▫️دردین دیزینین دیبینده،
اوتوروب فیکره دالمیشام.
ائله بیل یوز ایلدی بوردا،
دوشوب بوکولوب قالمیشام.

الیم نه آللاها چاتیر،
نه ده سسیم بنده‌سینه.
من اؤزومو سون گوجوم‌له،
بند ائتمیشم، بند، سسینه.

دردین دیزینین دیبینده-
یاشاماق ایسته‌ییم هئچدی.
بیر شاعیر الی جیبینده،
بیر آز اوّل بوردان کئچدی.

#ابوالفتح_مدداوغلو
#شعر_اوجاغی
@SheirOcagi

▫️...سئوَن البته اؤزون سئومه‌لی‌دیر ایلک اؤنجه،
یاد دیلینده دانیشان سئومیر اؤزون هئچ- منجه.

سن کی تۆرک اوْغلوسان اوّلجه دانیش اؤز دیلینی،
اؤنجه سئو اؤز آتانی، اؤز آنانی، اؤز ائلینی!

یادلارین «کؤهنه چیراغینداکی یاغ»سان، آ داداش!
نه اوْلار، اؤز ائلینه بیر پارا یاغسان، آ داداش؟!

#یاسر_فاتحی 
@SheirOcagi

▫️آدام اول، آی آدام!

اوره‌ییم اولوبدور داریسقال مزار،
سیخیلیر، قاچماغا یول تاپانماییر.
سانکی بیر قارتالی قفسله‌ییبلر،
چالیشیر اوچماغا، یول تاپانماییر.

فصیل‌لر ایتیبدیر منیم ایچیمده،
یازیما تؤکولور پاییز یاپراغی.
گونلریم جومعه‌نین داریخان چاغی،
سپیلیر اوستومه اؤلوم توپراغی.

نه قدر داریخار بیر یازیق اینسان؟!
نه قدر سیخیلار بیر اوووج اورک؟!
باشا چاتمایاجاق بو آغلاتی‌لار،*
«دینجلیکده یاشاماق»- ال‌چاتماز دیلک.

باخیشلار قئیقاجی، سؤزلر تیکانلی،
نه‌یه دَییشمیشدیر اینسان خوش گونو؟
یازین بیر گونونون دادین دادمامیش،
باشینا جالانیر قارا قیش گونو.

داریخیر سؤزلریم، سیخیلیر جانیم،
بیر بوغاز ایپ‌ ایله دارتیشان کیمی.
اؤزگه، اؤزگه‌ ایله ساواشار، بللی،
اؤزوم، اؤزوم ایله ساواشان کیمی.

ایتمیشم ایچیمین کوچه‌لرینده،
دیوارلار قویورلار باش-باشا منله.
بئینیمده بیر دلی باغیریب دئییر:
آدام اول، آی آدام، گل یاشا منله!

#میرحسین_دلداربناب
* تراژئدی
#شعر_اوجاغی
@SheirOcagi

▫️اؤلوم، حیاتین ان بؤیوک زیانی دئییل.
حیاتین ان بؤیوک زیانی، سیز هله دیری‌یکن ایچینیزده اؤلن شئیلردیر.

#نورمن_کوزینز
#شعر_اوجاغی
@SheirOcagi

دیالوق

▫️- ییخیلماق یوکسَلیشیمیزه سبب اولا بیلر، آما ییخیلدیغیمیز یئرده قالماق اؤلوموموزه یول آچار.

🎬 Gladiator
2000 آمریکا
#ریدلی_اسکات
#شعر_اوجاغی
@SheirOcagi

▫️وطن دادی

بیر آیریلیق چئشمه‌سی‌دیر،
گؤزومده‌کی سو، غوربتده.
عجب وطن دادی وئریر،
گؤردویوم یوخو غوربتده.

دالغالاری سایا-سایا،
عکسیم دوشدو آخان چایا.
یوز بئله عؤمور یاشایا،
اوخوماز کی قو، غوربتده.

ساچلاریمدا دن سئچمیشم،
بیر روحسوز بدن سئچمیشم.
گل! سنه وطن سئچمیشم-
اوره‌ییمی بو غوربتده.

#علیرضا_حسرت
#شعر_اوجاغی
@SheirOcagi

دیالوق

▫️- ثروت بیر سیلاح‌دیر و سیاست اویغون زاماندا ماشانی چکمک.

🎬 The Godfather ااا
1990 آمریکا
#فرانسیس_فورد_کوپولا
#شعر_اوجاغی
@SheirOcagi

▫️دویورسان‌می؟ اوره‌ییم-
قفسده قوش کیمی‌دی.
سونونجو نفس ایله-
یئره دوشموش کیمی‌دی.

دویورسان‌می؟ گؤزلریم-
اؤله‌زیییر، کیچیلیر.
نورلا دولو پیاله،
سس-سمیرسیز ایچیلیر.

دویورسان‌می؟ اللریم-
بارماق-بارماق قورویور.
وارلیغیم اوزو سنه،
تک قورد کیمی اولویور.

دویورسان‌می؟ بیر سئوگی،
پاییزینا ییخیلیر.
دینله‌مه منی! قلبین-
دویورام کی، سیخیلیر.

#ابوالفتح_مدداوغلو
#شعر_اوجاغی
@SheirOcagi

▫️اوچماق اؤیرنمک ایسته‌سن، اؤنجه آیاق اوسته دورماق، یئریمک، قاچماق، یوخاری قالخماق و رقص ائتمه‌یی اؤیرنمه‌لی‌سن.
اوچماغی اوچماق‌لا باشلامازلار.

📚 زردوشت بئله دئدی
#فردریش_نیچه
#شعر_اوجاغی
@SheirOcagi

▫️دئدیلر: اوره‌یین درمانی نه‌دیر؟
دئدی: اینسانلاردان اوزاقلاشماق.

#عطار_نیشابوری
#شعر_اوجاغی
@SheirOcagi

▫️آنام نئجه دینیر، نئجه دانیشیر،
شعریمی آنامین دیلینده یازدیم.
منی دیل‌لندیرن، منی دیندیرن،
سئوگیمین، صونامین دیلینده یازدیم.
ساغلام عقیده‌نین، صاف طبیعتین،
آللاها اینامین دیلینده یازدیم.
حالال کیشیلردن حالال سؤز آلدیم،
حالال بیر ایلهامین دیلینده یازدیم.

#زلیمخان_یعقوب
#شعر_اوجاغی
@SheirOcagi

▫️هانی ای ظالم، بیزیمله‌ عهد و پیمان ائتدیگین؟!

غیر ایله هر دم نه‌دیر سیرِ گلستان ائتدیگین؟
بزم ائدیب خلوت قیلیب یوز لطف و احسان ائتدیگین؟
عهد بنیادین مروّت‌دیرمی ویران ائتدیگین؟
هانی ای ظالم، بیزیمله عهد و پیمان ائتدیگین؟!

لحظه-لحظه مدّعی پندین دُرِ گوش ائیله‌دین،
قانا-قانا غیر جامِ شوقونو نوش ائیله‌دین.
وارا-وارا عهد و پیمانی فراموش ائیله‌دین،
هانی ای ظالم، بیزیمله عهد و پیمان ائتدیگین؟!

غیره سالیب مهرینی، بیزدن سویوتدون عاقبت،
ترکِ مهر ائتدین، طریقِ ظلم توتدون عاقبت،
عهدلر، پیمان‌لار ائتمیشدین، اونوتدون عاقبت.
هانی ای ظالم، بیزیمله عهد و پیمان ائتدیگین؟!

جورموموز نولدو کی بیزدن ائیله‌دین بیزارلیق؟
بیز غمین چکدیک، سن ائتدین اؤزگه‌یه غمخوارلیق.
سیزده عادت بومودور، بؤیله اولورمو یارلیق؟
هانی ای ظالم، بیزیمله عهد و پیمان ائتدیگین؟!

چرخ تک بدمهرلیک رسمینی بنیاد ائیله‌دین،
یاخشی آدین وار ایکن دؤندون یامان آد ائیله‌دین،
دؤنه-دؤنه بیزی غمناک، اؤزگه‌نی شاد ائیله‌دین.
هانی ای ظالم، بیزیمله عهد و پیمان ائتدیگین؟!

کؤنلوموز مِن‌بعد زولفونچون پریشان اولماسین،
باغریمیز لعلین هواسی‌یله داهی قان اولماسین،
بی‌وفاسان، چشمیمیز یادین‌له گریان اولماسین!
هانی ای ظالم، بیزیمله عهد و پیمان ائتدیگین؟!

وعده‌ی وصل ایله آلدین صبریمیز، آرامیمیز،
اولمادی بیر گون وصالیندان میسّر کامیمیز،
کئچدی هجر ایله «فضولی»دن بتَر ایّامیمیز.
هانی ای ظالم، بیزیمله عهد و پیمان ائتدیگین؟!

#حکیم_ملامحمد_فضولی
#شعر_اوجاغی
@SheirOcagi

▫️منیم شعریم

قلبیمده پؤهره‌لنیب
هر گون بوی آتان دا سن،
گئجه شیرین یوخودان
منی اویادان دا سن.

اوره‌ییمین غضبی،
سئوینجی، غمی شعریم،
بوتون یارالاریمین،
بیرجه ملهمی شعریم!

آلدیغیم نفس کیمی،
منیمله‌سن همیشه.
بیرگه گئدیب گلیریک،
بیز هم ائوه، هم ایشه.

من سنی گزدیره‌رم،
قلبیمده غورور ایله.
من سنین اوجباتیندان،*
بعضاً اوز-گؤز اولورام،
نئچه رئداکتور ایله.

ایلهام نامردلیک ائدیب
اوز دؤنده‌رنده مندن،
من آیریلا بیلمیرم،
یئنه اینان کی سندن!

افتخاریم، الهامیم،
وارلیغیم، حیاتیمسان.
یالنیز ائویم دئییلسن،
بوتون کائیناتیمسان.

گؤزومده ایلدیریمسان،
اوره‌ییمده گور دنیز.
بلکه آتادان عزیز،
بلکه آنادان عزیز،
ائله سنسن حیاتدا،
سنسن ائله حیات دا.

منه آتا دئسه‌لر،
بیل کی سنسن اؤولادیم.
من سنین اوجباتیندان،
یاخشی اؤولاد اولمادیم‌.

سن منیم یانار، اودلو،
دلی-دولو شعریمسن.
کؤکسومون قفسینده،
پلَنگیمسن، شیریمسن.

نه‌دیر منیم ایسته‌ییم؟
مین آداملیق بیر سالون.
بیر استکان تمیز سو،
بیر خطابت کورسوسو.
اوره‌ییمین گور سسی،
دالغا-دالغا یاییلسین،
یئر ده، گؤی ده آییلسین!

کورسولره سیغمایان،
جسور شعریم، ار شعریم!
تپه‌دن دیرناغاجان،
سیلاحلی عسگر شعریم!

سنین سؤز راکئتین‌له،
مین دوشمن بایراغینی،
تورپاغا سالدیرارام.
سنین قودرتین‌له من،
«قالخ!» دئسم، بیر دونیانی-
آیاغا قالدیرارام.

حیاتیمی وئره‌رم،
بیرجه سنین یولوندا.
سنین اؤزونو ایسه،
بو وطنین یولوندا.

اوره‌ییمین آیناسی،
قلبیمین آمالیسان.
من اؤلندن سونرا دا،
منی یاشاتمالیسان!

منیم شعریم ووصالی،
استقلالی آلقیشلار.
شعریمین داوامی‌دیر،
سالونداکی آلقیشلار.

#خلیل_رضا_اولوتورک
* اوزوندن
#شعر_اوجاغی
@SheirOcagi

▫️عشقه،
سئومه‌یه،
یئنیلمه‌یه،
موساعیدم.
گلمه!

#قهرمان_تازه‌اوغلو
#شعر_اوجاغی
@SheirOcagi

دیالوق

▫️- ایشلری گؤرمک اوچون، اوچ یؤندَم وار:
دوغرو یؤندم، یانلیش یؤندم،
منیم یؤندَمیم.

🎬 Casino
1995 آمریکا
#مارتین_اسکورسیزی
#شعر_اوجاغی
@SheirOcagi

▫️سیزین اومیدلرینیزی دوغرولتمایان، هئچ بونا جهد ده ائتمه‌ین کیشی‌یه واختینیزی و انرژینیزی ایتیرمک عوضینه، گئتمه‌سینه ایمکان وئرین!

📚 قادین کیمی داوران، کیشی کیمی دوشون!
#استیو_هاروئی
#شعر_اوجاغی
@SheirOcagi

▫️من «گونش» دئمیشم سئوَن قادینا.

ساچیمین قیرووو توتار گؤزونو،
سنی گؤزله‌دیگیم یئره گلرسن.
دوشوب آرخاسینجا خاطیره‌لرین،
اؤزونه درد وئره-وئره گلرسن.

من «گونش» دئمیشم سئوَن قادینا،
یئر ده ساخلامادین دوشَم یادینا.
بیر سئوگی زوّاری یئتر دادینا،
نازلانا-نازلانا پیره گلرسن.

چکیبدیر چارمیخا نظر کؤنلومو،
بیر غریب آهی‌یلا بزَر کؤنلومو.
دینله‌مک ایسته‌سن «خزر» کؤنلومو،
«آراز»ا اوز توتوب «کور»ه گلرسن.

#علیرضا_حسرت
#شعر_اوجاغی
@SheirOcagi

▫️سن ایمکانین اولاندا،
یا دا کی ائله-بئله،
قوی تئلفونوم سکسنسین،*
هردن منه زنگ ائله!

ایسته‌ییرسن دانیشما،
تکی هنیرین گلسین!
منه ریشخند ائدن‌لر،
بیر-بیریندن شک‌لنسین.

من‌سه سیخیب کؤکسومه،
او تئلفونا «جان!» دئییم.
«سنینله بیرلیکده‌یم-
هر زامان، هر آن» دئییم.

بلکه ده چوخ گولونج‌دو،
آرزوم دا، امَلیم ده.
اینان، وارلیغین دورور،
سئوگیمین تمَلینده!

#ابوالفتح_مدداوغلو
* دیکسینمک (Səksənmek)
#شعر_اوجاغی
@SheirOcagi

▫️قورخون هاردادیرسا، گؤرَوین ده اوردادیر.
یوکسَلمک اوچون ان بؤیوک فورصتین، ان چوخ قورخو و آغری حیسّ ائتدیگین یئرده‌ گیزلی‌دیر.
دوشمکدن‌ قورخورسان‌سا، تک قورتولوش یولون، کؤنوللو اولاراق آتلانماق‌دیر.

#کارل_گوستاو_یونگ
#شعر_اوجاغی
@SheirOcagi

▫️دؤرد چرشنبه

ایکینجی چرشنبه

بولاقلارین گؤزو آچیق،
اورمانلارین اوزو آچیق،
دورنالاردیر اوچوب گلن،
قاققیلداشا-قاققیلداشا.
چایلار آخیر دریالارا،
شاققیلداشا-شاققیلداشا.

دومان قالخیر گؤیه دوغرو،
مئشه‌لرین نظریندن.
بوزلار دوشور پارچا-پارچا،
شوشه‌لرین اوزَریندن.

پوچورلاییر یاواش-یاواش،
آغاجلارین بوداقلاری.
مئهدن اسیر حزین-حزین،
گول-چیچه‌یین یارپاقلاری.

دره‌ده سئل قیژیلداییر،
شن آریلار ویزیلداییر.
هر یاندان خوش آواز گلیر،
سولار دئییر: یاز... یاز گلیر.

#احمد_جاواد
#شعر_اوجاغی
@SheirOcagi

▫️آختارمادیغین یئرلرده اولماغی سئچیرم، نه‌دن‌سه.
قارشیلاشما احتمالیمیزین اولمادیغی، اولا بیلمه‌یه‌جه‌یی یئرلرده.
ایلک ایشیقدان ساغا دؤنورم هپ؛
سندن دئییل،
سنینله قارشیلاشماقدان قورخورام.
شکیل دَییشدیرمیشیک بیز؛
من گئدرکن، سن گلیرکن،
دَییشن، بیلمه‌دیگیم نه وارسا،
قارشیلاشدیغیمیزدا بیر شیلله کیمی ائنه‌جک اوزوموزه سانیرام.
او اوزدن قاچیرام قارشیلاشمالاردان.
قورخماق دئییل بو،
قورخودان قورخماق‌دیر منیمکیسی.
و آنلادیم کی آیریلیغا دئییل،
آیری قالماغا یئنیلیر اینسان...
منی سوسارکن بؤلمه!

#قهرمان_تازه‌اوغلو
#شعر_اوجاغی
@SheirOcagi