▫️کؤچ

دور آیاغا گئدک، بیز گئتمه‌لی‌ییک!
قورخا-قورخا یاشام، اؤلومدن پیس‌دیر.
چکینه-چکینه نفس چکمکدن،
ایچیمین هاواسی دوماندیر، سیس‌دیر.

سیزلری بیلمیرم؛ منه ال وئرمز،
بئله بیر حیاتی قوسماغیم گلیر.
قیسیلا-قیسیلا یاشاماق نه‌دیر؟!
اؤلومو باغریما باسماغیم گلیر.

ایچیمده بیر قوش وار، آدی «جان قوشو»
گؤیلرین هاواسین، ایچمک ایسته‌ییر.
کؤچری بیر قوشدور، قفسه سیغمیر،
اوره‌یی سیخیلیب، کؤچمک ایسته‌ییر.

گئجه‌دن یورولوب؛ مین‌بیر گئجه‌دیر
داریخیر، هارایلیر، گونش چاغیریر.
سانکی بیر آنادیر، اوغول‌سوز قالیب،
یارالی-یارالی نیسگیل باغیریر.

دور آیاغا گئدک، بیز گئتمه‌لی‌ییک!
قاتار-قاتار دورنا بیزی گؤزله‌ییر.
بیر یارالی گؤل وار، یانیر اوره‌یی،
آرازا بند اولان کورو اؤزله‌ییر.

بیلیرم بو گونلر من اؤله‌جه‌یم،
کابوسلار یوخودا بوغاجاق منی.
مین گئجه، مین گوندوز کئچندن سونرا،
دنیزلر یئنیدن دوغاجاق منی.

#میرحسین_دلداربناب
@SheirOcagi

▫️بیزی آرتیق اوشاقلیقدان اهلی‌لشدیریبلر‌، بالا!
سن اوّل مکتبده اوخومالیسان، سونرا اونیورسیته‌ده. اونیورسیته‌نی بیتیرن کیمی عسگرلیگه گئده‌جکسن. قاییداندا ایشله‌مه‌یه باشلایاجاقسان. او ایللر نیشانلانارسان.‌ بیر آز ایمکان تاپان کیمی ائولنه‌جکسن. ایلک ایکی ایلده اوشاغین اولاجاق. سونرا اوشاق بؤیویه‌جک. اونو مکتبه قویاجاقسینیز. سونرا اوشاقلارینیز ائولنه‌جک، سن نوه‌نله اوینایاجاقسان. قوجالاندا دا کی ورَمدن، شکردن بیر خسته‌لیک تاپیب اؤله‌جکسن.
عیار بودور، حیات استانداری. هر شئی بو جور اولمالی‌دیر.

📚A
#قاراقان
#شعر_اوجاغی
@SheirOcagi

▫️آزربایجان تورپاغی‌یام.

بو دونیا شیطان اوشاغی،
خان آرازدی اویونجاغی.
او یانین بیر یانی یاغی،
بو یانین دا بیر یانی وار.

اوره‌ییم بیر قیر تییانی،
آلتدان یانیر، اوستدن یانیر.
بو دونیادا هر زیانین،
موسَلماندان قوربانی وار.

دوست یولوندا نور باغی‌یام،
یاد الینده تور باغی‌یام.
آزربایجان تورپاغی‌یام،
اوستومده شهید قانی وار.

#رامیز_قوسارچایلی
#شعر_اوجاغی
@SheieOcagi

دیالوق

▫️گؤی‌قورشاغینی گؤرمک ایسته‌ییرسن‌سه، یاغیشا دؤزمه‌لیسن!

🎬 The Fault in Our Stars
2014 آمریکا
#جاش_بون
#شعر_اوجاغی
@SheirOcagi

▫️اینسان همیشه بیر شئیدن واز کئچمه‌یه مجبوردور، باشقا اینسانلار حیاتلارینی یاشایا بیلسین دئیه.

#کارلوس_فوئنتس
#شعر_اوجاغی
@SheirOcagi

▫️اینانمیرام.

یازیرسان کی: «دردیمدن-
اؤلورسن»- اینانمیرام.
تزه شکیللرینده
هؤنکوروب گؤزلرینی
سیلیرسن- اینانمیرام.

آخیدیب سئللرینی،
تؤکورسن دیللرینی.
هئی... اوزونه-دیزینه
چیرپیرسان اللرینی.
یادیما سالیب هر آن
آجی عمل‌لرینی،
بیلیرسن- اینانمیرام.

ایناندیم هر سؤزونه،
آلیشدیم هر کؤزونه.
وئردیگین عذابلارین،
دؤزموشم هر اوزونه.
دویسام دا دلی اولوب
سنین اؤزون-اؤزونه
گولورسن- اینانمیرام.

آخشاملار ارکن دوشور،
ایستی مندن گئن دوشور.
حیَطدن سسین گلیر،
ائیوانا کؤلگه‌ن دوشور.
بئزیب یالانلاریندان
حسرت منی اوشودور،
گلیرسن- اینانمیرام.

#واحید_عزیز
#شعر_اوجاغی
@SheirOcagi

▫️پارک فیلمی(۱۹۸۳)

رئژیسسور(کارگردان): #راسیم_اوجاق‌اوو


بو فیلمین سئناری‌سی، رستم ابراهیم بی‌ اووون یازدیغی «پارک» رومانیندان آلینیب.

@SheirOcagi

▫️اؤزسایغی'نین اؤنَمی، ساده‌جه بیزه یاخشی حیسّ وئرمکده دئییل.
اؤزسایغی، بیزه داها یاخشی یاشاماق اوچون فورصت یارادیر.

#ناتانیل_براندن (پسیخولوژیست)
#شعر_اوجاغی
@SheirOcagi

▫️دیلیمیز

باخاق دیلیمیزه؛ نه‌لر گؤرونور؟!
اوخویوب آنلاماق، یازماقدان گوجدور.
یازان دوشونمه‌دن یازسا دا بئله،
اوخوجو بئش-اون گون گرک دوشونه:
کی، آنلاسین بو سؤز عرب‌می، فارس‌می؟
او کی قالدی معنا...آنلایان هانی؟
چوخلاری آنلاماز میلّتدن، آیدین
بیرجه پارچاسینی شاعیر یازانین.

گون اولدو شاعیرلر گؤیه چیخدیلار،
بو یازیق میلّته اوردان باخدیلار.
«اود» ائتمه‌دی، یاغدی «آتش» باشینا،
«سیاه» قونداردیلار «قارا» قاشینا.
آلینیر «دیل»لری، «زبان» وئریلیر،
ایسمارلانیب «باران»، «یاغمور» کسیلیر.
«آغ»لاری «بیاض»ا، «ساری»سی «زرد»ه
دؤندو. جان دایانماز بو آغیر درده.

دَییشدی هر شئیی، «بوم» اولدو «بایقوش»،
«البسه» گئییلدی، «پالتار» قالدی بوش.
«دوزلوک»ون یئرینه بیر «استقامت»-
گؤره‌رک، یئمه‌لی ظنّ ائتدی میلّت.
چالیندی «قارداش»ی، گلدی «برادر»،
«باجی»نین یئرینده «همشیره» گزر.

نه‌دیر بو قیامت، نه ایشده‌سینیز
ائی بیزیم قوجامان ادیب‌لریمیز؟!
یاخاسیندان توتوب بو «ائل اوغلو»نو،
فارس ایله عربین بیر «هموطن»ی-
شکلینه سوخدونوز. باخینیز! سونرا،
اوخوناجاق لعنت بئله یازانا.

#احمد_جاواد
#شعر_اوجاغی
@SheirOcagi

▫️نه یاخشی کی، اینسانلار هر شئیه اؤیره‌شه بیلیر. یوخسا اونلارین یاریدان چوخو عاغلینی ایتیرردی.

📚 بیر میلیون دولاریم اولسایدی.
#قاراقان
#شعر_اوجاغی
@SheirOcagi

▫️«پیرایه» اوچون یازیلمیش شعرلر 23

ایلک گؤز-گؤزه گلدیگیمیز گونکی البیسه‌نی چیخارت صاندیقدان،
گئیین، کچئین!
بنزه باهار آغاجلارینا!
حبسدن، مکتوبون ایچینده یوللادیغیم قرنفیلی تاخ ساچلارینا!
قالخیز اؤپمه‌لی، چیزگی‌لرله قیریشیق، بیاض، گئنیش آلنینی!
بؤیله بیر گونده چؤکموش و کدرلی دئییل...
-نه موناسیبت؟!-
بؤیله بیر گونده بیر عوصیان بایراغی کیمی گؤزل اولمالی،
ناظیم حیکمتین قادینی!

#ناظیم_حیکمت
#شعر_اوجاغی
@SheirOcagi

▫️نئچون یابانجی‌یام من بو وارلیغا؟
فیکریمده، حیسّیمده بو نه سوکوت‌دور؟
ایچَریم بنزه‌ییر بیر مزارلیغا،
گئجه‌لر آیازدیر، گوندوز بولوددور.

نئچون هر سئوینجدن، هر اختلاطدان،
اوزاغام قارانلیق بیر بوجاق کیمی؟
اوزولموش کیمی‌یم من بو حیاتدان،
قیریلان، یارالی بیر بوداق کیمی.

منیم یولداشلاریم بیرَر کوماندان،
هپسی قاباق‌دادیر، هپسی اؤنده‌دیر.
بو درین حیاتی دویوب قاناندان،
منیم‌سه حیاتیم یامان گونده‌دیر.

#میکاییل_موشفیق
#شعر_اوجاغی
@SheirOcagi

▫️وئردیگین هر قرار، اؤزونو تانیماغا، باشا دوشمه‌یه یاردیم ائده‌جک.
دونیانی حرکته گتیر، اؤز دونیانی!

📚 بلکه ده بو حقیقت‌دیر.
#مارک_لئوی
#شعر_اوجاغی
@SheirOcagi

▫️قوتسال «پتروس»، هر کسدن جنّته گیرَرکن سوروشور: «سنده هئچ بیر یارا ایزی یوخ‌مو؟»
آداملارین چوخو فخرله «یوخ! دوزون ایسته‌سن، یوخدور.» دئیه جاواب وئریر.
پتروس «نییه یوخدور؟ حیاتیندا ساواشماغا دیَن هئچ بیر شئی اولمادی‌می؟» دئیه سوروشور...

📚 فرندز
#متیو_پری
#شعر_اوجاغی
@SheirOcagi

▫️قاچماق فلكدن ايندی نه مومكون؟! كمان چكير.
دونيا خارابلاشير، هامی اوندان «امان!» چكير.

اولما فلک‌له دوست! دئييل خوش طبيعتی،
ترک ائت جهانی! بوردا قالان «الامان!» چكير.

دونيا بزَكلی بیر ايلانا اوخشايير كی او،
اوزدن گؤزل‌دير، عالم ايچيندن زيان چكير.

اهريمن اولدو جمله ملک‌لر زمانه‌ده،
اؤز دردينه قال! اؤزگه آياقدان يامان چكير!

يئددی فلک‌له آلتی جهت هئچ دَیيشمه‌ميش،
عالم بيزی دَيیشديره‌رک امتحان چكير.

زنجيرله‌ميش فلک يئری؛ اولدوزلاری اونون-
اولموش مينیک آتی، گئجه-گوندوز عنان چكير.

«خاقانی»، آغلاما! كی سنين آه و شيوَنين،
دهرين سازيندا نغمه يئرينه فغان چكير.

#خاقانی_شیروانی
#شعر_اوجاغی
@SheirOcagi

دیالوق

▫️- بیلیرسن گئرچکدن قوجالماغا باشلادیغین زامانی، نه تهر آنلاماق اولار؟
+ نه تهر؟
- کیمسه سنین یانیندا «اؤلوم» کلمه‌سینی ایشلتمیر داها.

🎬 Kalvary
2014 ایرلند
#جان_مایکل_مک‌دونا
#شعر_اوجاغی
@SheirOcagi

▫️آما گؤزلرین گؤزل‌دیر،
دلی‌دیر، وحشی‌دیر،
اود توتموش بیر مئشه‌دن فیرلایان
بیر حئیوان کیمی.

#چارلز_بوکوفسکی
#شعر_اوجاغی
@SheirOcagi

▫️قوشلارا

یاواش اوچون، نازلی قوشلار!
سیزه منیم بیر سؤزوم وار:
دویدونوزسا بو یئرلردن،
کیمه قالدی بو یووالار؟

سیز ده بلکه اینسان کیمی
بوراخدینیز یووالاردا،
او گول‌اوزلو بالانیزی.
یوخسا نه وار هاوالاردا؟

آمان، قوشلار! من یانیلدیم،
سیزده اورک نور پارچاسی،
بیزده موردار ییغینیر، او
محبّتین کربلاسی.

سیزده هئچ بیر بابا یاپماز
بئله مودهیش جینایتی.
بیزیم‌ کیمی سیزده یوخدور
آنالارین خیانتی.

گئدین قوشلار، گئدین! آللاه-
یاخشی یوللار وئرسین، گئدین!
سیز کیمسه‌دن اینجیمه‌یین
کیمسه سیزدن اینجیمه‌سین!

آمان، قوشلار! بیلمم نه وار
بو مزارلیق عالمینده؟
روحوم آیدین بیر ایز آرار،
بو قارانلیق چؤل ایچینده.

وارسا سیزده آرتیق قاناد،
آللاه اوچون وئرین منه!
من ده سیزسیز غریب‌سه‌دیم،
اوچماق ایستر روحوم داها.

هئچ اولماسا، اونو آلین-
-چوخ یازیق‌دیر- یانینیزا!
نازلی قوشلار! سیغینمیشام
آدینیزا، شانینیزا.

#احمد_جاواد
#شعر_اوجاغی
@SheirOcagi

▫️بیر ایل کئچیر،
باشقا بیر ایل گلیر؛
و هر شئی سنده
داها دا بترلشیر، وطنیم!

#محمود_درویش
#شعر_اوجاغی
@SheirOcagi

▫️دینجَلمیشم،
پاییزدا
بوتون یارپاقلارینی کولک آپاران
بیر آغاج کیمی.

#رضا_کاظمی
#شعر_اوجاغی
@SheirOcagi

▫️من اؤزوم اؤلمه‌دیم، تانریم!
منی آبیرلا آغلاما!
قورد-قوشا یازیغین گلسین،
منی قبیرله آغلاما!

نه‌ییم وار کی او دا یانسین؟!
بولودوندا سو دایانسین.
ائله آغلا سو دا یانسین،
منی صبیرله آغلاما!

یئر دئمیرم، ایز دئمیرم،
وئردیگینه پیس دئمیرم،
سندن چؤپ ده ایسته‌میرم،
منی چادیرلا آغلاما!

#رامیز_قوسارچایلی
#شعر_اوجاغی
@SheirOcagi