▫️شرابسيز اولا بيلمز خومار اوچون چاره،
نه ده فلک‌زده بير زخم‌كار اوچون چاره.

گئدنده سن، نئجه قالسين قرار كؤنلومده؟
قرارسيزلارا يوخدور قرار اوچون چاره.

اگر مقصّری زنجيره چكسه‌لر، يئری وار،
نه‌دير او زولفه اويان بير شكار اوچون چاره؟!

مسيحدن سوروشارديم گؤرنده: سؤيله نه‌دير،
پری‌لر عاشقی بير ناله‌كار اوچون چاره؟

جنون الی ياخامين تيكمه‌ميش جيريقلارينی،
نه‌دير بو قارشی گلن نوبهار اوچون چاره؟

دورولماسام، منه آئينه‌تک دوزون سؤيله،
نه‌دير بو قلبيمه چؤكموش غبار اوچون چاره؟

وئرَرسه جانينی «خاقانی»، يادا سالماز يار،
نه‌دير، الهی، او بی‌اعتبار اوچون چاره؟!

#خاقانی_شیروانی
#شعر_اوجاغی
@SheirOcagi

▫️بو ایت نه‌دن هورور گؤرن؟
بالالاری یان دوشوب‌مو؟
قوردلارین یاتان واختیندا،
جانینا ویغان دوشوب‌مو؟

سومسونن ایته اولاییر،
کئف‌لنن آت'ا اولاییر،
گاه یاتا-یاتا اولاییر،
بئیینینه قان دوشوب‌مو؟

اولاییر بلکه اوچماغا،
اوتانیرمی ال آچماغا؟
باش گؤتوروب او قاچماغا
هئیدن‌می، حالدان دوشوب‌مو؟

جانیندا اوشوتمه نه‌دیر،
بئله سیزلادیر، اینله‌دیر؟
باشینی ایتیریب گئدیر،
یولونا دومان دوشوب‌مو؟

#عبدالله_یالچین
#شعر_اوجاغی
@SheirOcagi

«پیرایه» اوچون یازیلمیش شعرلر 24

▫️ساخسی‌لاردا هله تک-توک قرنفیل تاپیلیرسا دا،
چؤلده تارلالار، پاییز دینلَنمه‌سینه بوراخیلدی چوخدان.
توخوم ساچیلیر،
و زیتون، توپلانماقدا.
بیر یاندان قیشا گیریلمکده،
بیر یاندان باهار شیتیل‌لرینه یئر آچیلیر.
من‌سه حسرتین‌له دولو،
و بؤیوک یولجولوق‌لارین صبیرسیزلیگی‌یله یوکلو،
یاتیرام دمیرلی بیر یوک گمیسی کیمی «بورسا»دا.

#ناظیم_حیکمت
#شعر_اوجاغی
@SheirOcagi

▫️هر شئیدن چوخ، بوتون روحومو گؤزلریمده یئرلشدیریب سونسوزادک، اؤلنه‌ قدر سنی سئیر ائتمک ایسته‌ییر‌دیم.

📚 عشقه خطاب
#آلبر_کامو
#شعر_اوجاغی
@SheirOcagi

▫️من سئحیربازلیقدا، ایپین اوستونده یئریمیشم و بو ایشین نه قدر چتین اولدوغونو بیلیرم. آما جورأتله دئییرم: آدام اولوب دا یئر اوستونده یئریمک، بوندان دا چتین‌دیر.

#چارلی_چاپلین
#شعر_اوجاغی
@SheirOcagi

▫️کیم دئییب‌سه دوز دئییب،
یاشا اعتبار یوخدو.
سؤیکندیگین قایایا،
داشا اعتبار یوخدو.

نه جنگ ائیله، نه قاپیش!
یوز حیله وار، یوز پاپیش.
آیاغیندان برک یاپیش!
باشا اعتبار یوخدو.

نه دؤزوم، نه تپر وئر،
بیر جوت اوچماغا پر وئر،
اؤلسم، منه خبر وئر!
هوشا اعتبار یوخدو.

#رامیز_قوسارچایلی
#شعر_اوجاغی
@SheirOcagi

🔹تحکییه ادبی درنه‌یی(441-جی جلسه)
🔹حئکایه: قیرمیزی باراما– کوبو آبئ
🔹ژاپون نثری
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 21 آذرماه 1402
🔹ساعت:17-19:30
@tahkie
Butajournal.com
#ادبییات #آذربایجان_تورکجه_سی #داستان #مودئرن_نثر #تحکییه #اورمو #کوبو_آبئ #ژاپون_نثری #حئکایه

▫️منجه آرتیق سنین گؤزلرینی یاواش-یاواش حیاتا آچماغین واختی‌دیر. منه ائله گلیر کی، هردن سن حیاتی اؤزون ایسته‌دیگین آخارا سالماق اوچون چوخ چالیشیرسان.‌..
بیر گون گؤزونو روحی خسته‌خانادا آچماق ایسته‌میرسن‌سه، اوره‌یینی آچ و ووجودونو حیاتین آخینینا بوراخ!

📚 نروژ مئشه‌سی
#هاروکی_موراکامی
#شعر_اوجاغی
@SheirOcagi

▫️آذر، آزربایجانین آیی‌دیر!

آذر، آزربایجانین آیی‌دیر، میلّی حوکومتین دوغولوش و داغیلیشی...دوکتور زهتابی‌نین دوغوم و اؤلومو بو آیدادیر.
حبیب ساهیر تراژدی‌لرینین چوخونو آذر آییندا قوشدو و ائله بو آیدا دا دونیاسینی دَییشدی.
آذر...رشید بهبودوف‌، رضا براهنی‌ و محمدحسین مبیّن‌ین دوغوم آیی... غلامحسین ساعدی، جبّار باغچه‌بان، حسن‌بَی زردابی، حیدر علی‌یئو و میرزه‌حسن رشدیّه‌نین اؤلوم آیی‌دیر.
آزربایجانین میلّی مجلیسی، تورکجه درسلیک کیتابلارینی تصویب ائتدییی گون، هم ده شهرلر مئیدانلاریندا تورکجه کیتابلارین یاندیریلماق گونو بو آیدا‌دیر.
آذر، بیزیم کیملیک، دیریلیش هم ده سوی‌قیریم‌ آییمیز‌دیر.

#شعر_اوجاغی
@SheirOcagi

▫️قالدی.

بیر گول اکدیم، آچیلمامیش دردیلر،
زحمتیمدن منه بیر تیکان قالدی.
امک چکدیم، گون کئچیرتدیم، گول اکدیم،
امه‌ییمدن سولغون بیر فیدان قالدی.

نه یازیم یاز، نه ده گونوم گون اولدو،
کؤنلومون چیچه‌یی آچمادان سولدو.
قانادیمی بیر اوغورسوز ال یولدو،
یئرینده بیر دامجی قورو قان قالدی.

سؤیله‌دیگیم بوش سؤز، تؤکدویوم قان-یاش،
حاقّیما -کیم ایسن- ال وورما، یاواش!
یاواش کی، دردیمه آغلایان قارداش
یئرینده، آرخامدا بیر دوشمان قالدی.

یارالاندیم، سارمادیلار یارامی،
یاس گونونه دؤندردیلر بایرامی.
الیمدن آلدیلار سون بیر چارامی،
اثری روحومدا بیر فغان قالدی.

#احمد_جاواد
#شعر_اوجاغی
@SheirOcagi

«پیرایه» اوچون یازیلمیش شعرلر 25

▫️آغاجلار چؤلده سون بیر غئیرتله پیریلداماقدا:
پول-پول، قیزیل، میس، تونج و تاختا...
اؤکوزلرین آیاقلاری یاش تورپاغا گؤمولور یوموشاجیق.
و داغلار قورغوشون‌ رنگینده دومانا باتیق، یام‌یاش.

تامام،
سون‌باهار بلکه بوگون بیتدی آرتیق.
چؤل قازلاری سورعتله گلیب کئچدی آز اؤنجه؛
بؤیوک احتمال‌لا،
«ایزنیک گؤلو»نه گئدیرلر.

هاوادا سرین،
هاوادا هیس قوخوسو کیمی بیر شئی:
هاوادا قار قوخوسو وار...
ایندی دیشاریدا اولماق،
داغلارا دوغرو، آتی دورد نالا سورمک.
- «آتا مینمه‌سینی ده بیلمزسن» دئیه‌جکسن؛
آما،
ظارافاتی بوراخ و قیسقانما!
یئنی بیر آلیشقانلیق تاپمیشام حبسده:
سنی سئودیگیم قدر دئییلسه ده،
همن، همن اونا یاخین سئویرم طبیعتی...
و ایکینیز ده اوزاقداسینیز...

#ناظیم_حیکمت
#شعر_اوجاغی
@SheirOcagi

▫️اؤزومله دانیشارکن بئله، اونون خوشونا گلمه‌یه چالیشیردیم.

📚 تهلوکی اویونلار
#اوغوز_آتای
#شعر_اوجاغی
@SheirOcagi

▫️توپلومون قوراللاری‌یلا یاشاییب دورومو عادی کیمی گؤسترمک، تاپدالانمیش بیر جادّه و یئریمک اوچون قولای بیر یول‌دور. آما بئله بیر یولدا، هئچ بیر گول گؤیرمز.

#ونسان_ونگوگ
#شعر_اوجاغی
@SheirOcagi

▫️بیر یالانمیش اوّلیم،
سونومدان چیخمیشام من.
اؤز اوروام‌*دی، اؤز الیم،
اونومدان چیخمیشام من.

نه باغیر، نه باغری یار!
زاوال چوخموش دوغرویا.
جان آغرییا-آغرییا،
جانیمدان چیخمیشام من.

باخت دؤیور، باخیر اینسان،
ایچینه یاغیر اینسان،
قانیندان آخیر اینسان،
قانیمدان چیخمیشام من.

#رامیز_قوسارچایلی
* خمیری کونده‌له‌یرکن و یا یایارکن اله یاپیشماماسی اوچون اوستونه سپیلن آز اون(Urva)
#شعر_اوجاغی
@SheirOcagi

▫️من باغیشلامیشام؛ سیز ده ایسته‌سه‌نیز باغیشلایا بیلرسینیز.
آدام یئر کوره‌سی دئییل کی، بو قدر آجیلیغین یوکونو اوموزونا چکه بیله.

📚 نیمه تاریک ماه
#هوشنگ_گلشیری
#شعر_اوجاغی
@SheirOcagi

دیالوق

▫️- دیَرلی بیر شئیی آتماغا گوجو اولمایان آداملار، هئچ واخت بیر شئیی دَییشدیرمه‌یه اومید ائده بیلمزلر.

📺 Attack on Titan انیمه
2013- 2023 ژاپن
#شعر_اوجاغی
@SheirOcagi

‍ ▫️سببی سنسن.

دئییرسن: اؤزونو یامان سئوَنسن،
دئییرم: بونون دا سببی سنسن.

اؤزومو سئومزدیم؛ هله عکسینه،
بیر زامان اؤزومدن بئزیب اوساندیم.
ائله کی اورَکدن باغلاندیم سنه،
اؤزوم اؤز گؤزومده دیَر قازاندیم.

اؤزومو سئومکده بورجلویام سنه،
سئوگی بیر سیردیر کی من اونا تسلیم.
باشقا بیرینی یوخ، من دؤنه-دؤنه
سنی سئودیگیمدن اؤزومو سئودیم.

#بختیار_واهابزاده
#شعر_اوجاغی
🎙 سالار موغانی
@SheirOcagi

▫️اینسان حدّیندن آرتیق آجی چکسه، دورومو کومئدیایا یاخینلاشار و ان اوزوجو شئیلره بئله گوله بیلر.

📚 فساد چایی
#ماساجی_ایشیکاوا
#شعر_اوجاغی
@SheirOcagi

▫️دان اولدوزو

بو قارانلیق گئجه نه قدر سوردو!
یئتیش ایمدادیما، ائی دان اولدوزو!
باری سن گل، منه یوخو گلمه‌دی،
یئتیش فریادیما، ائی دان اولدوزو!

قودورغان قاسیرغا، چارپاشیق یوللار،
یولومدا ظولمت وار، اوچوروملار وار.
یئتیش کی، عؤمرومون کاروانی آغلار،
آمان، گل دادیما، ائی دان اولدوزو!

بو سؤنوک اولدوزلار منی آلدادیر،
سوزگون گؤزلرین‌له گل «اونو» آندیر!
گؤزلریم یولوندا، اوزوم حاقدادیر،
آمان، سن «یوخ» دئمه، ائی دان اولدوزو!

#احمد_جاواد
#شعر_اوجاغی
@SheirOcagi

▫️حیاتدا هئچ بیر سهو یوخدور، یالنیز درس وار.
اولومسوز تجروبه‌دن یاخشی هئچ نه یوخدور. بو حالدا، یئنی ایمکانلار آختاریلیر. موباریزه‌دن دوغور گوج. حتّی آغری دا ان یاخشی موعلّیم اولا بیلر.

📚 فئراریسینی ساتان راهیب
#رابین_شارما
#شعر_اوجاغی
@SheirOcagi

▫️اینسان نه ائدرسه ائتسین، اؤزونه ائدر.

📚 اؤلو جانلار
#نیکولای_گوگول
#شعر_اوجاغی
@SheirOcagi