▫️سئومه‌سه‌یدیم سنی من...

اینانمادین سؤزومه،
بیر گولمه‌دین اوزومه.
ایللر منی اوجالتدی،
ایللر منی قوجالتدی.
دئییرم اؤز-اؤزومه:
کئچردین‌می قلبیمدن،
سئومه‌سه‌یدیم سنی من؟!

باغدا چیچک درنده،
دوستا تؤحفه وئرنده،
هئی دوشورسن یادیما،
یانیرام اؤز اودوما.
بیر گؤزل گول گؤرنده،
کئچردین‌می قلبیمدن،
سئومه‌سه‌یدیم سنی من؟!

یایلاغا چیخاندا دا،
دوست الی سیخاندا دا،
یوللار چنه بورونور،
داغدان دومان سورونور.
بیر قیزا باخاندا دا،
کئچردین‌می قلبیمدن،
سئومه‌سه‌یدیم سنی من؟!

قوشلار قاناد چالاندا،
چؤله هارای سالاندا،
یئنه سنی آنیرام،
آندیقجا دا یانیرام.
کؤنلوم ایلهام آلاندا،
کئچردین‌می قلبیمدن،
سئومه‌سه‌یدیم سنی من؟!

گزیب چؤلو، چمنی،
ان گؤزل بیر نغمه‌نی،
دوروب دینله‌ینده من،
یادیما دوشورسن سن،
راحات قویمورسان منی.
کئچردین‌می قلبیمدن،
سئومه‌سه‌یدیم سنی من؟!

هر گون سؤکولنده دان،
اوغرون-اوغرون اوزاقدان،
گؤزلریمه باخیرسان،
اوره‌ییمه آخیرسان.
هر شعیر یازان زامان،
کئچردین‌می قلبیمدن،
سئومه‌سه‌یدیم سنی من،
سئومه‌سه‌یدیم سنی من؟!

#احمد_جاواد
#شعر_اوجاغی
@SheirOcagi

▫️اؤزونده، ووجودونون بیر بوجاغیندا، بیر آدام یاراتمالیسان؛
چتین گونلرده هئچ‌ بیر یئره، هئچ بیر اینسانا سیغینماغا احتیاجی اولمایان بیر آدام!

#غسان_کنفانی
#شعر_اوجاغی
@SheirOcagi

دیالوق

▫️- اینسان باغیشلاماغی باجارمالی‌دیر!
+ بو، دوروما باغلی‌دیر. باغیشلاماق هر زامان مومکون اولان شئی دئییل.

🎬 Delicatessen
1991 فرانسه
#ژان_پیر_ژونه & #مارک_کارو
#شعر_اوجاغی
@SheirOcagi

▫️بو گون منیم اوره‌ییم...

بو گون منیم اوره‌ییم،
دونیادا بیر دونیادی.
«مؤولانا»نی تاپان «شمس»دی.
«شمس»ی ایتیرن «مؤولانا»دی.
«حاجی بکتاش»ین سیغیندیغی گوشه‌دی،
درویشین درگاهدان آلدیغی نشه‌دی،
«یونوس»ون گزدیگی چؤلدو،
«مجنون»ون دولاشدیغی صحرادی،
«طاهیر»ین دوشدویو دریادی،
«کرم»ین پایینا دوشن کولدو،
«خان‌چوبان» آدیندا یانان کؤنولدو،
«کوراوغلو»نون چالدیغی سازدی نیگار خانیما،
دورنا تئلی گتیرن «ائیواز»دی،
«باغداد»دان گلن سسدی،
«تبریز»دن گلن نفَسدی،
«غریب»ی «تیفلیس»دن «حلب»ه گتیرن «خیدیر ایلیاس»ین آتیدی،
«واقیف»ین وورولدوغو گؤزل‌دی،
«ویدادی»نین دیلینده‌کی بایاتی‌دی،
«سارا»نی آپارات سئلدی،
قارشیدا بیر اوردودو،
آرخادا بیر ائل‌دی،
«فضولی»نین «شبِ هجران»یدی،
«شهریار»ین چاغلایان ایلهامی
آغرییان جانی‌دی.

بو گون منیم اوره‌ییم،
مین ایللرین باغریندان قوپان،
سازین یادداشینا هوپان،
اؤزونو «دده قورقود»دا تاپان،
دده‌سی «یونوس» کیمی
سینیق کؤنوللر یاپان
جانین ایچینده‌کی اورک‌دی،
اوره‌یین ایچینده‌کی جاندی.
آللاه عاشیقی،
پیغمبر وورغونو،
اینسان پروانه‌سی، «زلیمخان»دی.

#زلیمخان_یعقوب
#شعر_اوجاغی
@SheirOcagi

▫️بیر اینسانین تربیه‌سینی سیناماق اوچون، ان اویغون یئر داعوا آراسی‌دیر.

#جورج_برنارد_شاو
#شعر_اوجاغی
@SheirOcagi

▫️- اؤزونو اونون سیماسیندا گؤره بیله‌جه‌یین داها نئچه اینسان تانیییرسان؟
اینسانلار چوخ زامان، اومیدله، اؤزلرینه بنزر بیرینی آختاریرلار.

📚 فارنهایت 451
#ری_بردبری
#شعر_اوجاغی
@SheirOcagi

▫️یوللار منی ایزله‌ییر.

کلمه-کلمه دیلیم سوسوب داریخیر،
یارپاق-یارپاق باغدا پاییزلانیرام.
قورشون-قورشون دؤشوم دئشیک‌-دئشیک‌دیر،
اؤلوم-اؤلوم اؤلوب يالقيزلانيرام.

آددیم-آددیم قاندال آیاغیمدادیر،
سورگون-سورگون یوللار منی ایزله‌ییر.
دوستاق-دوستاق سؤزلر آغزیمدا قالیب،
بیتیک-بیتیک حسرت منی گؤزله‌ییر.

بایات-بایات قالیب بایاتی‌لاریم،
آغیت-آغیت آنام اورک داغلاییر.
بولود-بولود شیمشک چاخیر گؤزلريم،
دوزلو-دوزلو دنیز یارا آغلاییر.

باغچا-باغچا چیچک سولور ایچیمده،
اورمان-اورمان بالتا تؤکور قانیمی.
قارغا-قارغا گلین گئدیر گونلریم،
گئجه-گئجه ظولمت سیخیر جانیمی.

کئف‌سیز-کئف‌سیز قالیب دیلیم، دیله‌ییم،
شاختا-شاختا سویوق، قارا قیش گلیر.
وطن-وطن غوربت یاغیر باشیما،
قاتار-قاتار گؤیه قارانقوش گلیر.

#میرحسین_دلداربناب
@SheirOcagi

▫️اؤنجه‌دن هئچ واخت باشیما بئله بیر شئی گلمه‌ییب. ائله بیلیردیم کؤهنه یارالاریم حاقدا دانیشسام، اونلاری تزه‌له‌یه‌رم؛ بیردن اونلار گئرچک اولار.
آمّا عکسینه اولدو؛ گؤز یاشلاری یارالاریمی ساغالدیردی.

📚 جاسوس
#پائولو_کوئیلو
#شعر_اوجاغی
@SheirOcagi

▫️سن آغلاما!

من دئین یوخ، فلک دئین اولدوسا،
اسدی یئللر، گول یاناغین سولدوسا،
درد الیندن آلا گؤزلر دولدوسا،
سن آغلاما، من آغلاییم، گؤزلیم!

اوغوروندا اولموش ایکن سرسری،
من اؤپمه‌دن او قیویرجیق تئللری،
داغیتدی‌سا طبیعتین یئللری،
سن آغلاما، من آغلاییم، گؤزلیم!

هاردا سنین هر عاشیقه، هر گنجه-
عشق اوخویان قلبین؟ سؤنموش او، منجه.
تاپماییرسا قلبین آرتیق اَیلنجه،
سن آغلاما، من آغلاییم، گؤزلیم!

بیر غول ایدیم گئجه-گوندوز سیزلره،
یازیق!... منی گولدورمه‌دین بیر کره.
باخیب ایندی الینده‌کی ایزلره،
سن آغلاما، من آغلاییم، گؤزلیم!

من باخارکن سن ووردوغون یارایا،
ایندی ظالیم فلک گیردی آرایا.
باخ، خسته قلبیم‌له گلدیم هارایا؟!
سن آغلاما، من آغلاییم، گؤزلیم!

#احمد_جاواد
#شعر_اوجاغی
@SheirOcagi

دیالوق

▫️ساواشلار آرتیق دؤولتین دؤولته قارشی اولماسی دئییل، بیر اینسانین آیری اینسانا قارشی اولماسی‌دیر.

🎬 War Photographer
2001 سوئیس
#کریستین_فری
#شعر_اوجاغی
@SheirOcagi

▫️سئومیرم.

خوش ایدیم او یاشام یوخ اولدو گئتدی
اریدی اومید شام یوخ اولدو گئتدی
او قیز دا بیر آخشام یوخ اولدو گئتدی
داها بو دونیانی سئومیرم آللاه

آریلار دیدرگین، پته‌یی یوخدو
آللاهین توتماغا اته‌یی یوخدو
ظالیما بیر چیرتما کؤته‌یی یوخدو
داها بو دونیانی سئومیرم آللاه

بو ناغیل نه یامان کدرلی چیخدی
آتاسی ائوینده قیز ارلی چیخدی
آدامی ایلاندان زهرلی چیخدی
داها بو دونیانی سئومیرم آللاه

چوبان داغدا اؤلدو نئییی قالدی کی
قوش اؤلدو هاوادا اییی قالدی کی
سئومه‌یه دونیانین نه‌یی قالدی کی
داها بو دونیانی سئومیرم آللاه

بارماقلار نه‌دن‌سه ته‌تییه بازدی
گؤتوروب حیاتا اؤلومو یازدی
بو دونیا دلی‌دی، عاغلی دایازدی
داها بو دونیانی سئومیرم آللاه

#توحید_نامور (آدلیم) ۱۳۹۷
@SheirOcagi

▫️ان اوزوجو شئی، اینسانلارین اؤز حاقّینی آرزولاماغی‌دیر.

#جورج_اوروئل
#شعر_اوجاغی
@SheirOcagi

▫️یالنیزلیق دیشاریدان گلمز،
اینسانین ایچینده‌دیر.

#اؤزدمیر_آصاف
@SheirOcagi

▫️آداملارین چوخو اصلا یاخشی یاشامیرلار، اونلار ساده‌جه قوجالیرلار.

#چارلز_بوکووسکی
#شعر_اوجاغی
@SheirOcagi

▫️عاغلی باشدان آلان سس

چاغیر منی، گلیم سنه قوشولوم،
سحر-سحر شاه بوداقدا اؤتن قوش!
بولبولسن می، قومروسان‌می، قوشسان‌می،
زومزومه‌یله آخیب گئدن سوسان‌می؟
سسی قالخیب فلک‌لره یئتن قوش!

بیر آنلیغا کاش سولئیمان اولایدیم،
کلمه-کلمه آنلایایدیم دیلینی!
بیر بیله‌یدیم اوخویورسان نه‌دن، قوش!
سس دئییل کی، سسده روح‌دو اوخویان،
سنسن یئنه عاغلی باشدان آلانیم،
منم یئنه عاغلی باشدان گئدن، قوش!

#زلیمخان_یعقوب
#شعر_اوجاغی
@SheirOcagi

▫️قارا اینجی'نی سنین گؤزلرینده‌ تاپان
بوتون عاشیقلرین آدینا،
اوزونتولریم آدینا،
گئجه-گوندوز، یئر اوزونون هر بوجاغیندا آختاردیغیم
بوتون ووجودوم آدینا،
سنه مینّت‌دارام،
قادینیم!

#نزار_قبانی
#شعر_اوجاغی
@SheirOcagi

▫️بیر گون «نزار قبانی»نین قیزی اونا خیطاباً بئله دئییر: «سن منیم حیاتیمی برباد ائتدین، آتا! یولوما چیخان هر کیشینی سنله قیاس ائتدیم، گؤزومدن دوشدو.»

#شعر_اوجاغی
@SheirOcagi

دیالوق

▫️- اینسان دویغولاری، صنعت اثرلرینه بنزه‌ییر. ساختالاری حاضیرلانا بیلیر؛ بونلار، گئرچک اولان‌لا عئینی گؤرونه بیلر، آما ساختادیرلار.
هر شئیین ساختاسی حاضیرلانا بیلیر. سئوینجین، عذابین، نیفرتین، خسته‌لیگین، ساغلاملیغین، سئوگینین بئله.

🎬 La Migliore Offerta
2013 ایتالیا
#جوزپه_تورناتوره
#شعر_اوجاغی
@SheirOcagi

▫️نه ایشیم واردی؟!

آتام ایسته‌میشدی، آنام گتیردی،
منیم بو دونیادا نه ایشیم واردی؟!
عؤمروم واراقلاردا سطیر-سطیردی،
منیم بو دونیادا نه ایشیم واردی؟!

کیمی‌سه  تاملادی، یاری گؤندردی،
بیر باللی چیچه‌یه آری گؤندردی.
گلمه‌ییم یوخ ایدی، تانری گؤندردی،
منیم بو دونیادا نه ایشیم واردی؟!

تاپدی قیلیغیمین چمین کیمیسی،
حئیرانیم کیمیسی، قنیم کیمیسی.
بوردا آرتا بیلمز منیم کیمیسی،
منیم بو دونیادا نه ایشیم واردی؟!

وارمی بیر بختور اؤزوندن امین؟
قوی دوروم باشینا دولانیم همین!
یاوانلیق اولمادی دیشیمه منیم،
منیم بو دونیادا نه ایشیم واردی؟!

خبردار ائتمه‌دی منی بیر دویموش،
سن دئمه‌ بینادان تالان یورد'ویموش.
شیطان‌لار وطنی، جین‌لر یوردو'یموش،
منیم بو دونیادا نه ایشیم واردی؟!

بیر اوجا مقامدان ساللانیب گلدیم،
حاقدان باده آلدیم، حاللانیب گلدیم.
«علی‌اوسط!» حوسنونه آلدانیب گلدیم،
منیم بو دونیادا نه ایشیم واردی؟!

#علی‌اوسط_سالداش
#شعر_اوجاغی
@SheirOcagi

▫️وطن

قورولاندان سنین حیات اوجاغین،
ایگیدلر بسله‌ییب آنا قوجاغین.
تاریخین آچیرام هانسی واراغین،
یازیبلار آدینی قهرمان، وطن!

سینه‌نین اوستونده وار چوخلو یارا،
ایگیدلر آسیلیب یولوندا دارا.
بابکی چکدیلر باشقا دیارا،
سؤزوندن دؤنمه‌دی، وئردی جان، وطن!

اوجاغیندا یانان ایستی کؤزم من،
قیفیللی دیللره آچیق سؤزم من،
یولوندا آییغام، باخار گؤزم من،        
دایانمیشام سنه نیگهبان، وطن!

من سنین اوغلونام، سنی ساتمارام،
بیر دلی وورغونام، یادا قاتمارام،
اوره‌ییمدن سنی سیلیب آتمارام،
سن ده آتما منی هئچ زامان، وطن!

یاشیل گئیینیرسن باهار گلنده،
یاییلیر گول-چیچک، چؤلده، چمنده،
تانری بزک وئریر قوجا سهنده،
جنّته بنزه‌ییر ساوالان، وطن!

دولانیرام هر گون باشینا سنین،
گووه‌نیرم قوجا یاشینا سنین،
آدیمی یازیرام داشینا سنین،
قبریمین اوستونه قوی نیشان، وطن!

#جبار_محمودی (خیال)
@SheirOcagi

▫️داها چوخ بارماق ایسته‌ییرم،
هامیسی‌یلا سنی گؤسته‌ریب
«بو، منیم سئوگیلیم‌دیر» دئیه
باغیرماق اوچون.

#غادة_السمان
#شعر_اوجاغی
@SheirOcagi