▫️بیلَن، گوجلودور!

#موغان_پارساآباد_شهری
@SheirOcagi

▫️چاغیر منی!

آیری دوشدوم، اوزاق اولدوم،
دوغما یوردوم، چاغیر منی!
یاد ائللرده یازیق اولدوم،
دوغما یوردوم، چاغیر منی!

قویما سندن اوزاقلاشیم،
هاییما چات بو چاغیمدا!
چاغیر گلیم، اوشاقلاشیم،
قۇزۇلاشیم قوجاغیندا!

چاغیر، گلیم گؤروشونه،
آت اوینادیم ساغا-سولا!
یئنه قونوم داغ دؤشونه،
چتن نئیی چالا-چالا.

دوغما یوردوم، سوچومدان کئچ!
دولاشسام دا دره-دره،
تا من جله قورمارام هئچ،
یئم آختاران سرچه‌لره.

تا گؤزومو قیییب-قیییب،
یووالارا داش آتمارام.
تا ساپاندی قۏلازلاییب¹
قیز-گلینی قورخوتمارام.

چاغیر گلیم- چیخسین آدیم،
دلی‌قانلی جاوان اولوم!
بره کسیم، بولاق گودوم،
دلی جئیران قووان اولوم.

یئنه او قیز ناز ائله‌سین،
منی گؤرجک دؤنسون یانا!
هؤرویونو کؤکه‌لسین،
سانجاقلاسین آغ بوینونا!

یئنه ایشه گئده-گئده،
«سه‌گاه» دئییم آرابادا.
یئنه آخیر چرشنبه‌ده،
مکتوب آتیم بوش توربادا.

یئنه گزیم چاتیم-چاتیم،
بالدیرغانلی دره‌لری.
قوووشلارا قوووم قاتیم،
دَیمه-دوشر دله‌لری.

دوغما یوردوم، اۇلۇ بینه‌م،
اؤزون چاغیر، آپار منی!
سن ایتیرسن، آی بیردنه‌م،
کیم آختاریب تاپار منی؟!

دئمه اوغلون کوسوب گئدیب،
داریخمیشام بو تکلیکده.
اللریمی بالینج ائدیب
بیر یاتایدیم چیچک‌لیکده.

بیر یاییلیب یاستی‌لارا،²
دئیه‌یدیم کی: اوخای-اوخای!
بیر جومایدیم صاف سولارا،
قولوم اوسته اوغلوم «اوقتای».

چاغیر گلیم، دوغما یوردوم!
من کی سنی آرخا سایدیم.
بیر دیلک‌له دؤزوب-دوردوم:
کاش قوینوندا اۇیۇیایدیم!

#آغا_لاچینلی
¹- قولونون گوجو چاتدیغی قدر اوزاغا توللاماق
²- سطحی دۆز اولان یئرلر
#شعر_اوجاغی
@SheirOcagi

🔹تحکییه ادبی درنه‌یی(460-جی جلسه)
🔹اوخوناجاق اثر:
🔹دونیانین داغیلدیغی گون- روللان سئیسئنبایئو
🔹قیرغیز ادبییاتی
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 8 خرداد ماه 1403
🔹ساعت:17-19:30
@tahkie
Butajournal.com
#ادبییات #آذربایجان_تورکجه_سی #داستان #مودئرن_نثر #تحکییه #اورمو #روللان_سئیسئنبایئو #قیرغیز_نثری #حئکایه

▫️ائی سئودیگیم قادین!
ائی، هر داشین اوزرینه آیاق باسدیغیندا شعر بولاقلارینی جوشدوران قادین!
ائی، سولغونلوغوندا آغاجلارین بوتون اوزونتوسونو چیینینه چکن قادین!
سنینله بیرلیکده نه گؤزل‌دیر سورگونلوک!
ائی منیم تاریخیمی، یاغیشین تاریخینی خولاصه ائدن قادین!...

#نزار_قبانی
#شعر_اوجاغی
@SheirOcagi

▫️دونن اوتوبوسدا بیری عطیر وورموشدو.
بعضاً، مندن اؤنجه صندلده اوتوران شخصین اییینی، حیسّ ائدیرم.
بیز بیله‌رک یا دا فرقینده اولمادان اؤزوموزدن بیر پارچالاریمیزی گئتدیگیمیز یئرده بوراخیریق.

📚 آیریلیق خیالی
#سایمون_ون‌بوی
#شعر_اوجاغی
@SheirOcagi

▫️عشقین بیر یاغیش‌دیر...
سوسوزلوغومدا،
اونا سیغیندیغیمدا،
کسیلیر بیردن.

عشقین بیر یاغیش‌دیر.‌‌..
ائوده اولدوغومدا،
سوسوز اولمادیغیمدا،
یاغماغا باشلاییر بیردن.

#شیرکو_بیکس
#شعر_اوجاغی
@SheirOcagi

▫️مارش

میلّتیمین تاریخینه،
شن-شؤهرت اکمه‌لی‌یم!
بو قارشیدا یاد قالایا،
بیر آل بایراق دیکمه‌لی‌یم!

دوشمن‌لره گؤستردیم کی،
منیم کیمی عسگری یوخ!
منیم قیلینج وورمادیغیم،
دونیانین هئچ بیر یئری یوخ!

ایسمارلادیم نیشانلیما:
من «توران»ا گئدییوروم.
قارداشیمی قورتارماغا،
«تورکوستان»ا گئدییوروم.

بایراغیما خائین باخان،
خائین گؤزه من تیکانام.
وورولورسام کؤلگه‌سینده،
حالال اولسون اونا قانیم!

شهید اولسام، دوست ائلینده
منه مزار قازیلسین دا!
قازاندیغیم یئرین آدی،
خاقان'یما یازیلسین دا!

#احمد_جاواد
#شعر_اوجاغی
@SheirOcagi

▫️گؤزلرین
ایکی اوزونتو آرخی‌دیر،
ایکی موسیقی آرخی.
اوزاقلارا آپاریر منی،
زامانلارین اؤته‌سینه.

#نزار_قبانی
#شعر_اوجاغی
@SheirOcagi

▫️نهایت، واختسیز حیاتینی دییشن گنج شاعیریمیزین #دیشلریم_تلگراف_وورور شعیر توپلوسو ایشیق اوزو گؤردو.

شاعیر: #اسماعیل_پیل‌پایه
تایپ و رئداکت: #علی_چاغلا
چاپ نوبتی: بیرینجی
تیراژ: ۱۰۰۰ جیلد
جیلد طراحلیغی: #آتابای_تیکان‌تپه‌لی
حاضیرلایان: #محمد_پاشاپور
ناشر: #آیدین_ساو تبریز
چاپ و صحافی: #چاپ_شهر_پارس‌آباد(حسن‌خانی)
قیمت: ۱۰۰٫۰۰۰ تومان
(ساتیش مرکزلری تئزلیکجه پایلاشیلاجاق)

#شعر_اوجاغی بو گؤزل اولایی ادبیاتیمیزا تبریک دئییر.
@SheirOcagi

▫️شهرین آداملاری آزادلیغا تابوت، عشقه سینیر دوزَلتدیلر. اونلار بیلمیردی نه آزادلیق تابوتدا یئرلشر، نه ده عشق سینیر تانییار.

#ارنستو_چگوارا
#شعر_اوجاغی
@SheirOcagi

اوشاق شعری

▫️قوق‌-قولو‌-قو

«قوق-قولو-قو!» خوروز اؤتر،
بیزه دئیر «یوخو یئتر!
تنبل‌لری سئومم اصلا،
هایدی گئدین ایش باشینا!
قالخین آرتیق، یئتر یوخو!
ایشچی قیر'ا¹ یوللانمالی،
چاپا²، ساپان³ قوللانمالی!
اکمک لازیم بوغدا، آرپا،
دونیا گؤزلر سندن غیدا.
قوق-قولو-قو، قوق-قولو-قو،
صاباح اولدو، یئتر یوخو»

ظریف اوشاق، خوروز دینله!
نه خوش اؤتر، نه شن اؤتر!
«باشلا -دئییر- درسلرینه
تنبل اولما، یوخو یئتر!»

قوق‌-قولو-قو، قوق-قولو-قو،
گون یوخوسو فنا یوخو.

#احمد_جاواد
¹- دوزن، چؤل
²- تیرَشته، آلاق‌کئش
³- کوتان، خؽش
#شعر_اوجاغی
@SheirOcagi

▫️بیلسه‌نیز اینسانلار اؤز سیرادان بیر باش‌آغریلارینا، سنین-منیم اؤلوم خبریمیزدن مینلرجه دفعه‌دن داها آرتیق اؤنم وئریرلر، داها سیزین حاقّینیزدا نه دوشونورلر دئیه قایغیلانمایاجاقسینیز.

#دیل_کارنگی
#شعر_اوجاغی
@SheirOcagi

دیالوق

▫️- بعضاً قورخولاریندان کئچمه‌لیسن، قورخونون اؤته‌سینده‌کی گؤزللیگی گؤرمک اوچون!

🎬 The Good Dinosaur
2015 آمریکا
#پیتر_سوهن
#شعر_اوجاغی
@SheirOcagi

▫️فریادیما بیلمم نییه بس هئچ کیم اویانمیر،
باتمیش قولاغی یا کی فلک یاخشی دۇیانمیر؟

گئتمیش یوخویا، یوخدو داها بیر اویاق اینسان،
بو عالَمیمیز بیر یوخودو- هئچ کیم اینانمیر.

سسسیز گئجه‌دیر، آی دا کی یاتمیش نه زامان‌دیر،
اولموش ائله ظولمت کی، بیر اولدوز دا دولانمیر.

اؤلموش هامی؛ دفن اولماغینا واخت ساییرلار،
من ده یاری جان، سانکی اجل جانیم آلانمیر.

باتمیش غمه عالم، یئنه یاسلی ائوه اوخشور،
واردیر سببی کیمسه بو عالمده قالانمیر.

بخت اولدوزومو غم یوخوسوندان اویادان یوخ،
بیچاره‌ «کؤنول» بختی کیمی یاتمیش، اویانمیر.

#فاطمه_عبدی_کؤنول
@SheirOcagi

▫️کوسموشم...

شعیر: #حکیم_ابوالقاسیم_نباتی
سَس: #الهام_قریشی (حئیران)
تنظیم و میکس #امیر_برا
تهیه و تدوین: #استودیو_حئیران
@SheirOcagi

▫️منظره

بو قاری، مال ساخلامیر،
یاغدان، کره‌دن قاچیر.
تندیره بئل باغلامیر،
اوددان، کوره‌دن قاچیر.

دؤرد دیواردی، بیر کیلیم،
یوخوسو دیلیم-دیلیم،
قوش‌اپپَیی، جینجیلیم،-
اوتدان، تره‌دن قاچیر.

هانی ارلر، ارن‌لر،
بیر واخت کؤنول وئرن‌لر؟
یوز قاپیدان گیرن‌لر،
بیر پنجره‌دن قاچیر.

عؤمور بیر خیرمان؛ سووور!
لمبه¹-سامان بیر هووور².
قوووان تپه‌دن قووور،
قاچان دره‌دن قاچیر.

صبری سو'دور الَکده،
دونَنی داش بلَکده.
دؤزمه‌ییب لاپ فلک ده،
بو منظره‌دن قاچیر.

#رامیز_قوسارچایلی
¹- کولَش
²- لحظه
#شعر_اوجاغی
@SheirOcagi

▫️شعرین جیلالانمیش، اؤلچولو-بیچیلی سؤزلری، یاخشی یاغلانیب دوزن‌لنمیش دییرمان چارخلاری کیمی بیر-بیرینی حرکته گتیریردی.

📚 بویالی قوش
#جرزی_کوزینسکی
#شعر_اوجاغی
@SheirOcagi

▫️ایندی اینسانلار هر شئیین قیمتینی یاخشی بیلیر، آما اصل دیَرین نه اولدوغونو بیلمیرلر.

📚 دوریان گرایین پورتره‌سی
#اوسکار_وایلد
#شعر_اوجاغی
@SheirOcagi

▫️فارغ ائتدی مهرین اؤزگه مه‌لقالاردن منی،
حِرز ایمیش عشقین سنین؛ ساخلار بلالاردان منی.

کؤنلوم آلدین گؤستریب یوز لطف و منّت جانیما،
ائیله‌دین مستغنی اؤزگه دلربالاردان منی.

وامق و فرهادتک رُسوایا قیلمان نسبتیم،
بیر فقیرم، سانمانیز اول خودنمالاردان منی!

عشوه و ناز ایله رفع ائتدین غم و اندوهومو،
سِحر ایلن بیگانه قیلدین آشنالاردان منی.

قیل تکلّم، زُلفون اندوهونو کؤنلومدن گؤتور،
بیر فسون ایله خلاص ائت اژدهالاردان منی.

غایتِ زهد و ورع، زاهد! وصالِ حور ایسه،
وجهی یوخ منع ائیله‌مک حوری‌لقالاردان منی.

هر جفا قیلسان، «فضولی»تک شکایت قیلمازام،
عشق اطواریندا سانما بی‌وفالاردان منی!

#حکیم_ملامحمد_فضولی
#شعر_اوجاغی
@SheirOcagi

▫️و زامان فیسیلدادی:
سنین یارالارینی من بئله سارا بیلمه‌رم.

📚 تهلوکه‌لی اویونلار
#اوغوز_آتای
#شعر_اوجاغی
@SheirOcagi