▫️ان بؤیوک قورخو، اینسانین اؤزونو الدن وئرمه تهلوکه‌سی‌دیر؛ او قدر سسسیز اوز وئریر، سانکی هئچ بیر شئی اولماییبدیر.

📚 ایلک آددیم
#سورن_کی‌یرکه‌گور
#شعر_اوجاغی
@SheirOcagi

▫️زامان بیزیم یئتکین‌لشمه‌ییمیزی گؤزله‌سه‌یدی، یقین داها آز قوصورلاری اولان بیر حیات یاشایاردیق...
بیلمیرم، «افسوس» کلمه‌سی اولمادان، حیات نه بیچیمده اولاردی. داها دادلی اولاردی، یوخسا داها داریخدیریجی؟


📚 های-هارایلی یالنیزلیق
#بهومیل_هرابال
#شعر_اوجاغی
@SheirOcagi

▫️کومسومول پوئماسی27

هومای یئنه دوشونور.

هومای بوخارینین قاباغیندا تک،
دیکیلمیش گؤزلری اوجاغا ساری.
داغلارین آیازلی، قورو روزگاری،
واختسیز قوناق کیمی بیردن اسه‌رک،
دؤیوردو قاپینی،
هومای غملی‌دیر.
یورغون نظرلری آزجا نملی‌دیر:
- «ناحاق قیز یاراندیم من بو دونیادا.
دیکیب گؤزلریمی بو تمیز آدا،
نه مجلیس گؤرورم، نه توی، نه ده یاس.
آیاقلار آلتینا دوشن بیر پالاز.»

«نه دئییم؟ حاقلیسان بلکه ده، جلال!
الیندن گلیرسه، ائلچی گؤندر، آل!»
سؤزلری، هومایین یادینا دوشور،
سینیب قول-قانادی یانینا دوشور:
-«گؤر نه‌لر دئمیشم، گؤزلردن ایراق!
بیر منیم عاغلیمین کم‌لیگینه باخ!
نه قدر اولسا دا، او، یاد اوغلودور،
نه‌دن بیلیرم کی فیکری دوغرودور؟
بلکه ده آلدادیر جلال کؤنلومو،
منیم ده دونیادان نصیبیم بومو؟
آه، اونو گؤردوکجه آت بئلینده من،
آغاجدا یارپاق تک اسیرم بعضاً.
سؤزونو‌ قایتارسام، زورلا آپارار،
یالان چیخماغیمین قورخوسو دا وار.
بابام دا بیر یاندان بئلیمی قیرار،
چکیلیب داغلارا جوشوب هایقیرار.
اونون چؤره‌یی‌یله بوی-باشا چاتماق،
سونرا یاد اوغلونا قوشولوب قاچماق،
ایلانا دؤندرر یئنه بابامی،
اونون خصیَتینه شاهیددیر هامی.
فقط نئیله‌ییم‌ کی سئودیم جلالی.
نه شؤهرت، نه منصب، نه دونیا مالی،
گؤرونمز گؤزومه»

هومای دریندن،
بیر نفس آلاراق، فیکیرلریندن
باشینی قورتارماق ایسته‌ییر بیر آز.

شاعیریم، ایندی ده طبیعتی یاز!
بایاق پنجره‌ده سس‌لنن کولک،
خسته اوشاق کیمی هئی اؤسکوره‌رک،
نفسدن کسیلدی، لال اولدو آرتیق،
اولدوزلار سایریشیر، بولودلار آچیق.
گؤیلرین آیناسی لکه‌سیز دورور،
خیلقتین ان درین معناسی بودور.
هومای پنجره‌دن باخیر دیشاری،
آغاریر سود کیمی داغلارین قاری...

#صمد_وورغون
#شعر_اوجاغی
@SheirOcagi
داوامی وار.

▫️نه خسته گؤزلر صاباحی،
نه تزه اؤلونو مزار،
نه ده شئیطان بیر گوناهی،
سنی گؤزله‌دیگیم قدر.

کئچدی، ایسته‌مم گلمه‌نی،
یوخلوغوندا تاپدیم سنی.
بوراخ وهمیمده کؤلگه‌نی!
گلمه! آرتیق نه‌یه‌ یارار؟

#نجیب_فاضیل_قیساکورک
#شعر_اوجاغی
@SheirOcagi

دیالوق

▫️- سیلاح قاچاغینین ایلک و ان اؤنملی قانونو بودور:
اؤز ساتدیغین سیلاح‌لا اؤلمه!

🎬 Lord of War
2005 آمریکا
#اندرو_نیکول
#شعر_اوجاغی
@SheirOcagi

▫️بو داغدان كئچه بیلمزسن،
گولونو دره بیلمزسن.
زهَرم، ایچه بیلمزسن،
سنین شرابین دئییلم.

گل اویناما بو اویونو!
آچا بیلمزسن دویونو.
گئت، آختار، تاپ اؤز تایینی!
من سنین تایین دئییلم.

اؤتَری حیسلره یادام،
كؤنول‌لر یاندیران اودام.
سئوگی آدلی بیر كیتابام،
سنین كیتابین دئییلم.

یانیب اودلارا قالانما،
بو عشقی اَیلنجه سانما،
پروانه‌تک چوخ دولانما!
سنین چیراغین دئییلم.

#نوصرت_كسمنلی
#شعر_اوجاغی
@SheirOcagi

▫️اوره‌ییم سانکی بیر چیچک باغچاسی‌یمیش دا، هر کئچن گون او چیچکلردن بیرینی اؤز اللریمله قوپاردیرمیشام‌ کیمی حیسّ ائدیرم.

📚 اومید باغچاسی
#دل‌آرا_کسکین
#شعر_اوجاغی
@SheirOcagi

▫️غریب اوجاغینین ایستیسی اولماز.

سرحد تئللری‌دیر کؤک‌له‌دیگیم ساز،
دومان دا داغلاردا گؤرونور آز-آز.
غریب اوجاغینین ایستیسی اولماز،
گرک کول آلتیندا کؤز ساخلایاسان!

دوروشو باشقادیر بیزده داغین دا،
شاماما رسمیسن قونشو تاغیندا.
نه وار اَییلمه‌یه یار قاباغیندا؟
گرک اوره‌یینی دوز ساخلایاسان!

آلیب آغوشونا یئنه سو، آرخی.
یاندیریر آیریلیق قورخوسو، آرخی.
هایاندان باغریما باسیم بو آرخی-
اوستومده یالاندان گؤز ساخلایاسان؟

#علیرضا_حسرت
#شعر_اوجاغی
@SheirOcagi

▫️آزادلیق اولمایان یئرده، رأی وئرمک بیر شئیی دَییشدیرسه‌یدی، سیزین رأی وئرمه‌نیزه ایذن وئرمزدیلر.

#مارک_تواین
#شعر_اوجاغی
@SheirOcagi

▫️بلی، اینسان خیاللاردا ایسته‌دیگینی ائده بیلردی، ائله اینسانین گئرچک اوزو ده صیرف بو خیاللاردا بللی اولوردو.

📚 کورلاشما
#الیاس_کانتی
#شعر_اوجاغی
@SheirOcagi

▫️دؤرد چرشنبه

بیرینجی چرشنبه

آچیلدی هاوا،
قورتاردی داعوا.
گئتدی قیش،
گلدی یاز.
دوغدو گونش،
بیتدی آیاز.
چؤله چیخدی،
قویون-قوزو.
گولدو یئنه،
گؤیون اوزو.
گولدو یئنه،
یئرین اوزو.
دوزلر یئنه چیچک آچدی،
گونش قوودو، سویوق قاچدی.
سویوق قارلا ایستی گونش،
یازدا قیشین داعواسی‌دیر.
گؤرن دئییر:
اوزه‌ دیَن مئیخوش مئه ده،
گؤزل یازین هاواسی‌دیر.

#احمد_جاواد
#شعر_اوجاغی
@SheirOcagi

▫️کومسومول پوئماسی28

ایلک گؤروش

«بختیار، منی ده کومسومولا یاز!»-
دئییب سوکوت ائدیر آلاگؤز «گولزار».
قیزی دینله‌دیکجه بیزیم بختیار،
تیتره‌ییر قلبینده صدفلی بیر ساز.

باشینی کؤکسونه دایامیش گولزار،
معنالی گؤزلری گؤل کیمی لال‌دیر.
او معصوم باخیشلار بلکه خیال‌دیر،
گؤزله گؤرونمه‌ین بیر عالمی وار.

قهرمان بختیار نه‌دن‌سه دونموش،
عشقین شربتینی دادمیشدی او دا.
توتولموش وارلیغی یانار بیر اودا،
قلبینین باشیندا چیرپینیر بیر قوش.

محبّت بؤیوک‌دور ازَلدن بری،
حیات عاشیقی‌دیر عشقی بیلن‌لر.
آنار حسرت ایله کئچن گونلری،
سئویب یاشایان‌لار، سئویب اؤلن‌لر.
«محبّت» دئدیگین طبیعتده‌دیر،
طبیعت اؤزو ده محبّتده‌دیر.

ائی کؤنول بئشیگی، بؤیوک محبّت!
سنین ده قدرینی بیلمه‌ین‌لر وار.
وارلیغا داش کیمی، کسَک کیمی سرت.
بیر اینسان عشقی‌یله گولمه‌ینلر وار‌.

نه چوخدور گؤردویوم قوجا دونیادا،
سؤز وئریب سؤز آلیب سؤز اونودانلار!
گؤره‌سن ویجدانی سالیرمی یادا-
عشقین معناسینی اوجوز توتانلار؟

وارمی سئومه‌یه‌نین بیر استقبالی؟!
حیات دا سرسَمین اوستونه گولر.
گون کئچر، آغارار ساچی-ساققالی،
چؤلده قورد-قوش کیمی یوواسیز اؤلر.

بؤیوک یارانمیشدیر ازلدن اینسان،
«محبّت» آدلانیر شیرین نعمتی.
عشقین مئیوه‌سی‌دیر هر یئنی داستان،
دویانلار یارادیر شعری، صنعتی..‌.

جانان سیغال ووروب چیخیر اوتاقدان،
نه گؤزل یاراشیر بو گئدیش اونا!
کؤنول، آرخاسینجا اوچور بوداقدان،
یوللار دا فخر ائدیر یاراندیغینا.

گل، گل، ککلیک کیمی قیققیلداشاراق،
دَیسین بیر-بیرینه قایماق دوداقلار!
گئتمه گؤزدن اوزاق، کؤنولدن ایراق،
سنین ده غریبه غمزه‌لرین وار...

یاخشی، اؤزون سؤیله، بوندا نه وارمیش؟!
عؤمورلوک بیر عشقین یولچوسویوق بیز.
موقدّس قوینوندا چیچک آچیر قیش،
آیریلماز بیرله‌شن دوست اللریمیز.
عؤمورلوک بیر عشقین یولچوسویوق بیز.

#صمد_وورغون
#شعر_اوجاغی
@SheirOcagi
داوامی وار.

▫️آهیم عشقه سون تورکودور.

خاطیره‌لر آینا توتوب،
بیزه بو سفردن ائله.
قونشو قیزی! وئر الینی،
کئچک بو چپردن ائله!

عشقه کؤنول وئرن گولور،
باغدا چیچک درن گولور.
اوزومه پنجره‌ن گولور،
چکیلنده پرده‌ن ائله.

دومان-چن داغین کورکودور،
اووچو قوشلاری هورکودور.
آهیم عشقه سون تورکو'دور،
اوخویارام هردن ائله.

#علیرضا_حسرت
#شعر_اوجاغی
@SheirOcagi

▫️تانری، باشینیزین ایچینه اصلا گیرمه‌یه‌جکدیر، اونون کئچدیگی قاپی اوره‌یینیزده‌دیر.

📚 مکتوب
#پائولو_کوئیلو
#شعر_اوجاغی
@SheirOcagi

▫️حیاتیمی سنه نه تهر آنلادیم؟
من چوخ دوشونه‌رم، موسیقی دینله‌رم، چیچک‌لری سئوه‌رم...

#سوزان_سانتاگ
#شعر_اوجاغی
@SheirOcagi

▫️سن اینتحار کیمی‌سن -دئدی-
هم هر کس طرفیندن بیر دفعه دوشونولن،
هم ده جسارت ائدیله‌ بیلمه‌ین.

#جمال_ثریا
#شعر_اوجاغی
@SheirOcagi

دیالوق

▫️- شهری قرنطینه ائدین، کیمسه‌نین چیخماسینا ایذن وئرمه‌یین، تلفون باغلانتیلارینی کسین! خالقین نفعینه‌دیر بیر شئی بیلمه‌سینلر.

📺 Chernobyl
2019 بریتانیا-آمریکا
#جان_رنک
#شعر_اوجاغی
@SheirOcagi

▫️گئجیکمیش اعتراف

بیر آز گئجیکدیم من بو اعترافدا،
آما گئج اولسا دا پیچیلدایاجام.
منه یئر اولمادی هئچ بو اطرافدا،
تورپاغین آلتیندا پوچورلایاجام.

سئوگیم آرتیق اؤلدو، آشدی اؤلچونو،
او دا لچک-لچک سارالدی، قوپدو.
ساخلایا بیلمه‌دیم خیال کؤچونو،
اونون دا روحونا «الوداع» هوپدو.

آتدیغیم آددیم دا، دئدیگیم سؤز ده،
دؤندو گؤز یاشینا، دؤندو طعنه‌یه.
منیم ایچیمده‌کی دؤزوم ده، دؤز ده-
آدیم تک یوک اولدو دیله، چنه‌یه.

گئرچک اولان‌لاری سوسوب دینله‌مک،
نه قدر چتین‌دیر- چکن‌لر بیلیر.
نه‌دیر اؤز ایچینی دیدیب اینله‌مک؟-
بونو دا ایچیندن چؤکن‌لر بیلیر.

بیر آز گئجیکدیم من بو اعترافدا،
باتان گمی کیمی ایزیم یویولور.
دوروب سو آختارما هئچ بو اطرافدا!-
کیپریگیمدن دامیر...اوزوم یویولور.

#ابوالفتح_مدداوغلو
#شعر_اوجاغی
@SheirOcagi

▫️نئجه کی چوروموش تاختالارلا قاییق دوزَلتمک اولماز، چوروموش دوشونجه‌لرله ده مملکت دوزلتمک اولماز.

#کارل_پوپر
#شعر_اوجاغی
@SheirOcagi

▫️گلدی بختور آیریلیق.

گلدی غمین شن گؤزَلی،
گلدی بختوَر آیریلیق.
بو قدر عشقین ایچینده،
اولماز بو قدر آیریلیق.

نه اوجاق، نه پیردی ائله،
ها سایاسان، بیردی ائله.
کیمینه خئییردی ائله،
کیمینه ده شر آیریلیق.

بو دوروشا، بو بویا باخ،
باخسان، آد قویا-قویا باخ!
تویا باخ آللاه، تویا باخ،
گلین عشق‌دیر، ار آیریلیق!

#علیرضا_حسرت
#شعر_اوجاغی
@SheirOcagi

▫️هردن، دینله‌مک، بیر اینسانا یاردیم ائتمه‌نین تک یولودور.

#رومن_گاری
#شعر_اوجاغی
@SheirOcagi