▫️آذر پوئماسی

...قاپانیب پرده، همن جوشدو پرستش، آلقیش.
رقصه دعوت ائده‌رک چالغی سسی،
یئنیدن پارلادی هر چؤهره‌ده سئودالی باخیش.
یئنیدن دوغدو ساریلماق هوَسی،
یئنیدن دولدو قدح‌لر. هر کس-
آزاجیق آلدی نفس.
صحنه‌دن پارلادی خوش بیر مهتاب،
وئردی هر قلبه جاواب.
جانلی هئیکل‌لر...
او هر سۆسدن اوزاق، صاف، عوریان،
گول بدن‌لر وئرییور روحا قیدا.
موسیقی معبدینین تانریسی دلبر قیز دا،
دوشونور اورتادا حئیران-حئیران.
«بو نه صنعت، نه ظرافت، نه ملاحت!» درکن،
پرده‌لر ائندی همن.
چیخدی هر کس، آزاجیق مؤحتریس¹ اینسان قالدی.
مجلیس آرتیق یئنی بیر رنگ آلدی.

سوزولدو نشئه‌لی گؤزلر،
کؤنوللر آچدی چیچک.
بئش-اون «آمئرکا»لی زنگین ده سونرادان گله‌رک،
ساچیلدی آلتین‌لار.
دمین² عوریان دوران پریلر ده،
سۆس‌لنیب قوندولار بیرَر ماسایا.
هر قدح تاپدی چاره بیر درده،
کیمسه دونیانی آلمییوردو سایا.

نشئه‌دن دؤندو مؤحتریس قافالار،
چیلغین ائشلر چکیلدی لوژالارا.
پرده‌لردن دویولدو قاه‌قاهالار،
داها محرم‌جه ذؤوقه گلدی سیرا.

ساچیب دا اورتایا مغرور آمئرکا ثروتینی،
امَردی عیشوه‌لی آوروپانین بکارتینی.
فقط بو سوسلو تاماشایا قارشی «آذر»ده،
اویاندی نیفرت‌لر.
یاخیندا رنگی سولوق اوچ قادین گلیب درده،
آچیلدی صؤحبت‌لر:...

#حسین_جاوید
¹- اؤزونو قورویان- اؤزونو ساخلایان
²- بیرآز اؤنجه- بایاق
#شعر_اوجاغی
@SheirOcagi
داوامی وار.

دیالوق

▫️- گؤزل بیر گله‌جک اوچون، کئچمیشینی اونودا بیلمزسن!

🎬 Brick Mansions
2014 آمریکا
#کامیل_دولمار
#شعر_اوجاغی
@SheirOcagi

▫️اؤزونه عذاب وئرمک، اؤزونو آلچالتماق بعضاً اینسانا لذّت وئریر.
اؤزوموزو گوناهکار چیخاراندا، باشقا هئچ کسین بیزی گوناهلاندیرماغا حاقّی اولمادیغینی دوشونوروک.

📚 دوریان گرایین پورتره‌سی
#اوسکار_وایلد
#شعر_اوجاغی
@SheirOcagi

▫️آی نیسگیلیم، آی دردیم!
نییه سئومه‌دین منی؟
عؤمرومو سنه وئردیم،
نییه سئومه‌دین منی؟

حسرت قارا یئل اولدو،
گؤز یاشلاریم سئل اولدو
قلبیم قانلی گؤل اولدو
نییه سئومه‌دین منی؟!

سن اومیدیم، پناهیم،
عرشه دیرَندی آهیم.
آخی نه‌یدی گوناهیم؟
نییه سئومه‌دین منی؟

#علی‌بالا_حاجی‌زاده
#شعر_اوجاغی
@SheirOcagi

▫️بعضی توخونوشلار وار، روحونوزلا علاقه قوروب دانیشا بیلیر.

📚 ان
#مسعوده_جاببار
#شعر_اوجاغی
@SheirOcagi

▫️قاباقکی یولداشلارینین هامیسیندان اوزاقلاشمیش، قاباقکی آلیشقانلیق‌لاریندان ال چکمیشدی.
اونون تزه دوستلاری ایسه یوخ ایدی، بونا گؤره ده یالنیز کیتابلارلا قانع اولوردو.

📚 مارتین ایدئن
#جک_لندن
#شعر_اوجاغی
@SheirOcagi

▫️موغاندا، هونرسئور خالقین گئنیش اشتراکی‌یله، «آخماق تولکو» نوماییشینین آچیلیش مراسیمی کئچیریلدی.

یازار: محمد پاشاپور
یؤنتمن‌لر: محمد پاشاپور، واحید فیروزی
آراشدیریجی: همت شهبازی

ا.ی: بو نوماییش، تیر آیی‌نین ۴-جو گونوندن ۷-جی گونونه دک ایجرا اولاجاق.
#شعر_اوجاغی
@SheirOcagi

▫️بیر بیلئت آلاسان، اونا چاتاسان،
باخا گؤزلرینه، دئیه «هارداسان؟»!
سوساسان...سویوقدان تیر-تیر اسه‌سن،
اؤپه‌سن، اؤپه‌سن، سؤزون کسه‌سن!

دؤنه‌سن باشینا، ائله دؤنه‌سن،
قاییتدیغی یئرده، دؤندویو یئرده.
دؤنه‌سن باشینا، ائله دؤنه‌سن،
هئچ بئله دؤنمه‌ییب گونشه یئر ده.

«داریخدیم» دئیه‌سن، گوله سؤزونه،
باغرین چات-چات اولا، دیلین توتولا!
«داریخدیم» دئیه‌سن... بو داریخماقدا،
گؤزلرین حبس اولا، الین توتولا!

چیخا آخیرینا گؤز باخا-باخا،
اوره‌یینه گیره، عاغلیندا قالا!
کیشیسن... آغریدان قیوریلما ایندی!
کیشیسن... آغریما، دؤز باخا-باخا!

دوشه‌سن دونیانین ان پیس گونونه،
خرچنگ طالعینه، ایلان ایلینه!
دیز چؤکوب دئیه‌سن «باغیشلا منی،
باغیشلا، باغیشلا منی الینه!»

غفیل، اوره‌یینین سانجیسی توتا،
اونا نفَسینی قوربان کسه‌سن.
یارا نفس نه‌دی، یارا سس نه‌دی؟!
اومیدی کسه‌سن، الی کسه‌سن.
اومید ده، آرزو دا بیردن چوخ اولا،
بیر سۆرۆ کسه‌سن، کاروان کسه‌سن!

بیر بیلئت آلاسان، یارا چاتاسان،
دئیه‌سن: گلمیشم، دئییم... گئدیرم،
دئییم کی «سئوگیلیم!» دئییم کی «یاریم!»،
بئله ننه‌م دئمیش، «قادام»، باغیشلا!
قانیما قیرمیزی، گؤزومه ایشیق،
روحوما جان وئرن آدام، باغیشلا!

#باهار_زامان‌اووا
#شعر_اوجاغی
@SheirOcagi

▫️یئر اوزونده اینجیدیلمه‌میش آدام تاپیلارمی هئچ؟!
منی او قدر اینجیدیبلر کی، داها اینجیمکدن یورولموشام.
نه ائتمک اولار کی؟! اینسانلار باشقا جور ائده بیلمیرلر.

📚 آنا
#ماکسیم_گورکی
#شعر_اوجاغی
@SheirOcagi

▫️هئچ بیر قانیتی اولمایان شئیلره اینانان‌لاری، قانیت‌لا قانع ائتمک اولماز.

#جیمز_رندی
#شعر_اوجاغی
@SheirOcagi

دیالوق

▫️- منیم یاشیمدا، شاملار دوغوم‌گونو کئکیندن چوخ خرج گؤتورور.

🎬 MR. Nobody
2009
#ژاکو_وان_دورمال
#شعر_اوجاغی
@SheirOcagi

▫️اولسا ایدی اثری ناله و افغانیمیزین
یئنه بیر رحمی گلردی بیزه جانانیمیزین.

آغلادیق صبح آچیلینجا گئجه‌لر کویوندا،
اۆزۆ گولسون بیزه بلکه مهِ تابانیمیزین.

بیزه هجران گونو ظلمت گئجه، گوندوز کیمی‌دیر،
ائله روشن‌دی چراغی، دلِ سوزانیمیزین.

نازنین حوری‌لقالار بورویوب دونیانی،
بوندان آرتیق نه‌یی وار روضه‌ی رضوانیمیزین؟!

خمِ ابرولرین اوخشاتدیق هلاله او مهین،
عوذرو مقبول دئییل عالمده بو نقصانیمیزین.

چکدیک، افسوس، عبث زولفو سیَه‌لر فکرین،
سببی بیر ده بودور حالِ پریشانیمیزین.

بو تفاخر منه «واحید!»، یئتر اؤلسم ده اگر،
من ده بیر شاعری‌یم آزربایجانیمیزین.

#علی‌آقا_واحید
#شعر_اوجاغی
@SheirOcagi

▫️حیاتیمدا ان بؤیوک یانلیشیم «باشقالاری‌یلا ایشیم اولماسا، اونلارین دا منیمله ایشی اولماز» دئیه دوشوندویوم‌ ایدی.

#وودی_آلن
#شعر_اوجاغی
@SheirOcagi

▫️سنی رام ائله‌مک،
اهلی‌لشدیرمک،
و یا ایلکین طبیعتینی دوزَلتمک
الیمدن گلمیر.
بو ایمکانسیز بیر شئی‌.

من هوشومو سنله سینامیشام،
ائله‌جه ده آخماق‌لیغیمی.
سونوندا دا یئنیلمیشم.

#نزار_قبانی
#شعر_اوجاغی
@SheirOcagi

▫️آذر پوئماسی

...بیرینجی قادین:
«منیم قیزیم داها گنج...ایشده قالدیق اتمک‌سیز¹،
نه ائدرسن، تیکانلی بیر یاشاییش!
بو کیرلی جنّته گلدیک، قارالدی گؤزلریمیز،
قیزی ساپدیردی² بیر ییغین آلقیش.»

ایکینجی قادین:
«منیم ده غوغادا محو اولدو قارداشیم‌لا اریم،
ایکی قیز قالدی، بیر ده یوخسوق‌لوق.
(بیر لوژانی گؤستریر):
نه ایش تاپیلدی، نه ائش...
آه! بو نادیر اینجی‌لریم،
ایندی هر ذؤوقو اوخشایان مخلوق».

اوچونجو قادین:
«منیمکی ایشده بو آل پرده‌دن گولوب ده منه،
«بیر آز دا گؤزله!» دئییر.
نه چاره؟! گؤزله‌رم، آز-چوخ نه آغجا گلسه اونا،
منیم‌له صرف ائله‌ییر.»

اینجه بیر یاش گؤروندو گؤزلرده،
آجی بیر ایز بوراخدی آذرده.
دوشوندو: بلکه... -دئدی-
بیر زامان بلکه دۆنکو آسیادا،
اسکی قافقازدا، وحشی آفریقادا
قیزی جبراً ساتیب آلیرلارمیش؛
اونا آوروپا خالقی «پک فاحیش³
بیر فلاکت» دئمیش ده هایقیرمیش،
تابلو یاپمیش، رسیملر آلدیرمیش.
گولموش، اَیلنمیش، ائیله‌میش حئیرت،
بسله‌میش بلکه بیر ییغین نیفرت.
فقط بو حال نه ایدی؟!
بونو گؤرمزمی اینجه گؤزلوک‌لر؟!
ساتیلیر بوردا قیزلار آزاده،
هم طبیعی بیر ایش قدر ساده.
آنا بیر یاندا تیتره‌ییب بکلر.
مدنیّتده چیرپینان وحشت،
داها یالدیزلی، شاعیرانه، اوَت.
بوردا اؤز ایسته‌یی‌له جاریه‌لر،⁴
سنه شاقراقجا⁵ نیننی‌لر⁶ سؤیلر.
بیر قفس خوشدور، آلتین اولسون دا،
آج گؤیرچین‌لر اَیلنیر اوندا...

«بوراخ، بوراخ، یئتیشین! بیتدیم، آه، آمان، ایمداد!»
«نه‌دیر بو سس؟» دئر ایکن، قوپدو سیسلی بیر فریاد،
همن بیرینجی قادین قاچدی کندی یاوروسونا:
«ملک قیزیم، -دئدی- کیملر مسلّط اولدو سانا؟!»

ایپَکلی پرده آچیلدیقدا غؤنچه سولموشدو،
سبب جینایته، بیر کیرلی شهوت اولموشدو.
او شن سالوندا فقط دالغالاندی حزن و سکوت،
سکوت ایچینده گولومسردی سوسلو بیر تابوت...

#حسین_جاوید
¹- چؤرک- اکمک
²- دوغرو یولدان چیخارماق- پیس یولا سالماق
³- حددن آرتیق- چوخ
⁴- خیدمتچی قیز
⁵- نشه‌لی
⁶- بئشیک ماهنیسی- لایلا
#شعر_اوجاغی
@SheirOcagi
داوامی وار.

▫️آنالی گئجه

بیز یولا دوشنده ساعات یاتیبمیش،
هله قاباقدایمیش باغری‌قان گئجه.
یاخین یونجالیقدا بال'ا باتیبمیش،
اوزاق بولودلوقدا باغیران گئجه.

ائوه قاییدیردیق اوجاق سۇیۇندان،
کؤنول آت چاپیردی اۆزۆ دونیایا.
قایادا قایناییب آغرینی اۇدان،
یئنیدن دوغموشدو بیزی دونیایا.

چیغنانیب¹ دینیردی چینقیللی یاماج،
باشی هرله‌نیردی باییلان اۏوون.
تپه قاشقاسیندا² پول-پول یانان داش،
اۆزۆردۆ گؤلونده ایشیق آلووون.

یانیردی اوزاغین شیمشک داماری،
بولاق نئی توتوردو اؤز اؤیۆدۆیله.³
او مونجوق دۆزۆملۆ ایلهام داغلاری،
ایشیق یوغوروردو ذیروه سۆدۆیله.

«بونلار یازمالی‌دی» دئییردین منه،
قوزئیی قۇجۇردۇ قالایلی قاناد.
یاش آلماس چیله‌ییب یای گونئیینه،
بیزه پای وئریردی گئجه آد-با-آد.

یوخو بیشیریردی یایلاق دورناسی،
هاوانی یاران قوش بالا پری‌یدی.
اورَکدن جارلانان آنا دوعاسی،
کؤنول چیراغی‌یدی، جان چپری‌یدی.

گؤرکَمی باشقایدی او تۇنج⁴ گئجه‌نین،
گئجه‌نی گؤزویله یۏنموشدو آنام.
فیل دومان اوچوردان قورخونج گئجه‌نین،
لاپ آی‌دۆشمزینده یانمیشدی آنام.

آغ-آلا گئییملی قارا گئجه‌نین،
اوچقوندان آسیلمیش قالا گئجه‌نین،
اؤزومه بنزه‌ین قابا گئجه‌نین،
اینجه آناسینا دؤنموشدو آنام.

اوغوروم مینمیشدی اولدوز آتینا،
هاردا دۇیانیم وار اوردا دا خوشدو.
قویوب قۏل بالینجی باشیم آلتینا،
آنام گئجه‌‌یه ده آنا اولموشدو.

منه قۏل آچمیشدی او سیغناق آدا،
آج آیی ایشینی بیلیب قاچیردی.
سۆله‌نیب-سۆمسۆنن آغزی‌قارا⁵ دا،
آنا هنیریندن⁶ سیلیب قاچیردی.

دئمیرم یئل ایینه، یئلپیک سویوق‌دو،
آنا اولان یئرده گوج غمی بوغور.
آنا اولان یئرده قارانلیق یوخدو،
آنا اولان یئرده یئر ایشیق دوغور.

ساعات برک یاتیبمیش آن اۇدا-اۇدا،
هر کس بیر یانلیشین یول یولداشی‌دی.
بالانین چاش-باشلیق آغریسینی دا،
هامیدان بیرینجی آنا داشیدی.

گل منی باشا دوش، آی «منم» دئین!
ائله آتا کیمی آنا دا بیرمیش.
آنا اته‌ییندن توتوب یئرییَن،
تانری ائوینه‌جن گئده بیلیرمیش.

#آغا_لاچینلی
¹-تاپدالانماق، آیاقلانماق
²- آلنین تام اورتاسی
³- نصیحت
⁴- قورغوشون- قالای
⁵- جاناوار- قورد
⁶- یاواش سس
#شعر_اوجاغی
@SheirOcagi

▫️منه یالان دئدیگین اوچون اوزولمورم، بیر داها سنه گووَنه بیلمه‌یه‌جه‌ییم اوچون اوزولورم.

#فردریش_نیچه
#شعر_اوجاغی
@SheirOcagi

دیالوق

▫️- اینسان چوخ قورخدوغو زامان، قورخوسو نیفرته دؤنوشور. نیفرت‌سه اینسانین دونیاسینی همیشه‌لیک دَییشیر.

🎬 Silent Hill
2006
#کریستوف_گان
#شعر_اوجاغی
@SheirOcagi

▫️سن منی، عزیزیم، اونودا بیلسن،
گرک چیخمایاسان یاشیل چمنه!
من او چمنلردن بیر باهار چاغی،
بیر دسته گول دریب وئرمیشم سنه.

سن منی، عزیزیم، اونودا بیلسن،
گرک باخمایاسان یاغان یاغیشا!
آچب کؤنلوموزو بیر چتیر کیمی،
او یاغیش آلتیندا گزمیشیک قوشا.

عزیزیم، سن منی اونودا بیلسن،
گرک کئچمه‌یه‌سن او کوچه‌لردن!
ووصال چکیله‌جک سون باهار کیمی،
انتظار دینه‌جک لال گئجه‌لرده.

عزیزیم، سن منی اونودا بیلسن،
اولدوزلو گؤیلردن گؤزونو چک سن!
یالقیز گئجه‌لرده پیچیلداشاندا،
سن منیم سسیمی ائشیده‌جکسن.

عزیزیم، سن منی اونودا بیلسن،
بیر ده او گؤزلره کیم باخاجاقدیر؟!
ساچینا ال وورما، آمان گونودو،
منیم اللریمچون داریخاجاق‌دیر!

عزیزیم، سن منی اونودا بیلسن،
شیرین خاطیره‌لر گئن دوشه‌جک‌می؟!
سون پاییز چاغیندا داغلارا ایلک قار،
سنین ساچلارینا دن دوشه‌جک‌می؟!

عزیزیم، سن منی اونودا بیلسن،
یارالی کؤنلونو بیر اوووت گؤروم!
منی اونوتماغی آسان بیلمیسن؟!
اونودا بیلیرسن، گل اونوت گؤروم!

#بابا_وزیراوغلو
#شعر_اوجاغی
@SheirOcagi

▫️بعضی آداملارین سانکی فقط یالان ائشیتمکدن آجیغی گلیر، آما یالان دانیشماقلا سورونو یوخدور.

#یوستین_گوردر
#شعر_اوجاغی
@SheirOcagi

▫️سن سئوگیلیم اولاندان اؤنجه،
ایسته‌دیگیم هر سؤزله
سئویشیردیم.
ایسته‌دیگیم هر کلمه‌ آنلامی‌یلا، ائولنیردیم.

سن سئوگیلیم اولاندان بری،
آغ دنیزین ساحیلیندن،
هئچ بیر شئی خاطیرلامیرام،
سنین اوزونتو، سورمه و قاغایی دولو گؤزلریندن باشقا.

#نزار_قبانی
#شعر_اوجاغی
@SheirOcagi