▫️عؤمرون چوخو گئدیب، آزی قالیبدی،
قیشی اؤتوب کئچیب یازی قالیبدی.
سینه‌مده یازمالی یازی قالیبدی،
بیر اوغول گزیرم، یازا دردیمی.

یوخولار گؤرورم قاتما-قاریشیق،
یوخولار الینده چاشیب قالمیشیق.
دئییرم نولاردی بیر غملی عاشؽق،
کؤچورده اوچ تئللی سازا دردیمی؟
بیر اوغلان یوخدو کی یازا دردیمی؟!

گونده بیر دون گئییر بو ظالیم فلک،
دؤزور هر آغری‌یا-آجی‌یا اورک.
دئییرم آی «ائیواز!» نولار بو فلک،
گؤتوره قلمی، پوزا دردیمی.
بیر اوغلان یوخدو کی یازا دردیمی؟!

#یتیم_ائیواز
#شعر_اوجاغی
@SheirOcagi

▫️طالعسیز بیر عاشیقم،
نه سنه گله بیلیرم،
نه اؤزومه قاییدا بیلیرم.
اوره‌ییم منه باش قالدیریب.

#محمود_درویش
#شعر_اوجاغی
@SheirOcagi

▫️منیم آرزولاریم گؤزل‌دیر، آما اونوتمامالی‌یام کی، اونلار گئرچکلیکدن چوخ-چوخ اوزاق‌دیر. خیاللاریمدا قیزاران سمانی، چیچک‌لنن جنّتی گؤرورم، آما چوخ یاخشی بیلیرم کی، گئده‌جه‌ییم یول سرت و آمانسیزدیر، منی قارشیدا توفانلار گؤزله‌ییر.

📚 جین ایر
#شارلوت_برونته
#شعر_اوجاغی
@SheirOcagi

▫️تاپشیر!

گئديرم؛ دئميرم يولا سال منی،
منی يوللاريمين داشينا تاپشير!
يولداشيم اولاجاق آخان گؤز ياشيم،
منی گؤزلریمين ياشينا تاپشير!

آماندی، آه چكمه، يول دومان اولار،
ساريلما بوينوما، باخ، اومان اولار،
دولدورما گؤزلرين، آه، جومان اولار،
منی او چاتيلان قاشینا تاپشير!

روحوما قاناد وئر، اوچوم سئوگينه،
كؤنلومدن بير قاپی آچيم سئوگينه،
سن آللاه، آچ قوينون، قاچیم سئوگينه،
«كؤنول»و هاوالی باشينا تاپشير!

#فاطمه_عبدی_کؤنول
@SheirOcagi

▫️آللاه بو نئجه بیر عنعنه‌دیر؟! دونیانین او بیری اوجونا گئتمه‌یه حاضیر اولدوغوم بیر کیشی ایله بیر کلمه دانیشدیغیم اوچون منی اؤلدورمک ایسته‌ییرلر.

📚 منیم پاییم
#پرینوش_صنیعی
#شعر_اوجاغی
@SheirOcagi

دیالوق

▫️- نییه منی اؤلدورمه‌دین؟
+ سن اؤلومدن قورخمورسان، هله اونو آرزیلاییرسان. سنین جزان داها آغیر اولمالی‌دیر.

🎬 The Dark Knight Rise
2012 آمریکا
#کریستوفر_نولان
#شعر_اوجاغی
@SheirOcagi

▫️گئجه گؤردویوم یوخونو،
سحر-سحر کوچه‌ده،
آددیم-آددیم تامسینیرام.
بیری چیمدیک‌له‌سین منی،
ائله‌بیل یوخوم چین اولور!
ائله‌بیل او منیم طالع قوشوم‌دو...

بس نییه باشیمین
اوستوندن کئچدی گئتدی؟
بس نییه باشیما... گئتدی؟!

#نادر_الهی
@SheirOcagi

▫️گل اویون اوینایاق!

گل دردی آخیداق سئوینج سئلینه،
گل اویون اوینایاق ائله بو یاشدا!
گوله‌شک، گولوشک، مله‌شک یئنه،
گونوموز سۆد امَن گۆنلۇ یاماجدا!

من اؤلوم، گل یئنه بیر آغیز دئیَک،
آغرییا ایچیردک شادلیق بالینی!
دادلی تیکه‌میزله یئنه یئم‌له‌یک،
یووادا یالواران اتجه بالانی!

گؤللرده قاز اولاق، چؤللرده گونش،
قاتاق دووشانی دا زاغا دامینا!
پاییزین کۆرکۆندن یولونان کولش،
آلوودان دۏن بیچسین یاز بایرامینا!

دَییشسین عؤمورون آغری قابیغی،
قایغی سۆنگولری قلبدن سۆرۆشسۆن!
قیشین بۇز گؤزلویو، سیرسیرا بیغی،
اوجاق هاواریندا اریییب دوشسون!

ائشیت اوره‌ییمین جیزهاجیزینی!
چۇللو چوبوغو دا چاپاق یوز یئره.
اویون جیغیرینی، اویون جیزینی،
بیر چیدار¹ ائله‌یک قاچان عؤموره!

مین ایل یاشاساق دا، کۆت اوشاقلاریق،
پای-بؤلوش اوماریق دونیا بابادان.
گل اویون اوینایاق نئجه کی واریق،
شیرینه شیرنیکسین² آجینی دادان!

ایللر بیچاغینی چپینه چرتیب،
جاندا جیزیلتی وار، قاندا ولوَله.
باشیمیز، آی قارداش، چوخ اویون چکیب!
بعضی اویوندان دا قورخورام هله.

او «گیزلن-پاچ»دان دا قورخورام آرتیق،
گل اویون اوینایاق قلبه دَیمه‌دن!
دؤیوله-دؤیوله جیزدان چیخمیریق،
آخی نه دانیشیم‌ «دیره-دؤیمه»دن³؟!٫

چیلینگی سینماسین «چیلینگ-آغاج»ین،
هله «سۆدلۆ-سۆمۆک»⁴، سودلوجه گئجه.
«بئش-داش»دا توققوشان بئش قوهوم داشین،
یولو یولوموزا بنزه‌دی نئجه.

نئجه ده سۆرۆشدۆ عؤمور بالیغی،
گل دردین باشینی اویونلا قاتاق!
کفنی یئل‌لنن قیش قوجالیغی،
یازا یووارلاداق، یاشیلا توتاق.

گل ماهنی کؤپوردک ساخسی کۆپه‌ده،
گل اووو قاچیرداق- گؤرن گولوشسون!
تاجی اوجاق اولان قارلی تپه‌ده،
سۏیۇغۇن آغ گؤزو توستویه دوشسون!

بیز بو دَییرمانین قۇرۇ دنی‌ییک،
قوی سئوینج اوولاتسین چالیب-اوخوماق.
اونسوز دا هره‌میز بیر آز دلی‌ییک،
بیر آز عاغیللی‌ییق، بیر آز دا آخماق.

اونسوز دا باغلی‌دی چیخیش یوللاری،
گل قۏدۇ⁵ گزدیرک قارا یاغیشدا!
گل یادا سالمایاق چوخ سؤال‌لاری،
گل اویون اوینایاق بو یاری یاشدا!

#آغا_لاچینلی
¹-بوخوو
²- آلیشماق- اؤیرشمک
³- کوتله‌وی اوشاق اویونلاریندان بیرینین آدی
⁴- کوتله‌وی اوشاق اویونلاریندان بیرینین آدی
⁵- کئچمیشده، آراسی کسیلمه‌دن یاغیش یاغدیقدا کند اوشاقلارینین توپلاشیب حیَط-حیَط گزه‌رک نغمه اوخوما مراسیمی و بو مراسیمده اوخونان نغمه‌نین اؤزو.
#شعر_اوجاغی
@SheirOcagi

‍ ▫️هئچ بیلمیرم من سنی،
هاچان، هاردا ایتیردیم.
یاغیش یودو،
یوخسا کی، کولَک آپاردی سنی؟
بو سئوگی ناغیلینی،
من بیر یوللوق بیتیردیم.
آختارمیرام،
آختارسام، یقین تاپاردیم سنی.

دونیادا بیرجه قورخوم،
سنی ایتیرمک ایدی.
سن یوخسان،
بو دونیادا داها منه قورخو یوخ.
آما سنسیز ائله بیل،
هر شئی شیکست‌‌دی ایندی.
ساعاتیمین عقربی،
چاینیکیمین قولپو یوخ.

یئل ووردوقجا یئل‌لَنیر،
پئنجه‌ییمین اَته‌یی.
پئنجه‌ییمین سونونجو-
دویمه‌سی‌تک قوپموسان.
باری چوخدان سووولموش-
آغاجین اوستونده‌کی-
ان سونونجو، ان شیرین-
مئیوه‌سی‌تک قوپموسان‌.

«دردلی‌لر اؤز دردینی،
سویا دئیر» دئییبلر.
یاخشی کی، سو دا گلدی،
دردیمدن آزاد اولدوم.
«آرمودون یاخشیسینی،
آیی یئیر» دئییبلر.
گئتدین هانسی آیینین،
داماغیندا داد اولدون؟!

سنسیز ائله بیلمه‌ کی،
کئفه باخیرام، کئفه!
سن یادیما دوشنده،
داریخیرام هر گئجه‌.
اوشاق واختی هاچان‌سا-
عؤمرومده بیرجه دفعه،
پیشی‌ییمیز ایتَنده،
داریخمیشدیم بئله‌جه.
داها اوشاق دئییلم،
هر ایتَنه آغلایام.
راحات یاتیرام داها،
یوخوم دئو یوخوسودو.

...کیمدی بو گئجه یاری،
قاپیمی جیرماق‌لایان؟
بو نه سس‌دی؟
دئیه‌سن،
پیشیک مییولتوسودو.

#رامیز_رؤوشن
🎙 سالار موغانلی
@SheirOcagi

▫️ایندی باشا دوشموشموشدوم نه اوچون اینسان یارادیلان‌لارین ان اوستونودور: اوره‌یه گؤره.
بیر اورک گونشدن ده ایستی، بوزدان دا سویوق، قایادان دا سرت، دنیزدن ده چیلغین، بولاقدان دا تمیز، سمادان دا اوجا، اولدوزدان دا پارلاق، چیچکدن ده اینجه اولا بیلردی.

📚 A
#قاراقان
#شعر_اوجاغی
@SheirOcagi

▫️اینسانین اوره‌یینده یالنیز بللی درجه‌ده کدر و اومیدسیزلیک اولا بیلر. سۆنگَره سو هوپدوقدان سونرا اونو دنیزه آتسان دا، بیر دامجی سو چکمه‌یه‌جک.

📚 پاریس نوتردام کیلسه‌سی
#ویکتور_هوگو
#شعر_اوجاغی
@SheirOcagi

▫️گول نفسین گول قوخویور، آی گولوم!
دئ، گول نه‌دیر، چیچک نه‌دیر یانیندا؟!
بو دونیادا ملکدن ده گؤزلسن،
حوری نه‌دیر، ملک نه‌دیر یانیندا؟!

نه قدر کی سن یۏخلارسان، من وارام،
نه قدر کی سن سئورسن، یاشارام.
بیر گؤزَله گؤز اوجویلا باخمارام،
گؤزل نه‌دیر، گؤیچک نه‌دیر یانیندا؟!

سنسیز اولسام، وارلیغیمی سارار غم،
سنسیز اولسام، بیرجه آندا اؤله‌رم.
گؤزلریمی سنه قوربان وئره‌رم،
بو جان نه‌دیر، اورک نه‌دیر یانیندا؟!

#علی‌بالا_حاجی‌زاده
#شعر_اوجاغی
@SheirOcagi

▫️قارداشیم
«ممد آراز»ا

سن منی بیر آخشام قوناق ساخلادین،
یارامى یاران‌لا یویوب باغلادین.
منیم گؤزلریم‌له بعضاً آغلادین،
قویمادین گؤزلریم دولا، قارداشیم!

تویونا گلمیشم، هر یان خونچادیر،
بوش الیم بوكولموش قانلى غونچادیر،
بیرجه اوره‌ییم وار، پارچا-پارچادیر،
او سنه چاتاجاق، آلا، قارداشیم!

اوره‌ییم شیشه‌دیر، اوره‌ییم حلیم،
كیم اونو ایكی‌یه بؤلدو، نه بیلیم؟!
آل، او چیلیک-چیلیک، او دیلیم-دیلیم،
اونو بیر-بیرینه جالا، قارداشیم!

دره‌لر كئچه‌رم، داغلار كئچه‌رم،
اؤزومه آلوودان پالتار بیچه‌رم،
ظولمتى اریدیب سئل-سئل ایچه‌رم،
قویمارام ائل داردا قالا، قارداشیم!

من «سؤهراب طاهیر»م، نه لازیم اؤیود؟
بیرجه اوغلوم قالیر، اونو سن بؤیوت!
گئدیرم ووروشا، سیلاحیم اومید،
قالماییم قارداشدان دالا، قارداشیم!

#سؤهراب_طاهیر
#شعر_اوجاغی
@SheirOcagi

▫️هله تاماملانمامیش شئیلر حاقّیندا یاخین دوستلارا بئله، سؤز دئمه‌یی و خبر وئرمه‌یی خوشلامیرام.

📚 قیرمیزی یایلیقلی قوواغیم منیم
#چنگیز_آیتماتوو
#شعر_اوجاغی
@SheirOcagi

‍ ▫️منیم دونیام
 
اوزونده غم-کدر گؤرمه‌سین گؤزوم،
سندن باشقاسینا باخمایاجام من.
سئوگیمین آنلامی! گؤزل گؤزونده-
اگر یاش دا اولسام، آخمایاجام من.

سنی اؤزوندن ده آرتیق سئومیشم،
یاش اولوب گؤزوندن آخسام بیلرسن.
گوناهکار دئییلم آرتیق سئومکده،
آینادا اؤزونه باخسان بیلرسن.

آدینی یازاندا شعیرلریمده،
قلمیم اوخ اولوب سؤزومدن دییر.
چوخو اؤز سئودیگین گوله بنزه‌‌در،
آما بوتون گوللر سنه بنزه‌ییر.

سنی سنه خاطیر سئومیرم، نازیم!
بیرتایلی سئوگیدن قورتارار دؤزوم.
سن منیم اؤزومسن، سنی سئومکله،
اؤزومو اؤزومده سئویرم اؤزوم.

سن منیم رؤیامسان، سن منیم دونیام،
اللریمدن توتوب هارا چکسه‌لر.
بوتون وارلیقلاری آتارام، منی-
سنین ساچلاریندا دارا چکسه‌لر.

هردن دانیشیرسان، هردن سوسورسان،
سوسماغین دا گؤزل، دانیشماغین دا.
هردن باریشیرسان، هردن کوسورسن،
کوسمه‌یین ده گؤزل، باریشماغین دا.

شعر و سس:
#حاتم_احمدی
@SheirOcagi

▫️شهرلی آغاج

شهرلی آغاجی آغ بیچاق سویار،
بوشقو دا یئریکلر اوجا بویونا.
کولک آغ کاغیذدان کفن دولایار،
بئلی بوکولموشون ساپلاق بوینونا.

دینمزجه قۇرۇشار یول قیراغیندا،
اوزونه توپورَر پالچیقلی تکر.
بار'یندان اوست-باسا بویاق یاغاندا،
بوداغی بالتالار شیلله‌ییب-تؤکر.

اسن یارپاقدان دا قورخو ساللاشار،
قوشلار سیغناجاغی قوش اولار بیردن.
یارالی-یارالی مایاللاق آشار،
یاراق آنبارینین اوستونده بیتن.

تانکلار چینارین دا باغرینی یارار،
قان دامار سؤیودون اۇن آغلیغینا.
گلمه آکاسیالار¹ تیکان باتیرار،
یئرلی قوواقلارین یومشاقلیغینا.

شهرلی آغاجلار بیج-بیج اؤسکورر،
ساغا گؤز گزدیرَر، سولا ماریتلار.
بویلانیب ائولرده گؤزللیک گؤرر،
بالدیری اَهَنگ‌لی² قوجا پالیدلار.

قیشدا باشقالاشار یازین اویونو،
باشلانار کاکتوسون دیبدن ائشیمی.
هر گلن بیر یئرده بیتیرَر اونو،
بیزیم بۇیرۇق غولو باشچیلار کیمی.

شهرلی آغاجلار یامان داریخار،
قیرین دار بوخووو قیریلار یئنه.
شهرلی آغاجلار چپردن چیخار،
قاچار اؤز یئرینه، اؤز مئشه‌سینه.

#آغا_لاچینلی
¹- آغاج آدی- اقاقیا
²- کیرج- آهک
#شعر_اوجاغی
@SheirOcagi

▫️عؤمروم داغدا-داشدا کئچیبدی منیم،
سیلدیریم قایالار دفع ائیله‌میشم.
قلبیمه او قدر دَییبلر منیم!
من‌سه باغیشلاییب عفو ائیله‌میشم.

اینجیمه‌دیم هئچ واخت دوستون سؤزوندن،
چون کئچه بیلمه‌دیم دوستون اۆزۆندن.
ایندی هامسی گلیر ایکی گؤزومدن-
گنجلیکده نه قدر کئف ائیله‌میشم.

وئرمیشم قلبیمه تابی-دؤزومو،
دئیه بیلمه‌میشم اورک سؤزومو.
«ائیواز»ام آی قارداش، اؤزوم اؤزومو
ساغلیقدا بیر یوللوق محو ائیله‌میشم.

#یتیم_ائیواز
#شعر_اوجاغی
@SheirOcagi

▫️آنلاماماق خوشبختلیگی، اونلاری دلی اولماقدان قورتاریردی.

📚 1984
#جورج_اوروئل
#شعر_اوجاغی
@SheirOcagi

▫️منجه، شئیطان دئیه بیر شئی حقیقتده یوخدورسا، اینسان‌اوغلو اویدورموشدورسا اونو، اؤزونه باخاراق، اؤزونو اؤرنک گؤسته‌ره‌رک اویدورموشدور.

📚 کارامازوو قارداشلاری
#فئودور_داستایئوسکی
#شعر_اوجاغی
@SheirOcagi

▫️اوزاقلاردا دئییلم، سئوگیلیم!
بولودلاردا گَزسه ده هاوالی باشیم،
یئر اوزونده‌دیر آیاقلاریم.
آخی «من تورپاق قیزییام» دئمیشدیم.
قارینجالار اؤزوندن بؤیوک دَنه‌لر داشیدیغی کیمی،
سیرتیمدا داشییرام آغیر یئر کوره‌سینی.
سَرت دونیا اوزوندن سیغینمیشام شعر دفتریمین سیجاق بوجاغینا،
یارالاریمی ساریییرام چیچک قوخولو ایپک مندیلی ایله.
او قَدَر یورغونام کی،
کهف کؤهولونون یولداشلاری کیمی
بوتون دونیانی باشیمدان آتماغیم،
اوچ‌یوز ایل یاتماغیم گلیر.
قورخورام آما…
قورخورام یاتدیغیمدا ظالیم زامانین آغیر تَکَرلری کئچر اوستومدن،
یئتیم قالار اوخونمامیش کیتابلاریم،
یاریمچیق قالار دئییلمه‌میش سؤزلریم.
اودور کی کیرپیک‌لریمین آراسینا سامان چؤپو قویورام،
بو ایکی گونلوک دونیادا،
یومولماسین گؤزلریم.
اونسوز دا اوزون-اوزون، مین ایللر یوخولایاجاغیق،
بئزه‌جه‌ییک یوخولاماقدان، اوره‌ییمیز بولاناجاق.
یادیندادیرمی؟
دئمیشدین: هر اینسان چاپا حاضیرلانان بیر کیتاب‌دیر
سهولرله دولو،
رئداکته لازیم‌دیر اینسانا.
هله دوزه‌لیش ائتمه‌لی سهولریم وار بوللوجا…
اؤزللیک‌له مین اوزلو آداملاری تانیماقدا چوووخ سویروشوب آیاغیم!
سهولرله دولو کیتاب یوز کره چاپ اولسون بئله، کیمه نه فایداسی وار؟!
درد اهلی اولاجاقسان بیر عؤمور هر آتدیغین آددیمیندان حساب چکسن
آمما الینی جیبینه قویوب وئییل ده گزه بیلرسن هئچ زادی وئجینه آلمادان،
الکتریک آغاجلاریندا،
ساختا گولوشلریندن اینسان قانی دامان،
اینسانلاری ایشیلدایان پوتونلاری آلتیندا دگرسیز بیر بؤجک سانان،
اؤزلرینی اورک یاندیران تانیدیب، اورکلری یاندیران،
ائو تیکن تانیتدیریب، ائولر ییخان، اللری بیر کاسادا جلّادلارلا قان ایچن،
بیرگه یئییب، آیری سی…ن بَی‌لر کیمی!

دئمیشدین: دورو اول، آیدین اول بولاقلار سایاق
او اوجالیقدا گؤی، سنه باش اَیه‌جک
اؤزونو سنده گؤرمه‌یه آیاقلارینا ائنه‌جک
گوندوزلر گونش، گئجه‌لر آی-اولدوز، سنده یویوناجاق، اوزونو اؤپه‌جک.
چارپاشیق سیناقلاریندان باش اوجا چیخماق چتین اولسا دا،
سنین درین سئوگینه لاییق بیری اولماق اوچون دورولماغا،
دۆرّ (dürr) اولماغا چالیشیرام، سئوگیلیم!

#سحر_خیاوی
@SheirOcagi

▫️آلنین وطنیم‌دیر،
دینله منی!
و بیر آلاق اوتو کیمی،
بو بارماقلیق‌لار آرخاسیندا بوراخما!

کؤچده اولان بیر گؤیرچین کیمی
قویوب گئتمه منی!

قاراگونلو آی کیمی،
دیلَنچی بیر اولدوز کیمی،
بوداقلار آراسیندا،
اوزونتولریم‌له باش-باشا بوراخما!
منی دوستاق ائت، گونش‌آخیدان اللرینله!

#محمود_درویش
#شعر_اوجاغی
@SheirOcagi