هله آغلاییر، آغلاییر...

#شوجاعت_کلبجرلی
@SheirOcagi

▫️گئتدی.

اونو سندن سوروشسالار، دئنن کی،
من ها عزيزله‌ديم، ناشی‌يدی، گئتدی.
کؤنلومون ايلک ياری، ايلک سئوگیسی‌یدی،
گؤزومون سون قطره ياشی‌یدی، گئتدی.

قالدی خیالیمدا حسرتین ایزی،
یامان دالغالاندی هیجران دنیزی!
اینسان اؤولادينين داش اورک‌لیسی،
نازلی گؤزَللرين باشی‌یدی، گئتدی.

قلبیمی سیخسا دا یار دؤنه-دؤنه،
«شوجاعت» كم باخماز محبّتينه.
من اونو سئویرم، سئویرم یئنه،
اونون اؤز كئفی‌یدی، خوشويدو، گئتدی...

#شوجاعت_کلبجرلی
@SheirOcagi

▫️کیشی‌یه یاراشماز.

اینجه‌لیک، بر-بزک قادین اوچوندور،
عیشوه، غمزه، ناز، کیشی‌یه یاراشماز.
یالتاقلانماق، آیاقلارا سورونمک،
عقیده‌سی‌دوز کیشی‌یه یاراشماز.

عاریفلر اَیلَشیب بو ساغ، بو دا سول،
خوشونا گلمیرسه، او سن، او دا یول.
هر کیم اولورسان‌سا، اول، بیریندن اول،
دوخسان‌دوققوز اوز، کیشی‌یه یاراشماز.

آخیر «شوجاعت»ی گتیردین دیله،
چوخ شئیی اوزونه دئمیرم هله.
قلبیندن کئچَنی آچیق دئ، للـه!
ایکی‌باشلی سؤز کیشی‌یه یاراشماز....

#شوجاعت_کلبجرلی
#شعر_اوجاغی
@SheirOcagi