‍ ▫️قار آلتیندا حوزون دنه‌مه‌سی

دونیانین ان اوزون حوزنو یاغیر،
یورغون و یئنیلمیش‌ اینسانلیغیمیزین اوستونه.
قار یاغیر و سن گئدیرسن،
آغلار کیمی، یئرییه‌رک گئدیرسن.
بلکه تاپماغا گئدیرسن ایتیردیگیمیز او اینسان و طبیعت چاغینی.

دؤن منه و دینله!
قوشلار اوچوشور ایچیمده.
لوش بیر کمان چالینماسی کیمی،
قوشلارین اوچوشدوغونو ایچیمده،
دون منه و دینله!

قارانلیق دنیزلرین دیبینده،
بعضی اینجی‌لرین اولدوغونو،
بعضی اینجیلره و خاطیره‌لره
نه‌دن باغلی اولدوغوموزو اونوتما!

ائشیت منی و دینله!
دنیزلر بوغوشور ایچیمده.
«اونوتما!» دئییرم، آما سن آنلا!
آنلات بیزیم ده یاشاماق ایسته‌دیگیمیزی اونلارا!

#اردم_بایزید
#شعر_اوجاغی
@SheirOcagi

▫️ماهنالار یوکسَلیشیمیزین ان بؤیوک تورموز و انگللری‌دیر، اونلارا «زامان اوغروسو» دئییلیر.
ماهنالاری حیاتیمیزدان سیلمه‌یی اؤیره‌نک!

📚 مورکّب اثر
#دارن_هاردی
#شعر_اوجاغی
@SheirOcagi

▫️کومسومول پوئماسی6

هومای

«هومای» دوشوندورور، «هومای» آغلادیر،
او نه «تاتیانا»دیر، نه «اوفئلیا»‌دیر.
حیاتا گلدیگی او گوندن بری،
او کوسکون باخیشلی قارا گؤزلری،
نه‌لر دوشوندورور!...
اونون حیاتی،
سئوگیسی، طالئعی، موقدّراتی،
هر زامان آندیریر ورَملی بیر قیش،
بوتون دیلک‌لری گؤزونده قالمیش.

ایجازه وئرسه‌نیز دانیشارام من،
او، قیز خیالینین اینجه‌لیگیندن:
دالدیغی موسیقی، سازلارین سسی،
یا دا کی قوشلارین وحشی نغمه‌سی...
داغلارین دؤشونده گزینن چوبان،
دردلنیب نئیینی چالدیغی زامان،
یاشاریر هومایین قارا گؤزلری،
حیاتا گلدیگی او گوندن بری.
بیلیرم دردینی، بیلیرم نه‌دیر،
هومای، تک آیاقلی بیر قرینه‌دیر.¹

الینه عؤمرونده کیتاب آلمامیش،
بؤیوک شهَرلرده قوناق قالمامیش،
نه بیر دمیر یولو، نه ده بیر قاتار،
گؤرمه‌میش... گئجه‌لر او قاتار-قاتار
اوزانان دورنالار نه‌لر آندیرار؟
هومایین قلبینی نییه یاندیرار؟
بعضاً قونشولاردا آغلاشما سسی،
کندلی قادینلارین ائدیلَشمه‌سی،²
دیل دئییب آغلایان یاسلی گلینلر،
قانادلی ناله‌لر، آهلار، انین‌لر،³
قیزین خیالینی قالدیریب یئنه،
اوچورور گؤیلرین درینلیگینه...
بعضاً ده گؤیلرده قیزارتی وارسا،
اوفوقده بیر قیزیل شیمشک چاخارسا،
قورخوب طبیعتین حیکمت‌لریندن،
هومای آهو کیمی اورکه‌رک همن،
سوخولور چادیرین کونجونه ساری،
گؤزآلتی سئیر ائدیر تا اوزاقلاری.

دونیانین سیرّینی نه بیلیر هومای؟!
بعضاً ده گؤیلری گزن سولغون آی،
یاریب بولودلاری هوجوما چیخار،
اونون سنگری‌دیر سیخ-سیخ بولودلار.
هومای بو لؤوحه‌دن ماراقلانیر پک،
آیین آرخاسینجا فیکیرلشه‌رک.
نهایت یورولور، کوت‌لشیر باشی،
دونوب کؤلگه‌لنیر مأیوس باخیشی.
بیلیرم دردینی، بیلیرم نه‌دیر،
هومای تک‌آیاقلی بیر قرینه‌دیر.

او هر گون اویانیر قوشلاردان قاباق،
یاخین بیر تپه‌نین اوستدن آشاراق،
ترپه‌نیر ساحیله، بولاق باشینا،
قویوب سهَنگینی ساحیل داشینا،
سئیر ائدیر سس‌لنن اورمانلیقلاری،
پوزور ساچلارینی سحر روزگاری...

#صمد_وورغون
¹- قرینه ۳۳ ایل، دؤرد آی‌دیر. (شاعیر، هومایین ۱۶-۱۷ یاشیندا بیر قیز اولدوغونو دئمک ایسته‌ییر.)
²- بیرلیکده اوخشاما دئمک
³- اینیلتی، زاریلتی
#شعر_اوجاغی
@SheirOcagi
داوامی وار.

▫️سن اولمایاندا،
«سئوینج» آنلامسیز بیر سؤزدور،
«سنی سئویرم» بوغازیمدا دیغلایان بیر سیرّ.

سنسیز نئجه توتولماسین اوره‌ییم؟!
بورادا ساعات، گوزگو، هاوا سنه دوشکون‌دور.

#حسین_منزوی
#شعر_اوجاغی
ترجومه
@SheirOcagi

▫️دنیزه قار یاغیر.

دنیزه قار یاغیر، اوشویور دنیز،
دورموشام بیر ساحیل داشینین اوسته.
بلکه اللریمی چتیر ائیله‌ییم،
ساخلاییم دنیزین باشینین اوسته.

بلکه هئچ قار دئییل یاغان بو قار دا،
بلکه گؤیدن یاغیر آغ-آغ چیچک‌لر.
دنیزه قار یاغیر، دنیر قوشلاری-
بو قاری دن بیلیب دن‌له‌یه‌جکلر.

دنیزه قار یاغیر، اوشویور دنیز،
یالین آیاغینا چکمه ایسته‌ییر.
دوروب پنجره‌دن باخان او قادین،
دنیزی گؤزونه چکمک ایسته‌ییر.

#علیزاده_نوری
#شعر_اوجاغی
@SheirOcagi

▫️بو آریقلیق پهریزدن دئییل.
بو یئکه‌پر آریقلیق، بو کؤک آریقلیق،
داریخماغین «کؤک‌آلتی‌»¹دی،
تکلیگین «کوب»²ودو،
آیریلیغین «کوادرات»³ی‌دی.
کئچمیشین یانیندا الیمیز آشاغی‌دی
گونو-گوندن قیمتی قالخیر خاطیره‌لرین.
یاددان چؤله چیخمیر خاطیره‌لر،
ماما اوشاغی‌دی.
آلزایمر خسته‌سی چیخدی سئودیکلریمیزین چوخو.
هانسی «مؤعتریضه‌»⁴نی آچساق،
اونلار اوردادی.
هانسی «مؤعتریضه‌»نی باغلاسالار،
بیز اوردا یوخوق.
بارماق سایی قدر گولدوک،
حئسابلایا بیلمه‌دیک یاناغیمیزدان آخان نئچه‌نجی گؤز یاشی‌دی.

مین آداملیق اوره‌ییمیز وار ایدی،
بیر سئودالیق یئریمیز،
بیر خیانتلیک جانیمیز وار ایدی.
اؤلدوک...
بیز اؤلمه‌میشدن اوّل،
بیر باخیش بس ایدی سویوغون ایسینمه‌یینه،
قیشین کئچمه‌یینه.
بیر اؤپوش بس ایدی بوتون اورقانلارین بوتون اورقانلارا کؤچمه‌یینه.
هر شئی بسیمیز ایدی.
نه قدر کی سئوگی بیزیم هر شئییمیز ایدی،
نه قدر کی بیز سئوگینین هئچ نه‌یی دئییلدیک،
اینانمیردیق آمئریکان فیلملرینه،
آلدانیردیق هیند کینولارینا.
چونکی ضعیفین غالیب اولاجاغینا امین ایدیک،
چونکی سیچان همیشه پیشیگین باشینا ایتین اویونونو آچیردی،
چونکی «جئری»نین الیندن بئزمیشدی «تام».
اوسته‌لیک ائویمیزین دامی دا اوچمامیشدی باشیمیزا.
قازانچالاری دوزمه‌میشدیک یاغیشین آلتینا،
ایسلانماماق اوچون ائودن قاچمامیشدیق.
کاسیبلیغی هر شئییندن تانیییردیق:
جورابیمیزین ییرتیغیندان،
آیاق‌قابیلاریمیزی دئشیگیندن تانیییردیق.

کیشی کیمی‌یدی آنامیز.
آنامیز اولماسایدی آتاسیز بؤیویردیک.
باجیمیز اولماسایدی، قارداشیمیز اولمازدی.
قونشوموز اولماسایدی، قوهوم نه‌دی‌، بیلمزدیک.
سئوگیلیمیز اولماسایدی هامیدان خوشبخت یاشایاردیق،
بیر خیانتلیک جانیمیز وار ایدی چونکی.

ایندی بو آریقلیق بیر آز دا اوزاقلاشماق‌دی خاطیره‌لردن و سئودیکلریمیزدن،
و بو اوزاقلیق بیر آز دا یاخینلاشماق‌دی
خاطیره‌لره و سئودیکلریمیزه.
چونکی بیز آریقلادیقجا جانیمیز بیر آز دا هوپور ایچیمیزه.
ایندی بو آریقلیق پهریزدن دئییل،
آیریلیغین «کوادرات»ی‌دی بو، تکلیگین «کوب»و...

#ائلوین_باکیراوغلو
¹- جذر
²- اوچ دفعه اؤزونه چیرپیلان عددین حاصیلی- مکعب
³- بیر عددین اؤزونه وورولماسیندان حاصیل اولان عدد- مربّع
⁴- پارانتئز
#شعر_اوجاغی
@SheirOcagi

دیالوق

▫️- پول خوشبختلیک گتیرمز، آما «مرسدس»ده آغلاماق، چارخ‌ اوستونده آغلاماقدان داها قولای‌دیر.

🎬 Legend of the Lost
1957 ایتالیا-آمریکا
#هنری_هاتاوی
#شعر_اوجاغی
@SheirOcagi

▫️دوستونون الینی سیخماق ایسته‌ییرسن، آما سنین ایره‌لی اوزانان الین اختیارسیز حالدا یانینا دوشور، صیفتینده‌کی گولومسه‌مه کئچیر؛ سونرا اطرافیندا هئچ کیم اولمادیغینی، تک اولدوغونو آنلاییرسان.

📚 تاتار چؤلو
# دینو_بوتزاتی
#شعر_اوجاغی
@SheirOcagi

▫️آخشاملار

اؤلکه‌نیزده وارسا سیزین بیر غریب،
باخین گؤزلرینده نه وار آخشاملار!
غریبین حالینی وطندن اسن-
تانرینین یئللری سورار آخشاملار.
‌
قاییق قوجاغیندا، دنیز اوزونده،
دالغانین نغمه‌سی دئییل گؤزونده.
بیر شئیلر سؤیله‌ییر، اونون سؤزونده-
کؤنول بیر اینجه‌لیک دویار آخشاملار.

آچماییر دردینی غریب، بیر کسه،
قولاق وئریب دورور هر یانیق سسه.
وطن موژده‌چیسی روزیگار ایسه،
بعضی گونلر اولور سوسار آخشاملار.

بیر سؤز ایسمارلامیش¹ بلکه یار ائلی،
نه‌دن آنلاشیلماز قوشلارین دیلی؟
سانکی بوغماق ایستر گؤز یاشی سئلی،
غریبین گؤزلری یاشار، آخشاملار.

آخشام اونا کدر، اونا دوشونجه،
توخونمایین، غریب قلبی چوخ اینجه!
یوللارلا سؤیله‌شیر مکتوب گلینجه،
اونونچون یوللارا باخار آخشاملار.

عجب، یوخ‌مو اونون باغچاسی، باغی،
گوللره باخماییر، گول سولو-ساغی.
سن، ائیله گل، اونو سانما بایاغی²،
نئجه دویمادین‌می، جوشار آخشاملار؟

ائی او یانیق قلبین ائلی، وطنی!
وارمی سنده اونون حالین سورانی؟
عجب، ساغ‌می اونلار، وارمی قالانی؟
وارسا سؤیله، قلم یازار آخشاملار!

#احمد_جاواد
¹- تاپشیرماق
²- قابا، لیاقتسیز
#شعر_اوجاغی
@SheirOcagi

▫️کومسومول پوئماسی7

بیر آز دا «هومای»ین آخشاملاریندان:
قارانلیق، دؤشونو گردیگی زامان،
اونون دا روحونا قارانلیق چؤکور،
چیرماییب قولونو، ایته یال تؤکور.
قاپینین آغزیندا پالتار-پالازدان،
نه وارسا ایچری گؤتورور آستا.
جئهیز صاندیغینا بیر قیفیل وورور،
هومایین گونده‌لیک ایشلری بودور.

ال-آیاق ییغیشیر، هامی اَیلشیر،
عاغلینا گلَنی دانیشیر بیر-بیر.
کیشیلر دم وورور پهلوانلیقدان،
گولَشدن، گوللـه‌دن، اؤلومدن، قاندان.
قوجالار قیزیشیر، دانیشیر هردن،
«زال» اوغلو «روستم»ده اولان هونردن.
سونرا «کوراوغلو»دان، بیر ده «قیرآت»دان...
اینسان یورولمادی بو خاطیراتدان...

«موللا نصرالدین»ین مضحکه‌لری،
ائللرین آغزینا دوشندن بری،
اوشاقلار دا اونو سئوه‌رک اوخشار،
دونیانین غریبه ماجراسی وار...

سونرا قادینلار دا نؤوبه‌یله بیر-بیر،
قوهومدان، قونشودان غئیبت ائله‌ییر:
«آی قیز! «گول‌جامال»ین توتاری یوخدور،
بو قوجا واختیندا هئچ عاری یوخدور.
یئنه سیرغالانیر، سیغاللانیر، باخ!
دئین، ار آختاریر بو قوجا سارساق.»
رنگ آلیب رنگ وئریر، گؤزلرین آیدین!
بو ساختا سؤزلری دئین بیر قادین.
اوینادیر قاشینی، سوزور گؤزونو،
گولونج بیر شکیله سالیر اؤزونو.
آلتمیش ایل‌دیر کی صنعتی بودور،
سحر دئدیگینی آخشام اونودور...

هومای خوشلاماییر بو صؤحبت‌لری،
اَیرینی، دوغرونو سئچَندن بری.
سونرا سوفره گلیر، اوتوروب یئردن،
قاتیقدان، قایماقدان، یاغدان، پئندیردن،
نه وارسا یئییلیر، اوستوندن ده چای...
هامیدان آز یئییر، آز ایچیر هومای.
ایشتاهی اولسا دا هئی چکینه‌رک:
«قیز اولان بنده‌لر آز یئسین گرک!»

هومای دوشوندورور، هومای آغلادیر،
او نه «تاتیانا»دیر، نه «اوفئلیا»دیر.
حیاتا گلدیگی او گوندن بری،
او کوسکون باخیشلی قارا گؤزلری،
نه‌لر دوشوندورور!
اونون حیاتی،
سئوگیسی، طالئعی، موقدّراتی،
هر زامان آندیریر ورم‌لی بیر قیش،
بوتون دیلک‌لری گؤزونده قالمیش...
بیلیرم دردینی، بیلیرم نه‌دیر،
هومای تک‌آیاقلی بیر قرینه‌دیر.

#صمد_وورغون
#شعر_اوجاغی
@SheirOcagi
داوامی وار.

🔹تحکییه ادبی درنه‌یی(446-جی جلسه)
🔹اوخوناجاق اثر: داهی- مو یان
🔹چین نثری
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 26 دی ماه 1402
🔹ساعت:17-19:30
@tahkie
Butajournal.com
#ادبییات #آذربایجان_تورکجه_سی #داستان #مودئرن_نثر #تحکییه #اورمو #مو_یان #چین_نثری #حئکایه

▫️عشقی اؤیرنمک یوخسا اوخوماق اولماز، عشق بیر نعمت کیمی گلر.

#مولانا
#شعر_اوجاغی
@SheirOcagi

▫️اصل سئوگی ایسه انتحار کیمی‌دی. سن اؤز «من»ینی اؤلدورمه‌یه و «بیز» اولاراق دیریلمه‌یه راضیلاشیرسان.

📚 آرت و خائوس
#قاراقان
#شعر_اوجاغی
@SheirOcagi

▫️گئتدین، اؤگئی عشقین آناسی اولدون،
ایندی خیاللاردا دوغماسان منه.
من سنی گؤزومده اوجالتمادیم کی،
چیخیب یوخاریدان باخاسان منه.

بلکه ده هئچ سنین گوناهین دئییل،
بلکه ده اودوزدوم عاغیلدا سنه.
من سنی گؤزومده ائله بؤیوتدوم،
گؤزلریم دار گلدی آخیردا سنه.

ایندی ده شکلیندن آیریلیرام من،
بو دا سئوگیدن‌دی، نیفرتدن دئییل.
اوزونو اؤزگه‌سی اؤپن بیر قیزین،
شکلینی اؤپمک ده غئیرتدن دئییل.

#علیزاده_نوری
#شعر_اوجاغی
@SheirOcagi

‍ ▫️اوشاقسان سن.

دونیانین اؤته‌سینه آتیلمیش بیر آددیم ایدین سن،
عؤمروموزسه قارشیلیقسیز سؤال‌لار ایدی،
هپسی بو.
بو سامان‌یولو، هانی اوووجلاریندان تؤکولن قوم دانه‌لری وار یا، اونلاردان بیرینده‌یم.
یئنی بیر یولجولوغا چیخیرام،
قار یاغیر.
بیر عشق، چووغونا توتولور داها ایلک دؤنگه‌ده.

اوشاقسان سن،
سسینده‌کی چووغونا توتولدوغوم.
دؤنوشن و سویا دؤنوشن سؤال‌لار سوروشورسان.
سسین بیر چاغلایان* اولوب دولدورور اوچوروملاریمی.
یاوا بیر ایضاحچی‌یام اویسا من.
و نه زامان بیریسی آدرئس سوروشسا،
اؤنجه سیلاحا ال آتیرام.
ککه‌مه‌یم، ان آز قصبه‌لی عشقلر قدر محجوب.
و اوزگون شهرلر گزیرم آیریلیقلار اوچون.
بیر یانلیشلیغام بو دونیادا، ان آز سنین قدر.
و سن اؤز کوللرینی سووورورسان داغا، داشا،
بیر داها دوغولماماق اوچون.
«دوغولماق -دئییرسن- اؤلوملولرین ایشی،
بیر ده خوشبخت اولانلارین».
اونلارین هپ بیر اؤیکوسو اولار و یاشارلار.
بوراخیب گئده بیلمزلر آلیشدیقلاری نه وارسا.

اوشاقسان سن
«هر آیریلیقدا ایملاسی پوزولان،
سوسان بیر اوشاقدان داها بؤیوک بیر تهدید
نه اولا بیلر؟» سؤالیمین قارشیلیغینی بیلمیر کیمسه.
یاوا بیر ایضاحچی‌یام اویسا من.
و نه زامان بیر قضا اولسا، آدی «عشق» اولور آرتیق.
عشق‌سه دونیانین چوخدان اونوتدوغو بیر مؤعجوزه.
سنی گؤزله‌ییرم اوردا، او بولاشان اوتوپیادا.
کیپریکلریمه دوشورسن، بیر شئه داملاسی اولاراق.
یومورام گؤزلریمی،
گؤزقاپاقلاریمین ایچینده‌سن.
سونسوز بیر یوخویا دالیرام سونرا،
و سن هئچ بؤیومورسن آرتیق.
نه یاخشی کی بؤیومورسن!
آدینلا باشلاییرام هر شعره.
و هر میصراعدا،
اسیرگه‌ینسن، باغیشلایانسان، بیعت ائدیرم.

اوشاقسان سن
و بو دونیا سنه گؤره دئییل.

اوشاقسان سن،
سسینین چاغلایانینا دوشدوم،
بیر چیچه‌یه توتوندوم دوشرکن،
اوردایام هله،
ساللانیب دورماقدایام،
بیر ساعاتین پاندولو نئجه گئدیب گلیر، گئدیب گلیرسه، اؤیله.
زامان منم ایشده،
جانلانیر بوتون آنلار،
دورسام اؤله‌رم، پارام‌پارچا اولار دونیا.

اوشاقسان سن،
سسینین چاغلایانینا دوشدویوم.
«اوچوروم» دئییردین، بیر عشق اوچوروم اؤزلمی‌دیر.
بوراخیرام اؤیله‌یسه اؤزومو سسینین بوشلوغونا.
توتونا بیله‌جه‌ییم بوتون اومیدلری گؤرمه‌ییم اوچون،
گؤزلریمی باغلاییرام، گئجه‌نی دسمال ائده‌رک.
( گؤزلریم بیر یئرلرده داها باغلانمیشدی، بونو اونوتمورام، اونوتمورام، اونوتمورام هئچ).
بیر یئل اسسه، اللرین رئیحان قوخویار،
قارانقوشلار قونار آلنینا آخشام‌اوستلری.
بو اوزدن بیر قاناد سسی‌یم یاماجلاردا،
اوزگون بیر ارغوان آغاجی‌یلا دانیشیرام.
آیریلیغین چتین‌لشدیگی یئرده‌یم،
و دالغینلیغیم بیر سیغینماچی حوزنونه دؤنور آرتیق بو شهرده.

اوشاقسان سن،
آلنینا قارانقوشلار قونان.
بیر بولودون دالینا دوشوب گئتدیگیمیز یئر،
«اوقیانوس» دئیَک ایسترسن، یا دا سن سؤیله!
باتیق بیر گمی‌یم‌ اوردا، سنی گؤزله‌ییرم.
اوپ‌اوزون بیر سسسیزلیگم فیرتینالار پاتلارکن،
گؤوده‌م کؤله تاجیرلرینین باروت یانیقلاری ایچینده.
و گئتدیکجه گؤینه‌دیر یارالاریمی دوزلو سو.

اوشاقسان سن،
بؤیومک یاراشمازدی هئچ.
گولوشونون قوخوسویلا گؤیَردی بو آلما آغاجی.
(نفسینین آلما قوخوماسی بونداندی بلکه).
بیر آلما قوخوسونا توتوندوم دوشرکن،
ساللانیب دورماقدایام،
بیر ساعاتین پاندولو نئجه گئدیب گلیر، گئدیب گلیرسه، اؤیله.

اوشاقسان سن،
اوشاغیمسان.

#احمد_تئللی
* کیچیک شلاله
#شعر_اوجاغی
@SheirOcagi

▫️دنیزچی اولسایدیم،
منه بیر قاییق وئرسه‌یدیلر،
آخشام‌چاغی‌لار یئلکن‌لریم یاناشاردی،
گؤزلرینین ماوی لیمانلارینا.

#نزار_قبانی
#شعر_اوجاغی
@SheirOcagi

▫️سنی اوره‌ییمده تاپدیم، او زاماندان بری اؤز چئوره‌مده دولانیرام.

#مولانا
#شعر_اوجاغی
@SheirOcagi

▫️آدامی یوللار یوخ...

اوزون یوللار گئدیب گاه یورولارسان،
گاه دره-دوز گئدیب، گاه بورولارسان،
اوزولمه! لیل‌لشسن ده، دورولارسان.
آدامی یوللار یوخ، آداملار یورور.

یولونا داش تؤکن دار گؤز آداملار،
اوره‌یی قیش-قیروولو، بوز آداملار،
دَله‌دوز، نانجیب، مین‌اوز آداملار،
آدامی یوللار یوخ، آداملار یورور.

یورولسان، اوتور بیر چشمه باشیندا،
یویوندور اوزونو صاف گؤز یاشیندا،
دینجین آل اَل‌آچیق صحرا داشیندا!
آدامی یوللار یوخ، آداملار یورور.

داش آتار یولونا، آیغین بودره‌سین،
چینقیللی یولاقدا دیزین تیتره‌سین،
اوندان یولداش اولماز، بیله‌سن کَسین!
آدامی یوللار یوخ، آداملار یورور.

بورنونون اوجوندان گؤرمز ساوایی،
"ییخیلسین کیمسه‌نی!"، مسموم دوعاسی.
اؤزونه قاییتسین نیفرین صداسی!
آدامی یوللار یوخ، آداملار یورور.

دئدین کی "صبر ائله!"...دؤزوم نه سایاق؟!
چکیرلر کؤکسومه زهَرلی بیچاق.
اؤز کؤلگه‌م گؤتوروب اوستومه آیاق،
آدامی یوللار یوخ، آداملار یورور.

#سحر_خیاوی
@SheirOcagi

▫️دانیشیر یئر کوره‌سی.

پلاستیک مانکن، «گوجی» مارکالی سئحیرلی خلعته بورونوب،
ویترین اؤنونده ویبراسیون سیستئمینه کئچید آلیب.
سومالینین‌ کیبریت کؤرپه‌سی،
ایری گؤزلری دیزلرینین گؤزلری کیمی سورونور عبا‌ بویونجا؛
ایستک‌لری موز قابیغیندا سوروشوب چیرپیلیر بشریّتین اوزونه:
«اییو کییو‌ بابا، منه مارسدان بیر چارخ، بیر ده اینسانلیق گتیرَرسن»!

دونیانین قفس اولدوغونو، یئر کوره‌سینی هؤرموش مئریدیان¹ و مدارلار داها آیدین گؤستریر.
ایستیوا خطّی ماوی شالواری ساخلایان کمردیر.
یئر کوره‌سی، آستا دؤور ائت، کمر دوشر بئلیندن!
قانلی کؤینه‌یین کیمی، شالوارین دا چیخار اَینیندن، 
روسوای اولارسان.

گونش یئر مدارینی چئینه‌دیکجه، نفَسی اییله‌نیر،
قووّه‌یه مینه‌رک اینسانلاری مینیب-چاپان تخمین.
«دونیامیزی محو ائدیر آتموسفئره بوراخیلان گازلار»
حالبوکی، دؤورانیمیزدان اؤنجه، غازلار روما'نی خیلاص ائتمیشدی.
او واخت دونیا یاشیل ایدی.
و بلکه ده،
مارس شوکالادینین شیرینلیگی ایدی، آجی دونیامیزدان قوپوب مارسدا حیات آختارماغیمیزین سببی.

سالامون معبدی دومینو داشلاری تک اوچولاندا،
میناره‌لر کؤکه‌لیب بولودلارا سانجیلاندا،
موزدلو راهیبه‌لرین باکیره‌لیگی آچیلاندا،
سما گزه‌گنینی گؤندریب پیچیلدادی:
«باشینا داش دوشسون، جناب یئر کوره‌سی!»
دونیا آغزینا سو آلیب اوتوردوقجا،
آفریقادا سوسوزلوق حؤکم سورور.
ترافیک چیراغینین یاشیلینی گؤزله‌مه‌دن دئییرلر  گونش دوغاجاق.
هامی غریبه بیر تلاشدا،
هامی خسته اوتاغینین اؤنونده گؤزلَمه‌ده،
حکیمین سون سؤزو ایسه آرتیق بللی‌دیر:
«روشئیم² تلف اولدو».
آرتیق «آزادلیق» هئیکلی ده الینی گؤیه قالدیریب تسلیم اولوب،
«آتش آچمایین، من سیلاحسیزام!» دئیَرجه‌سینه.
بو دونیادا قانون «قان» و «-ون» سنتئزینین خمیریندن بیشیریلن آجی چؤرک،
حاکیمیّتین منصبی خالقدیر
آنا یاسادا مادّه‌لر روحدان ازل
گؤی بیلیمچیلیگینین آستاریندا تیکیش‌لر دینسیزدیر.
نوستراداموس³ سئحیرلی خالچادا ناماز قیلدیقجا،
آتوم صدالاری کؤرپه قیغیلتیسینی پولسوز آلدیقجا،
فوکوشیما کوکورد توپوره‌جک دونیایا گونش اؤلکه‌سیندن.
گؤی آداسیندا ان بؤیوک اولدوز هالیووددیر.
«عدالت» آدلی گزه‌کن آختاران اوزای گمیمیز آیسبئرگه دوغرو ایناملا ایلرله‌ییر،
هر کس سوکون'دادیر،
واتیکان سوسور،
یونیسئف ده سوسور،
اوچوروما گئدیریک،
رادیودالغالار قایالارا دَییب خیشیلداییر:
«دانیشیر یئر کوره‌سی،
دانیشیر یئر کوره‌سی
سوکانی⁴ بئله ساخلایین!»

#آقشین_ائورن
¹- یئر کوره‌سینین ایکی قوطبونو بیر-بیرینه یاپیشدیران خیالی خط، نصف‌النّهار
²- نوطفه، جنین
³- فرانسه‌لی گؤی بیلیمچیسی
⁴- یؤنَلتج، سُکّان
#شعر_اوجاغی
@SheirOcagi

▫️ان یاخشی بؤلومو بوراسی‌‌یدی: پرده‌لری ائندیردیم، قاپینین زنگینی کؤهنه بیر قوماشلا اؤرتدوم، تئلفونو بوز دولابینا قویدوم، تام اوچ-دؤرد گونو یاتاقدا کئچیرتدیم.
هامیسیندان یاخشیسی دا بو ایدی: اصلا کیمسه منه داریخمادی.

#چارلز_بوکووسکی
#شعر_اوجاغی
@SheirOcagi

▫️عشقین خاطیرینه، سؤیله‌ منه!
اوره‌ییمده آلیشان،
گوجومو یوخ ائدن،
اختیاریمی الیمدن آلان او آلووون آدی نه‌دیر؟

#جبران_خلیل_جبران
#شعر_اوجاغی
@SheirOcagi